رواية أمواج قاسيه الحلقة 26 حتى 30 حصريه وجديده
 |
نعتتلي الشومبرة قاتلي_ بدلي هنا حبيبتي راهي شمبرتك لي ترقدي فيها نتي ولبنات _ يعيشك ياجدة الغالية و بستها من راسها و راحت ، هيا خرجت وانا بديت نندب هففف وش راح يقعدني نهااارين مع لبنات مانحملش نجتامع معاهم بزااف ( نكره الناس كل أنا 😂) بدلت لبست غوب تا دار فالبلو سيال و جايا بالورود بيض مزيرة على جيهة الصدر و الكرش و عريضة من تحت لميت شعري درتو دوايرة الفوق ولميت قشي طبقتو و درتلو بلاصة ، أنا كملت و دخلو بنات خلاتي في 3 ( عندي 7بنات خالات 4 مزوجين و 3 لا وعندي 9 بنات خال 🙂) ضحكو معايا هاذيك الضحكة الصفرة ( الحمد لله كره متبادل ههه) و بداو يكيلو فيا من تحت الفوق قاتلي كوثر _ سمنتي وش راكي تاكلي هذا اعطينا الوصفة ماتبخليناش _ ( ناكل في السم 🙂) ههه والو من بكري هكذا أنا _ لالا ماكنتيش كمك بصح زيد قصرتي تانيك هههه راكي شبر و نص تاع صح _ ( تزيدي كلمة الشبر و نص تريشك كي دجاجة ) ضحكت معاها و سكت جيت خارجة قاتلي ايمان _ وشبيك ماتقوليليش زعفتي من كوثر كي قتلك قصيرة راهي تضحك _ ههههه وعلاه نزعف منها هذا مانيش حاطة مع كلامها أصلن و خرجت يغمو ياربي مغزلين نرقد برا مع البقر و مانرقدش معاهم ، رحت للكوزينة نشرب الماء لقيت جدة معاها ماما و زوج خالاتي قعدت معاهم شوي ، سقساوني على حوالي و على القراية كيفاه معاها _ الحمد لله مليحة _ وكتاه السوتنونص تاعك _ السمانة الجاية نشاله _ نشاله ،بصح هاكي لقيتي خدمة قبل ماتتخرجي فحلة _ خدمتي ماهيش بديبلومي _ المهم خدمة ولكان مش عاجباتك خلي بلاصتك للعباد خلاف كاين ناس مالقاوهاش ونتي تشرطي _ علاه انا قتلك ماعجبتنيش مين تجيبي فيه لكلام أدا ، تخنزرت فيا ماما بمعنى بلعي و أخرجي منا علابالها نزيد معاهم 5 دقايق نوض ڨيرا فالدار 😂( فهتو علاه مانحبش نجي عند جدي و نروح عند لافامي ) ستأذنت و خرجت قعدت برا فالحوش مع لولاد الصغار لعبت معاهم شويا و جا وليد شافني بقا يخزر فيا و يذبل في عويناتو انا كنت راح نوقف نقولو صورني خير مباعد تفكرت وش راني لابسة خليتو و طلعت نجيب تيليفوني خليتو الفوق فالشومبرة ،
كي دخلت لقيت لمغزلات هاذوك يهدرو بشويا كي شافوني سكتو ( باينة كانو يقطعو فيا خلي يديولي شويا ذنوب ) جبدت تيليفون وقتلهم راني خارجة كملو أحكيو و غمزتلهم و خرجت ، فتحت تيليفوني لقيت ليزابال تا عادل ( نيمرو تاعو لي عيطلي بيه اول مرة ) ، مانكذبش عليكم فرحت ( توحشتو خلاه ) انا هكاك و زاد صونا في يدي كنت راح نكوبي مباعد قلت والله نهز نشوف وش مسحق ( ولا نقولو حابة نسمع صوتو ) رحت قعدة فالحاشية تا الدروج باه كون يجي واحد نشوفو و هزيت _ ألو _ مالا ركبتي مع هذاك الطحان _ وش دخلك تسما معيطلي باه تقولي هكذا _ وش حابتني نقول ل ربك توحشتك ، كوبيت عليه ديراكت خرااا بعثلي ميساج قريتو "غلطاتك راهم غير يزيدو ياويلك مني " زيد حطيتو ف لاليست بلوكي بهذا النيمرو خالي مرا جايا يعيطلي فاليوتيوب ..
فاليل تعشينا و تلمينا كااامل فالصالون نشايخو و نضحكو ( حتى جدي جابوه معانا دارولو مخاد و قعدوه )انا قعدت مع جدة هيا تحكي و انا دموع يسيلو تقتلني بالضحك نبقا غير نقلها زيدي جدة، حنا هكاك حتى ينطق جدي قال ل بابا _حميد ولدي حاب نحكي معاك في حاجة ونشاله ماترفضنيش _ تفضل ( أنا عرفتها سير راح يقولو ولو عيشو معانا و بابا يغيضو الحال كيما كل مرة ) _ يزيد فضلك بالخير ، شوف وليدي نتا راك كي بني و انا جيت قاصدك في بنتك نور لولدنا وليد نشاله ياربي ماترفضش على وجهي راكم دايما ماتقبلوش و الطفل راهو متعلق فالطفلة مالصغر و علابالي يحطها في عينيه اسمع كلامي هاذي المرة راني حابلها غير الخيير_ انا خزرت طول في بابا تا لاااااا يا بابا .......
ديري لايك يا المسمومة الزينة 🥰😂
الحلقة 27💕
قالو بابا نخمو و نشوفو راي الطفلة و نردولك ا عمي _ وين تخمم يابني 5 سنين و هو يخطب فيها وش مزال تخمم ، نطقت أنا قتلو _ هيه ا جدي 5 سنين و هو يخطب فيا و دايما نقولو نفس الجواب و حتى المرة هاذي مش راح يتبدل والو في قراراي _ الجواب بيد باباك و يماك ماشي نتي _ علاه شكون راح يزوج انا ولا هوما يا جدي انا مانيش باغية نتربط درك مزلت صغيرة و حابة نخدم _ هيه تقدري تخدمي ونتي مزوجة مكان حتى مشكل ياخي ا وليد ، نطق منهيه قاعد مربع كي لولية _ وي جدي لي تبغيه كامل راني قابل بيه مهم ترضى برك ،مرت خالي تقريب تغاشات كي قال هكاك و أنا كل يوم زيد نكرهو كثر يازحي لصقة مابغاش يفهمم مانييش حااابتووو _ قالي جدي يابنتي والله ماتلقاي واحد كيفو _ وي صح مكانش لي كيف وليد كاين لي خير منو برك ( قلتها بين شواربي برك ) _ جدي ماني حابة لا لي كيفو لا لي خير منو ماني باغية والو _ تخنزر فيا ودار ل ماما قالها أهدري مع بنتك قاتلو _ خليها برك أنا لي نقرر هيا راهي رايها تالف و ماتعرفش صلاحها و كي هيا ماتعرفش تميز بين لمليح و الخايب انا نقرر في بلاصتها _ تنارفييت خلاااه على ديييك الهدرة وقفت و قتلها _ زيدي أزوجي في بلاصتي و خلاص و خرجت خليتهم يتعايطو و يسبو فيا مش متربية ويالي فيك و لي فييك، طلعت للشومبرة لي نرقد فيها نغلييي ماقلقني حتى واحد بخلاف ماما راني علابالي بيها دير فيها مكرة و حابة تزوجني لوليد باه مانطمعش ندي عادل ماعلابالهاش بلي قادرة تحطمني بهاذي المكرة لي راهي دير فيهاا ، شوي ودخلت عليا كوثر قاتلي _ مبروك عليك حنونة راهم قبلو والديك باش تزوجي وليد _ تتمسخري بيا نتي _ والله كيما راني نقول ، دزيتها و خرجت نجري هبط لتحت لقيت ماما في وجهي قتلها _ قبلتو بيه صح _ أرواحي نحكي معاك وحدنا _ لالا جاوبيني ا ماما _ هيه امشي قدامي برك نفهمك _ وش نفهم أدا ، مشاتني و داتني للحوش وقعدتي فالكراسة لي لتم _ هيه هانا قعدنا ووحدنا أحكي ولا نجيبلك كاس قهوة تانا _ شوفي بنتي وي رانا قبلنا بصح خمي فيها شوي طفل راهو شاريك و يموت عليك 5 سنين و هو يجري وراك كون جا واحد خلاف والله من المرة اللولة سيبو وزيد قاري و مثقف خدام عندو دار كون ماجيتش علابالي بلي راح تهناي معاه والله مانمدك ا حبيبتي _ نتي ماما اكي نورمال راح تعرفيني في وليد عقليتو كي لخرا وليد أمو يرجع الهدرة حلاب وش ندير بيه أنا كابابل كون يدور بيا واحد برا يهرب و يخليني يا ماما مافيهش ريحت الرجلة هك تحبي نقولهااك بصرييح العباارة طحااااان.......
الحلقة 28 💕
_اقسم بالله ماتحشمي تحكي على ولد خالك كيما هك نتي تاع الصح وليتي ماشي مربية مالنهار تلاقيتي بهذاك المكلوب تا عادل ( لا ماما مانسمحلكش غير أنا لي نقولو مكلوب ) _ وش دخل عادل فالحكاية ياك ماقبلتوش وسيبو نسيت الحكاية نتي لي راكي تجبدي فيها راهو يحرق في قلبك الراجل تحسب منعرف وش درالك و راني قلتهالك وليد أزوجو بيه نتوما المرة لي فاتت قتلك نهرب و أنا ماشي في وعيي ، المرة هاذي نقولها وانا في كامل قوايا العقلية والله نهرب كون تحتموه عليا _ ياك والفتك حاليتلك العين وليتي تهدي فيا همالا والله غير تديه و جربي ديري حاجة و درك قودي للشومبرة ترقدي أقسم بالله تروحي للصالون و تهدري كلمة ولا تقولي راني رافضتو نلعنك ليوم الدين والله مانسامحك و ماكي بنتي مانعرفك _ ماما وشبيك علاه ديريلي كمك _ أقفلي عليا فمك وروحي للشومبرة هيااا _ طلعت للشومبرة و خليتها شوكاتني بهدرتها ماكنتش حاطة راح يجي نهار و ماما لحنينة و تقسا عليا هكذا و تسيف عليا نزوج ، ياربي والله مانقدر نديه لازم نديير حل لعمري، جا في بالي طوول نعييط لعادل قلت غير هو لي يحلهالي نحكيلو كلش و يحاول يقنع والديا يبطلو ولا حتى يهدد الطحان هذاك تا ولييد باه يبطل هو ، هزيت التيليفون عيطلو نعيط و نعاود ماهزش هففف ياربي وش راه يدير مايرقدش حتى هذا الوقت ، حطيت التيليفون و نحيتو من لاليست بلوكي قلت بلاك يعييط ساعة و انا نستنا ، جاو لبنات ولاو يطلقو فغمالتهم عليا وزيد ايمان كون لقات راهي ضربتني ( كانت صاحبة وليد قبل ) سكتت سكتت مباعد قاتلي _ نتي صح شيطان لعبتيهالي تكرهيه و ماعينكش فيه و راهو كي خوك و كي وصلت للصح قبلتي _ تتمسخري بيا نتي درك ياك 5 سنين وهو ورايا و يخطب جامي قيمتو كون عيني فيه راني ديتو كي خطبني أول خطرة _ والله مانخلييك تتهناي معااه _ ديري مزية و درك قيليني ماتخلينيش نطلق هبالي عليك و خرجت، ديت التيليفون و نعيط للمكلوب ( بلاك عيطت واحد 50 مرة ) انا هكاك نعيط و هو هز قلت_ ألو سمعت صوت مرأة قاتلي _ وي شكون معايا ، تشوكيييت كوبيت عليهاا طول ياه نندب راهي باينة صاحبتو ولامرتو مباعد وليت نقول بلاك أختو بصح أختو ماتقوليش شكون معايا ماهيش مهبولة تهز تيليفون خوها وتسقسي لي راه يعيط شكون نتا , وليت نبكي بشوي باه مايسمعوش وش غاضتني روحي انا تقريب عااديت والديا على جاالو و هو مش لاتي بيا علقني بيه وراح الحيوان بصح حتى انا مانيش ضعيفة باش نقعد معلقة بيه والله نمحيه من مخي كيشغل جامي شفتو ولا حبيتو ، ماما كان عندها حق منعرفش نخير أنا طحت فالشخص الخطأ تبانلي نقبل بوليد نربح رضايت ماما و ننسا المكلوب هذا خير ....
ديري لايك يا المسمومة باه غدوة نعرفو سي عادل وش يدير 💕
الحلقة 29 💕
تغميت و تقلقت علاه دار فيا هكذا زعما صح حاب ينتاقم مني بصح انا وش درت أصلن حكاية موت انا وش دخلني زعما كي يحببني فيه و يكسرلي قلبي وش راح يربح حتى بابا لي زعما هو السبة ماهوش لاتي بيا و ماهوش عارف بشي لي تحس بيه بنتو ،اصلن واحد ماراه حاس بيا ماما لي كنت حاطتها سندي فالدنيا دارت عليا ضربة وحدة خاوتي لي كون نحكيلهم يضحكو عليا بغسك انا كنت مانحملش كي يحكولي على قصص الحب، حتى صاحبة كي الناس ماعنديش ماعندي لي من نشكي و نبكي ( الشكوة لغير الله مذلة) ، بقيت غير نبكي مباعد مسحت دموعي و زيد تفكرت كامل وش صرا ميساجاتو تهديداتو الشي لي صرا اليوم من الغمة هبطت طول للصالون لقيت جدي و جدة و ماما و بابا وليد المهم كامل غير البنات و خاوتي مكانش ( من ولاد خالاتي و خوااي الذكورة لكبار واحد ماجا بغير وليد ) دخلت طول قتلو _جدي ( بالصوت ) ماما تخنزرت طول فيا قاتلي _ نور روحي منا ماتنسايش وش 6 مالتيتش بيها و كملت دورت لجدي _ راني خممت ملييح المرة هاذي _ بنتي سيبو حكينا مع والديك و قبلو و ، ماخليتوش يكمل هدرتو و قتلو _ مام أنا راني قابلة ا جدي ، تشوكاو كامل وليد قال _ اووو ياااس و ياخوتي فشلو ركايبي كي دار هذاك الجاست بيديه حسيت روحي كون نديه نمشيه من وذنيه انا الراجل و هو المرأة، فالحضة هاذيك كي خزرت فيه ندمت خلاااه وش داني نقبل ياه نندب ادا مستحيل نقدر نكمل معاه حياتي ،أنا يلزمني رااجل فحل و واعي ماشي دري يقولي اووو ياااس ( حسيتو مزال يتفرج كوميكات 😭) قالولي كامل بالباراكة عليكم و ماما جات تحضن فيا و انا في مرحلت اللاوعي وش درت في روحي أنا ، حبيت ندير مكرة في عادل ! ياو المكرة كاملة درتها في روحي أنا، رغرغو عينيا بالدموع و خرجت نجري رحت للحوش و حليت الطاقة حبيت نتنفس شويا هواء نقي لانموت من القنطة و الغمة هففف الراي التالف وش يدير، ربي كي كان يمد فالعقل للناس انا وين كنت هفف هفف تقريب خنقة روحي ( وزيد مانكذبش عليكم وليد وليت مانحملوش نعافو صح، من نهار آخر مرة دارلي هذاك الجاست، قبل حتى كنت ماديرتو كي خويا درك كي أختي و مانديروش ) ، انا هكاك و صونا تيليفون لقيتو عادل تقريب كسرتو مباعد حبست غاضوني صواردي نخسرهم على جال مكلوب كيف هذاك بقيت نكوبي و هو يعاود أيا مباعد هزيت قلت نحطلو سعدو في يدو _ ألو _ وي بنتي لاباس ( نفس الصوت تاع قبيل بصح علاه راهي تقولي بنتي ) _ شكون _ أنا فاطمة أم عادل حبيبتي عيطي قبيل و هزيت عليك كوبيتي و ماقدرتش نعاودلك ماعنديش الكود تا التيليفون ودرك كي خرج عادل مالدوش قتلو يعيطلي ليك _ ااا طاطا لاباس علابالك صوتك يبان تا وحدة فالعشرينات الله يبارك _ هههه يعيشك يعيشك راهم دايما يقولولي صوتك رقيق كي المعزة _ لالا حاشة صوتك يهبل طاطا _ ههه مالا لاباس بنتي وشراهم باباك ماماك خاوتك_ الحمد لله طاطاا الغالية يسقسي عليك الخير ربي يحفظك _ هيا مالا بنتي نخليك انا نروح نرقد سهرة بزاف اليوم ماشي مليح ليا، ليلة سعيدة حبيبتي _ ليلتك أسعد تصبحي بخير نشاله ، جيت راح نكوبي سمعت صوتو _ ألو ( ياربي داك الصوت لي يزعزلي بدني وقلبي صوتو خشين لأقصى حد ) _ وي _ علاه عيطي قبيل وش تسحقي _ تفكرت وش صرا ووعلاه كنت راح نعيطلو قبيل كنت مدايرة في حسابي نحكيلو كلش بلي راني خاطيا بصح درك وش راح نقولو بعد ماقبلت بفمي ياربي وعلاااه _ يا ألو ويينك أهدري ولا نكوبي _ لالا مكان والو عيط نسقسي برك _ صحا وكوبا عليا ترميت فالأرض و قعدت نبكي على زهري المتعوووس ...
الحلقة 30💕
انا هكاك نبكي جات ماما قاتلي _ نور بنتي وشبيها حالتك كمك وجات ليا _ بعدي عليا ماتقربيليش راح دمريلي حياتي بقراراتك والله مانسامحك حاب تزوجيني ل وليد بسييف _ تزوجي ب وليد خير من عادل _ لا هذا ولا هذا بصح كون نتخير بيناتهم او نزوج عادل فهمتي _ أحشمي اطفلة درك سيبو راح تولي مربوطة بأسم راجل و مازلتي تجبدي على عادل _ لالا باينة راجل و سيد الرجال تانا لاصق في وحدة ماتحملوش _ مع الوقت تعرفي صلاحك حبيبتي مزلتي صغيرة _ أيوه قلتيها بفمك مزلت صغيرة علاه راح تزوجوني كون تلهيتي ببناتك لكبار كيما راكي لاهية بيا خير راهم راح يبورولك انا ساهلة حتى و ما زوجتش عندي خدمتي _ ربي يهديك حتى خاوتك لكبار ماشي طالقتهم فمك راهو ولا كي سم _ وش ربحت كي كان فمي كي لقطرة تا لعسل شعر ، وخرجت وخليتها طلعت للشومبرة لقيت لبنات ساهرين دخلت رقدت طول في بلاصتي و ايمان تقحرلي بعينيها علابالي كون نتبعها نجيبها مالشعر غطيت على راسي و رقدت ماحسيتش حتى بالنومة كيفاه ، الصباح نضت روطار مالقيت حتى وحدة تهنيا منهم لميت فراشي و غسلت وجهي توضيت صليت وهبطت عينيا منفخين حالتي تعيف لقيتهم حاطين الطابلة و متلمين كل يفطرو , شافني وليد قالي _ صباح الخير نور أرواح راني حكمتلك بلاصة قدامي ( تحسب بلاصة فالجنة ) تخنزرت فيه قاتلي جدة _ يابنتي وشبيها حالتك هكذا و عينيك منفخين _ بايتة نبكي على زهري _ علاه ا ميمة وشبيك _ قاتلي خالتي لبارح خطبتك ونتي تبكي فالحق تفرحي قتلها _ هاذيك هيا سبابي ياااو مانيش حابة و الناس ماتفهمش _ قالي خالي اب وليد _ ا طفلة وش لعب الدراري هذا لي ديري فيه كل مرة براي ياك لبارح قلتي قابلة _ لبارح قلت قابلة بغسك أختك لي هيا ماما هددتني قاتلي كون ماتقبليش مانرضاش عليك و ماك بنتي مانعرفك تسما كان لازم نقول هكاك باه نرضيها برك _ قالي جدي ماعندك حتى رأي درك سيبو حددنا نهار الخطبة و الفاتحة راهو السمانة الجاية قصو علينا الموضوع _ مبروك عليه مهم أنا مانيش لعروسة برك _ جات ماما جبدتني من يدي داتني للكوزينة ضربتني بواحد الكف حسيت خدي تملص قاتلي _ فيقي مع روحك وشبييك نتي ماكنتيش هك نتي نور ترجعي الهدرة للكبار من وكتاااه راكي هبلتي فهميني وش تبدل فيك , نضت نبكي و قعدت فالأرض _ يا ماما راني نحبوو يا ماما مانقدرش نزوج بولييد راني نحب عاادل ا ربي افهميني _ ولات تقفلي في فمي أسكتي امصيبة كون يسمعوك _ خلي يسمعو رااني كرهت متخمام هنيني يعيشك _ ياو عادل يا كلبة والله ماهو لاتي بيك كون جا يحبك راهو حارب على جالك 5gv أول مرة رفضناه كشما عاود جا هاك تشوفي في وليد سنين و هو ورااك فيقي _ مانفييقش حتى و عادل مايحبني5ش كيما راكي تقولي انا نحبو و عيني فيه و نحارب على جالو _ ولات تندب في وجهو يا خلايا وش راهي تقول أقفلي فمك ياه نندب والله غير نزوجك في أسرع وقت علابالي بيك ديريلي فضيحة و درك امشي قدامي تزيدي تخرجي كلمة من فمك تشوفي ، مشاتني معاها و داتني للشومبرة لي كانت راقدة فيها هيا و بابا طيشتني تما و غلقت عليا الباب . ...
الفصل الحادي والثلاثون حتى الفصل الخامس والثلاثون من هنا