رواية أمواج قاسيه الحلقة 21 حتى 25 حصريه وجديده
 |
مهم وصلني للدار و المرة هاذي قالي ندخل معاك ، دخل معايا رحبنا بيه قعد في الصالون و أنا رحت للشومبرة تاع لبنات نبدل في قشي لبست بيجامة عريضة درت الخيمار لوحتو برك، و خرجت قعدت معاهم شايخنا شوي و بابا كالعادة يسقسي فيه على أخبار العايلة ، و على حسب ماسمعت و فهمت جاب خاوتو لبنات لي من باباه يسكنو معااه بغسك أمهم عاودت الزواج من وراء ما مات عمي و كانت حاطة بناتها ( عندها 3 بنات ) في دار جدي و كي خسرو كلش وصراو بيناتهم مشاكل عادل قتارح على خاوتو يسكنو معاه و هوما قبلو ( خاوتو في 3 ماشي مزوجين قصدي بنات عمي ) ، مهم حطينا لعشاء تعشينا كملنا رحت على زهري الكلب غسلت فالماعن ( مش راكبين لاصقين و مش لاصقين يتيرو بالحجر 😭دايما لازم يحصلو فيا ) وهو والله ماروح موالف ساعة ساعتين لاكثر خلاه و المرة هاذي من العشية لليل و هو عندنا السيد طالق رجليه علينا حلاتلو ( و أنا عجبني الحال طبعاا) ، كملت رحت قعدت معاهم ، أنا حطيت رجليا على الكرسي و هو نطق باينة كان يستنى فيا نخلص ، خزر جيهت بابا قالو _ عمي اليوم جيت قاصدك في حاجة لكان نقدرو نحكيو وحدنا ( وجه القصديرة يخرج فينا مالصالون تا دارنا وجهو صحييح تقريب ضربتو لتم وين حطييت رجليا نرتااح) _ هيه ولدي تفضل, حنا لبنات خزرت فينا ماما تا هيا براا ( وحنا والله كون ماشي هيا تخنزرت فينا كنا راح نقعدو صح والله مانا خارجين 😂) ، خرجنا و قعدنا نتصنتو قدام الباب كشما نسمعو جبدتنا ماما قتلنا أترباو هدرة تاع رجال و بيناتهم ، رحنا للكوزينة مناار قتلنا بلاك راح يحكي معاه باه يتنازل على حقو تا الدار ياخي قبيل قال بلي راح يبيعوها ، مهم كل وحدة وش قعدت تقول، شوي و سمعنا الباب تفتح و خرج عادل مالصالون مع بابا ودعنا و راح هو تقفل الباب و ماما نطقت ل بابا _ وش قلك ( هيه ا ماما مالا هدرة رجال اه ) _ أرواحو للصالون و نقلكم ، رحنا نتاشرنا كي النمل و نستناو في بابا يهدر _ راهو جا قصدني في حاجة و انا قتلو نخمم _ قتلو ماما هيه وشي هيا الحاجة هاذي _ راهو خطبني في نوور بنتي ، أنا تقريب تغاشيت من الفرحة تقريب نطرت نسوطي من بلاصتي تباسمت معا بابا لاحشمة لاوالو و قتلو _ ونتا وش قلتلو ا بابا _ انا قلت نخمم و نشاور الطفلة ( ياااو قااابلة تحب حتى نزوجو غدوة) _ هيه ونتا راح تقبل !( كنت فرحانة مش حاسة حتى على روحي وش راني نهدر ) ، حتى نطقت ماما _ باينة مش راح يقبل نتي مهبولة _ وعلاه _ منيتك تسقسي فيا وعلاه والله مانمدك لولد محمد علاه أنا عندي منك عشرة و زيد لمي روحك شوي نتي نشوف فيك تضحكي و عاجبك الحال لا حشمة لاقدر اي غير أنسايها و نحيها من مخك الهدرة أدي _ منيتك ا ماما ، مباعد درت لبابا قتلو _ ونتا بابا وش تقول _ أنا راني مع راي أمك مستحيل نزوجك ب عادل اا نور مستحييل _ ياااك القرار أنا لي نقرو ياخي انا لي راح نتزوج و هاذي حياتي ، قاتلي ماما _ والله ماتحشمي وش الهدرة أدي ا طفلة و ياخي كنتي تقولي مانتزوجش زواج لافامي وش تبدل درك و زيد راني حاسة هدرة وليد تا الخطرة لي فاتت كاملة صحيحة , قالها بابا _ وينا هدرة هاذي وش صرا و خزر فيا ....
الحلقة 22💕
_ ماما نتي لي راكي تهدري هك مالا مانلومش على الناس و خرجت مالصالون رحت لشومبرة لبنات و قعدت والله ماتوقعتهم يرفضو و مكانش حتى سبب مقنع ، شوي و جات ليا ماما قاتلي _ نتي من وكتاه موالفة ديري هك على جال واحد خطبك ا نور ياخي دايما ترفضي و قرايتي و نخدم و منااا وش تبدل_ موالفة أنا لي نرفض ماشي نتوما وزيد تعرفي راسي خشين لي ممنوع مرغوب ا ماما_ غير نحي الفكرة أدي من بالك و لكان عندك مشاعر ليه غير أنساي و بعدي عليه على قد ماتقدري عزيزتي _ مكان حتى حاجة بيناتنا بصح الراجل مافيه حتى عيب حتى نقول عليه لا خلوني نخمم و انا لي نجاوب ماشي نتوما _ وين تخمي وين نسيتي بلي راهو ولد محمد ، عمك لي مات ولي حصلوها في باباك ا بنتي نتي وشبيك _ ماما بفمك قلتيلي راهو ولد لمرا اللولة و ماعندو حتى علاقة بالعايلة هاذيك وش تبدل درك _ الإحتياط واجب ماتدري هاذي دنيا قادر حتى يعايرك بيها نهار منهارات و خاوتو راهم يسكنو معاه ماتنسايش والله يمرولك عيشتك _ راح نزوج بيه ماشي بخوتو ماديريش بيهم السبة خلااه_ نتي سيبو ديسيديتي راح تزوجي و خلصتي خمي فيها مليح بنتي لعزيزة راني نهدر في مصلاحتك هاك شفتي باباك يحبو بصح ماقبلش بغسك هاذي دنيا و ماندروش وش كاين فالقلوب مهما يكون يبقا باباه هذاك لي مات _ حسستيني بلي صح بابا قتل عمي ياك قضاء و قدر ماما علاه راكي تهدري هك _ كاين ناس هك تخمم ا بنتي _ ماشي عادل بصح _ وكتاه عرفتيه حتى تضمني فيه الرجال مافيهمش لامان أبنتي و راهو قلبي ماشي مطمن عليك ،أنا لي عندي قلتو و مستحيل نخليك تزوجي و تدخلي دارو ا بنتي و باستني على راسي وراحت، دقيقة جات زعزعتني وليت مام أنا نخمم و نقول بلاك صح و بلاك يكذب مباعد نولي نقول لاء عادل مايديرش هك والله تاع الصح تغميت و ماعرفتش نخمم ، انا هكاك و تيليفون صونا لقيتو عادل جيت راح نهز دخلو خاوتي مالا كوبيت عليه و بعتلو ميساج _ شوي ونعاودلك مانيش قاعدة ، قاتلي سيرين _ وش بيناتكم نتي وعادل _ وش راح يكون مكان والو _ اممم زعمااا _ أنا نروح خير _ أقعدي نحكيو معااك وين رايحة _ هيه أحكي وش حابة رايحة نرقد _ شوفي خمي مع روحك انتي مليح بابا و ماما ساهل تقنعيهم بصح تانا خمي في هدرتهم راهي شويا لوجيك ،حنا مانعرفوهش عادل ماشي في شهرين ولا 3 راح ناثقو فيه ، قاتلي منار _ هيه اا أختي خمي ملييح ملييح وماشي غير هو راجل فالدنيا أدي كاين بزااف و مزلتي صغيرة و مدابيك تاع الصح تبعدي على زواج لافامي يجيب غير المشاكل و تكسار الراس ، قتلهم _ هاذي نتم لي تهدرو هك ياخي كنتو ميتين على الزواج وش تبدل _ ماتبدل والو مام أنا ماقتلكش راني ضد زواج قتلك مانحبش زواج لافامي برك و دبري راسك هاذي حياتك حنا ننصحو فييك باه مرة جاية كون تصرالك حاجة تتفكري هدرتنا كاامل _ نشاله هيا تصبحو على خير و خرجت رحت للصالون و انا مخي راح يتحرق وشبيهم جاو كل ضدي بلاك صح عندهم حق ،فرشت و حكمت بلاصتي باه نرقد ولا نقولو نخمم ....
الحلقة 23💕
غدوة نضت مورالي يعييف ، شفت التيليفون لقيت عادل عيط شحال من خطرة و لقيت ميساج قالي "وشبيك غير الخير" رديتلو "مكان والو رقدت بكري برك " ،فدقيقتها بعد ريبوندالي "راني جاي نوصلك " قتلو "لالا ماتجيش راني رايحة للجامعة اليوم ورايحة معايا أختي " (نكذب وفرات أصلن خاوتي ماينوضوش درك ) ،عيطت للمدير قتلو عندي ظرف لكان نقدر مانجيش ( كاش نهار يسحتنيي ) قبل مسكين ، طفيت تلفون ونهار كامل وانا قاعدة فدار نخمم نواجهوا ونحكيلوا بصح وش نحكي ماعرفتش، ولا ندير روحي معلاباليش وخلاص، بصح باينة راح يزيد يرجع لبابا ياخد الجوااب _لمهم راسيي حبس متخمام جامي حسيت روحي مخنوڨة هكا فات ليوم وجا صباح شعلت تيلفوني و روحت للخدمة كلعادة وانا بهداكا تخمامم راح يقتلني ونڨول يخي ماما عندها حق انا من وكتاه وليت لاتيا بزواج لمههمم بزاف حكايات في راسيي كمملت خدمتي والله ما علابالي حتى كيفاه فات روحت لدارنا مديڨوتيا مالفا نعدي على بابا نسلم عليه ونڨعد مع ماما واااالوو غسلت روحي بدلت قشي وحكمت بلاصتي هاااه ونلڨا عادلل يعيط حرڨ تلفون عليا ماهزيتش ( منعرف علاه حاشمة و مش قادرة نواجهو ولانقولو حابة نبعد خفت زيد نتعلق فيه كثر ) شويا ونلڨا لباب يطبطب راحت منار فتحت سمعت صوت عادل (يا ربي انا نحلم وولا وش ولا هبللت بيه وليت نسمع صوتوا 🤣)اهييه، دخل ڨعد مع بابا وماما فصالون لعبها زعما يسقسي على بابا و أحوالو وهو حاب غير يعرف وشبيا ههه هكا شويا ونلقاه بعتلي ميساج _ واش مش راح تجيبيلي لقهوة ولا حابتني نروح هكاك ، انا ما فقتش بروحي حتان نلڨا روحي وجدت سينية تا لقهوة وداخلا لصالون ماماا يا خوتييي وجها صفار ولا كي لكعبة تا القارص دخلت سلمت على خالد و قعدت ، حتى نطق بابا قالي بنتي روحي للبيت تاعك حاب نحكي مع ولد عمك وحدنا انا ڨولت صايي اليوم يمدلو القرار خرجت و روحت للشومبرة بصح طالقة ودني عند الصالون كشما نسمع مكان والو تحسب يحكيلو في وذنو، شوي و خذجت ماما مالصالون و جات عندي تضحك أنا فرحت قلت مدام ماما تضحك تسما قبلو هيا دخلت و أنا لعبت روحي قاعدة نكونكتي وفي قلبي صايي فيهااااا يا خوتييي كل دقيقة ڨاعدة تفوتت نحسسها عاااام ڨلبي راح يخرج ♥️يخبط ميتين فسااعة قاتلي _ الحمد لله ا نور بنتي باباك سمع كلامي و رفض عادل _ وشياااا والله مليحة أدي ياخي قتلكم نخمم _ أقفلي فمك وين تخمي نتي عقلك صغير أنا لي نعرف و نفهم للحياة _ ايه اك باينة تفهميلها الحياة عليها نشوف فيك عايشة فالهناء و خرجت مالشومبرة لقيت عادل في وجهي تخنزر وحد الخزرة وراح ، درت لماما قتلها وعلاه راح يخزر فيا هكذا ياك أنا خاطيا _ بصح حنا قنالو نتي لي رفضتي وماكش حابة هذا الزواج _ لا نتوما تاع الصح مهابل وعلاه تحصلوها فيا ، نطق بابا _ نور بنتي من وكتاه ترجعي الهدرة نتي _ مالنهار وليتو تدخلو في قراراتي ، همالا كي نهرب معاه ماتقولوش علاااه و خرجت نجري مالدار تخنقت ياربي والله غير نحبو.....
ديري لايك يا المسمومة 😘
الحلقة 24 💕
خرجت كي الهاملة ماشية ماعلابالي بوالو والله غير قلقوني كي راهم يتحكمو فيا ،بلاك كون نحكي لناس خلاف يقولولي هاذو والديك ومن حقهم يتحكمو فيك و في حياتك ،بصح كيفاه راح نفهمهم بلي أنا راني متربية هك هوما لي علموني نعتامد على روحي من الصغر ،كلش نقررو و نديرو وحدي و جامي مدولي حتى رايهم ،و الحمد لله دايما قراراتي صحيحة ماشي كل بصح المهم ماندمتش عليها بغسك أنا لي حبيت ندير هذيك الحاجة ضربت يدي ماتوجعني كيما يقولو ،المهم مشيت و لقيت وحد البلاصة معمرة حشيش كنت راح نقعد فيها مباعد شفت وحد المرأة كبيرة تطلب تما أقسم بالله حالاتها خير من حالتي نبان أنا الطلابة مش هيا أيا خفت ندي عليها الزبائن ونقطعلها رزقها أيا بدلت لبلاصة و رحت قعدت فوق كرسي محطوط تما حطيت يدي على خدي و نخمم حتى تيليفوني ماديتوش ، بقيت ساعة و انا برا بصح كي خممت مع روحي عرفت بلي راني غالطة 1000% مع والديا و ماحقيش نديرلهم هكذاك مش على جال واحد عرفتو في فترة قصيرة يعلم ربي وش ناويلي خير ولا شر نربحلهم العيب منعرف مخي وين كان ،شهدت و ستغفرت و قلت سيبو نرمي حكايتو عليا لعلها خير نعيش حياتي كيف قبل و نكمل خدمتي و ميمواري لي نسيت عليه و مباعد كلش يجي وحدو هذا مكتوب ربي ، وقفت رجعت للدار طبطبت فتحت ماما دخلتني وولات تهدر و تعيط حتى جاو كل _ وين كنتي ا طفلة تقريب حبستيلنا قلوبنا نتي راكي تعيشي فالمراهقة درك ،كيفاه أدي تهربي معاه وش تربية هاذي نتي هيا بنتي لي كنت هزا راسي بيها و نفتاخر بيها و نقول لعقل و الثقل و الفحولة مع لخر تخرجيلي الخرجة هاذي وعلاجال راجل ا نور ، خيبتي أملي فييك ربي يهديك ا بنتي ربي يهديك _ زاد بابا تخنزر فيا خزرت تاع خيبة أمل و راح , تاع صح تحطمت الدقيقة أديك صح أنا وشبيا ماكنتش هك ، تحسب كانو عينيا مغمضين و مانيش واعية على شي لي كنت ندير فيه تاع الصح يقلك الحب أعمى اليوم وين صدقتها هاذي الجملة أتا تعميت و حتى من مخي ماوليتش نخمم بيه ( العقل زينة وأنا الوقت أداك كان كيفو كيف الحيط ) كنت قادرة حتى نقنعهم بصح بسياسة نعرف والديا حنان ،وشبيا أنا لي كنت قبل ما نخطي خطوة نحسبلها ألف حسااب وقبل مانخرج كلمة من فمي نوزنها ملييح ملييح نولي نقول نهرب ياه نندب ، دموعي ولاو كي شلال شوي على كلام ماما مع خزرات بابا و عادل لي لازم ننساه كلش تلم على بعضاه تاع الصح تغمييت ، نضت توضيت صليت و دعيت ربي ينورلي طريقي و يبينلي الصح من الغالط و يهديني ووقفت و خليت كلش بيد الله ، فرشت بلاصتي جابتلي سيرين لعشاء ماشفتوش أصلن ( ماعيطوليش حتى ناكل معاهم لدرجة أدي مش حابين يشوفوني 🥺) خليتهم كي كملو و حكمو بلايصهم رحت لشومبرة بابا و ماما , طبطبت و ستأذنت لكان نقدر ندخل قبل قالولو ايه أدخلي ، كي دخلت لقيتهم في زوج مشنفين قاتلي ماما _ تفضلي _ يزيد فضلك يعيشك و قعدت قدامهم _ ياو تفضلي أحكي وش 6 ماشي تقعدي معانا _ بديت ندمع و تلحت نحضن فيها و قتلهم سامحوني والله ماعرفت وش نهدر و ساعة حضر فيها الشيطان سامحوني و فرات علابالي غلط معااكم بالهدرة ماحقنيش علابالي راكم تخمو في مصلاحتي سامحونيي راني بنتكم الصغيرة و مانحملش تنايفوني شكون عندي من غييركم , بابا مسكين ولا يمسحلي في شعري _ السماح ا بنتي أصلن باينة مش راح نديرو علييك راكي بنتنا الغالية و الحنينة _ زاد باستني ماما قاتلي مستحيل نقدر نهز عليك ديري وش ديري بستها ،و هبطت من عندها طابست حضنت بابا و بستو مام هو ( وليت كي عايشة البواسة ) ، بقيت غير نعنق فيهم و نبوس حبيت نبات معاهم ماما مخلاتنيش قاتلي شارفة قدك ترقد وسطنا هههه , مهم خرجت من عندهم حسيت قلبي متهني اول حاجة درتها تعشيت ( ياخوتي مانقدرش بلا ماكلة ) مباعد رحت حكمت بلاصتي شعلت تيليفون، و يوصلني ميساج من عند عزرائيل كي قريتو حسيت الدنيا دارت بيا ياخوتي داك الميساج و دوك الهدرااات قالي فيه ......
الحلقة 25💕
"مزال مجا لدنيا أدي لي يرفضني أنا والله ندمك عليها ا نور ولا مانيش راجل ،و أنا نقول علاه نهارين ونتي مش حابة تهزي و غالقة عليا التيليفون وانا كي البهلول حاسبك حاشمة مني همالا غير أستناي مني أي حاجة نديرهالك ليامات هاذم أقسم بالله ندمرك ، و غير نحي من بالك تاع نخليك تتهناي مع واحد غيري أنا راني نديك نديك برضايتك ولا بلا بيها فهمتي بصح أني نكسرك ابنت عمي مالا غير خافي على روحك طحتي مع الشخص الغالط ،أما مانيش وليد و مانيش كيف الطحاحنة لي دارو بيك قبل ، أنا راني عادل و لي نقولها نديرها أقسم برب العزة ندلك كيما دليتيني اليوم " ، كي قريتو وليت نغلي والله مليحة هاذي تاع يهددني و مانكدبش عليكم تاع الصح خفت بصح مستحيل نسكتلو عليها رجعتلو ميساج قتلو " لي عندك و تقدر عليه ديرو ،مانيش انا لي يهددني واحد كيفك " ، وحطيتو فلاليست بلوكي و طيشت التيليفون ليل كامل و أنا نتقلب في بلاصتي الحمد لله غدوة ويكاند و ما نخدمش ،تخنقتت تاع الصح وليت نخمم كيفاه نزيد ندلو كثر على جال هذاك الميساج شكون عطالو الحق يهدر معايا هذا الكلام و يهددني و يخوفني ماكنتش غالطة كي سميتو مكلوب ، بسيف باش رقدة غدوة نضت روطار غسلت وجهي و توضيت صليت لميت الصالون و الفراش ورحت لماما لقيتها فالكوزينة دير فالغداء و معاها بابا صبحت عليهم حارو كيفاه رقدت لهذا الوقت مش عوايدو قتلهم راني وليت نتعب مالخدمة شربت الماء و خرجت لقيت خاوتي يسيقو فالدار كي شافوني ناضو يعيطو ولاه راقدة لهذا الزمان و الجمعة و مخليا الشغل كامل علينا ماناش خدامين عليك خليتهم يغليو و رحت للصالون مشني ناقصة حس، جبدت البيسي هدرة مع لي دير معايا فالميموار بغسك مابقاش و نقدمو و نخلص و نتخرج( الحق تقريب دارتو وحدها انا كنت ساعة ساعة برك وين نشارك معاها كنت مشغولة مع الخدمة و نروح تعبانة حبيت نبلوكي حتى العام مي هيا الله يعطيها الصحة ماخلاتنيش قاتلي راني تقريب نخلصو و بدينا كيف كيف نكملو كيف كيف وحتى ل Encadreur تعنا مرأة و ناس ملاح خلاه دايما معاونتنا ) ، المهم خلصت رحت تغدينا غسلت لماعن ووقفنا ....
فاتت سمانة نفس الروتين بصح عادل مابان عليه حتى خبر مايجي مايعيط ماعاد يتبعني ( ولا نقولو أنا مانشوفوش ) المهم اليوم كان لخميس وجدنا رواحنا راح نروحو لدار جدي ( اب ماما ) دار أوبيغاسيو على الحجر فالكلاوي ،حنا مانروحوش لدار جدي بزاف بحكم هوما من ولاية خلاف بعيدة و ماعندناش طونوبيل و كيما تعرفو بابا مريض مايحملش السفر حتى ساعتين بصح كان لازم علينا نروحولو وزيد وليد عرض على بابا يوصلنا بغسك هو تانا رايح و بابا وافق ، رحت انا و ماما و بابا مع وليد و خاوتي لبنات ركبو مع خالي ومرتو و بنت خالي الصغيرة ، طريق كاملة ووليد يخزر فيا ( نضرات هاذوك تاع التسيتيت انا طفلة و مانديرهمش زعما حاط كي يدير كاك يغيضني ماعلابلوش بلي نعافو 🙂) ، وصلنا دخلنا لدار جدي جدة مسكينة فرحت خلاااه قتلنا زارتنا براكة و اليوم نطيب الحلو ( وش نحبها جدة تهبل تهبل عاقلة و نظيفة وكيوووت و مين نقعد معاها و انا نضحك تحكيلنا على بكري و على جدي وش كان يديرلها ههههه ) دخلنا للصالون ( كبييرة الله يبارك ) لقيناهم كامل ( عرش ياخوتي عايلة ماما وش كبيييرة مشاء الله و كاين لبزز بزااااف ) سلمنا عليهم خدي قبالة وجعني حسيتو عوااج من التسلاام قعدنا ،شوفو عندي 4 خالاتي و 7 خوالي ( جدة ماتولها 6 ولاد كي كانو صغار هههه جاب ربي كون رانا نديرو قبيلة أقسم بالله ) ، خالاتي كامل مزوجين غير وحدة صغييرة في عمرها 32 سنة مزال مجا مكتوبها و خوالي تانا كامل مزوجين ، وكل عندهم أولاد و أحفاد ولكم ان تتخيلو العدد هههه المهم توانسنا شوي و سقسينا على حول بعضانا و تعرفت على أحفاد جدد أدا وين شفتهم شوي و طلعنا ل جدي لفوق طلينا عليه و حمدنالو بالسلامة ،انا خليتهم معاه و قلت لجدة تنعتيلي وين راح نرقد باه نبدل و نحط حوايجي تمااك....
الفصل السادس والعشرين حتى الفصل الثلاثون من هنا