رواية الاشقياء_الثلاثة بقلم_فيلوفوبيا الجزء_الثاني حصريه وجديده على مدونة أفكارنا
 |
رواية الاشقياء_الثلاثة بقلم_فيلوفوبيا الجزء_الثاني حصريه وجديده على مدونة أفكارنا
رزان/بقصة همسة تبادلنا الادوار....صرت انا احكي و هيه تسمع...مع اني متعودة انو الناس تحكي و انا اسمع
بعد كتير محاولات اظهرت اول استجابة الي
بأنها ابتسمت وانا عم احكيلا عن طفلها....و بعد مدة بسيطة...قدرت تطلع بعيوني و انا عم احكي معها
بس الموضوع ماتجاوز النظر....بقيت مدة طويلة بس تطلع بعيوني...متل الي ناطر يسمع اي شي من التاني
وهالشي كان بس معي انا....لانو ماكانت تطلع بعصام ابدا
و بناءا على هالشي طلبت من عصام يصير ينام بغرفة تانية و يتركها تسترجع وعيها لوحدها بعيد عنو_
باسل:حبيبتي شو عم تعمل!(قعد جنبها و رفع شعرها عن وجها)
رزان:عم سجل ملاحظاتي عن همسة
باسل:هي المجنونة؟؟
رزان(بانفعال)باسل!الف مرة قلتلك لاتقول عنها مجنونة
باسل:بعتذر....هاتي حكيلي...لوين وصلتي معها
رزان(تنهدت)ماعم تحكي...بتطلع فيني بدون ماتحكي
ولازم...ضروررري خليها تتواصل معي
باسل:و زوجها؟
رزان:زوجها....رح اعمل جهدي لابعدو عنها...هو السبب بكل شي عم تمر فيه
باسل:هيك زلمة لازم ينسجن على فكرة
رزان:و انا هيك عم قول....بس بدي شي يرميه بالحبس رمية مايطلع منها
باسل:مو انتي سجلتي كلامو معك اول مرة...كيف ضربها و شو عمل فيها و كيف كان عم يعتدي عليها كل هالسنين
رزان:اي؟؟
باسل:شوبدك اكتر من هيك دليل
رزان:انا ايمتا حكيتلك هالشي باسل؟؟
باسل(بارتباك)اي شي؟؟
رزان:تسجيل عصام باول جلسة
باسل:هه...شبكي رزان انتي بتحكيلي كل شي عن مرضاكي
رزان:بس انا متزكرة تمام انو هالشي بالذات انا ماحكيتو
باسل:رزان...حبيبتي...اذا انتي ماحكيتيلي كيف بدي اعرف!! ياعمري انتي حاكيتيلي و نسيانة
رزان:معقول!!!
باسل(حضنها لصدرو وصار يمسد على شعرها)حبيبتي انتي مضغوطة كتير بشغلك...لهيك نسيتي...عملي حسابك تنهي هالكم ملف الي عندك و نسافر بعدهن نغيرلك جو
رزان:اااااه ياباسل والله معك حق ....كتير مضغوطة...وقصة همسة بالذات...هالكتني
باسل(ابتسم)شفتي كيف..حبيبك بيفهم عليكي
رزان:طبعا بتفهم عليي.....رحت زرت امك اليوم؟
باسل:احمم....رحت...منيحة هيه و بتسلم عليكي
رزان:بدي منك تجيبها تعيش عندك
باسل:مابقدر
رزان:مومعقول رجل اعمال قد الدنيا و امو عايشة بمأوى عجزة!!
باسل:كل شي هنيك مأمن الها...موناقصة شي
رزان:ناقصها انت!....حرام عليك...بسبب طيشك انحرمت منك 17سنين....صار عمرك 33 سنة وهيه مابتعرف عنك شي...ولا فرحت فيك
باسل:هيه السبب يارزان....هيه الانانية مو انا..كيف بدك ياني انسى كل شي ببساطة و نرجع نعيش سوا
رزان:المشكلة انك ماعم تعرف تقدر موقفها ابدا
باسل/المشكلة انو ماحدا عم يفهم عليي!!....المشكلة اني وعيت على شغلات ما كان لازم اوعى عليها....وشفت شغلات ماكان لازم شوفها....بس انا هلأ قوي...و هلأ انا غير عن باسل القديم....وهالمرة خيطان اللعبة كلها بين ايديي انا!!/
رزان:باسل!!!وين شردت
باسل:اه! مافي شي حبيبتي....انا قايم روح لبيتي
____________________
_ببيت عصام_
_مشيت على مهلي و بهدوء....شتقت شوف همسة...وقفت جنب باب غرفتها وطلعت عليها من فتحة الباب الصغيرة....كانت قاعدة على سريرها....حاطة ايدها على بطنها و عم تطلع فيه ومبتسمة...للحظة اندفعت و كنت رح فوت لعندا و احضنها....بس بعدها تزكرت انها ماعم تطلع فيني...وكأني غير موجود...غمضت عيوني و بعدت عن الباب و رحت لمكتبي....قعدت و حضنت وجهي بين ايديي وتنهدت...طالعت البوم صور من الدرج المقفول...وقلبت بين هالصور الي بتجمعني بشخص...كان بيوم من الايام اغلى شخص على قلبي....عشت معو سنين ببيت واحد....صرفت عليه...من مصاريي....ساعدتو بدراستو...وبأول مشروع شغل الو....بس بالمقابل هو طعني بضهري!!!.....بس انا....انا انتقمت منو شر انتقام
و خليتو يحرم يقرب مني هههههه_
_باليوم التالي بعيادة رزان_
رزان:لااا شايفتك اليوم رايقة كتير...وجهك مرتاح..
بتعرفي برد الدنيا رح قوي التدفئة كرمال البيبي
همسة:هي بنت!
_جمدت بمكاني وطلعت بهمسة باستغراب كبير....هيه حكت...بعد معانات شهرين ونص حكت اول كلمة!!!!_
رزان:شو قلتي همسة؟
همسة:بنت
رزان:معك بنت؟
همسة(هزت براسها)
رزان:(ابتسمت و كانو دموعي رح ينزلو)الحمدلله انك حكيتي
همسة:هي حلوة
رزان:اكيد رح تكون حلوة متل امها
همسة:وحيدة....مالها حدا!!!
رزان:(باستغراب)اي؟؟؟
همسة:امها و ابوها راحو و تركوها!!
رزان:لحظة لحظة(طالعت الجوال و بلشت سجل كلام همسة)....كملي
همسة:كان عمرها 8سنين...و راحو
رزان:اي؟؟؟
همسة:عاشت عند ست مو منيحة....بتضرب...وبتحرم من الاكل....بردت كتير...ومرضت كتيير...بس ماحدا اهتم فيها....ماحدا حبها...بس بعدين....بعدين...هربت...اي هربت...ركدت بالشارع....بالليل....ركدت كتيييير كتير
و هربت!!!
رزان:(تنهدت)خلص حبيبتي بيكفي لهون مابدي اتعبك
همسة:هي بنت...بنت صغيرة...مابتعرف شي(تبكي)بس بنت...بس بنت...بس بنت!!!
_قمت من مكاني وقعدت جنب همسة وحضنتها و هديتها شوي_
رزان:هالبنت رح يجي يوم و تفرح كتير...و انا رح
ساعدها على هالشي..رح كون معها خطوة بخطوة...سدقيني مارح اتخلى عنك مهما صار
__________________
رزان/قاعدة بمكتبي و حاطة ادامي ملف باسل...
مافي أي ثغرة...كل الملعومات انا بعرفها منيح...بس ليش حاسة انو في شي مخبى!!
رجع فيني الزمن لقبل سنتين......
باسل:مرحبا دكتورة!!
رزان:اهلا وسهلا
باسل:انا بدي تساعديني....بدي تريحيني...بدي انسى
رزان:تفضل....قعود و حكيلي قصتك او جزء منها
باسل:انا اسمي باسل...عمري31 سنة...انا طلعت من بيت اهلي من لما كان عمري 18 سنة...ابي مات وقت كان عمري 6سنين....عشت مع امي هيه كانت تشتغل وتصرف عليي...ماقبلت اترك المدرسة!...بس....بس لما صار عمري 16...قررت تتزوج...قال هيه بحاجة رجال....قال هيه تعبت من الشغل وبدا ترتاح....
باسل:امي انا رجال....انا بصرف على حالي وعليكي...لاتتزوجي الله يخليكي
ام باسل:يا باسل...انت لساتك صغير...بدك تكمل دراستك
و عمك فؤاد رح يتكفل فينا و رح يصرف عدراستك ماعندو مشكلة....خلينا نرتاح شوي ونعيش متل الناس
باسل:(بيصرخ)انا مابدي حدا يصرف عليي! انا رجال و بعرف اصرف على حالي!!
ام باسل:بكرا بس تتعرف على عمك فؤاد رح تحبو و رح تغير رأيك
_وتعرفت على فؤاد...كان ودود بالبداية...و اهتم فيني بشكل خاص...كتب كتابو على امي و بعد 15يوم تزوجو و اخدوني معهن على بيت فؤاد....بالنسبة لمراهق فقير
بيت فؤاد كان جنة...جنة حقيقية...كل شي بتتمناه النفس موجود فيه...و انا متل اي طفل انحرم يعيش طفولتو بسبب الفقر...انشديت لهالعالم الجديد و نسيت انو فؤاد زوج ام....مو اب!!_
فؤاد:يا مرفت...حضري حالك عنا سهرة اليوم
مرفت:اي حبيبي تكرم عيونك
___________________
فؤاد:حياتي...رفيقي جهاد بدو يشرب معك كاس
مرفت:(مبتسمة)تكرم انت وجهاد
___________________
فؤاد:مرفت...شغلي هالمسجلة وتعي عملي فتلة للشباب
مرفت:اي موعلى عيني هههههه
____________________
باسل/امي تغيرت كتير...تحولت من ست بيت و مرا ارملة عم تشتغل و تربي ابنها....لست من الطبقة المخملية بس الفاشلة....طبقة السكر و لعب القمار...طبقة بتخليها تقعد مع هاد و تمزح مع هداك و تتمايل ادام هداك...كلو لخدمة اعمال زوجها...حتى شغلو يكبر...واسمو يعلا اكتر و اكتر
كل هاد و انا شايف كل شي و سامع كل شي
امي كانت حلوة كتير....لهيك كانو الرجال يتمنو ابتسامة او نظرة منها...وهيه لما انتبهت لهالشي انغرت بحالها كتير
و صار شغلها الشاغل كيف تغريهن و تلفت نظرهن و زوجها شايف ومبسوط طالما اعمالو ماشية/
مرفت:هههههههه جمال بيك انت دمك كتير خفيف على فكرة!
جمال:هههه ماشفتي شي لسا ياحلوة
مرفت:هههههههه
فؤاد:شو مبين السهرة ولعانة اليوم
جمال:لك خبرني وين ملاقيها؟لهالجوهرة النادرة هي
فؤاد:الحظ ضحكلي و بعتلي ياها جمال بيك
جمال:(بنبرة جدية)بدي ياها!!
فؤاد:عفوا؟؟؟
جمال:بدي ياها الليلة
فؤاد:بس هي زوجتي جمال بيك
جمال:اذا بدك بضايعك تمرق من الجمارك و ماينخرب بيتك...بتسلمني ياها ليلة وحدة و بعدها (غمزو)امورك ماشية!!
فؤاد(بلع ريقو و تردد قبل مايحكي)هيه الك
جمال:(ضحك بطريقة مستفزة)هههههههه....شاطر يافؤاد
مرفت:(بارتباك)فؤاد ممكن كلمة عجنب...بعد اذنك جمال بيك
جمال:لاتطول ياحلو
_اخدتو وقفو ادام باب غرفتي الي كنت فاتحو وعم اسمع كل شي عم ينحكى وعم يصير_
مرفت:فؤاد انت جنيت!!!معقول تبيعني لهالرجال
فؤاد:سكتي وخليكي من تم ساكت هاااد مابينقلو لا....هاد بيخرب بيتي وهو عم يضحك
مرفت:لك بس انا مرتك...انا شرفك!!!!
فؤاد:هيه ليلة مرقيها و خدي البدك ياه....هي البضاعة الي بدو يمرقلي ياها هيه تجرة العمر...لهيك مرقيلي ياها هالمرة بس
مرفت:مابقدر
فؤاد:مبلا....كرمالي بتقدري....اصلا هو شربان..وانتي خليه يشرب حتى ينطفي وينام و الصبح بتعملي حالك كأنو كل شي تمام
مرفت:انت عديم الشرف فؤاد
فؤاد:و انتي مالك احسن....روحي لجنبو و اعمليلو البدو ياه...اذا مومشانك مشان ابنك!
مرفت:لك تفه عليك!!!
_كملت امي السهرة....و بعدها جمال سأل فؤاد عن غرفة النوم...بتتخيلي...رجال يقبل عحالو و على مرتو هيك شي و بنص بيتو...دلو فؤاد..وطلع عالدرج جمال وهو ماسك امي من خصرها....بوقتها جنيت و عيوني ماعاد شفت فيهن_
باسل(بيصرخ)لك يا واااااطي...هي امي يا واطي هي امي!!!!
_ركدت بجهة الدرج وشديت امي من بين ايدين جمال و بعدتها عنو وضربتو بوكس بنص وجهو_
باسل:هي امي!!!ياعديم الشرف...انت و اللي معك
جمال(بلهثة وهو عم يتمايل من السكر)والله و طلعتي ام يا مرفت
باسل:امي...روحي ضبي غراضك خلينا نطلع من هون يلا
فؤاد:باسل...فوت على غرفتك و لاتدخل بشغل الكبار
باسل:لك ياحقير هي مرتك!! كيف بتقبلا عحالك كيف!
فؤاد:عم قلك فووووت لغرفتك!
جمال:تعي ياحلوة تعي
_مسك مرفت من ايدها و شدها لجهتو_
جمال:شباااب...تعالو خدو هالولد وعطوه درس ماينساه كل عمرو
_واجو شباب جمال و مسكوني ونزلو فيني ضرب....حتى سمعت صرخة امي وهيه عم تترجى جمال يوقفهن_
مرفت:ببوس ايدك...ببوس رجلك خلص بيكفي خلص
جمال:خلص ياشباب تركوه....شو يامرفت...بتكملي معي لغرفة النوم...ولا بتشوفي ابنك مقتول ادامك!!
مرفت:الي بدك ياه...بس تركو ابني بحالو...مشان الله تركوه بحالو
جمال:سمعت شوحكت امك!!...يلا قوم انقلع من وجهي مابدي شوف خلقتك و رح سامحك بس كرمال امك ياكلب!!
_طلعت فيها و الدم عم يشتي من وجهي....غصبت حالي حتى قدرت وقف على رجليي...بزقت بوجه جمال و امي
و ركدت برات البيت و هربت...ومن يومها لليوم ماشفت امي_
______________________
رزان:انا اسفة عنجد
باسل:عادي دكتورة....ولايهمك
رزان:وبعدها
باسل:بعدها....رحت لبيت رفيقي...الي بعرفو عايش لوحدو وكمان هربان من اهلو....عشت معو...وبعد فترة لقيت شغل بمطعم صغير...صرت اشتغل وادرس
تعلمت الطبخ من شيف المطعم....وقررت اتخصص بهالمجال...تعلمت بمعهد طبخ و بعد 4سنين فتحت اول مطعم الي بمساعدة رفيقي...
بلش اسمي يكبر شوي شوي....وبعد سنتين كمان صار مطعمي من اشهر المطاعم بالبلد...كبرت الشغل و المطعم صار مطعمين..طلعت من بيت رفيقي....بس بقينا جسدين بروح وحدة...تقاسمنا الحلوة و المرة
صرت انا صاحب سلسلة مطاعم...وهو مهندس معروف
بعد مدة حبيت بنت.....حبيتها بشكل مو طبيعي وهيه بادلتني هاد الحب....تعلقت فيني كتير حسستني كأني ابوها و اخوها و رفيقها وحبيبها وكل شي بحياتها
علمتها الطبخ معي....وصارت تشتغل تحت ايدي لما اطبخ بالمطاعم
الحب الي عطتني ياه رجعلي قلبي من جديد
رجعلي مشاعري و احياني من بعد ماكنت ميت
كانت حلوة كتير....جمالها نادر تلاقي متلو
اخدت عقلي وقلبي ومشاعري....وعوضت فيها كل النقص الي عشتو بحياتي
بقينا سنة كاملة نحب بعض وكنا مخططين نتزوج...لولا انو صار حادث دمرني ودمر حياتي واخدها مني
رزان:يعني توفت؟
باسل(بلع ريقو و غص بدموعو)توفت! وتركتني لوحدي عم عاني من غيابها و بعدها....عم شوفها بكل الناس
عم اتخيلها بكل دقيقة معي...عيونها...ضحكتها...خدودها
طفولتها....كل شي فيها...ماعم اقدر انساها..انا عم موت الف موتة ببعدها...صرلا 4سنين ولهلأ حاسسها عايشة معي
لهيك يادكتورة بدي تساعديني انسى كل شي....بدي انسى الماضي...وانسى امي...و انسى حبيبتي...بس حتى اقدر كمل حياتي...واعرف عيش!
____________________
رزان/عالجتو....فترة علاجو كانت سنة...اظهر تحسن واضح...طبيعتو المرحة رجعتلو...كان يمزح معي كتير
و يضحكني كتير...قدر يئسرني...ويسرق قلبي
كتير بيحكو عن اطباء بيحبو مرضاهن...وانا حبيت باسل
بالبداية شكلو الجذاب لفتني كتير
طولو...عضلاتو المفتولة...عيونو وساع وبلون قرص العسل...شعرو بني فاتح و ناعم كتير...وبشرتو قمحية
دقنو خفيفة و مهذبة...و ابتسامتو بتسحر اي بنت
حبيتو كتير...لدرجة ماقدرت خبي مشاعري واعترفتلو بحبي/
رزان:باسل....مو انا و انت اتفقنا نكون اصدقاء
باسل:اي اكيد
رزان:والاصدقاء مابيخبو شي على بعض
باسل:صح
رزان:و انا في شي مهم بدي خبرك عنو
باسل:(ابتسم)تفضلي
رزان:(تنهدت)انا بحبك...من كل قلبي بحبك...بعرف انك يمكن تقول هي مجنونة وكيف حبت مريض عندها...بعرف ممكن تلاقيني مو مناسبة الك لاني قدك بالعمر...بس صدقني المشاعر مو بالايد...و انا حبيتك بصدق
حاولت كابر عحالي و اتجاهل مشاعري بس ماقدرت وكنت اغرق بحبك اكتر...مو بايدي...انا بحبك
باسل:ههه...(مسك ايدي)و انا بحبك
_خطبنا فورا.....وقررنا يكون عرسنا بعد سنة...خلال خطبتنا ساعدتو ليلاقي امو...و يصلح علاقتو فيها
ولقاها مرمية بمأوى عجزة...صار يزورها بالاسبوع مرة
بس علاقتهن ماتصلحت ابدا و انا على امل انهن يرجعو متل قبل لما نتزوج_
إللي خلص القراءه يدخل هيلاقي كل الروايات اللي بيدور عليها من هنا 👇 ❤️ 👇
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
جميع الروايات الحصريه والكامله من هنا
انضموا معنا علي قناتنا بها جميع الروايات على تليجرام من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
تعليقات
إرسال تعليق