رواية أمواج قاسيه الحلقة 16 حتى 20 حصريه وجديده
 |
بعد ماخرجو عادل طلب السماح من ماما على الشي لي صرا قالها ماكنتش حاسب هذا الشي كامل يصرا كون راني ماوصلتهاش ( أنا تقريب أمنتو وجه الهم) ، ماما قاتلو _ هاذي ماهيش غلطتك و سوء تفاهم وفرات و سيبو تصلح و طلبت منو يقعد يتعشا بصح هو الرفض قال عندي خدمة ولازم نخلصها ،سقسا على بابا قاتلو ماما راح راقد ، كي جا خارج بقا يخزر فيا بنضرات تا ( نحكمك نقتلك ) تحسب منعرف وش درت هو الغالط فيا و تقريب لاحني في مشكلة قد السمااء و زيد يتخنزر فيا بهذيك النظرة، حنا هكاك و بابا خرج من الشومبرة ( كرسي متحرك )يعيط على ختي (كان راقد مسكين والله ماو سامع بحاجة بغسك يشرب دواء تا نوم و الحمد لله كي ماسمع والو كون راهو تجلط مالشي لي صرا اليوم ) المهم كي جا جيهتنا شاف عادل ،مسكين عينيه تملاو دموع قالو _ هذا نتا عادل ولد خويا محمد الله يرحمو _ ايه أنا هو و طابس باسو و سلملو على راسو _ بعدو بابا قالو ماتبوسنيش فالحق تضربني أنا سباب موت باباك و ناض يضرب في وجهو قالو كون غير متت أنا ماشي هو راني كل يوم نتمنى الموت 1000 مرة على الشي لي صرا راهو تأنيب الضمير ماخلانيش نعيييش ا وليدي راهم عندهم حق عايلي كي تخلاو عليا ( اول مرة نشوف بابا فالحالة هاذي كان دايما ساكت مايهدر والو يبان مهموم بصح مايخرجش لي في قلبو و اليوم كي شاف عادل تفلق ) قالو عادل _ لالا عمي نتا ماعندك حتى ذنب و هذا مكتوب ربي وصلت ساعتو ربي يرحمو واحد ماعندو ذنب هذا مكتوب ربي هم السابقون و نحن الاحقون ، و جدي و جداتي و عمومي الله يهديهم كي حطو عليك اللوم يجي نهار و يعرفو غلطتهم _ راهم 8 سنين و شهرين ملي صرا هذاك الحادث و مانساوش ياولدي بصح عندهم حق محمد خويا الله يرحمو كان عمود العايلة و أنا قتلت هذاك العموود الله لاتربحني وراهو ربي يعاقب فيا هاك تشوف فيا كيفاه حالتي ميت بالحياة _ لالا عمي ربي يعلم بكلش و علابالو مادرتش هذا الشي بقصد لازم انت تنسى باه تعيش مرتاح و ماتحوس على حتى واحد يا عمي لعزيز و أمسح دموعك هاذو الغااليين ، ولا يمسحلو في دماعو أنا للحضة ماعرفتوش عجبني كلامو و يبان واعي و رزين و ماهوش يخمم كيفهم بوغتو عمي محمد الله يرحمو كان باباه بقيت نخزر فيه تهت قبالة وليت نخمم كيفاه منعرفوش و جامي شفتو ولاد عمي كل نعرفهم و نشفا على وجهم (كنت 13 سنة نشفا شوي ) غير هو و زيد حتى أسمو ماعقلتوش حرت ، كي طلع راسو لقاني نخزر فيه غمزلي 😉 حشمة هبطت راسي ( لازم يحشمني ) ، وقف على رجليه _ أنا نروح برك قالو بابا زيد أقعد شوي أوليدي ريحت المرحوم راني تحرمت منها _ والله ياعمي اليوم عندي شغالات مرة جاية اني نجي نشاله ، قاتلو ماما _ عندك ماتجيش برك راك 8 سنين ولا مرة غلطي فالدار _ مجاتش الفرصة برك ا عمتي ا سمحولي _ سماح ا وليدي و سلم على ماماك فاطمة _ يوصل هيا باي باي طهلاو في روحكم و خرج ، درت ل ماما قتلها نتي ا ماما ياخي تكرهيهم و ماتحبيش حتى اسمهم يتذكر كيفاه قلتيلو سلملي على أمك فاطمة .....
الحلقة 17 💕
_ حكاية طوييلة _ أحكيهالي ماما راني أصلن ماتفكرتوش حتى عادل _ ماتفكرتيهش وراكبة معاه فالطونوبيل مالا كون عرفتيه وش ديري _ ماما منيتك _ والو والو هيا برك زيد يسمع بيك نروح للكوزينة نكمل العشاء _ نحي قشي و نجي عندك تحكيلي على عادل ا ماما _هيه روحي برك اني نعرفك كي تحكمي في حاجة، رحت نجري نحيت قشي بسرعة البرق و لبست بيجامة توضيت صليت ( مخي والله مكان مع الصلاة النهار هذاك ربي يسامحني برك ) ، و رحت للكوزينة لقيت خاوتي _ ماما هيا أحكيلي أزربي أزربي ، قاتلي سيرين ( أختي 2) _ سمي بسم الله راك درك وين قعدتي و أصلن ياخي ماتحبيش لحكايات و المجامع و الهدرة على الناس و اليوم وش صراالك وش تبدل _ ماهمش حكايات حبيت نعرفو شكون برك هيا ا مامااا _ قاتلي ماما هذا عادل ولد محمد الله يرحمو من مرتو الأولى _ علاه ماما عمي كان مزوج زوج _ هيه فاطمة أم عادل أول كنة فالعايلة الله يبارك رزينة و عاقلة زوجت من عمك صغيرة بالاك كانت 18 سنة و عمك هذاك الوقت كان مش تا دار و مسؤولية و أصلن زوجوه والديه بيها بسيف كان يحب وحدة خلاف المهم كان الله يرحمو و يسامحو دايما يروح سكران يضربها و يسبها و هيا غير تتحمل مسكينة صبرت معاه و جابت عادل، قاتلي عادل كانو تا العايلة كامل يموتو عليه ولد الغالي و أول حفيد المهم كي ولا في عمرو 3 سنين ، محمد قرر يعاود الزواج و يزوج لي كان يحبها كريمة ( مرت عمي لي نشفا عليها )، بصح فاطمة ماقبلتش قاتلو صبرت على كلش بصح تزوج عليا لا مستحيل نصبر و نقعدلك فالدار ،و مام تاع العايلة رفضو المرة اللولة بصح كي أصر عليهم و هددهم يخرج مالدار مايرجع قبلو، و هيا طلبت الطلاق قالها تطلقي ندي ولدي بصح هيا ماسكتش و مخلاتش ولدها و في مرة هربت وراحت لعايلتها لي كانو أصحاب جاه و مال و حكاتلهم كلش (مكانوش يعرفو بلي عايشتو بنتهم مع محمد كانت تحبو و مابغااتش تحكيلهم علابالها يطلقوها منو بسييف )، راحو لمحمد قتلوه بضرب و جبروه يطلقها بسيف عليه، و كيما كان الحال هوما طلقو وولدها بقا عندها و كان مرة على مرة يجي للدار كي يبقاو يعيطو عليه جدك و جداتك بغسك يموتو عليه _ هاااا مالا عليها مانعرفوش _ هيه مكانش يجي بزاف و كي يجي هو نتي تكون هاملة برا ياخي كنتي تموتي على اللعب مع البقر ( والله كي كنت صغيرة كنت نعيط لوحد البقرة ماما من كثرة نحبها و نهار دبحها جدي جبتها سمانة و انا نبكي عليها بصح لحمها ناكل فيه نورمال 😂) قاتلها منار _ ياو أنا كنت نعرفو فالصغر بصح درك راهو تبدل ولا يهبل تقريب ماعقلتوش منعرف مزوج ولالا ، منعرف علاه كي قالت هكذا ماعجبنيش الحال 🙂واقيلا ضربة فيه عشقة و أنا لاخبر و كيفاه نحب واحد متاهمين بابا بلي قتل باباه .....
ديري لايك يا المسمومة 😘
الحلقة 18💕
غدوة الصباح كي رحت نخدم لقيتو يستنى فيا توال لاري تاع البيس قالي _ أركبي نحكي معاك و نتفاهمو على كلش _ تسما نتا ماكفاكش المشكل لي درتهولي لبارح حاب مشكل جديد أخطيني يرحم باباك _ ماتحشميش تحكي مع ولد عمك لكبير هك _😑منيتك _ هيه أطلعي برك والله مايصرا والو نحكيو و نوصلك ، ياخي سي وليد وليد خالك كان يوصلك و تركبي معاه نورمال _ ماكمش كيف كيف _ في ماه ماناش كيف كيف أهدري تشو _ اييي وشبيك هو يعرفوه بلي ولد خالي و نتا لالا هذا مكان مايروحش مخك لبعيد _ هيه أركبي برك حتى أنا راح يوليو يعرفوني الناس و بزاف تانا _ ركبت و هو مشا مباعد قالي _ شوفي ا نور سامحيني على البارح والله ماحبيت نديرلك حتى مشكل ماهوش بقصدي _ معليش علابالي السماح _ درك دالتك تطلبي السماح هيا _ وعلاه نطلب السماح أدا وش درتلك _ الهدرات لي تعيف لي قلتيهملي كل قلال _ هذاك الشي نتا سبابو لكل فعل ردة فعل _ صح _ هيه والله_المرة هاذي هاني فتهملك بغسك مزلتي ماتعرفينيش و ماتعرفيش عقلية المرة الجاية يااا نور قسم بالله تخلصيهاا غاالية راني مانحبش لكلام الزايد مدابيك غير الإحترام معايا داكور ، وزيد كيفاه ماتقوليليش بلي هذاك الطحان خطبك قبل _ وعلاه نقلك شكون نتا وش تكون بنسبة لياا _ قرب من و ذني و قالي نكون كلش فهمتي ومرة جاية لي تصرا معاك صغيرة ولا كبيرة تجي تحكيهالي خير من نعرف أنا بطريقتي و نكسرلك رااسك _ بعدتو عليا مش كون تكمل توصلني خير مانديرو أكسيدو فالطريق و نتكسر كاملة مش غير راسي _ ضحك كمل يمشي مباعد سقساني على بابا و أحوالو و على تا الدار قتلو الحمد لله رانا غااية ، مباعد نفحتلي نسقسيه على جامي جا عندنا _ قتلو عادل نسقسيك _ تبسم معايا أسمي يهبل من فمك و غمزلي 😉 هيه سقسي _ حشمني لخراا قتلو مانيش مسقسيا بطلت _ على راحتك ( 😭أنا قلت يحاولني شوي باه نسقسيه و هو طفاني و أنا نفحتلي نعرف ) ، سكتت شوي مباعد قتلو _ نتا علاه جامي جيت عندنا للدار و طليت على بابا بغسك بنتيلي لبارح ماكش هاز الغل على بابا و مقتنع بلي هوا ماعندو حتى دخل _ دقيقة راني وصلنا للحضانة نحبس الطونوبيل و نحكيو _ داكور شوي و حبسها و دار ليا قالي _ شوفي نور أنا من صغري ماكنت قريب من حتى واحد من عايلة بابا الله يرحمو و كانت علاقتي معاه سطحية جدا ،كنت نجي للدار بسبت جدي و جداتي هوما كانو يكثرو عليا بالعياط و على جال صلة الرحم فقط ، انا نهار مات بابا جيت حضرت الجنازة و قمت بالواجب و سمعت صح جدي و عمومي يقولو بلي باباك سباب الحادث بصح ماحطيتش بالي معاهم و قلت هدرة و تزول و يفوت شوي وقت و ينساو ماهتميتش بالحكاية الوقت هذاك كنت مهتم بحاجة خلاف داتلي عقلي ، و زيد ورا موت بابا أنا خرجت للخارج نخدم قعدت 5 سنين باه رجعت ،و كي جيت باه عرفت من يما وش صرا ووش دارو لعمي سقسيت عليكم وين تسكنو شفتكم بصح مادرتش في بالي نجي ليكم بغسك قتلك علاقتي معاهم كامل تقريب منعدمة و زيد ماحبيتش نقابل عمي و نعاود نفكرو في الشي لي صرا بصح من مقابلتي ليه البارح عرفت بلي جامي نسا حاجة ولا عمرو راح ينسا مدام عايلتو مش راضية عليه .....
الحلقة 19 💕
_ هيه بابا والله ماراح ينسا علابالي بابا تبدل بزاااف كان قبل الضحكة ماتفارقوش و درك الهدرة و قليل وين يهدر مايحبش حتى يتجمع معانا يشوف في روحو زايد علينا دايما يتفكر هدرة والديه و مقتانع بلي عندهم حق زرعو فيه تأنيب الضمير مسكين ، أنا والله مانسامحهم بغسك بسبتهم ضاعت حياة بابا و حياتنا حسبي الله و نعم الوكيل فيهم كل واحد واحد _ ربي يهديهم مام هوما ماهمش فالربح دايما المشاكل عندهم فالدار و زاد خسرو كلش لفلاحة كامل فزدت باعو الأراضي بقات غير هاذيك الدار راهم يتعاركو عليها كامل راح ياكلو بعضاهم _ دعواتنا هاذم لي خرجو فيهم ربي يزيدهم هم على هم نشاله _ ماتقوليش هكذا ماتكونيش كيفهم _ هيه درك خليني منهم انا نروح برك راهو راح الحااال المدير منعرف كيفااه ماسحتنيش راهو صابر عليا _ داكور روحي ربي يعينك نشاله _ قبل مانهبطو قتلو _ حقا نسقسيك _ تفضلي _ شحال في عمرك نتا _ هههه وعلاه تحوسي على عمري هذا _ سقسيت برك مجرد فضول و سامحني لكان قلقتك _ هههه مهبولة نتي وعلاه تقلقيني كي تسقسي على عمري _ قلت بلاك _ ماتقوليش مهم راهو عمري 33 سنة _ الله يبارك _ يبارك فيك ا زين 😉 ، أنا نهبط خير هبط و دخلت نخدم كالعادة
فاتو ليام وعلاقتي مع عادل تحسنت وليت نحكي معاه دايما فالتيليفون و ساعات يوصلني علاقتنا بصح كانت مجرد علاقة ولاد عم في حدود المعقول نسقسيو على بعضانا و على خدمتي و فرات و ساعات نشايخو و كان بصح دايما يجبدلي على وليد لكان راهو يجي عندنا ولا لا ( وليد و خالي جاو طلبو السماح منا و قبلنا و رجعت المياه لمجاريها بصح كيما يقولو لي فالقلب فالقلب و جامي ننسا هذاك الجاست لي صرا ) عادل جا عندنا زارنا مرة ولا زوج للدار، بابا فرح خلااه كي شاافو أصلن ولا دايماا يحكيلنا عليه ( بابا لي كانت هدرتو منعدمة ولا دايما يهدر بصح مين يحكي يهدرلنا على عادل مسكين طامع فيه يصلحلو علاقتو مع عايلتو )، المهم نهار هذا كالعادة نضت نروح نخدم ( نحب خدمتي خلاااه وجامي نتعب ولا تكودني مانروحش بالعكس ) وزيد تعلقت خلااه بالولاد سيغتو هاذيك الطفلة نور نموووت عليها ربي يحفظها , مهم رحت خدمة و كملت نهاري بصح عادل ماعيطلي ما بعث ميساج ما جا ليا حرت مش من عوايدو قلت بلاك تلهى في حاجة برك درك يعيط بقيت غير نستنا والو روحت للدار لليل كامل مارقدت بقيت غير نخمم قلت كشما صرالو و قررت غير يجي الصباح نعيطلو أنا ، كيما كان الحال جا الصباح و أنا والله ماغمضت تحيرت علييه خلاه والفني بييه حسيت الليل أداك عدا عليا قرن ، مهم درت النيمرو تاعو عيطت لقيت التيليفون مغلوق نهار كامل بقيت غير نعيط والو تيليفون مقفول والله الخدمة ماقدرت نركز معاها وش صرالو أداا .. فااتت سماانة كاملة و ماسمعت علييه واالو حتى خبر....
الحلقة 20💕
سمانة كاملة مابان عليه حتى خبر ماعيط مافتح تيليفون تقلقت علييه بزااف وليت دايما شاردة و نخمم فيه ، اليوم نضت الصباح ( الخدمة و كرهتها ماوليتش نحب نروحلها كي عاد مانشوفوش ) لبست ورحت للحضانة نخدم كنت قاعدة مع لولاد حتى جات وحدة تخدم معايا قتلي راهو واحد قاعد برا يستنا فييك خرجت نجري وش فرحت الدقيقة هاذيك ، لكن يافرحت ماتمت لقيتو وليد والله تقريب بزقتلو وي وجهو حمسني فالباطل _ وي وليد وش تسحق _ لاباس نور _ الحمد لله _ جيت نشوفك ونحكي معاك شوي لكان عندك الوقت _ معنديش الوقت و أنا علابالي بيك وش حاب تهدر و راني قتلك 100 مرة لاء وليد مانقبلش مستحيل نكون أنا و نتا كيف كيف _ أعطيني فرصة علابالي غلط و مكانش لي فالدنيا هاذي مايغلطش _ قبل ماتغلط و كنت رافضة هاذي لحكاية غير ماتكسرش راسك معايا و روح منا عندي خدمة _ راني نحبك ا نور حسي بيا _ أحتارمني ربي يحفظك راني بنت عمتك و متربين مع بعض يعيشك روح منا _ راني رايح بصح خمي في هدرتي ، دخلت و خليتو خاصني غير نخمم في هدرتو هذا مابقا هزيت التيليفون نشوف الساعة نلقا ليزابال تا عادل قلبي عااد يخبط فا 1000 ياربي و أخيرراا عاودتلو طول لقيتو يصوني شوي و هز _ عادل وينك كثر من سمانة مابان عليك حتى خبر ماتعيط ماتسقسي خليتيني متحيرة عليك _ هههه مالا تحيرتي عليا ا زينة _ هيه وينك برك ايام هاذو _ ياخي مانهمكش أنا و كنتي قبل حابة تتهناي مني _ مش حاب تقول ماتقولش ربي يسهلك _ علاه جاية هك نتي _ علاه كيفاه جااية أنا _ شوفي نتي مع روحك المهم راني شوي و نوصل عندك أداك هو تكوني خلصتي الخدمة نوصلك و نحكيو _ داكور كيما تبغي _ مليحة هاذي كيما تبغي عجبتني عودي كثريلي منها بزااف ا زينة _ ههههه صحااا ، كوبيت والله غير مورالي تبدل في 5 دقايق هدرة معااه وليت نضحك وحدي لولاد و حارو فيا مسااكن ههه حمدت ربي كي ماشافش وليد كون راو شرالي مشكل قد راسي بصح منعرف علااه يكرهو زعما يغيير عليا ، نحيت الأفكار أدي في راسي ولات 4 خلصت ستنيتو عيطلي و خرجت ليه ركبت معااه _ سلام _ بايت معاك أنا سلمي علياا _ من وكتاه موالفة نسلم علييك أنا _ من اليوم تولي تسلمي عليا كي الناس _ نشاله نشاله ، قدملي سلمت عليه و هو مشا _ اهيه ماكش راح تحكيلي وين كنت ليام هاذم كل و قافل تيليفونك تانا _ كنت برا دزاير ماكنتش هنا أصلن عليها تيليفون مغلووق _ كنتي في خدمة مالا بصح كنتي قادر تقولي من قبل راني رايح و ماتخلينيش هك _ هههه ماكنتش في خدمة وزيد معلاباليش بلي تتحيىي عليا كمك 😉_ وعلاه رحت مالا تحوس _ تخليني نهدر ولا لاء المشكلة سقسيتيني وراكي تجاوبي نتي بعد _ هيه تفضل أهدر _ يما كانت مريضة شويا هاذي مدة و كي ديتها للطبة هاذم لي هنا كل واحد وش يقول واحد ماقدر يشخص حالتها قد قد ياخي خرجتها برا باه نعرف وشبيها و ماقلتلكش بغسك ماكنتش علابالي راح تتقلقي عليا _ ربي يجيبلها الشفاء نشاله ووش قالولك عليها _ يما عندها ملي كانت 14 سنة مريضة بالسكر و كي طلعتها المرة هاذي قالولها كلاويها بداو يمرضو و كون تقعد هك تولي تصفي ( مسكين يخرج فالكلام بسييف يبان خلااه متعلق ب أمو) _ ربي يشفيها نشاله ياربي و يطولك في عمرها و يحفظهالك بربي مايكون غير الخير و نشاله مع المداومة تا دواء ماتحتاجش تولي تصفي و نتا ماتغفلش عليها برك _ نشاله الله أمين .....
الحلقه الحاديه والعشرون حتى الحلقه الخامسه والعشرون من هنا