غآردينيآ بقلم ندآء_الصوالحي الجزء_الآۆلْ_والاخير حصريه وجديده على مدونة أفكارنا
امامها خيران
احدهما ك السم القاتل ؛
لم تعد تثق به ولا تستطيع نسيان خذلانه..
قد يجرحها مرة ومرة .. ولكن قلبها لا يتلهف لأحد سواه ..
والآخر ك الترياق الشافي ؛
تثق به .. تسعد بوجوده.. واثقة انه لن يخذلها.. لكن قلبها لم يستطيع ادخاله فيه.. لم تستطع ان تحبه..
فهل س تتجرع السم لتغذي فقط قلبها وتميت ما تبقى منهآ .. أم تتجرع الترياق ل تغذي سائر جسدها وتدس ع القلب!
عند شباك الغرفة يلي قضت فيها ثلاث سنين من البكي والعذاب.. واقفة وعم تطلع لبرا وضهرها للباب.. بتفرك ايديها بتوتر وجسمها عم يرتعش كتير
خطوة وحدة رح تغير حياتها كليا معقول هالشي يلي بتعمله صح معقول هاد
 |
الاختيار السليم
كانت لابسة فستان دهبي طويل مرصع بالخرز الذهبي..
الديل بيجر وراها وحوافه كلها من الدنتيل الأبيض
شعرها البني الفارد يلي واصل لآخر ظهرها..
الإكليل المزين بورد أبيض ع راسها ..
كانت طويلة.. رفيعة.. جميلة.. متل العارضات.. انوثتها الطاغية.. سمارها العربي.. كانت شرقية بإمتيآز
بس ثقتها يلي كانت ظاهرة مانها موجودة.. ثقتها مهزوزة وضعيفة
يمكن المكان يلي هيي فيه عمل فيها هيك.. هيا بدا شمس بدها الهوا بدها عناية حذرة بدا السماد المناسب الها لتحيا وتورد ..
القوة يلي في عيونها إختفت
قلبها المسكر يلي ما حد بيستحق يفوتو .. إنكسر بابه وإتدمرت حيطآنه
...
فاتت لعندها سلمى بعيونها نظرة حزن..
سلمى: شو جهزتي!
حطت إيدها ع قلبها بألم ولفت وجهها وحكت بصوت عم يرجف ..
زهر: قديه بقي!
سلمى: ما بقي كتير ساعة وبكون الكل وصل
زهر: شادي راح !
سلمي: ايه قبل شوي
زهر: سلمى.. ساعديني انا ما فيني لازم تساعديني..
////
#البدآية
عادل: ما رجعت زهر لهلء!
حياة: لا والله لهلء ما اجت تأخرت مو
عادل: ايه مو عادتها.. خليني دقلها عالموبايل
بعد محاولات الاتصال..
عادل: ما عم بترد
حياة: لك كيف ما بترد ليكون صاير معا شي
عادل: مع زهرر!! عم تمزحي! مو عارفة بنتك ب 10 رجال شو بدو يصرلا.. قومي جهزي الغدا بتكون وصلت..
فاتت حياة عالمطبخ وبنفس اللحظة وصلت زهر وفاتت عالبيت
زهر: مرحباا..
ركضت بخفة وحيوية لعند ابوها وطبعت بوسة حنونة ع جبينه
زهر: كيفو حبيبي اليوم
عادل: مشتقلك ياحبيبة بابا تأخرتي
زهر: والله كنت بإجتماع مفاجئ وما قدرت إطلع منه ابداً وماصحلي خبركن.. وينا امي
عادل: ليكا بالمطبخ عم تجهز الاكل
بصوت امها من المطبخ..
حياة: روحي ياامي غيري تيابك بكون خلصت
مشيت زهر لعندا وفاتت عالمطبخ حضنتا من ورا ضهرا بحب وباستها من خدها
زهر: مممم يسلمو هالايدين ما ننحرم منهن ياااارب ريحة الاكل طييييبة
حياة: هههه اي حبيبتي عملتلك ورق عنب وتبولة اكلتك المفضلة
زهر: اي عرفت من اخر الشارع شميت ريحة اكلك منتي بتعرفيني بميزه من ع بعد امتار
حياة: ههههه اي روحي غيري يلي ليكني خلصت
راحت زهر لغرفتها.. رمت شنتايتها عالسرير وشلحت تياب الشغل الرسمية.. ولبست بيجامة وردي وسكني .. رفعت شعرا كله متل ديل الحصان.. غسلت وجهها وايديها وراحت عالصالون.. لقت امها وابوها قاعدين وعم ينطروها لياكلو
قعدت حدهن وبلشو ياكلو..
بعد ما خلصو اكل.. وقبل ما حدن يقوم
زهر: ماما.. بابا بدي احكيكن بموضوع
عادل: خير حبيبتي
حياة: اكيد متل كل مرة
حطت المعلقة من ايدها وشبكت ايديها ببعض وحكت بحزم
زهر: اي ماما.. متل كل مرة.. بتعرفو هاد الموضوع منتهي عندي وما فيني ارفضه.. انا اعطيتكن فرصة لتتقبلو هالشي وتفكرو فيه واليوم بالاجتماع خبروني انه لازم ردلهن خبر بكرة الصبح
عادل: يا بابا انتي بتعرفي انه هالشي صعب.. سفر وغربة وبيت لوحدك مستحيل
زهرة: بابا افهمني انا مو صغيرة عمري 26 سنة ماعدت طفلة بعرف اهتم بحالي ودير بالي ع حالي منيح وهالفرصة ما بتتعوض الراتب هنيك رح يكون اضعاف راتبي هلء
وغير السكن المتوفر والاقامة يلي رح يطلعولي اياها فوراً ومتل ما خبرتكن رح اعمل لم شمل واخدكن لعندي
حياة: ما بعرف قلبي مو متطمن ل هالسفرية.. وقصة انه تعيشي لحالك ببلد اجنبي ماا في
زهر: لا اله الا الله.. امي انا زهرر ما بتعرفيني الصبية الي كانت الاولى بالثانوية العامة.. وخلصت 4 سنين من جامعتها ب سنتين ونص واشتغلت ومن اول شهر اتوظفت فيه إترقت
يعني مو معقوول تخافي عليي
حياة: شو ما كان بتضلي بنت
عادل: والعريس
زهر: خبرتكن اني رافضة
حياة: كل عريس بييجي بتطلعي فيه حجة.. وهادا ما في اي عيب لشوو بترفضي!! دكتور وعمرو مناسب وببيت خاص وعيادة خاصة وسمعة متل المسك ليش لتضيعي هالفرصة
زهر: لاني ما بدي اتزوج.. والعريس مو فرصة لضيعها.. انا هيك مرتاحة ومبسوطة ومو بجاجة رجال بحياتي انا هيك مكتملة
عادل: الله يهديكي يابنتي اعملي يلي بريحك
حياة: شوو يعني خلص اعطيتا الاوكي
عادل: شو اعمل مو شايفة عقلا لبنتك ما رح تهدا الا لما تسافر
حياة: زهر انا بوافق بس بشرط.. من دون هالشرط ع جثتي ما رح تسافري
زهر: اي اؤمري امي
حياة: ما فيكي تسكني لحالك رح تعيشي عند بيت عمك ابو فارس
زهر: غير هيك مافي!!!..
سحبت حالها اما وبلشت ترفع بالاكل.. وزهر حست انه ما عندا غير هالحل.. رغم كرهها للجمعات والحياة مع الناس وكرهها لفكرة انا تعيش ببيت حدا بس مضطرة توافق لترضي امها..
زهر: ماشي امي متل ما بدك انا موافقة.. رح عيش عندهن.. خبريهن بجيتي.. مع اني ما بعرفهن وما شفتهن غير بالصور ولا حتى بيعرفوني ما بعرف كيف بدهن يتقبلوني
يا الله بتعرفيني ما بحب كون ضيفة عند حد اووف
عادل: بيت عمك ما في احن منهن رح تحبيهن كتير
حياة: اي وبنت عمك من عمرك ولسا مو متزوجة اكيد رح تونسك وتحبك كتير
زهر بتأفف وملل وهيي عم تطرقع اصابعها ع طاولة السفرة
زهر: اي ان شاء الله..
بعد اتصال ابوها لزهر ع بيت اخوه وخبرهن بجية زهر ووضع شغلها.. انبسطو كتير اخوه ومرتو ما سدقو ايمتى تيجي.. لانهم كانو بغربة من سنين طويلة حسو بشوق كبير لبلدهن وولاد بلدهن.. وخبروه انهن بينتظروها ع احر من الجمر..
ارتاح عادل كتير لردة فعل اخوه ومرتو وحس انه بنته رح تكون بأيدي امينة.. لانه بيعرف اخوه من وهني صغار حنون وحساس وما بيهون عليه يكسف حدن او يزعل حد وكان متأكد انه خلفته متله وتربايته سليمة..
//بقلم نداء الصوالحي
زهر تاني نهار خبرت رئيسها بالشغل بالموافقة.. واعطوها موعد السفر اخر الاسبوع..
اخدت اجازة لموعد السفر حتى تهيء حالها وتقضي وقت مع اهلا قبل ما تتركهم
مشيو الكم يوم بهدوء وسعادة ما بين زهر وامها وابوها..
اخر ليلة كانت قاعدة بالجنينة تبعت البيت
الجنينة الي كلها ورود.. كلو من شغل ابوها.. لانه بيملك مشتل للورد ومهنته وهوايته زراعه الزهور والاهتمام فيها
سما زهر بهالاسم من كتر ما كان متعلق بالورد وانواعه وروائحه..
طلع لعندا ابوها وهيا ماسكة وردة وعم تشتم ريحتها..
عادل: عجبتك
زهر: مممم كتير.. فيها شي غريب.. جذبتي من بعيد حاسة كإني تعلقت فيها
عادل: هههه هي زهر الغاردينيا..
زهر: غاردينيا شو هالاسم اول مرة بسمع فيه
عادل: اي هوا نادر كتير وما في منه الا بأماكن نادرة كتير.. هاد الزهر الي كنت رح سميكي بإسمه
زهر: شوو هههه عم تحكي جد!
عادل: ايه اول ما امك ولدتك وجيت عالمشفى لشوفك وحملتك.. شفت فيكي زهر الغاردينيا.. كان الك ريحة مميزة بتجذب عن بعد وبتخلي الواحد يتعلق فيها وما يقدر يتركها
كنتي متله تماما.. حتى لما بلشتي تكبري.. كانت تربايتك صعبة كتير متل هالورد.. كنتي عنيدة وحازمة من صغرك مو اي شي بيرضيكي ولا اي شي بيعجبك
كنتي بتحتاجي بيئة معينة وحياة خاصة حتى تزهري
زهر: شو هالحكي ابي ما بعرف رد عليك.. معقول انا هيك
عادل: اي واكتر.. كنت متشوق كتير لسميكي غاردينيا بس امك رفضت وضلت تبكي وما قبلت لانه الاسم صعب وكبير هههه ف سميناكي زهر
يعني اشي ومنه
زهر: هههههه يخليلي اياك انت وماما رح اشتقلكن كتير
عادل: ياحبيبتي ونحنا رح نشتقلك
طلعت امها وهيي حاملة الشاي واجت لعندن.. سهرو سوا بالجنينة لنص الليل.. وبعدا فاتو ينامو
تاني نهار فاقت بكير جهزت شنطتا يلي بدا تسافر فيها.. جهزت شنطة وحدة.. رغم اناقتها ولبسها الراقي بس ما بتحب تخزن التياب.. بتحب يكون عندها قطع تياب قليلة بس مميزة..
باقي لطيارتها ساعة..
لبست وجهزت حالها وحملت شنتايتها وطلعت لبرا.. كان جاي لعندا رفقاتا وقرايبا سلمو عليها وقعدو معا شوي وودعتهن وبوست امها كتير وطلعت.. وصلها ابوها للمطار
قعدو هنيك لحد ما ييجي موعد الطيارة.. طول الوقت كانت حاطة راسا ع كتفه وعم يحكو ويضحكو سوا..
ودعت ابوها وبوسته كتير وبكيو ع قد ما هيي متعلقة فيه..
مسحت دموعا وشدت كتافا وابتسمت ابتسامتها القوية وطلعت بالطيارة..
بعد 5 ساعات من سفر وطريق وصلت لبيت عمها.. نزلها الشوفير للعنوان يلي اعطته اياه..
نزلت من السيارة وحملت شنتايتها الشخصية بايدها وشنطة السفر جرتها بايدها التانية ومشيت بخطوات ثابتة وثقة..
رنت عالجرس وبعد شي دقيقة فتحو الباب..
طلت صبية بعمر العشرينات حيوية ضحوكة وباين من نظراتها انها متهورة.. اطلعت بزهر من فوق لتحت وابتسمت ابتسامة لهفة واشرت باصبعها
سلمى: زهر.. ماهيك!
اكتفت زهر بابتسامة وهزت راسها بالموافقة..
هجمت عليها سلمى بالاحضان وهالشي فاجئ زهر بس خلاها تبتسم..
سلمى: زهرر وصلللت ماماا لك زهر هووون.. فوتي فووتي اهلا وسهلا ياعمري.. يااي شو مبسووطة
فاتت عالبيت حطت شنتايتها ع جنب وفوتتها سلمى ع غرفة القعدة
كانت ام فارس وابو فارس.. وولادهن الشباب فارس وشادي قاعدين سوا
اول ماشافوها الكل كان عم يطلع عليها من فوقت لتحت.. كانت تسحر اي حد بتشوفه بجمالها ونظراتها وثقتها
ام فارس: تقبري قلبي شوو هالجمال اهلا وسهلا حبيبتي والله نورتينا
ابو فارس: يا اهلا وسهلا عموو حبيبتي والله مابتعرفي قديش مبسوطين بشوفتك
زهر: تسلمولي يارب انا يلي مبسوطة بشوفتكن ان شاء الله ما تقل عليكن بقعدتي
ام فارس: شوووو لك نحنا ما صدقنا انك رح تيجي لعنا
قام فارس وشادي بنفس الوقت ليسلمو عليها اطلعو ببعض وخجلو من تصرفهن
اطلعت زهر بالاتنين وابتسمت وما مدت ايدها لحد
زهر: اهلا وسهلا فيكن.. فارس وشادي ما هيك '! بتذكر وجوهكن من الصور
فارس: اهلا وسهلا والله ونحنا بنتذكرك بس مو بهاد الجمال هههه
حكا جملته وابتسم وغمزا .. اطلع فيه شادي وجحره ورجع اطلع ب زهر بهدوء..
شادي: اهلا وسهلا فيكي بنت عمي.. نورتينا والله
ارتاحت زهر شوي وقعدت معهن.. اتعرفت عليهن واحد واحد.. كانت بتحكي بذوق ورقي وهيا عم تبتسم لكل شخص.. كانو يسالوها وتجاوب ع قد السؤال.. خبرتهن عن مكان وظيفتها ونظام شغلها وهني خبروها عنهم عمها عامل بمطعم.. وفارس عم يدرس بس لسا ما تخرج لهلء رغم انه عمرو 27 بس كسول وملعوب وما بحب المسؤولية والتعليم.. شادي مخلص محاسبة وبيشتغل محاسب ببنك.. وسلمى خريجة تكنولوجيا بس قاعدة بالبيت مقضية حياتها عالنت والفيس والجروبات..
ارتاحتلهن كتير وحست بحنانهم وبساطتهم.. خبرتها مرة عمها انهن جهزولها غرفة بالطابق يلي فوق بجنب غرفة سلمى..
استأذنت منهن وقامت لترتاح بغرفتها..
كانت حاسة بخجل وعدم راحة.. بس ما كان عندا حل تاني.. قامت لتطلع وتحمل شنطتها.. لحقها شادي
شادي: هاتي عنك اكيد تعبانة من السفر..
زهر: مافي داعي مو تقيلة
شادي: لا خلص صرت حاملها
زهر: عنجد يسلمو غلبتك معي
شادي: ولا غلبة ولا شي نحنا بالخدمة..
ابتسمت وراحت لتطلع عالدرج شادي سبقها وهيي لحقته.. وصلها لغرفتها فتح الباب وفوت الشنطة وفاتت معه
طلع ومسك الباب بايده من برا
شادي: بدك شي انا رايح
زهر: سلامتك.. شكراً كتير
شادي: العفو.. اذا احتجتي شي ما تخجلي خبريني
زهر: ولا يهمك
قفل الباب وراح.. وزهر شلحت جزمتا والجاكيت وفكت الشال ورمت حالها عالسرير.. ارتاحت كتير ل شادي وذوقه وحست بانه كسبت أخ بلحظات قليلة..
كانت رح تغفى من التعب بس نقزت لما حدا فتح الباب وفات بدون استئذان..
زهر: انت كيف بتدخل هيك!
قامت زهر من مكانا مرتبكة ومعصبة ع فوتة فارس بدن اذن
فارس: عادي شو فيها.. ليه انا داخل مغارة علي بابا هههه !.. كنت رح شوف اذا بدك شي
اطلعت فيه من فوق لتحت وحكت بعصبية وصوت عالي
زهر: لا ما بدي شي.. لو بدي شي بخبرك وياريت تاني مرة بتدق ع الباب قبل لا تفوت عم تفهم ..
فارس: اسف عنجد اسفة مو بقصدي خلص انا رايح لا تعصبي
اتدايقت من تصرفها وطريقة حكيها معه واتذكرت انها في بيتهم وهاد اول يوم بتقابلهم فيه..
وقبل ما يلف حالو ويطلع حكت بتردد..
زهر: استنى لحظة.. انا ما بقصد علي صوتي ما تزعل بس اتدايقت من فوتك هيك فجأة
فارس: لا انا الي اسف فتت هيك متل الاجدب.. ما تآخذيني يمكن لانه اول مرة بتيجي لعنا صبية وبتسكن بالبيت.. وهيك ماني متعود دق ع باب حدا في البيت اسف ما رح عيدها
زهر: خلص ماصار شي..
ضلو الاتنين ساكتين وعم يطلعو ببعض بدون ما يحكو شي..
كان فارس عم يتأمل فيها.. عم يفكر بجمالها وشكلا يلي اتفاجئ فيه وشخصيتا يلي جذبته من اول لحظة فاتت فيه عالبيت.. مو قادر يصدق انه في بنت بهالدنيا ممكن تلفت انتباهه او تسرق قلبه
ما بيعرف شو عملت فيه حتى خلته يسرح بخياله فيها ..
بس زهر كانت بعالم تاني.. كانت عم تفكر ومستغربة من حالا كتير.. كيف هيك تأسفتلو ومشتلو يلي عملو بكل سهولة !!
مو من طبعها تتأسف لحدن.. كتير كان بصير معها مواقف بالعمل مع الموظفين او اشخاص عاديين كانت تعصب ع ناس كتير وتجرح كتير بس ولا مرة اتنازلت واتأسفت حتى لو كانت غلطانة .. حست بالضعف لأول مرة
بس فكرت انه هالشي عادي.. يمكن من تعب السفر.. وإنا بدا تنهي الموضوع مو اكتر
بقيو دقايق كل واحد عم يفكر ويطلع بالتاني لوقت ما فارس انتبه ع حالو.. حك راسه بايده وحكا وهوا عم يبتسم
فارس: مممم خلص انا رح اتركك ترتاحي اي..
زهر: اي ماشي
كان رح يمشي.. بس رجع لف حاله عليها..
اطلعت زهر بلهفة لتشوف شو بده
فارس: شو بدي قلك.. انزلي اسهري معنا بس تفيقي نحنا بنسهر كل يوم سوا
زهر: ممم ماشي ولا يهمك..
ابتسم وغمزا كمان مرة.. طلع وقفل الباب..
انحرجت كتير.. حطت ايديها ع وجهها وحست خدودها يلي سخنو
زهر: شبك ياجدبة.. كل الي عمله انه غمز.. ما عمل شي كبير يعني اكيد عملا بعفوية.. بعدين شو يلي صاار كتير بتعرض لهالشي وما بتفرق معي.. اووف ياا.. بدي حط رايي ونام احسن..
ركضت زهر وقفلت الباب بالمفتاح.. خافت ليتكرر هالشي مع حد غير فارس.. غيرت تيابها ولبست بيجامة ورمت حالا عالسرير.. كان سرير مريح ودافي.. غرفة صغيرة من تخت منفرد وخزانة صغيرة ومراية بجنب الشباك.. عجبت زهر كتير حستا قريبة من غرفتا يلي ببيت اهلها..
غمضت عيونها لتنام بس اول شي اجا ببالها هوا فارس..
كانت مغمضة عيونها وعم تشوفه.. طوله.. سماره.. كتافه العراض الي كلهن عضلات ملفتين للانتباه كتير.. ما بتعرف ليه بتفكر فيه.. بس ما قدرت تشيله من تفكيرها.. دقايق قصيرة وكانت فايتة بسبات عميق..
///بقلم نداء الصوالحي
فاقت عم تحرك ايديها يمين شمال وتتاوب بتعب.. كانت الغرفة معتمة شوي.. كانه وقت الغروب.. اطلعت بالساعة لقتا 6 ونص المسا
زهر: اووف كل هاد نووم الي اكتر من 4 ساعات.. ياربي ما حسيت ع حالي.. اااخ حاسة جسمي كله عم يوجعني
قامت عن السرير وفتحت باب غرفتا بهدوء.. بدا تفوت التواليت بس خايفة تلتقي بحدا.. حتى ما بتعرف وين مطرحه!
تسللت ع روس اصابيعها شوي شوي..
وهيي عم تطلع يمين وشمال لتلاقي التواليت
شادي: بخ
زهر بخوف ورعبة لفت ظهرا لتشوف مين يلي رعبها
زهر: بسم الله.. لك رعبتني
شادي: ما انتي متل الحرامية عم تمشي ع روس اصابعك هههه شو فيه ع شو عم تدوري
زهر بخجل وهيا عم تلعب باصابعها..
زهر: يعني انا.. مافي شي بس كنت بدي اروح ع ال.. انا..
شادي: ههههه ايه ليكو ع يمينك امشي خطوتين بتلاقيه.. بس تخلصي غيري وانزلي نحنا قاعدين تحت
زهر: ماشي
مشيت لعند التواليت وهيا عم تبتسم وتطلع ع شادي يلي راح.. حست بالراحة الفظيعة ناحيته..
فاتت التواليت ورجعت غيرت تيابها وزبطت حالا ونزلت لعندهن.. كانو كلهن مجتمعين بغرفة قعدة فراش عربي عم يتفرجو ع فيلم كوميدي وعم يضحكو
اول ما شافتهن حست كانها ببيتها.. ضحكة عمها يلي كانت نسخة من ضحكة ابوها..
بساطتهم وحنانهم وجوهم العائلي يلي اعطاها الجرئة تتعامل معهم براحة اكبر
زهر: يسعد مساكم.. معلش تاخرت عليكم راحت عليي نومة
ابو فارس: لا عمي ما تقلقي المهم تكوني ارتحتي
زهر: ايه الحمدلله
ام فارس: تعي بنتي تعي اقعدي.. بعدي سلمى خليها تقعد حدك
سلمي: حاضر امي.. تعي زهوور اقعدي هون
قعدت سلمى بينهم وبلشت تحضر معهم وتضحك.. وهيي قاعدة معدتا بلشت تطلع اصوات من الجوع
ام فارس: ييه عليي اتلاقيكي ع لحم بطنك رح قوم اسكبلك اكل رفعتلك اياه وقت اتغدينا ما هان عليي فيقك
زهر: لا لاا خليكي مرتاحة انا بروح خلص اعتبروني منكن مابدي حد يعملي شي ما رح ارتاح هيك
ام فارس: خلص لكان يلا انطلقي من هلء ليكو المطبخ هونيك
زهر: ماشي.. اعمللكن شي معي
ابو فارس: لا سلامتك عمي هلء كنا نشرب قهوة
فارس: انا.. اعمليلي شاي
اطلعت زهر ع فارس يلي عم يطلب منها وهوا عينه عالفيلم ومو معيرها اهتمام.. استفزتها الحركة.. مشيت وقربت من عنده قبل ما تطلع من الغرفة
زهر: اي قوم اعمل لحالك
وكملت مشيها وهيا عم تضحك.. انو ليه هيك حكتله..
اطلع عليها فارس وهيا عم تروح وضحك من قلبه.. بعد دقيقة لحقها عالمطبخ
كانت قاعدة عم تسخن بالاكل اجا من وراها ووقف بلزقها..
فارس: شو ما عملتيلي قهوة
زهر: اي اعمل هيك واقف اخدم حالك
بعدت عنه زهر شوي وكملت تسخين.. رجع قرب منها اكتر
اتوترت وحست قلبها عم يدق.. اول مرة حد بيسترجي يقرب منها هي المسافة.. طول عمرا فارضة شخصيتا ع الكل..
شادي: احم احم..
اتوترت زهر وبعدت عن فارس فوراً وسكبت الاكل بسرعة وطلعت.. شادي الي تدايق وانتبه ل فارس ع تصرفه ونظراته
شادي: ع شو ناوي.. اهدا
فارس: ههههه وشبك محموق هيك
شادي: لاني فاهمك منيح.. اوعك تفكر تعمل عمايلك مع زهر انا عم حذرك
فارس: له له اهدا ما تشد اعصابك رووق اخي
شادي: فااارس.. انا بعرفك منيح بلا حركاتك.. هي بنت عمنا وامانة عنا لهيك خودا من قصيرها ايه
تطلع فيه فارس من فوق لتحت وضرب ع صدره شادي بخفة وغمزه
فارس: مو شغلك..
بلشت الايام تمر مع زهر وهيا ببيت عمها.. استلمت شغلها كانت مديرة انتاج لشركة ازياء.. مكتبها قريب من بيت عمها.. سلموها مفتاح الشقة بس ما راحت لعندا ولا وصلتا وضلتا ببيت عمها متل ما وصوها امها وابوها..
كانت تطلع من البيت بكير وترجع وقت العصر تتغدا وترتاح شوي وتقضي باقي النهار مع بيت عمها..
تقربها من فارس زاد كتير بسبب فضاوته وقعدته بالبيت..
شادي كان من البنك للبيت واحيانا يبقى عليه شوية حسابات واوراق يضل مشغول بغرفته
كانت حياتها راقية وهادية ومستقرة بين حنان عمها ومرة عمها واهتمام الكل فيها
حست بالسعادة بينهم وانها خفيفة عليهم
كانت كل يوم تتصل ع امها وابوها وتطمن عليهم وتبكي كتير وهيا عم تحاكيهم..
شغلها كان ممتاز ومن اول راتب استلمته كان كبير عليها ومضاعف عن كل مرة.. بعتت مبلغ لاهلها وعملت الها حساب بالبنك يلي بيشتغل فيه شادي والباقي طلعت المسا من البيت وشرت فيه هدايا لبيت عمها كلهم..
ام فارس: اجيتي زهر.. طولتي
زهر: ايه والله بس ما كون قلقتكن
سلمى: ايه بابا قلق كتير.. شو هي الكياس كلها
زهر: هي شوية شغلات بسيطة مني الكن بتمنى تعجبكن
قعدت زهر وبلشت تطول الاغراض وتزعهن
زهر: هي الك عمو.. وهي الك مرة عمو.. خدي سلمى هدول الغراض كلهن الك.. فارس هاد الك ان شاء الله يعجبك.. وهااد لشاادي شوف شو حلو حسيته بلبقلك كتير لتروح فيه ع شغلك شفتك فيه
ام فراس: الله يسلمك والله مغلبة حالك
سلمى: يا الله شو حلووين عنجد يسلمو كتيير زهوور
شادي: كتير حلو رح قوم قيسه.. لونه راقي.. يسلم ايديكي يارب
الكل كان عم يطلع ويبتسم ويتفرج عالهدايا الا فارس كان قاعد ومزعوج كتير رغم انه جابتله متلهن..
بعد ما قعدو وحكيو شوي طلعت لغرفتا بدلت تيابها وقعدت ترتاح
دق باب غرفتها قامت لتفتح وطلت من ورا الباب
فارس: فيني فوت
زهر: جوا!! مافي داعي في شي ضروري
دفش الباب وفات لجوا وسكره بعصبية
زهر: لك شو عم تعمل هلء حدا بيشتلق عليك اطلع ابرا
فارس: ماابدي قبل ماتجاوبيني ع سؤالي
زهر: شو تفضل
فارس: شو فيه بينك وبين شادي
زهر: هههه هلء هاد سؤالك.. عادي ابن عمي وبينا شوية شغل وقصة حساب وهيك عادي.. ليه
فارس: كيف عادي! والهدية يلي جبتيلو اياها وبتقولي بتلبقلك وشفتك فيها وابصر شو
زهر: منا جبتلك متلا
فارس: بس اعطيتيني اياها هيك ما حكيتي شي
زهر: بالله عم تحكي جد هلء بتغار متل الولاد الصغار هههه
زقها فارس عالحيط وحاوطها بايديه.. حست حالا رح تغيب عن الوعي.. انفاسها تسارعت
فارس: اي بغار.. بغار كتير وما بدي تفضلي حدا علي.. انا.. انا بحبك زهر عم تفهمي
زهر: انت شو عم تخبص بعد عني
فارس: بتحبيني!
زهر: لا.. بعد عني هيك
فارس: كذاابة عيونك عم تفضحك
زهر: ____
كانت حاسة قلبا رح يوقف.. ما عادت قادرة تسيطر ع مشاعرها.. فيه شي مخليها ما تقدر تقاومه.. اسلوبه.. وكلامه.. تصرفاته المتهورة.. خلته يعلقها فيه
غمضت عيونها وبكل استسلام
فارس: جااوبيني حتى اتركك.. زهررر بتحبيني!!
زهر: ايه بحبك..
////
بقلم نداء الصوالحي
الحب ما عاد حب.. صار عشق.. زهر ما عادت تقدر تقضي يوم بدون ما تشوف فارس وتحكي معه بالساعات.. كانت نظراتهم نظرات عشق.. طول الوقت يحكو ويتهامسو ويضحكو.. اول مرة بتحس بالحب وبتعرف شو يعني حب
يمكن لانه اول مرة تحب.. ما قدرت تقاوم هالمشاعر.. يمكن لانها اول تجربة.. ما كانت تعرف شو الصح وشو الغلط.. شو المسموح وشو الممنوع
رغم سنها المناسب وعقلها الواعي وثقتها العالية
بس قدام فارس كانت عم تضعف كتير
الكل لاحظ حب فارس وزهر لبعض.. من امه وابوه وسلمى وشادي
والكل كان متدايق وخايف من هالعلاقة.. يمكن لانهن عارفين شو نهايتها!!
كانو يحاولو قد ما يقدرو ما يخلوهم يجتمعو لوحدهم.. سلمى ع طول عم تحاول تكون بينهم
امه طول الوقت عم تحاول تلهي ابوه حتى مايشك بشي..
بس شادي.. كان ضايع تماماً
كانت مشاعره عم تقتله.. ما بين حبه ل زهر وخوفه عليها.. اي خوفه عليها من اخوه
بلشت حياتهم تزيد توتر.. فارس وزهر كانو يحسو ع هالشي ويحاولو يتلاقو برا البيت او يسهرو وا بالليل حتى ما يثيرو شكوكهن وينسو قصتهن..
كانو قاعدين سوا عالاسطوح الساعة 12ونص بالليل
زهر: ما بعرف حاسة مرة عمي وسلمى وشادي متدايقين مع وجودنا مع بعض وع طول بيتطلعو فينا بتوتر ليه
فارس: شو بدك فيهن.. عادي اكيد بس مستغربين مو اكتو
المهم هلء انتي مبسوطة معي! انا بحبببك كتير
زهر: هههه وانا بحبك.. بتعرف .. ماتخيلت بيوم اني حب.. كنت طول الوقت ارفض اي اعجاب او اعتراف بالحب او اي عريس بس انت مابعرف في شي ما قدرت قاومه.. حبيتك ببساطة وبسهولة
فعلاً لما بقولو انه الحب بيدخل عالقلب هيك بدون استئذان وبيعشعش جواته
وهيا عم تحكي رن موبايل فارس اطلع فيه وطفا المكالمة ورجع اتطلع في زهر
زهر: مين؟ .. رد
فارس: ولا حدا ماعليكي. المهم اني عم قضي معك احلى ايام بحياتي
رجع رن موبايله.. فتح خط
فارس: اي دندوون بحكي معك بعدين لا تجننيني اتصالات ماشي.. بشوفك.. سلام
سكر وحط الموبايل بجيبه وزهر عم تطلع فيه ومصدومة
زهر: دندون!!
فارس: اي هي رفيقتي الزعرة دينا بدا اياني اطلع اسهر بس مو جاي ع بالي خليني قاعد معك هون يااحلى زهرة
زهر: والله!! اي لا روح بلا ما تزعل دندون.. انا قايمة
فازس: لك تعي شبك.. ع شو عصبتي هي رفيقتي
زهر: كيف رفيقتك وبتسهرو سوا!
قام فارس بعصبية
فارس: زهرر ما تبلشي ها انا ما بحب الخنقة.. رفقاتي شي وانتي شي تاني انا بحبك اه بس ما في داعي للغيرة وهالتصرفات هي مالنا ولاد صغار
اطلعت فيه زهر والدموع بلشت تنزل من عيونها وسحبت حالها ونزلت ع غرفتها.. مرقت من جنب شادي وهيا عم تبكي
شادي: زهر.. زهر شبك
لحقها لغرفتها وفات معها.. رمت حالا عالسرير وقعدت تبكي.. بس هديت قعد حدها وبلش يسالها.. ما ترددت ابدا انها تحكيلو لانها كانت ترتحلو كتير وتحس بالامان بوجوده
حكتله عن كل شي وهيا عم تبكي
شادي: خلص لا تبكي.. والله انا كنت رح خبرك فارس هيك طايش وما بحب الالتزام وكنت عارف رح يصير هالشي بس انتي كنتي واقعة فيه شو اعمل خلص ما تبكي..
هديت وقعدو يحكو شوي وكان شادي يحكيلا مواقف وشغلات عنهن وهني صغار ويضحكها.. لحد ما تعبو وراح شادي لغرفته وارتاح وهيي نامت..
تامي يوم كان فارس رايق ومبسوط وبكلمة وحدة خلا زهر ترضى وتنسى يلي صار وتقبل بالامر هاد.. كانت واقعة بحبه وما فيها تبعد عنه وكانت تجبر حالها توافق ع شغلات بتدايقها كتير..
بلشت زهر تضعف شخصيتا وتقبل وترضى بشغلات كتير ل فارس متل رفقات البنات والسهر معهن والتدخين والمشروب يلي لاحظت انه بياخدهن مع الوقت..
هاد كله كان يزعلها بالبداية بس بعدا تحس انه فارس رح يتركها ويبعد عنها تتراجع بسرعة وترضى وتراضيه كمان
كانت عم تحس ع تصرفاتها الي بلشت تتغير.. ثقتها الي صارت مهزوزة وخايفة باي وقت فارس يتركها او يزعل منها
شغلها يلي بدا يتراجع من كتر سهرها مع فارس وتفكيرها فيه..
هالشغلات هي كانت مدايقة شادي كتير.. طول الوقت يضل جنبها ويحاول يفهمها ويبعدها عم فارس بس ما كانت عم ترد ولا تستوعب
حب فارس عاميها وطابس ع قلبها..
عيونها ما كانت تشوف غيره
وفارس استغل هالشي كتير..
بلش يطلب منها شغلات ما كانت متخيلة بيوم انها ممكن تقدمهن لاي انسان
بلش بقعداتهن وسهراتهن يقرب منها كتير وياخد منها بوسات وشغلات تانية
كانت لحظتها تحس حالا مخدرة وما تقدر تمنعه بس بعدا تندم وتضل طول الليل تبكي وتحلف ما تنعاد بس عبس..
ييجي شادي يواسيها ويحاول يسمع منها بس ما كان فيها تقله شي غير انهن متخانقين او متزاعلين..
كانت تحس بالراحة بوجود شادي وتحس انه انسان مختلف تماماً عن اخوه
كانت نبرة صوته دافية.. قلبه حنون.. لسانه حلو ومابيقول الا الكلام الطيب
علاقاته جيدة وواضحة ومع ناس معينين
كانت معجبة بشخصيته كتير وتتمنى بكل وقت لو كان فارس متله..
بس هيي بتحب فارس.. مغرمه فيه لابعد حدود رغم الصفات السيئة يلي قاعدة عم تكتشفها فيه بس بتحبه وقلبها مو رايد غيره.. يمكن لانه عنجد الحب أعمى..
بلشت هالصفات تأثر عليها وع شخصيتها وشغلها بشكل سلبي..
حاولت كتير تصلحه وتعدل منه بس ما قدرت تغير فيه شي كان اسلوب حياته غربي..
وهني سهرانين متل كل يوم من ورا اهل البيت الي نايمين وكل فكرهن انه زهر نايمة ومأمنة بغرفتها..
عم يضحكو ويحكو وفارس يغرقها بالحب والحكي الحلو يلي ادمنت عليه
طلع شي من جيبته وحطه بحضنها
زهر: شو هاد
فارس: متل ما انتي شايفة
زهر: اي شايفة حبوب بس لشو
فارس: هاتي انا بقلك خدي هي حبة الك وهي حبة الي
زهر: فارس مجنون انت شي.. حبة شو هي
فارس: لك مالك اصفريتي هيك.. حبة سعادة لك عادي كتير ناس بياخدوها.. رهيبة لك رح تخليكي فوق الريح رح تنبسطي كتير
زهر: اي خدهن عني مو ناقصني قرف
فارس: زهر قرف شو!! بقلك حبة سعادة رح تخلينا ننبسط ونضحك شوي مو قصة! بعدين هي غالية كتير وانا شريتا ميشاني انا واياكي هيك بتحكي معي قرف وبعد عني
زهر: اي خلص اسفة ما تزعل بس مابدي لو سمحت بعدها عني
فارس: ماشي زهر براحتك بس انتي هيك ما بتثقي فيني ومابتحبيني عم تضحكي عليي وع حالك
زهر: لك ما تربط كل شي بالحب بحبك ايه وبثق فيك بس مابدي اخدها
فارس: زهر ليه عم تزعليني بكل مرة.. نفسي اطلب منك شي وتحكيلي ايه ولا تكرم.. انا بحبك وجايبهن لنضحك وننبسط حبة ما رح تضر.. انتي ما عندك ثقة فيني بنووب.. خليني قوم احسن شي
زهر: خلص ما تزعل حبيبي بس والله بخاف
فارس: لك اوثقي فيني بحبك انا.. خدي افتحي تمك.. ماتخافي خدي.. يلا ابلعيها
زهر: لك ماا بعرف رح تعلق بزوري
فارس: خدي خدي هي مي
زهر: ايه بلعتا خلص ارتحت!..
فارس: ايه شفتي ليكي ما صار شي هلء بترتاحي شوي وبتنبسطي.. بحبك اناا
زهر: وانا بحبك والله..
بعد وقت قليل بلشت زهر تفقد توازنها وتحس بدوخة.. قامت من مكانا وحاسة حالي رح توقع بارضها
زهر: لك شو هاد ااخ مو شايفة شي ههههه فارس لك انت كم واحد هههههه واحد اتنين تلاتة ههههه
فارس: هههههه يسلملي الرايق تعي تعي
زهر: ههههههه لويين
فارس: وطي صووتك تعي لتحت
زهر: هئ مابدي بدي نااام نعساانة
فارس: اي تعي لنيمك بغرفتك يلا..
فارس سند زهر عليه ونزله لتحت.. حط ايدو ع تمها حتى ما تضحك وما يطلع صوتا.. وصلو الغرفة فات وسكرا بالمفتاح.. اطلعت عليه زهر وهيا عم تتمايل
زهر: خلص روح لك سطلتني بهالحبة بدي نام
فارس: اي تعي لحتى تنامي..
زهر: بدك تنيمني هههه
فارس: اي ياحلوة بلا ما تخافي لوحدك بالليل ايه
حملا فارس وحطا عالتخت وهيا بلشت تتخدر وجسما يرتخي وتحكي بهمس
زهر: ماشي.. ___ طب خلص اتروك ___ خلص ما بدي غير تيابي ___ فارس اتركني __
نعسانة بدي نااام __
فارس: ما رح أئذيكي ما تخافي
كآن فارس عم يحاول ينزع تيابها بهدوء بدون ما حد يحس.. زهر كانت واعية ومفتحة عيونها ع الي بصير بس جسمها مرتخي وحاسة بتقل كبير مو قادرة تبعدو عنها..
بعد اقل من دقيقة وقبل لا يعمل فارس شي اندق باب الغرفة بقوة كبيرة وتخبيط خلا الباب ينكسر.. فات شادي متل المجنون
ارتعب فارس وبلش يتأتأ ويرجع لورا..
هجم عليه لشادي وضل يضرب فيه ويشتمه بدون رحمة
شادي: لك ياكلب ياحقييير شو بتعمل فيها الله يلعنك قلتلك اتركها بحالها والله كنت بعرف نيتك سوودة متلك والله لادبحك
فارس: اااخ لك اتركنييييي والله ما عملت شششي
كانت زهر مرتمية عالسرير ودايخة وعم تبكي كانت واعية وحاسة بالي عم يصير ومو قادرة بنفس الوقت تقوم وتدافع عن حالا..
ع صواتهم العالية فاق كل البيت واجو ركض عالغرفة.. اجا الو فارس وام فارس وسلمى عم يلهتو ومرعوبين
او ما شافو منظر زهر وهيي عالتخت وبتيابها يلي مقطعين شوي ام فارس بلشت تطلم ع وجهها وابو فارس وقع بارضه وحط ايده ع وجهه
ابو فارس: الله ياخدك يافااارس شو عملت بالبنت شوو عملت ببنت اخووي الله يلعنك
سلمى وهيي عم تبكي ركضت ع زهر وبلشت تغسلا وجهها بالمي يلي جنب السرير وتفيق فيها وتهديها
شادي ترك فارس من ايدو ودفشو عالخيط وراح لعند زهر
شادي زهر زهر حبيبتي فيقي صرلك شي عملك شي هالواطي
ركضت ام فارس وقام ابو فارس وقعدو كلهن يفيقو فيها ويغسلولا ويشربوها مي لوعيت وهديت..
بهي اللحظة كان فارس هارب من البيت وما حد انتبه عليه بسبب انشغالهم ب زهر..
بعد شي ساعتين لما هدي الوضع وانتبهو لهروب فارس.. قعدت زهر معهن وحكتلهن يلي صار بالتفصيل وهي عم تبكي وتشهق
شادي حاول كتير يهدي فيها ويطمنها انه ما صار شي
ام فارس: حسبي الله ونعم الوكيل.. الله لا يسامحك يافارس والله هي يلي كنت خايفة منه
ابو فارس: طول عمره هالوسخ عمايله بتخزي وبتفضح بس ما توقعت توصل لبنت عمه وببيتنا كمان.. والله لقتله بايدي هدوول
سلمى: خلص بحياة ربي تهدو الحمدلله الي لحقناه وما أذاها.. بس شادي كيف عرفت اتت نحنا ما حسينا ع شي
شادي: من اول ما تقرب ل زهر وحبها وحبته وانا مو متطمن لنيته قلبي كان ناقزني والله لهيك كنت ضل قوم اطلع واتفقد زهر لاتطمن عليها وليلتها كنت طالع من غرفتي لمحته وهوا نازل وساندها عليه حسيت في شي غلط صاير لحقتهم شوي شوي واول ما فات الغرفة وسكرها ارتعبت والحقتهم وصار يلي صار..
زهر: شكراً شادي ما بعرف لو ما اجيت كان شو صار هلء
ام فارس: برضو الحق عليكي يازهر يابنتي انتس كيف هيك بتاخذي منه حبة ما بتعرفي شو هيا
...
انفجرت زهر بالبكس وهيي عم تحكي
زهر: لاني بحبببه .. حبيته وثقت فييه.. اعطيته قلبي وروحي والامان كله.. ما توقعت يخذلني ويعمل فيني هيك.. ما توقعت بيوم يقدر يإذيني.. كنت مفكرة حبنا اكبر من اي مصالح
حبيتو كتيير والله حبيتو وما كان بدي زعله
ابو فارس: خلص عمي خلص اهدي بغلاتي عندك والله لاخدلك حقك من بين عيونه بس ماتبكي
كان شادي عم يسمع كلامها وبكيها على فارس وقلبه عم يتقطع تقطيع.. سحب حاله وراح ع غرفته..
وزهر اعتذرت منهن وراحت ع غرفتها.. بقيت تبكي طول الليل
كانت موجوعة ومقهورة وحاسة بالغدر
الغدر صعب كتير..
شو صعب توقع بالحب لأول مرة وتقدم كل شي للطرف يلي بتحبه بس هوا يستغل ضعفك ويغدو فيك
شو صعب تحس الانسان يلي بتعشقه وبيملك قلبك.. ذئب عم يحاول يفترسك بأي فرصة..
مسكت زهر الموبايل ومسحت دموعها ودقت ع ابوها لتحكي معه وهيي عم تشهق من قوة الوجع يلي بقلها..
بعد شوي رد ابوها بلهفة وفرحة
عادل: اهلا وسهلا بحبية بابا
زهر: مسا الخير بابا
عادل: مسا الورد كيفك ياروحي شو مفيقك لهلء.. الوقت عندكن نص ليل
زهر: ايه لا بس كنت قاعدة مو جاييني نوم
عادل: زهر!! شبه صوتك شو فيه!!!!
زهر: مافي شي بابا منيحة
بلش صوت زهر يختفي ويختنق وما قدرت تتمالك نفسها وانفجرت بالبكي
ابوها قلق كتير وصار دمو فاير متل النار
عادل: زهر زهررر حبيبتي شو فيه بابا حد مزعلك!! صاير معك شي
زهر: ما في شي بابا والله ما في شي بس تعباانة ومشتقاالكن كتير مشتاقة لحضنك وحضن ماماا مشتاقة للبيت ولغرفتي وللجنينة
ياريتني ما سافرت وبعدت عنكن يابابا
عادل: ياروح بابا ونحنا مشتاقينلك كتير والبيت بدونك ما اله طعمة.. بس ما بدي تعمل هيك بحالك.. بدي اياكي متفائلة ومبسوطة ورافعة راسك
بدي زهرة الغاردينيا تبعتي تضل مفتحة وريحيتا الحلوة فايحة بكل مكان
زهر: ان شاء الله بابا
عادل: حبيبتي اهدي وما بدي اسمع صوتك عم تبكي بعد هلء
كملت زهر مكالمتا مع ابوها يلي خفف عنها كتير وصوته ريح قلبها.. بس ما قدرت تصارحه ماقدرت تحكيله شو يلي صار معا
ما قدرت تحكيله بنتك ضعفت.. بنتك انذلت
بنتك وقعت بالحب وانغدرت
ما قدرت تقله انه الغاردينيا يلي رباها بصعوبة وحرص عم تدبل شوي شوي بهالمكان يلي ما بيناسبها..
مر اسبوعين ع الحادثة يلي صارت مع زهر وهيي نفسيتها عم تتراجع و تتعب.. اخدت اجازة من شغلا وبقيت بالبيت ما بتطلع منه بنوب.. حتى غرفتها ما بتطلع منها..
طول الوقت قاعدة وعم تطلع من الشباك ع الناس والشوارع والاطفال يلي بتركض وتلعب
اتمنت بكل لحظة لو انها لساتها طفلة بريئة ما بتعرف الحب ولا الحزن ولا الغدر ما بتعرف شي ولا بتفهم شي..
حسدت كل الاطفال يلي قاعدين عم يلعبو قدامها..
شادي كان طول الوقت يقعد معها ويحاكيها ويضحكها يجبلها شغلات طيبة بتحبها.. طلب منها كتير ياخدها مشوار ويخليها تغير جو بس كانت ترفض
ابو فارس كان طول الوقت حزين وضميره عم يأنبه..
وام فارس كانت زعلانة ع زهر البنت الطيبة يلي ما شافو منا شر ابداً ومشتاقة لابنها فارس يلي لسا ما اجا لهلء ورغم كل شي بيضل ابنها..
فارس كان يتصل ع اهله ويعتذرلهن طول الوقت ويحاول يتأسف ع الي عمله ويبين ندمه.. بس كانو يصدوه بكل مرة..
اكتر من مرة يتصل ع زهر ويبعتلا رسائل اعتذار وانه ما كان قصدع وانه لساته بحبها وما كان بدو يإذيها.. بس كمان زهر ما قدرت ترد عليه ولا تحاكيه ابداً بعد الي عمله..
كانت قاعدة هيا وسلمى وشادي وعم يحكو ويحاولو يضحكوها
شادي: زهوور الي ساعة عم احكي وانتي،شاادرة وين
زهر: والله معك مو شاردة ههه..
سلمى: لك مو شاردة بس سرحانة بالاطفال طول الوقت موو
زهر: اي يالله شو بحسدهن.. ياريتني طفلة وما اكبر بنوب
سلمى: مل بصير كل الاطفال مصيرها تكبر.. بدي اقوم اعمل قهوة اعمللكن معي
زهر: لا مو جاي ع بالي
شادي: اعمليلي معك.. زهر بدي احكي معك شوي
زهر: اي شادي تفضل
شادي: بتعرفي.. ممم انا.. ما بعرف شو بدي قلك
زهر: ههههههه لك شلك متوتر احكي
شادي: انا كتير معجب فيكي.. او انا بحبك
زهر:____
شادي: خلص ما بدي تحكي شي بعرف الوقت مو مناسب بس ما كان فيني اكتم هالكلمة اكتر من هيك.. اذا اتدايقتي اعتبريني ما قلت شي
زهر: لك اقعد لوين رايح.. اقعد شوي..
شادي بتعرف.. انا هلء لسا موجوعة وما نسيت فارس.. حب فارس لسا جوات قلبي.. بس وجع قلبي اكبر من حبه.. انا ما برفضك وما بقلك ما بحبك.. بس انا تعبانة.. انا لسا ما نسيت وطالعة من علاقة فاشلة.. والثقة عندي هلء تقريباً معدومة
لهيك انا ما بدي اظلمك معي.. انت الف بنت بتتمناك.. فيك كل المواصفات الي بتحلم فيهاواي صبية
فيك مواصفات كنت بتمنى تكون موجودة عند فارس نفسه..
بس انا فعلاً علء،مو جاهزة لشي.. او يمكن ما رح اقدر اجهز لوقت طوييل طوييل كتير..
شادي: انا متفهم وضعك.. بس بدي قلك انو انا ناطرك.. ناطرك لوقت ما تجهزي.. قد ما رح يطول الانتظار رح ضل ناطرك
ابتسمت زهر ونزلت راسها.. ابتسم شادي وطلع من عندا من الغرفة..
اتدايقت كتير من طلب شادي.. رغم انه قلبها برتحله كتير.. جسما بكون مرتاح نفسيتها بتكون مرتاحة. بتكون حاسة بالامان والحنان بس بمجرد وجوده جنبها.. بس مع هيك ما فيها تعطيه قلبها
يمكن لانه قلبها مو بس موجوع ومو بس لانه اخوه.. بس مجرد انه قلبها لسا متعلق بفارس رغم كل شي عملو.. لسا عم تفكر فيه وعم تحنله..
بعد بفترة قصيرة بلشت زهر ترجع لطبيعتها ولشغلها وحياتها..
علاقتها هيا وشادي اتعدت علاقة القرابة صارو اصدقاء كتير.. طول الوقت سوا.. يوصلها ع شغلها والمسا يروح عالشغل ياخدها ويرجعو عالبيت سوا..
كان شادي متل الدوا بطيء المفعول يلي عم يعالج زهر ويحاول يشفي جروحها.. كان يعاملها بكل رقة واحترام وذوق.. وهالشي كان اله تأثير كبير ع شخصية زهر الي رجعتلا شوي من الثقة بالاشخاص.. بس لسا ثقتها بحالا كانت ضعيفة ومو ثابتة
شادي حاسس انه عم يعلقها فيه بس هالشي رح يطول.. كان مستعد ينطرها العمر كله ..
بلشت زهر تنشغل شوي وتنسى يلي صار وتطلع من الجو المعتم يلي عايشة فيه..
زادت ساعات العمل حتى تحاول تنشغل اكتر.. كانت تروح ع الشغل من بكير وترجع المسا تقعد معهن شوي وتطلع ع غرفتها..
بيوم كانت راجعة من الشغل المسا هيا وشادي وعم يضحكو متل كل يوم
اول ما فاتو البيت شافو ام فارس وابو فارس وسلمى قاعدين ومعهن فارس..
هالشي جنن شادي وكان رح يخليه يهجم عليه ويضربه بس ابوه منعه وبعده عنه..
كانت زهر واقفة مطرحها ومو مصدقة يلي عم تشوفو بعيونها..
قلبها وجعها كتير وبنفس الوقت حاسة انها لساتها بتحبه.. قلبها دق بصورة عجيبة الم مع حب.. كيف هي المشاعر اتلخبطت جوا قلبها سوا ما بتعرف
ضلت واقفة مطرحها بدون ما تتحرك
شادي انزعج كتير وحس انه رح يصير شي مو لصالحه سحب حالو وطلع ع غرفته..
ابو فارس: عمي تعي اقعدي شوي فارس عنده حكي بده يقوله
ضلت زهر مكانا وعم تطلع بفارس والدموع بلشت تتجمع بعيونها.. قرب فارس لعندها
فارس: زهر انا اسفة.. بترجاكي سامحيني.. مابعرف ليه عملت هيك. ضعفت والله.. سامحيني انا بحبك
بلحظة كان كف نازل ع خد فارس رن بكل البيت.. لدرجة اهتزت الحيطان من قوته..
فارس حط ايده مطرح الكف وما حكا ولا شي..
الكل كان مصدوم وما نطق بشي وحسه انهن ما فيهم يعترضو وهالشي من حقها ويمكن كمان من حقها تعمل اكتر من هيك..
زهر بصوت عم يرجف ودموع عم تنزل ورا بعضها بدون توقف
زهر: انت كيف الك عين تيجي لهون.. كيف الك عين تشوفني وتحكي مغي بعد يلي صار.. لك كيف هان عليك تعمل فيني هيك.. استغليت ضعفي وحبي الك.. استغليت كل شي لحتى تاخد يلي بدك اياه.. بس ربي كان ارحم منك ونجاني من شرك
شو بدك هلء.. شوووو احكي
ام فارس: اهدي خلص حبيبتي.. والله فارس جاي ليصلح كل شي ويتزوجك
زهر: شوووو هههههه يتزوجي !!!
فارس: اي زهر.. بدي اتزوجك حتى تسامحيني انا ما كان بدي إئذيكي ولا اجرحك والله
زهر: لكان الي عملتو شو كان؟؟!
ابو فارس: يابنتي فارس رجع وندمان وطالب منك السماح والقرب ع سنة الله ورسوله.. واذا ربنا بيغفر نحنا مين حتى ما نغفر
زهر: ماشي عمي بس خليني ارتاح شوي وفكر براحتي.. بعدين بدي اخد شورة اهلي.. بترجاكن مو هلء..بدي شوية وقت
ابو فارس: حقك عمي والي بدك اياه بصير انتي بنت اخي ومتل بنتي وما بدنا غير تكوني رضيانة ومبسوطة
زهر: تسلم عمي.. عم اذنكن
طلعت زهر ع غرفتها ركض بدون ما تطلع ولا نظرة ع فارس يلي كان عم يتوسلها بعيونه..
فاتت غرفتها ورمت حالها عالسرير وبلشت تبكي وتطلع كل شي جواتها
كانت مقهورة وموجوعة منه كتير.. بتحبه بس مافيها تسامحه..
بعد يومين من التفكير والقلق والسهر قررت تعطي جوابها..
شادي يلي عرف بالي صار بعد يومين جن جنانه ونزل لاهله وهني قاعدين كلهن واعترف بحبه لزهر.. خبرهن قديه بحبها وقديه حاول ليرجعها ويحييها من اول وجديد..قديه نطرها حتى ترجع اله مو لفارس
ابو فارس وام فارس حسو حالهن بين نارين.. حسو البيت عن يطربق فوق روسهم
ماعرفو يحملو مين السبب
زهر يلي اجت ضيفة خفيفة بس قلبت حياتهم رأساً على عقب..
ولا ع ابنهم فارس يلي استغل البنت
ولا شادي يلي طلع معهم بالسحبة..
ضل البيت بصراع متواصل لحد ما قرر ابو فارس يخبر زهر وياخد رأيها والي بتوافق عليه رح تتزوجه بإرادتها..
كان هالخيار صعب كتير ع زهر وتعبها نفسياً
ليش مجبورة توافق! ليه لازم تتزوج.. بس هيا ما بدها تتزوج..
بس حست انه لازم تختار حتى تنهي هالصراع وتوقف كل يلي عم يصير..
كان الخيار صعب ما بين الاثنين
بدا توافق ع فارس يلي كان متل الأفعى ما بتثق فيه ومو قادرة تنسى يلي عملو معها وخايفة يجرحها متل ما جرحها من قبل.. بس قلبها لسا بحبه ومتعلق فيه..
ولا شادي يلي بتثق فيه اكتر من حالها وبترتاح لوجوده وبتحس بالحنان والامان معه.. بس قلبها مو قادر يتقبله اكتر من صديق واخ..
أخدت قرارها وحاولت تلتقط انفاسها وراحت لتخبر عمها
كانو مجتمعين وبحيكو بالموضوع اول ما فاتت سكتو وشادي اطلع فيها وابتسملها بهدوء كإنه عم يطمنها بنظراته..
وفارس يلي بطلع فيها بثقة متل يلي عارف جوابه شو حيكون
قعدت حد عمها وابتسمت وخبرته انه هي خلاص موافقة
ابو فارس: اي عمي الي بدك اياه
زهر: عمي انا اخترت واقتنعت ب اختياري.. انا بدي فارس
كان شادي مصدوم من ردة فعلها.. دمعت عيونه وسحب هالو وقام بهدوء..
بعد ما خبرو اهلها وطلبوها من عادل والي وافق بدموع الفرحة.. بعد ما شادي سحب حالو وطلع من البيت بلحظة الخطوبة وكتب الكتاب بس مو حابب يشوف هي اللحظة..
الكل عم يجهز حالو.. ام فارس. ابو فارس.. سلمى.. وزهر يلي رفضت تروح ع اي كوافير ولبست لوحدها
فستان بعتلا اياه ابوها لتلبسه..
واكليل بورد الغاردينيا..
لبست وجهزت حالها بغرفتها وقعدت تنطر المعازيم والشيخ..
كانت واقفة عند شباك الغرفة يلي قضت فيها ثلاث سنين من البكي والعذاب.. واقفة وعم تطلع لبرا وضهرها للباب.. بتفرك ايديها بتوتر وجسمها عم يرتعش كتير.. خطوة وحدة رح تغير حياتها كليا.. معقول هالشي يلي بتعمله صح.. معقول هاد الاختيار السليم
...
كانت لابسة فستان دهبي طويل مرصع بالخرز الذهبي.. الديل بيجر وراها وحوافه كلها من الدنتيل الأبيض شعرها البني الفارد يلي واصل لآخر ظهرها.. الإكليل المزين بورد الغاردينيا الابيض..
فاتت لعندها سلمى بعيونها نظرة حزن
سلمى: شو جهزتي!
حطت إيدها ع قلبها بألم ولفت وجهها وحكت بصوت عم يرجف
زهر: قديه بقي!!
سلمى: ما بقي كتير ساعة وبكون الكل وصل
زهر: شادي راح!
سلمي: ايه قبل شوي
زهر: سلمى ساعديني انا ما فيني لازم تساعديني..
سلمى: بشو ساعدك شو فيه
زهر: انا.. انا حاسة حالي عم اغلط.. مافيني ارتبط ب فارس.. انا حبيته اي.. بس مافيني اوثق فيه بعد هيك.. صح سلمى! جاوبيني رح عيش بعذاب مو!!
سلمى: انا رح ساعدك شو بدك زهر احكي
زهر: بدي اطلع من هون
سلمى: لوين
زهر: ما بعرف لوين ما كان.. ما بعرف.. اي اي شقتي.. شقة الشغل بدي روح هونيك
سلمى: بس بابا.. وماما.. رح ينزعجوو
زهر: بعرف انا اسفة بس مافيني كمل..
شلحت زهر بسرعة رهيبة فستانها ولبست جينز وبلوزة وبوت وحطت شال ع راسها ومسحت مكياجها بتهور.. وطلعت من الغرفة قبل ما تحكي سلمى شي.. سحبتها من ايدها
زهر: غطيني.. خليني اطلع ما بدي ضل هون بترجاكي
سلمى: اي خلص امشي امشي انا رح فهم امي وابي الوضع..
طلعت زهر بصعوبة من البيت وهربت من عيون الناس يلي كانت بالبيت..
راحت ع الشقة يلي اعطوها اياها بالشغل.. قعدت فيها وهيا متوترة وخايفة من يلي رح يصير
ما بتعرف هيي عملت الصح ولا غلطت بس كل يلي بتعرفه انها هربت وارتاحت من شي كانت رح تغلط كتير لو كملته..
سلمى خبرت امها وابوها ب يلي صار وحكتلهن موقف زهر وانها مترددة وخايفة كتير ومابدها يزعلو منهن وانها بتتأسفلهن
اعتذرو من الضيوف وخبروهن بالتأجيل..
فارس جن جنانه وحس حاله رح يطق من يلي عملته زهر
عروسته هربت منه!! بيوم خطوبتهم..
اتصلت زهر ع ابوها وهيا عم تبكي وحاسة حالها رح تختنئ..
خبرته كل شي صار معها بهستيريا وبسرعة لدرجة ما فهم منها شي.. بس كل يلي قلها اياه ارجعي فورا ما تضلي بهالبلد اكتر..
شادي رجع عالبيت وعرف بالي صار والفرحة ما كانت سيعاه بس ماقدر يحكي شي ولا يعمل شي كان بيكفيه انه زهر ما داست ع قلبه..
بعد ثلاث ايام رجعت زهر عالبيت بعد ما حجزت تذكرة للسفر لترجع عن اهلها.. حبت تروح وتقعد معهن وتتاسفلهن ع كل شي صار وتودعهن..
اول ما وصلت البيت كان ابو فارس وام فارس وسلمى وفارس بس شافها فارس اطلع فيها من فوق لتحت وطلع فوراً.. ابتسمت من قلبها وماحست بالذنب من ناحيتو بالعكس حست انها قهرته متل ما قهرها.. سلمت عليهن وقعدت
زهر: ما بعرف شو بدي قلكن.. بعرف اني تقلت عليكن وقلبت حياتكن فوقاني تحتاني.. ما كان بدي يصير هيك والله.. بس مع كل هاد انا سعيدة اني عشت معكم هالسنين واكلنا سوا وشربنا سوا.. حبيتكم متل اهلي واكتر.. بتمنى تسامحوني
ابو فارس: انتي يلي سامحينا ياعمي ع الي عمله فارس ومافينا نجبرك ع شي اذا اترددتي واتراجعتي ف هالشي من حقك.. والله ما بدنا شي غير تكوني مبسوطة وتنسي يلي صار.. خلص اعتبريها صفحة وطويناها..
ام فارس: الله يرضى عليكي وييسرلك الخير يارب يلي صار ما كان ذنب حدا.. وان شاء الله بتيجي بتزورينا مرة تانية ما تندمي انك اجيتي حبيبتي..
سلمى: رح اشتقلك كتير
زهر: وانا رح اشتقلك واشتقلكن اكتر والله عنجد سامحوني.. بس وينو شادي..
سلمى: شادي بغرفته فوق
طلعت زهر لعند شادي ع غرفته دقت الباب وفاتت.. كان قاعد عم يكتب حسابات للبنك..
زهر: مشغول!
قام شادي من مكانه والابتسامة ع وجهه
شادي: زهرر!! لا لا بالعكس ما عليي شي كيفك ان شاء الله احسن
زهر: ايه الحمدلله.. بس جاية اودعك ولأتشكرك ع كل شي عملته معي.. انت كنت الاخ والصديق والرفيق وكل شي كنت بحتاجه.. لولاك ما كنت بعرف شو ممكن صار معي مابعرف كيف ممكن ردلك هالشي
شادي: مابدي غير تكوني مرتاحة ومبسوطة.. وفيكي ترديه لما اجي لعندكن زيارة
اطلعت فيه زهر وابتسمت..
زهر: رح بستناك..
تاني نهار كانت زهر راجعة ع بيت اهلها.. حضنت وبكيت وإتألمت وضحكت.. كانت حاسة بشوقووحب وفرحة كبيرة برجعتها ع بيتها بين ابوها وامها..
#بعد_خمسة_شهور
كآنت قاعدة بالجنينة الخلفية للبيت عم تسقى ب زهر الغاردينيا يلي عم تشرف عليه.. ابتسامتها الناعمة.. ثقتها يلي رجعت وأقوى من قبل.. حياتها يلي صارت أفضل..
علاقتها مع بيت عمها كانت كويسة كتير وع طول ع تواصل..
مرتاحة وناسية كل شي صار معها.. وعم تفكر بس لو انها ما خطت هالخطوة واتزوجت فارس كان شو صار فيها
او كيف حالها هلء
معقول كان عاشت بخيانة بتعب بحياة ذل!!
تنهدت وخلصت سقي الورد ونده عليها ابوها لتيجي لجوا
زهر: شو فيه بابا
عادل: تعي تعي في شخص جاي ليشوفك
زهر: ميين!!
عادل: لك بس تعي
مشيت زهر بخطوات ثابتة وبهدوء وفاتت للصالون.. لقت شادي..
حامل بوكيه ورد وبجنبه شنتاية سفر
زهر: شاادي!!!!
شادي: زهر.. كيفك
زهر: لك شو هالمفاجأة عنجد فرحتني كتير.. اهلا وسهلاً..
شادي: بس هيك!
زهر: هههه شو!
شادي: جاي لأقعد عندكو بالبيت.. ويمكن جاي لأستقر وأسس عائلة.. فشو رأيك
زهر: بشو!
شادي: تأسسي معي العائلة
زهر: ما بعرف خليني فكر
شادي: اي شو عليه.. خبرتك بنطر العمر كله
زهر: ممم لا ما رح نطرك العمر كله.. اي موافقة
إنتهت
رواية متمرده عشقها الشيطان من هنا
رواية عذرا لقد نفذ رصيدكم من هنا
رواية نار قلبي وانكسار فؤادي من هنا
رواية قاصره في قلب صعيدي من هنا
رواية مالم تخبرنا به الحياه من هنا
رواية اللعب مع الشياطين من هنا
رواية أحببت مربية ابنتي كامله من هنا
❤️🌺❤️💙🌺❤️💙🌺❤️💙🌺❤️💙🌺❤️💙🌺
الروايات الكامله والحصريه من هنا
انضموا معنا على تليجرام ليصلكم اشعار بالروايات فور نزولها من هنا
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺