رواية أمواج قاسيه الحلقة 60 حتى 69 قبل الاواخر حصريه وجديده
 |
نضت الصباح لقيتو يهدر فالتيليفون سمعتو يقول ايه أرواحو مرحبا بيكم و زاد قلهم هيه نتلاقاو مباعد نشاله و كوبا , قتلو شكون هاذم لي جايين _ دار جدي كامل راهم جايين يزورو يما ، انا قبالة فزدلي المورال قتلو بتشناف _ مرحبا بيهم ، جبد التيليفون قالي أني راح نعيط لباباك اليوم يسموني نصلح العلاقات بين العايلة كنت مشغول قبل بمرض يما و عمليتها مي درك الحمد لله هاني تهنيت عليها و فضيتلهم _ لالا غير مكلاه عادل رانا هكذا ملاح الله لايشوفنا فيهم و فالصلاح تاحم يجينا من عندهم غير تكسار الراس و المشاكل _ بلعي عليا نتي وش تعرفي كون جيتي حاسة ب باباك و الشي لي راهو يخمملو دايما ماتقوليش هكذا ووقف دا التيليفون يعيط و خلاني شوي و جا قالي نوضي نوضي يا الشكارة راهو تقريب ظهر أداك هو ماتوجدي لعشاء للناس _ ياكلو الرهج من عندي انا كيشغل ميتا عليهم _ بلعي مهما يكون يبقاو عايلتك و من لحمك و دمك و حتى لكان ماقادرتيهمش على وجه باباك قادريهم على وجهي انا و زيد بزيادة لي راكي تدعي عليهم راهو باباك و يماك و خاوتك تانا جايين _ يااا قبلو يجو و يقابلو وجوه الشر هاذوك _ نتي ا طفلة مش راح تترباي شوي وش قلنا على الكلام أنا نوض خير ماندير فيك حاجة وقف و خرج ، نضت على زهري الكلب دوشت و توضيت صليت وكليت شوي و لميت الدار مباعد هبطت التحت لقيت الزبالة تاعمتي ماروحتش كي شفتها قتلها على حسب علمي عادل قالك أقعدي مع لبنات في غيابو برك مش حتى في حضورو و رحت للكوزينة خليتها تغلي هيا و بنتها ( والله مانرجعلهمش الشي لي داروه فيا ثالث و مثلث مانتسماش نور ) ، لعشوة جاو الأفاعي لي تقربلي كامل سلمت عليهم بالتشناف والله ماني حاملتهم و هوما نفس الشي و رحت للكوزينة مانيش حابة نقابلهم و أصلن كنت ندير فالعشاء و الحق تعاونت فيه أنا و خاوتو لبنات شوي و جاو تا دارنا جابهم عادل رحبت بيهم والله نبوس و نعاود و نبكي شحال توحشتهممم ماما قاتلي ملي زوجتي نسيتينا دارنا ماعفستيهاش حتى نهار غلطة تخنزرت في عادل ( هو سبابي ) ، دخلتهم للصالون مع الشر هاذوك بصح كل واحد في جيهة مباعد قالنا عادل حطو لعشاء برك قتلو راهو مزال الحال على العشاء خلي مباعد شوي _ لالا حطي باه كي نكملو نحكي في راحتي عندي كلام طويل عريض نقولو ، تخنزرت فيه ووقفت مع البنات وجدنا زوج طوابل وحدة للنساء وحدة للرجال و سربينا و عيطنالهم كلينا و انا عيني مع طابلة الرجال نشوف في بابا مسكين والحق شفت عادل يڨصر غير معاه عمومو لوخرين والله ماهدر معاهم كلمة ( جاو عمومي و جدي برك مالرجال ولادهم ممنوع عليهم يجو مالنهار زوجنا قلهم داري ممنوعة عليكم درك ولات عندي مرأة و مانسمح حتى لواحد فيكم يشوفها حتى غلطة ) ، كي كملنا لميت الطابلة و خليت البنات يغسلو لماعن بغسك عيطلي عادل نروح نقعد معاهم كي دخلت قعدني قدامو و قال درك راح نبدا نهدر و واحد مايقاطعني حتى نكمل _ شوفو انا لميتكم اليوم ماشي هكاك عندي سبب و سبب تا خير ونشاله ماتردونيش و تسمعو كلامي مليح و دار ل جدي شوف يا جدي لعزيز الغالي اليوم لازم نهدر لوكتااه راح تبقا هاز على وليدك و ضلع من ضلوعك لوكتاه راح تبقا محملو ذنب هو ماعندو ماخصو فيه شي لي صرا قضاء وقدر واحد ميقدر يتحكم فيه واليام راها غير تجري وحنا لازم نصفيو قلوبنا ونحاولو نعوضو شي لي فات والشي لي صرا ماهو بيد عمي ولا بيد بابا الله غالب تقدرت من عند ربي هو مسكين لوكان صاب تجي فيه و متجيش في بابا هاذا راه وليدك ياجدي وتعرفو مليح خير مني موحال يرضى بشي خدشة تقيس خوه ولا يرضالو لهلاك ياجدي ستغفر مولاك وحن قلبك هاذو ولادك في زوج الله غالب قل لن يصيبنا إلا ماكتبه الله لنا كبر قلبك و خلي لقلوب تتصاف .......
الحلقة 61💕
، انا حكمت في دموعي و خزرت في بابا مسكين لقيتو يبكي بالسكات و مهبط راسو و قفت من جنب عادل و رحتلو قتلو بابا هز راسك يا غالي مادرت حتى حاجة تهبط راسك على جالها و رفعتلو راسو و بستو عليه ، كي كمل عادل كلامو عمومي نطقو كامل قالولو لا و هو السبة و علابالو بروحو مايعرفش يسوق و مانسامحوش الله يلعنو سكتهم عادل قتلهم ماحكيت حتى مع واحد فيكم راني نحكي مع جدي يا تكونو محضر خير يا تفضلو أخرجو ماتخلونيش نندم كي جبتكم ، سكتو و خزرنا كامل في جدي نستناو فيه يهدر تنهد و قالو انا جامي ننسى النهار لي دفنت فيه ولدي و فرحتي لولة بسبت ولد طاايش كيفو حرقلي قلبي و قلب ميمتو مخلانيش نشبع بوليدي السماح من عندي والله مايديه لا مني لا من حتى واحد من عايلتو وراهو ملعون والله مايربح لا في حياتو لا في ماماتو ، هو سبت موت باباك هو لي قتلو وانت عاميك الحب وجاي دافع عليه وانا مليوم نقولك لوكان تزيد تحبدلي هاذ لحكاية تاع نتصالحو ونصفو لقلوب نغضب عليك لآخر عمري هو ماهو بني انا ماني باباه صاي راني مانستعرفش بيه لآخر نفس من حياتي ، نطقت قتلو _ بابا لي مايشرفوش يكون عندو اب كيما نتا جااهل مايعرفش ربي و حاجة يسموها المكتوب الحمد لله الحمد لله كي بعدنا ربي عليكم ساعات العبد مايقدرش النعمة ، عادل تخنزر فيا تاع أسكتي ، جدي ( عطيه جلدة) قال لولادو ياله للدار مابقيتش نعفسها الدار هاذي مدام فيها بنت الكلب هاذي كنت راح ننطق ياخي قالو عادل _ جدي راك كبير و قدرك عالي و فوق راسي بصح مرتي خط أحمر و لي يطيحلها قدرها تسما راهو يطيحلي في قدري انا ، تخنزر فيه و داو قابيلتو و خرج ، بابا مسكين تغم قال ل عادل هيا وصلني يا بني لداري ربي يحفظك عييت فيه يقعد مابغاش علابالي مش حاب يبين قدام حتى واحد علابالي راه مخبي داخلو شي كبير ، قلت ل عادل نروح معاه نحكي معاه و نخفف عليه مابغاش قالي درك نحكي معاه انا نتي تروحي تزيدي الطين بلة و فرات راني نعرف فمك ، وراح خرج و هوما راحو معاه و خلاني بقيت نستنا فيه على نار نعيط و نعاود مايهزش فاتو واحد الساعتين باه دخل للدار حكمتو من الباب قتلو وش حوالو بابا _ لاباس عليه راني حكيت معاه و قنعتو بلي مانيش راح نيئس حتى نخليهم يعرفو غلطتهم و هوما لي يجو يطلب السماح _ منيتك مازلتي راح تحكي معاهم _ شوفي نور راني راح نطييح بالواقفة و مانيش ناقص كلام سم من عندك تسما خليني نرقد و غدوة ساهلة ، راح ديراكت بدل قشو و رقد انا والله ناجاني نوم غاضني بابا مسكين شو هاذوك الوالدين لي عندو الله لا تربحهم بسييف رقدت صباح نضت على صوت التيليفون تاعي و عادل كان راقد قدامي ناض قلي طفي عليااا وقفت هزيت التيليفون شفت لقيتها ماما هزيت سمعت صوتها تبكي رجفت في بلاصتي قتلها ماما وشبيك وش كاين _ باباك مات يا نور مات ضلع داري و كتاف ولادي ، طحت فالبلاصة عادل وقف يجري هبطلي للأرض قالي وشبيك انا ماقدرتش نستوعب وليت نضحك و دموعي يسيلو قتلو بابا مايموتش و يخليني ماما راهي تكذب هو غمض طول عينيه وقالي ان لله و انا اليه راجعون ، نضت نعيط بواش عطاني ربي من صوت ماتقولييييش هكذاااااا أسكت قتلك والله مامات مايروحش و يخلي بنتو الصغيرة المازوزية وحدها راهو دايما يقلي نشوف ولادك و نلعب معااهم والله مايروح علابالي راهي تكذب علياااااااا و نضت وقفت نجري قبل مانوصل للباب حسيت عينا ضلامو ماحسيت بوالو .......
ديري لايك يا المسمومة و أدعي لكل روح مؤمنة بالرحمة و المغفرة 💕
الحلقة 62💕
نضت لقيت روحي فالسبيطار و عادل قدامي و حاط راسو على يدي في ثانية تفكرت وش صرا تفكرت بلي بابا ضو عينيا سندي الصدر لحنين لي نبكي عليه راح و خلاني نضت طول نعييط _ اديني ل بابا اديني وش راني ندير هنا خليني نشوفو نشبع منو ، خطفني و بقا يكالمي فيا انا ماقدرتش وقفت نحيت السيروم من يدي و حكمت في شعري نقطع فيه و طحت فالأرض نعيط ياربي ماتخلينيش ياربي نصبر على كلش غير على فراق لعزيز الغالي ياربي راهو كتااافي راني مانقدرش بلا بيه كيفاه ندخل لدارنا بلاما يقابلني بوجهو و ضحكتو لي جامي فارقتو حتى و هو هاز هموم دنيا كامل يااربي مستحيل نتنفس بلا بيه، لقيت مقص قدامي جبدتو طول ، جا عادل خطفو من يدي وليت نعيط أخطيني خليني نروح ل بابا وش نقعد ندير فالدنيا هادي بلا بيه حضني و انا نبعد فيه بكل قوتي قالي _ نور ادعيلو ا نور ل بكاء هذا راهو غير يزيد عليه كوني صبورة نعرفك انسانة مؤمنة هذا قضاء و قدر ربي ادعيلو بالرحمة و الثبات عند السؤال ، بعدتو عليا وقتلو _ هذا راهو بابا لي مات هذا راهو روحي و حياتي ا عااادل _ علابالي يا نور هيا حبيبي نديك تشوفي باباك هيا و حكملي يدي ، كركرني انا ماشية بلا روح حاسة الدنيا حبست بيا و كيفاه راح نعيش في دنيا مافيهاش بابا احن قلب الشخص لي جامي يعوضو واحد في حياتي لا أخ ولا زوج ولا إبن اي حاجة عندها بديل غير بابا راني نطلب نجمة يجيبلي سماء ياربي كيفاه راح نقدر ننسى ، ركبني فالطونوبيل و انا جثة بلا روح راسي حسيتو حابس من التفكير مخي حبس فالدقية لي عيطت فيها ماما و قالتلي هاذوك الكلمات لي طاحو عليا كي الصاعقة ، وصلنا للدار هبطني عادل شفت صباط بابا قدام الباب رحت ليه نجري نبوس فيه ياعمري نتفكر نهار قالي يابنتي راني توحشت النهار لي نحط فيها رجلي على الارض ،دخلت وانا هازة داك الصباط لقيت ماما و خاوتي فالصالون تلحت في حضن ماما نحاول نشم فيها ريحت بابا ، ماما شافتني زاد زادت فالعياط تبكي و تقولي راهو قبل ما يموت وصاني عليك يا ميما اخر اسم قالو اسمك ياربي تيتمو ولادي قبل حتى مايفرح بيهم يا ناااس راهم ما تهناو حتى قتلوووه و خزرت في عادل قاتلو أخرج عليا أخرج تهنيتي درك راك ديتي حق باباك اخرررج نتا سبابو بسبتك مات بغصتو الله لاتربحك الله يلعنك نشاله ماتشوف حتى نهار يصلح و يفرح و بنتي غير انساها والله مانخليهالك زيد ترزيني فيها كيما باباها يااا قتااال ، حكموها خالاتي و عادل بقا غير يخزر فيا و يشوفني وش ندير أنا ماهدرت والو أصلن ماعنديش الطاقة للكلام بصح كنت متيقنة و متأكدة بلي هذا راهو قضاء و قدر و عادل ماعندو حتى سبة فيه علابالي كان قصدو كي لمهم غير الخيير و قدر الله ماشاء فعل باينة مانيش راح نولي جاهلة كيفهم و نحط اللوم عليه ، عادل كي شافني ماهدرت والو خرج وخلانا و ماما غير تعيط و تدعي عليه سقسيت اختي على بابا وين حابة نشوفو نبوسو نشبع منو خفت يكونو دفنوه و انا مكانش والله نمووت قاتلي بلي راهو فالسبيطار راح يديرولو تشريح قلبي ضرني من هاذي الكلمة..، منعرف كيفاه جاني الكوراج وقفت توضيت و دخلت لشومبرة لعزيز حطيت سجادتو لي فيها ريحتو و صليت و دعيتلو و رفعت يدي للسماء وانا علابالي بلي مش راح يسمعني بصح حبيت نفرغ قلبي " ابي انا موقنة انك رحلت للآخرة اعلم انك لا تسمعني ولا يصلك كلامي لكني أحب أن اخطابك كأنك أمامي لن اتركك و لن اننساك سأشتاق لكل صباح يبدأ بوجهك و بإبتسامتك و صوتك يامن كنت ألتجىء لحضنك عندما تضيق بي الدنيا سأشتاق دائما ليوم يجمعني معك " ........
الحلقة 63💕
شوي ودخلو علينا عايلة بابا ( خسارة فيهم كلمة عائلة ) أمو كي دخلت طاحت فالأرض و تعدد ياوليدي رحت وخليتني بلاما نشم ريحتك لي كي المسك ياوليدي حرموني منك هاذي سنين ياوليدي نشاله تسامحني راني أنا و ماشي قادرة نسامح روحي كيفاه قدرت نخليهم يمنعوني من شوفتك و ريحتك سنين ياربي راني تمنيت النهار لي نحضنو فيه و نقولو راني نحبك و جامي هزيت عليك نهار ، جا يهزها جدي من الارض بعدتو قاتلو _ ياخي طول حياتك دايرو سبة موت خوه مالا انا اليوم لي نحملك ذنب موت وليدي الثاني انت سبابو كلامك لي خلاه يموت بغصتو الله لاتربحك قسيتي قلبك على ولد من ولادك و خليتينا كامل نولو كيفك ، هو مادار والو بعد عليها و هبط راسو وفرات و ماما وقفت تعيط عليهم يا القتالين حرمتوني من سند داري و بناتي الله ياخد فيكم الحق ، انا رحت حكمتها و قتلها _ خليهم يا ماما الحقد و الشر لي في قلوبهم يكفيهم حنا ماناش كيفهم و درتلهم قتلهم تفضلو من دارنا مايشرفناش عباد كيفكم يجو لجنازة بابا واحد فيكم ماعندو الحق يدخل دارو برااا علياااا راكم خديتو حق ولدكم ارتاحو درك انا مانحمل حتى واحد فيكم ذنب موتو مانيش جاهلة كيفكم نعرف بلي هذا مكتوب ربي ووصلت ساعتو بصح لكلام لي سمعو منكم قبل ما يموت جامي راه ننساه حسبي الله و نعم الوكيل فيكم كامل هذا الجملة تكفيكم و توفيكم ، قاتلي جدة _ يابنتي اسمحيلي و خليني نشوف وليدي لآخر مرة راني أم و مشوية على كبدتهاا ، ماهدرت معاها والو حكمت بلاصة في شوكة و حطيت المصحف بين يديا و قعدت ...،، العشية جابو الحنان الغالي ودخلوه للدار جابولي بابا في صندوق يا ربي كي شفتو كيفاه تشوكت لحمي قعدت قدامو و نبوس فيه و هو باارد اڨلاص نضت نعيط _ بابا بارد جيبولي نغطيه ندفيه بابا مايحبش البرد ، جا ليا عادل هزني من فوقو وسط الناس كامل و أنا نفرفط بين يديه ماقدرتش و نشوف في ماما متغاشية قدامو منظر الله لايشوف حد فيه دخلت في دوامة هستيريا دخلنا للشومبرة نقطع في شعري شحال صعيبة ياربي سيغتو موت الفجأة دمر العبد عادل كي شافني سيبو رحت فيها و نفرفط و راح نهبل صباعي كليتهم ماحملتش هذاوك الشعور لي راني نحس فيه كيفاه مانقدرش نشوفو و نسمع صوتو مرة أخرى ماقدرتش نتخيل والله حكمني ضربني بكف و جبدني ليه حضني _ نور راكي عدبتيه ياانور ادعيلو بالرحمة و المغفرة علاه راكي ديري هكذا وش راح يفيدك قدر الله ماشاء فعل و هذا الشي لي راكي ديري فيه مش راح يرجعو علابالي باباك و روحك و دنيتك كاملة علابالي وش كان يعنيلك و ماقتلكش ماتبكيش بصح مش هك ا نور ابكي بكاء الرحمة و ادعيلو ، انا كيشغل فقت مع روحي طحت فالأرض و انا محضنتو و زيد تلحت فيه بزااف كنت نحوس على صدر حنين كي تاع بابا مي خسارة مالقيتوش كيفو ، وليت نبكي و نقولو كيفاه راح ندير قلبي راح نقلعو يا عادل ماقدرتش والله مستحيل ننسى مستحيييل _ علابالي ولا عمرك راح تنساي بصح الوقت يداويلك جروحك و يخليك توالفي الله غالب هاذي هي سنة الحياة و كامل هذا ماصيرنا هم السابقون و نحن اللاحقون و حط يدو على راسي و بدا يقرالي فالقرآن حسيت براحة بصح عينيا ماحبسوش من الدموع ، شوي و سمعت صوت ماما و خاوتي يتعايطو عرفت بلي راح يديوه عادل وقفني و قالي هيا تودعييه كنت راح نرفض بغسك مانحبش هذا الإحساس كيشغل كاين أمل الداخل يقولي بلي راني نحلم و بابا راح يرجع ، بصح ستغفرت و قتلو يلا خفت نندم كي ماشفتش وجهو لآخر مرة في حيااتي ايه آخر مرة نشوف بابا غير يجي في بالي هذا التخمام نتقطع مالداخل ، خرجت شفتهم راح يهزوه و عادل راه معاهم هزيت يدي لصندوق بابا وودعتو وودعت روحي و حياتي وكل فرحتي معاااه ( يا بابا يا الحنين كانت امنية حياتك تخرج من باب دارنا ماشي على رجلييك اه يا دنيا الغداارة ،، ) ....
الحلقة 64💕
فاتو ليام تقريب شهر من يوم وفات الغالي عشت اسوء ايام حياتي ماتوقعتش يكون الشوق و الوجاع و الحنين ل شخص صعيب هكذا دخلت في أزمة نفسية دايما فالسبيطار كل ليلة لازم نروح للسبيطار يضربولي إبرة أكثر وحدة تأثرت من موتو أنا كامل رضاو بمكتوب ربي بصح انا ماقدرتش نتخطى والله ماقدرت علابالي كنت انا القوية و لي هازة الدار بابا الله يرحمو كان يقولي راكي راجل الدار نخاف عليهم كامل غير انتي ، كان دايما يقولي قلبك صامد و رزينة ماعلابالوش بلي كنت شخص متصنع القوة برك و بلي بفراقو ضاع كلش القوة و الفرح... , عادل كان كل يوم يجيني للدار أصلن كان هو لي دايما يديني للسبيطار الحق واقف عليا و ماخلانيش رغم كلام ماما القاسي معاه بلي هو سباب موت بابا بصح ماكانش يدير عليها يخليها تهدر و فرات حاول شحال من خطرة يرجعني للدار ماحبيتلوش قتلو مانخرجش منا فارقت بابا مانيش قادرة زيد نفارق دارو مالقا مايدير معايا كان دايما يعيط يبعث ليميساج يجي قدام الدار يطلب يشوفني والو مانخرجش ليه حتى حط في بالو بلي حتى انا نخمم بلي هو سباب موت بابا ، بصح أنا ماكنتش هازة عليه أصلن ماكنت هازة على حتى واحد نفسيتي الوقت هذاك مكانتش تسمحلي نهدر ولا حتى نقابل الناس كنت حاكمة شومبرة بابا نرقد في جيهتو نلبس لبستو كل يوم نصلي و ندعيلو و فرات ، ماما و خاوتي صبرو و رجعو لحياتهم الطبيعية تقبلو هذا الأمر غير انا ماقدرتش ، لمنامات زادو عليا الفترة هاذيك كنت نحلم ب بابا يمدلي ساعة و يقولي حافظي عليها يا بنتي تقريبا الحلم هذا كان دايما يتعاود ، عايلة بابا جاو شحال من خطرة طلبو السماح كامل قالو بلي راهم نادمين و حابين يعوضونا ( يعوضوني على فراق بابا زعما ) حنا قابلناهم بالرفض ماحبينا لاصلح لاوالو ماما قاتلهم كيما كنتو كيما درك ماتبدل وماراح يتبدل والو أخطونا نتوما و ماشكلكم ...
في يوم كنت قاعدة جات ليا سيرين قاتلي راهي عجوزتك جات ( جات شحال من خطرة و حاولت معايا ترجعني ماحبيتهاش و كي شافتني رافضة تماما جابت فترة ماجات ما عيطت اليوم منعرف كيفاه حتى جات ) رحت للصالون لقيتها هيا و منال سلمت عليهم و قعدت هوما يهدرو و انا حاطة يدي على خدي و مانيش معاهم خلاااه حتى عيطت عليا منار قاتلي وينو مخك راهم من قبيل يحكو معاك باه فقت على روحي ، شفت فيهم قتلهم اسمحولي شردت شوي ، منال تبسمت معايا بصح عجوزتي تخنزرت فيا و شنفت عليا و قاتلي كنت دايرة في بالي نجيب كنة و مرأة ل وليدي تنحي عليه الهم و المشاكل مش تزيد عليه علابالنا موت باباك أثر فيك بصح ولدي ماعندو حتى ذنب في هذا الشيء علاه راكي تعدبي فيه معاك حنا كامل ماتولنا لعزاز و لحباب لكن ولا مرة خلينا دارنا و رجالنا بصح نتي كي شفتي وليدي ميت عليك راكي ديري في رايك معااه معلييش اقعدي بالعقلية هاذي والله انا لي نجيبلو مرأة خلاف و المرة هاذي انا لي نخيرها ماشي هو بغسك راني شفت خياراتو كيفاه قاعدة ووقفت قالت ل منال يالله نخرجو خوك راهو يستنى فينا برا ، منال قاتلي ماديريش عليها راهي تهدر برك ، انا شوكاتني ماكنتش متوقعة هذا الكلام منها هيا بعد تشوف فيا ربي لي عالم بحالتي و هيا زايدة عليا علابالي هاملة واجباتي مع راجلي بصح ماشي تقولي نزوجو بعد ، الحمد لله ماما ماكنتش فالدار و راحت عند خالي كون سمعتها هدرت معايا هكذا كون راهو طاح القدر و مابقا فيه والو هيا من بكري تحلف و تقول والله ماترجعيلو ....
ديري لايك يا المسمومة 😘امواج قاسية
الحلقة 65 حتى 69
فاتو عليا ايام مرار من جيهة موت بابا و من جيهة التخمام في عادل لي مالنهار لي قالتلي فيه خالتي فاطمة هذاك لكلام جبد روحو عليا خلاه ولا يعيط مرة فاليومين يسقسي على حوالي و كشما نستحق و فرات عرفت روحي بلي كون نكمل بهاذي العقلية راح نخلي داري شهدت و ستغفرت ورحت توضيت باه نصلي المكان الوحيد لي نرتاح فيه دعيت ربي ينورلي طريقي و يهديني و يوريني الصوااب ، كي كملت طبطب الباب و دخلو ليا لبنات قعدو قدامي مباعد نطقت منار قاتلي _ نور أختي لوكتاه راح تبقاي هكذا راكي هلكتي روحك علابالك بابا الله يرحمو كان حاس بلي راح يموت وصا ماما عليك انتي فرات قالها راني علابالي بيها تتصنع القوة برك و راهي أكثر وحدة ضعيفة بين خاوتها و كان عندو حق حنا كامل رانا نحاولو نكملو كيف قبل و نخليو جروحنا داويها ليام مي نتي لا راكي ضيعي في حيااتك ا أختي حتى بابا مش راح يرضى علييك فيقي ا نور و أوقفي على رجليك و أرجعي لدارك و كملي حياتك الله غالب هذا هو مصيير كل واحد فينا بصح ربي عطالنا كامل الصبر و نعمة النسيان ، هي تهدر و أنا دموعي يسيلو زاد قاتلي سيرين _ حنا كي نشوفوك هكذا رانا نتحطمو معااك وين راهي اختي الصغيرة الفحلة لي كانت واقفة علينا و هيا لي تنعتلنا الصحيح من الغالط ، وقفت تلحت في حضنهم و نبكي ( دايما نفيق بلي مهما نتعارك مع خاوتي و مهما وش يصرا بيناتنا بصح في وقت الصح غير هوما لي نلقاهم في كتافي ) قتلهم بربي نشاله نقعدو في كتاف بعضانا مهما وش صرا كيما كان يتمنى بابا الله يرحمو ، كي حكيت معاهم حسيت برااحة نفسية و كي حضنتهم حسيت روحي في حضن الغالي حضن سخون و فيه الصدق و المحبة كيما تاعو ، بعدت عليهم مسحت دموعي قتلهم بصح كيفاه راح نرجع ل داري و ماما ماشي راضية بهذا الشيء قاتلي منار ماما راهي تهدر برك هاك شفتي قبل قاتلك مانرضاش عليك و مانسامحكش كون تزوجي بيه و... و كي جات فالصح نهار عرسك فرحت كثر منك انتي لعروس _ ههههه هيه صح مالا نلم قشي و نعيطلو يجي يديني ، و تحل الباب دخلت عليا ماما قاتلي احكمي بلاصتك ماعندك وين تروحي أقسم بالله يا نور ما نخليك تعفسي عتبة الدار و ترجعي عند هذاك القتال المرة لولة درتيها و عفستي على كلامي و خلصتيها و خلصناها معاك غالية و ماتلي راجلي و اب ولادي هاذي المرة مانيش راح نعاود نفس الغلطة مانحلفك براسي مانقلك كون تخرجي ماكي بنتي المرة هاذي نمنعك و نحبسك و مانسمعلك نتي رايك تالف و عاميك الحب ماكيش تعرفي تخميي ، ياااو فييقي راهوو بسبتو دفنتي باباك تحت التراب و ماتقوليليش مكتوب ربي مانيش كافرة و نعرف المكتوب و القضاء و القدر بصح بسبتو هو باباك مات و هو في قلبو غصة من هذاك الشي لي سمعو من عند عايلتو ، عادل غير انسايه و بسيف علييك تتهناي نتي و حنا ، مرة هاذي رزاني في باباك المرة جاية دالتك نتي _ ماما لعزيزة كنتي تهدري على عايلة بابا كيفاه حاطين لوم عليه في موت عمي راكي وليتي كيفهم ، الله يهديك ماعميني لاحب لا والو تبانلي نتي لي عاميك الكره من جيهتو يا ماما راني علابالي بنيتو كيفاه كانت مستحييل نلومو و نديرلو كيما دارو ل بابا مسكين علابالي بلي عادل كان حاب الصلح و الخير لكن قدر الله ماشاء فعل و أنا مستحيل راح نخلي داري و راجلي على جال هدرتك اسمحيلي ماما لا طاعة لمخلوق في معصية الخالق يجي نهار نشاله و تفهمي بلي عادل هو الشخص المناسب ليا و بلي غير معاه لي نكون فرحانة _ مانيش نشاور فيك راني نعلم فيييك .....
الحلقة 66💕
ماما حبيبتي كلامك دايما على راسي و على عيني و تعرفي قدرك و محبتك عندي بصح اسمحيلي هاذي المرة مانيش راح ندير عليك يعيشك افهميني ، و رحت هزيت التيليفون قاتلي _ خسرتي باباك بسبتو و مزالك تخسري ا نور وكلامي ماتنسايهش و خرجت و خلاتني خاوتي قالولي عيطي عيطي راهو مزال موت بابا مأثر عليها برك كي تفيق على روحها تعرف بلي راهي غالطة حنا كامل علابالنا كان قاصد الخير وجوه الشر لي عكسووه و درك نخليوك تعيطي لراجلك و أعرفي كيفاه تهدري معاه و راحو .، كي خرجو تنهدت و خممت شوي في هدرة ماما بغسك دايما توسوسني بكلامها مباعد توكلت على ربي وعيطت ل عادل صونا زوج خطرات مباعد هز _ الو ( وش توحشت صوتو يا ميمتي هههه ) _ لاباس ا عادل ؟ ( نهدر و انا حاشمة منعرف علاه ) _ هيه راني دايما لاباس انا _ كيفاه _ والو ا نور كشما سحقيتي ، قلقني كنت راح نكوبي مباعد ستغفرت و قتلو _ لكان قاعد أرواح أديني لداري حابة نروح , سكت مباعد تنهد و قالي _ الحمد لله كي تفكرتي بلي عندك دار برك اني جاي و كوبا , لميت حوايجي شوي و بعثلي ميساج قالي أخرجي راني وصلت رحت ل ماما نودعها ماحبتش تخرج تقابلني غلقت على روحها لباب تاع الصالون عييت فيها تفتح والو و مام عادل مادخلش للدار ( دايما هكذا يقعد برا و فرات ) علابالو ب ماما ماتحملوش و تكرهو و هازلتو حقد الدنيا كل ، سلمت على خاوتي و قتلهم أقنعوها تسامحني و تحاول تفهمني وخرجت ليه هز من يدي لحواايج و ماسلم عليا لا والو حلي الباب تاع الطونوبيل ركبت و ركب ورايا انا حرت وشبيه طريق كاملة ماهدرت معاه حتى كلمة هو الطريق حرقها ، حنا تقريب نوصلو للدار قاس واحد في طونوبيلتو من للوراء الراجل خرج والله غير قالو ا خويا وشبييك ماكش تشوف .. عادل تحول تحسب كان يستنى في واحد ينطق معاه برك قالو هاني جاي ل ربك نعتلك لكان راني نشوف ولا لاء انا نحاول فيه يلعن الشيطان و مايروحش ماسمعليش ميا دخلت ميا خرجت أصلن ماهوش حاملني فتح الطونوبيل و جا هابط قالي تخرجي راسك مالطاقة ولا نلمحك برك نڨعرك و راح ، تلاح فيه كي المكلوب الراجل تانا ماشي قليل كان هاز صحتو و يبان سبورتيف بصح مع عادل المهبول و زيدلو الغش حق الله ما خلا فيه والو حتى مالطونوبيل كسرهالو ب حديدة لقاها فالطريق الناس كاامل تلمت تفك تحسب مجزرة صرات ( ناس حطتها قضية شرف 🙂) انا جايبتها غير بكاء على زهري الكلب قلت نرجع نتهنى مع راجلي ياخي فالطريق بعد حتى بسم الله ماقلتهاش بدينا بالمشاكل ، بسييف فكووهم الناس شفت عادل وجهو كامل دم و جاي جيهتي هذاك الراجل قالو والله ندمك و نرشيك فالحباس راني حفظت الماتريكيل تا الطونوبيل تاعك نجبدك من تحت الأرض عادل جا جبد ورقة منعرف وش كتب فيها و طيشهالو قالو هاوليك لادراس تا الدار و ركب و طار بالطونوبيل قتلو _ عادل وشبيك علاه دير هكذا ر... ، مخلانيش نكمل كلامي و قالي _ تزيدي حرف حق ربي نلوح رب الطونوبيل في حيط ولا شجرة و نتهناو في زوج ، أنا سكتت بغسك علابالي مزوجة بمهبول و يديرها صح تسما اتقيت شرو و فرات هفف باينة كيفاه راح يفوتو ايامي معاه أصلن باينة مين تدعي عليا ماما و ندير حاجة بلا رضاها هكذا يصرالي وزيد نشاله هذا الراجل مايشكيش بيه و يولي في كل و اربط و المحكمة و بعيد الشر والله بزااف مانحملش انا مزلت فيا شعرة و نطرطق تنهدت و ستغفرت قالي _ شيطان قدامك حتى راكي تستغفري _ تخنزرت فيه و قتلو لالا خوه فالدم _ شاف فيا بإستهزاء و قالي رانا ولاد عم و عنا نفس الدم ، هبطت راسي و سكت علابالي كون نطلق لساني لي فيه 4 ميترات و نص و خمس و عشرين و هو زيد يطلق هبالو و الكلب لي فيه ماتفراش تسما لازم واحد فينا يسبل و فراات .....
الحلقة 67💕
وصلنا للدار ڨارا الطونوبيل و خرج الحوايج دخلهملي ( تقريب كسر الباب كي فتحو رجعت ريمة لعادتها لقديمة البيبان نزعزعوهم ) ، فالباب بعد تلاقينا خالتي فاطمة( تحسب كانت تستنى فينا ،) غير شافتو و شافت حالتو بالدم جات تجري وش كاين أوليدي وش صرا فيك ماتخلعنيش قالها والو يما جرح خفيف ماتخافيش حط لحوايج و خرج قتلو وين رايح ماجاوبنيش ردخ الباب ومشا تشوكيت فيه والله ماشي واين يزيد يفسد العبد أداا بزااف ياربي طاقتي خلاصت من المشاكل ، خالتي تخنزرت فيا قاتلي غير رجعتي جبتي مشاكلك معاك يالاطيف منك منعرف وش دار في حياتو حتى بلاه ربي بيك كون قعدتي في داركم خير ، كرزتني و غمتني بكلامها و باينة بلي معمرة مليح من جيهتي كنت راح نسكتلها مباعد قلت والله غير نهدر خير ما نطرطق قتلها _ كي كنت فالدار قلتي مانيش مليحة و تخلي في راجلك و مسؤوليتك و كي رجعت وليتي تقولي جبتي مشاكلك و جيتي و أرجعي لداركم خيير الله يهديك خالتي كيما ندير مانسلكش معاك تسما ، و هزيت حوايجي و طلعت ل داري ماليوم مابقيت نهبط التحت نحكم سابعي خير و ندير حدود بيناتنا باه يبقا لقدر مهما كان تبقى أم راجلي ولازم عليا نحتارمها ، دخلت قابلتني ريحة الغف و الغبرة تقريب تقييت في بلاصتي فتحت الضو شفت حالة الدار كيفاه قاعدة تقريب كلش مجبود و مكسر حتى واحد الكادر تاع زجاج فيه صورتنا انا و هو فالعرس و تشعل بالضو و فيها موسيقى جابتهولنا منال كادو لقيتو كسرو غاضني خلاه و زيد ندمت كي رجعت كون قعدت في دار بابا فا النظافة و الكالم خير ياربي تسما اليوم مافيهاش الرقاد هفف هاي باينة الليلة الكلبة تا اليوم مش راح تعدي على خير فتت بدلت قشي و شمرت على دريعاتي و رجيلاتي للفرزا و التسياق ، نسيق و نشوف فالساعة و نعس فالباب كشما يطل عليا لقمر راجلي والو كملت الخدمة و دخلت دوشت و سشورت شعري و ماجا تقريب 3 تا الصباح كرزت و حرقت عليه التيليفون المرة لولة كان مايهزش مباعد ولا يكوبي كي وليت نبعث فاليميساج طفاااه خلاه تغممميت ياربي وين يكون هامل و الليل غير تا حوايج ستغفر الله يا ربي والله عقلي راح تم و توسوست قلت كون يكون تعلم الصنعة هاذي كي غبت عليه هذا الشهر مجرد التخمام فيها برك تشوك لحمي و تغميييت جبتها ليلة كاملة و انا نبكي والله ماغمضت عينيا التوسويس قتلني باينة يكون عند كاش وحدة الله يلعنو والله نمررلو معيشتو و نروح و نخلييه ولات التسعة تاع الصباح مكان حتى خبر عليه ، شوي و سمعت الباب يطبطب وقفت نجري قلت يكون هو و نسا المفتاح عليها راهو يطبطب كي فتحت لقيتها منال كي شافتني فرحت عنقتني و سلمت عليا و قاتلي _ والله خالتي قاتلي راكي جيتي و ما أمنت توحشتك الدار ضلمة بلا بيك ا حنونة بصح وشبيه وجهك هكذا تعبان مارقدتيش ؟ _ ايه مارقدت ماغمضت ليلة كاملة _ علاه ا نندب وش كاين _ ادخلي و أغلقي الباب وراك نحكيلك ، دخلت و حكيتلها بلي مسود السعد تا خوها ماروحش ليلة كاملة مادارت حتى ردت فعل حسيتها ماتشوكاتش زاد تأكدت بلي تخمامي كامل صحيح قتلها _ منال هاذي ماشي أول مرة تاعو ياك باينة راهو دايما يبات برا احكيلي ربي يحفظك راني كيف أختك و ماتخبي عليا والو خلي يتحلو عينيا لمغمضيين تبانلي عندها حق ماما كي قاتلي عماك الحب .....
ديري لايك يا المسمومة 😘
الحلقة 68💕
قاتلي والله والو مكان حتى حاجة ماتشوكيتش بغسك نورمال مالف يديرها قبل الزواج و حتى فالفترة لي غبتي فيها ساعات مايباتش فالدار خالتي كانت قبل تبقى متقلقة عليه و تبات تخمم مي درك والفت عادت ماتسقسيهش اصلن وين كان _ منال اختي راني غير نتشوكا منو اسيدي نقولو قبل الزواج يسهر و يخرج و يبات برا بصح درك راهو مزوج علاه رابطني معاه مالا انا كي عاد تاع لحوايج هاذم ياربي العزير دايما ندير لي في راسي و نندم _ نتي علاه راح مخك للبنات بلاك يسهر مع صحابو برك _ ماتحشيليش ا منال كاش رجال يتلمو مع بعض و فليل يسهرو بلا بنات المهم يعيشك كي قلتيلي برك _ نور ربي يحفظك اختي ماديريش المشاكل و ماتقوليلوش بلي راني انا لي قتلك راك تعرفيه قلوقي والله قادر حتى يخرجني و يسحتني مالدار _ علابالي حبيبتي مستحيل نقول على اسمك غير اطمني ، شايخنا شوي مباعد راحت منال هيا خرجت من عندي و انا طرطقت بالبكاء كنت حاكمة في روحي قدامها و فرات مانحبش نضعف قدام حتى واحد بكيت نشبعت على زهري لي طيحني فيه غبت عليه شهر و شوي ولالي يسهر مع البنات ولا نقولو رجع يسهر مع البنات أصلن لي فيه نڨة ماتتنڨى والله كون علابالي بشي هذا قبل مانقبل نزوج بيه و نموت بعد ، شوي و سمعت الباب تحل عرفتو هو مارحت ليه ماندبت عليه بقيت قاعدة في بلاصتي دخل عليا يبان عيان خلاه باينة يغلب راهو بايت يجاهد مع البنات ، خزر فيا لقاني قاعدة على السرير و نخزر فيه طفاني و عدا للدوش تغميت منو متجاهلني لدرجة كبيرة تحسب مكان ميت عليا قبل تبدل 180 درجة ، كي كمل خرج دا قشو و راح لبس فالدوش كيشغل أنا ميت باه نشوفو عريان لبس و جا عدل بلاصتو راح يرقد قبل مايحط رجلو فالسرير وقفتلو قتلو _ طلقني ا عادل ، خزر فيا بكل برود و انا راح نغلي و هو ولا هامو قالي _ راكي سير حابة تطلقي _ ايه سير من روحي و بزاف تانا مستحيل نكمل مع راجل خداع و خاين كيما نتا حسبي الله و نعم الوكيل فيك هذا مانقلك نكار الخير و العشرة نتا نهار خرجتي للخارج داوي في يماك قعدتلك فالدار كي مسمار جحا شرطي عليا مانخرج مانتنفس حتى دار بابا ماعفستها قتيلي نقعد شهر قعدتي ربعة و مخليني وسط اللفاعي و العقارب دارو فيا المنكر كرهولي حياتي حتى وليت نقطع في شعري مالهم لي عايشوني فيه , حتى المصروف لي خليتيه و سرقوه تقريب خلاوني نطلب بصح انا كي عدت نعرف لكار العشرة و مربية و بنت ناس صبرت و كي جيت روحت ماهدرت حتى كلمة و درت روحي كيشغل ماصرا والو و قلت راجلي مسكين و مانزيدش عليه بصح نتا ماتستاهلش الشي لي نديرو علاجالك انا غبت قل من شهرين عليك و ماشي بلا سبة علابالك بيا كنت في محنة كبيرة وعلابالك بابا الله يرحمو وش يسوا عندي ووش صرا فيا في غيابو ياخي كنتي شاهد شحال من خطرة رقدت فالسبيطار مي نتا باه توقف معايا و تساندني لا هاز عليا خشمك و وليتي تسهرلي مع البنات و ماتروحش حتى للصباح الله لاتربحك برك عندها حق جدة كي تقول الرجال و الزمان مافيهمش لامان و الله ماتستاهل حتى شعرة مني طلقني و روح جيب وحدة من لبنات لي راك تسهر معااهم تعمرلك دارك لتم تعرف قيمتي مليح مليح ، هو بقا غير بتخنزر كي خلصت تنهد و قالي _ سيبو كملتي هدرتك نقدر نرقد درك ؟ , رغرغو عينيا بالدموع حسييت بالإهانة هبطت راسي و بعدت من قدامو و هو تلاح لسرير يرقد ....
الحلقة 69 💕
فتت للدوش حطيت يدي على فمي و نبكي مش حابتو يسمعني حاسة بالشفقة على روحي بصح لازم ندير حل و نخرج مالدار مانبقاش معاه ، ضرب في راسي كلام ماما قلبي تزير نبهتني و انا ماخديتش الراي الله لا تربحني درك كي نرجعلها للدار و نقلها راح نطلق وش راح تكون ردة فعلها هفف وش راح ندير بصح مهما يكون تبقا ماما حتا و تمدغني ماتبلعنيش راح تفهمني و تساندني علابالي ، غسلت وجهي و خرجت رحت نلم في حوايجي لي بقاو ( لي جبتهم معايا لبارح خليتهم كيما راهم الحمد لله كي مافرغتهمش تحسب كنت حاسة ) انا هكاك و حسيت بيدي طارت ، عادل جبدني عندو قتلو _ وشبيييك اطلقني يدي راهي وجعتني _ وش راكي ديري نتي درك _ ماتحوسش عليا و درت نكمل زاد جبدني ليه _ وعلاه تلمي في رب حوايجك لوكتاه راح تقعدي هكذا اا نوور علااه عقلك تالف و ماتخمييش فالحاجة قبل ماديريها و تهدريها اك راح تهبلييني ا دين ربي كون جا القلب يتقلع راني نحيتو و تهنيت ، و بدا يكسر فالدنيا كي عوايدو انا حكمت الشوكة و بقيت نتفرج فيه كي تجيه حالتو هاذي مانقدر ندير والو حتى باه يروح لطبيب يشوفلو وشبيه و يمدلو دواء ل حالتو ماحبش جبدتلو مرة باه يروح يداوي عند طبيب نفسي قتلو زيد كشما يكون عندك تقريب قتلني و قتل روحو قالي تحسبي فيا مهبووول ( ياخي حنا عنا لي يروح لطبيب نفسي راهو مهبول تفكير جاهل ) ناض يهدر و يعيط _ هذا فاه خممتي نتي نكون ساهر مع لبنات هذا وش جا في بالك ماقلتيش بلاك توخد مات بلاك أكسيدو والو دايما هكذا تتوسوسي لحاجة و تصدقيها و ترجعي بالمشاكل عليا _ تتمسخر بياا نتا درك اكسيدو و موت ، نقولو لمرة هاذي نصدق بلي صراتلك حاجة و ليامات لي كنت فيهم انا مكانش و كنت تسهر لصباح تانا كنت داير أكسيدو ؟ الطونوبيلات مدايرين الدالة عليك نتا _ شكون لي راه يقلك و يعمرلك في راسك فهميني برك نتي ا طفلة نسيتي بلي كنت نبات مع ربك كي الكلب فالسبيطار و نجيبك تروحي الصباح لداركم _ اااا وليت تعاير فيا مليحة نستاهل ، قرب حكمني من طرف لبيجامة _ وكتاه عايرتك ياو راني نفهم فييك _ ولبارح وين كنت مالا ، مع من كنتي ڨارد مالاد فالسبيطار _ راكي تزحكاي بيا ؟ مانيش هادر و راح غلق باب الدار بالمفتاح و جا قالي روحي أخرجي مالتاقة درك و رجع للسرير ، حبيت نطرطق كي مقاليش وين كان و غلق عليا الباب و زيد كي شفت حالة الشومبرة كيفاه ولات و تفكرت تسياق لي سيقتو البارح الموت دخلتني من رجلي ، مالغمة هزيت لمخدة ضربتو بيها لراس ناض شاف فيا قالي _ تحوسي نضربك نتي ؟ _ أيوه أداك وش بقا مادرتيليش _ مالا احكمي ساابعك رااني عيااااان _ ومن ماه عياااااان و نضت نبكي فهمني برك علاه جامي كنتي كي الرجال لحنان و تحس بيا أنا ليلة كاملة ماغمضت عينيا راسي راح يطرطق و انا مقلقة و نخمم فيك و نبعثلك فليميسااج و نعيط و نتا تغلق عليا فالتيليفون و كي جيت الصباح ماحكيت معايا حتى كلمة عطيتيني بظهرك و رقدت و الله غير حرام علييك ا عادل ، ناض قعد على ترميه تنهد و قالي _ كنت فالكوميسارية ا نور عليها ماقدرتش نهز ووليت نكوبي و كي كثرتي عليا بالعياط غلقت التيليفون و كي روحت و عطيتك بظهري راني عيااان قلت نرقد و كي نفطن نحكيلك و نفهمك في كلش ، بصح نتي لالة تخمامك راح لحاجة خلااف _ وعلاه وكيفاه حتى رحت شكى بيك هذاك السيد بعد ؟ _ لالا انا لي شكيت بيه ماشي هو _ كيفاه منيتك ووين تعرفو _ كي دابزنا هزيت لاكارت ناسيونال تاعو مالأرض و حطيتها فالجيب بلاما يفيق و رحت شكيت بيه قبل مايشكي بيا برك هذا ماكان _ ياااا وخدي بصح راك نتا الضالم _ روحي اشكي راهو يحوس على شاهد أصلن _ مانيش نتمسخر ا عادل بصح حرام عليك دخل راجل للحبس و نتا لي تكون ضالمو _ ماهوش فالحبس طلب السماح مني و أنا قلبي كبير و سامحتو و سحبت الشكوى _ شوف ا سيدي ضالمو و زيد هو لي يطلب فالسماح _ هيه و درك خليني نرقد راني عيااان بزااف كي نوض كملي التحقيق تاعك _ بعد نجي نرقد معاك حتى أنا عيانة مارقدتش فاليل _ هيه أرواحي ، و حلي يديه _ قتلك قدامك ماشي عندك _ لالا عندي خير ترقدي نتي متهنية و انا كيف كيف هيا _ ضحكت معاه و رحت تلحت في حضنو و رقدنا ......
ديري لايك يا المسمومة 😘