رواية قيود امرأه البارت الاول والثاني والثالث والرابع والخامس والسادس والسابع بقلم جمانه السعيدي حصريه وجديده على مدونة أفكارنا
 |
قصه حقيقه من واقعنا
هلمره القصه اجتماعيه ومنتشر هاي الحاله
بشكل واسع بهاي الفتره
راح نعيش أحداث القصه ونقرر منو الغلطان ومنو الصح
خل نتابع الاحداث
عسى ولعل بعض النساء تتعض من هاي القصه
اني رويده مواليد ٩٠ من عائله متوسطه الدخل
احنا بنات ثنيبن ولد
اخوي مرتضى الجبير بعدين اماني وبعدين اني ازغر وحده.
اني شكلي عادي جمالي متوسط شكلي حلووو بس
مو جمال طاغي شكلي مقبول
والناس الي تعرفني تكول انتي عندج حضور وجاذبيه
عندي نوع من القبول بشخصيتي
طولي ١٧٠ حنطاويه جسمي حلو
امي وابوي ناس كلش فقره وبسطاء على كد حالهم
اول مشكله واجهتها بحياتي
تسلط اخوي علينا
لان هو الولد الوحيد بلعائله والجبير
كان ماخذ تقدير اكثر من استحقاقه
ضالم ومتسلط بشكل مو معقول طبعا ابوي مايناقشه باي تصرف
يخاف لا يضوج لو يصير عصبي
يخاف لا يعوف البيت وينهزم
وهو كان يعرف نفسه مسيطر ومحد يرفضله طلب
واوامره لازم تمشي على الكل
حتى على امي وابوي
كان بدخل بكلشي كلشي يعني كلشي
محد يطلع لو يدخل اله باامره محد يفتح حلكه اله يكون هو موافق
وصل الدرجه اتفرعن علينا
كام يدخل حتى بانفاسنا طغا فد مره علينا
طبعا هو يمشي وياا ولد مو اوادم
علمو على شغلات مو حلوه يتصرف بكيفه ماعنده اي حكمه بااي قرار عصبي كلامه كله صياح ماعنده تفاهم
ابد حتى على امي وابوي يصيح
الي يعجبه يسوي
يدخن صاحب مشاكل
بس محد يكدر يفتح حلكه ولا بكلمه
لان هو الزعيم بلبيت
طبعا السبب الرئيس بشخصيته العدوانيه اهلي
من هو زغير عافوه على راحته
اي تصرف يتصرفه عادي ماكو مشكله
بعد هو ولد وكانما نازل من السما
عبالك عمله نادره وماكو منه ابد
هاي الحريه الزايده خبلته
رسب بالسادس ابتدائي وبطل من المدرسه
وصمم اختي اماني تبطل وما تكمل دراستها
بطلها من صف خامس
خطيه جانت شاطره كلشي بلمدرسه
شكد بقت تبجي حاولت بس بدون فايده
طبعا هو هيج بطلها بدون سبب
يعني مزاجه يكول تبطل يعني تبطل
جمانه السعيدي
اماني...اني اريد اكمل دراستي
امي...اسكتي اخوج مايقبل
اماني...شنو ما يقبل هو بكيفه ما يقبل اني احب المدرسه
امي...اكعدي واسكتي لا اجيبينه المشاكل
اماني...اي ليش البنات كلها اداوم واني لا
امي...تعرفين تقرين وتكتبين بعد كافي هاي هي شسوين بشهاده
اماني....هي المدرسه بس قرايه وكتابه اريد افتهم اني شسوي باقيه بلبيت
امي....اهووو عاد راح ادوخنا اسكتي لا يسمعج مرتضى ولله يفصم ضهرج فصم
اماني....مرتضى مرتضى شعلي مرتضى هو ساقط ويريد الناس كلها مثله
امي...الحجي مايفيد اسكتي
سكتت اماني لان ماعدها خيار ثاني محد راح يوكف بوجه مرتضى ويناقشة بهذا الموضوع
الحد ماوصلت عمر ١٥ سنه تقدمها ولد من معارفنا وزوجت
بس امه اجت تخطب اماني وافقت على طول
رغم همه ناس كلش بسطاء
بس تريد تخلص من بيتنا
طلعت من قيود مرتضى وتحكماته
رغم عمرها زغير بس من تقدمها هذا الولد فرحت
راح تطلع من هذا البيت
جمانه السعيدي
ابيتنا ممنوع البنيه تطلع ممنوع تفتح الباب
ممنوع تضحك بصوت عالي ممنوع تكمل دراستها
ممنوع تسلم على اي ولد يجينا من اقاربنا
ممنوع تنعزم بمكان وتطلع
من يدخل مرتضى للبيت كون نوكف وكفه
تحسبا الاي اوامر من حضرته
اذا طلب شي وتأخر علي تصير ساعه سوده
مستعد يضرب ويغلط ويهين
مو حياة بهذا البيت جحيم
المهم اماني ازوجت الولد هم حالته الماديه متوسطه
عايش وياا اهله
يشتغل حداد بس ابن اوادم ومحترم
ازوجت اماني وكانت سعيده بهذا الزواج
من تجي تبقى بس تحجي عن زوجها شلون يعاملها وكانما متفاجئه من طريقه تعامله وياها
لان هي زغيره فتحت عينها علي هو هم كان فرحان بيها
زغيره وحلوه من اول زواجهم حس هي حيل متعلقه بي
وسعيده بحياته وياااا
الي عزز علاقتهم اكثر
اول ماازوجت بعد شهرين طلعت حامل
والحلو بيه ماكنت تجينا زيارات هواي
تكول انتم بس النكد والمشاكل شعندي جايتكم
اكيد اكو مشاكل بيت عيالها حالهم حال الناس
بس مو هي وزوجها لا هي وعيالها
بس هي صامده تكول كلشي اهون من الحياة وياا مرتضى
مشاكلنا بلبيت يهونها عليه زوجي ويصبرني واذا زعلت يراضيني
ويشتريلي ويفرحني
بس بيت اهلي اذا زعلت محد اله شغل بيه
محد يشتريلي محد يطلعني محد يهتم بيه
محد يدافع عني
طلعت اماني وخلصت من هذا البيت وصارت ام
وزوجها يحبها متعلق بيها
جمانه السعيدي
بس اني بقيت لا حول ولا قوه
كلشي براسي كلشي عليه الشغل والتعب والاهانه
والوحده اي اني كنت عايشه الوحده رغم عايشه وسط اهلي لان محد يهتم بيه
محد يسئلني شنو محتاجه
مااطلع ولا اغير جوووو
بس صابره لان وصلت للمتوسط
مرتضى ماجان مركز وياي
لان بهاي الفتره كان يروح يشتغل بغداد
هو يكول اشتغل بس ماكان يرجعلنا بفلوس
بلعكس كان يسحب من ابوي فلوس
اني اتوقع كان يدور اماكن سهر ونسوان
بس محد متسلط علي ومحد يعرف هو شكاعد يسوي
المهم اني وصلت صف ثالث متوسط وامتحنت ونجحت
وكعدت افكر اقدم للاعداديه
وهنا رجع مرتضى وخابت كل امالي
رجع بسبب سوء الأوضاع بغداد بعد السقوط
والخطف والقتل
قرر يستقر هنا وبعد مايرجع البغداد
اول قررا بس رجع للبيت
اني اكعد بلبيت وبعد ماكو مدرسه
كمت ابجي واتوسل باابوي وامي
بس هو قفل ماكو مدرسه يعني ماكو مدرسه
بس شافني ابجي وضايجه
مرتضى....باعي اني لو هنا من زمان جان ماعفتج
بلمدرسه للثالث
بس حضج غلبني ديري بالج اسمع صوتج فهمتي لولا
تبجي علمود المدرسه شكد بطرانه
رويده....انت ليش رجعت جان متت هناك وخلصنا منك
هاي عصابات الخطف والقتل وين راحت عنك
ابوي...انجبي ولج
امي...اسم الله انتي تموتين ونخلص منج
هو راسا رجع عليه موتني تموت امي وابوي يردون يخلصوني منه ماكو
انتقم مني انتقام ماصاير
وشد وياي بلزايد يدخل للبيت ويطلع بس يغلط
ويضرب ويهين
واني لا حول ولا قوه
هواي مرات احسد اماني ازوجت وخلصت من هذا اللبيت
كنت اتمنى اي واحد يجي اقبل بي
بس اخلص
مو بيت سجن مع الأشغال الشاقه
للحكايه بقيه
#قيود_امرأه
#البارت الثاني
جمانه السعيدي
رويده....انحبست بلبيت لا اطلع ولا ادخل
لا عندي اي نوع من أنواع الحريه
بس اشتغل بلبيت واكل وانام
فقدت الشغف بكلشي لا اليه واهس البس ولا اشتري اي شي
اريد النهار يخلص حتى انام وارتاح
من الوكفه طول النهار
خدامه اي اني خدامه يمكن الخدامه احسن مني
لان الها اجازه وتأخذ راتب
اني لا اجازه ولا راتب ولا معدوده على البشر
افتر كل النهار مثل الناعور
اي حقوق مااملك مكينه شغل وبس عايشه بهذا البيت
على الهامش
لحد يسئلني شنو تردين
لو شنو محتاجه
عليه انفذ الأوامر وبس وممنوع احجي
حتلو اريد احجي ويامنو احجي وعن شنو
اني لا اطلع ولا ادخل ولا عندي صديقات حتى اماني
ما تجينا دائما
ملتهيا بلبيت والجهال والمسؤليه
اهلي من تجي ما يسوولها واهس
يعني مثلا يطبخون اكله علمودها
اوياخذوها يشترولها ملابس الها والجهالها
او حتى يحسسونها هم مشتاقين الها رغم هي كل شهر تجي يوم واحد حتى ما تبات ترجع بليل البيت عيالها
والأهم من ذني كلهن مرتضى ينزعج من يشوفها بلبيت لان جهالها يلعبون لو يتعاركون
وهو مايريد هوسه
كل الاسباب هاي كانت تمنعها تجي للبيت
وماعدنا تليفون نتصل بيها لو نحجي وياها
جمانه السعيدي
اني كنت اعيش وحده فضيعه واحس بلاهمال من كل النواحي
وصلت العمر ٢٠ سنه واني مامزوجه
امي كانت تعتقد اني صرت عانس
برائيها هواي عشرين سنه المفروض اني هسه مزوجه وعندي اطفال ثنيبن
لان اماني اكبر مني بتلث سنوات وعدها ٣ اطفال
هذا الموضوع كان يحسيني بلاحباط اكثر
كنت احس نفسي صرت عجوز وبعدني ماازوجت
الصراحه اني كنت اتمنى ازوج
اريد اطلع من هذا البيت اريد اتنفس اريد شريك حياة
اريد اكون مسؤله من احد
يهتم بيه وبطلباتي يكون حريص عليه
اكون اسره انشغل بيها كل الوقت
بس منيين يجيني العريس اذا اني لا اطلع ولا ادخل
ولا اشوف احد ولا يشوفني
ولا اطلع الاي احد يجينا
احنا اصلا محد يجينا لا نادرا تجينا وحده من الجيران
لو شغله مهمه تجينا وحده من اقاربنا
يعني لا ادخل ولا اطلع لا عندي علاقات و
صديقات
شلون انخطب محد كان يفكر بكل هذني الشغلات
بس بالاخير يردوني ازوج
جمانه السعيدي
امي بهاي الفتره كانت ادور عروسه المرتضى لان صار عمره
٢٥ سنه وهو مامزوج
كل الي تروح تخطبها ترفضه
اكيد ترفضه لان سمعته سابقته
كل الناس تعرف هو واحد صاحب مشاكل ولا شغل ولا عمل
ويدخن ويدور نسوان
اي وحده نخطبها وتسئل عن مرتضى ترفض
حقهن انسان ما يتعاشر
كلما ينرفض اكثر يصير عصبي اكثر والبيت يصير حجيم
كنت ادعي كل يوم تجيني قسمه واخلص
وارجع افكر واكول لواني بلمدرسه جان هسه واصله كليه
حتلو ما ازوج على الاقل احصل شهاده
الحد مايوم اجانا مرتضى
هو مايحجي وياي على اي شي بس يصدر اوامر
واني عليه انفد
مرتضى....اني لكيت عروس
امي.. يالله اي خوش الحمد لله يايمه طاحن رجليه واني افتر وادور
صار سنتين ماكو باب مادكيته
مرتضى...اخوها صديقي
امي...اي خوش يعني تعرفهم ناس زينين
مرتضى....اي اعرفهم اخوها صديقي
امي... اي خوش خبر صلاوات
مرتضى...بس هي منفصله
امي....يااا مطلكه
مرتضى... اي ازوجت ست اسهر وطلع زوجها موخوش ادمي
وطلكت
امي...شلون تزوج وحده مطلكه
مرتضى....انتم مالكم دخل اني عاجبتني واريد ازوجها
امي... اني ادري بكيفك عاد خل اشوفها
مرتضى....اكيد اخذج تشوفيها
رويده...من اجا ابوي وفتح مرتضى وياا الموضوع ماقبل
بس مرتضى بقى يلح
يمكن اكو بينهم علاقه
مرتضى لح منا لمن ابوي اقتنع
وفعلا رحنا نخطبها
طبعا مرتضى ما قبل اني اروح بس امي اخذتني وياها
من طلعت عبالك بي شي
بس اباوع بعيوني لان مااطلع دائما
من شفت العروسه ابد مارتاحيت الها
اول امها كعدت يمنا امها السان وتحجي وصوتها عالي
اني بس كاعده واباوع
ما نطقت ولا كلمه
حتى امي محتاره شنو تحجي وياها ناس ابد مو من طبقتنا ولا نفس طبعنا
متحررين بزياده طلعت علينا اميره
العروسه اسمها اميره
الثوب قصير والصدر دلع والمكياج مكياج عروسه
عبالك اليوم راح يزفوها
دخلت سلمت كعدت وطك بعلجها
اني مااعرف ليش ابد ماارتاحيت الها حسيتها مو تمام
المهم اني شعليه هو راح يزوج مو اني
وهمزين هو الي اختار حتى هو يتحمل المسؤليه
اصلا احنا روحتنا مالها داعي هو وياها الضاهر متفقين من زمان
امي... احنا نريد نعرف طلباتكم شنو
ام العروسه.. عيني ترا مرتضى اجانا وكعدنا هنا واتفقنا على كلوشي
امي...ياا اجاكم
ام العروسه...اي غير صديق حسام ابني
اجا هنا كعد وشاف العروسه واقتنع بيها
امي.. اذا متفقين خوش اني اطلع منها
العروسه...اي خاله انتي طلعي منها اني ومرتضى متفقين
امي حيل ضاجت اولا امي ما قابله يزوج مطلقه
وخاصه هو الولد الوحيد عدنا
ثانيا امها وكحه ومبينه تدخل بكلشي
ثالثا وهذا الاهم البنيه مبينه اخلاقها مو تمام
كاعده كبالنا رجل على رجل والثوب قصير طالعات رجليها كلهن
وتحجي وتضحك وتاشر امبينه مو محترمه
طول مااحنا كاعدات احنا خارج إطار الاتفاق
هنا الي حددن كلشي
حجن كل التفاصيل حسب مايردن هنا
جمانه السعيدي
اني وامي حسينا وجودنا ماله داعي وجودنا مثل عدم وجودنا
لان هنا متفقات وياا مرتضى على كل التفاصيل
كمنا اني امي وطلعنا وصلنا للباب
جان ام العروس
ام العروس...خل يجي مرتضى عندي شغله مهمه وياااا
امي هزت راسها وطلعت
منا لمن وصلنا للبيت امي ماحجت ولا كلمه
وصلنا للبيت بس دخلنا مرتضى هاااا
امي....شنو هاااا انت متفق وياهم على كلشي
بعد عليمن خليتي اروح عليهم
مرتضى.. تعارف امي تعارف
رويده...حجت امي بعصبيه
امي.. اي تعارف يمه تعرف عنك شغلات اني مااعرفه
اصلا هي الي حددت كلشي
وقررت عنك وعني كل التفاصيل
انت ماخذني حتى يضحكن عليه
مرتضى... وشكو بيها اني وياها متفقين على كلشي
انتي اللج الصافي
امي.....كل عمرك تتصرف من كيفك وماتاخذ رائي بكل شي
بس اني اكلك هاي البنيه ماتفيدك
اعبر النهر ماطوله ضيك
مرتضى...عاجبتني واني الي راح ازوج مو انتي
انتي مالج دخل
رويده.. امي سكتت بس كلش ضايجه
من اجا ابوي حجتله كلشي صار ويانه ابوي هم ماعجبه الوضع
بس مايكدر يسوي شي مرتضى مصمم عليها
رحنا خطبنا هي خطبه هي مهر
العرس تحدد بعد شهرين علما انجهز نفسنا
جمانه السعيدي
بحفلة المهر اني شافتني وحده مره جبيره
من الجوارين
بعد المهر ٣ ايام اجت تقدمتلي
اني من سمعت هي جايه تتقدملي طرت من الفرح
يالله اجاني الفرج
العريس اسمه اياد عمره ٢٨ سنه يشتغل بلحلال
عندا بيت قاسمه نصين
نص بناء بسيط غرفه ومطبخ وعليهن هول
والنص الثاني محصار حلال
الولد بلابتدائي وعايف المدرسه
اسمر طويل شكله اقل من عادي
كل هاي الصفات ماكانت بعيني اريد بس اطلع من هذا البيت اريد اعيش حالي حال البنات
كنت اكول خلاص بيتي وحدي
اكيد راح يحبني بلعشره مثل ما زوج اماني يحبها
اني ما ناقصني شي
رغم اني وياا فرق السما عن الكاع
هو ما متعلم ويربط حلال واني مااعرف اي شي عن الحلال و. مااعرف شنو طبعه
ياترى بخيل لو كريم شكاك لو لا يقدرني ويفهمني لو لا
كل هاي الاشياء غمضت عيوني عليها
ماصدكت تقدملي
هلكد ماعايشه بوحده ويائس وعدم اهتمام ماصدكت
اتقدملي
وأهلي كانو طايرين بي من الفرح
يعتبرونه تاجر وين اني احلم اخذ واحد تأجر
وراح اسكن وحدي
بعد ماكو احسن من هيج موصفات
لازم اقبل واني مغمضه عيوني هيج فرصه ماتجي بس بلاحلام
#البارتات3__4
#قيود_امرأه
#البارت الثالث
جمانه السعيدي
رويده....كنت مامصدكه اني اخيرا راح ازوج واطلع من هذا السجن
كمت اتخيل حياتي الجديده شلون صايره
ومن هاي اللحظه قررت بس اطلع من البيت
بعد ماارحع ابد المن راجعه وعلمود شنو كافي عمري الي ضاع واني مقهوره وحزينه بهذا البيت
اهلي وافقو على اياد بس بشرط يزوج مرتضى بلاول
اكيد اني الخدامه الي مايكدرون يستغنون عنها
منو الي راح يشيل كل هوسه العرس غيري
الولد وافق ان كلشي يتم بعد عرس مرتضى
يعني الخطبه كانت بس كلام
كلشي اتأجل بعد عرس مرتضى
كنت قلقه خاف يمل ويعوفني لان عرس مرتضى بعد شهرين
فتره طويله بلنسبه الواحد مستعجل على العرس
بس ام اياد أكدت راح ينتضرون
امي دزت على ام اياد
المره اجت راسا تسمع رد اهلي على الخطبه
امي... رويده الكم بس ما تاخذونها اله مرتضى يزوج
ام اياد...اي موافقين
بس احنا اذا عقدنا ناخذها كبل الولد جاهز بيته ومشتري
غرفة النوم
وهم على كيفكم ويانه بلمهر
امي...المهر يم ابوها واخوها اني ماادخل
رويده...تم الاتفاق بين امي وام اياد بس اياد حتى ما طلب يشوفني
هاي هي على كلام امه وافق عليه
جمانه السعيدي
بليل صار نقاش على موضوع خطبتي اني كاعده اصب جاي
وامي ومرتضى وابوي كاعدين
امي....اليوم ام اياد تكول همه بيتهم وحدهم والولد مشتري الغرفه وتكول على كيفكم ويانه بلمهر
ابوي... اني سئلت على الولد زين خوش ولد يشتغل
شغله وحده ماعدا شريج
بس يكولون شويه حريص
امي...هو زين الحريص احسن يطشر بفلوسه
مرتضى...لازم مهر زين اني اريد حصه من مهرها يساعدني اجهز نفسي بسرعه
ابوي....إني اكول خل تمشي البنيه كبرت ومادام غرفته جاهزه بعد بس فلوس الذهب
مرتضى....لا شوفو شكد المهر هسه واطلبو شنو ياخذها بلاش اني اريد حصه من هذا المهر
ربينا وكبرنا وصرفنا عليها لمن صارت بكد العجل
وهسه كلشي ما نحصل منها
امي...بكيفك اذا الولد اجا انت احجي ويااا
مرتضى...اني راح اشتري غراض للعرس بلدين
ومن استلم حصتي من المهر اسدد
ابوي...زين خوش حجي
رويده...خفت خاف اهلي يشدون بموضوع المهر والولد يبطل من هاي الزواجه
واني ماصدكت واحد تقدملي
ياسبحان الله مرتضى معارض بكلشي حتى بقسمتي معارض
كل عمري اشتغل خدامه جوه رجله ويضربني ويهيني مالي اي تقدير عنده وهسه مايقبل يعوفني اله ياخذ الثمن
يريد ثمن مقابل عرسي
جمانه السعيدي
المشكله من كد مااني ماله من وضعي بيت اهلي دققت على موضوع الرفض والقبول ومادققت على موضوع البخل ابوي جمل هاي الكلمه شويه وكال حريص
اني ماعندي تجارب ومااعرف شنو السالفه
ماكان شاغل بالي غير ازوج واطلع من هذا البيت
كنت أتوقع حياتي راح تكون مثل حياة اختي
اكيد بلعشره راح يحبني ويعاملني معامله حلوه
ليش لا اني انحب وماناقصني شي
كانت التحضيرات العرس مرتضى متعبه بشكل
بس اني كنت اشتغل بواهس لان اعتبر هاي الايام الاخيره
اليه بهذا البيت
مهما يكون التعب يهون اني خلاص راح اتحرر من هذا المكان
اياد وأمه ابد بعد ما بينو علينا ولا سئلو طول ذني الشهرين واني ماكو على الساني غير
بس ادعي لا يبطلون من هذا الزواج
قرب العرس امي جابتلي ثوب بسيط بس حلو
البسه بلعرس
طبعا اميره مللت مرتضى بلطلبات طلباتها ما تخلص
ابد كل يوم شغله جديده
وهو يجيب ويسجل بلدين منتضر المهر الي ياخذه
من اياد ويسدد
يوم العرس مرتضى ما قبل اطلع ابد
رويده...يمه فدوه خل اروح بلزفه
امي...اخوج مايقبل
رويده.. قابل هو يزوج كل يوم
امي...تعرفينه زين ما يقبل ليش تلحين
راسا سمعنا مرتضى
مرتضى...هااا خير
امي...رويده تريد تروح بلزفه
مرتضى...اي زفه هاي ووين تريد تروح الزفه بس ولد
تكعد هنا بلبيت وتسكت
مااريد اسمع صوتها
رويده....سكتت مااريد مشاكل اصلا اني اعرف هو مايقبل
ليش اتعب نفسي بلحجي ويااا
صارت الزفه وجابو العروس
واني صرت عبالك ناعور اركض هيج وارجع هيج
الكل يصيح رويده رويده
زفو مرتضى على اميره
واني ملتهيه بلمطبخ والننضيف حتى اماني ماساعدتني
ابنها الزغير يبجي فلونزا وبس يبجي
على فكره حتى اماني ما راحت بلزفه
فتح باب الغرفه مرتضى
مرتضى...ووين العشى
امي.. اي هسه رويده العشى
ركضت حضرت العشى واخذته
شويه وصاح تعاي طلعي الصينيه
رحت جبت الصينيه من غرفتهم بليلته لثنتين واني افتر اعزل وارتب بلبيت
نمت على وجهي من التعب
امي من الصبح .....اكعدي خاف يجينا احد
رويده ...ولله تعبانه اريد انام
امي...غير عدنا عرس خلي يخلص ونامي براحتج
صممت امي لازم اكعد
كمت حضرت الريوك وبديت اطبخ للغدا وأخذت ملابس ابوي غسلتهن
كعدو العرسان الساعه عشره
اول ما طلع مرتضى راح للحمام وبعدين اميره
شويه وصاح مرتضى رويده صخام تعاي
رويده...نعم
مرتضى.. نعم الله عليج اغسلي ملابسنا
ملابس مرتضى وملابس اميره هسه ملابس مرتضى عادي متعوده بس ملابس اميره ليش اني اغسلهن
طبعا مااكدر احجي اخذتهن غسلتهن وشربتهن
بعدني أشر بلملابس
صاح رويده
رويده...نعم
مرتضى...تعاي نضفي غرفتنا وجيبي الريوك
رحت حضرت الريوك كعدو برا يتركون واني نضفت غرفتهم
وقت الغدا صاح جيبي بغرفتنا وبعدين صاح تعاي شيلي الصينيه
العصر كال تعاي نضفي غرفتنا وغيري الجرجف
مدري اخدم مرتضى وزوجته مدري اخدم الناس الي تجينا مدري انضف مدري اطبخ
حشاكم احس نفسي زمال اركض منا وارجع منا
واميره بس اتباوع عليه حتى ماحركت نفسها حركه وحده
حتى هي اذا تريد شي تصيح عليه تعلمت من مرتضى
الحد يوم السابع واني اغسل ملابسهم ثنبينهم
وانضف غرفتهم واجيب الاكل اخلي كدامهم وارجع اشيله ماكو اي رحمه بكلبهم ثنيبنهم
طبعا هي تتآمر عليه عبالك خدامه بيت الخلفوها
ومااكدر افتح حلكي اخاف مرتضى يهجم عليه
يمتى ازوج واخلص ياربي
للحكايه بقيه تفاعل حلو مثلكم
#قيود امرأه
#البارت الرابع
جمانه السعيدي
رويده....اسبوعين ورا زواج مرتضى
واني اركض طول النهار واشتغل والعروسه لونايمه
لو مكيجه وكاعده بغرفتها
خفت من تأخر اياد ليش مااجا اتقدملي خاف بطل من هاي الزواجه
اذا خرب هذا الزواج راح ابقى على هذا وضعي
شلون بيه
ثاني يوم اجت ام اياد دكت الباب
فتحت الباب بس شفته ودي احضنها وابوسها
دخلت جوا
امي...منو اجانا
رويده . ام اياد
امي ....هله ببها روحي جيبي ماي عصير
دخلت امي يمها واني رحت جبت عصير وماي
المهم المره اجت تحدد موعد حتى يتقدمولي
امي...اسئل ابوها وارجعلج خبر
ابوي جان موجود بلبيت سئلته امي تحدد الموعد الخميس
بعد اربع ايام
من جيت ام اياد البيتنا
ام اياد. احنا نريد بس نعقد اسبوع ويزوج
امي ماعدنا مانع بس يعقد محكمه ياخذها
رويده..... مادزولي فلوس للمهر ولا اتفقوا على المهر شكد
كلشي بقه سكته
بيوم المهر اميره انطتني ثوب من ثيابها حلو وردي
ضيك وطويل وكتاف الفستان مفتوحه
وهي الي سرحت شعري ومكيجتني
وقبلها بيوم حفت وجهي كلشي تعرف ماشاء الله
عدها خبره بلمكياج والشعر
جمانه السعيدي
بس هي تشتغل بوجهي وتحجي على اياد
اميره...لج عيني شنو هلبخل ليش مادزو فلوس للصالون
يردون عروسه بلوشي
رويده...اني ساكته مااريد احجي اريد هاي الزواجه أتم على خير مااريد اي مشكله تخرب العرس
كانت تحجي وتنقد اياد كل الوقت لان مادزلي فلوس علمود اروح للصالون لو اشتري نفنوف
المهم. كملت مكياجي طلعت كلش حلوه
يمكن لان فرحانه احس نفسي كلش حلوه
حتى اختي اجت متاخره هي وجهاله بيوم المهر
الهوسه كبت
يله المهم توكف وياي ومااحس نفسي وحدي
اجو الزلم وياهم بس امه وزوجت اخو وخالته هو ماعند
خوات
المهر جان بوقت زواجي خمسه حاضر وخمسه غايب
بس اياد عند ما قبل خمسه
لان هو مشتري الغرفه
كوه بلمشاكل والطلايب صار المهر اربعه بخمسه
اربعه حاضر وخمسه غايب
اياد مجان دازلي فلوس اشتري ذهب
ولا جايب وياا ذهب
انطا فلوس المهر المرتضى عقد ومناك راح
لادخل عليه ولا شفته ولا حتى باركلي
حسيت فرحتي ناقصه ليش اني حضي مو مثل البنات
حتى امه وخالته وزوجة اخو بس خلص العقد راحن ويااا
ياربي شنو القصه مغصوب عليه شنو
بدت اميره تبسمر ببه
امير....شنو هذا من عريس ياربي ليش مادخل سلم على عروسته باركلها
خاف مغصوب لو جابرينه عليه
اول مره اشوف هيج عريس
ماخلصت من حجي اميره بقت تبسمر بيه وذب حجي عليه كل شويه وكالت هذا العريس الشارد
عريس ابو فليس
المهر اخذ مرتضى منه مليونين وانطاني مليونيبن
محد فتح حلكه وحجا لا امي ولا ابوي
ولا ناقشو ابد ولا احد كال ذني فلوس اختك ليش تاخذهن
بعدها بيومين اخذتني اميره تسترلي ملابس وذهب
اشتريت حلقه ومحبس وتراجي كلش خفاف
اسمهن ذهب
وملابس كم قطعه ومكياج على كد الكد
باودر واحد وقلمين حمره وكحله وحده ومسكاره وحده
وعطر ومعطر وبس لان الفلوس خلصت
جمانه السعيدي
طبعا مادزلي فلوس للحنه ماقبل
يكول عليمن تسوي حنه وحتى فلوس صالون العرس هم ماقبل يدزهن يكول اني مااريد صالون خليها تجي هيج
بعدين امي دزتني صالون كلش عادي قريب علينا
وهي الي دفعت الفلوس
يعني الصراحه ماطلعت كلش حلوه مثل مااريد
والبدله مالت العرس ايجار وموديلها قديم
بلزفه اجن بس سيارات ثنيبن ازغار سياره صعدنا اني وياا
وامي بلصدر والثانيه اختي وجهالها واميره ومره جبيره من جوارينا
وصلنا للبيت البيت طابق واحد
دخلنا جوا الأثاث حيل بسيط وقليل وقديم
يمكن مشتري مستعمل
والطركاعه
كل الوقت وهو يكول عندي غرفه اشتريت غرفه
طلعت الغرفه كلش قديمه موديلها قديم مشتريها مستعمله
رخيصه وصابغها
من دخلت للغرفه وشفتها كلش ضجت
مو عرس تلزيك ياربي شسوي بروحي
حتى امي من شافت الغرفه ضاجت حيل
واميره استلمته تصنيف وتقليد
اميره.. ووين لكيتو هاي الغرفه خاف مال عرس امك
وصبغته لو لكيتها بلزباله وجبتها
ام اياد....شبيها هي غرفه ينامون بيها ويعلكون ملابسهم
شني ياخذون وياها صوره
اميره...حجيه ترا كلش قديمه شو الغرف تخبل وبلقسط
وهو ماشاء الله مكنه
ام اياد...ميله متمكن خليتي عينج علي
اميره...حتلو ماعندا بلقسط حجيه هاي الغرفه الي يشوفها
تنسد نفسه من العرس
المهم اميره كوه سكتت اول مره اتفق اني واميره على شي وكانها حجت الي بكلبي
جابو العشى دجاج وتمن تعشن امي واختي وجهالها واميره بس اني ماكدرت اكل
بعدين زفو العريس اول مره اشوفه عن قرب
شكله عادي كلش اني ماكان يهمني الشكل بكد مايهمني يكون انسان حنون عليه
ويسد النقص العاطفي الي بداخلي
النقص الي عشت كل عمري اعاني منه بسبب اهلي
وتفريقهم بلمعامله بينا وبين مرتضى
المهم دخل اني وكفت
اياد... شلونج
رويده...الحمد لله
اياد...اكعدي استريحي
رويده كعدت
كعد بصفي وبدا كلامه وياي
اياد... اني اهم شي عندي تسمعين الكلام اي شي اكول علي تكولين حاضر لا تناقشيني بشي
اني اكبر منج وعندي تجارب اكثر منج
اني اعرف بمصلحتي ومصلحتج اكثر منج
مااريد كل يوم اريد اروح بيت اهلي
انتي صرتي صاحبت بيت ومسؤله عن بيتج اكعدي واسكتي هنا
مااريد صديقاتي كرايبي كل يوم جايات رايحات
ماكو طلعه اله بااذني
شغلت واجبات نسوان ورايحه وجايه تصرفين فلوس مااريدها
لا ترحين الأحد واجب ولا يجيج احد
واذا سئلوج كولي اياد مايقبل اطلع
اي عود مايتحرك من البيت اله يكون عندي علم بي
مااريد اطبخين وتكومين الطبخ على كدنا اني وياج
فهمتي لولا أسرار البيت تبقى بينا ماتطلع برا
جمانه السعيدي
رويده...من سمعت هاي الاوامر بليلة عرسنا كلبي انقبض
ابدال هاي الاوامر
لازم اسمع كلمات غزل حب او على الاقل تعارف
لان اني ابد ماحجيت وياا من يوم خطبني لليوم
هذا اول تعارف بينا
ابدال مايهدي نفستي ويطمني بدت ليلة عرسنا بمجموعة اوامر الله يستر من الجاي
بعدين بدل ملابسه وكال يله بدلي حتى ما سئلني تعشيتي لولا يمكن هو ماكل قبل لا يدخل الغرفه
هوبدل ملابسه وطلع يغسل واني كوه نزعت البدله
لبست سيت ابيض وفتحت شعري
شعري صاير عبالك خشبه هلكد ما ام الصالون خالتله سبري
ابد ما يتمشط واكف مثل الخشب
والمكياج تخربط اضطريت امسحه
طلعت غسلت برا وغسلت وجهي ورجعت
دخلت وهو دخل وراي للغرفه طفا الضوه وطبك الباب
كانت ليله جافه مابيها اي نوع من أنواع المشاعر
او الاطمئنان النفسي
وكانما عندا شغله خلصها ودار وجها ونام
بقه جسمي يرجف لان حيل خفت منه عبالك داخلين معركه
همزين يعرف اسمي لان ما سئلني اي شي يخص حياتي
كلش انقهرت وكمت ابجي
معقوله هو هذا الإنسان الي راح اخلص حياتي ويااا
لو لان اول ليله بعده ما متعرف عليه
بلكت من يعرفني اكثر يتغير
كمت سبحت ورجعت لفيتي نفسي ونمت
جمانه السعيدي
ثاني يوم كعدت مالكيته نايم بصفي بقيت مدده
شويه ودخل للغرفه
اياد...كومي يله كافي نوم
رويده...بيش الساعه
اياد...انتي اتكعدين على الساعه شعلينا بلساعه الدنيا صبح لازم انكوم بعد شنو النوم بلنهار
الساعه بلسبعه ونص
اريدج تتعودين تكعدين الصبح اني اكعد من الخمسه
رويد...عدلت كعدتي ولميت شعري
ليش نكعد بلخمسه شكووو
اياد...شغل عدنا شغل
راسا نزل حواجبه وكام يحجي بعصبيه وياشر بايده
اياد.. انت كل يوم تحجين هلكد الصبح من تكعدين
رويده...لا بس بعدني ما متعوده على هذا الوضع
راد يطلع من الغرفه التفت عليه
اياد...يله كومي انتي شنو تنبل مال نوم تعاي اشوفج شي حلو
رويده فرحت يالله بعد هاي المحاضره من الصبح اكو شي حلو
كمت نزلت من الجربايه ولميت شعري
طلع هو قبلي وكال تعاي وراي
رحت امشي ورا طلع من البيت ودار على المحصار مال الحلال
وكف واشرلي تكرمون على الهايشه
اياد...شوفي هاي فرحه الهايشه اسمها فرحه بعد كم يوم وتولد وهذا العجل
ابنها بس يكبر شويه ابيعه
وذني النعجات بيهن ثنيبن حوامل وذني الاربعه خرفان
وذني الصخول شاميات
وهذا كن الدجاج عندي دجاجه كرك نايمه على البيضات
بعد اسبوع او عشر ايام ويبدن يفكسن
رويد....صفنت علي يحجي وهو فرحان بشكل مو معقول
وهو يعد بالحيوانات كدامي
صدك جذب اول يوم عرسي واكفه بحضيرة الحيوانات
والريحه تكتل
هاي شنو من ورطه ياربي معقول هو هذا الإنسان الي راح يعوضني عن الحب والحنان الي فقدته بيت اهلي
هذا عقله عباره عن حضيره حيوانات
ووينه وين الحب
الله يستر من الجاي
#البارت__5
#قيود_امرأه
#البارت الخامس
جمانه السعيدي
رويده... وكف اياد يتحسس بلهايشه
الي على وجه ولاده
اني عفته ورجعت للبيت راسا اجا وراي
اياد...حضري الريوك بسرعه لان جوعان
رويده...حاضر
طلعت بيض الضاهر من الدجاج الي عندا لان مبين بيض
لونه هيج ابيض وحجمه زغير
لان حجم البيض مو جبير حيل طكيت خمس بيضات
وطلعت ٣ كرص خبز وترست القوري ماي حتى اخدر جاي
اجا قرب عليه هو شاف الطاوه بيها هواي بيض وتخبل
اياد...هاي شكد بيض طكيتي
رويده...خمسه
اياد...ليش خمسه عندج عزيمه خوما عزيمه
رويده.....مو حجم البيض زغار
اياد...شنو زغار خوش بيض تدرين هذا البيض بيش بنباع
بلسوك وليش هلكد خبز
كل و أحد خبزه وليش القوري هيج متروس مي
على كدنا خلي جاي قيسي بلكوب وخلي بلقوري
هلمره سماح لان اول مره بس مرة الثانيه انتبهي زين
لوما الباراحه وصيتج
لا اضلين اطشرين انريد انلم نفسنا
رويد...شكد جنت جوعانه لان بليل بقيت بدون عشى
انسدت نفسي عن الاكل
هذا شبي على البيضه يحاسب خرب حضي
خليت الاكل
كعد ياكل
اياد...تعاي اتريكي
رويد ...مااشتهي
اياد..اذا ما تشتهين ليش طكيتي هلكد بيض
رويده....ماادري عفته ودخلت للغرفه ياربي كون يطلع حلم كون مو حقيقه
هو هذا الزواج الي ذبحتي نفسي علي
على الاقل بيت اهلي جنت اكل براحتي
ليش هيج جاي يصير وياي ليش اني قليلة حظ هيج
اكل وراح للمحصار مال الحلال
اجيت اشيل الصينيه لكيته ماكل كل البيض
اذا هو عندا هيج قابليه على الاكل ليش يحجي
ليش يحجي وحده اكل خمس بيضات
صدك جذب مايشتري بيض وهيج يحاسب لويشتري طبقات بيض شلون
صبيت جاي واكلت وياا خبز وسكتت
بقيت متردده شنو اطبخ خاف مايقبل مثل الريوك
رحت ورا للمحصار
لكيته جاي ينطي علف للحيوانات
جمانه السعيدي
رويده...بس اريد اسئلك تحب احضر شي للغدا
اياد. لا امي راح اجيبلنا غده تعاي اعلمج شلون
تعلفين الحيوانات
رويده...واني شنو علاقتي بيهن
اياد ... .شلون شنو علاقتج بيهن احنا منيين عايشين
غير عايشين بيهن
طبعا بس حبيت أوضح شي احنا ماعايشين بمنطقه ريفيه
احنا عايشين بقضاء وولايتنا حلوه
وناس تدرس والا غلبيه موضفين والبيوت حلوه مرتبه
بس حظي الاغبر من دون كل هاي الناس
وكعني بااياد
رويده.. اي عايشين من خيرهن افهم بس شلون جنت قبل
ترعاهن هسه ما تغير شي
اياد....لا تغير شي انتي هسه اجيتي وصرتي مسؤله عن كلشي اني ابيع واشتري
وانت هنا بمكاني تعلفين الحلال واذا الهايشه جابت
تحلبينه
لازم اني وياج نتشارك بكلشي انتي صرتي مسؤله عنهن مثلي
رويده...بس اني كلشي مااعرف عنهن
اني بعمري ما مقربه على اي حيوان وكلشي مااعرف
اياد...اني اعلمج على كلشي
رويده....مااكدر اني مااكدر اتحمل هاي الريحه
ولا اعرف اسوي الاشياء الي انت تسويها
اني اعرف بس اطبخ وانضف
اياد...لا تخافين اني اعلمج
ساعتها حسيت نفسي اتورطت من صدك
شكد جنت احجي على اهلي وعيشتهم هسه وكعت بالاسوء
كاعد يحجي ويشرحلي واني عقلي يجيب ويودي
اندكت الباب
رحت افتحها
رويده...منووووو
ام اياد...اني خاله افتحيلي
فتحت الباب والمره باركتلي ودخلت سمع صوتها
اجا يسلم عليها
دخلت هي وياا واني رحت اخدر جاي
رجعت قدمتلهم الجاي
ام اياد....اليوم اني اجيبلكم غده لا اطبخون بس من باجر
انتي اطبخين حتى نشوف شطارتج
سكتت مارديت عليها هو شطبخ اذا ابنج حاسب البيضات
يمكن راح يكتلني الجوع بهذا البيت
المهم دزولنا غدا الضهر الضاهر زوجت حماي طابخه لان عمتي بقت عدنا للغدا
تغدينا وشربنا حاي عمتي راحت واياد نام
اني هم رحت نمت
للعصر اجت امي واميره يطمنن عليه
كعدن شويه ونطني واجب وراحن
بس طلعن دخل اياد
اياد.. هااا اخذتي واجب
رويده. هنا صممن اخذ واجب هذا مو واجب هديه من امي
اياد...جيبي اضمهن اللج عندي خاف تصرفينه
بقيت مستغربه من ردت فعله شنو ياخذ فلوسي
رويده.. كلت بس ياخذهن مستحيل يرجعهن اليه
جمانه السعيدي
رويده....لا اني مطلوبه للصالون نسيت انت ماقبلت تنطيني فلوس الصالون اشتغلت بلدين
جمانه السعيدي
اياد.. هو شنو بلدين جايبتلج ذهب خفيف وكم قطعه قماش انتي مو اخذتي اربع ملايبن
ووين وديتهن ششتريتي بيهن فهميني
رويده...شنو عينك وراهن غير فلوسي
اياد...ادري فلوسج ووينهن لو اهلج اخذوهن
رويده....ذني مهري ترا
اياد...امبينه راح اتعبيني جيبي الفلوس اني اضمهن اللج
شنو رائيج أجمعيهن
وتشترين نعجه النعجه كل يوم تحبل وجيب
اتبيعيهن ويكثرن فلوسج تجاره هاي بيها كومه فلوس
رويده...وليش ابيع واشتري اني قابل شعندي
انت مسؤول عني تصرف عليه
اياد...شكد ثوله شبيج يصير عندج هواي فلوس
رويده...مو شغلتي مااعرف بيها
ليش ادخل نفسي بشغله مااعرف الها
اياد....شكد غبيه هذا شغلنا منا وهيج افهمي
اباوع علي واكول حسبي اله ونعم الوكيل هاي شنو من قسمه
المهم ضميت فلوسي هذا الرحال مبين راح يعصرني عصر
ثالث يوم كعدني من الصبح الدنيا بعدها ضلمه
ثالث يوم عرسي
اياد...اكعدي اكعدي بسرعه
رويده...كمزت خير خير شكووو
هلكد مايحجي بسرعه ويصيح بصوت عالي توقعت احد مات او صار شي
اياد..كومي كومي بسرعه فرحه جابت
طبعا اني النعاس بعيوني ونسيت منو فرحه
رويده...منو فرحه
اياد..خرررب كومي بسرعه شكد ثوله الهايشه جابت
اني نزلت من الجربايه وهو يحجي لان حسيت اكو شي خطير صار
وكفت على حيلي الهايشه جابت واني شنو علاقتي بلموضوع
قابل اني اجيبها لو اني امها واذا جابت
هذا الحجي هو طلع من الغرفه يركض ويصيح تعاي وراي
لبست دشداشتي ورحت ورا لكيت الهايشه جايبه
والدم تارس الكاع بس شميت ريحة زفرة الدم وريحة المكان حسيت نفسي راح اتقئ
راسا سديت خشمي ماكدرت اوكف بلمكان
رجعت طلعت
اياد...ووين رحتي ليش طلعتي
رويده. مجاي اكدر اتحمل ريحة المكان
اياد...ياريحة ياريت يوميه اجيب جان حتى نمت بهذا المكان
روحي جيبي جدر جبير وتعاي
رحت جبت جدر انطيته اله وطلعت
لكيته خال العجل الزغير بحضنه ويمسح علي بوصلة قماش
عفته ورجعت دخلت للبيت
بعدني نعسانه توه الفجر بين
دخلت الغرفتي اريد ارجع انام بعد الهايشه جابت اني اريد انام
بقه تقريبا نص ساعه واجا وراي
اياد.. شنو نمتي كومي بعد ماكو نوم
هاج هاي البايه انطاني الجدر الي اخذته اله
رويده...البايه شنو
اياد. هاي من اجيب الهايشه حلبتها هسه
رويده.. يعني هذا حليب شو مو حليب
اياد..اي حليب بس لان اول مره بعد الولاده بطلع هيج مقطع نسمي لبايه كلش طيب
رويده...ووين اخلي يعني
اياد...روحي فوري على الطباخ وخدري جاي حتى نتريك
رويده.. هسه تتريك
اياد..اي اريد اروح للعلوه وانتي ابقي مراقبه العجل الزغير
وحاولي تخلين امه ترضعه
رويده...تحجي صدك
اياد...شنو شوفيني اتشاقا وياج
يحجي ونزع دشداشته لان صار بيها دم من العجل
بس نزع الدشداشه ماسبح راسا لبس وحده غيرها وذيج الدشداشه شمرها بلكاع
والريحه صارت بلغرفه كارثه
عبالك الهايشه كاعده ويانه بلغرفه
رويده.. ولله اخاف اقرب علي الهايشه
وهذا العجل شلون يعني اراقبه بس اباوع علي
اياد...تعاي وياي انتي صدك متعبه تعاي اني اعلمج
اخذني للمحصار وكعد يشرحلي شلون اهتم بلعجل
والهايشه
شال العلف كال هيج تعلفين كل الحيوانات
هاي الصخله اليوم تعبانه يمكن راح اجيب
اني اوصل للعلوه اجيب علف اجي
رويده...هاي شلون اجيب شسوي مااعرف
اني ترا مااقرب عليها اخاف
اياد....اني ساعه لو ساعه ونص وارجع
يله تعاي حضري الريوك بسرعه راح عليه الوقت
رجعت خدرت الجاي وفورت الحليب الي جابه
كعد ياكل واني اباوع علي ومتعجبه منه ومن تصرفاته
طلع واني ميته نعاس بس هو كال لا تنامين راقبي العجل
رجعت وكفت من بعيد اراقبه يوكف ويرجع يوكع وأمه تلحس بي
حلو زغيرون بس اني بعدني اخاف أقرب علي
هاي شلون ورطه
عبالي اخذ واحد يحبني يهتم بيه يطلعني
يحاول يسعدني على الاقل احسه فرحان بيه
هذا من كلهن ماكوووو
عقله مشغول بالحيوانات وبس
معليه اريد ارجع الاهلي اريد اعتذر منهم على كل يوم ضجت بي منهم
اني تورطت ياناس
#البارت__6
#قيود_امرأه
#البارت السادس
جمانه السعيدي
رويده....بقيت واكفه واباوع على العجل من بعيد
اخاف أقرب علي
مااعرف شسوي شنو يعني اراقبه شسوي
بقيت واكفه بمكاني
نعسانه وتعبانه عشتو عود عروس
منا لمن اجا اياد
مشتري نعجه وجايبها وجاي
رويده...همزين اجيت اني انعس وتعبت من عفتني لسه واكفه هنا
اياد...ليش واكفه
رويده...غير انت كلت راقبي العجل والصخله
اياد...اي مو توكفين هنا يعني كل شويه تعاي شوفيهن
وارجعي
رويده...رحمله الاهلك اني موكد هيج مسؤليه
اني مالي شغل بلحلال
اياد..ايباخ شنو عيوني جايبج اهفي على كذلتج
هاي عيشتنا وانتي مسؤله مثلي
تقبلين ما تقبلين انت مسؤله
يله روحي جهزي الغده
رويده....غده هسه الساعه عشره الصبح
اياد...اي اني حوعان شنو واذا بلعشره
يله روحي بين مااعلف الحيوانات
رويده....رجعت للمطبخ وبديت احضر بلاكل صدك جذب
هذا فخ مو عرس
شكد حاولت اغيره او اخلي يحس بيه
او يعاملني معامله حلوه بس بدون فايده
كنت مجبوره اتعلم على هاي الحياة
اقنع نفسي واكول اي ميخالف عيشتنا قابل هو جاي يلعب لازم اساعده
اني بعد ازوجت خلاص وهاي حياتي الجديده لازم اتعود عليها
كنت أواجه صعوبات هواي هاي الحياة مو حياتي
وكلشي مااعرف عنها
بس مضطره اسايره وامشي ويااا
تعلمت احلب الهايشه
واعلف الحيوانات واجمع البيض من جوه الدجاجه
وانضف المحصار كلما يتوصخ
وأصعب من ذني كلهن اني مااحس نفسي مزوجه
ماكو اي عاطفه بينا
كل الشغل والتعب يهون اذا اكو احد يهون عليه
اذا اسمع كلمه حلوه
اي كلمه حلوه ماكو لا مديح على شغل
ولا مديح على لبس ولا كلمة اعجاب
انسان عقله عباره عن حضيرة حيوانات كل النهار مشغول
بلحيوانات
اني مجرد أداة مساعده لا أكثر ولا اقل
حتى العلاقه الزوجيه بينا حسب مزاجه هوووو
ولمن يجي للعلاقة بدون نضافه
واذا أرفض واطالبه يكون نضيف
يتعارك مايقبل
اياد...شنو اني قابل وصخ هو احنا عايشين وسط الحيوانات اكيد اتصير ريحه
لا تتبطرين على النعمه
جمانه السعيدي
رويده...اي نعمه اي نعمه الي انت تحجي عنها
لا كلمه حلوه ولا اسلوب ولا نضافه لامصرف
ترا مايصير هيج
اياد...لا ولله انتي ليش هيج شايله خشمج
اني تعبان طول النهار علمود منو غير علمودج
وبعدين اي مصرف تحجين عنه تاكلين تشربين
تنامين شنو محتاجه
شسوين بلفلوس
رويده...تشتغل علمودي اني مو سعيده افهم اني مو سعيده
انت لامهتم بيه ولا بمشاعري
اهم شي عندك الهايشه والصخله تروح تحضنهن
وتجي تريد تحضني
ترا اني بشر مو حيوان
اياد...واذا حضنتهن افهمي ذني الخير والبركه
رويده....خلاص خليك وياهن وابعد عني
لا تقرب عليه
اياد...انت شنو حاسبه نفسج ترا انتي زوجتي ولي حق عليج
رويده...تاخذ حقك لمن تنطيني حقي من المشاعر
من الحب من ازوجنا لليوم وانتي ماكلت كلمة احبج
ولا جبرت خاطري بكلمه حلوه
تعاملني حالي حال الحيوانات يمكن تهتم بيهن اكثر مني
جمانه السعيدي
زعل ودار وجها واني هم درت وجهي عنه
هاي كانت أول عركه قويه بينا بعد ست اشهر زواج
بقه اربع ايام مايحجي وياي
بس اكيد يئمرني على الشغل بلبيت
ولله طكت روحي مايصير هيج
من رحت الاهلي اشوفهم امي حست اني ضايجه
امي...شبيج
رويده....ابد مو سعيده اتوقعت بس ازوج واعيش
بيت وحدي راح اكون اسعد وحده بهاي الدنيا
امي...شكوووبيتج وحدج لا عمتج تتعارك وياج ولا عندج حموات ولا حموين
رويده ...يمه مو بشر طبيعي عقله وحياته كله بس حيوانات لا طلعه ولا سفره ولا كلمه حلوه أطيب خاطري
كل وقته مو الي
المن اني ازوجت
امي....احمدي ربج عقله بلحيوانات ولا وياا النسوان
شتردين منه اكلي اشربي ونامي
وغلبي بلسانج الحلو
يايمه هم الزلم كلهم هيج انتي عبالج مثل المسلسلات
يكابلج ويكعد يكول احبج
الدنيا صعبه والعيشة غاليه
مزين يشتغل ومعيشج
رويده...اي عيشه يمه اللكمه الي تدخل حلكي محسوبه عليه
الاكل يقدره بمقدار
اكلنا كله بقوليات مايقبل يشتري شغلات طبخ زينه
واللحم يدخل بيتنا مرتين بلاسبوع
حتى بيضات الدجاجه بلثلاجه يحسبهن
واذاجاب مسواك يحدد كم يوم لازم يبقى
اني مايهمني كل هذا نزلت المستوى وقبلت وكمت اشتغل وياا بلحلال
بس اريد كلمه حلوه
اريده بليل ياخذني بحظنه ويحسسني بلامان
اريده يشتاقلي
مايصير هيج عبالك مكينه مال شغل ترا الحياة موهيج
ابد
امي...اكعدي بيتج واسكتي من يوم ازوجتي لليوم واحنا حياتنا حجيم
اميره لاعبه بينا لعب واخوج مايكدر يفتح حلكه كدامها
مشاكل طول النهار
البارحه ابوج اتعارك وياا مرتضى كاله اخذ مرتك واطلع
مايقبل يطلع من البيت يكول منيين ادفع ايجار
بيعو البيت وانطوني حصتي واني اطلع
كفيلج الله لعبت بينا لعب
لا شغل ولاوعمل وبس تاخذ كلام وجيب كلام
ابوج يريد يكطع البيت ملينه من المشاكل والطلايب
يمه اكعدي بيتج واسكتي
عوفي شغلة الحب هاي ما توكل خبز
احنا بيتنا بعد ماينسكن لا اضيعين حياتج
ديري بالج تفكرين ترجعين هنا
تتندمين بكد شعر راسج
رويده...رجعت الطريق كله ابجي ووين انطي وجهي
منو الي راح يفهمني
كل اهلي والناس الي حواليه وزوجي مو فاهميني
عدهم الحياة اكل ونوم
اني مااريد اعيش مثل الحيوانات اكل وانام
اريد احد يعوضني عن الحب والحنان الي فقدته
اكو نقص بنفسي محد حاس بي
شكد حاولت اغير بشخصية اياد بس بدون فايده
عقله محجر
ماعنده اي احساس
بعدين عرفت اني حامل فرحت اخيرا راح يجي شي لحياتي يغيرها شويه
بلكت هذا الطفل يعوضني
بلكت اياد من يصير عند طفل يحس بيه
بلكت تتحرك عاطفته شويه
ايام الوحم اتنسيت على تين
كل يوم اكله ومايجيب واني كلبي طاير على التين
بعدين كعدت وكمت ابجي
دخل وشافني ابجي
اياد..ليش تبجين
رويده...اريد تين بعد مااكدر مجاي اكدر اسيطر
على نفسي
اياد...غالي التين الكيلو ٣٠٠٠
رويده...قابل انت كل بوم اجيب بس هلمره
اياد..راح اجيب نص كيلو
ترا بس هلمره مو نكولين بعد جيب
على هذا اهماله اليه وعدم احساسه بلمسؤليه
حلفت بعد لا احبل ولا اجيب
هاي اول واخر مره
هو اني شمحصله منه اله اجيب اطفال تتعذب وياااا
اذا صارو عدنا هواي اطفال يمكن بكتلهم الجوووع
خل استر على نفسي
بس هذا الطفل وكافي
طول فترة الحمل مايقبل اراجع عند الدكتوره
ياخذني للمستشفى لان المراجعه مجاني
واي علاج تكتبه الدكتوره من برا مايقبل يجيبه
دائما يكول قبل شلون النسوان تحبل وجيب
هسه شنو الي تغير
اذا قاسمه الله يصير لا تتعايرين
يصير وحده
كرهني حتى بلحمل رغم الحمل الاول لازم الاب يكون سعيد بي وفرحان
بس هو ابد ماحسسني فرحان بهذا الطفل
كلش عادي عنده الموضوع
#البارت__7
#قيود_امرأه
#البارت السابع
جمانه السعيدي
رويده.... كملت اشهر الحمل ربي ستر عليه
بيوم الولاده اخذني للمستشفى وراح جاب امي وبعدين اختفى
دورنا كل المستشفى وماكووو
انهزم خاف يدفع فلوس المستشفى
أحقر شغله سواها خلاني بنص هدومي
صحيح الولاده مجاني بلمستشفى بس لازم إكراميه
للستر واكو باص لازم يسجلون الطفل
والأهم من ذني كلهن الدعم النفسي
يعني اني جاي اطلك وصلت للموت حتى ماهون عليه
الي قهرني الهايشه من جانت حامل اهتم بيها اكثر مني
ياربي حتى الهايشه احسن مني
هسه بخيل بلفلوس ميخالف ليش بخيل بلمشاعر
ترا المشاعر مجاني بدون فلوس
معقوله ماصارت بعينه العشره
خادمته كل النهار واساعده بشغله يعوفني وحدي وينهزم
بعد الولاده امي ماقبلت اروح وياها للبيت
تكول مااكدر اداريج وتخاف من المشاكل
لان اميره لحد الان ماصار عدها طفل تخاف تصير مشكله بسببي
اصلا بيتهم هليام كله مشاكل اميره ملعبتهم تلعب
حيل بيهم هاي حوبتي
جنت خادمتهم ويتبطرون عليه
خوش وكعو بوحده وارتهم نجوم الضهر
جمانه السعيدي
اني وين اروح ووين انطي وجهي ياناس ياعالم
مايصير هيج اريد احد يهتم بيه يحسسني بقيمتي
شنو اني ليش محد يحبني شنو ناقصني
ترا اني بشر حالي حالكم
رجعت البيتي لكيت اياد بلبيت
رويده...الحمد الله على السلامة انشاء الله كلشي تمام
خوما محتاج شي
اياد...شبيج ليش هيج تحجين
رويده...بله مااستحيت وانت عايفني بلمستشفى وحدي
جان بقيت حتى تطمن عليه
هذا الطفل الاول شلون تعوفني وتروح
تخاف على فلوسك لا تخاف مااخذو منا مليار
هنا كم فلس امي دفعتهن
اياد...شنو شبيج بيتنا بقه فارغ ورجعت علمود الحلال
رويده.. حقك الحلال اهم مني ومن بنتك
اياد...بنيه جبتي بنيه
رويده.. اي وشبيها البنيه عمت عيني عليها طلعت للدنيا
وانت ابوها
امي. اسكتي عيب
اياد...لا ليش تسكت اله اكسر راسها تكسير يله تسكت
السانها شطوله
فوكاها جايبتلي بنيه
رويده...انت الي ماراضي على البنيه لا ولله هي الي حظها اغبر طلعت للدنيا عدها اب مثلك
جمانه السعيدي
اياد...ليش ما تنجبين وتسكتين
رويده...سمعتي يمه خاف احجي ما تصدكيني
امي.. اسكتي
رويده ..... ليش اسكت هاي الحمد لله على السلامه
شمحتاجه حبيبتي
همزين رجعتي للبيت
البيت نور بوجودج تعاي نختار اسم للبنيه
اياد... محسستني جايبتلي عشر ولد اني مااحب البنات
رويده... انت احمد ربك على هاي تصرفاتك ورب العالمين رزقك بنيه انت الي مثلك كون مايصير عدهم اطفال
بخيل بلفلوس وبلمشاعر
على شنو عايش مااعرف
اياد...اهو اطلع احسلي بعد ما تسكت ابد
عافني وطلع ياربي شكد مقهوره منه ماكو هيج بشر ابد
بليلتها امي بقت يمي وابوي اجا شافني شويه وراح
امي ثاني يوم من الصبح رجعت البيتها
وبقيت وحدي
حتى امي تريد بس تشرد
ولا كأنما اني توني جايبه ومحتاجتها وياي
حتى اختي رابع يوم اجتني كعدت شويه وراحت بعدما شفتها كلمن ملتهي بضيمه
ومحد فارغ يفكر بيه لو بوضعي
همزين صارت عندي بنيه على الاقل تحس بيه شويه
من يوم ولدت بنتي اياد اخذ فراشه وراح نام بلهول
يكول شنو تبجي مااكدر انام منها
ديله روح الله وياك على اساس هسه انت مشرمه
هو انت وجودك مثل عدم وجودك
شكد جانت العلاقه بينا فاتره صارت فاتره اكثر
ابد ماله شغل بيه
وهاي المسكينه حتى مادنك عليها باسها
ادري ليش يكرها قابل عنده عشر بنات
الطفل الاول يصير عزيز بس هو يدخل ويطلع ماله شغل بيها
مخبوص طول النهار بلصخول والطليان
واني وبنتي ماكو ربع هذا الاهتمام
المهم اني ماعندي مكان اروحله امي سدت كل الأبواب بوجهي ماخلت منفذ اتنفس منه
ماتقبل اروح عليهم حتى زياره تكول لا تجين من تشوفج اميره تسوي مشكله
بقينا بس اني وبنتي
ماعندي غيرها اشكيلها همي
مرت الايام وكبرت بنتي صار عمرها ٣ سنوات
بهاي الفتره كلش انتشر النت بلعراق
بس اني لا عندي تليفون ولا عندي نت
صادقت جيرانه ام حيدر مره كلش حبابه واخلاق اكبر مني بعشر سنوات
عدها ٣ اطفال
من نحجي اني وياها من الحايط دائما تحجيلي على الفيس والنت
طبعا نحجي من يطلع اياد لان ممنوع احجي وياا الجوارين
شلون اول مره تعرفت عليها وحجينا اني وياها
طفت الكهرباء وزهوره بنتي كامت تبجي هي سمعته من الحايط
ام حيدر....ليش تبجي بتج
رويده...طفت الكهرباء وتبجي
ام حيدر...راح ادزلج مروحه شحن خطيه تبجي من الحر
شويه ودزلتي مروحه شحن بيد ابنها
شغلتها ونامت زهراء راسا
من هاي اللحظه صار بينا تعارف
المهم...كلما نحجي تكول انتي بس جيبي تليفون
واني انطيج رمز الشبكه بس يصير عندج نت
تنسين امج وابوج لج عيني عالم ثاني
حتى نفسيتج تتغير
اني ابد ماجنت اهتم شنو نت شسوي بي
مافهمت الشغله شنو
بعد تعرفي عليها تقريبا بسنه صار عمر بتي اربع سنوات
المحافظ صدر قرار منع تربية المواشي داخل البيوت
لان تسبب أمراض وانتشار روائح كريهه
واكو كم مرض انتشر بوقته وكالو بسب الحيوانات
جنون البقر وفلاونزا الخنازير
هنا اياد كام يلطم شلون بيه ووين اروح حلالي كدام عيني ووين اخلي وشلون اكدر احرسه
اني كنت متشمته بي أي حيل بي
مو بيت عايشين احنا والحيوانات سوا البيت ريحته
تكتل كل الوكت
وهو لا احساس ولا مشاعر
ماقبل يطلع الحلال كان منتضر بلكت المحافظ يسكت
والحلال يبقى بلبيت
انتضر لمن كلش طلعت لجنه ادور بلبيوت
الي يلكون بيته حلال يغرمونه فلوس
يله قرر ينقل كل الحلال خارج البيت
طلعت عنده قطعة ارض ورا الشارع العام مشتريه
ورا زواجنا واني مااعرف بيها
بنى بيها محصار ونقل كل الحلال من البيت
ما تتخيلون فرحتي شكبرها
خلصت من الريحه وخدمة الحيوانات
للحكايه بقيه تفاعل حلو مثلكم
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇