رواية معني الحب الحقيقي بقلم الكاتبه نشوه عادل الفصل الاول والثاني والثالث والرابع والخامس حصريه وجديده على مدونة أفكارنا
 |
رواية معني الحب الحقيقي بقلم الكاتبه نشوه عادل الفصل الاول والثاني والثالث والرابع والخامس حصريه وجديده على مدونة أفكارنا
انت بتقول ايه بس ي بابا انا مش موافقة ع العريس ده
= طيب ممكن تهدى وتفهمينى ليه
- حضرتك بتسألنى ليه بجد عشان ده ابن عم جوزى ومينفعش ابدا اوافق اتجوزه
= اولا اسمه طليقك ثانيا برضه فين المشكلة فى ان انك تتجوزى ابن عم طليقك هل حرام فيه نص قرأنى حرم جوازك منه
- لا يا بابا بس انا مش هقدر استحمل كلام الناس واللى هيتقال عنى وقتها عارف ي بابا هيقولوا ايه هيقولوا ان جوزها اكتشف علاقتها بابن عمه عشان كده طلقها وخد بقى من الحكاوى دى كتير
= بس انا عمرى ما ربيتك انك تعملى لكلام الناس مقياس تمشى بيه حياتك بصى يا منة تأكدى انك مهما حاولتى تكونى مثالية قصاد الناس مهما حاولتى تبينى ليهم انك ف عفة مريم هيطلعوكى امرأة نوح وسبق وقولتلك طالما اللى بتعمليه مفيش حاجة تغضب ربنا ولا ضرر لحد يبقى ليه توقفى حياتك وعشان مين
منة بحزن: ي بابا انا فعلا اتقفلت من العيلة دى ومعنديش استعداد اقرر تجربتى تانى
= وانتى حكمتى ع يوسف بناء ع ايه
منة: مش ابن عمه يبقى اكيد زيه
= بجد والله وانتى جيبتى المنطق ده منين ده بيكونوا اخوات ومختلفين ف الصفات وف كل حاجة واكبر مثال حى انتى واختك ملك انتى عقلية وهى عقلية تانية خالص
منة بتنهيدة: معرفش ي بابا انا يمكن معنديش حجة قوية لرفض يوسف وهو فعلا شخص محترم واى حد يتمناه بس صدقنى صعب
= طب ايه رأيك نعطى لنفسنا فرصة يعنى خدى وقتك بالتفكير وصلى استخارة واللى يدلك عليه ربنا اعمليه
منة: حاضر ي بابا اوعدك انى هحاول
خرج ونيس والد منة وقعد مع مراته ابتسام اللى قالت: ها طمنى
ونيس: زى ما توقعت رفضت
ابتسام: طب ليه بس ده يوسف شاب اى بنت تتمناه
ونيس: التجربة اللى مرت بيها مع اللى اسمه هانى كانت صعبة عليها وعملت ليها عقدة وفكرة ان يوسف ابن عمه مخليها متوترة اكتر بس انا طلبت منها تاخد وقتها ف التفكير
ابتسام: يعنى ممكن يكون فيه امل
ونيس: معرفش بس ربنا يقدم ليها اللى فيه الخير وبس يلا هقوم انا اروح الشغل
ابتسام: ربنا يعينك ويقويك ويرزقك
نزل ونيس راح ع الورشة وهو حزين ع حال بنته واللى وصلت ليه ...عند منة كانت قاعدة ف اوضتها وبتفتكر يوم حنتها و فلاش باك
منة: ملك انا عطشانة اوى
ملك: طيب استنى هروح اجيبلك مياه حالا
منة: لا انا بصراحة جعانة برضه
ملك بضحك: اول مرة اشوف عروسة مفجوعة كده اومال عريسك فين هو مش كان هنا دلوقتى
منة: مش عارفة يمكن راح يجيب حاجة وجاى انا هطلع الشقة كده اكل لقمة ع السريع واشرب وارجع ع طول
ملك: ماشى ي مزة بس متتأخريش بقى
طلعت منة ع الشقة وسمعت صوت غريب جاى من فوق السطح كان صوت تأوهات غريبة طلعت ع فوق وشافت حاجة صدمتها
منة بصدمة: هانى انت ..انت بتعمل ايه انت بتخونى ومع مين ..مع نهلة ازاى
هانى بتوتر: منة اهدى انتى فاهمة الموضوع غلط احنا بس كنا ااا......
منة بصريخ: انتم ايه ..انتم كلاب بتخونى انا ويوم ما تخونى يكون مع اعز صاحبة ليا اللى كنت بقول عنها اختى اللى مش من امى ليه انا عملت ليكم ايه عشان تعملوا فيا كده طب ... طب لو هى الحكاية كده ليه خدعتونى ما كنت طلبت تفسخ الخطوبة وخطبتها
هانى: ي حبيبتى صدقينى انا فعلا بحبك وشاريكى هى واحدة رخيصة
نهلة بصدمة: انت ايه اللى بتقوله ده
هانى: ايه بقول الحقيقة انتى فعلا رخيصة وبقضى معاكى وقت نزوة مش اكتر
نهلة: يلا ي زبالة ي حقير متصدقهوش ي منة هو اللى لف عليا وعلقنى بيه وفهمنى انه هيتجوزنى
هانى: وانا اكيد عمرى ما هربط اسمى بواحدة زيك
منة: اخرسوا انتم الاثنين انا مش عاوزة اعرفكم تانى انتم فاهمين انا هنزل دلوقتى حالا وهنهى كل حاجة
مسكها هانى بغضب: تعالى هنا تنهى ايه انتى عبيطة النهاردة حنتنا وبكرة الفرح
قلعت منة الدبلة: ميهمنيش مستحيل اكمل مع واحد خاين
هانى بضحك: حبيبتى انتى مفكرة ان الموضوع مجرد دبلة هتقلعيها والموضوع ينتهى احنا مكتوب كتابنا ي حبيبتى فوقى
منة: عادى هطلق لا انا اول ولا اخر واحدة تطلق بعد كتب كتابها
هانى: صح عندك حق بس الكلام ده لو الطلاق قبل الفرح بشهر ولا اثنين مش ليلة الفرح
سكتت منة وكمل هانى: تفتكرى الناس هتقول ايه ها عارفة هيقولوا ايه هيقولوا اطلقت يوم فرحها عشان اكيد عريسها عرف عنها حاجة بطالة وابوكى هيعيش عمره موطى راسه ومش قادر يرفعها وسط الناس وحال اختك هيقف وهيكون بسببك ده غير الفلوس الكتير اللى ادفعت النهاردة وقبل كده ايه كل ده مش فارق معاكى
منة: هحكى للناس حقيقتك القذرة وهعرفهم باللى شوفته ومحدش هيلوم عليا
هانى بضحك: محدش هيصدقك ايه الدليل ع كلامك ي قطتى وغير كده انا هقلب الاية ضدك ومفيش اسهل من الفوتوشوب دلوقتى ي منة وانتى فاهمة الباقى
دمعت منة فهى تعلم كم هو محترف ف امور الفوتوشوب قرب هانى وقال: اعقلى كده ي منوشتى وعدى اليوم
منة: اوعى تقرب منى او تفكر تلمسنى انت فاهم انا بكرهك
هانى: اوك هبعد بس اهدى انا عارف انك مضايقة منى دلوقتى هسيبك دلوقتى لكن بكرة هصالحك بمعرفتى
مشى هانى وقبل نهلة وفضلت منة قاعدة ع السلم بتعيط ومش عارفة تعمل ايه اخدت قرار تنزل تقول لابوها لكن شافت فرحته هو وامها واختها وخافت عليهم وكلام هانى بيدور ف راسها و.......باك
منة لنفسها: بابا عنده حق انا غلطت ف حق نفسى لما وافقت اكمل جوازى من الحيوان اللى اسمه هانى عشان كلام الناس لكن دلوقتى انا لازم اخد القرار اللى يريحنى ويرضينى انا وووو....
الثاني
- بابا عنده حق انا غلطت ف حق نفسى لما وافقت اكمل جوازى من الحيوان اللى اسمه هانى عشان كلام الناس لكن دلوقتى انا لازم اخد القرار اللى يريحنى ويرضينى انا
قامت منة اتوضت وصلت فرضها وخرجت تجهز الغدا مع والدتها
ابتسام: ايه ي حبيبتى انتى كويسة
منة: اه ي ماما الحمدلله ليه السؤال ده
ابتسام: ولا حاجة بطمن عليكى ي بنتى عاوزة اشوفك سعيدة ف حياتك
منة بابتسامة: ان شاء الله يا ماما هكون بخير واللى فيه الخير ليا يقدمه ربنا
عند ونيس اللى كان قاعد ف ورشته لقى يوسف جاى عليه بابتسامة: السلام عليكم
ونيس: عليكم السلام ي ابنى
يوسف: ها طمنى فتحت الموضوع مع منة
ونيس: ايوة وزى ما قولت ليك هى شبه معقدة من اللى عمله فيها ابن عمك لو كانت منة صارحتنى من البداية اقسم بالله ما كنت خليت الجوازة تتم ابدا وغير كده اللى عمله فيها طول الست شهور والضرب والاهانة والخيانة مش عارف ده ازاى بنى ادم
يوسف: عم ونيس انا عارف ومقدر حالتها ولو رفضت مش هقدر الوم عليها بس حزين من جوايا انها تحكم عليا لمجرد انه ابن عمى
ونيس: انا طلبت منها تعطى لنفسها وقت تفكر واللى فيه الخير ليكم يعمله ربنا
يوسف: ان شاء الله طيب هستأذن انا عشان معطلش حضرتك عن شغلك
مشى يوسف وهو من جواه بيتمنى ان منة توافق وتعطى فرصة لعلاقتهم ..... رجع ونيس ع البيت ف المساء واتجمع الكل ع السفرة
ملك: بابا بعد اذنك فيه رحلة تبع الكلية للاقصر وبصراحة نفسى اروح
ابتسام: ملك انا قولت مفيش رحلات
ملك: ليه بس ي ماما ما كل الدفعة تقريبا هتروح اشمعنا انا
ابتسام: انا مليش دعوة بحد كل واحد حر ف بيته وتفكيره والموضوع منتهى
ملك: ي بابا عشان خاطرى وافق
فكر ونيس وقال: موافق بس بشرط
ملك بحماس: موافقة طبعا
ونيس: مش مهم موافقتك المهم هى توافق
ملك: هى مين دى ي حاج
ونيس: منة تروح معاكى
ملك بحماس: طب ياريت بجد وافقى عشان خاطرى ي منوشتى دى هتبقى رحلة طرش
منة بضحك: انا نفسى اعرف بتجيبى الكلام الغريب ده منين بس ماشى
نظر ونيس وابتسام بفرحة واستغراب من موافقة منة اللى حرفيا من سنة عدت مشافتش الشارع
ملك: هييييه واخيرا والله هتتبسطى اوى
منة: تعرفى انا كان من احلامى انى ازور الاقصر واسوان واشوف الاثار والمعابد اللى درستها
ملك لوالدتها: ايه ي غالية عاوزاكى تعترضى بقى وتقولى لا
ابتسام: مقدرش اكسر كلمة ابوكى وطالما اختك معاكى هكون مطمنة
بالفعل راحوا ع الرحلة وكانت جميلة ومرحة واصحاب ملك حبوا منة جدا وف يوم كانت واحدة منهم اسمها ألاء بتحل اسئلة ومش عارفة تبع المنهج قعدت منة وشرحتها ليها
آلاء: ما شاء الله عليكى بجد انا فهمت منك اكتر من دكتور الكورسات ليه متعطيش كورس
منة بضحك: مش بالسهولة دى طبعا
عدت اسبوعين الرحلة ورجعوا البنات ع البيت وكانوا مبسوطين جدا ...ابتسام: يارب تكونى اتبسطى ي حبيبتى
منة: اوى ي ماما بجد زمايل ملك لطاف جدا وروحهم حلوة ويتحبوا
ابتسام: ربنا يحبب فيكى خلقه كمان وكمان
منة: اومال بابا فين؟!
ابتسام : ف الشغل هيرجع بليل
منة: تمام عن اذنكم اخد شاور وانام شويه
دخلت منة وقالت ملك: وانا كمان
ابتسام: استنى اختك اتبسطت بجد ولا كانت قاعدة ف اوضتها وخلاص
ملك: بالعكس خرجت واتبسطت جدا وعارفة ي ماما بنتك ما شاء الله عليها ممتازة بجد وحرام تقعد كده من غير شغل
ابتسام: ازاى مش فاهمة
ملك: حضرتك عارفة انها كانت ف نفس القسم بتاعى والمفروض عندنا امتحان بكرة وكان فيه حاجات كتيرة مش فاهمينها هى شرحتها لينا احسن من الدكاترة نفسهم يعنى لو فكرت تعطى كورسات حقيقى هتكسب وهتشغل وقتها بدل قعدتها بالبيت
ابتسام : والله فكرة حلوة يا مضروبة انتى
ملك بضحك: ده اقل ما عندى ي حاجة عن اذنك بقى هقوم انام انا كمان شويه
عدى الوقت وجاء الليل واتجمع الكل ع السفرة عشان العشا وكانت ملك بتحكى لوالدها كل حاجة وبتفرجه ع الصور وهو مبسوط
ابتسام: يا بت اسكتى بقى عشان ناكل
ملك: جرى ايه ي ست ف ايه ما الراجل زى الفل اهو وع قلبه زى العسل
كانت لسه ابتسام هترد ....ونيس: سبيها براحتها حقيقى افتقدت شقاوتها الكام اليوم اللى غابتهم وكمان منة وحشتنى
منة: وحضرتك اكتر وعاوزة اخد رأي حضرتك ف حاجة كده بعد العشا
ابتسام: اعملكم كباية الشاى المتينة ونسمع كلنا
بالفعل بعد العشا ...منة: بصراحة ي بابا انا بفكر اعطى كورسات تبع الكلية ايه رأيك
نظرت ابتسام وملك لبعض باندهاش فهذا تماما ما كانوا ينوون عليه واخبار ونيس به ...ونيس: فكرة حلوة اوى طبعا يا حبيبتى وانا معاكى فيها
منة بحماس: طب كويس بس بصراحة انا مش عارفة ابدء ازاى او منين
ملك: سبيها عليا
ابتسام: هتعملى ايه يعنى ي ام العريف
ملك: مش عارفة انتى ليه دايما مقللة من قدراتى كده يا نبع الحنان بس والله هبهرك
منة: ايوة يعنى هتعملى ايه؟!
ملك: ي سيتى اعتبرينى السكرتيرة بتاعتك انا هعملك دعايا ف القسم عندى بين كل السنين عن طريق الاسرة اللى انت فيها وكمان هنشر ع الجروبات بتاعت الدفعات وهيكون فيه حضورى واونلاين
منة: حضورى مفهوم لكن اونلاين ليه ؟!
ملك: انتى ناسية ان فيه طلبة كتير مش من هنا وبيروحوا ع بلدهم بعد اليوم الدراسى وكمان احنا ف فترة شتاء ومحاضراتنا اوقات كتير بتكون مسائية يبقى الاونلاين حل كويس جدا
منة: برافو عليكى بجد
ملك: اى خدمة من بكرة ان شاء الله هعمل كده
منة: طب المكان هيكون فين؟!
ملك: الشقة اللى تحت نظبطها كده ونجيب كام بينش حلوين ومكتب واكون انا السكرتيرة واللاب بتاعى هيفى بالغرض لكل حاجة
ونيس: شوفوا هتعملوا ايه وانا معاكم بس ي منة فيه حاجة مهمة انتى ناسيها
منة: خير ي بابا
ونيس: مردتيش عليا بخصوص يوسف ي بنتى عدى اسبوعين ومينفعش نعلق الراجل اكتر من كده ووووو...
الثالث
- مردتيش عليا بخصوص يوسف ي بنتى عدى اسبوعين ومينفعش نعلق الراجل اكتر من كده لازم يكون فيه رد ي بالموافقة او بالرفض
منة بتنهيدة: محتاجة اقابله الاول ي بابا قبل ما اقول قرارى النهائى
ابتسام بفرحة: طبعا يا حبيبتى حقك ولا ايه ي ونيس
ونيس: اكيد ي بنتى انا هكلمه يجى بكرة بعد العصر ايه رأيك
منة: تمام ي بابا عن اذنكم هدخل انام
دخلت منة ع اوضتها ...ابتسام: اللهم لك الحمد يارب دعواتى استجابت
ملك: ايه ي ماما هى قالت عاوزة تقابله بس موافقتش عليه لسه
ابتسام: انا مقصدش ع موافقتها انها تقابله انا دعيت ان ربنا يخفف عليها ويرجعها زى ما كانت لحياتها الطبيعية وانها تفكر تبدأ شغل دى بداية تعافيها
ملك: صح ي مامتى
ابتسام: كلمه ي ونيس وعرفه بقى
ونيس: اكلمه فين بس الساعة ١ ميصحش ارن عليه ف وقت متأخر كده هكلمه بكرة الضهر واعرفه
ملك: طيب هستأذن انا كمان انام عشان عندى امتحان وهيكون يوم طويل
عدى الليل وتانى يوم اتصل ونيس ع يوسف وقاله ان منة عاوزة تقابله وكان طاير من الفرح وراح ليه ع العصر زى ما اتفقوا
ونيس: نورتنا ي ابنى مكنش ليه داعى كل الحاجات دى
يوسف: بنورك ي عمى وبعدين دى حاجات بسيطة يعنى
ابتسام: تسلم ي ابنى عن اذنكم اقول لمنة تيجى
دخلت ابتسام لمنة عشان تخرج تقابل يوسف وبالفعل خرجت وسلمت وقعدوا شويه
ونيس: طيب هنسيبكم تتكلموا وهنكون قصادكم هنا بالصالون
يوسف: تمام حضرتك اتفضل ....خرج ونيس ومراته ...يوسف: احم انا مبسوط جدا انك وافقتى تقابلينى حقيقى شكرا واوعدك مش هتندمى
منة: بس انا لسه مقولتش انا موافقة
يوسف: انك توافقى تقابلينى وتدينا فرصة نقعد ونتناقش ده ف حد ذاته حاجة تفرحنى جدا
منة: انت ليه عملت كده اشمعنا انا بالذات اللى عاوز تتجوزنى
يوسف بتوتر: بصى انا مش بعرف ازوق كلامى انا بحبك اوى ي منة ومن قبل ما انتى وهانى تتخطبوا اصلا انا اللى عرفته عليكى
منة بصدمة: نعم ازاى يعنى
يوسف بتنهيدة مليانة بالوجع: انا كنت معيد عندك بالكلية بس ف قسم تانى وشوفتك صدفة وانتى بتناقشى بحث ف المدرج ولفتى انتباهى جدا وهانى كان معاكى بالمدرج فسألته عنك مكنش يعرفك طلبت منه يعرف اسمك وعنوانك عشان اتقدملك وكان كل مرة أسأله عملت ايه يقولى نسيت او معرفتش ويتحجج لحد ما قالى انه ناوى يخطب وقالى ان العروسة هتكون مفاجأة وحاجة تفرحنى فكرت انه حد قريبك او صاحبتك ومن هنا هيعرفنى عليكى لكن اتصدمت لما لقيتك انتى العروسة ومن شدة صدمتى وان ابن عمى واللى بعتبره اخويا الصغير يعمل فيا كده حجزت اقرب تذكرة وسافرت برة البلد مقدرتش استحمل فكرة ان البنت الوحيدة اللى حركت قلبى اخدها منى اللى كنت بعتبره اخويا من دمى
منة: يعنى الرخص والحقارة دى فيه من زمان طب ليه مقولتليش
يوسف: مكنش ينفع لان هانى مش سهل واكيد كان هيحور كتير ويوصلك انى شخص مش كويس انتى عاشرتيه كويس واكيد عرفتيه
منة بحزن: ياريتك كنت حذرتنى منه حتى لو من بعيد مكنتش وصلت للى انا فيه ده
يوسف: انتى زى الفل وربنا خلصك منه وده الاهم
منة: طب اهلك عارفين انك عاوز تتقدم ليا وموقفهم ايه خصوصا ان ممكن بسبب الموضوع ده علاقة باباك بأخوه تتقطع
يوسف: هما عارفين ي منة اكيد مش هعمل حاجة زى دى من وراهم والعلاقة ما بين ابويا وعمى شبه مقطوعة من زمان
منة: طيب انا ممكن تعطينى فرصة افكر واكيد هرد عليك ف اقرب وقت
يوسف: وانا مش مستعجل خدى وقتك براحتك
ف الليل خبط الباب وكانت منة قاعدة سرحانة فاقت ع الصوت وقالت: ادخل
ونيس: انتى لسه صاحية ي حبيبتى
منة: ايوة ي بابا اتفضل
ونيس: بتفكرى مش كده
منة بتنهيدة: دى حقيقة ي بابا خايفة اوى خايفة اخد اى قرار ارجع اندم عليه تانى
ونيس: طب ممكن اعرف انتى خايفة من ايه بالظبط
منة: خايفة يكون يوسف نسخة من هانى متدارية ف ثوب الاخلاق وخايفة اكون رهان بينهم خايفة من حاجات كتير اوى ي بابا
ونيس: اهم حاجة ان الحاجات دى ميكنش منها كلام الناس
منة: لا اطمن ي بابا بقى اخر همى واهتمامى كلام الناس
ونيس بابتسامة: وده المهم اى حاجة تانية سبيها ع الله وصلى وادعى واللى يريحك ويوصلك ليه قلبك اعمليه بس بحكم انى ابوكى وانك هتاخدى رأيى لو تفتكرى لما اتقدملك اللى اسمه هانى قولتلك مش مرتاحة ليه ولا حاسس انه شبهك بس انتى قولتيلى انك بتحبيه وعاوزاه مقدرتش امنعك ومن وجهة نظرى ان فيه فرق السما والارض بينه وبين هانى بلاش تظلميه بالمقارنة دى وهو متقبل قرارك لو وافقتى فيه فترة خطوبة اعطى لنفسك فيها الفرصة الكفاية عشان تعرفيه اكتر
منة: ان شاء الله يا بابا
ونيس: يلا ي حبيبتى تصبحى ع خير
خرج ونيس وقامت منة اتوضت وصلت ركعتين واستمرت ع كده لاسبوع كامل واخدت قرارها النهائى
منة: بابا قول ليوسف انى موافقة ع الخطوبة
ابتسام بفرحة: لولولولووووووولى ايوة كده ي حبيبتى ربنا يكملك ع خير
ملك: ايوة كده ي شيخة خلينا نجيب فستان سواريه جديد بقى
منة: لو سمحت ي بابا انا عندى شرط
ونيس: ايه هو ي حبيبتى
منة: عاوزة مدة الخطوبة تكون سنة
ابتسام: مش كتير سنة ي بنتى
ونيس: لا مش كتير حقها عشان تعرفه اكتر وتطمن ليه وانا هكلم يوسف ومتأكد انه مش هيرفض
بالفعل اخبر ونيس يوسف بقرار منة وكان طاير من الفرحة
فايز والد يوسف: انت متأكد من قرارك ده ي يوسف
يوسف: طبعا ي بابا بس ليه السؤال ده
فايز: اشمعنا البنت دى بالذات وانت عارف انها طليقة ابن عمك ووووو...
الرابع
ـ اشمعنا البنت دى بالذات وانت عارف انها طليقة ابن عمك ليه مصمم تجيب لينا الكلام والمشاكل لحد عندنا واحنا فى غنى عنها
يوسف: ي بابا انا مش بعمل اى مشاكل وصدقنى لو مفكر ان جوازى من منة انتقام من هانى ع اللى عمله زمان تبقى غلطان انا بحب منة فعلا وشاريها وطول السنتين دول مقدرتش اشيلها من قلبى ولا امنع نفسى من حبها وكأن ربنا قدر ليا استناها وبيكافئنى ع صبرى بأنه يرجعها ليا
فايز: طب اشمعنا هى دى حتة مش بنت يعنى انت مش اول بختها
يوسف: معقول ده تفكير حضرتك بابا انت خايف من ايه بالظبط خايف ع علاقتك بعمى مش كده
فايز: انا علاقتى بعمك ماتت من زمان وانت عارف كده كويس وعارف ليه لكن انا خايف عليك من هانى واذاه وعليها هى كمان
يوسف: اطمن يا بابا انت مخلف راجل انا هعرف احافظ عليها كويس
لتأتى والدته من خلفه وقالت: خلاص ي فايز بلاش تعكنن عليه انا من زمان مشوفتش ابنى مبسوط كده والضحكة منورة وشه زى النهاردة وانا واثقة من ربنا انه هينصره ع مين يعاديه
فايز: ي نوال صدقينى انا خايف عليه
نوال: عارفة والله بس ابنك وقع ف الحب ومن زمان حرام نكسر فرحته
فايز: ماشى ي ابنى حددت ميعاد مع ابوها امتى
يوسف: الخميس الجاى ان شاء الله
فايز: ع خيرة الله مبارك ي حبيبى وربنا يتم عليك بخير
عدى يومين وكان الجميع ع قدم وساق للتجهيز للخطوبة وف نفس الوقت كانت منة بتابع شغلها اللى بدأته بحماس وف يوم خرجت لوحدها عشان تشترى ملابس وهناك قابلت شخص مكنتش تتمنى ابدا انها تشوفه تانى
هانى: الله ده انتى بقيتى تخرجى اهو ولوحدك كمان
منة: ابعد عن طريقى احسنلك
هانى: مالك ي عروسة مستعجلة ع ايه ولا خايفة عريسك يشوفك واقفة مع طليقك
منة: انت عرفت طب كويس عرفت منين
هانى: حبيبتى مفيش حاجة بتستخبى ف البلد دى ده بلدنا اوضة وصالة بس من وسط الاوضة والصالة ملقتيش غير ابن عمى اللى تتجوزيه
منة: حياتى الشخصية ملكش ابدا انك تدخل فيها لا من قريب ولا من بعيد
هانى: الاحسن ليكى تنهى الموضوع ده
منة: ده ليه ان شاء الله
هانى: لانى مش هسمح ان الجوازة دى تتم
منة: اعلى ما فى خيلك اركبه تهديداتك دى مبقتش تفرق معايا خلاص
هانى: بس تهديداتى تمس ميزان السمعة الحساس معتقدش انها هتكون عادى وخصوصاً لما افضحك واقول انك طلبتى الطلاق عشان كنتى ع علاقة بابن عمى
منة: برافو حلو السيناريو اللى رسمته بس للاسف مبقاش يفرق معايا زمان سلمت ودنى ليك ودمرت حياتى عشان كلام الناس لكن دلوقتى لا انت ولا الناس تهمونى ف حاجة طالما مش بعمل حاجة تغضب ربنا وبعدين انت ازاى بجح كده بجد ده بدل ما تشكرنى انى مفضحتكش وسط اهلك وعرفتهم بخيانتك ليا وشربك للمخدرات والقرف اللى ع دماغك جاى دلوقتى كمان تهددنى صحيح بقينا ف زمن البجح بقى ليه عين وبيتكلم اسمع انا بحذرك لاخر مرة مش عاوزة المحك تانى حتى لو صدفة
رجعت منة ع البيت وكان باين عليها القلق فكرت تحكى لوالدها لكن خافت عليه فضلت السكوت وتانى يوم نزلت مع يوسف عشان يشتروا الشبكة وطول الوقت كانت منة سرحانة وباين عليها الانزعاج
يوسف: مالك ي منة انتى كويسة
منة: اه الحمدلله ليه بتقول كده
يوسف: ملاحظ انك من امبارح متوترة ومش ع بعضك صارحينى ي منة لو فيه اى حاجة مضيقاكى لو حاسة ان الموضوع مش مريحك انا ممكن انهيه حالا بس انتى تكونى بخير
ابتسمت منة وقالت: عرفت ازاى واحنا من امبارح متقبلناش ولا شوفتنى
يوسف: كنت حاسس من نبرة صوتك وطريقة كلامك بس النهاردة اتأكدت من شكوكى
منة: اطمن ي يوسف لو انا مش عاوزة العلاقة دى ومش مرتاحة معتقدش انى كنت هكون واقفة معاك هنا النهاردة
يوسف: طب ف ايه بجد احكيلى منة انتى قبل ما هتكوني زوجتى انت صاحبتى وحبيبتى من فضلك اتعاملى معايا ع هذا الاساس قبل اى شئ احكيلى كل حاجة كل اسرارك ومشاكلك ارمى همومك وحمولك كلها عليا جربى مرة وانا ان شاء الله عمرى ما هخذلك وده وعدى الاول منى ليكى انى عمرى ما هخون ثقتك ابدا
منة : توعدنى انك مش هتعمل اى حاجة طايشة
يوسف: انا مش هزعل من كلامك ولا هلوم عليكى لانك لسه متعرفنيش كويس ومش هقعد اقولك كلام كتير حلو ومعسول يرضيكى لكن هخلى الايام والظروف هى اللى تثبتلك يلا بقى احكيلى ايه مضايقك
ترددت منة كتير لكنها حكت ليه كل اللى حصل وقالت: وبحكم انى عارفة اد ايه هو حد قذر انا واثقة انه هيعمل حاجة وهينفذ تهديده
يوسف ع عكس الغضب اللى جواه: انا كنت متأكد انه هيحاول يوصلك ويرمى السموم ف ودنك ويخوفك زى ما عمل يوم الحنة لكن تعرفى ايه اللى فرحنى دلوقتى
منة: ايه
يوسف: انك حكيتى ليا ومسلمتيش ودنك ليه يجوز من جواكى خايفة لكن اوعدك طول ما انا معاكى مش هسمحله ابدا يوصل لغرضه
منة: انا متأكدة من كده عشان كده حكيت ليك بس هنمنعه ازاى
يوسف: عادى بالدليل هو هيقول كلام لكن احنا هيكون معانا الدليل ولو ان احنا مش محتاجين نبرر لحد حاجة لكن عشان نخرسه هو والناس للابد عنك طالما ده هيريحك
منة: ايوة بس ازاى يعنى
يوسف: سبيها لله خلينا ف النهاردة ننقى شبكتنا برواقة والحل هيكون عند رب التدبير نكمل كلامنا بعد ما نخلص
بالفعل بدأوا يختاروا الشبكة وكانت منة هديت تماما بعد ما قدر يوسف يطمنها وفجأة صوت من وراها : مبروك ي منة ووووو......
الخامس
ـ مبروك ي منة مش كنتى تعزمينى مكنش العشم
لفت منة واتصدمت لما شافت نهلة واقفة قصادها جريت عليها ملك وقالت بغضب: انتى ندلة لسه فاكرانا وفاكرة ان ليكى صاحبة اسمها منة
ابتسام: زعلانة منك اوى وشايلة جامد عشان تسافرى فجأة قبل فرح منة ومن غير ما تعرفينا وبعدها تتقطع اخبارك
كانت نهلة بتبص لمنة باستغراب اقتربت منة منها وحضنتها وهمست: اهلى ميعرفوش حاجة عن اللى حصل انتى جاية ليه تانى ي نهلة
نهلة: لازم اتكلم معاكى ضرورى
منة: مفيش بينا كلام اللى كان بينا مات واتدفن وانسى تماما انى ممكن اسامحك وادخلك ع حياتى تانى واتفضلى امشى من هنا
نهلة: صدقينى انا جاية ليكى ف خير وبعدها اوعدك انك مش هتشوفينى تانى
بعدت عنها منة بابتسامة: وانا مش زعلانة اصلا
عدى الوقت ورجعت منة مع يوسف واهلها ع البيت وطلبت نهلة تقعد معاها لوحدهم دخلت ع اوضتها فدمعت نهلة ....منة: اخلصى عاوزة ايه ي نهلة راجعة تانى ليه ولا يكونش جاية تاخدى يوسف كمان
نهلة بدموع: انا عارفة انى غلطت واى اعتذار واسف مستحيل يغفر ليا اللى عملته لكن صدقينى انا جاية هنا اساعدك
منة بتهكم: تساعدينى ف ايه ان شاء الله
نهلة: هوريكى حاجة
خرجت نهلة الفون من شنطتها وفتحت فيديو بكلام هانى ومنة امبارح بصوت واضح وفيديو تانى لهانى وهو بيشرب ومعاه بنات
نهلة: كده تقدرى تخرسيه وتوديه ف داهية كمان وتعملى ليه محضر سب وقذف ومحضر عدم تعرض
منة باستغراب: وانتى ايه اللى يخليكى تساعدينى عشان ايه
نهلة: اعتبرى انه بحاول اعمل حاجة اخيرة تشفعلى عندك انك تسامحينى عارفة انى خسرتك وعارفة انى مبقتش صاحبتك ولا هرجع تانى بس استجدعتك لما مقولتيش لاهلى واهلك انى انا اللى كنت معاه وسترتينى يومها امبارح انا شوفته صدفة وهو واقف مستنيكى وكأنه عارف انك جوة وانا كنت معدية صدفة واستنيت اشوفه بيعمل ايه وكنت واقفة بعيد عشان كده صورته من غير ما ياخد باله
منة: ومش خايفة لما يعرف انك عملتى كده
نهلة: لا هخاف من ايه يعنى كده كده انا ماشية خلاص
منة: ماشية فين مش فاهمة
نهلة: اتقدملى عريس سعودى واهلى وافقوا وهنتجوز واروح معاه ع السعودية
منة: غريبة فكرتك لسه مع هانى
نهلة: من يوم الحنة ولما شوفت حقيقته القذرة بعدت عنه هو حاول كتير يهددني وانه هيقول لاهلى بس انا كنت ماسكة عليه حاجات توديه ورا الشمس وده اللى خرسوا من ناحيتى
منة: اهم حاجة تكونى اتعلمتى حاجة
نهلة: اتعلمت وندمت
قربت منها نهلة ومسكت ايدها: اتمنى يجى اليوم اللى تقدرى تسامحينى فيه واوعدك انى مش هزعجك تانى بوجودى واتمنى من ربنا ان اللى جاى يكون عوض ليكى وشكرا من قلبى تانى انك مطلعتنيش وحشة قصاد اهلك عن اذنك
عدت الايام وجه يوم الخطوبة وكانت منة مبسوطة والحفلة كانت ع اد العيلتين فقط فجأة حصل اللى منة كانت متوقعاه
هانى: الله مش عيب ي ابن عمى تكون خطوبتك ع طليقتى ومتعزمنيش
يوسف وهو بيحاول يتحكم ف اعصابه: وانت مش مرحب بيك اصلا اتفضل من غير مطرود
هانى: ليه بس ده انا حتى جاى ابارك ليكم ولا خايف الناس تعرف بحقيقتكم
يوسف: حقيقة ايه ي مريض انت
هانى: حقيقتكم القذرة ي ابن عمى ي اللى كنت بعتبرك اخويا يعنى مش كفاية انى سترت عليكم ومرضيتش افضحكم لما عرفت باللى بينكم تقوم تعمل كده
يوسف: اسمع ي هانى كلمة زيادة وصدقنى هندمك ع اليوم اللى فكرت تيجى هنا فيه
صرخ هانى بأعلى صوته: ي ناس تعالوا وشوفوا البجاحة طليقتى اللى سترت عليها بدل ما تلم نفسها فضحت نفسها بنفسها ورايحة تدارى ع فضيحتها بأنها تتجوز من ابن عمى اللى خانتنى معاه
بدأت الناس تخرج وتتفرج ويتهامزوا بالكلام ابتسمت منة وقالت: شكرا بجد انك قومت بالواجب وجمعت الناس الحقيقة ان الباشا هو اللى خاين وكمان بيتعاطى وانا حاولت اكون كويسة للاخر حتى بعد الطلاق محبيتش انى انزل من صورته قصاد اهله لكن هو مصمم يكون قذر
هانى: انتى بتعملى كده عشان تبانى شريفة حقيقتك انكشفت خلاص
منة: لا الحقيقة لسه متكشفتش
شغلت منة الشاشة ع تهديداته ليها وع فيديوهات تانية وهو بيتعاطى ومع بنات وكل ده بصوت واضح جدا والجميع مصدوم
منة: انا مكنتش حابة اكون زيك وافضل مكملة جميلى للاخر واسترك للنهاية لكن انت شخص دنئ وندل ودى اقل حاجة تتعمل مع واحد زيك
هانى بصدمة وتوتر: كدب كل ده مفبرك وكدب مش حقيقى
منة: بجد طيب نجيب كاميرات المول نفسه ولا نحلل ليك عشان تثبت انه كدب
بلع هانى ريقه وهو سامع الناس وهى بتشتمه واللى بيتف عليه
يوسف: دلوقتى بقى اتفضل من غير مطرود اظن وجودك مبقاش مرغوب فيه والاحسن تخلى عندك شويه من الاحمر ومتوريناش وشك تانى
ابتسم هانى وقرب منه وقال: وماله ما انت متعود طول عمرك تاخد البقايا بتاعى
اتعصب يوسف وضربه بوكس قوى من شدته وقع هانى ع الارض بوجع وقرب منه يوسف لكن فايز منعه: كفاية ي يوسف ميستاهلش
قام هانى وقال: الجولة لسه مخلصتش ومش دى نهاية المباراة خليكم فاكرين كده كويس
قربت منة من يوسف وقالت: اهدى ي يوسف متخليهوش يحقق مراده هو جاى النهاردة وقاصد يخرب اليوم
بص ليها يوسف وقال: انا اسف عن اذنكم بس محتاج اغسل وشى
دخل يوسف غسل وشه وحاول يهدى وخرج كملوا الخطوبة ولبسوا الشبكة وعدى اليوم بسلام .....منة: انت كويس
يوسف: الحمدلله وانا اسف ع اللى حصل ومنكرش انه قدر يضايقنى فعلا لانه عارف انى بحبك وانك نقطة ضعفى
منة: اطمن يا يوسف انا مش بواقى ولا حاجة انا فعلا كنت متجوزة هانى وواخدة لقب مطلقة لكن انا لسه زى ما انا بنت وووو...
يتبع
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺