رواية بنت إبليس الفصل الرابع والخامس والسادس والسابع بقلم الكاتبه حياة محمد حصريه وجديده على مدونة أفكارنا

 رواية بنت إبليس الفصل الرابع والخامس والسادس والسابع بقلم الكاتبه حياة محمد حصريه وجديده على مدونة أفكارنا 

أيها السيدات و الساده لا تهينوا النعمه لأنها زائله يحكي إن رجل كان عنده من الخير كتير ومن الرزق الواسع .

كان خارج ولاحط إن جزمته متربه فأخذ كسرة خبز ومسح بها حذاءه ورماها فعاقبه الله بزوال النعمه منه.ويقال إنه من شدة جوعه دور في كل مكان عن لقمه يأكلها فلم يجد إلا نفس كسرة الخبز إللى مسح بها حذاءه فأكلها.

طيب أنا ليه بحكى الحكايه دى

هقولكم لأن فيه برضو حكايه.حكاية ابراهيم الداجى وهو من عائلة من أكبر عائلات الصعيد عاش حياته كلها في عز وخير ونعمه الكل بيمدح عائلته ويصفهم بأهل الخير والكرم والجود مافي حد إلتجأ لهم إلا وساعدوه مافى فقير أو محتاج إلا وأعطوه وأكرموه .عاش وكبر ابراهيم وهو محسوب من الأعيان وكبارات البلد كان بيمتلك أكتر من ١٠٠فدان وعنده من الخير الكتير والكتير لكنه عاش حياته كلها ميحسبش حساب بكره تقولوا كريم أقول سفيه أصل الكرم له ناسه ومواقفه أما ابراهيم لأ كان بيصرف من غير حساب.مثلا  لما ربنا رزقه بإبنه الوحيد متوقفتش الدبايح مده سبع ايام يدبح ويفرق ويأكل كل أهل البلد.

ويوم العيد كان يقف بعد الصلاة ويرمى الفلوس على الأرض ويتلم حواليه الأطفال يلموا الفلوس من على الأرض.وياسلام لو اتنصب مولد في البلد كان بيعزم كل الموجودين من مداحين ومغنين وغوازى وحتى بتوع المراجيح والألعاب ياكلوا ويناموا ويتمتعوا في دواره.طول مدة المولد ومن ده كتير وكتير

والناس عرفت عنه بذخه وإيده الفرطه فإستغلوه كالعادة حتى شوفوا 

_ مساء الخير يا حاج ابراهيم 

- مساء النور خير 

_ إحنا جايبن لك في شكوه يرضيك يا حاج أقوله المهر شويه وميكفيش يقولى يا ترضى بيه يا كل واحد يروح في حاله وانت شايف كل حاجه غاليه والدنيا نار أعمل إيه 

ابراهيم: لا ميرضنيش.

الراجل التانى: وأنا أعمل إيه الدنيا غاليه والفلوس على قد القد.أعمل إيه بس يا حاج 

ابراهيم: سيبها على الله ثم عليا وشوار البت كله هديه منى لكم.

الراجل بتأثر: كتر خيرك يا حاج ربنا يخليك لينا ويزيدك من فضله.

الراجل التانى: طيب وإبنى مالوش من الحب جانب.

فيضحك ابراهيم بصوت عالي وبعدها قال: ياسلام عنيا للعريس وهديته خمس قراريط له يشتغل ويصرف على مراته منهم.

فهب الراجل يبوس إيده ويقول (( ربنا يكرمك يا حاج ربنا يخليك لينا ربنا يزيدك من نعيمه))

وخرج الإتنين وهما مبسوطين وفي الشارع قال الأول لنسيبه:(( مش قلت لك أدينا جوزنا العيال وجهزناهم ومدفعناش ولا مليم وخدنا كمان خمس قراريط ببلاش))

الراجل التانى: أنا لو كنت عارف كنت جيت له من زمان.

واحد تانى: يا حاج ابراهيم بارك لي يا حاج مراتى ولدت وجابت ولد 

ابراهيم: ألف مبروك ربنا يخليه لك.

الراجل: وسميت إبنى ابراهيم على اسمك وعايز حلاوه الإسم.

ابراهيم: وماله خد حلاوه الإسم وحط إيده في جيبه وخرج مائة جنيه كاملين في وقت كان الراجل بيتأجر طول اليوم بخمسه جنيه.

ومن ده كتير.

كبر ابراهيم  وإتمنى  العزوه والأولاد لكن ربنا  مكتبش له إلا إبنه الوحيد اللى كبر وهو مش عاجبه حال أبوه وخاصه ان أمه بدأت تزن في ودانه

(( شفت أبوك وعمأيله هيخربنا.))

(( والله العظيم أبوك هيفقرنا))

(( بطريقته دى مش هنلاقى ناكل وهنمد إيدنا للناس))

(( عارف مين أول من يتشمت فينا شلة الألاضيش إللى ملمومين حولين أبوك))

وطبعا كلام الأم كان الدافع لإبنها إنه يسرق من أملاك أبوه بالتوكيل إللى معاه شويه بشويه ويمكن أبوه كان عارف بس ده إبنه الحيله ياخد إللى يكفيه أصل كل حاجه في النهاية له.ماهو الحيله ومن حقه يتمتع بخير أبوه.

عدت سنين وكبر ابراهيم وكسى الشيب شعره.وهو زى ماهو أما إبنه كان مش عاجبه الحال وخاصه بعد موت أمه وجواز أبوه من واحدة تانيه وهو ده اللى جرأه في إنه يزيد في سرقته لحد ما في يوم رجع ابراهيم من مولد السيد البدوي وقبل ما يخش الدوار لقى العمده داخل ومعاه محضر من المحكمة.جاى عشان يسلم الدوار لمالكه الجديد.

إتجنن ابراهيم و زعق وهاج لكن ما باليد حيله وكانت الكارثة إن إبنه باع كل حاجه الدوار والأرضى والمعالف حتى البهائم واضطر ابراهيم إنه يخرج من البيت بشنطة هدومه والبلد كلها كانت بتتفرج عليه والناس مابين شامت أو غضبان أو حزين وأسف  على حال ابراهيم إللى بهدله إبنه في أخر أيامه.

أما ابراهيم إتخلى عنه الجميع بعد ما خسر كل فلوسه وكل أملاكه.

لف ابراهيم على بيوتهم واحد واحد والكل بيتهرب منه خايفين ليطلب منهم يردوا له أرضه ولا فلوسه..

وبالفعل لقى ابراهيم نفسه وحيد وفي الشارع بلا بيت ولامأوى بس رحمة ربنا كانت في الست الأصيلة إللى إتجوزها.كانت طببه وبنت حلال أخدته معاها لبيت أبوها .

وفي يوم وليله كان إبراهيم تربية العز عايش في بيت قديم مبنى بالطين وسقفه من الغاب والحطب ولأنه كان مفلس ومش معاه ولا جنيه واحد أضطر يبيع دهب مراته ولما خلص اضطر يبيع هدومه . عشان ياكل هو ومراته.

دولابه بقى فاضى بعد ما كان مليان بعباياته الكاشمير وقفاطين الصوف وجلاليبه الغاليه باع كل حاجه وكل همه يلاقى إبنه إللى اختفى من يوم ما سرقه.

أما مراته لما حست إن الفلوس إللى معاهم هتخلص ومفيش حاجه تتباع فباعت الحلق الدهب والخاتم أخر حاجه معاها وإشترت ماكينة دش للفول وطاسه ومقصوصه وشعله وعملت قدام بيت أبوها نصبه صغيرة تعمل فيها الطعميه والفول ومهتمتش بكلام الناس ولا غمزهم ولمزهم عليها وعلى جوزها.

وكل يوم تحط الفلوس اللى ربنا بيرزقها بيهم في إيد جوزها (( أصل صعب على راجل عاش في العز والراحه إنه يبقى مفلس وجيبه فاضي)) وهو يوعدها إنه هيرجع لها فلوسها أول ما يلاقى إبنه.

مرت شهور وشهور والوضع زى ما هو حتى إن الحاج ابراهيم كان بيساعد مراته في شغل الفول والطعميه فمتستغربش لما تلاقيه قاعد على كرسي خشب وماسك المقصوصه وبيطلع الطعميه أو بيعبى الفول للزباين لحد ما فيوم جه واحد عليه وهو بيأكد له إنه شاف إبنه في مصر (( القاهره)) وإن إبنه بقى تاجر كبير وعنده فلوس ومحلات وعقارات.فأخد ابراهيم العنوان وجرى بسرعه يركب القطار عشان يروح القاهره ويقابل إبنه.وياريته ماراح ولا سافر.أصل إللى حصل ماكان على البال 

-مين إللى بيخبط؟

ابراهيم: افتح يابنى الباب.

فتح الباب وشاف الضيف إللى مش عامل حسابه.فقال بشدة: جاى ليه وعايز إيه.

ابراهيم بشوق معرفش يخبيه: إزيك يابنى عامل إيه ؟ 

إبنه:______

ابراهيم: بقى تعمل فيا كده تاخد فلوسى وتهرب طيب بتهرب ليه ده كل الفلوس لك من بعدى

إبنه: هو إنت كنت هتخلى لى حاجه ده أنا كنت هشحت بسببك.وبسبب شلة الألاضيش إللى كانوا حواليك.قولى حد فيهم بص لك ولا حتى سأل عنك بعد ما أخدت الفلوس؟

ابراهيم: عندك حق يا بنى خلاص اتعلمت الدرس خلاص رجع لى فلوسى وأنا أوعدك إنى هاحافظ عليها 

إبنه: أرجع إيه ؟ إنت بتحلم ولا حد قالك إنى داقق عصافير (( المقصود بها ساذج أو أهبل أو مجنون)).ملكش عندى حاجه 

ابراهيم: خلاص خلاص أنا مش عايزهم كلهم بس على الأقل اشترى لى بيت وادينى فلوس أعيش بيها.

إبنه: عشان أول مايرجع القرش في إيدك ترجع تلم الشله حواليك 

ابراهيم: لا يا بنى والله ما هلمهم بس رجع لى جزء من فلوسى أوحتى ابعت لى شهريه أصرف على بيتى ومراتى.

إبنه: على أساس أنا قاعد لك على بنك شوف 

لو عايز أنا ممكن أشوف لك بيت اوضه وصاله وحمام هنا واخليك تشتغل معايا هنا أى حاجة بس بشرط

ابراهيم: إيه هو

إبنه: تطلق مراتك. 

ابراهيم: ليه يا بنى حرام عليك دى معملتش حاجه وبنت حلال ليه.

إبنه: أنا مش مسؤول أصرف عليها 

ابراهيم:وأجازيها عن أصلها الطيب إنى أرميها وأطلقها بعد ما عاشت معايا فى الحلوه ومشتاكتش في المره.

إبنه: ده إللى عندى ياتطلقها وتيجى هنا تشتغل عندى يا ملكش فلوس عندى.

ابراهيم: جيبت قسوه القلب دى كلها منين؟ ده إنت مش بنى أدم ده إنت شيطان ده إنت إبليس منك لله ربنا ينتقملى منك حسبي الله ونعم الوكيل فيك يا رب تشوفها من أعز أولادك يارب يوجعوك زى ما وجعتنى

منك لله زى مااهنتى على كبر.

وخرج ابراهيم من البيت ومش فى الشارع وهو بيردد نفس الكلام: منك لله يا شيطان .

منك لله يا إبليس حسبى الله ونعم الوكيل حسبي الله ونعم الوكيل يارب تشوفها من أعز أولادك يا رب يوجعوك زى ما وجعتنى بقى تسرقنى وعايزنى أشتغل عندك بفلوسى منك لله يا إبليس.

أظن كده الكل عرف مين هو ابراهيم ومين هو إبنه.والكل عرف مين أول واحد أطلق عليه اسم إبليس.

وبرضه الكل عرف سبب قسوة قلب إبليس على الناس لأنه بدأ بأبوه.

وأظن برضه الكل يتوقع إيه هتكون نهاية إبليس وعلى إيد مين أصل الدنيا دواره

$$$$$$$$$$$$$$$$$$$

إعذرونى على التأخير لأنى بقالى أكتر من خمس ايام بهرب من البارت ده ومش عايزه أكتبه.

كنت دايما بسأل يا ترى الكاتب جاب فكرة رواياته منين؟ هل كلها خيال ولا فيه شخصيات حقيقيه.

ولروايتى دى فيها شخصيتين حقيقيتين.استمديت منهم روايتى

الأولى هى ابليس وده شخص حقيقى وللأسف الشديد كان بيشتغل إلى جانب الربا مدرس لغه عربيه ودين.للمرحله الإبتدائية 

والشخصية التانيه والحقيقة هى قصه ابراهيم نفسها كلها حقيقة حكاها لى والدي أطال الله عمره بس إبنه مسرقوش بس خسر كل فلوسه وعاش مع زوجته في بيع الطعميه.ولأن في عصره مكانتش الطعميه معروفه في الأرياف كان الراجل بيملا (( المشنه)) طعميه وزوجته تشيلها وتلف على البيوت تبيعها للناس لحد ما مات وهو من أفقر الناس.

وبرضه مستنيه الليك الحلو والتشجيع واستنوا باقى الأحداث وصدقونى هتكون صادمه وشكرا حياة محمد

خليك كبير في عين أولادك وأوعى تعمل حاجه تنزلك من نظرهم لأن ساعتها من الصعب ترجع كبير تانى عيونهم حتى ولو احترموك لأن الإزاز إللى بيتكسر لايمكن يرجع سليم تانى طب أنا ليه بقول الكلام ده 

اقراوا البارت وإنتوا هتعرفوا

&&&-&---&&&&&&&&&&&&&&

لف سيد في بيوت كل إللى يعرفهم يسأل عن زينب والكل يقول لا شفناها ولا نعرف مكانها 

لف كتبر حتى إنه راح المدرسة وسأل عنها كل المدرسين وكانت نفس الإجابة 

عامر: مش قلت لك إنها ألعن من أبوها.

أحمد: تقصد زينب 

عامر: أهى طلعت طفشانه من بيت ابوها لأ وإيه سارقه نص مليون جنيه كمان 

أحمد: مين قالك إنها سرقت المبلغ ده 

عامر: الناس كلها في الحاره بتتكلم عن أبوها إللى ماشى يكلم نفسه وهو بيدور عليها.

أحمد: تصدق إنى خايف عليها تخيل بنت صغيره زيها ماشيه في الشوارع الله اعلم مين يقابلها أو يتحرش بها أو يبهدلها.

عامر: لا متخافش عليها دى زى أبوها أنا 

بصراحه هزعل أوى على الفلوس.

أحمد: فلوس إيه يا غبى الفلوس تروح وترجع البنت أهم.

عامر: أصل بصراحه المبلغ كبير أوى ده الواحد يحقق به كل أحلامه يعنى أشترى شقه وعربيه ولبس وأعيش بيه سلطان زماني.

أحمد: برضوا بتتكلم في الفلوس أنا بقول لك بنت غايبه من عشرة أيام ربنا يسترها أنا بجد بدعى لها ربنا إنه يحميها ويحفظها من كل شر

قام عامر وقال: طيب يا حنين أنا ورايا حصه اقعد إنت ادعى سلام.

&&&__&&&٥٥٥&&&&&&/

رجب: كنتى فين يا سميحه ؟

سميحه: كنت عند رضا أخويا  بسأل عن زينب 

رجب: لسه ملقوهاش 

سميحه: لسه ربنا يستر أنا خايفه عليها أوى 

رجب: لأ وسرقه ٧٠٠ألف جنيه من أبوها

سميحه: ٧٠٠ إيه هما ٢٠٠ بس الناس كل شويه تألف وتزود بمزاجها 

رجب: طلع مفهاش خير دى لو كان فيها خير كانت حطت إيدها في شنطتها وطلعت عشرة خمستاشر ألف جنيه وإدتهم لك وقالت خدى يا خالتى يا أخت أمى اصرفى على عيالك 

سميحه: على أساس إنى مغرقاها حنيه ودلع 

فتيجى تقولى خدى يا خالتى ماهو بسببك أنا مش بدخلها من البيت في حضورك ولما بتشوفها بتزعق لها..

رجب: بس برضوا معاها ٢٠٠ألف جنيه كانت إدتك على الأقل ألف ولا ألفين

سميحه: جرى إيه يا راجل إنت كنت عمال تقول فلوس حرام فلوس حرام دلوقتي زعلان إنها مدتناش منها ولا إنت هترضى بالحرام 

رجب: ومين قالك إنها لو إديتنا هتبقى حرام لأ هيا حرام عشان هيا سرقاهم بس إحنا لو أخدنا مش هتبقى حرام لأننا مسرقناش لأننا هنعتبر واخدين هديه هيا إللى هنشيل الذنب مش إحنا.

سميحه: شوف إحنا بندور على إيه وإنت بتفكر في ايه دى تايها بقالها عشرة أيام 

رجب: هو أنا قلت حاجه يا رب تلاقيها وتكون لسه مخلصتش الفلوس.

هزت سميحه راسها بأسف ودخلت الأوضه تغيير لبسها.

&&&&&&&&&&&--&&&&&&&&

في نفس الحاره وقدام بيت رضا وقف تاكسي نزلت منه زينب وشالة شنطتها على كتفها ووقفت تخبط على الباب في نفس الوقت الناس شافت زينب هيا داخله بيت رضا فجريت بسرعه لأبوها يطمنوه ويبشروه إنهم شافوا بنته دخلت بيت خالها.

وفعلا جرى سيد بسرعه لبيت رضا عشان يشوف بنته.

&&&&&&&&&&&&&&&&&&

رضا: كنتى فين يا بنت الكل*ب  إنطقى كنتى فين وبتى فين ونمتى عند مين إنطقى

وعملتى إيه بالفلوس بقى تسرقى أبوكى هيا فين الفلوس (( وسحب شنطتها من كتفها وبدأ يقلب فيها ويدور على الفلوس)) في نفس الوقت دخل سيد البيت لقى زينب واقفه في هدوء غريب ولقى رضا بيقلب في شنطتها وبيقول: وديتى الفلوس فين إنطقى

كان سيد بيتأمل بنته بسرعه خايف إن حد أذاها.لكنه إنتبه إن وشها هادى ورايق مفيش أى أثر لضرب أو تعذيب عينيها صافيه وجميله يعنى كانت بتنام كويس لبسها نضيف يعنى متبهدلتش فحس براحه شديدة وحمد الله في سره إنها سليمه ومحدش أذاها.

وبعدها كشر وأظهر الجديه في ملامحه وقال بصوت عالي: كنتى فين يا زينب ؟

إلتفتت زينب ورضا لأبوها كانت هاديه جدا 

أما رضا كان في نص هدومه وهو شايف إبليس بيتفرج عليه.فحط الشنطه على الأرض وقال: أنا كنت لسه بزعق لها وبسألها عن الفلوس ....تصدق الشنطه فاضيه.... فين الفلوس يا زينب إنطقى.

زينب بملل: إيه يا خالى قالوا لك هبله ولا عبيطه عشان أمشى في الشارع ب٢٠٠ ألف جنيه ليه مفيش بنوك في مصر.

إلتفت لها رضا وقال بدهشه: بنوك إيه دا إنتى لسه قاصر.

زينب: عارفة بس معايا بطاقه وب٢٠٠ جنيه تحت الطرابيزه لموظف   في البنك عمل لى حساب وبقى ليا رصيد وإدانى دفتر شيكات كمان 

كان رضا بيبص لها بدهشه وكأنه بيقول((آه يابنت إبليس مكاره زى أبوكى))في حين لمعت عيون سيد وهو بيبص لها بفخر وكأنه بيقول (( هى دى بنتى))

رضا: الفلوس دى لازم ترجع لأ...

زينب بجديه وبصوت قوى وحازم: إنسى الفلوس دى مش هترجع أبدا وبصت لأبوها وقالت بنفس الحزم: مش هرجع ولا جنيه واحد.

سيد: تعالى معايا هنتفاهم في البيت.

زينب: لأ أنا مش همشى من هنا أنا هقعد هنا عند خالى

رضا: تقعدى فين ده إنتى إتجننتى رسمى قومى وبلاش هبل روحى مع أبوكى.

سيد بسخرية: هتقعدى فين ده خالك نفسه مش عايزك

زينب: لا أنا قلت مش هروح وهقعد هنا يعنى هقعد هنا 

رضا: وأنا بقول لك لأ روحى عند أبوكى أنا مش هقعدك عندى 

بصت له زينب وقالت: تعال يا خالى نتفاهم جوه 

رضا: وليه جوه قولى إللى إنت عايزاه هنا قدام أبوكى.

رفعت زينب حاجب واحد وقالت بخبث: مابلاش خلينا نتفاهم جوه أحسن 

قلق رضا من نبرتها.وقال لها: طب تعالى جوه عن إذنك يا سيد.

وأول ما دخلوا الأوضه

رضا: أدينا لوحدنا قولى عايزه إيه.؟

زينب: من صغرى وأنا عندى ذاكره حديدية مبنساش حاجه.

رضا بسخرية: شاطره وبعدين.

كملت زينب: وفي مره كنت بلعب مع بناتك فطردتنى مراتك من هنا وقالت لى ووحى عند أبوكى وماشوفش وشك هنا تانى.

رضا بعدم اهتمام: وبعدين 

زينب: يومها روحت أعيط لماما ولما قلت لها خرجت وجت هنا بلبس البيت وزعقت لمراتك

تعرف قالت لها إيه؟

رضا: يارب نخلص من المسلسل الرخم ده قولى قالت لها إيه؟

زينب: قالت لها إنى ألعب براحتى لأن هيا بتمتلك نص البيت ده بيع وشرا.

برق رضا وبص لها وقال بقلق: إنتى بتقولى إيه لأ لأ لأ مش بجد ده أمك كانت بس بتخوفها بس الحقيقة إن....

زينب: ماأنا مكنتش فاهمه حاجه بس أمى الله يرحمها قبل ما تموت فهمتنى إن جدى كان داخل في تجارة  واضطر يرهن البيت لأبويا زى معظم أهل المنطقة ولما خسر في التجارة دى اتجوز أبويا أمى كنظام تخليص حق.

وبعد شويه حس جدى بالندم عشان رمى أمى الرميه دى فكتب نص البيت لها بيع وشرا..

وأمى الله يرحمها كانت خايفه عليكوا من بابا ليشاركوا في الورث لما تموت فكتبت البيت نصيبها بإسمى برضوا بيع وشرا إيه رأيك يا خالى هتسيبنى أقعد معاك ولا نخرج ونعرف بابا وإنت عارفه كويس يموت ومحدش يضحك عليه في شلن واحد يعني من بكره هيقفل الشقه بتاعتنا وهيجى يعيش هنا معايا بصفته أبويا وولى أمرى ومش هيمشى إلا إذا إنت بعت نصيبك أو أخد حقه 

رضا: الله يخرب بيتك على بيت أبوكى.

زينب بعدم اهتمام: الله يسامحك قلت إيه.؟

رضا: طيب وهقنع أبوكى إزاى إنك تقعدى عندى

زينب: إنت وشطارتك يا خالى يا حبيبي 

رضا:طب تعالى نخرج لأبوكى إلاهى ربنا ينتقم لى منك قال وخايف عليكى ده إنت ألعن من أبوكى.

زينب: سمعاك يا خالى وهنتحاسب على الكلام ده بعدين.

سيد ': إيه خلاص اتفقتوا.

رضا: شوف يا معلم أحسن تخلى البت تقعد معانا كام يوم وبعدها أنا بنفسى هجيبها لك.

سيد: قلت لا يعنى لأ وبعدين أنا عايز اعرف كانت فين وقضت العشر ايام دول عند مين

زينب: بابا نسيت أقول لك (( البقيه في حياتك))شد حيلك 

سيد بعدم اهتمام: في مين

زينب: في أبوك. إللى هو جدى ابراهيم الداجى 

قعد ابراهيم علي الكرسي وقال: بتقولى مين 

زينب: أبوك ابراهيم الداجى 

سيد: هو مات.

زينب بسخرية: من ١٢ سنه إيه مستغرب إن محدش قالك.ليه كنت عايزهم يقولوا تعال يا سيد إدفن أبوك إللى إنت السبب في موته ده حتى في مثل بيقول(( يقت*ل القت*يل ويمشي في جنازته)).

مسح سيد الدموع من عينيه وقال: كنتى في البلد.مين عرفك مكانها.

زينب بقسوه: ميزت إنك تعيش وحيد من غير أصحاب ولا أهل إنك بتفتش في كل حته وبتدور عليهم وانا فتشت في كل اوراقك من زمان وعرفت اسم البلد ولما ضاقت عليا الدنيا قلت أروح هناك يمكن ألاقى لى حد يحبنى ويهتم بيا.بس للأسف مالقتش.بس عرفت كل الحكايه من جدتى سعديه.

سيد : قابليتها

زينب: وأكلت من الطعميه إللى كانت بتصرف على مرض جدى منها.تصدق إنها رفضت تاخد فلوس منى وقالت (( حد الله مابينى وبين فلوس أبوكى))

سيد بضعف وبصوت حزين: الله يرحمك يا أبا

زينب بنفس القسوه: كنت بتحسبه هيدنه عايش لك العمر كله.

سيد: بإنكسار :تعالى معايا يا زينب نروح بيتا.

زينب: لأ 

سيد: عشان خاطري يا بنتى أنا مليش غيرك ومش هسألك عن الفلوس.

زينب: لأ يعنى لا انا مش عايزه أعيش معاك تانى إنت اخترت الفلوس وسيبت أقرب الناس لك فاشبع بها أنا مش همشى من هنا.

رضا: طب سيبها يا سيد شويه لحد ما تهدى 

خرج سيد من البيت وهو بيطوح في حين كان رضا ومراته وأولاده بيراقبوه في شفقه.

منال: أنا صعبان عليا أوى عمى سيد

سامح: أول مرة اشوف زينب قاسيه أوى كده

زينب: خالى أنا هدخل أرتاح شويه وابقى صحينى لما تحضروا الغدا 

ودخلت الأوضه وقفلت عليها الباب وانهارت في البكا.

وبعد أسبوعين 

رضا: كنتى فين يا زينب 

زينب: يعنى هكون فين في الدرس.

رضا: طيب أنا كنت عايز أقول لك أبوكى عيان.

بقاله أكتر من اسبوع راقد في السرير.

زينب بخوف: إنت بتتكلم بجد يا خالى

رضا: أه والله أنا كنت عنده ولسه الدكتور خارج من عنده أنا قلت بس أعرفك.

رمت زينب كتبها وخرجت بسرعه وجريت لحد البيت لقت ابوها نايم وواضح عليه التعب والمرض.فقربت منه وباست جبينه إللى كان مولع من الحمى

سيد بتعب: إنتى جيتى يا زينب 

زينب: كان لازم أجى هو أنا ليا حد غيرك.

&&&&&&&&&&&&-&&&-&

السادس والسابع

&&&&&٥٥٦&&&&&&&&٦٦٦٦&&&&&The boy has a toy 

(أو الطفل يمسك لعبه )المقوله دى سمعتها في فيلم life boat أو (قارب النجاة)للمخرج العالمي ألفريد هتش كوك وده بيحكى عن مجموعه من المدنيين الأمريكان هربوا في مركب صغير من الحرب فى ڤيتنام وطول الفيلم بيعانوا من قلة الأكل والماء وفي وسط معاناتهم أنقذوا طفل صغير عنده حوالى ١٢ سنه ولما عرفوا إنه ڤيتنامى كانوا عايزين يتخلصوا منه فقالت واحده من الأبطال (( سيبوه ده مجرد طفل)) بس بعد شويه خرج الطفل من ملابسه سلا*ح وهددهم به فرد البطل في سخريه/( الطفل يمسك لعبه))

طيب أنا ليه بحكى الفيلم ده هقول كالعادة 

اقرأوا البارت وإنتوا هتعرفوا.

&&&&&&&&&&&&&&&&-&&-&

قعدت زينب تراعى باباها خمس ايام سبحان الله وكأن روحه متعلقه بها لأنه اتحسن بسرعه حتى إنه طلب منها تاخده للمعرض أو لأى محل من محلاتهم.وبالفعل أخدته لمحل صغير قريب من البيت وبسبب ظروف مرضه بدأت تباشر معاه الشغل في المحلات وإللى تفهمه وتقدر عليه بتعمله لوحدها أما الأمور الصعبة فكانت بتستشير والدها وإللى كان في منتهى السعادة وهو بيشرح لها ويعلمها أصول الشغل

زينب وهى على المكتب وبتكتب في الدفتر: طيب بالنسه للسوبر ماركت إللى في الشارع الرئيسي قالوا إنهم محتاجين على الأقل عشر شكاير رز وشكارتين فول وشكارة عدس.إلا بجد إنت بتجيب الكميات دى كلها منين ؟

سيد: أنا بشترى المحصول من الفلاحين ومتفق مع مضارب للرز وللعدس بوزع على المحلات إللى يحتاجوه والباقي بحطه في المخازن لحد ما يخلصوا أكون مجهز دفعات تانيه من مزارع تانيه

زينب بإنبهار: وانت بتعمل كده من كام سنه ؟

سيد وعجبته نبرة صوتها المتحمس : من زمان أوى بس كنت مستنى لما تكبرى وأعلمك كل حاجه عن الشغل .

دخل عليهم رشيد والد هنا 

رشيد: السلام عليكم يا معلم إبليس

سيد: وعليكم السلام أهلا يا رشيد 

رشيد: أنا كنت جايب فلوس الايجار بتاع البيت كنت جيت كام مره بس إنت كنت عيان.

إبليس: مفيش مشكله هات الفلوس وهطلعلك الوصل

زينب بإندفاع: عمى رشيد. خد بالك إن الشهر ده أخر شهر لك في البيت وشوف لك بيت غيره.

بص لها رشيد وحتى إبليس بدهشه.

رشيد: ليه يعني إن شاء الله ؟

زينب وحست إنها اتورطت في الكلام لكنها كانت حاقده على الكل فقالت: بنتك هنا اشتكتنى لمدير المدرسة إنى بهددكوا بالطرد من البيت والأستاذ عبد الكريم هزقنى بسببها 

رشيد: بنتى لسه صغيره ميتاخدش على كلامها زى مانتى صغيره وميتاخدش على كلامك 

زينب بصوت مخنوق من البكا.:؛بس أنا اتهزقت واتهددت بالطرد من المدرسة بسببها 

رشيد: ودى حاجه متهمنيش أنا مستأجر وفيه معايا عقد وأنا ملتزم به

إبليس: والعقد هينتهى بعد تلات شهور وانا مش هجدد لك العقد 

بصت زينب لأبيها وهى مستغربه مش متوقعه إنه ممكن يجي في صفها أبدا

رشيد: ليه بس يا معلم

إبليس: لو إنت مبتاخدش على كلام بنتك فأنا باخد ولو بنتك لسانها طويل وبتخرف يبقى تتعلم تقص لسانها أصلها مش راحه المدرسة تألف حكاوى فاضيه ولو انت معلمتهاش يبقى تشيل إنت ذنبها 

رشيد: ونروح فين أنا والعيال

إبليس: مش مشكلتى قدامك ثلاث شهور تدور فيهم على حته تانيه.

رشيد: وده ينفع عشان كلام العيال تطردنا من البيت إللى أوينى أنا وعيالى بقلنا ١٦ سنه

(( حست زينب بألشفقه على رشيد وعائلته فقالت: خلاص أنا مسا...))

لكن كمل سيد بصوت قوى: أديك قلتها فكفايه عليك ١٦ سنه يالا ابعد وإدى غيرك الفرصة يسكن مكانك..

رشيد: دى أخرتها تطردنى من البيت بسبب عيله.

إبليس: لو إنت بنتك عيله فأنا بنتى كبيره وكلمتها تمشي على الكل.

مشى رشيد وهو بيدعى ويتحسبن عليها هى وأبوه

(( بصت زينب لأبيها بإنبهار)) ولأول مره مهتمتش بشتيمة أو بدعاوى رشيد.

سيد: أول درس لازم تتعلميه أوعى ترجعى في كلمتك مهما حصل.

زينب: أصل صعب عليا.

سيد: غلط أكبر غلط مادمتى قررتى تنتقمى يبقى مايصعبش عليكى حد 

زينب: بس إيه ذنبه.

سيد: كان ربا بنته وعلمها الأدب انا لو كنت عارف إنها بتدايقك كنت طردتهم من زمان.

&&&&&&&&&&٥٥٥&&&&&&&&

يمكن زينب حست بالذنب شويه بس احساس أخد الحق ممتع.ومايضرش لو كررته مره تانيه 

وخاصة لما شافت هنا داخله الفصل وعيونها حمراء وقعدت تشتكى لزميلاتها من زينب 

فقامت ياسمين في غضب وصرخت في زينب: إنتى ليه تعملى في هنا كده مش حرام عليك تطرديهم من بيتهم.

زينب ببرود: لأ مش حرام بيتى وأنا حره فيه 

هنا بدموع ؛: مش قلت لكم شريرة زى أبوها بابا عمال يزعق لى بسببها ربنا ياخدها.

فرح: وأنا مش هسكت لها ومسكت زينب تضرب فيها وانضم لها هنا وياسمين بقوا الثلاثة ضد زينب وطبعا الغلبه لهم الثلاثة 

مأنقذهاش إلا دخول الأستاذ أحمد في الفصل إللى صرخ في الكل فبعدوا عن زينب إللى كانت مبهدله أوى شعرها منكوش ووشها كله جروح من ايديهم.

الأستاذ أحمد: إنتوا اتجننتوا إيه اللى عملتوه ده.

فرح بصوت واطي: أهو جه الحنين يدافع عنها

هنا: تستاهل بنت الكل*ب. بقى هيا وأبوها يطردونا من البيت.

استاذ أحمد: مشاكلكم بره المدرسه والفصل ودلوقتي لازم تعتزروا إنتوا التلاته من زميلتكم.

هنا: لو هاموت مش هعتزر ده بابا طلب منى وأنا رفضت.

الأستاذ أحمد: يبقى تروحوا لمدير المدرسة يتصرف معاكم..

زينب: لا يا استاذ أنا مسمحاهم أنا مش عايزه مشاكل.

هنا: لا كتر خيرك تعالى نروح للمدير ولا إنتى جبانه وخايفه.

الأستاذ أحمد: بدل ما تشكرى زميلتك إن قلبها ابيض وبتسامح بنتريقى تغلطى فيها.حقيقى مفيش أخلاق.

اقعدوا ضيعنا نص الحصه على الفاضي 

درس النهارده هيكون عن.....

زينب بصوت عالى: استنى يا استاذ أنا مش لاقيه ساعتي.

وبدأت تدور وتفتش في شنطتها وعلى الارض 

استاذ أحمد: ساعة إيه إللى بتقولى عنها.

زينب بخوف: ساعه غاليه أوى كنت اشتريتها من محل هدايا كبير أوى في خان الخليلي.

دوروا معايا والنبى.

بدأ الكل يدور وعلى الارض وفي شنطة زينب ومفيش حد لقاها..

واحده من البنات: والله ماخدت حاجه ولو عايزه تفتشينى فتشى

بنت تانيه: لا إحنا كلنا نتفتش.

زينب: أنا ماليش دعوه انا مش هفتش حد 

قامت رائدة الفصل وقالت: أنا إللى هفتش البنات

وفعلا بدأت تفتش الكل الشنط والملابس لحد ما طلعت الساعة من جيب بنطلون ياسمين.

لمعت عيون زينب بإنتصار في حين بكت ياسمين وقالت بقهر: أنا مظلومه أنا مأخدتش حاجه هيا زينب إللى حطت الساعة في جيبى وأنا بضربها.

بنت: يعنى بتضربيها وبتسرقيها 

بنت تانيه: حراميه وإيدك طويله

ياسمين: أنا مأخدتش حاجه والله العظيم أنا مسرقتهاش

بنت بصوت عالى: حرام عليكى ضربتيها وبهدلتيها وبرضوا بتسرقيها كانت عملت لك إيه.المفروض يا استاذ أحمد تبعتها لمدير المدرسة يرفدها الحراميه دى

كان الأستاذ أحمد بيبص على زينب بتركيز وبعدها قال: خلاص كل واحده تقعد مكانها وأنا عارف زينب قلبها أبيض وزى ماسمحتها في المره الأولى هتسامحها المره دى كمان.

بصت زينب له بتركيز وقالت بدموع: خلاص يا استاذ أنا مسمحاها.ربنا يسامحك يا ياسمين على ضربك ليا وعلى سرقتك لساعتى.مع إن لو طلبتها والله كنت إديتها لها من غير ما تسرقنى.

بص لها الأستاذ وبعدها قال: يالا نلحق حاجه من الحصه.وبدأ بشرح الدرس.

$$$$$$$$$$$$$&&&&&&&&

بعد الحصه نادى الأستاذ أحمد زينب

زينب: أيوه يا أستاذ عايز حاجه 

استاذ أحمد: إيه اللى انت عملتيه ده

زينب: أنا عملت ايه يا استاذ 

استاذ أحمد: يا زينب بطلى حركاتك دى أنا عارف إن صحبتك ماأخدتش الساعة 

زينب: لا والله أمال خرجناها من جيبها إزاى

استاذ أحمد: إنتى عارفه ازاى 

زينب: طبعا حضرتك مش مصدق إنها حراميه لكن لو أنا كنت هتصدق صح ماهو أنا بنت إبليس أما هما ملايكه ماشيين على الأرض صح

استاذ أحمد: لأ مش صح وإنتى أكتر واحده عارفة إنى عمرى ما شفتك بنت إبليس بس واضح إنك شايفه نفسك كده ليه يا زينب 

زينب: باخد حقى

استاذ أحمد: من مين ؟

زينب: من الكل من كل من أذانى كل من أهاننى كل من غلط فيا 

استاذ أحمد: ليه يا زينب إنت قلبك أبيض وبتسامحى ليه عايزه تبقى قاسيه على الناس 

زينب: ماهو أنا هسامح بعد ما أخد حقى

استاذ أحمد: وده يبقى سماح

زينب: ده يبقى العدل زى ماظلمونى هظلمهم وزى ماغلطوا في حقى هغلط في حقهم وزى ما أساؤا ليا هأسيئ لهم وبعدها لو هما عرفوا يسامحوا هبقى برضوا أسامح.

استاذ أحمد: ده مش اسمه سماح ده اسمه انتقام.وياترى يازينب دورى في إنتقامك هيبدأ إمتى

زينب: تصدق إنك الوحيد اللى مافكرتش أنتقم منه

استاذ أحمد بسخرية: لا متخافيش مادام قررتى الإنتقام هيبقى ليا دور بس اعرفى إنى مش هسكت وهقف ضدك طول مأ تفكيرك غلط لحد ما ترجعى لعقلك تانى.

زينب بسخريه: طيب ربنا يوفقك.

وبعد ما مشى استاذ أحمد 

ياسمين: أنا رحت للمدير واشتكيته إنك بتتهمينى بالسرقه وهو هيتصرف معاكى

زينب بسخرية: مش مهم لأنى خلاص حققت هدفى

ياسمين: وإيه هدفك إن شاء الله 

زينب: إنى أشكك الناس فيكى وخلاص إنتى بقيتى حراميه 

ياسمين: مفيش حد مصدقك وكل البنات قالوا إنك ملفقه التهمه دى ليا

زينب: متأكدة طيب ياحلوه اعرفى إن التهمه بتلزق في صاحبها ولو أول مره نصهم ماصدقش فالنص التانى صدق وهيشك فيكى وهتعرفى أول مايضيع من واحده حتى ولو قلم رصاص هتكونى إنتى المتهمه الأولى مبروك عليكى اللقب الجديد والسمعه اللى بقت في التراب.

ياسمين: حرام عليكى بتعملى كده ليه

زينب: دوقى من نفس الكاس كنتى أول واحده تنشر عليا اسم بنت إبليس وأدينى أول واحده طلعت عليكى لقب حراميه.

ياسمين: هروح أست

أشتكيكى للناظر والمدير

زينب: براحتك بس صدقينى ولا١٠٠ منهم هيقدروا يمسحوا لقب حراميه من لسان الناس 

وأوعدك لو الناس نسيت انا هفكرهم 

&&&&&&&&&&&&&&&&&&&&&

كان الدرس التانى إللى اتعلمته من أبوها إن كل شيء وله تمن وإللى مبيجيش بالترهيب يجى بالترغيب والإيد إللى متقدرش تكسرها بوسها.وزينب شاطره بتحفظ دروسها صم وعشان كده عزمت كل البنات إللى وقفوا معاها على حاجه ساقعه شوكولاته من كانتين المدرسة.وبكده بقت في يوم وليله محبوبة كل البنات في الفصل بتتمنى رضاها.

&&&&&&&&&&&&&&&&&&&

عرفتوا أنا اقصد إيه باللعبه 

سمعت الناس وشرفها ومستقبلها لعبه في إيد طفله حاقده ياترى هتستمر زينب في حقدها ولا هيجى حاجه تطفى نار الإنتقام من قلبها

ده إللى هنعرفه البارت الجاي بس كالعادة ماتنسونيش بليكات كتيره وعشر بوسترات وتعليقات حلوه عشان أتحمس وأكتب الجزء الجديد وشكرا حياة محمد 

.(مزرى)ده اسم فيلم اجنبي.أصل بصراحه أختكم في الله ملهاش في الرعب يعنى أفلام مصا*صي الد*ماء والصرخه والدميه القا*تلة

متاكلش معايا بتفطسنى من الضحك أما الرعب بالنسبة ليا هو فيلم مزرى وده بيحكى عن كاتب زميل بيألف روايات وعمل حادثة وحظه الوحش وقعه فى ايد معحبه مهوسه به ورته الويل.

طيب أنا ليه  الفيلم ده هقول كالعادة هتعرفوا بعد قراءة البارت ده.

&&&&&&&&&&&&&&&&&&&

دخلت زينب المدرسة شافت الفراشين والعاملين شغالين بهمه ونشاط والمدرسه بتلمع من النظافة فسألت صاحبتها: هو فيه ايه يا سارة ليه الكل شغال بنشاط وهمه النهارده ؟

ساره: هو إنت متعرفيش مش فيه تفتيش جاى من وزارة التربية والتعليم عشان يقيموا المدرسة وإنتى عارفة إن مدرستنا الأولى على مستوى المحافظة 

زينب: يا سلام 

ساره: أه والله إنت مش شايفه المدرسين على سنجة عشرة إزاى

زينب بسخرية: أه اخيرا استحموا.

ساره: لأ ومشددين أوى على اللبس ومأكدين ممنوع أى لبس مخالف.

بصت زينب للبسها وقالت: يا خسارة أنا لابسه اليونيفورم لو كنت اعرف كنت لبست مخالف النهارده بالعند فيهم.بس ملحوقه 

ساره ؛ : بتعملى إيه يا مجنونه 

زينب: اتفرجى وانت ساكته.

وجرت ضفيرتها وحلتها فإنساب شعرها حتى أخر ظهرها.وخرجت من جيب الشنطه قلم روچ أحمر وقلم كحل وبدات تحط روچ وتكحل عيونها وتتقل في الكحل.

ساره: يا خبر أبيض ده انت هتروحى في داهيه.

زينب: مش مهم المهم اني أحرجهم وبس وخرجت علبة برفيوم وقبل ما ترش عليها وقفت وفكرت شويه وقالت: بت يا ساره تحبى تكسبى ١٠٠جنيه في عشر دقايق.

ساره وقد لمعت عيونها: طبعا بس إزاى؟

زينب: عايزاكى تروحى عند بابا و.......

ساره: ياخبر أبيض وأبوكى هيرضى.

زينب: ملكيش دعوه روحى بس.

ساره: وافرضى يا فالحه اتأخرت على الحصة الأولى هاعمل ايه؟

زينب: أنا هاغطى عليكى يالا بسرعه قبل ما يبدأ الطابور.

ساره: طيب ومتروحيش انتى ليه يا فالحه 

زينب: انتى هتوجعى دماغى هديكى ٢٠٠ جنيه هتروحى ولا أرجع في كلامى.

ساره: لا لا هروح 

&&&&&&&-&&&&--&&&------$$_

كانوا قاعدين في غرفة المدير وكانت اللجنة تشيد بمستوى المدرسة المثالى ورئيس اللجنة يشيد بحسن إدارة المدرسه وحس التنظيم وفجأة خبط الباب ودخلت زينب الغرفه.بصت للكل بإضراب وقالت: أنا أسفه كنت بحسبكم مشيتوا أنا هرجع مره تانيه.

بص رئيس اللجنة للبنت بإعجاب فواضح إنها بنت مؤدبه جدا وخاصة إنها ملتزمه بكل التعليمات ملتزمه باليونيفورم وشعرها مربوط ووجهها خالى من أى زينه.فقال بابتسامة: تعالى عايزه إيه؟

زينب بقلق: لأ أنا هرجع الفصل خلاص مش عايزه حاجه.

وجت ترجع فناداها الأستاذ: تعالى فيه حاجه 

بلعت زينب ريقها بخوف وقالت: أصلى كنت عايزه الأستاذ عبد الكريم بس خلاص هبقى أجى له وقت تانى.

الأستاذ عبد الكريم بثقه: لا تعالى دلوقتي ليه وقت تانى 

زينب بنفس الخوف: طب ينفع لوحدنا

صرخ فيها الأستاذ عبد الكريم: متقولى جايه ليه مش فاضيين لك.

خرجت زينب من جيبها ظرف وحطته على المكتب.

استاذ عبد الكريم: إيه ده 

زينب بصوت مهزوز: ده الألف و خمسمية جنيه إللى طلبتهم.

استاذ عبد الكريم: أنا طلبت منك ألف وخمسمية جنيه إنتى بتخرفى وبتقولى إيه.

استاذ من اللجنة: اهدى بس يا استاذ عبد الكريم عشان نفهم منها الفلوس دى ليه 

رئيس اللجنة: قولى يا.إنتى اسمك إيه؟

زينب: اسمى زينب سيد.ابراهيم.

رئيس اللجنة: طيب يا زينب انتى جايبه الفلوس دى ليه ؟

بصت زينب للأستاذ عبد الكريم.

فقال رئيس اللجنة: متخافش قولى وأوعدك مفيش حد هيأذيكى.

زينب بخوف وبصوت مهزوز وببكاء: استاذ عبد الكريم طلب من بابا ألف وخمسمية جنيه عشان أنا كنت غبت كتير وهو قال لبابا إنى اتخطيت المده المسموحه بالغياب فعشان كده هيتم فصلى من المدرسة وهحتاج اعادة قيد.

رئيس اللجنة: وايه علاقه الكلام ده بالفلوس

زاد بكا زينب وقالت: هو قال لبابا إنه هياخد ألف وخمسمية جنيه وهو هيحلها من غير اعادة قيد ولا وجع دماغ 

هب الأستاذ عبد الكريم وقال بغضب: انتى بتخرفى وبتقولى إيه متصدقهاش يا استاذ دى كدابه دى بتفترى عليا عايزه تلوث سمعتى

زينب: أنا مكنتش عايزه أقول حاجه بس حضرتك إللى أصريت

استاذ عبد الكريم بغضب وثورة: لا والله ماكنتى تقولى يالا ألفي ألفي ما أنا مش مستغرب بنت إبليس ويطلع منك أكتر من كده

رئيس اللجنة: ده منظر واحده بتألف جسمها بيرتعش وصوتها المهزوز

استاذ عبد الكريم: وانت صدقت تمثيلها بنت إبليس .يعنى المكر والكدب ورثتوا من أبوها إبليس 

زينب بدموع حقيقة: خد الفلوس وارفدنى من المدرسة بس ماتناديش بالإسم ده.

استاذ عبد الكريم: على اساس انك ملاك ده انت شيطانه بنت إبليس وحلال فيكى اللى البنات بيعملوه فيكى.

رئيس اللجنة بغضب: ويا ترى البنات بتعمل فيها إيه؟

انتبه استاذ عبد الكريم لكلامه وقال: ولا حاجه أنا بقول كلام وبس عشان أضايقها.

رئيس اللجنة: تدايق مين يا استاذ انت حاطت البنت الغلبانه دى في دماغك وعمال تدايقها.

استاذ عبد الكريم: مانت شايفها بتتهمنى بإيه بقى أنا على أخر الزمن تيجي بنت زى دى تتهمنى بالرشوه وقدامك.

رئيس اللجنة: مش تهمة الرشوة بس يا استاذ فيه تهمه تانيه اسمها التنمر وبدل مانت تحارب السلوكيات دى انت بتشجع البنات على كده ومستنى ايه تلاقى شخصية سويه 

استاذ عبد الكريم بعدم تركيز: تنمر ايه احنا هنقلد الأجانب

رئيس اللجنة: لو مش عاجبك كلمة تنمر الخوجاتى هقولك الاسم العربى الدينى اسمه يا استاذ يا معلم يا مربى الأجيال (( تنابز بالألقاب)) وربك قال بسم الله الرحمن الرحيم 

(( ولا تلمزوا أنفسكم ولا تنابزوا بالألقاب بئس 

الاسم الفسوق بعد الإيمان ومن لم يتب فؤلئك

هم الظالمون)).

استاذ عبد الكريم: الناس كلها بتناديها ببنت إبليس مجبتش حاجه من عندى.

رئيس اللجنة: وأنا مش هستغرب لو لفقت لك أى تهمه عشان تأذيك .

زينب بقوه: بس أنا ملفقتش له التهمه 

استاذ عبد الكريم: شوف بتقول ايه.عايزه ايه قولى عايزه ايه عايزه تضرينى في شغلى بس مش هتعرفى.مش هيجي على أخر الزمن وسجلى الوظيفى إللى زى الفل يتحط فيه نقطه سودا بسبب دى.

رئيس اللجنة: ليه يا استاذ هو طبيعي ان بنت تروح مدرسه ومعاها ألف وخمسمية جنيه يعنى أد مرتبك تلات مرات اكيد فيه سبب وأنا هقدم بطلب التحقيق معاك عشان نشوف أخر التجاوزات دى 

وقام من مكانه.فلحقت به زينب في خوف وقالت: انت هتمشى وتسيبنى معاه هيبهدلنى أنا وبابا.

رئيس اللجنة: متخافيش دى كل أرقامى لو حد أذاكى أو حتى عمل فيكى حاجه اتصلى بس وأنا هتصرف معاه..

رجعت زينب الفصل بعد ما غسلت وشها وهي بتبتسم ابتسامه واثقه ولا انها عملت حاجه 

خرجت اللجنه غضبانه وخسرت المدرسة المثاليه لقبها بس في النهايه رجعت زينب الفصل وهى سعيدة 

&&&&&&&&&&&&&&&&&&&

بعد اسبوع كامل من التحقيق وقامت لجنه من الوزارة تبحث عن أى تجاوزات والتحقيق مع مدير المدرسة واستدعاء زينب أكتر من مره ومحاولاتهم استدراج زينب لأى غلطه تبين الحقيقة بس زينب كانت هاديه جدا ومعرفوش يوقعوها في الكلام أصلها شاطره وحافظه دروس أبوها صم وخاصة الدرس الجديد إللى حفظه لها قبل ما يستدعوها للتحقيق وهو((كدب مساوي أحسن من صدق منكوش))فخلى كدبك مساوى مرتب من غير غلطات وطبعا زينب حافظه الدرس 

وبالرغم من السجل النظيف للمدرسة إلا أنه ممنعش إن حصل المدير على لفت نظر.

-&&&&&&&&&&&&&&

ساره: بقى تعملى معايا كده.

زينب عملت ايه 

ساره: متعمليش ناصحه عليا أنا هروح الأستاذ عبد الكريم وهقوله كل حاجه.

زينب: والله طب ماتروحى حد مانعك

ساره: والله يعنى مش خايفه أروح له وأقوله.

زينب: وهتقولى ايه يا حلوه هتقولى له إنك أخدتى٢٠٠ جنيه رشوه عشان تجيبى الفلوس اللى اتهمت بها الأستاذ عبد الكريم.روحى قولى بس متعيطيش لو الاستاذ عبد الكريم رفدك لأنك شريكتى.

ساره بخوف: وانتى كمان هتترفدى معايا 

زينب: لا يا حلوه أنا رئيس اللجنة يعرفنى وأى حاجه هيحاول يعملها معايا هقوله وهو هيلغيها ومتنسيش إن بابا ممضيك على...

الأستاذ أحمد من وراها: برافو عليكي يا زينب اتفوقتى على نفسك..أحيكى يا زينب 

زينب: ...____

استاذ أحمد: الأستاذ عبد الكريم قدم طلب تسوية معاشه بسببك.ماهو مرضيش على نفسه تهمتك الباطله.

زينب: ____

استاذ أحمد: خلصتى انتقامك ولا لسه.ياريت كفايه لحد كده ياريت ترجعى قلبك الابيض مرة تانيه وياريت ترجعى تركزى في دروسك وسيبى الخلق للخالق.

وسابها ومشى وهيا كمان مشيت تفكيرها مشوش وقعدت تدور عليها لحد مالقتها قاعدة بتاكل 

زينب: قاعده بتاكلى وسيبانى لوحدى

أمانى: إنتى لوحدك ده ماشاء الله كل ما اشوفك ألاقى خمسة ستة حولايكى.

تقعد جنبها زينب وتقول: ودول يعتبروا حد دول بنات بتوع مصلحتهم مستنين منى فلوس لا عزومه لكن انتى لا إنتى حاجه تانيه انتى الوحيده إللى بتحبنى بجد من غير مصلحه.

أمانى: وعايزه إيه يا زينب

زينب: مش عارفه والله مش عارفه 

أمانى: لازم تعرفي ولازم تفكرى إنتى عايزه إيه وإيه أخر عمايلك دى.

زينب: يووووووووه إنتى والاستاذ أحمد 

خبطتها أمانى على كتفها: قال يعني بتسمعى كلام حد.

زينب: مش عارفه اصلك متعرفيش انا بحس بإيه لما ينتقم منهم ياااااه احساس حلو أوى 

أمانى: لما تظلمى الناس احساس حلو انتى اكيد إتجننتى

زينب: مقصدش بس احساس انك مسيطره حاجه حلوه.فاتك منظرى وانا عامله خايفه وبرتعش وفجأه أجيب لمدير المدرسة مصيبه

أمانى: وفرحانه بنفسك 

زينب: أه تصدقى هو الوحيد اللى مش ندمانه إنى أذيته يورينى هيعمل ايه إبنه الشهم 

أمانى: بقى بتعملى كل ده عشان تنتقمى من يوسف انتى لسه بتحبيه 

زينب: أنا لايمكن ده يستاهل كل اللى عملته في أبوه

أمانى: يا خايبه وهو عمره ما هيبص لك بسبب اللى عملتيه.

زينب: مين قالك ده هو إللى هيخليه يجرى ورايا عشان أثبت براءة أبوه.

أمانى: مش عارفه إيه إللى في دماغك 

زينب: سيبك منى مش هتيجى تقعدى جنبى في التخته

أمانى: وانتى عايزانى ليه متقعدى أى واحده تانيه

زينب: لا انتى حاجه تانيه انتى صاحبتى بجد وانتى الوحيدة اللى بحبها بجد 

أمانى: ماشى بس بشرط تعزمينى على حاجه ساقعه 

زينب: بس كده أحلى حاجة ساقعه وساندوتيش هامبورجر كمان.

&&&&&&&&&&&&&&&&&&

في الحاره 

رباب: مالك يا يوسف 

يوسف: مخنوق يا رباب ومتدايق أوى

رباب: عشان إللى عملته بنت إبليس في عمى

يوسف: وهو ده شويه 

رباب: لأ بس الناس كلها عارفه عمى وعارفه إنه زى الجنيه الدهب.

ابتسم يوسف لها: يعنى عمرك ما شكيتى فيه

رباب: ابدا ولا ثانيه.واحده

يوسف بابتسامة: عشان كده أنا بحبك أوى عشان عمرك ما خالفتينى في رأي.

إلتفت وشافها جايه في الطريق فقال لرباب: روحى انتى على البيت

رباب بقلق: عشان خاطري متعملش مشاكل 

يوسف: روحى انتى يالا.

ومشى بسرعه في اتجاهها وفجأة شدها من دراعها فصرخت بفزع لثانيه وأول ما شافته ماقدرتش تمنع ابتسامتها.

يوسف: نفسى اعرف إنتى مخلوقه من إيه؟

زينب : والله انا أدبى مش علمى

يوسف: بنتريقى جبتى الشر ده كله منين بس مش هستغرب مانتى بنت إبليس 

كشرت زينب وقالت بجديه: تصدق بقيت أفتخر باللقب ده عشان بسببه عرفت الناس على حقيقتها إبليس وإللى مش عاجبك طلع أحسن من أبوك.

يوسف: بتخرفى وبتقولى إيه أبوكى المرابى أحسن من بابا 

زينب: أه أحسن منه مليون مره ولو عشان مرابى فالناس هيا إللى بتروح له برجلها وبترضى بشروطه يبقى يستاهلوا إللى بجرا لهم .

يوسف: انا مش هوجع دماغى بكلامك الفارغ ده من بكره تروحى الإدارة التعليمية وتعترفى انك لفقتى لبابا التهمه دى وتروحى تعتذرى لبابا في المدرسة وقدام كل المدرسين.

زينب: وإيه المقابل 

يوسف: مقابل إيه

زينب: أروح الاداره واعتذر لأبوك مقابل إيه هستفيد إيه من كده.

يوسف ' هو راحة ضميرك مش كفايه 

زينب: لا لا لا أنا ضميري مرتاح ليه اوجع دماغى شوف لى مقابل تانى.

يوسف: طلعتى ماديه و حقيره واستغلاليه زى أبوكى

زينب: زينب بصوت غاضب عالى: أبويا إللى مش عاجبك واضح وصريح مش بوشين زيكو مالك منفوخ كده على إيه أبوك طول اليوم قرفنا بشعاراته الفارغة وهو منافق يقف يصرخ ويقول بأعلى ضوته أنا ميهمنيش حد انا اقول الحق على رقبتى انا لازم أشكيى غلطات الإدارة التعليمية للوزير وأول ما يشوف ربع موظف من الإدارة بيبقى عايز يبوس إيده 

فلقنا بالعدل والمساواة وبالرغم إنه عارف إنى مظلومه إلا أنه عمره ما نصفنى ولا جاب لى حقى وبسمعه بودنى وهو بيقول انا عارف انها مظلومه بس مش عاوز أقويها على البنات 

وإنت يا باشمهندس يا شجيع السيما على رأى بابا طول الليل والنهار بتدافع عن بنات الحاره وبتحميهم وأكتر من اربع مرات تشوف شباب بيدايقنى وعمرك ما دافعت عنى حتى في المره الوحيدة اللى لجأت لك سيبتنى وحتى اكتشفت انك بتدافع عن البنات بس طيب والشباب المظلوم مابتدافعش عنه ليه إيه يا باشمهندس هى المبادئ خاصه بالجنس الناعم بس ولا إنت زى ما بابا بيقول بترسم على البنات تصدق أنا 

يوسف: حيلك حيلك مبقاش غيرك انتى اللى تعرفينى الصح من الغلط روحي شوفى نفسك وشوفى الناس بتقول عنك إيه.

سابته زينب وقالت: ميهمنيش بيقولوا إيه.

ودخلت البيت لقت أبوها على الكرسي وواضح إنه سمع كلامها مع يوسف 

سيد: مالك يا زينب 

قعدت زينب على الكرسي بتعب وقالت: تعبانه اوي اوي يا بابا نفسى أرتاح شويه 

سيد: إيه رأيك بعد الامتحانات أخدك ونروح في اى حته تحبيها اسكندريه- شارم الشيخ- الإسماعيلية وبورسعيد اى حته تحبيها 

زينب: ياريت يا بابا ياريت.

سيد: هانت كلها كام شهر وتخلص امتحاناتك بس انا عايزك تركزى في مذاكرتك ومتشغليش بالك بحد مفيش حد يستاهل

زينب: عندك حق 

&&&&&&&&&&&&&&

وأخيرا انتهت الامتحانات بعدها بالظبط سوى الأستاذ عبد الكريم معاشه وبيدور على شغل يعوض فيه المبلغ إللى بيتخصم من المرتب 

أما يوسف اتخرج من الجامعه وبيدور على شغل.فى حين زينب لسه بتتفسح مع أبوها وبتستمتع بالهدوء والراحة.استعداد لمرحله جديده في حياتها وهى الجامعه وعالم الجامعه

&&&&&&&&&&&&&&&&&

انتظروا أحداث مشوقه جدا في الأجزاء الجايه ياترى زينب هتدنها بحقدها ولا الدنيا هتتغير.وهل حسيتوا انها شريره ولا ضحيه هل حسيته إنها قويه وبتفترى على الناس ولا ضعيفه وبتحاول تظهر نفسها بالقوه دى.

والسؤال المهم إللى بسأله للكل هل فيه حد شرير خالص بيمشى يرمى شره على الناس ولا ده نتيجة ظروف بتتحكم فيه.

والسؤال الاهم إيه علاقة البارت بفيلم (( مزرى)) إللى حكيت عنه

اقول لكم بصراحه مفيش أى علاقه انا كنت بدردش معاكم بس قبل البارت.

تابعوووووووني 

الفصل الثامن والتاسع والعاشر والحادى عشر من هنا

بداية الروايه من هنا

رواية كيان الزين كامله من هنا

رواية بنت إبليس من هنا