رواية أمواج قاسيه الحلقة 70 حتى 75 والاخيرة حصريه وجديده
 |
نضت لقيت روحي مزالني عندو متلايحة فيه طلعت راسي شفت في ملامحو كي يكون راقد تحسب ملااك و هو فالصح مكلوب ، الله يبارك عندو شوافرو طوال قادر يربطني بيهم نورمال و شعرو هذاك الرطب لي دايما هابط على وجهو مايخلي فيا والو، هو فالصح ماهوش زين هذاك الجمال و لكن عندو ملامح حادة و رجولية و من وجهو يبان واعر و صعييب و حنا البنات هذاك وش يهمنا و زيد راهو في عينيا أنا أجمل راجل فالدنيا مانقدر نشوف في واحد غيرو والله قد مانوصف حبي ليه قلييل منعرف علاه تعلقت بيه هكذا و حنا معناش حتى عام زواج بلاك من حنانتو معايا و كي يوقف في ظهري كي الحيط و ميخلي حتى واحد فالدنيا هادي يقيسني بكلمة من غيرو هو ، انا هكاك سارحة فيه و هو فتح عينيه خزر فيا و طلع حاجبو قالي _ وش راكي تشوفي فيا ، شنفت و قتلو _ كون بقيت راقد خير كي نضتي فزدتيها عليا و جيت واقفة مخلانيش زيرني عندو مليح و غلق عليا قتلو _ بعد بعد كي تزيرني هكذا نولي منقدرش نتنفس و توجعني _ مانيش طالقك حتى ناخد حقي منك حق شهرين نخرجو في يوم _ معندك حتى حق عندي أصلن مزلت زعفانة منك غير أخطيني _ ها والله وكي زعفانة مني علاه راقدة في حضني _ مالقيت وين نرقد برك راك حاكم السرير كامل ماخليتيليش بلاصة حتى نحط فيها يدي برك _ هههه لي يسمع يقول فيا مترتين عرض _ ياو فييك ثلاثة ربي يصبرني برك _ هههه ونتي علاه راكي هزنتي على كتافك ولا ياو أنا لي ربي يصبرني عليك و على فمك المشرك _ وشبيه فمي مش عاجبك ، خزر فيه و قالي _ لالا الحق يهبل و غطس يبوس فيا و انا نبعد فيه مباعد مافهمتش كيفاه لقيت روحي تحتو و نتفاعل معاه ...
كملنا دخلت الدوشت وهو دخل ورايا و خرجت قضيت صلاتي مين نجي لداري بسبتو صلاتي ماتتصلاش في وقتها مين نقولهالو الهدرة أدي يقولي لاه شيطان انا و رابطك بالسناسل باه ماتصليش ، هو صلاتو في وقتها والله مايفرط فيها و الفجر دايما فالجامع و انا و الله جامي نوضني معاه مايحبليش الخير هههه ، رحت للكوزينة ندير حاجة ناكلوها كنت جيعانة و علابالي مام هو ماكلا والو مايحبش ماكلة برا قلييل وين ياكلها غير كي يتلزم و مايلقا بيها واين ، كي كمل جا ليا للكوزينة قابلني و تكا على الحيط قالي _ ماتتصوريش شحال توحشتك و توحشت نشوفك و نسمع صوتك دار بلا بيك ضلمة نتي هيا نور حياتي ا عينيا ، ضحكت معاه و هبطت راسي مزلت نحشم كي يبدا يتغزل بيا منعرفش وش نهدر ولا وش نرد ، قربلي و حكمني من خصري و طلعني على الطابلة قالي _ علاه ساكت و طلعلي وجهي ليه و حط عينيه في عينيا يخزر فيا بكل جرأة و شغف بصح انا شوفات عيوني كانت عبارة عن خوف و حب و حنين ، مكملتش ثواني قليلة و هبط عينيا منقدرش نخزر فيه اكثر من هكذا نحس داخلي يتزعزع ، هو حط وجهو في رقبتي و همسلي _ يا نور دنياي و يازهرتي الناصعة بياضا اسقيني من جدور حبك عشقا فياضا فالاشتياق اليكى بعقلى مرارا و لبعدك الروح تتعذب تكرارا قبل لقائك كانت حياتى دمارا و الان اصبح فؤادى بالحب عمارا فتذكرينى دائما باستمرارا , فمهما طال البعد و كان به جراحا بقدر حبى لكي اخلفه افراحا , رغرغو عينيا و دفنت وجهي في صدرو قتلو _ نحبك ا عادل ( كانت هاذي أول مرة في حياتي نقولهالو ) ماتخلينيش حبيبي بقيتلي غير نتا سند في حياتي , بعدني و حط وجهو في وجهي و قالي _ مهما يصرا ا حبيبي و مهما وش ديري عادل دايما معاك و في ضهرك نتي أغلطي و انا نصلح كي تفرحي نتي هاذيك هيا عندي الدنيا و مافيها راني نعشقك و جامي نخليك و هذا وعد مني ...
الحلقة 71💕
فاتو ليام انا و عادل شبه متفاهمين هو قلوقي و عصبي و انا مانحكمش لساني و دايما لازم التكسير فالدار كل سمانة يشري حوايج جدد للشومبرة دراهمو كامل خلاصو في هذا الشي هههه الحاجة الوحيدة لمليحة أنو جامي حط عليا يدو الحمد لله دايما يقولي كون نقيسك نحس روحي ماشي راجل مستحيل نضرب ولا نمس شخص أضعف مني ( نسى الكولا رابيد مسكيين ياما دار فيه و وليد الحق انا و قاوية عليه هههه ) ، مهم حنا صح نتعاركو و توصل بينا للخر و انا دايما في فمي كلمة الطلاق و هو يسمعني نقولها زيد يهبل يقولي كيفاه تجيك ساهلة و تقوليها عادي ( علابالي مايديرهاش عليها ) بصح فليل نرقدو متعانقين كيشغل ماصرا والو جامي يرقد نهار بلاما يصالحني و انا بكلمة منو نذوب سيبو سيغتو كي يبدا يطلقلي في شعر الغزل تاعو نعود نترعد وحدي هههه ، ماما مالنهار لي رجعت فيه لداري مابقاتش تحكي معايا كي قبل تعيط ساعات خلاه تسقسي عليا و على أحوالي و تكوبي و انا كي نعيط ماتهزش و دار بابا حرمتها عليا ( قاتلي معندكش الحق تدخلي ل دار باباك و نتي مزوجة مع لي قتلو ) ، عادل راحلها شحال من خطرة يصالحها و يحاول يحكي معاها و يفهمها مع أنو انا كنت نرفض بغسك ماهيش غلطة تاعو ولا حاجة دارها بيدو حتى يصالحها و يطلب منها السماح ( صح ماما و غالية و معزتها مايوصلها حد لكن كلمة الحق نقولها ) ، بصح هو يقولي مهما يكون تبقا أمك و نسيبتي و مرت عمي الغالي الله يرحمو و كي نرضيها و نصالحها و نحنن قلبها عليا و علييك نفرحو في قبرو و نخليه مرتاح ، ماما كانت دايما ترفض تقابلو ساعات تخلي لبنات يفتحو الباب و يدخلوه و يقولو مكانش فالدار و ساعات حتى الباب و ماتحلوش ، و ماشي غير عادل راه يعاني من ماما انا تاني هكذا علاقتي مع أمو من سيء الى أسوء منعرف وشبيها معايا تبدلت 180 درجة مين تشوفني دايما لازم تطلقلي الهدرة لي كي السم توصلت حتى في مرة تقولي راكي ساحراتو و نجيب الراقي للدار و نفيق وليدي و نحلو عينيه و نخليه يطيشك على طول يدو ، هاذي الهدرة ماتتجرأش تقولها قدام عادل بغسك علابالها وليدها كيفاه قاعد و كون يسمعها غلطة برك تهدر في هذا لكلام يحرق علينا الدار ، و انا جامي نقولو مانفسدش علاقة إبن و أم ، و كيما هو متحمل ماما و يحاول يصالحها و يربح رضايتها أنا تانا يلزم عليا ندير كيفو و نحتارم أمو بسيف عليا ، كنت نتجنبها و نتجنب المشاكل معاها وليت نقعد الفوق نهبط ساعات خلاه غير كي يبدا يتوسوس عادل كي مانهبطش نولي نقولو راني نعيا مالدار و نحب نرقد و صح ليامات هاذيك كنت دايما راقدة و تعبانة و نفسيتي زفت يهدر معايا كلمة يحصل قبل كنت نرجعلو الهدرة و لساني ميترا بصح درك وليت جايبتها غير فالبكاء برك غير ينطق نص كلمة ندير حفلة بكاء فالدار حتى توسوست من روحي كشما بيا و تفكرت الطبيبة كي قاتلي رقي و انا نسيت ، هبطت النهار هذاك عند منال كنا فالعشية قتلها تعطيني نيمرو هاذيك الطبيبة نعيطلها نحكيلها على الأعراض لي راني فيهم و زيد تعطيني اسم راقي مليح نسيي نقنع عادل يجيبهولي ( مايأمنش بالحوايج هاذم و مايحبش يدخل رجال للدار حتى و كبار ) مدتلي نيمرو تاعها قعدت معاها و عيطت حكيتلها كلش وش نحس و كيفاه ندوخ و نعيا من والو و دايما راقدة و نبكي على كلش سقساتني على رقية قتلها مزال و أنصحيني بواحد مدتلي اسم واحد قاتلي مليح بزاف تشكرتها بصح قبل مانكوبي قاتلي أشري تاست بلاك تكوني بالحمل و منعرف كوبيت عليها و بديت نتوسوس و نحسب وحدي و ندعي و نقول نشاله يكون كلامها صح بغسك راني قريب عام زواج و مكان والو و عجوزتي بدات تمعنيلي على هذا الشيء ، قلت ل منال تروح تشريلي تاست مسكينة ماصدقت قتلها خرجت تجري و تدعيلي يكون صح أنا بقيت نستنى فيها على نار بغسك احساس داخلي يقولي راكي بالحمل ( ماشكيتش في هذا الشي قبل بغسك ماكنتش نتقيا و يدور عليا قلبي كي النساء لي تتوحم ) ، شوي و جات دخلت للدوش لي لتحت درتو شوي و خرج خط واحد عينيا تعباو دموع شحال كنت دايرة أمل بصح قلت لعلها خير و هزيتو في يدي و خرجت ل منال قتلها مكان والو قاتلي _ أستناي شوي مش في دقيقتها تبان ، حطيتو فوق الطابلة و طلعة لداري عادل مكانش كان يخدم تاع الصح تحطمت درت في بالي سيبو لازم نبدا نداوي بلاك عندي اشكال انا ولا هو ، انا هكاك و سمعت الباب يطبطب راح يتكسر رحت نجري فتحت لقيتها منال هزتلي التاست في وجهي لقيت فيه زوج خط ( الخط الثاني خفيييف خلااه) قتلها مالصدمة _ هذا تاعك ولا تا شكون _ ايه تاعي واني جاية نعتهولك و نستنى خويا باه نفرحو بأختو بلي بالحمل ، نتي مهبولة ياو باينة تاعك اني قتلك أستناي نتي برك معندكش الصبر مبروووك عليك هاك راح تولي أم و انا نولي عمة , كي قاتلي كلمة أم حسيت قلبي راح يخرج احساس والله مانقدر نوصفو مهما نهدر حسيت روحي ملكة الدنيا ووليت نمس في كرشي و نقولها تسما عندي بيبي لداخل قتلي _ ايه وبلاك حتى زوج ( تقول ملاك تكلم على فمها ) انا مالفرحة و هذاك الشعور وليت غير نبكي و حاكمة هذاك التاست نتأكد و هذاك الخط غير يزيد يحمار ( احساس نشاله وحدة ماتتحرم منو و ربي يرزق كل وحدة راهي تقرا في حكايتي ) اول حاجة خممت فيها كيفاه راح تكون ردة فعل عادل و كفاه راح نخبرو....
الحلقة 72💕
لعشية جا عادل غير دخل مالباب قابلتو قالي _ سمله الرحمان رحيم من وكتاه موالفة تستقبليني فالباب وش تبدل فيك اليوم ، ضحكت _ حبيت نمدلك كادو شباب كيفي _ علاه وش كاين اليوم _ لازم تكون كاينة حاجة باه نمدلك كادو يا قليل الخير _ الحق يعني بصح جامي جبتيلي كادو _ كيما درت ماعجبكش فاجأتك كيفاه مافاجأتكش كيفاه و كيشغل نتا مالف تجيبلي _ علاه خليتيلي وقت مليح نجيبلك فيه هاكي دايما بالمشاكل ، قلقني خلاه انا نستنى فيه على نار و نخمم كيفاه نقولو و هو شو كيفاه يهدر رميتلو لباطة لي حطيت فيها التاست على وجهو حكمها بيدو ( كنت حابة تخبطو على الوجه ) و قتلو _ خراا ماكش تا قدر ، هز حاجبو على الكلمة لخرة لي قلتها و انا هربت نجري علابالي كون نقعد قدامو يضربني شوي و سمعتو يعيط عليا و لحقني للشومبرة تلاح ليا حضني قالي ماتتصوريش شحال فرحتيني بهادا الخبر _بعد ماه ؟ بعد ما سمطلي اللحظة ؟ بعد عليا تشو و زيد دايما طول نقلك مابقيتش تزيرني كيما هك _ماتستاهليش حنانتي _وين راهي لحنانة لي تهدر عليها_كركرني لسرير و قالي ارواحي نعتهالك........
فاتو شهور على حملي ماتصورتوش يكون بالصعوبة أدي كرهت الدار و لعباد و ماكلتي وليت دايما ناكل من برا عادل هبل معايا نتوحملو على حاجة مكانش خلاه في مرة سخفت على الشيشة تقريب وصلت بيناتنا لطلاق ، حكمني تانا سكر الحمل لي بسبتو تنفخت كي البالون كنت نحس روحي هازا عبد كبير في كرشي ماش بيبي، حتان كي رحت لطبيبة قاتلي بلي عندك توأم ..شحال فرحني هاد الخبر و في نفس الوقت خوفني ، خفت مالمسؤولية تا زوج صغار (انا عادل و حايرة فيه ) ، في يوم فاليل كنت قاعدة مع منال تحكيلي على صاحبها لي خانها ( حكاتهالي ألف مرة حتى حفظتها ) حنا هكاك و سمعت عادل عيطلي قالي اطلعي وقت النوم يا الشكارة ، خرجت ليه مشنفة قتلو ياخي دايما نقلك مابقيتش تعيطلي هكذا _ علاه نكذب وليتي شكارة منفوخة راح تطرطقي عليا مين نرقد معاك نرقد و انا خايف _ أرقد وحدك و جيت رايحة طالعة بكل ثقة قالي _ خمي شكون يطلعك في هاذوك الدروج , تخنزرت فيه و قتلو بسبتك وليت هكذا والله نولد و مابقيت نخليك تمسني قالي _ رايك ولا رااي _ راي انا باينة _ أرواحي برك ا مدام نفيخة نعاونك تطلعي فالدروج لا تتكركبي و جا طلعني دخلت للدار فتت للدوش بدلت قشي وحدي شحاال عييت ماجيت نكمل ( ليامات هاذي وليت نعول عليه في كلش حتى في تبدال القش و التدواش ) كي كملت خرجت و خبطت الباب و حكمت بلاصتي فالسرير قالي _ كسريه خيير ، شفت فيه و عينيا بداو يرغرغو بالبكاء قتلو _ زيد زيد كشما عندك تهدر قولها ماتخليهاش في قلبك ، تنفخت شوي وليت ماكش حاملني كون كشما يصرالي طيشني على طول يدك و حطيت راسي على المخدة و دموعي ويدان ، جا طابس عندي و رقد في جيهتو تا السرير و جبدني عندو قتلو _ سيبني ماتمسنيش درك نطرطق عليك كيما قلت ، ضحك و قالي _ هيه معليش مكانش مشكل راني قابل لي تجي من عند حبيبي حلوة _ اممم باينة بعد برك _ كون جيت قادر نبعد عليك كون راني نحيتك من مخي من كي كان عمري 23 سنة , حرت و خزرت فيه قالي _ هيه ا نور مالنهار شفتك فيه ونتي مغروسة هنا ، و دار يدو على قلبو مكانش نهار رحتي فيه من بالي بقيت نستنى فاليوم لي تكوني فيه حلالي و أم ولادي و هبط باسني من كرشي و طلع زاد باسني على راسي ، بقيت غير نشوف و مصدومة قتلو _ وعلاه ماقتليش من قبل _ نتي لي حمارة برك و ماتفهميش كانت باينة ....
الحلقة 73💕
نضت غدوة الصباح مانيش مليحة أصلن ملي دخلت الشهر السابع و لوجاع دايما عليا و لاطونسيو طالعة ، لميت شوي الحالة خفافي برك و خليت عادل راقد في بلاصتو و هبطت التحت نجيب تيليفوني نسيتو عند منال لبارح ، الدروج هاذوك حسيتهم كي الجبل ماجيت نهبط طلعت روحي انا كملت الدرجة لخرة و تلاقيت خالتي فاطمة في وجهي قاتلي _ حنا كل هزينا بصح كيفك نتي جامي شفنا ، ستغفرت ماحبيتش نردلها لكلام عابالي تشريلي فالمشاكل كي جيت نعدي حكمتني من يدي قاتلي مليحة هاذي كي وليتي كي نحكي معاك تحقريني و تستغفري أصبري درك نطلع لولدي نقولو يربيك و سيبتني و جات طالعة كي جيت نحكمها درت فو جاست و تعكلت رجلي ماقدرتش نحكم ليكيليبر كي عدت ثقيلة طحت على العتبة تاع الدرجة لخرة في نص ضهري بعد، حسيتو تكسر نضت نعيط و نرغي على قد ماعطاني ربي صوت و حسيت بحاجة نزلت تحتي جيت نشوف لقيتو الدم وليت نبكي و نندب شوي من الوجاعة و شوي خفت نخسر ولادي لبنات خرجو يجريو من الشنامبر تاعهم و عادل هبط كي شافني بهذاك المنظر جا ليا يجري قالي _ نور وش صرا كيفااه طحتي ، انا غير نعيط و نقول ولادي رااااحو يااا ربي ماتحرمنيش من كبدتي ، هزني و قال لمنال أزربي جيبيلها حاجة تسطر بيها روحها و شعرها و انا غير نعييط فشلت قبالة و لعجوز بقات واقفة في بلاصتها و تشوف والله ماتحركت حسيتها تشوكات ، جابتلي منال لحوايج و هو طااار بيا ل سبيطار طرييق كامل و انا نقولو _ يا عادل رااحو ولادنا يااا عااادل تحرمت من شوفتهم راني تشوييت علييهم و هو يقولي الصح كامل فيك تعيشيلي نتي أديك هيا البراكة لولاد يتعوضو و مزلتي صغيرة _ لا مايروحوش منقدرش والله و هزيت يدي لسماء ندعي ياربي أديني أنا و ماترزينيش في ولادي راني مانحملش لفراااق..، وصلنا للسبيطار عيطت منال لطبيبة تاعي جات ليا تجري خرجتهم و بقات تفحص فيا و انا دم ماحبش يحبس و حاسة روحي راااح ندووخ وليت في مرحلة الوعي ولا وعي بصح قبل مانغمض عينيا سمعت الطبيبة كي خرجت قدام ل باب و قالتلو _ المريضة صرالها نزييف حاااد و لازملها تولد فالحال و مانيش حابة نخلعك بصح راهي حياتها وحياة لولاد في خطر من النزيف لي صرالها ولاطونسيو راهي طالعة بزااف ، عادل ناض يعيط و يردخ قالها مرتي تصرالها حاجة نحرقك نتي و السبييطار .. مباعد تغمضو عينيا وليت نشوف غير فالضلمة ( بلاك نبقا فيها )..
منعرف وين رحت ووين انا نشوف غير فالضلمة ماني حاسة بوالو جسمي كامل يوجع و اطرافي مانيش قادرة نحركهم نسمع في حركات قدامي و شوي حس بصح ماني قادرة ندير حتى ردة فعل حسيت روحي راني فالهواء مانيش فالأرض ، جسمي خفيف و في نفس الوقت ثقيل منعرف شحال الوقت قعدتو و انا نحس هكذا لكن فالنهاية قدرت نفتح عينيا كانت الرؤية تاعي فيها نوع من الضباب لكن قدرت نلمح عادل لي واقف فوق راسي و نشوف في شواربو يتحركو بصح ماني نسمع في والو مافهمتش أنا وين و كيفاه راني هنا حسيت ذاكرتي خانتني و نسيت كلش بصح علاه كي شفت عادل تفكرتو للحضة عدى عليا سيناريو حياتي كامل من نقطة بدايتي لي كانت في سن 13 سنة و الشي لي صرالنا حتى وقت هدرت الطبيبة عليا و على ولادي ، ولادي وينهم ولادي ، رغم الفشلة و الإحساس بالعجز لي كنت حاستو لاكن كي تفكرت ولادي و كبدتي قدرت نتحرك و نقاوم فشلي و تعبي و عجزي حركت عينيا و شفافي لي كنت نحسهم ثقااال و قتلو _ وين راهم بنتي و ولدي ، كنت نستنى في الإجابة بصح مانيش قادرة نسمعها خفت من الشي لي راح يقولو للحضة كنت راح نغلق ودنيا حتى شفتو قربلي و همسلي بصوت حنيين و دافي و فيه نوع من البحة لي كانت باينة من تعبو و حزنو قالي _ ولادنا لاباس وراهم فالحضانة ربي كتبلك ليك و ليهم عمر جديد يترباو في عزك و عزي يا نور حيااتي ، للحضة حطيتو يكذب بصح كي خزر فيا و شفت عينيه لحمر و يلمعو فهمت كلش ضحكت بصح رجعت غفيت بصح لمرة هاذي رقدت و أنا مطمنة و في راحة ماشي كي المرة لولة ....امواج قاسية
الحلقة 74 75 والاخيرة
شوي و نضت على صوت الطبيبة و هي تحاول تفيقني و تحكي
معايا كي شافتني حليت عينيا طاحت عليا بالأسئلة و انا والله ماني حاطة راسي معاها بقيت نتفكر في كلام عادل لكان صح ولا كنت نحلم ، شوي و شفتو داخل و ضحكة في وجهو تبسمت معاه ( كي نشوفو نطمئن و طلتو عليا بالدنيا و مافيها ) كملت الطبيبة الأسئلة تاعها لي جاوبتهم بعيني فقط، بصح قبل ماتخرج قالتلي جملة كانت كي الصاعقة بالنسبة ليا قاتلي _ كي صرالك نزيف من الطيحة ولاطونسيو تضرر رحمك و اظترينا نستأصلوه الحمد لله لي ربي عوضك بطفلة و طفل ربي يحفظهملك و حمدتلي السلامة و خرجت ، عادل راح وراها نسمع فيه يعيط بصح مانيش نفسر وش راه يقول ياربي كيفاه يتنحالي الرحم من طيحة يصرالي الشي هذا كامل و كي يتنحا كيفاه ندير انا نولي مرأة ناقصة و عادل مستحيل يكمل معايا علابالي يكره و يطلقني ، شحال من فكرة الدور في راسي ماقدرتش نتقبل بلي مابقيتش نعاود نحمل منعرف حسيت بالنقص الضعف مفهمتش و ماحمدتش ربي باقية غير نبكي و نقول علاه يصرالي هكذا دخلت في هستيريا و بديت نعيط دخل عليا عادل حضني بكل قوتو و يهدي فيا يهدر و انا مانيش سامعة كلامو ولا نقولو مانيش حابة نسمعلو و نتقبل هدرتو .. ، قعدت فالكلينيك سمانة كاملة دخلت في حالة اكتئاب حتى ولادي مانيش قادرة و حابة نشوفهم مين يقولي عادل نديك ليهم تشوفيهم نرفض ، نرفض بغسك كان عندهم أمل صغير للعيش ولدو ضعاف و ناقصين و انا ماكنتش حابة نتعلق فيهم و نتحطم اكثر من هكذا احاسيس الأمومة كاملة تلمت عندي احساس بلي ولادي قادر يموتو و انا حتى ماشفتهمش احساس اني مابقيتش نجيب لولاد في حياتي كلش جا مع بعضاه ، الطبيبة قالت ل عادل هذا اكتئاب ما بعد لولادة بصح انا متأكدة ماشي اكتئاب هذا خوف من الشي لي راح يصرا برك عدت نخاف نتصدم من المستقبل ، كملت هاذيك السمانة و جيت خارجة مالكلينيك بصح عادل قالي والله ماتعتبي الباب حتى تشوفي ولادك رفضت رفضا قاطع بصح مع شكون هذا عادل الراس لخشين داني ليهم بسيف كي دخلني لهذيك الشومبرة وليت نغلق في عينيا و نعيط و نقولو خرجني مانشوفش راني خايفة تكون اول و آخر مرة خليني ، جا ليا حكمني من وجهي و قالي _ شوفي ولادك يا نور شوفيهم كنتي طول عمرك تستناي فيهم خليهم يحسو بيك انتي لي تعطيهم الأمل و القدرة فالحياة و فتحلي عينيا ب يديه ، قابلوني في زوج فالحاضنة كيشفتهم ضاقت نفسي حابة نبوسهم نشمهم ياربي وش صغااار عينيهم مغلوقين لخيوط عليهم من كل جيهة باينة راهم يتوجعو ياربي فيا ولا فيهم راهم لحمة طرية و مايحملوش بقيت غير نتلمس في هاذاك الزجاج حابة نكسرو و نجبدهم نلمهم لصدري و نرجعهم عندي في داخلي ، بقيت وحد الساعة و انا غير نتفرج فيهم و نبكي و مرة نضحك حتى جات الطبيبة قاتلنا لازم تخرجو بصح طمنتنا و قاتلنا نشاله ايام قليلة و تخرجوهم بصحة و عافية هدرتها عطاتني الأمل و خرجت فرحانة من هذاك لكلينيك ، كي خرجت ولاو يجو ليا الناس و انا والله ماني حاملتهم الحمد لله ماما لي واقفة عليا هيا و خاوتي و خاوتو كامل ( لبنات والله لقيت فيهم الخير كي روحت من لكلينك هزوني فوق روسهم ربي يعطيهم مايتمناو نشاله ) عجوزتي لي مجاتش عندي ولا مرة و أصلن بالي ماشي معاها تخمامي كامل عند كبدتي لي خليتها فالكلينيك كل يوم نبكي و مانقدرش نصلي على خاطر ماشي طاهرة بصح الدعاء ليهم جامي يتنحا من فمي ..،
تكملة الحلقة 74💕
في يوم كنت قاعدة مع خاوتي لبنات و ماما داها عادل تجيب حوايج من الدار و يرجعها ( علاقتهم نورمال عادية هي تحكي معاه على وجهي و فرات مزالت دايرة في بالها هو السبة بلاك يجي نهار و تنسى و تسامح منعرف ) مهم سمعت الباب يطبطب راحت سيرين فتحت سمعت صوت خالتي فاطمة قلبي تقبض علاه جاية مش موالفة تطلع خفت كشما يكون كاين و قفت من بلاصتي بسيف و هي دخلت قاتلنا السلام قتلها _ كشما كاين وش صرا ولادي و عادل لاباس ، سكتت و قاتلي لالا مكان والو بصح حابة نحكي معاك دقيقة وحدنا بنتي لا تحبي ، خاوتي كي سمعوها خرجو طول و غلقو وراهم الباب انا قعدت و هيا بقات واقفة قتلها تفضلي جات قعدت بجنبي و طرشقت بالبكاء و بدات تهدر حتى كلامها مش مفسر قد قد كي عاد تبكي بالشهقة _ يابنتي علابالي كون نطلب السماح عمري كامل مش راح تسمحيلي انا سبابك و سباب الشي لي صارلك يابنتي والله معلابالي وش صرالي وعلاه كنت نعامل فيك هكذاك بلاك غيرة على ولدي بلاك حب فيه والله منعرف حتى كلام لعباد زاد عليا ، بصح الحاجة لي علابالي بيها درك أنو انا غلط معاك و غلطة كبيرة و بسبتي تقريب راحت حياتك و حياة ولادك لي هوما أحفادي مانيش راح نطلب منك تسامحيني بغسك مش من حقي بصح حبيتك تعرفي بلي راني والله نحبك و لحضة شيطان الله يلعنو نشاله و راني ناادمة يا نور بنتي ، تنهدت و قتلها _ السماح خالتي راكي مسامحة دنيا و أخرى و مابقيتيش تقولي نتي سباب لي صرا راني كرهتها المقولة هاذي ( والله مام أنا ) هذا الشئ قضاء و قدر و علابالي مكانتش نيتك طيحيني ولا تخسريلي ولادي ، معليش حاجة صرات و راهي فالماضي و بربي نشاله الشي لي صرا قبل يقعد بيناتنا ولا عمري راح نجبدو قدام واحد سيغتو عادل ، طلعت باستني على راسي قاتلي _ ربي يعطيك ماتتمناي و على حساب قلبك لكبير يا بنتي ولدي وش دار خير في دنيتو حتى رزقو ربي بثمرة غالية كيما نتي ربي يريح قلبك كيما ريحتيني ، ضحكت و تفكرت هدرتها تا قبل ( كي كانت تسبني و تقولي ولدي وش دار شر في حياتو حتى يصيبو ربي ب لعنة كيفك ) قعدت معايا شوي و خرجت ......
الحلقة 75💕 و الاخيرة
لغدوة سمعت أسعد خبر في حياتي عيطو ل عادل قالولو تقدر تجي تخرج ولادك راهم بصحة تامة اليوم هذاك الدنيا مش سايعتني بالفرحة نستنى في عادل يجي بأحر من الجمر ، تلمو عندنا الغاشي بغسك عجوزتي كي قالها عادل اني رايح نجيب لولاد خبرت الدنيا كل ، و الناس ماصدقت تسمع جاو كامل انا بعثت ميساج ل عادل قتلو _ طلعلي ولادي عندي نشوفهم انا لولة ، كيما كان الحال كي وصل طلع طول عندي كي قابلوه قالهم كي تشبع أمهم منهم نهبطلكم تشوفوهم طبطب الباب راحت اختي تجري تفتح و انا وراها سمعت صوت بكاهم من برا نضت نبكي حتى انا تفتح الباب و دخلو ملايكة حياتي رحت ليهم اول حاجة درتها شميت ريحتهم المعطرة و الحنينة شحال كنت مشتاقة نشمها مباعد وليت نبوس و نحضن و نبكي و هزيت الطفلة في حضني اول وحدة ( ماشي حيلة ولا حاجة عادل لي عطاني ) فوتت نهار كامل معاهم انا و عادل لاصقين فيهم ماخليتهمش حتى يهبطو قتلو لي تحب تشوفهم تطلع عندي ، كي سمعو جاو غير خالاتو و نسا خوالو ، عايلة باباه ( نحشم نقول عايلتي) كامل قالو كيفاه حنا لي نطلعولها وش العيب هذا لي دير فيه و عادل دايما يديرلها رايها ، بسييف فض علينا الغااشي انا والله مالاتية بواحد قاعدة غير مع ولادي سيراج و ريتاج ( اسمهم الحقيقي ) جاب ربي ماما و لبنات واقفين على الحالة و الدار ، كي راحو الغاشي هبطو لبنات و ماما التحت يوجدو العشاء و انا قعدت مع لولاد نسيي نرضع فيهم و واحد فيهم ماحب يحكم صدري تقلقت انا هكاك و دخل عليا عادل ( كان برا مع صحابو ) كي شفتو غطيت روحي و صدري و هبطت راسي ، مالنهار ولدت دخل بيناتنا البرود و الجفاف ولا نقولو فيا انا برك بغسك كي قاتلي الطبيبة بلي نحاولي الرحم عدت نحس روحي ناقصة و درت في بالي يجي نهار و يخليني ، جا عندي قدم باس لولاد و باسني على راسي بعدت قالي _ علاه ا نور وش مزال يقلق فيك حبيبي ( علابالو بلي مين نقلق من اي حاجة غشي كامل نفرغو فيه هو ) سكتت و هبطت راسي زاد قالي _ فهمتك على ماه تخمي و راح للصالون نسمع فيه يحوس على حاجة ، شوي و جا قالي طلعي راسك شفت فيه لقيتو هاز المصحف تنهد و قال ياربي سامحني بصح مالقيتش حل و دار ليا _ حق الله و المصحف و لكلام الغالي لي راني هازو ، ماراح يجي النهار لي راح نخليك فيه بسبت هاذيك الحاجة لي تخمي فيها و مستحيل نعاود الزواج كيما راكي تخمي افهمي يا بنت الناس راني نحبك و حبي ليك صافي و صادق ماشي تا عام و عامين حبي ليك عندو سنين و هو محفور الداخل و بربي نشاله تفرقني عليك و على ولادي غير الموت و حط المصحف و زاد قالي هنيني ا نور راني تعبت والله ، انا دموعي ويدان من كلامو الصادق و حنانتو و حبو ليا حطيت لولاد فالسرير ووقفت حضنتو قتلو سامحني على أي نهار قستك فيه وعلى أي نهار راح نقيسك فيه بغسك نعرف فمي سم ضحك و قالي نحملك نتي و لسانك و فمك و كلش المهم ماتبعدينيش عليك و على ولادي برك _ نشاله نبقاو دايما كيف كيف ....
هاذي هيا حكايتي و قصتي في هاذي الدنيا مزالت ماكملتش و مزالني مع حب حياتي و اولادي لي درك عندهم عامين كبرو و خرجو مابشبهولي في والو الزين و الطبياع كيفو بعد غير ريتاج دات من عندي تشراك الفم الحمد لله شهادة أعتز بها هههه ، المهم بالنسبة ل ماما إلى حد الآن علاقاتها مع عادل ماشي لاباس مزالت هازة عليه بصح مالنهار موت بابا الله يرحمو ماجبدتليش على الطلاق و لفراق منو بلاك شافت حبو و حنانتو ليا منعرف الله يهديها ، عجوزتي الله يرحمها ماتت عندها 8 شهر موتت ربي ووصلت ساعتها موتها حطمنا كامل و خصوصا عادل بصح الحمد لله صبر و راه يحاول يتعايش مع الأمر ، عائلة بابا مانروحلهم مايجونا أصلن دايما عندهم المشاكل و جدي و جدة قالك راهم في فراش الموت و منعرف ربي معاهم و يسامحهم هذا مانقول ، منار أختي تخطبت و قريب عرسها في نوفمبر ، خوتات عادل مزالو ساكنين معانا ( دار خوهم ) علاقتي مع منال كي الأخت لكن هوما ساعات نتعاركو و ندير المشاكل بصح جامي وحدة فينا رجعت الشي لي يصرا ل عادل ( عيرانا و مشاكلنا بين بعضانا ) ، هيه نسييتلكم حاجة هههه كولا رابيد زوج ب وحدة كولا رابيدة كيفو بعد ههههه ربي يحفظهم لبعضاهم و يبقاو لاصقين في بعض حتى الموت .
النهاااية ✨❤️❤️❤️