رواية بنت إبليس الفصل الأول والثاني والثالث بقلم حياة محمد حصريه وجديده على مدونة أفكارنا

 رواية بنت إبليس الفصل الأول والثاني والثالث بقلم حياة محمد حصريه وجديده على مدونة أفكارنا 

الناس انواع وأصناف فيه إللى على نياته وفيه الخبيث فيه الأصيل وفيه الخسيس وفيه الطيب وفيه إبليس.

وإبليس مش بقرون وديل زى مانتوا متخيلين ده راجل عادى وآه من قلوب الناس لما تسود بيبقوا ألعن من الشياطين.

اسمه إيه ؟؟؟؟؟؟ تصدقوا نسيت يمكن خالد....لأ أظن على ...آه إفتكرت اسمه سيد بس الناس خلاص اتعودت تقول إبليس إبليس لحد ما كل الناس نسيت سيد وافتكرت بس إبليس ولما سألنا مين سماه بالإسم ده قالوا إن زمان من أكتر من عشرين سنه جه راجل غريب سأل عنه وبعدها سمع الناس الراجل بيبكى ويصرخ بأعلى صوته (( منك لله ربنا ينتقملى منك إلاهى تشوفها من أعز عيالك.ده إنت مش بنى أدم ده إنت إبليس أعوذ بالله منك يا إبليس ربنا ينتقم لى منك يا إبليس))

//.أما هو فى الحقيقة ألعن من إبليس أصله (( مُرابى))يعنى بيتاجر بالربا.ويسلف الناس بالربا. حتى شوفوا معايا.(( الاحدث سنه ٢٠٠٢))

سيد (إبليس): شوف يا عبدالله إنت عارف إن العيشه صعبه وأنا تاجر وتجارتى واخده كل فلوسى ومبلغ عشرة ألاف جنيه مبلغ كبير.

يتنحنح عبدالله بتوتر::عارف يا معلم بس أنا أملى فيك كبير إنت عارف البت هتخش الشهر الجاى ومحتاج أخلص جهازها وأسترها 

سيد (( إبليس)): وماله يا حبيبي ربنا يستر على ولايانا..بص أنا المبلغ ده مش متوفر معايا دلوقتي 

عبدالله بخوف: لا يا معلم ابوس إيدك. ده أنا معنديش غيرك أروح له.

لمعت عيون ابليس وقال 

وأنا ميرضنيش أرجعك مكسور الخاطر بص أنا هديك عشرة تلفزيونات جداد لانج بكرتونتهم ماشى تمن الواحد بسعر المصنع ألف جنيه يبقوا العشره بكام .

عبدالله: يبقوا العشره بعشرة ألاف جنيه.بس أنا هعمل ايه بالتلفزيونات أنا عايز فلوس

إبليس: ماهو إنت هتبيعهم وتاخد الفلوس 

عبدالله: وأبيعهم لمين.دول عشرة بحالهم.

إبليس: بعهم لقرايبك لجيرانك لزمايلك في الشغل يعنى مش هتغلب والناس مهتصدق تلاقى تلفزيون رخيص إحنا قلنا الواحد بكام؟

عبدالله: بألف جنيه 

إبليس ( سيد): لأ ده سعر المصنع لكن الناس هتشتري بسعر تانى خالص يعنى هنفترض إنك بعت الواحد بسعر ١٥٠٠جنيه يبقوا العشره بكام ؟

عبدالله: ب....استنه أحسب.

إبليس: مش محتاجه حساب يبقوا بخمستاشر ألف جنيه.فهنقسم المكسب بالعدل إنت التلت وأنا التلتين..يعنى يعنى هترد ليا العشر ألاف ١٣ألف جنيه

عبدالله: وهو ينفع أبيع الواحد بألف ونص.

إبليس: ده على الأقل ده إنت ممكن تبيع الواحد ب١٨٠٠ولو هتقسط ممكن تبيع الواحد ب٢٠٠٠أو٢٢٠٠ كمان.بس أنا هحاسبك على ألف ونص والزياده حلال عليك يعنى ممكن تكسب فوق العشر ألاف عشره كمان يعني ترد ليا فلوسى من المكسب.وتجوز بنتك من غير ما تتداين.(( لمعت عيون عبدالله بسذاجة وهو بيحلم بالمكسب الكبير إللى هيجي من بيع التلفزيونات أما ابليس فلمعت عنيه بمكر لأنه وقع الزبون الساذج بسهوله.))

إبليس: وعلى العموم تبيعهم بخمستاشر بعشرين إن شالله بخمسين أنا هاخد ال١٣ ألف بتوعى والباقي حلال عليك.قولت إيه؟

عبدالله: موافق يا معلم.هاخد التلفزيونات إمتى؟

ابليس: حالا بس الأول هتمضى لى على دول!

عبدالله: إيه دول؟

إبليس: دول عشرة شيكات كل شيك ب

عبدالله: بألف جنيه 

إبليس: ب٣٠٠٠جنيه يعنى هتمضى شيكات ب٣٠ألف جنيه 

عبدالله: كتير يا معلم

إبليس: كتير إنت شايفهم كتير ده أنا بقطع من قوتى وقوت بنتى عشان أديك فلوسك وتفك أزمتك يعنى بشيلها من بوء بنتى وباديهالك وتقولى كتير واضمن منين إنك هترجعلى حقى مش هتبيع وتكسب وأدى وش الضيف لازم أربطك بشيكات ومادمت هترجع لى فلوسى في معادك فأنت حبيبي وهتاخد شيكاتك وفوقهم بوسه لكن هتلاوع فانت عارف مش هسيب ولاشلن واحد من فلوسى قلت إيه.؟

عبدالله: خلاص يا معلم موافق وهمضى على الشيكات وربنا يعنى وأسددك.

ابليس: وماله طيب إيدك على عشرين جنيه.

عبدالله: ليه يا معلم؟

إبليس: اجرة الربع نقل إللى هتنقل لك التليفزيونات على بيتك ماأنا مش هدفعهملك من جيبى.

وبعد شويه دخل راجل ومراته المحل.إبنه وكل واحد شايل كرتونه كبيرة 

الست: خد يا معلم كراتينك ويا دار ما دخلك شر.

الراجل: استنى بس يا سعديه على ما أتفاهم معاه 

الست: مفيش تفاهم ياخد تلفزيوناته ويجيب لنا الشيكات بتاعتنا.

إبليس: حيلك حيلك إنت وهيا إنتوا هتغنوا وتردوا على بعض عايزين إيه منك ليها.

الراجل: شوف يا معلم احنا جايبين التلات تليفزيونات دى نرجعهم لك وعايزين الشيكات بتاعتنا

إبليس: جايب إيه يا حبيبي وأنا مالى أنا ليا فلوسى خد كراتينك واتكل على الله وقدامك لسه شهرين تكون جهزت ليا فلوسى 

سعديه بردح وصوت عالي: فلوس إيه يا أبو فلوس بقى يا نصاب تدينا خمس تليفزيونات الواحد بألف جنيه وأتاريهم فرز تانى الواحد بيتباع ب٤٠٠بسبب عيوب الصناعه.لأ وإتنين منهم مفيش فيهم الرجا. 

إبليس بهدوء: وأنا مالى شوفى يا ست إنتى أنا إديتكم بضاعة زى الفل ماليش دعوه بكلامك ده فإمشى من وشى.

سعديه: طيب أنا هطلع من هنا على القسم أكتب فيك بلاغ.

إبليس: وماله اهو القسم عندك أهو اكتبى إللى عايزاه ولما تزهقى من الكتابه إبقى اقرأى إللى كتبتيه يالا مع السلامه.

سعديه : ماشى واحنا بقى مش هنجيب لك فلوسك 

إبليس: براحتكم خالص اتوا قدامكم شهرين لو ما أخدتش قلوسى بعد شهرين ويوم هرفع على جوزك خمس قواضى بالخمس شيكات إللى ماضيهم .

الراجل بخوف: بس يا سعديه يا معلم خد دول تمن التلفزيونين إللى بعتهم ألف وستميت (( ستمائة)) جنيه والكراتين أهم خدهم وهات الشيكات بتاعتهم يا معلم 

إبليس: أخد إيه يا حيلتها إنت أخدت خمس تليفزيونات بخمس ألاف جنيه والمفروض ترجعهم ليا سبع ألاف جنيه جايب ليا ألف ونص أعمل بيهم ايه ؟ انا عايز فلوسى.

الراجل بإنكسار: إنت عارف إن.

إبليس: أنا معرفش غير تجيب ليا فلوسى 

الراجل: ده حرام دى سرقه.

ابليس: وأنا حرا* مى.

سعديه بإنكسار: ترضاها على نفسك تأكل بنتك من الحر*ام

إبليس: أرضاها ملكيش دعوه يالا خدوا كراتينكم وإطلعوا بره.

الراجل: منك لله يا شيخ حسبى الله ونعم الوكيل 

إبليس: اتحسبن من هنا لبكره 

خرجت سعديه وهيا بتعيط وجوزها وهو مكسور وسعديه بتقول:وتوجه كلامها للناس منك لله يا شيخ منك لله يا حرا*مى ده حرا*مى ده نصا*ب.ده ياكل مال النبى منك لله صدق من قال عليك إبليس 

وأكيد كل الناس بتتفرج عليها بس ماهتمتش أصل دى مش أول مره تقريبا اتعودوا 

إبليس: واد ياجلال.

جلال ؛: أيوه يا معلم 

ابليس: خد بالك من المحل أنا هروح أتغدى وأريح شويه والعصر أبقى ألف على بقية المحلات وزى ما فهمتك أى حد يجيب فلوس أيدها واكتب اسمه فى الأجندة ماشى 

جلال: ماشى يا معلم

&&&&&&&&&&&&&&&&&&&_

فى نفس الحاره بس بعيد شويه كان فيه خناقه والناس ملمومه والكل بيتفرج في البلكونات والشبابيك.

يوسف وهو بيضرب البوكس: بقى بتعاكس البنت يابن الكل*ب وأقولك إبعد عنها دى بنت حتتى.

الشاب: أديك قولتها بنت حتتك يعنى مش من باقية عيلتك.

يوسف: مادامت من حتتى تبقى من باقية عيلتى وإللى هيقرب منها أنسفه من على الأرض سامع.شايف ياكلب الحاره دى من أولها لأخرها لو بصيت لأي بنت فيها بصه كده ولا كده أخذق لك عنيك دى وده أول وأخر انذار لك يالا اخفى من هنا وزقه بقوه فوقع الشاب على الارض.والكل بيقول:(( يحميك لشبابك يا يوسف))((ربنا يكتر من امثالك)) (( تسلم الإيد إللى ربتك))(( ربنا يخليلك ابنك يا استاذ عبد الكريم))

عبد الكريم بفخر: شكرا ربنا يبارك لكم في أولادكم وتفرحوا بيهم وتشوفوهم زى يوسف إبنى.

كانت زينب بتتابع الخناقه من البلكونه وهى بتبتسم وتقول في سرها،: ربنا يحميك يا يوسف يا أجدع شاب في الحاره كلها.

فى نفس الوقت رفع يوسف عينيه فشافها في البلكونه فإبتسمت له لكنه بص لها بقرف وكشر وبعدها بص للناحيه التانيه.

زينب بنت جميله اوي عندها ١٧سنه في الثانوية العامة أخدت كل ملامح أمها وشها أبيض منور زى القمر ليله تمامه شعرها اسود طويل ناعم زى الحرير لحد خصرها ابتسامتها كلها جاذبيه وبراءه أما عينيها فدى الحاجه الوحيده إللى أخدتها من ابوها عيون سود واسعه ونظرتها حاده كلها مكر وخداع .

إبليس: بتتفرجى على إيه يا زينب.

زينب: ده الباشمهندس يوسف كان بيتخانق 

إبليس: سبع البرمبه كان بيتخانق تلاقيها نمره وهو عاملها عشان يرسم على البت.

زينب بزعل: لا يا بابا الباشمهندس يوسف مايعملش كده ده كله شهامه ده عنده اخلاق 

ابليس بسخرية: عنده شهامه عنده أخلاق بلا قرف أمال فين إخلاص إنت يا إخلاص 

بلعت زينب ريقها بتوتر وقالت: خالتى إخلاص روحت.

إبليس:بزعيق: إيه روحت ليه أوعى تكونى إنتى إللى خلتيها تروح.

زينب بخوف وتوتر: أصل يعنى...

صرخ فيها: أصل إيه ؟ ماتردى

زينب: أصل حرام يا بابا تشغلها خدامة عندنا.

إبليس بزعيق: حرمت عليكى عيشتك ليه مش هيا اللى مدفعتش إللى عليها.قال جايبه ليا شيخ الجامع.

زينب: الست عليها ألف ونص وشيخ الجامع لم لها ٩٠٠جنيه وجه استسمحك في الباقي 

إبليس: وأنا سامحتها وإتنازلت عن القضية 

زينب: اتنازلت مقابل تشغلها خدامه عندنا ست شهور.بدل ماتسامحها لوجه الله 

إبليس: نعم أسامح مين ليه فاتحها سبيل لازم أشغلها ولا كل واحد مايعرفش يدفع يجيبلى شيخ الجامع ويعيطلى شويه حاجه تغم يالا قومى فرغى لى الأكل عشان أطفح وأتخمد شويه.

زينب: حاضر 

على السفره كان بياكل باستمتاع: إنتى يا بت يا زينب عليكى نفس في الطبيخ إنما إيه.بس برضوا من بكره تخلى إخلاص هيا إللى تطبخ وتنضف البيت أنا عايزك تركزى في مذاكرتك عايزك تبقى شاطره عايزك تطلعى زى أبوكى ناصحه ومافيش حد يقدر يضحك عليكى 

قولى ليا في حد مضايقك في المدرسة ؟

بصت زينب في الأرض بإنكسار فصرخ فيها

ارفعي راسك وانت بتتكلمى معايا قولى مين؟

زينب: مفيش حد بس البنات بتعايرنى وبتقول يا....

إبليس: يا إيه يا بنت إبليس وإيه يعنى ده أنا ميفرقش معايا بالعكس عاجبنى الاسم بيخلى الناس بترتعش منى من قبل مايشوفونى مش زيك هبله زى أمك الله يرحمها كل ما حد يقول لها حاجه كانت تعيط زيك.

تمسح زينب دموعها وتقول: طيب أنا عايزه اروح عند خالتى 

ابليس: لأ تروحى عند خالتك لأ هيا لو عايزه تشوفك تيجى هيا لكن إنتى تروحى عندها لأ.

زينب: إنت عارف جوزها مانعها تيجى عندنا.

إبليس: أحسن عيله فقر مبيجيش من وراها إلا الهم قولت لك بطلى عياط أنا مش عايزك ضعيفه كل شويه تعيطى أنا عايزك زىى قلبك مي*ت وتنسفى كل إللى يدوس لك على طرف ومايصعبش عليكى حد إللى يصعب عليكى يفقرك فاهمانى يا زينب.

هزت زينب رأسها.كالعاده.

ابليس: اقعدى هزى راسك كده زى الحمار عمرك ما هتتعلمى طول ما انت هبله وبينضحك عليكى كده.

&&&&&&&&&&&&&&٥٥

تانى يوم في المدرسة كانت كل البنات بتضحك وتهزر ماعدا زينب قاعدة في أخر تخته لوحدها لأن الكل مقاطعها ومفيش أى حد بيكلمها حتى صاحبتها الوحيدة أمانى بتكلمها في السر وخايفه أى حد يشوفها ويقول لأهلها إنها بتكلم بنت إبليس.

دخل عليهم مدرس جديد 

الأستاذ: أنا اسمى أحمد مدرس الإنجليزي الجديد وقبل ما أبدأ في الشرح أحب أتعرف عليكوا فياريت كل واحده تقوم وتعرفنى بنفسها.

فبدأت كل بنت تقوم وتقول اسمها وقبل ما تتكلم زينب قامت بنت وقالت: يا استاذ يا استاذ عايزه أسألك سؤال هو إبليس لو عنده بنت يبقى اسمها إيه.

الأستاذ بعدم فهم: هو إبليس متجوز

البت: افرض إنه متجوز وكمان مخلف بنت تتوقع يكون اسمها إيه؟

فيبتسم الأستاذ ويقول مش عارف يمكن تكون جنيه ولا عفريته بنت إبليس.

فتقول البنت: منوره يا زينب

فتضحك كل البنات أما زينب فتنزل راسها وعيونها كلها دموع.

&&&&&&&&&&&&&&&&&&&&&

الثاني والثالث

&&&&&&&&&&&&&&&&&&&&&$الأستاذ بعدم فهم: هو إبليس متجوز

البت: افرض إنه متجوز وكمان مخلف بنت تتوقع يكون اسمها إيه؟

فيبتسم الأستاذ ويقول مش عارف يمكن تكون جنيه ولا عفريته بنت إبليس.

فتقول البنت: منوره يا زينب

فتضحك كل البنات أما زينب فتنزل راسها وعيونها كلها دموع.

الأستاذ أحمد: وإيه دخل زميلتك في سؤالك 

البنت: ماهى زينب تبقى بنت إبليس

الأستاذ بعدم فهم: يعنى إيه بنت إبليس 

البنت: يعنى أبوها إبليس....

استاذ أحمد بغضب: إنت بنت قليله أدب مش محترمه إزاى تنادى زميلتك بالإسم البشع ده

البنت بعياط: وأنا مالى الناس كلهم بي...

استاذ أحمد: أنا ماليش دعوه بالناس أنا سمعتك إنتى وده تحذير للكل إياك أسمع أى حد ينادى على زميلتكم بالاسم ده عيب عليكم إنتوا بعد كام شهر هتبقوا جامعيات إزاى تبقوا بالتخلف ده..المهم أنا هشرح لكم النهارده درس......

وبدأ يشرح والكل منصت بس ما بينهم واحده مش عارفه تمنع ابتسامتها .

بعد المدرسة 

ماشيه هى وصديقتها الوحيدة أمانى.

زينب بسعادة: شفتى شفتى شفتى يا أمانى إزاى سكتهم كلهم.إزى شخط فيهم.إزاى دافع عنى.

أمانى: بس يا خوفى يجى بكره يعاملك زى باقى المدرسين.

زينب: لا استاذ أحمد مش زيهم ده طيب ومؤدب وشكله مايعرفش بابا عشان كده استغرب من اسم إبليس 

أمانى: إيه النظام هتقلبى من يوسف وتحبى استاذ أحمد.

زينب: لأ يوسف مش ممكن أسيبه أبدا إنتى مش عارفه بحبه أد إيه ده أحسن واحد في الحاره كلها شهم وجدع ومفيش حد لجأ له إلا وحماه ودافع عنه ده مبيسبش أى واحده في الحاره تمشي وحدها بالليل لحد يتعرض لها.

أمانى بسخريه : آه بيدافع وبيحمى بنات الحاره كلها إلا إنتى صح.

زينب برومانسية هو اكيد مش واخد باله منى بيحسبنى لسه عيله صغيره بس اكيد لو احتجت له هلاقيه معايا وهيحمينى من الناس كلها وأبوه هياخد لى حقى من البنات اللى بتدايقنى في المدرسة وهيحبنى زى ما بحبه وأكتر.

أمانى:إنتى إللى غلطانه لو بتشكيهم للمدير كل مره كان وقفهم عند حدهم بس إنتى إللى بتسكتى لهم عشان كده بيتمادوا معاكى .

زينب: أنا مش عايزه الاستاذ عبد الكريم يقول عنى بتاعت مشاكل أنا عايزاه يشوفنى أحسن واحده في المدرسة 

أمانى:طيب وباباكى هيسيبه يخدك ده لسه صغير في الجامعه

زينب: ماهو بابا مش هيعرف يعمله حاجه لأنه

بعد مايتخرج هيشتغل ويبقى راجل أعمال كبير أوى ومعاه فلوس كتيره أوى أكتر من بابا وساعتها هروح معاه غصب عن بابا واعيش معاه بعيد عن الحاره الوحشه إللى الناس كلها بتكرهنى دى زى الأفلام العربي بالظبط.

أمانى: يارب يا زينب عشان أعرف أزورك من غير ماحد يزعق لى وأقعد معكى براحتى.

زينب: يارب....إنتى راحه فين يا أمانى

أمانى: أخدنا الكلام ونسينا إننا في الحاره أنا هبعد لحد يشوفنى ويقول لبابا إنى بمشى معاكى فيضربنى.يالا باى وأشوفك بكره.

وجريت أمانى قبل ما حد يشوفها ماشيه مع زينب.

كملت زينب طريقها والكل بيبص لها بقرف وكره بالرغم إنها لطيفه جدا ومش بتدايق حد هنا بس الكل بيكرهها من كرهه لأبوها.

دخلت زينب البيت وهو من أكبر البيوت في المنطقة ودخلت شقتهم في الدور التاني لقت أخلاص بتمسح الكراسي المدهبه بالفوطه

زينب: مساء الخير يا خالتو إخلاص.

إخلاص ببرطمه: قال عامله طيبه وهيا شيطانه بنت إبليس تقولى روحي لعيالك .ويجى أبوها يبهدلنى قال وأنا هبله وبحسبها طيبه.

دخلت زينب أوضتها وغيرت ملابسها بسرعه وخرجت في البلكونه منتظره رجوع يوسف من الجامعة.بصت للحاره وقالت (( البيت إللى جنبنا بتاعنا وإللى جانبه كمان والقهوه إللى في أول الحاره والدكان إللى جنبها بابا أخده تخليص حق من صاحبه حتى المخبز الالي كان بيت وحجز عليه بابا واشتراه مقابل الدين وعمله مخبز تقريبا نص الحاره ملك لنا وبابا مأجر معظم البيوت حتى الأستاذ عبد الكريم مدير المدرسة ووالد يوسف عايش في بيت ملكنا لكن ايجار قديم تقريبا بيدفع عشرين جنيه في الشهر.

مر المهندس يوسف وهو شايل المسطرة الكبيره حرف T وشايل شانطه كبيرة على كتفه الأيمن وشايل طفل صغير و ماشيه معاه واحده من ستات الحاره ابتسمت زينب بحسرة وقالت: آه لو تحس بيا يا يوسف آه لو تهتم بيا زى مابتهتم ببنات الحاره 

قعدت زينب على السفره منتظره والدها فقالت بأدب: خالتوا اخلاص تقدرى تمشى وأنا هحضر السفره لبابا.

إخلاص: لأ حنينه زى أبوكى روحي يا خالتى روحى يا خالتى لأ يا أختى مش هروح مش ناقصه يسم أبوكى بدنى بكلامه إللى زى السم الله يلعن الذله إللى حوجتنى لكم.

زينب: ليه يا خالتو هو أنا زعلتك في حاجه 

إخلاص بصوت عالى: أنا كده عاجبك ولا مش عاجبك مايهمنيش وبعدين بطلى المسكنه دى مش لايقه عليكى يا...

إبليس: بتكلمى مين بالطريقة دى يا اخلاص إزاى تتجرأى وصوتك يعلى على بنتى

إخلاص::لاا أ...أ.....أ مممكنتش

زينب: لأ يا بابا خالتوا اخلاص مكانتش بتزعق ليا دى كانت بتتكلم عادى هى ماتقصدش حاجه.بس أنا كنت عايزاها تروح وأنا هحضر السفره 

إبليس: لأ مش هتمشى إلا لما تلم السفره وتغسل الأطباق كمان وبعدها تقدر تروح يالا بسرعه 

إخلاص بصوت واطي: بالسم الهارى إنت وبنتك وبعدها دخلت المطبخ

&&&&&&&&&&&&&&&&

فى غرفة المدرسين في المدرسة 

أحمد: إلا إيه حكاية البنت زينب سيد. دى يا عامر

عامر: مين زينب سيد .

أحمد: زينب إللى في تالته خامس

عامر: زينب زينب قصدك بنت إبليس 

أحمد: أيوه هى دى إيه حكاية بنت إبليس دى 

عامر: ده أبوها أجارك الله منه مافيش حد سلم منه أصله يبقى م...

أحمد: أبوها يعنى مش هيا.

عامر: وهيا كمان.

أحمد: بس أنا شايفها بنت لطيفه مؤدبه شاطره ومجتهده ومش يتاعت مشاكل ولو عشان مش محجبه فمعظم البنات هنا مش محجبات بالعكس لبسها طويل ومحتشم

عامر: أوعى تغرك المظاهر دى بنت إبليس يعنى الشر بيمشى في عروقها مع الدم واحده بتاكل وبتشرب من دم الناس الغلابه عايزها تبقى إيه.

أحمد: أنا حتى الأن مسمعتش حاجه واحده غلط عملتها كل كلامك عن والدها بس 

عامر: أصلك متعرفوش زيى ده مورينى الويل أنا مأجر شقه في العماره بتاعته بيدفعنى تمن الخربوش على الحيطه 

أحمد: بس برضوا ماقلتش حاجه واحده عنها وواضح إنكم بتنتقموا من أبوها في بنته نظام مقدرتوش على الحمار فإتشطروا على البردعه 

عامر: تقصد ايه 

أحمد: قصدى إنكم بتكرهوا أبوها لكنكم خايفين منه فقررتوا تنتقموا منه في بنته وحملتوا المسكينه دى ذنب أبوها.

عامر: مسكينه مين بكره تشوف المسكينه دى هتكون ألعن من أبوها.

أحمد بأسف: دى لو بقت ألعن من أبوها فده منكم إنتم إنتوا إللى هتحولوها لوحش 

&&&&&&&&&&&&&&

بعد الحصه في الفسحه.

زينب: يا استاذ 

إلتفت الأستاذ أحمد وابتسم: أيوه يا زينب فيه حاجه مش فهماها في الدرس

زينب: لأ أنا حافظه الدرس كله صم.بس كنت عايزه اعرف لو حضرتك بتدى مجموعة دروس خصوصيه فأنا عايزه أحضر معاهم 

الأستاذ أحمد: بس إنتى شاطره أوى ومش محتاجه دروس.

زينب: وماله أبقى أشطر أصلى بحب الإنجليزي أوى حتى بابا بقى يزعق لى عشان مش بذاكر إلا الإنجليزي.

استاذ أحمد: عنده حق لازم تهتمى ببقيه المواد عشان تجيبى مجموع كبير وتدخلى الكليه إللى بتحبيها.

زينب: بابا عايزنى ادخل تجاره وبس عشان أخد بالى من فلوسه وتجارته وبس.

أحمد بإشفاق: ربنا يوفقك.

زينب: أستاذ ممكن أسألك سؤال 

أحمد: إتفضلى 

زينب: حضرتك إتخرجت من جامعة إيه؟

ضحك الاستاذ وقال: أنا إتخرجت من كليه التربيه قسم لغه انجليزيه وسابها ومشى

أما زينب فقعدت تردد في سرها كليه التربيه قسم انجليزي كليه التربيه قسم انجليزي.

إلتفتت لقت زميلاتها في الفصل واقفين.

ياسمين بتريقه: ممكن يا استاذ أخد درس خصوصي عندك أصلى بحب الطبيخ أوى 

هنا: أنا ست بيت شاطره وبابا إبليس حاجزلى شقه في جهنم ايجار جديد تعال بسرعه يا استاذ اقرأ الفاتحة مع بابا.

فرح: فاتحة إيه يا غبيه أبوها يتحرق احسن يقرا في صفحتين في شمس المعارف 

ياسمين: إيه شمس المعارف ده.

فرح: ده كتاب بتاع الجن والعفا*ريت 

ياسمين: حلو يا فرح كفك ( وضربت كفها في كف زميلتها ،)

زينب: أنا مش هسكت على كلامكم ده أنا لازم أروح أشتكيكوا لمدير المدرسة والله العظيم لأقول للأستاذ عبد الكريم.

$$$٣$$$$$#$#$####٣٢٢$$$$

فى حجرة مدير المدرسة وقفت زينب ووقف قصائدها زميلاتها الثلاثة ياسمين وفرح وهنا 

الاستاذ عبد الكريم: زميلتكم بتقول إنكم بتشتموها وبتهينوها 

ياسمين: كدابه يا استاذ إحنا ملناش دعوه بها بس هيا إللى دايما بتغلط فينا.

هنا: هيا إللى دايما تذلنا عشان أبوها غنى وإحنا مأجرين عندهم. بتذلنا عشان عايشين في بيتهم.

زينب: لا والله يا استاذ دى بتكدب.

فرح: لأ إنتى إللى كدابه أنا سمعتك وإنتى بتشتميها وتقولى هخلى بابا يطردكم من البيت.

استاذ عبد الكريم: شوفى يا زينب أنا مرضاش بالكلام ده في مدرستى فلو ماحترمتيش زميلاتك أنا هرفدك من المدرسة مش كفايه أبوكى في الحاره تطلعى لى فى المدرسة كمان اعتبري ده أخر انذار لك.يالا على فصلك.

رجعت زينب الفصل ودموعها على خدها.

أما المدير إلتفت للبنات وقال: وده كمان انذار لكم كلكم أنا سامعكم وإنتوا بتشتموها وتقولوا شمس المعارف وكتاب العفار*يت..بس ماحبتش أقويها عليكم يالا على فضلكم.

&&&&&&&&&&&&&&&&&&

فى بيت زينب خبط الباب وفتحت زينب لقت واحده لابسه عبايه سوداء وحجاب اسود وباين عليها الحزن والهم

الست : هو فين أبوكى

زينب: بابا جوه اقول له مين ؟

الست: قولى له كريمه مرات المرحوم حسن عبد الغفار.

زينب: إتفضلى يا خالتى.

دخلت كريمه وقعدت قدمت لها زينب كوبايه عصير.

إبليس ،' : أيوه يا ست كريمه 

كريمه: أنا واقعه في عرضك يا معلم

قعد إبليس وحط رجل على رجل وولع سيجاره وسحب منها نفس طويل و بعدها قال: عايزه إيه يا ست كريمه ؟

كريمه: أنا جايه أطلب منك متحجزش على حتة البيت إللى متاوينا.

إبليس: وماله ماحجزش معاكى الفلوس كاش ولا هتدفعى إزاى 

كريمه: وأنا لو معايا الفلوس كنت جيت أقع في عرضك وأتحايل عليك.

إبليس: وإنتى عايزانى أوقف الحجز بعد الكلمتين دول ماكنش حد غلب

كريمه: ماهو إنت مايرصكش أنام أنا وعيالى في الشارع.

إبليس: وأنا مالى هو إنتوا حلوين اوي وأنتوا بتاخدوا الفلوس لكن لما أطلب فلوسى أبقى وحش صح

كريمه بحزن وبكا:؛ وأجبب لك منين الراجل مات وكل حاجه راحت.

ابليس: هو حد قالك إنى قاعد على بنك ولا فاتحها سبيل أنا ماليش دعوه أنا عايز فلوسى وإلا هودى الأوراق للمحامى ويتم إجراءات الحجز.

كريمه: أبوس إيدك يا معلم أنا ماليش مكان غير البيت ده اروح فين أنا وأولادى.

إبليس: مش مشكلتى

كريمه: أشتغلك خدامه تحت رجليك إنت وبنتك بس ماتحجزش على البيت 

فيضحك إبليس بصوت عالي ويقول: بقى عايزه تشتغلى خدامه بقيمة الدين إنتى عارفة جوزك كان مستلف كام كان واخد خمسه وعشرين ألف جنيه يعنى أشغلك يجى عشرين سنه بالفلوس دى.

كريمه بعياط: وماله أشتغلهم.

إبليس: وأنا مش فاضي للكلام الفارغ ده يا تجيبى لى فلوسى يا هبعت الورق للمحامى 

كريمه: إرحم الأيتام إللى بربيهم واعمل حاجه واحده حلوه في حياتك ويفتكرها لك الناس بعد مماتك.

ابليس بقسوه: مالكيش دعوه بحياتي ومماتى 

كريمه: حرام عليك يا شيخ هو إنت مافيش فى قلبك رحمه ده أنا إتزللت لك وهنت نفسى منك لله منك لله ربنا ينتقملى منك حسبي الله ونعم الوكيل فيك حسبي الله ونعم الوكيل فيك.إلاهى تشوف الذله دى إنت وبنتك منكم لله

خرجت كريمه وهى بتدعى على إبليس وبنته 

زينب: بابا عشان خاطري أبوس إيدك متحجزش على بيتهم.عشان خاطرى

إبليس: إخرسى خالص ماسمعش لكى حس 

زينب: يا بابا دى مسكينه وبتربى في أيتام واحنا أغنيا وعندنا فلوس كتير ومش محتاجين بيتها.

إبليس: قاعد أنا على بنك عشان أرمى خمسة وعشرين ألف جنيه في الهوا عشان خاطرك طول عمرك هبله وبينضحك عليكى زى أمك.

زينب: خلاص عشان خاطري المره دى بس.وأنا مش هبقى هبله وهسمع كلامك.وهخش كليه تجاره وأحافظ على فلوسك

إبليس: بطريقتك دى لا هيبقى فيه فلوس ولا هيبقى تجاره هتمدى إيدك للناس تشحتى منهم ومفيش حد منهم هيديكى حاجه هيشمتوا فيكى بس.

زينب: صدقنى...

إبليس: بس وجعتى لى دماغى وخرج المحمول واتصل بالمحامى: أيوه يا أستاذ حسان....لا ماجبتش الفلوس....لأ إبدأ الإجراءات ....الورق المطلوب معايا كل الأوراق أهى قدامى. .... خلاص يادوب هاغير هدومى وأجيلك..... مع السلامه.

ودخل ابليس أوضته عشان يغير ملابسه.

فقربت زينب من الأوراق وقالت: سامحنى يا رب أنا عارفة إن إللى هعمله غلط بس إنت عارف إنى عايزه أساعد الست الغلبانه دى بصت لأوضة أبوها المقفوله وأخدت الأوراق و.............

$$$$$&&&&&&&&&&&

توقعاتكم هتعمل ايه زينب بالأوراق وياترى إيه رد فعل إبليس.

ده إللى هنعرفه البارت الجاي إن شاء الله بس ما تحرمونيش من تفاعلكم الحلو ومن تعليقاتكم المميزة وشكرا حياة محمد

الجزء الثالث 

ودخل ابليس أوضته عشان يغير ملابسه.

فقربت زينب من الأوراق وقالت: سامحنى يا رب أنا عارفة إن إللى هعمله غلط بس إنت عارف إنى عايزه أساعد الست الغلبانه دى بصت لأوضة أبوها المقفوله وأخدت الأوراق و......

خرج إبليس من الأوضه بعد ما غير ملابسه فلقى البيت فاضي فنده على زينب مره وإتنين وتلاته ولما مسمعش رد حس بقلق شديد .لكنه وقف فجأة واشتغلت أجهزة الإنذار في عقله وقال: لا مستحيل زينب تعملها ده هيكون أخر يوم في عمرها لو عملتها.لكن بعد لحظه كان بيدور على الملف على السفره وتحت الكراسي وفي كل مكان وبعد لحظه قال: عملتيها يا بنت الكل*ب .فخرج بسرعه من الباب يمكن يلحقها ويمنع الكارثة.لكنه وجدها أمامه فقال بصوت مرعب: فين الاوراق يا زينب.

زينب بخوف: ورق إيه أنا معرفش حاجه 

مسكها من هدومها وصرخ في وشها: طلعى الورق قبل ما أدفنك مكانك هاتى الورق 

زينب برعب: أأأنا أناا ممعيش حاجه أنا مأخدتش ححاجه.

فضربها كف شديد على وشها وقال: قلت لك هاتى الأوراق أحسنلك.

زينب ببكا: أنا مش معايا حاجه 

إبليس: وديتى فين الورق إنطقى.

زينب وهي بتبكى: أنا إديت الأوراق لخالتى كريمه 

إبليس بغضب: يا سنتك الس*ودا بتقولى عملتى إيه . 

زينب بخوف: احنا عندنا فلوس كتيره وهيا غلبانه 

إبليس: إدتيها الأوراق كلها ده موتك حلال تروحى حالا وزى ما إدتيها الأوراق ترجعيها و...

زينب: مش هينفع عشان خالتى كريمه قطعت الأوراق 

إبليس: بتقولى إيه ؟عملت ايه ؟

زينب: وبعد ما قطعتها حرقتها وحتى الورق المحروق هرسته بإيديها يعنى مستحيل أرجع الورق 

إبليس: وفرحانه إنك خسرتينى .أنا بقى هدفعك تمن الخسارة دى.

وخلع حزام البنطلون ولف طرفه على إيده ورفع ناحية توكة الحزام في الهوا ونزل بيها على جسم زينب إللى صرخت من قوة الضربه لكنه ماهتمش بصراخها ونزل عليها مره وإتنين وعشره وعشرين وهيا بتصرخ جريت على البلكونه وتستنجد بالناس الواقفين لكن الناس بعضهم فضوليين والبعض شمتانين والبعض نفسه إنه يمو*ت بنته عشان يخلصوا منه.

حتى إن البعض قال(( تستاهل اكيد شاف عليها حاجه غلط وبيربيها إن شاالله يكسر رقبتها)) 

شافته جاى مع والده من بعيد فحست بالأمل في خلاصها هو ده إللى هينقذها من عقاب أبوها فجريت بسرعه لباب البيت وأبوها وراها لكنها كانت أسرع نزلت السلم بسرعه وجريت احتمت فيه وقالت بخوف وبضعف: إلحقنى يا يوسف هيموتنى إنجدنى منه..

فى نفس الوقت لحقها ابليس ومسكها من شعرها وقال بصوت عالي: بنتى وبربيها عندك مانع.

يوسف: لا وأنا مالى إن شالله تموتها.إنت حر فيها.

وسابها ومشى .

وقفت الدنيا من حولها وهيا بتشوف حبيبها ومنقذها والأمل إللى كانت بتبنيه عليه كله بيتهد وهو بيتخلى عنها وبيسيبها تواجه مصيرها لوحدها.دارت الدنيا من حولها ووقعت مستسلمه للإغماء فاقده الوعى.

صرخ الكل في خوف ماعدا ابليس إللى صرخ في رعب وهو بيشوف بنته غايبه عن الدنيا فبالرغم من كل مساوئه إلا أنه مبيحبش في الدنيا كلها حد أد بنته..

كان كل جسمه بيرتعش وهو ببشوف بنته غايبه عن الدنيا وعلامات الضرب الزرقاء في كل جسمها وشها ودراعتها.

شاف الناس وهيا بترش وشها بالميه لحد ما شهقت وفاقت.فحس إن روحه ردت له فقال في سره الحمد لله وقرب منها بعد ما جمد قلبه وكشر وبص لها بغضب وقال في قسوه: سيبوها تقوم لوحدها.

الناس من حواليه: 

حرام عليك هيا عملت إيه؟

حرام هتموتها في إيدك..

سيبها.إللى بتعمله غلط.

عمر الضرب ما علم ولا ربا حد.

فصرخ في الناس كلها: ملكوش دعوه بنتى وأنا حر فيها أضربها أموتها محدش له صالح.

وبعدها صرخ في زينب: قومى خشى جوه ولا عاجبك الفضايح دى كلها.

قامت زينب من على الأرض ومشيت وهيا ساكته خالص لحد ما دخلت جوه..

دخل وراها وقال : بقى أنا تسرقينى عشان مين....ها..ردى عليا.نفعك حد.!..سأل عنك حد!....دافع عنك حد!.... حتى خالتك كريمه إللى إنتى سرقتينى عشانها جت وحمتك منى ولا حتى سألت عنك.

زينب بصوت ميت ضايع: كنت عايزه الناس تحبك وتقول عنك كلام حلو . كان نفسي اسمع حد بيدعى لك.كنت عايزاها تقول للناس كلها.إن سيد راجل طيب كان نفسي ينسوا اسم إبليس.

إبليس: غبيه وهتعيشى طول عمرك غبيه أديكى سرقتىينى ورجعتى لها الأوراق حد قال الكلام بتاعك ده..أنا رايح اشوف حل مع المحامي ولما أرجع ليا معاكى تصرف تانى خالص.

وسابها ومشى أما زينب فقالت: سرقتك ....عشان ساعدت واحده غلبانه أبقى سرقتك.........وهتيجى تعمل فيا إيه تانى ........مش كفايه يوسف وإللى عمله.....بس أنا مش هقعد له عشان يجي يمو*تنى .

$$$$$$$$$$$$$$$$$$$$$

فى بيت سميحه خالت زينب 

سميحه: أيوه ياللى بتخبط ثانيه واحده أنا هفتح أهو( و بعد ما فتحت الباب) مين زينب ياحبيبتي.وأخدتها في حضنها

زينب: إزيك يا خالتوا عامله ايه ؟

سميحه: أنا كويسه ((وبصت في وش زينب))

مين اللى عمل في وشك كده.دا إنتى متبهدله خالص.

زينب ببكا: بابا يا خالتو ضربنى أنا مش عايزه أرجع له.

سميحه: وهتقعدى فين ؟

زينب: أنا جيت لك عشان أقعد عندك.

سميحه بتوتر: عندى فين هنا مينفعش إنتى شايفه البيت صغير على قدى أنا وجوزى وعيالي ويعدين ماينفعش إنتى عارفه إن جوزى مش بيحب أبوكى.

زينب: أنا إللى هعيش معاكم مش بابا ياخالتوا 

سميحه: مينفعش برضوا أنا أولادى كلهم شباب مينفعش تقعدى معاهم.روحى لأبوكى احسن لك.شالت زينب شنطة السفر على كتفها وقالت: كتر خيرك يا خالتوا.

سميحه: طب استنى رايحه فين مش تعرفينى. يا زينب.ردى عليا؟

رجب: مشيت؟

سميحه ؛آه 

رجب: احسن إنك رفضتى تقعد معانا محناش ناقصين زحمه.

سميحه: بس صعبت عليا أوى.

رجب: ميصعبش عليكى غالى.هو إحنا هنصرف عليها ولا على عيالنا.

&&&&&&&&&&&&&&&&&&&&&

رضا: وعملتى إيه عشان أبوكى يضربك الضرب ده كله.

زينب: أخدت شيكات الديون واديتها لخالتى كريمه.

رضا: إنتى اتخبلتى إزاى تعملى كده.

زينب: دى ست طيبه وجوزها مات وومعهاش فلوس

رضا بصوت عالى: وانتى مالك.

زينب: ياخالى كانت بتعيط وهتبوس إيده عشان يتنازل عن القضية كانت هتعمل ايه يعنى.

رضا: وانتى مالك كانت عينتك محامى للدفاع عنها ده أنا لو منه كنت دبح*تك بإيدى.

زينب: يعنى أنا غلطانه 

رضا: وستين غلطانه كمان إنتى اتهبلتى تخسري أبوكى خمسه وعشرين ألف جنيه.عشان صعبت عليكى.

زينب: طيب أنا هعمل ايه دلوقتى؟

رضا: ولا حاجه أنا هاخدك من إيدك أوديكى لأبوكى.

زينب ببكاء وهيا منهارة: لأ أنا مش هرجع له عشان يموتنى.

رضا: وتقعدى فين إن شاء الله.

زينب: أنا عايزة أقعد معاك هنا.

رضا: هنا فين لا يا ماما تقعدى عند أبوكى أنا مش أده وبعدين البيت صغير يادوب يكفينى أنا وأولادى.

زينب: بس أنا مش عايزه أرجع له أنا عايزه أعيش معاك.

رضا: يبقى إتهبلتى حد يسيب بيت أبوه.أنا هغير هدومى وأخدك أروحك لأبوكى وهتحايل عليه عشان ميضربكيش.خليكى هنا.

وسابها وقام والدنيا بتضيق من حولها أكتر.

قامت من مكانها والضيق واليأس بيخنقها وشالت شنطة ملابسها على كتفها (( الهاندباج)) وخرجت.

&&&&----&&&&&&---&&&&&&

دخل أوضة الأنتريه يشوف مين الضيفه إللى بتسأل عليه.

استاذ أحمد باستغراب: زينب أهلا إنتى عرفتى بيتى منين ؟ ومين اللى عمل فيكى كده؟

زينب: مش مهم تعرف بس أنا جيالك في حاجه مهمه أوى.

قعد الأستاذ أحمد في قلق وقال: خير يا زينب قلقتينى.

زينب: أنا سيبت بيت بابا وجيت لك.

استاذ أحمد بفزع: نعم بتقولى إيه ؟

زينب: بقول سيبت بيت بابا وجيت لك ومش هرجع له تانى.

استاذ أحمد: هيجي وياخدك غصب عني وعنك ده والدك وهو المسؤول عنك

زينب بإصرار: مش هيقدر لأنى هكون مراتك.

فينفجر الأستاذ أحمد في الضحك : إنتى بتخرفى وبتقولى إيه؟

زينب: أنا مش بخرف أنا بحبك يا استاذ أحمد وعيزاك تتجوزنى 

استاذ أحمد بضحك أكتر: عايزه أتجوزك وإنتى في بيتى ومراتى هيا إللى مدخلاكى البيت ومقدمه لك العصير.وإنتى عايزه تبقى ضرتها.

زينب: لأ أنا مش هبقى ضرتها لأنك هتطلقها 

استاذ أحمد:!!!!!!!!!!!؟؟؟؟؟؟؟!!!!!!!

زينب بإقناع: أنا أجمل منها بكتير وأذكى منها بكتير أوى وكمان غنيه ومعايا فلوس كتيره اوي بعد ما تطلقها تتجوز أى راجل يعجبها وأنا هعيش معاك.

وقف الأستاذ أحمد عن الضحك وقال بجد: طيب إحنا كده حلينا مشكلة مراتى طب وإبنى!؟

زينب: فين إبنك؟

استاذ أحمد: في بطن مراتى .

زينب بثقة: هديها فلوس كتيره اوي تصرف على إبنها وتخليه مش محتاج لحد وتعوضه عن غيابك.

استاذ أحمد: وهل عوضتك الفلوس عن غياب أهلك 

زينب:!!!!! يا استاذ أنا معايا فلوس كتيره حتى بص 

استاذ أحمد: زينب إنتى متوقعه إنى هحميكى وأعزك بفلوسك.يازينب لو محستيش بالعزه والكرامة في بيت أهلك عمرك ما هتحسى بها في أى بيت تانى.ولو مارفعش أبوكى قدرك عمر ما هيرفعه أى شخص تانى.

زينب: بس يا استاذ.

استاذ أحمد: لوبتحسبى إنى بتخلى عنك فإنتى غلطانه أنا بحميكى من نفسك كل إللى حاسه بيه تجاهى مجرد مشاعر مراهقين هتروح مع الايام لما تلاقى الحب الحقيقي.

أنا لو ماكنتش خايف عليكى وبحميكى كنت وافقتك وإنتى بتقدمى لى عرض مغرى بنت جميله جدا زى القمر وفلوس كنت استغليتك وسرقت منك طفولتك وبراءتك لكنى فعلا باعتبرك اختى الصغيره وخايف عليكى وحزين على حالك عشان كده بقولك ارجعى بيتك.

زينب: بابا هيقتلنى

استاذ أحمد: مستحيل يا زينب عمر ما حد هيحبك أد باباكى روحى اتكلمى معاه وقربى منه 

زينب بانهيار: إنت زيهم كلهم بتتخلى عنى.

استاذ أحمد: أنا مش بتخلى عنك أنا كده بنصحك 

زينب: وأنا مش عايزه نصيحتك.عن إذنك 

وأخدت شنطتها على كتفها وخرجت من البيت.

دخلت على الأستاذ زوجته مرڤت وقالت: مين دى يا أحمد 

أحمد: دى زينب.

مرڤت: والله البنت ماشاءالله زى القمر بالرغم من الضرب إللى مشوه وشها.بس كانت عايزه إيه؟

أحمد: كانت عايزانى أتجوزها.

فضحكت مرڤت وقالت: بلاش هزار يا أحمد

أحمد: مش بهزر كانت هنا فعلا عشان عايزانى أتجوزها.

مرڤت: تبقى اتجننت.

أحمد بحزن: دى مش مجنونه دى يائسه وبتحسب إنى حبل النجاه لها.

مرڤت: مسكينه بس أوعى تفكر تعملها دا أنا....

أحمد: مش محتاج تهددينى إنتى عارفه أنا بحبك أد إيه.بس فعلا صعبانه عليا.

&&&&&&&&$$$$&&&&&&&

خرجت زينب ووقفت في الشارع وقالت بيأس أروح فين وأروح لمين.دلوقتى

&&&&&&&&&&&&&&&&

رضا: أيوه أيوه ياللى بتخبط أصبر.

وفتح الباب لقى إبليس في وشه.

إبليس: فين بنتى يا رضا.

رضا: هيا زينب مروحتش

إبليس: يعنى كانت عندك

رضا: آه وزعقت لها وقلت لها ترجع لك حتى كنت هجيبها وأجى لك لكنها مشيت وسبقتنى.

إهتز إبليس في مكانه وقال: يعنى إيه يعنى البت طفشت.دى سر*قتنى .

رضا: أنا والله زعقت لها عشان الشيكات إللى أخدتهم.

إبليس: شيكات إيه إللى بتقول عنهم 

دى سر* قت منى ٢٠٠ألف جنيه.

&&&-&&&&&&&&&&&&&&

بأعتذر عن الكم الكبير من العنف والحقد وقلة الأخلاق الموجوده في البارت لكن أنا من الأول قايله إنى جايبه إبليس وبنته يعنى هيقط*عوا بعض .

&&&&&&&&&&&

توقعاتكم إيه إللى هيحصل بعد كده وإيه رأيكم في تصرف زينب وفي رد فعل إبليس والدها وتوقعكم بنت صغيره في سنها لو معاها المبلغ ده ممكن تعمل بيه إيه؟

وسؤال للجميع هل مريت بوقت حسيت الدنيا في عينيك أضيق من خرم الإبرة.أنا شخصيا بقول كتير بس كل ما ضاقت الدنيا وسعها ربنا والحمد لله 

تابعووووووني 

الفصل الرابع والخامس والسادس والسابع من هنا

رواية كيان الزين كامله من هنا

رواية بنت إبليس من هنا