رواية امواج قاسيه الحلقة الأولي حتى الحلقه الخامسه حصريه وجديده
 |
السلام لبنات أنا اسمي نور عمري 21 سنة عايشة مع دارنا لي مكونة من بابا و ماما و زوج خاوتي لبنات و انا صغيرة فالدار , حنا عائلة فقيرة بمعنى الكلمة يعني لكان تغدينا مانتعشاوش ، بابا ربي يحفظو عندو إعاقة مايقدرش يمشي من 2012( حادث بالسيارة مع عمي ، عمي الله يرحمو مات و بابا فقد رجليه ) أصلن من هذاك الحادث تقلبت حياتنا كامل، كنا عايشين غاية والحمد لله بابا كان خذام مع جدي و عمومي فالفلاحة (في أراضي جدي )و حنا كامل كنا عايشين في دار جدي لي كااانت كبيييرة مشاء الله بحر كنا نسكنو فيها كامل من الصغير للكبير جدي مايحبش يفرق ولادو عليه، الحمد لله كنا عايشين حياة كريمة وهايلة حتى جا هذاك الحادث ،في هذاك الوقت أنا كنت عمري 13سنة ، خرج بابا و عمي راحو يفرو وراقي و يرجعو بابا طلب من عمي ( الكبير ) هو لي يسوق عمي المرة لولة رفض بحكم بابا عندو بارمي بصح مايعرفش يسوق ملييح بصح بعد اصرار بابا عمي وافق و خرجو حنا كنا قاعدين حتى يلحقنا خبر بلي دارو أكسيدو راحو يجريو وييكو أنا كنت صغيرة ماني فاهمة والو وليت نجري معاهم وفرات مهم كي وصلنا للسبيطار لقينا عمي توفى قالونا بلي مات فالبلاصة بعد و بابا راهو تحت المراقبة ، ايامات و فاق بابا و خسر رجليه مسكين ،لكن زاد خسر حاجة أخرى لي هيا عائلتو لي كامل حطو اللوم عليه قالولو نتا سباب موت عمي بغسك علابالك بلي ماتعرفش تسوق نساو حاجة يسموها قضاء و قدر و مكتوب ربي ، جدي وجداتو خرجوه من الدار و لعنوه مسكين قالولو والله مانا راضيين عليك و والله ماتشوف الربح 🥺, بابا مسكين تحطم شوي مالإعاقة لي صراتلو لي خلاتو عاجز و شوي من فاميلتو، مهم خرجنا من دار جدي شفنا دار صغيرة كريناها ( بعد ماكنا عايشين فالوسع ولينا فالضييق الحمد لله على كل حال ) بعد ماتقطع المدخول تعنا لي كان من الفلاحة و عجز بابا على الشغل قررت ماما تبدا تخيط بحكم كان عندها ديبلوم المهم بدات ماما تخدم و لكن الخدمة ماكنتش تمشيلها ياسر بحكم ساكنين في منطقة منعزلة شوي ، المهم فاتو السنين و كبرنا ، البنات خاوتي كانو فنيانين الحق مايعاونو في والو ماما مسكينة رافدة الدار وحدها و انا كنت نقرا خاوتي لبنات خلصو قراية وحدة 25 سنة و الأخرى 26 سنة، كانو غير يحوسو على الزواج والله مكان هامهم شي كنت نحسهم كبار و جايحين مايخموش خلاه مزالو عايشين في أحلامهم بلي يزوجو ويهناو ماعلابالهمش بلي زواج زيد يحطم العبد برك
المهم كيما قلتلكم انا كنت نقرا عامي لخر فالجامعة ( سنة ثالثة ) مدايرة finance d'entreprise كانو خاطيني الراجل و تمسخير تاع البنات كنت نحوس نقراا و برك و ساعات كنت نخدم عمل إضافي في سوبيرات ولا حوانت تا قش بصح مافهمتش كنت دايما نتسحت مانكملش سمانة و يمدولي حق وش خدمة و يبطلوني يقولولي ماسعدتيناش و انا والله غير كنت صح نجتاهد في خدمتي المهم وحد النهار كنت ماشية نشوف كاش بيس باه نروح للدار بحكم الجامعة بعيدة على دارنا مهم أنا واقفة قدام لاري تا البيس جا ليا واحد الجان قالي _ سلام نقدر نحكي معاك ،كي خزرت فيه لقيت روحي نعرفو موالفة نشوفو فالجامعة _ تفضل _ شوفي ا أختي نجيبهالك ملخر انا راكي تعجبيني و عندي شهور و أنا نتبع فيك بعينيا لكان تقدري تمديلي اي طريقة نتواصل بيها معاك وراني ناوي على الخيير _ لالا خويا مانيش تا الحوايج هاذم يعيشك روح منا كون يشوفني كاش واحد يعرفني _ والله ماكي راح تخسري والو نتعرف عليك برك و شهر شهرين نقدم نخطب هيا ماتردينيش و انا ناوي لحلال بقا غير يحاول فيا حتى البيس مخلانيش نركب أنا مالزربة و مش حابة البيس يروح عليا قتلو نخمم و غدوة نردلك _ وعد ماكيش تكذبي _ هيه وعد والله خليني نرووح ، بعدلي رحت نجري للبيس ركبت و ديمارا للدار وصلت للدار نسيت خلاه لحكاية وبلي قتلو نخمم، بصح ماكنتش علابالي بلي على كلمة نخمم برك تتقلب حيااتي .....
الحلقة 02💕
دخلت للدار فتحتلي ماما الباب سلمت على راسها _ ربي يفرحك بنتي الغالية _ نشاله ماما وينهم لبنات _ راهم برا مزال مجااو ، زيد رحت سلمت على بابا مباعد بدلت قشي لبست بيجامة و فتت الكوزينة ندير العشاء ، خلصت لقيت خاوتي جاو سلمت عليهم حطيت الطابلة كلينا و حكينا شوي و كل وحدة حكمت بلاصتها ، أنا كنت نرقد فالصالون بغسك عنا غير زوج شنابر و صالون ، الشومبرة1 تا ماما و بابا و الشومبرة2 تا خاوتي البنات انا كنت نرقد معاهم قبل بصح بدلت منحملش لڨصرات تحم تا الليل ( يحكيو غير على زواج و فلانة تخطبت فلانة راحت فلانة جات ) ، المهم فرشت بلاصتي فالأرض و حكمت تيليفون كالعادة نحوس على خدمة نعاون بيها ، بغسك ماما مسكينة ماهي لاحقة لواالو الدراهم لي يكون عندها شوي تخبيهم لعملية بابا ( لي مستحيل تقدر تلملها غاالية بزااااف ) وشوي تصرفهم فالدار ، المهم انا قاعدة مع تيليفون درت فيلم نتفرج و يلحقني ميساج من نيمرو مانعرفوش ستغربت و دخلت نقراه "المرة هاذي أحمدي ربي كنت بعيد و لمحتك غير من بعييد مرة جاية نلقاك واقفة مع جنس آدم أقسم برب العزة غير نحرقك أنتي و هو، اقعدي عاقلة كيما كنتي يا نور راني نقييسك و بزاف تانا خليني بعييد علييك كيف قبل خير لييك ماتحصليش روحك بيا أني نتعبك ، ودرك نخلييك و خمي ملييح فالحكاية تا قبيل و درك 😉." _ أنا ما تأثرت ماخفت كي قريتو درت في بالي جايح و فارغ شغل حاب يتمسخر بيا زيد جاني كلامو ماشي منطقي كيفاه لمحني برك و هو عرف بلي قلتلو نخمم ضحكت و رديتو على الميساجو بعتلو هذا "🖕" و حطيتو ف لاليست بلوكي و كملت نتفرج كيشغل حاجة مكاينة , شوي ورقدت نضت الصبااح بكري وجدت روحي لبست غوب بلو مع خيمار باج و صندال باج و بوشات فالمارون درت شوي مسكارا مانحبش نكثر مكياج نحب نخلي روحي طبيعية ( نوصفلكم روحي انا جاية بلوندة و عينيا كبار و مكحلين من عند ربي شفاري طوال ( الزين العربي ) و قصيرة شبر و نص ( أقربهم الى الأرض أشدهم بلاء )بصح لاطاي ماني سمينة ماني رقيقة قد الماء قد الزيت و عندي شوي من المناطق الأنثوية ) ، المهم كملت عديت وجدت فطوري لقيت ماما ناضت قعدة معاها كلينا شوي ،حكاتلي بلي لكليون تاحا ماعدوش يجو عندها بزاف بغسك جارتنا لي جات جديدة ( عندها عام و نص ملي سكنت قدامنا ) فتحت حانوت التحت و تخيط قاتلي و الناس ولات تروحلها هيا منعرف علاه قتلها _ يروحو هوما يجو غيرهم الرزق على ربي ماشي على العباد ماتخميش بزاف بربي تعبك مايروحش عزيزتي و أنا راني اليوم تانيك نزيد نشوف خدمة نعاون بيها بصح علابالي بزهري الكلب نكمل سمانة و يقولولي برا و المرة هاذي نطيحلهم تاع الصح _ لالا بنتي ماتخميش فالخدمة غير كملي عامك راهو عندك ميموار يستنا فيك ماتنسايش و الدراهم اي على ربي _ لالا غير مكلاه تعاوديلي نفس الجملة تا كل المرة راني حاستها هيا لي راها تجيبلي النحس و الخدمة لي نلقاها مانكملش فيها _ ههههه معليش روحي برك بنتي لعزيزة راهو راح عليك الحال زيد ماتلقايش الكوس _ بستها و ودعتها و خرجت مالدار مشيت شوي مباعد لقيت الكوس ركبت ووصلت للجامعة مالباب بعد لقيت هذاك تا البارح في وجهي قالي _ نور لباس خممتي فالحكاية تا البارح _ ( لالا خممت ياسر و شوي كون سقسيتني على الفيلم راني حكيتلك) لا ماخممتش ونتا صبح صباح ربي خويا تحسب بايت تحلم بيا _ هيه راكي ساكنتلي في مخي هاذي مدة احبي _ اععع حبة تحبك و كلبة تعضك و جبانة اليهود تلمك روح منا خويا ماتخلينيش نبهدلك ونلم عليك الناس _ علاه قبيحة وش هدرة انا راني نحاول نشري معاك الهدرة باه تعرفي عقليتي _ لالا عرفتها و ماحبيتهاش و درك تقدر تتفضل مانيش فارغة شغل كيفك راني جاية نقرا ماشي نحكي و نتعرف _ القبيحة تاعي هههه نحب لبنات الواعريين _ تخنزرت فيه ومشييت كون زدت معاه شوي نتقيالو في وجهو أعق يحب البنات الواعريين ههه راهو باينة من جماعة أنا الكلب نتاعك عمري أضربيني نولي نبغييك استغفر الله فزدلي نهاري على الصبااح ، انا كاك و لحقني ميساااج من نيمرو خلاف منعرفوش قلت في قلبي وشبيهم هاجو عليا تحسب النيمرو تاعي حطوه في كاش طوالات ( حاشاكم لبنات ) فتحتو وقريت " هاذي راهي الزاوجة تاعك " ، شكون هذا لي راهو يلعب بيا ناقصة ناس مهابل في حياتي خزرت ورايا كشما نلقا واحد هاز التيليفون و يخزر فيا مالقيت والو .....
ديري لايك يا المسمومة ( نضحك برك 😭😂)
الحلقة 03💕
دخلت للكور روطار و كليت تبهديلة بسبت لعرب ، ماجا يخلص هذااك الكور ياخوتي غير خلصت حياااتي دايما نقول ماندخلش و ندخل كي البهيمة ، خرجت من amphi ورحت نستنى فالبروف باه نقرا TD ياخي قالو ماجاش ناس كل فرحة غير أنا ماشي زعما نحب لقراية بصح علاه نضت بكري أنا ، على جال كور تاع هذاك الشيباني ، خرجت باه نروح نحوس على خدمة لقيت هذاك اللصقة غمزلي و دارلي بيدو تا خمي تخنزرت فيه و مشيت لبلية لي سلطها عليا ربي ، خرجت و حكمت الطريق ماشية وحدي و نسقسي ( معنديش صحابات مانحبش نخالط وزيد نكره لبنات هاذوك لي يطوطو بزاف نحب نضربهم كي نشوفهم يديرو في هاذوك لي جاست باه يبانو أنثى ، كانت عندي صديقة وحدة نفس عقليتي أسمها أمل بصح زوجت و راجلها حرمني عليها تحسب راجل أنا ) ، بقيت نحوس و ندور على سعدي لي ندخل ليه يقولي مكانش الخدمة وزيد جعت و انا معنديش دراهم حتى نشري قرعة ماء ، لقيت جنينة قعدت فيها قعدة بجنب وحد المرة كبيرة فالعمر لقيتها جايية معاها ماكلة و قاعدة عرضت عليا ناكل انا قبلت طول تحسب طلت على قلبي بقات تحكيلي على ناس بكري و كيفاه كانو عايشين والله ڨصرا معاها تهبل انا هكاك دخلني ميساج من نفس النيمرو تاع قبيل ( نسيت ماحطيتوش ف لاليست بلوكي) قريتو "غير مكلاه تكسري راسك مع الخدمة كالعادة سمانة و يخرجوك " تقلقت كي قريتو كيفاه عرف بلي راهم دايما يسحتوني ،شافتني لعجوز مقلقة قاتلي يابنتي وشبيك والو خالتي غير راني نخمم _ ماتخميش بنيتي بزاف لي كتبها ربي راهي تلحقك و ربي كي يقفل باب راهو يفتح عشرة غير أصبري برك راكي باينة من وجهك طيبة كيما يقولو سيماهم على وجوههم و نشاله يعوضك ربي _ أمين خالتي ربي يحفظك ياربي و درك نخليك انا نروح عندي شوي شغالات تهلاي في روحك _ طريق الخير حبيبتي ، درتلها بيدي باي باي و مشيت على سعدي نكمل نحوس على خدمة و هذاك الميساج في بالي يادرا شكون هذا لي راهو يبعثلي و عارف أخباري ، بقيت نحوس حتى دخلت لحضانة تا ولاد سقسيت على الخدمة داوني عند راجل كبير ( باين مول الشي ) حكيتلو بلي راني مزال ماتخرجت و راني نحوس على خدمة و منا و سقساني كيفاه نقرا و نخدم ماتصلحش بغسك الخدمة تبدا على 8 و نكمل على 4:30 قتلو بلي السمانة هاذي يخلاص السوماستر اللول تسما نولي مانروحش للجامعة نخدم ميموار برك تسما تساعدني الخدمة و نقدرلها و زيد خبرتو بلي راني ڨؤاف مسحقة الخدمة وافق و تفاهمنا نبدا السمانة الجاية و مام الشهرية مليحة ، خرجت و أنا فرحانة والله دنيا مش سايعتني بلاك اول مرة نفرح يخدمو كيف هاذي ، مشيت شوي ركبت فالبيس و ديراكت للدار و انا ماشية و تقريب نوصل زاد لحقني ميساااج فتحتو " بلاك نخليك تكملي كثر من سمانة مليحة الخدمة تا المرة هاذي " ، تحسب شاورتو لكان عجبتو ولا لاء بصح المرة هاذي تاع الصح خفت شكون هذا لي راهو يبعثلي و عارف عليا كل صغيرة و كبيرة ....
الحلقة 4💕
روحت للدار خبرت ماما بالخدمة مسكينة ماحبتش تخمم على القراية بسيف قنعتها ، فتت للكوزينة كليت شوي خبز غير هو لي لقيتو فدار علابالي مكان والو نورمال أصلن والفت عليها كاان لازم عليا نخدم و نجيب دراهم ناحي شوي الهم على ماما، شوي و جاو رية و سكينة خاوتي ( رية و سكينة على أقل كانو يسرقو الذهب و يجيبو الدراهم خاوتي انا يجيبو غير الهم معاهم ) فاتو و بدلو و جاو للكوزينة يحوسو ياكلو كي مالقاوش بداو يعرشو لماما و علاه ماتقضيش و طيبي قاتلهم ماما _ والله ماعندي مانيش راح نبخلكم قلتلها أختي الكبيرة _ راني علابالي تلمي فالدراهم لعملية بابا ياو أجبديهم برك ياو تموتي وماتلحقيش لدراهمها تسما حابة تعالجي بابا و تقتلينا حنا بالجوع روحي أجبديهم و أشريلنا خير ، أنا سكتت سكتت مباعد نطقت ( ياو خاوتي مستفزين ينطقو الميت من جنبو ) _ أسمعي نتي وهي أحشمو على رواحكم شويا راهي الصغيرة فيكم عمرها 25 سنة و طامعين في ماما تجيبلكم الدراهم و توكلكم ونتم علاه ماتخدموش و تص6رفو على رواحكم مكسرين اليدين ولا أيا بلعو علينا ماتخلونيش نهبل عليكم في زوج راني محتارمتكم كي عدتو كبار عليا برك و تانا على وجه ماما _ أيا ناضو يتعايطو كيفاه تحكي معانا هك و جايين زعما زعما يضربوني و ماما تحكم فيهم قتلها _ أطلقيهم ا ماما والله نريشهم كي دجاجة اليوم راهم يعرفوني ملييح ( هوما صح زوج و انا وحدة بصح علبالي مايقدروليش قصيرة بصح يديا طوال ) ,مباعد هوما راحو للشومبرة تاعهم و انا شايخت مع ماما شوي و عديت للصالون بربشت شوي فالتيليفون مباعد رقدت , فاتو ليام و جا نهار لي نبدا نخدم فيه و يااا خوتي وش كنت متحمسة تحسب كي لولاد صغار كي يدوهم اول مرا يقراو لبست و عدلت ( سروال باديليفون دجين و شميز بلون خيمار غوز كلاغ مع طالون بلون بوشات غوز ) نص القش سارقتو من عندي خاوتي غير الخيمار تاعي هههه علابالي ينوضو يديرو الحرب ههه درت مكياج لأول مرة ( مسكرة فوندوتا غوج لفمي أيلاينر حمرت خدودي ) رحت صبحت على ماما و خرجت قاتلي اقعدي تفطري ماحبيتش ( خفت ينوضو و يشوفوني لابسة قشهم ) حكمت البيس حبسني في بلاصة قريبة للبلاصة مشيت شوي ووصلت دخلت لقيت المدير تا الحضانة قالي السلام رديتلو بدا يشرحلي وش لازم ندير ( راح نعلم الاولاد و نقعد معاهم نوكلهم نشربهم نلعب معاهم المهم من 8 ل 4 و انا معاهم حتى يجو والديهم يدوهم ) بديت نخدم الحس بزاف بصح ماقلقونيش و زيد نحب لولاد و نعرف كيفاه نتعامل معاهم ، في يوم واحد تعلقت بيهم يهبلو و كيوت خلااااه سيغتو وحد الطفلة مام هيا يسموها نور مشاء الله زينة تهبلل و عاقلة و صغيرة و تعرف تهدر كي لكبار و نظيفة تشعل تمنيت نجيب طفلة هك ولا نكون أم ليها هيا بعدد.....
الحلقة 05💕
جات 4 وجدت لولاد داوهم والديهم و انا لميت حوايجي عدلت روحي ودعت لي يخدمو معايا و خرجت فرحانة حبيتها الخدمة هاذي و رتحتلها بزااف نشاله ياربي نكمل فيها برك والله عييت و أنا نتسحت بلا سبة ،وانا ماشية فالطريق رايحة نشري وراقي و كتاب ( نحب نقرا بزاااف ) الحانوت بعيد شوي على الحضانة بصح نقدر نمشيلو على رجليا ،لقيت اللصقة هذاك تا الجامعة جا يجري عندي _ نور يانور حياتي راني توحشتك _ أحشم ا خويا بلا كلام زايد رانا كباار و جيت ماشية حكمني من يدي _ نحي يدك عليا وشبيك نتا _ خليني نحكي معاك دقيقة _ ماتحكيش معاايا _ ياك قلتيلي نخمم و مارجعتيليش علاه خليتيني معلق _ راني خممت لا لا لا أخطييييني لا نبدا نعييط _ كيفاه لا ياو راني ناوي لحلال مانيش نلعب _ مانحبش لحلال أنا داكور سيغتو معاك بعد و درك بعد عليااا يا لخرااا ، انا نحي في يدي عليه و هو يزيد يحكمني و يقولي زيدي خمي مليح راني مش قادر نحيك من راسي ،انا نجبد في روحي و هو يجبد ماقدرتش نبعدو عليا pourtant رقيق و مافيه حتى عضمة ولا لحمة و قاوي عليا ( لازم نجري على روحي ) حنا هكاك حتى نلقى عبد تلاح بيناتنا ( حيط ماشي بنادم ) و عاطيني بظهرو أسمر و خشين دخل فيه طول يضرب لا سلام لا كلام قتلو _ خويا أطلقو وشبييك هذا ,ويدور ليا يا خوتي تقريب ضربني أنا شفتو الصح داير كي لخرا ههه يخووف و مقلق و يبان شريير و عينيها أسود غامق هذاك الابيض لي داخل العين تقريب مكانش قالي _ راهي الثالثة تاعك ياا نووور وش ندير فيك انا درك ( يحكي معايا و يضرب في هذاك ) _ ياو وانا ثالثة أطلق الطفل راح تقتلو نتا مريض خويا _ ياو بلعيي عليااااا غاضك والله نقتلك معاه كون تزيدي كلمة ياك قتلك ماتستفزنيش و خليني بعيد عليك _ وشيا وكتاه هدرت معاك ، انا نهدر و تفكرت ليميساج لاااا هذا لي كان يبعثلي تسما لحكاية كاينة منها و ماشي يلعبو بيا و زيد شكون هذا و مين جاب نيميرو تاعي ووعلاه يبعثلي ووش قصدو بهدرتو ، طلق الطفل و جا ليا كركرني داني لواحد الطونوبيل و الناس تتفرج تبهدلت جاب ربيي ماكنتش قريبة للحضانة كون راني تسحت مالنهار لولة المرة هاذي ماشي سمانة ، نضت نعيط أطلقني مانركبش عاونوني يا ناااااس ركبني بسييف عليا و غلق الباب راح يركب جا ليه راجل قلو أطلق الطفلة وشبيك نتا الدنيا سايبة حتى خاطف الطفلة قدامنا والله نشكي بيك _ لي عندك ولي تقدر عليه ديرو و درك بعد على ربي لا نكمل عليك نتا دزو و دخل الطونوبيل و ساق ( قصدي طاار ) انا خفت ندير أكسيدو و نموت يحطوني كنت مع صاحبي .....