رواية أجبرني أعشقه الحلقة 29 - قبل الاخيرة
الحلقة 30 - الاخيرة بقلم الكاتبه همس حسن حصريه وجديده على مدونة أفكارنا
 |
رواية أجبرني أعشقه الحلقة 29 - قبل الاخيرة
الحلقة 30 - الاخيرة بقلم الكاتبه همس حسن حصريه وجديده على مدونة أفكارنا
🔴🔴🔴🔴🔴🔴🔴🔴🔴🔴🔴🔴🔵
لدم يسيل من بطن محمد .. وشه بيحمر وبيزرق من الوجع وصدمة الطعنة
.
الصمت بيسيطر على كل العيلة في حالة ذهول تامة
روان باصالهم وعينيها مدمعة وسهيلة بتلطم على وشها ، ثرية بتقعد ع الكرسي من الصدمة
ثرية بصوت واطي وصدمة : يانهار اسود ، يانهار اسود ، يانهار اسود
آدم تليفونه وقع من ايده من الصدمة
مليكة بدأت تفوق ودموعها تنزل وهي باصة في عين محمد ومازالت غارزة السكينة في بطنه ...
*كل دا حصل في أقل من ثانيتين*
جري آدم زق مليكة بعيد .. شد السكينة من بطن محمد ، مسحها كويس في قميصه من البصمات وبيتلفت عشان يرميها ع السفرة
محمد وقع عالارض ساح في دمه .. مليكة قعدت في الأرض مكانها ، باصة قدامها عينيها نازلة حنفيات دموع وايديها الاتنين غرقانين دم
آدم بيشيل محمد : تعالى معايا يااسلام
إبراهيم : وانا جاي معاك ياادم
آدم شال محمد وخارج يجري بيه على برا
آدم : لااااا ياابراهيم خليك هنا خلي بالك منهم اوعي تخلي حد فيهم يخرج من باب الشقة وخد بالك من نشوى ومعاذ ، وانتي ياسهيلة خدي بالك من مليكة
يلا يااسلااااام
خرج آدم يجري بمحمد على برا ووراه إسلام .. ثرية مصدومة وساكتة تماماً روان قامت وقفت قدام مليكة وقعدت تعيط جاااامد وتلطم على وشها
روان : قتلتيييييييه يامليكة 😱😱 قتلتيه ووديتي نفسك في داهيييييية
عشان مييييييين 😱 عشان مين وعشان ايه تعملي في نفسك كدا حرام عليكييييييي
نزلت قعدت في الأرض قدامها وكملت لطم : حرام عليكي ليه تعملي فينا كلنا كدااااا دا انا نايمة صاحية بفكر ازاي اصالحك وتسامحيني تقومي تعملي حاجة تخليكي تضيعي مني خااااالص ليييييييييييه ، ليه حرام عليكي دا انا مليش غيرك ياشيييييخة
ميستاهلش تودي نفسك في داهية اقسم بالله مايستااااااهل
حطت دماغها على الأرض في وضع السجود وهي مفحومة عياط
مليكة مبتردش و بتعيط اكتر وهي باصة للدم اللي على ايديها الاتنين ... قام إبراهيم بسرعة مسك روان قومها بالعافية
إبراهيم ماسكها من كتافها الاتنين : اهددددي ياروان اهدي ياماما
روان بتعيط وبتقع ع الأرض مش قادرة تصلب طولها : كل حاجة بتضيع مننا ياابراهيم ، كل حاجة بتتدمر
لحقها بسرعة وهي بتقع وشالها .. طلع بيها على اوضتها بسرعة عشان يبعدها عن الجو دا
مليكة مازالت قاعدة على نفس الوضع وباصة لايديها
سهيلة قامت بسرعة قعدت جنب مليكة وخادتها في حضنها
سهيلة : اهدي ياحبيبتي ، أهدي بإذن الله مش هيحصله حاجة
مليكة في حضنها باصة قدامها ومازالت مصدومة ، مش مصدقة إنها حاولت تقتل بني آدم بجد ، والبني آدم دا يبقى ابوها
زقت سهيلة وقامت وقفت وراحت ناحية السلم .. بدأت تطلع درجة درجة بهدوء باتجاه اوضتها
❤️🔥❤️🔥❤️🔥❤️🔥❤️🔥❤️🔥❤️🔥
*في المخزن *
نشوى بتبدأ تفوق .. فتحت عينيها لقت نفسها مربطة من كل إتجاه في كرسي
اتعصبت وبصت حواليها تشوف هي فين
نشوى بعلو صوتها : انتووووو ياللي هنااااا
حد ييجي يفكني أحسن مااوديكو في ستيييييين داهية ياولاد الكلب
قعدت تزعق بأعلى حسها ومحدش سامعها ..
بقلم همس حسن 🖋️
💛🤍💛🤍💛🤍💛🤍💛🤍💛🤍💛🤍
*في المستشفي*
آدم شايل محمد داخل يجري بيه على الإستقبال يلحقوه قبل ما يموت .. اخدوه منه
الدكتور بدأ يكشف عليه وآدم وإسلام واقفين باصين عليه بخوف فظيع
الممرضة : لا ياجماعة بعد اذنكم اخرجو ولما الدكتور يخلص هيطمنكم عليه
الدكتور ماسك ايد محمد بيشوف النبض
آدم : مش هينفع نخرج إلا مانتطمن عليه
الدكتور : بعد اذنك يااستااااذ اللي معاك في حالة حرجة جداااااا ومحتاج يتنقل العمليات حالا
بيبص للممرضة : جهزوا العمليات فوراً وانا هجهز نفسي وادخلكم .. بسرررعة
آدم وإسلام خرجوا على برا مخضوضين وخايفين جداااااا يموت بجد .. آدم بيسند دماغه ع الحيطة
إسلام بيطبطب عليه : متخافش ياصاحبي ، ربنا معاه أهم مننا كلنا
آدم : انا مش خايف عليه هو يااسلام ما يغور في ستين داهية ، انا الحاجة الوحيدة اللي خايف عليها مليكة
الراجل دا لو حصله حاجة انا مش هسمح إن مليكة تقعد يوم وااااحد بس في السجن عشان واحد زي دا يااسلام .. على جثتي اقسم بالله
إسلام : متقلقش ياادم مش هيحصله بإذن الله
❤️🔥❤️🔥❤️🔥❤️🔥❤️🔥❤️🔥❤️🔥
إبراهيم شايل روان وداخل بيها اوضتها ، نيمها على السرير وقعد جنبها
اتعدلت روان وقعدت تكمل عياط وشحتفة
إبراهيم : اهدي ياروان ، اهدي أبوس ايدك متوجعيش قلبي عليكي .. كله خير بإذن الله
روان : خير ايه اللي بتتكلم عنه ياابراهيم ؟ وهييجي منين الخير .. انا مش فاهمة ايه اللي بيحصل للبيت دا
كأن حد عاملنا عمل لا نرتاح ولا بالنا يهدى يوم واحد ، انا تعبت ياابراهيم تعبت اقسم بالله
كان عندي إستعداد أشوف او أحضر اااااي حاجة في الدنيا .. بس إني أشوف أختي ماسكة سكينة وبتدبها في بطن أبويا وبتودي نفسها في داهية !!!!! دا اللي صعب بجد
قلبي هيقف من كتر الحزن اقسم بالله ، يارب خدني وريحني من اللي انا فيه دا يااارب
إبراهيم باصصلها وعينه مدمعة من الزعل عليها
إبراهيم : غلط ياروان .. تصرفك دا غلط
انا حاسس بيكي بوجعك كويس اوي بس في نفس الوقت خايف على مصلحتك .. دلوقتي أحسن ما تنهاري وتعملي كل دا انتي أولى واحدة تقف جنب العيلة كلها •• وبالذات أختك
أختك شالت كتييييير واستحملت كتير في حياتها وهو دا اللي وصلها للمرحلة المؤسفة اللي هي فيها دلوقتي دي ، وأبسط حقوقها عليكي تقفي جنبها بقا
روان بعياط : اقف جنبها ازاي وهي مش قادرة تسامحني ياابراهيم ، أقف جنبها ازاي وانا حتى مش قادرة أفهم هي ازاي اتحولت بقت كدا .. مليكة أختي الملاك البريء اللي كانت بتكتئب بالايام لو شافت فراشة بتموت قدامها ييجي اليوم اللي تحاول تقتل فيه بني آدم ؟؟؟؟
إبراهيم : غصب عنها ياروان ، كل دا مش بمزاجها
أختك عندها مرض نفسي صعب بقاله فترة ، المرض دا بيخليها تتعامل بشراسة مع اي حد يحاول يهاجمها أو يأذيها .. ودا كمان جالها بسبب الضغط اللي عاشته
روان بتبرق : انت بتتكلم بجد ياابراهيم ؟؟؟
إبراهيم : اه بتكلم بجد .. هقوم انا وانتي دلوقتي نروحلها وهتحاولي تهديها وتكوني جنبها
بس قبل كل دا انا عايز منك وعد
روان : ايه ؟؟
إبراهيم : مش عايزك تدعي على نفسك تاني أيا كان الموقف او الوضع اللي احنا فيه
هعديهالك المرة دي بس بعد كدا قبل ما تنطقي حاجة زي دي فكري في نفسك ، فكري في ياسين إبنك .... فكري فيا
روان بتبصله باستغراب !
روان : حاضر .. يلا نروح نشوف مليكة
نزلوا من الأوضة راحوا على أوضة مليكة .. روان بتفتح الباب وداخلة
ملقتش مليكة اوضتها
روان : ايه دا هي راحت فين ؟!!!!
إبراهيم : راحت فين ايه ماكانت لسة طالعة هنا .. تعالي ننزل نشوفها تحت بسرعة
نازلين هما الاتنين يجروا ع السلم عشان يدوروا عليها .. وبما إن روان فيه إعاقة في رجلها اتكبلعت وكانت هتقع
لف ابراهيم وشه ومسكها من وسطها بسرعة عشان يلحقها ... رفعت روان عينيها بصتله بكسوف وخجل فظيع ، عدلها وشال ايده بسرعة
إبراهيم بكسوف : خدي بالك من نفسك ياروان
روان : حاضر انزل بسرعة بس
روان داخلة عليهم : محدش شاف مليكة ياجماعة ؟؟؟؟
ثرية بترفع عينيها وبتبصلها بسكوت من غير ماتنطق ولا كلمة .. وكأنها فقدت الأمل في الكلام
أمينة : راحت فييييييين تاني يابنتي 😱😱😱😱
إبراهيم بينده ع الشغالة : احلاااااام .. دوري على مليكة بسرعة
❤️🔥❤️🔥❤️🔥❤️🔥❤️🔥❤️🔥❤️🔥
*في المستشفي *
العملية خلصت .. خرج الدكتور من أوضة العمليات
آدم : ها يادكتور ايه الأخبار ؟؟
الدكتور : مكدبش عليكم حالته صعبة جدااا .. النزيف مبيقفش والطعنة أصابت جزء حساس جداً في الأمعاء والقولون ، ربنا يسترها
سابهم الدكتور ومشي ، مسح آدم وشه من القلق والخوف
الظابط جاي من بعيد ...
الظابط : أستاذ آدم الخشاب ؟؟
آدم : أيوة انا
الظابط : انت تبع محمد الخشاب اللي زمانه في الإفاقة مظبوط ؟
آدم : مظبوط يافندم ، خير ؟؟
الظابط : طيب تعالوا نقعد في اي غرفة كدا عشان عاوزينكم في كلمتين
آدم بقلق : تمام
دخلوا مع الظابط الغرفة وقعدوا كلهم
الظابط : انا عاوزك تحكيلي بقا ياادم اللي حصل دا حصل ازاي بالظبط
آدم : طيب دلوقتي انا عمي لسة في العمليات مفاقش حتى ، ادونا فرصة يفوق ونتطمن عليه وبعدين نتكلم في اي حاجة
الظابط : عمك الله اعلم هيفوق امتى ، ودا لو فاق اصلا .. واللي حصل دا بنسبة ٩٠٪ شروع في قتل
وعشان كدا لازم اخد منك كلمة صريحة وموجهة لحد مااوصل لبقيت العيلة
مين طعن "محمد الخشّاب" عمك
آدم بيفكر لثواني ..
الظابط : آدم انا بسألك سؤال سهل جداً وصريح .. رد من غير تفكير بعد إذنك
آدم : انا ياباشا
إسلام بيبصله وبيبرق
الظابط : انت اللي حاولت تقتل عمك ؟؟؟؟
آدم : أيوة انا اللي حاولت اقتل عمي
الظابط : اول مرة من ساعة ما بدأت في الشغلانة دي أشوف حد بيعترف على نفسه بالسرعة والسهولة دي ، خصوصاً لما تكون جريمة قتل
آدم : متعودتش أهرب من حاجة عملتها
الظابط : امممم .. وايه تبريرك للي حصل ؟؟
آدم : الحقيقة هو مش تبرير ، هو سبب
محمد الخشّاب أذى بناته الاتنين شر اذية .. من وقت ما كان عمرهم ٦ و٧ سنين
لحد ما كبروا وبقوا أمهات .. وجاي دلوقتي وعايز يكمل في اذيتهم ، ومن سوء حظه إن مراتي تبقى واحدة فيهم واللي هي مليكة
وانا اكيد مش هقبل إن حد يأذي مراتي
مليكة داخلة من الباب : ولما يكون هو أذى مراتك وراجع تاني يأذيها ، يبقى سبب أدعى إن انت اللي تقتله .. ولا صاحبة الشأن ؟؟؟
آدم بيتلفت بيبصلها وبيبرق
الظابط : مين حضرتك ؟؟؟؟
مليكة : انا مليكة محمد الخشّاب .. بنت المجني عليه
وجاية برجلي لحد هنا عشان اعترف بنفسي وبمنتهى الفخر .. انا اللي حاولت اقتله
ولو اتعاد بيا الزمن بدل المرة ألف هحاول اقتله تاني وتالت ورابع
الظابط : لا مانتو متحيرونيش معاكو بقا !!!!
آدم بيقوم يقف : اللي بتقوليه دا كدب يامليكة .. انا اللي حاولت اقتله ياباشا متسمعش منها دي بتقول اي كلام
الظابط : طيب انا في الحالة دي هلجأ لطرف تالت مساعد
بيبص لإسلام : انت كنت حاضر وقت الحادثة ؟؟
إسلام : اه يافندم كنت حاضر
الظابط : مين فيهم اللي ضرب محمد بالسكينة ؟
إسلام بيبص لآدم ، آدم بيبرق وبيغمزله .. رجع إسلام بص للظابط
إسلام : آدم معملش حاجة ياباشا
آدم بغضب : انت كدااااااب
الظابط : بعد اذننننك ياادم متدخلش في شغلي
ممكن تشرحلي اللي حصل بالظبط يااسلام
إسلام : معلش ياباشا اعفيني انا من الموضوع دا .. العيلة كلها كانت موجودة وتقدروا تحققوا معاهم هما ، لكن انا مش هبدي بشهادتي على أي وضع
كل اللي أقدر اقوله إن آدم برئ
مليكة : انا اللي عملتها ياباشا .. ولو جيبت سلاح الجريمة من البيت هتلاقي بصماتي عليه
الظابط : طيب .. من هنا لحد ما المجني عليه يفوق احنا هنستضيفك معانا شوية يامليكة
مليكة بتبص في الأرض .. آدم بيبصلها وبيبرق
آدم : تستضيفوا ميييييين .. على جثتي إن دا يحصل
مليكة : اهدي اااايه وزفت ايه مش هسيبك تروحي معاهم انا
الظابط : اللي بتعمله دا غلط ياادم
مليكة : طب بص يافندم .. انا كدا كدا جاية معاكم بس هستأذنكم خمس دقايق هتكلم معاه على إنفراد واخرجلكم
بعد اذنك 🙏
الظابط : تمام .. تعالوا ياجماعة نستناهم برا على ما يخلصوا كلام
خرج الظابط والأمين اللي معاه وإسلام .. اتفضل في الأوضة مليكة وآدم
آدم : انتي ليه بتعملي فيا كدا يامليكة ؟؟
كأنك مصممة تكسري قلبي وتحرقيه حي طب ليييه ،اذيتك امتى ولا اذيتك ازاي عشان تعملي فيا كل دا
مليكة : وانا عملت فيك ايه ياادم ؟؟
آدم : عملتي ايه ؟ لا عملتي كتير
في الأول تتلاشي وجودي رغم إنك كنتي عارفة إني بحبك ويهمني أمرك ومن ساعة مااتولدتي على ايدي وانا بحلم من جوايا إنك تكوني ليا ومع ذلك تكدبي عليا وتفهميني إنك اسوء واحدة في الدنيا عشان سبب كان ممكن بسهوووولة تحليه وميبقاش ليه وجود ، تضيعي مني سنتين كاملين بتقطع كل يوم وكل لحظة بفتكر فيها إن البني آدمة اللي حبيتها بجد تطلع بالشكل دا .. ولما بعد كل المدة دي أكتشف إنك بريئة واحاول أصلح غلطتي بأي شكل واعوضك واعوض نفسي عن كل حاجة شوفناها تحاولي تقتلي ابوكي وتودي نفسك في داهية ، وقولنا ماشي يمكن عملتي كدا غصب عنك عشان المرض اللي عندك
بس إنك تيجي النهاردة برجلييييكي لحد هنا عشان تعترفي على نفسك وبردووو تضيعي مني وتضيعيني وتضيعي اللي في بطنك اللي لسة مجاش الدنيا واللي ملوش ذنب في اي حاجة يبقى انتي قاااصدة تأذيني وتدمريني يامليكة
مليكة بتمسك ايديه : صدقني ياادم انا آخر واحدة في الدنيا ممكن تتمنى اذيتك .. انت لو تعرف اللي جوايا ليك عمرك ما هتقول الكلام دا بس صدقني دي النتيجة المنطقية لكل اللي حصل السنين اللي فاتت ، بغض النظر عن مرضي اللي دفعني امسك السكينة وادبها في بطنه كان دا هيحصل هيحصل بأاااي شكل .. لما واحد يسمع كلام أخته اللي عايزة تدمره هو وعيلته كلها ويكسر مراته ويخونها ويسيبها هي بناته الاتنين في الدنيا لوحدهم سنييييييين من غير ما يسأل عايشين ميتين جعانين شباعنين محبوسين أو أحرار ويرجع بعد كل السنين دي عايز يدمر اللي فاضل في العيلة يبقى لازم تكوني نهايته القتل .. وصدقني انا عمري ما في حياتي ماحسيت بالفخر قد دلوقتي
ومفيش داعي للهرب ياادم .. أمر الله نافذ نافذ مهما هربنا منه ، انا هروح مع الظابط دلوقتي وانا متأكدة إن لو ربنا مش رايدلي الاذية والظلم عمر ما حد هيقدر يأذيني
آدم : وانا قولتلك مش هسيبك تروحي معاه يامليكة
مليكة : ولو قولتلك وحياتي ؟؟
آدم : حياتك هههه
حياتك اللي واقفة دلوقتي تقنعيني اسيبك تتخلي عنها ؟؟؟
مليكة : عمري ماهتخلي عن حياتي وانت فيها ياادم ، دا غير إني واثقة ومتأكدة إنك مش هتسيبني
انا عارفة إنك مش مقتنع بكلامي بس فكر بطريقة منطقية شوية .. تدخل انت السجن بدالي ويومين ويكتشفوا إن انا اللي عملتها تخرج وادخل مكانك أكمل حياتي جوا ، ولا تخليك انت برا تدور على دلائل تطلعني من اللي انا فيه واخرجلك بالسلامة ؟
آدم عينه بتدمع وبيمسح وشه : لا إله إلا الله
لا اله الا الله .. لا إله إلا الله
مش قادر أتخيل إن ييجي عليا اليوم اللي مقدرش احميكي فيه !!!
مليكة بتعيط وبتبصله : ياما حميتني ياادم ووقفت في ضهري .. ياما كسرت عضم أي حد يحاول يقربلي او يدايقني وياما خرجتني من مصايب سوداااا بعلمي وبدون علمي كمان
والمرة دي بردو هتقدر تخرجني من اللي انا فيه بس ارجوك حط عواطفك على جنب لأيام بس
بتحط ايديه على بطنها : لو مش عشاني يبقى عشان اللي في بطني ..حتة اللحمة الحمرا المشتركة بيني وبينك واللي مستنية تيجي الدنيا تلاقينا اقويا وواقفين على رجلينا
آدم بيرفع عينه وهي مليانة دموع وبيبص لمليكة : هتوحشيني يامليكة .. هتوحشيني اقسم بالله
حضنها جامد اوي وهما الاتنين بيعيطوا .. لا هي عارفة هترجعله تاني ولا لا ، ولا هو عارف هيقدر مصير اللي هي رايحاله هيكون ايه
بعدها ومسك وشها بايديه الاتنين : انا هسيبك تروحي معاهم دلوقتي .. بس وعهد الله
وحياتك عندي ووحياة ابننا اللي لسة مجاش للدنيا ما هسيبك تشيلي الليلة دي كلها لوحدك .. مش هغمض عيني ولا هنام ليلة واااااحدة بس غير وانتي نايمة في حضني يامليكة
بيبوس دماغها ودموعه نازلة : خدي بالك من نفسك .. لو مش عشانك عشاني انا
مليكة بتعيط : حاضر ياادم .. لا إله إلا الله
آدم : سيدنا محمد رسول الله
بتشد ايديها من ايده عشان تخرج .. قافش في ايديها وقلبه بيتقطع حتت مش قادر يسيب ايديها
شدت ايديها بالعافية وخرجت على برا
مليكة : انا جاهزة ياباشا
آدم : هو انا ممكن اجي وراكم بالعربية ؟؟
الظابط : مفيش مشكلة
آدم : خليك انت هنا يااسلام تابع أخبار محمد وخليك معايا عالتليفون وانا هروح معاهم
وبالنسبة للي عملته جوا حسابه معايا بعدين
خرج جري ركب العربية وراح وراهم
وهو في العربية اتصل بداليدا
داليدا : أيوة ياادم
آدم : تعاليلي بسرعة ع القسم ياداليدا
داليدا : قسم ؟؟؟ قسم ايه ياادم متخصنيش !!!
آدم : تعالي ع القسم بسرررررررعة وهفهمك كل حاجة هناك ياداليدا
داليدا : ماشي اقفل اقفل يلا
❤️🔥❤️🔥❤️🔥❤️🔥❤️🔥❤️🔥❤️🔥
*في القصر *
*في أوضة المسجد*
رفعت قاعد على ركبه ورافع ايده لفوق 🤲
اللهم إني أعوذ بك من جهد البلاء ودرك الشقاء وسوء القضاء وشماتة الأعداء .. اللهم إني أعوذ بك من زوال نعمتك وتحول عافيتك وفجاءة نقمتك ، وجميع سخطك
ياالله ياولي الصابرين .. ياالله ياولي الصابرين
ياالللللللله ياولي الصابرييييين
🔥🔥🔥🔥🔥🔥🔥🔥🔥🔥🔥🔥🔥🔥
*في الريسبشن *
أمينة قاعدة جنب ثرية بتطبطب عليها .. سهيلة خدت تليفونها وطلعت على اوضتها
قفلت الباب واتصلت بإسلام
إسلام : أيوة ياسهيلة
سهيلة : ايه يااسلام ايه الاخبار
إسلام : خرج من العمليات من شوية صغيرين ودخلوه العناية المركزة .. حالته صعبة جداً وربنا يسترها
سهيلة : لا إله إلا الله .. طب مليكة عاملة ايه دلوقتي؟
إسلام : فيه حد جنبك ؟؟؟
سهيلة : لا مفيش حد انا في الاوضة لوحدي
إسلام : طيب هقولك على حاجة بس امسكي أعصابك واوووووعي حد يعرف
اووووعي ياسهيلة
سهيلة : حاضر مش هقول لحد بس قول متوقعش قلبي
إسلام : قبضوا على مليكة
سهيلة بتبرق : اااااااايه
عينيها بتدمع : انت بتقول ايه يااسلام
إسلام : بقولك اللي حصل ياسهيلة .. جت لحد هنا واعترفت على نفسها وسألوني وانا مأنكرتش
سهيلة : مأنكرتش ازاااااااي وليه .. ماكنت تقول لا ولا تقول معرررررفش
إسلام : اقول لا واقول معرفش عشان آدم اخوكي يشيلها هو ؟!!!!
سهيلة : يعني ايه مش فاهمة
إسلام : وقت ما مليكة جت تعترف على نفسها كان آدم بيعترف بدالها ياسهيلة
سهيلة بتعيط : انا مش عارفة اخرة اللي احنا فيه دا ايه بس ياربي انا تعبت اقسم بالله
اقفل يااسلام .. اقفل ثواني
🔥🔥🔥🔥🔥🔥🔥🔥🔥🔥🔥🔥🔥🔥
*في القسم *
مليكة في أوضة التحقيق
الظابط : ها يامليكة .. لسة عند كلامك
انتي المسؤولة عن اللي حصل لأبوكي وعن قصد ؟
مليكة : انا المسؤولة اه .. عن قصد ولا لا دي بقا معرفهاش
الظابط : مش فاهم .. وضحي كلامك اكتر ؟
مليكة : انا عندي مرض نفسي بقالي فترة بيخليني اتهجم على اي حد يحاول يأذيني أو يدايقني بالضرب و ممكن توصل معايا للقتل .. وعشان كدا انا مقدرش احدد اللي حصل دا كان بقصدي ولا لا
ودا عشان أي واحدة طبيعية من غير أمراض في وضعي كان وارد جدا تعمل كدا
الظابط : وارد اي واحدة ممكن تموت أبوها ؟؟
مليكة : لو أبوها زي أبويا يبقى وارد تموته عادي
دا مش اب ولا يعرف حاجة عن الأبوة
الراجل اللي يسيب مراته وعياله سنين في الدنيا لوحدهم ويرجع بعد ١٦ سنة عايز يدمرهم زيادة يستاهل القتل ياباشا .. وبردو أرجع واقول لحضرتك انا معرفش اللي حصل كان عن قصد ولا لا
الظابط : واضح إن الموضوع كبير وتفاصيله اكتر
طيب يامليكة .. لحد دلوقتي القضية ماشية في إتجاه منقدرش نقول عليه خطر ١٠٠٪ ، بس الخطر الحقيقي هيبدأ لو محمد الخشّاب مات بجد .. وعشان كدا احنا جيبناكي هنا وتحفظنا عليكي تجنباً لهروبك ، بس انتي مش هتقعدي في الحجز
انتي هتقعدي على الكنبة اللي هناك دي لحد مانشوف الدنيا هتمشي ازاي ونقرر هنعمل ايه معاكي
مليكة : مش هبات في الحجز ؟؟!
ازاي يعني
الظابط : آدم وصى عليكي توصية تقيلة جداً
دا غير إنك من عيلة الخشّاب اللي ليها أفضال كبيرة اوي على الحكومة وبالذات اخو جدك إبراهيم الخشاب الله يرحمه ويحسن إليه
مليكة : تمام
أمين الشرطة خدها وقعدها ع الكنبة الي في آخر الأوضة .. حط الكلبشات في ايديها وفي العمود اللي جنبها عشان متحاولش تهرب
*برا الأوضة*
آدم رايح جاي متوتر جداااا واعصابه بايظة .. داليدا داخلة تجري عليه
داليدا : ايه ياادم حصل ايه ؟؟؟؟
آدم : مليكة متهمة في قضية شروع في قتل ولازم نتصرف بسرعة
داليدا : قتل !! قتل مين
آدم : قتل أبوها
داليدا بتبرق : يانهار اسود 😳 انت بتتكلم بجد ياادم ؟؟!!
آدم : والنبي مش وقت انبهار فكري معايا هنعمل ايه بسرعة عشان نخرجها من المصيبة دي
داليدا : طيب تعالي نقعد واحكيلي كل حاجة حصلت من البداية خالص
⚫⚫⚫⚫⚫⚫⚫⚫⚫⚫⚫⚫⚫⚫
*في القصر*
إبراهيم بيفتح الباب على نشوى وداخل .. فتحت نشوى عينيها تاني وبصتله
إبراهيم : يااااه ع الحلو لما تبهدله الأيام
نشوى : إبراهيم ، فكني ياابراهيم وانا هعملك اللي انت عايزه
إبراهيم : هو انا مقولتلكيش ؟؟
مش إبراهيم فاق ومسح الختم اللي على قفاه خلاص 😂
بيقرب عليها وهي بتبرق
نشوى : ابراهيييييم انت هتعمل ايه ؟؟؟؟
إبراهيم : هاخد منك حق أي حد اتأذي في العيلة دي يانشوى
ضربها بالبونية بأقوى ما عنده في عينيها 👊🏻 : دي عشان أمي اللي اذيتيها وشليتيها الفترة دي كلها
ضربها بونيه في العين التانية 👊🏻 : ودي عشان سهيلة أختي والواطي اللي بعتيهولها عشان يضحك عليها ويعمل اللي عمله فيها
بيضربها بالرجل في بطنها : ودي عشان روان اللي بعتيلها معاذ إبن كلب اللي كسر قلبها وشرد ابنها
*نشوى بتصوت من الوجع مع كل ضربة*
بيضربها بيعصاية على رجلها : ودي عشان آدم أخويا ووجعه اللي كان بياكله من جوا كل يوم اكتر من اللي قبله
بيضربها اقوى على رجلها وهي بتصوت : ودي عشان مليكة اللي اضطرت تقتل أبوها بسبب كل اللي عمله فيها واللي كان بدايته بسببك انتي بردو
بيديها بالرجل بيوقعها لورا بالكرسي على ايديها الاتنين وهي بتصرخ بعلو صوتها : ودي عشان جدي اللي عاش عمه كللللللله يبني في البيت دا عشان تيجي واحدة زبااااااااالة زيك وتضيع كل تعبه بالمنظر دا
نشوى مرمية ع الأرض عمالة تصوت من وجع جسمها ورجليها اللي اتكسرت من الضرب وايديها اللي باظت من وقوعها عليها وعينيها الاتنين وفي نفس الوقت متكتفة ومش عارفة تتحرك
إبراهيم طلع من جيبه ٣٠ وصل أمانة كل وصل بمليون جنيه ومسك صوباعها بصمها عليهم وصل وصل وهي مش عارفة تتحرك ولا حتي تقاوم
قام وقف وحط الوصولات في جيبه
إبراهيم : هسيبك مرمية في الأرض زي الكلبة كدا لحد ما تعفني وبعدين نشوف هنعمل فيكي ايه
نشوى بتعب : لا يااب... ياابراهيم متسيبنيش هنا
ياابرااااهيم انا تعباااانة تعالي اعدليني أبوس ايدك
سابها وخرج على برا ومبصش حتى وراه
❤️🔥❤️🔥❤️🔥❤️🔥❤️🔥❤️🔥❤️🔥
*في القسم *
آدم واقف مع داليدا بيفكروا هيمشوا ازاي بالظبط .. تليفونه رن
آدم بيرد : الو ؟؟
فضل آدم حاطط الفون على ودنه حوالي ٣٠ ثانية .. فجأة نزل الفون
ساب داليدا وخرج على برا ركب عربيته واتحرك
هنختصر اللي حصل بقيت اليوم ونعرف كل حاجة في وقتها
🔥🔥🔥🔥🔥🔥🔥🔥🔥🔥🔥🔥🔥🔥
تاني يوم الصبح 🌄
رفعت نازل على سلم القصر .. لقى الظابط داخل
الظابط : حضرتك رفعت الخشّاب صح كدا ؟
رفعت : أيوة انا .. اتفضل
الظابط : البقاء لله ..
محمد ابنك توفى امبارح الفجر
.
🔴🔴🔴🔴🔴🔴🔴🔴🔴🔴🔴🔴🔵
الحلقة 30 - الاخيرة
.
.
الظابط : البقاء لله ..
محمد ابنك توفى امبارح الفجر
رفعت اتصدم .. رجع بضهره خطوة لورا
رفعت : أشهد أن لا إله إلا الله
بيبلع ريقه : واشهد أن محمد رسول الله
الظابط : شد حيلك ياحج .. انا مقدر طبعاً الموقف الصعب اللي انتو فيه دلوقتي بس أعذرني انا لازم أنفذ الأمر اللي جاي بيه
هعمل شوية إجراءات كدا في البيت عشان دي تعتبر جريمة قتل والمتهمة الاولى مليكة حفيدتك
رفعت باصصله ومصدوم .. مش قادر يتكلم ولا يستوعب اللي بيحصل ، بدأ يتماسك
رفعت : شوف شغلك ياباشا البيت بيتك
دخل الظابط .. رجع رفعت لورا قعد على الكرسي وحط ايده على قلبه ، دعك صدره جامد من وجعه على الموقف اللي هو فيه
رفع راسه تاني وتماسك .. قام وقف مسك عكازه وطلع على فوق
*في أوضة ثرية*
قاعدين ثرية وأمينة وروان وسهيلة وإبراهيم
رفع رفعت راسه وبصلهم كلهم بقوة
أمينة : في حاجة ياحج ولا ايه ؟؟
رفعت : جهزوا نفسكم .. عندنا حالة وفاة
بس مش هنعمل عزا ولا هنستقبل ناس غير لما مليكة وآدم يرجعوا البيت
ثرية بترفع راسها بصدمة وبتبصله : حالة وفاة
رفعت بعد ٣ ثواني : بقيتي أرملة ياثرية
سهيلة وروان باصينله بصدمة فظيعة وعينيهم مدمعة .. إبراهيم بيلف وشه يبص على روان
أمينة بتحط ايديها على دماغها : انا لله وانا اليه راجعون ، انا لله وانا اليه راجعون
ثرية مازالت بصاله وبتحاول تستوعب اللي بيقوله .. ومن غير ما تعلق بولا كلمة على اللي قاله رفعت
ثرية : مليكة فين ؟؟
رفعت بص في الأرض وسكت
ثرية : بنتي فيييين ياحج
رفعت : بنتك متهمة في قتل أبوها ياثرية
محتجزينها والله اعلم هيحصل ايه
ثرية بصتله لمدة ١٠ ثواني وهي ساكتة .. قامت وقفت ووشها احمر
ثرية : كل دا بسببك .. كلللللللل دا كان بسببك انتتتتتت يارفعت ياخشااااااب
بنتي ضاعت مني بسببك وحياتي كلها اتدمرت بسببك .. عايشلنا طوووول الوقت حكم ومواعظ ومحسسنا إنك مسيطر على كلللللل حاجة وانت في الحقيقة هيئة كدابة لحد ما ضيعتنا اعمل ايه انا دلوقتي اروح فييييين وارجع بنتي ازاااااي
بدأت تصوت وتلطم على وشها : حسبي الله ونعم الوكيل فيك يارفعت ياخشاب حسبي الله ونعم الوكيل فيك
سهيلة وإبراهيم قاموا بسرعة يمسكوها وهي تزهقم وتلطم زيادة
ثرية بتلطم وبتعيط : بقالي سنيييييين عاملة فيها قوية عشان أربي عيالي واكبرهم بس انا مش قوووووووية 😱😱😱 لما بنت تضيع من ايدي بعد كلللل دا يبقي انا مش قوية ومستاهلش أعيش ولا انا ولا انت يارفعت ياخشاب منك لللللللله
قعدت في الأرض من التعب وقعدت تدب ع الأرض
ثرية : أعمل ايه انا ياربي أعمل ايه أعمل ااااااايه
روان سابتهم ونزلت تجري على تحت ووراها إبراهيم
❤️🔥❤️🔥❤️🔥❤️🔥❤️🔥❤️🔥❤️🔥
*في القسم *
مليكة قاعدة على نفس الكنبة وايديها في الكلبشات وساندة راسها لورا .. الظابط بيفتح الباي وداخل عدلت نفسها
الظابط : مدام مليكة ..
يؤسفني إني أقولك الخبر دا طبعاً ، انتي هتتحولي النيابة النهاردة
مليكة : ليه ؟
الظابط : ابوكي .. تعيشي انتي
مليكة بصاله ومصدومة : مات ؟؟
الظابط : الفجر
جهزي نفسك عشان شوية وهيحولوكي عشان تتعرضي ع النيابة النهاردة
مشي وراح قعد على مكتبه
مليكة دورت وشها وبدأت عينيها تدمع
مليكة لنفسها : جرا ايه يامليكة .. جالك اليوم اللي تحتاري فيه مش عارفة دموعك دي دموع فرحة ولا حزن
مش قادرة تفسري إحساسك ، هل فرحانة إنه اخد جزاته ؟ ولا زعلانة إنه اخد جزاته على ايدك انتي !
هل فخورة بنفسك انك قدرتي تعملي دا ؟ ولا قرقانة من نفسك ومش متخيلة إزاي قدرتي تمسكي سكينة وتقتلي ابوكي ؟!
زعلانة على نفسك وعلى اللي في بطنك لما تترموا في السجن بقيت سنين عمرك دا إذا مكانش إعدام ؟ ولا زعلانة إن دا كله حصل من البداية ومكنتيش بنت طبيعية زي اي بنت بتتحامى في أبوها
طب صعبان عليكي آدم والوضع اللي اتحط فيه ؟
ولا صعبان عليكي نفسك بعد كل اللي شوفتيه في حياتك وبعد ما فكرتي إنك هتقضي الباقي من حياتك في حما آدم اللي بيحبك اكتر من نفسه !!
جه أمين الشرطة يخرجها .. فك الكلبشات
خرجت على برا جري عشان تترمي في حضن آدم وتعيط ... اتفاجئت إن اللي موجودة داليدا بس
وآدم مش موجود ؟!!!
أمين الشرطة : هنقف هنا لحد ما الباشا يقولي هنتحرك امتى
قامت داليدا وقفت : ازيك يامليكة عاملة ايه دلوقتي ؟
مليكة : الحمدلله ، فين آدم ؟؟
داليدا : آدم مش موجود
مليكة : ؟!!!!
داليدا : مشي امبارح بالليل ومن ساعتها معرفش عنه حاجة
مليكة استغربت اوي بينها وبين نفسها .. ازاي آدم يسيبني في وقت زي دا ؟!!!
داليدا : متقلقيش يامليكة .. انا هخرجك منها ☺️
بترفع عينيها لقت روان جاية من برا .. وقفت على باب القسم تبصلها وعينيها مليانة دموع ، مليكة بتبصلها بحزن ونظرتها مختلطة بين زعلها منها وبين زعلها على الموقف اللي محطوطين فيه دا كله
وفجأة روان جريت عليها وخادتها بالحضن .. فضلوا حاضنين بعض كتييييير اوي
🔥🔥🔥🔥🔥🔥🔥🔥🔥🔥🔥🔥🔥🔥
اتحولت مليكة للنيابة واتحقق معاها وخدت ٤ أيام على زمة التحقيق .. عدت الأيام يوم ورا يوم ورا يوم ورا يوم
رفعت رافض ياخد عزا إبنه ، ثرية حالتها متدهورة وعايشة على أدوية الاكتئاب اللي بتنيمها عشان تهرب من الواقع ، روان رايحة جاية على مليكة هي وإبراهيم وإسلام صاحب آدم
داليدا عمالة تجمع أدلة من كل مكان وتروح لمليكة تسمع منها حاجات كتير ..
آدم مختفي تماماً ، كلهم بيدوروا عليه ومحدش فاهم ايه السر ورا اختفاءه الغريب دا !!!
مليكة اليوم بيعدي عليها بسنة كاملة .. عايشة أصعب أيام حياتها اللي مفيش اسوء منها
ولو مش بتتعذب بسبب كل حاجة في حياتها فهي بتتعذب بسبب غياب آدم كل لحظة مع كوم تفكير قد كدا .. ياترى اختفى فين وليه وازاي يسيبني في الظروف دي أيا كان اللي بيعمله
🔥🔥🔥🔥🔥🔥🔥🔥🔥🔥🔥🔥🔥🔥
جريت الأيام لحد ما وصلنا ليوم جلسة المحكمة ..
رفعت ، ثرية ، روان ، إبراهيم ، سهيلة ، إسلام داخلين المحكمة وطبعا كلهم معتمدين إعتماد كامل على داليدا المحامية اللي هتطلعهم من المصيبة دي
دخلت مليكة ورا القضبان ووقفت تبص عليهم وعينيها اللي مليانة دموع بتدور على آدم وسطهم وبردو ملقتهوش ، سندت راسها ع القضبان
مليكة : فينك بس ياادم .. ارجوك متعملش فيا كدا انا عارفة ومتأكدة إنك مستحيل تسيبني في يوم زي دا .. لو سيبتني لوحدي النهاردة كمان عمري ما هسامحك ياادم
دخل القاضي واللي معاه
مش هنقول تفاصيل الجلسة كاملة عشان الدواخل كتير زي ماحنا عارفين
القاضي : محامي الدفاع يتفضل
قامت داليدا وقفت : بدأت تقدم مرافعتها بس بطريقة مختلفة ، بدل ما تكون هي محامية الدفاع وتقدم أدلة في صالح مليكة بقت بتقدم أدلة تدين مليكة اكتر واكتر
لحد ما طلعت فيديو من كاميرات المراقبة اللي موجودة في الريسبشن اللي حصل فيه الحادثة ووريته للقاضي
كلهم باصينلها باستغراب ومليكة مبرقة
ثرية قامت وقفت : انتي اااايه اللي بتعمليه دا يابنت الغدااااارة
القاضي بيخبط قدامه : بعد إذنك يامدام اقعدي مكانك ومتتكلميش غير بأذني
بيبص لداليدا : هو انتي منين محامية الدفاع ومنين بتقدمي أدلة ضد مولكتك يا أستاذة داليدا ؟!!!!
داليدا : سيادة القاضي انا مع الحق أينما كان ✋🏻
وانا لحد من يومين كنت محاميتها على أساس إنها معملتش دا وبتعترف عشان تحمي غيرها بس لما عرفت الحقيقة كاملة وكونها تقتل أبوها بالطريقة البشعة دي قررت إني هكمل للآخر بس في الحق
آدم جاي من برا : قررتي تكملي في الحق ولا قررتي تكملي اللي غيرك مقدروش يكلموه ؟؟؟؟
أول ما مليكة شافته ابتسمت اتندهت تنهيدة قوية جداً وكأن الروح اتردت فيها تاني
القاضي بيبص لآدم : انت داخل تتكلم بالطريقة دي بصفتك مين ؟؟
آدم : بصفتي زوج المتهمة ، وابن عمها وشاهد على كل حاجة حصلت وكمان
القاضي : امسك المصحف دا مبدأياً
مسك آدم المصحف وحطه على عينه
آدم : والله العظيم هقول الحق .. والله العظيم هقول الحق
القاضي : اتفضل ياادم قول شهادتك
آدم : الحقيقة هي شهادتي مش بالكلام .. انا هعرض على حضراتكم فيديو قصير كدا هيقول كل حاجة انا عاوز أقولها
القاضي : قبل مااشوف الفيديو ، معاك تصريح رسمي بدا ؟؟؟؟
آدم : معايا تصريح وطلب من صاحب الشأن بنفسه ياسعادة القاضي
القاضي : تمام .. اتفضل
طلع آدم تليفونه .. فتح فيديو وعلى الصوت على الآخر
*داخل الفيديو 📸*
"محمد نايم على السرير وآدم قاعد على كرسي قدامه
آدم : تمام ياعمي الممرضة بدأت تسجل الفيديو ، ايه الكلام المهم اللي جبتني عشان تقولهولي ؟؟
محمد بيتكلم بتعب : انا عارف إني مكنتش سوي ، عملت حاجات كتير اوي غلط في حياتي وأذيت ناس كتير واللي هما اكتر ناس كنت المفروض احميهم واحافظ عليهم
بس لما أحس إن أمر الله خلاص على وشك النفاذ يبقى لازم ألحق نفسي واعمل حاجة لآخرتي أكفر بيها عن جزء من .... جزء من ذنوبي
بدأ يكح جامد اوي ويتوجع وهو بيتكلم
آدم : اهدي ياعمي ولو مش قادر تتكلم نتكلم وقت تاني عادي
محمد بتعب : مفيش وقت تاني ياادم أسمع الكلمتين اللي طالعين من ذمتي دول وركز معايا كويس اوي ...
بنتي متتحبسش فيا يوم واحد ياادم
آدم باصصله باستغراب !!!
محمد : زي ما بقولك كدا ... لو هي حاولت تقتلني مرة فأنا قتلتها ١٠٠ مليون مرة ياادم
عملت فيها اللي مستاهلش كلمة بابا عشانه ، هي وروان مكانوش يستاهلوا مني كدا ابداٌ وكان أبسط رد منها على كل دا إنها تعمل كدا وانا مش زعلان ✋🏻 ربنا يشهد على كلامي انا هموت وانا قلبي راضي عنها هي وبنتي التانية ، هموت وانا كلي أمل يسامحوني سواء في الحياة دي .. أو في الحياة الأخرى
وصيتي الاولى ليك ياادم مراتك متتسجنش فيا يوم واحد وخليتك تسجل الفيديو دا عشان كدا
آدم : طيب ووصيتك التانية ؟؟
محمد : نشوى ياادم
نشوى ومعاذ .. شيطانين لازمهم الحرق بسرعة
آدم : انت تعرف حاجة عن الموضوع دا ياعمي ؟!
محمد : انا اعرف كل حاجة عن الموضوع دا
نشوى هي السبب في كل حاجة ياادم .. جاتلي بعد طلاقها على طول وبخت سمها فيا كالعادة لحد ما عرفتها كل حاجة عن العيلة
وبعدها بسنين لما شكيت في اللي هي بتعمله بدأت اراقبها .. اكتشفت إنها شيطان من غير قرون
عندها طاقة شر محدش يقدر يشيلها جواه ، طاقة قدرت تخليها تهدم وتخرب وتحرق وتزور وتسرق وتقتل وتعمل اااااي حاجة تبرد نار الشر والحقد اللي جواها .. وبيساعدها في كل دا معاذ ، ومش لوحده ياادم
آدم : اومال مين كمان ؟؟
محمد : داليدا ..
داليدا اللي كانت ماشية معاك ، انا كنت مراقب كل حاجة من بعيد لبعيد وياما كنت عاوز أحذرك منها بس مكدبش عليك انا كمان كمان كان جوايا طاقة شر كبيرة
داليدا كانت بتحاول كل يوم تقرب منك اكتر عشان تعرف عنك معلومات اكتر فتروح توصلها للي مشغلاها فتديها فلوس اكتر وهكذا
آدم : داليدا ؟!!!!
محمد : اه ياادم داليدا
محمد بيمسك ايده : بنتي ياادم
بنتي أمانة في رقابتك ليوم الدين .. تخرج دلوقتي من عندي تروح ع الأماكن اللي هقولك عليها وهناك هتلاقي دليل برائتها ودليل إدانة نشوى ومعاذ وداليدا"
بدأ محمد يتكلم وكل اللي في المحكمة بيسمعوا واولهم القاضي
داليدا بصالهم ومبرقة وعمالة تشر عرق من كل حتة من الخوف
مليكة باصة لآدم وعينيها مدمعة من فرحتها .. ثرية ورفعت وروان وسهيلة مبتسمين ومش مصدقين عينيهم .. ابراهيم وإسلام باصين لآدم بنظرة فخر فظيعة
الفيديو خلص ...
آدم : وبكدا ياسعادة القاضي نقدر نستنتج تنازل رسمي لفظي من صاحب الشأن الله يرحمه عن القضية اللي تخص مليكة ، واعتراف على نشوى الخشاب .. ومعاذ السيد حافظ
ومعاهم المحامية الكفأ داليدا خليل ☺️
بيطلع الدوسيه اللي معاه : ودي كل الأدلة اللي عمي قال عليها في الفيديو تقدروا حضراتكم تطلعوا عليها ومعاهم تقرير الدكتور اللي بيثبت الحالة المرضية لمليكة .. والأهم من كل دا
بيبص لورا .. دخل سليم ومعاه الصعايدة وبدأوا يعترفوا بكل حاجة عملتها نشوى وداليدا ومعاذ
🔥🔥🔥🔥🔥🔥🔥🔥🔥🔥🔥🔥🔥🔥
وبعد كل حاجة القاضي شافها حكم لمليكة بالبراءة .. اتقبض على داليدا واتطلب القبض على نشوى ومعاذ
خرجت مليكة بعد ما خلصت كل الإجراءات .. أول ما شافت ادم جريت حضنته
حضنها حضن عوض فيه كللللل الوقت اللي قعده بعيد عنها
مليكة : كنت متأكدة إنك جاي والله العظيم
حط ايده الاتنين على وشها : انا آسف ياحبيبتي إني قعدت الوقت دا كله بعيد عنك بس دا والله كان لهدفين
أولهم إني اسيب داليدا تاخد راحتها وتبدع وتخرج كل حاجة عندها عشان اعرف اتعامل مع الموقف ، وتاني حاجة عشان أقدر أجمع كل المعلومات اللي شوفتيها دي
مليكة : خلاص بقا مش عاوزين نجيب سيرة الناس دي في حياتنا تاني كفاية اوووي كدا تفكير فيهم
آدم : اومال هنفكر في ايه
مليكة بتبسم : نفكر في إني بحبك
آدم بيبرق : اخيراااااااااا ياناس ، اخيرا قالتها ياعالم 😍😍😍😍
حضنها جامد اوي من فرحته
رجعوا لبقيت العيلة وركبوا العربيات
❤️🔥❤️🔥❤️🔥❤️🔥❤️🔥❤️🔥❤️🔥
*وصلوا البيت مع القوة اللي هتقبض على نشوى ومعاذ *
طلعوا المخزن جابوهم ونازلين .. نشوى في ايديها الكلبشات هي ومعاذ
العيلة كلها بقت تبصلهم باسحتقار فظيع .. كل واحد في العيلة اتأذى منهم بطريقة شكل
نشوى بغيظ وغل بتبص لآدم : اوعى تفكرها انتهت على كدا ياادم ، قد ما هقعد في السجن هرجع تاني وهاخد حقي
آدم : ان شاء الله حاضر لما تعرفي تخرجي نبقى نتكلم ، يلا ياماما مش فاضيين
خرجوا معاهم ركبوا البوكس .. اتفضل في الريسبشن العيلة بس
ثرية بتحضن مليكة تاني : قلبي كان هيتخلع عليكي اقسم بالله
مليكة : متقلقوش ياجماعة
طول ماادم معايا مكانش هيحصلي حاجة
روان : الحمدلله يارب
مليكة : مقولتلناش بقا ياادم الكلام اللي انت قولته دا حصل امتى وازاي
آدم : هحكيلكوا
Flash back 📸🔙
كنت واقف في القسم مع زفتة بنشوف حل يخرج مليكة من اللي هي فيه ..
تليفوني رن رديت
إسلام : عمك فاق تعبان وحالته صعبة جداً وطالب يشوفك ضروري جدا جدا
آدم : طب اقفل اقفل انا جاي حالاً
خرجت ركبت العربية وجريت ع المستشفي
دخلت لقيت عمي نايم حالته صعبة جداً ، دخلت قعدت جنبه وبصيتله
محمد : كويس إنك جيت بسرعة ياادم .. ادي التليفون للممرضة وخليها تصورنا فيديو
آدم : تصورنا فيديو ؟!!!
محمد : من غير اسئلة كتير ياادم الله يباركلك مفيش وقت ، خليها تصورنا فيديو عشان هتحتاجه بعدين
قومت ندهت للممرضة ، جت بدأت تصورنا ودار الحوار اللي بيني وبين عمي محمد
خلصت وخرجت على برا ، قعدت و دماغي عمالة تلف في مليون حوار .. حكيت لإسلام اللي حصل وبدأنا نفكر هنعمل ايه وهنجيب كل الأدلة دي ازاي
واحنا قاعدين بنتكلم الفجر أذن ، وفي نفس اللحظة عرفنا إن عمي قلبه وقف
ومن اللحظة دي اعتبرت نفسي في مهمة عسكرية 😂 مش هغمض عيني ولا هروح البيت ولا هوري وشي لمليكة إلا مااجيب كل الأدلة اللي تدين ولاد ال...
رفعت بيطبطب على كتفه : مش قولتلك قبل كدا ياادم ، انت راجل من ضهر راجل
تستحق لقب الخشّاب 😍😍😍
آدم : طيب بما إني أستحق اللقب بقا كنت عاوز استأذنك في حاجة كدا ياجدي
رفعت : اتفضل ياحبيب جدك
آدم : الفترة اللي فاتت دي حصل مصايب كتيييير اوي وحزن ونكد مكناش عارفين نخرج منه ، دا غير إن حضرتك عارف ساعة فرحي انا ومليكة كنا احنا الاتنين مضروبين بالجزم 😂 ومحسيناش بفرحة جوازنا
فكنت عايز استأذنك بعد الأربعين بتاع عمي بإذن الله نعمل حفلة كبيرة كدا ونعزم فيها كل الناس
وتبقى حفلة جوازي انا ومليكة ، وجواز سهيلة وإسلام كمان
مليكة بتبصله وبتضحك جامد من فرحتها .. إسلام بيبص لسهيلة وبيمسك ايديها وهما بيضحكوا
جدي : فكرة حلوة جدااا وانا موافق بالثُلث طبعاً 😍😍😍😍
إبراهيم : طيب اذا كان كدا بقا نخليه الفرحين تلاتة
آدم : يعني ايه ؟؟
إبراهيم : يعني انا بقالي فترة كدا كنت عاوز افاتحكم في موضوع بس كنت مستني اخد رأي روان الأول ، بس مدام الفرصة سمحت هاخد رأيها قدامكم يمكن توافق ونوثق اللحظة دي 😍😍
آدم : تاخد رأيها في ايه 🤔
إبراهيم بيبص لروان : تتجوزيني ياروان ؟؟
آدم : اوبااااااا
روان بصاله مبرقة ومصدومة .. مليكة بتبص لابراهيم بفرحة فظيعة وبتغمز روان في ايديها
روان : ايه دا طلع منين الموضوع دا
آدم : موافقة ولا مش موااافقة ياما يلا عايزين نفرررررح
روان : موافقة طبعااااا ودي فيها كلام بردو 🙈🙈🙈
مليكة بفرحة : ايووووة كدا بقا 😍😍😍😍😍
حضنتها وقعدت تبوس فيها من فرحتها بيها .. جت سهيلة وقفت قدام روان
سهيلة : ها بقا احنا بقينا عرايس زي بعض 😉 صافي يالبن ؟
روان : حليب ياقشطة
حضنوا بعض وصفوا كل اللي بينهم والفرحة سيطرت على المكان والعيلة كلها بتهني ال٣ عرايس .. مليكة ، روان ، سهيلة
وبالذات مليكة اللي عرفوا إنها حامل في ولي عهد عيلة الخشّاب 😍❤️🔥
❤️🔥❤️🔥❤️🔥❤️🔥❤️🔥❤️🔥❤️🔥
*بعد شهرين *
حفلة كبيرة جدااااا واخدة القصر كله ومعازيم كتيييير .. وعلى سلم القصر المتزين نازلة مليكة
زي الملاك بفستانها الابيض ووشها البرئ .. ووراها نازلة سهيلة بالفستان الأبيض وعيونها اللي بتلمع .. ووراهم روان بفستانها الابيض ووشها المنور من فرحتها
رفعت واقف على أول السلم .. مسك ايد مليكة سلمها لعريسها "آدم"
مسك ايد سهيلة سلمها لعريسها "إسلام"
مسك ايد روان سلمها لعريسها "إبراهيم"
بدأ صوت الزغاريط والتسقيف يعلى وال٣ عرسان بيبوسوا راس ال٣ عرايس والعيلة كلها واقفة في غاية السعادة وبالذات "أمينة" اللي بدأت تقف على رجليها بعد ما مفعول الدوا انتهى .. وواقفة بتتفرج على عيالها ال٣ وهما عرسان وعرايس 😍😍
خرجوا كلهم على الحفلة .. بدأوا يرقصوا سلوه
هنسيبنا من الحفلة كلها ومن بقيت الكابلز وهنركز على ❤️البطل والبطلة❤️
واقفين قدام بعض بيرقصوا سلوه .. عين آدم بتلمع من فرحته ، مليكة وشها منور من السعادة
آدم : من أول مااتولدتي على ايدي كنت عارف إنك هتكوني ليا
مليكة : من أول يوم بصيت في عيني وتحديتني كنت عارفة إنك هتجبرني أحبك .. أحبك ايه ؟
انت ❤️أجبرتني أعشقك ❤️ واعشقك كل تفاصيلك .. وقوفك جنبي ، خوفك عليا وحبك ليا اللي كان بيبان في كل تصرف ليك معايا كان بيأكدلي إني في المكان الصح رغم كل الزعل اللي كان بيننا
بتحط ايديها على قلبه : كنت عارفة إن في الآخر دا هيكون بيتي
آدم : النهاردة هنبدأ حياة جديدة بتفاصيل جديدة .. موعدكيش إن الحياة هتكون وردي طول الوقت
بس أوعدك إني في كل لحظة وكل ثانية هنعيشها مع بعض هبذل قصااااارى جهدي إنها تكون تعويض ليكي على كل حاجة شوفتها في حياتك .. ياملاكي
باس دماغها وايديها الاتنين وحضنها ولف بيها 🙈🙈🔥🔥🔥🔥
❤️❤️❤️❤️❤️❤️❤️❤️❤️❤️❤️❤️❤️❤️
عيشنا مع بعض رواية طويلة مليانة أحداث .. عيشنا معاها الحب والكره ، الفرحة والحزن ، الغيرة والحقد ، الخبث والبراءة .. عيشنا الظلم وعيشنا العدل
ولأن كل بيت من بيوتنا حصل فيه حدث من أحداث الرواية فعلاً فكنا حاسينها واقعية ومنطقية لأن أغلبنا عاش إحساس من الاحاسيس دي ، وفيه اللي عاشهم كلهم أو أغلبهم
وبعد ما خلصناها نستنتج من كل دا نقطتين مهمين جدا •••
إننا منتسرعش في الحكم على حد بالسوء ؛ وفي نفس الوقت منآمنش لحد ١٠٠٪ ونكشفله كل ورقنا قبل ما نتأكد من حسن نيته.
تمت
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺