رواية أمواج قاسيه تكملة الحلقة 40 حتى 49 حصريه وجديده
 |
عدا عرس يهبل انا شطحت بردت على قلبي و العديان لي من لحمي و دمي راح يموتو ماجاوش جيهتي خلاااه حابين يسمطولي عرس ياخي زهيتو انا و خاوتي و معانا أخت عادل الصغيرة مام هيا تشطح معايا مش لاتية بيهم و لافامي تاع أمو ، كي ولا الليل جات ليا أختو الصغيرة يالله تلبسي لاغوب راهو طالع رحت لبستها و الماشطة عاودتلي شعري طلقتهولي جا خرجني زيد شطحنا على الغنية تاع بلال الصغير " راني جاي لداركم نسكت جواريينكم" ( سكتلي لافامي برك الجيران خاطيين ) خرجني مع زغااريت و ماما و أمو مدايرين حالة بالبكاء ركبني فالطونوبيل و انطلق ( رايحين للدار ماشي أوتال ) طريق كاملة ماحكا معايا حتى كلمة و انا راح نموت بالخلعة ماليلة تاع اليوم ، وصلنا للدار هبطنا و هز هو الفاليزة و دخل حل الباب و قالي تفضلي مرحبا بيك في حياتي ( منعرف علاه خوفتني الجملة هاذي ) دخلت طلعنا الفوق ل شومبرة تعنا لقيتها الله يبارك كبيرة و فيها دوش بعد الداخل و مزينة بالورد قالي _ عجبتك _ ايه مليحة تهبل _ راهو ليك الدوش باه تبدلي ، دخلت للدوش نحيت لاغوب عاودت شليت روحي و شعري ماقستوش مشطو و لميتو برك توضيت و درت روايح لبست ديزابي بيضة المعري كثر من المغطي حشمت حتى نشوف روحي فالمراية ههه لبست فوقهم طقم الصلاة و خرجت لقيتو قاعد على السريير بدل قشو و لبس شورط و تريكو ، انا كي شفتو معرفتش حتى نمشي اول مرة نكون معاها وحدي قالي قربيلي ، قربتلو كي وصلت ليه ضحك حكمني من يدي هبطني ليه و همسلي _ هاكي وليتي عندي درك نقدر ندير فيك وش نحب نقتلك نضربك نعدبك و ناض يضحك وقالي ولا تحبي نفضحك قدام الناس خير و غمزلي ، أنا تصدمت خزرت فيه قتلو _ وش وش راك تقصد عادل ياك ماشي وقت تمسخيير _ هههه درك تشوفي التمسخيير على أصولو....
الحلقة 41 💕
وقف وجبدني من يدي و طيحني على السرير وجا فوقي ،قتلو _ عادل وش راك الدير راك بديت تخوفني _ مام أنا راني حابك تخافي و بزااف تانا و نحالي طقم الصلاة بسييف ، شافني لابسة هاذيك الديزابي بقا يتفرج فيا و حاكملي يديا بيد و حدا و رجليا خاطفهم بثقلو ماقدرتش نتحرك باقية غير نقولو _ بعدني وش راك الدير, هبط ليا قالي وش رايك نفضحك ا نور _ وش تفضحني وشبييك عادل علاه راك تخرط وش درت حتى نتفضح _ ساهلة نفوتو ليلة هاذي كيف كيف كيما اي عرسان و مباعد كي يفوتو 3 أيام نطيشك في دار باباك نقلهم لقيتها ماشي بنت و سطرتها هاذو ليامات على وجه عمي وفرات هممم وش رايك مليحة الفكرة ، تشوكيت للحضة كنت حاطاتو راهو يتمسخر مي ظهر لا وليت نبعد فيه عليا بكل قوتي بصح ماقدرتلوش قالي حبسييي عليا خليني نخمم ، عابالك عمي كون نقولو هكاك وش يصراالو ولا لا _ بديت نبكي مالصدمة و زيد تخيلت المنظر ماقدرتش والله بابا يموت في بلاصتو ( هاذي رسالة لكل وحدة قبل ماتزوجي ديري سارتافيكا باه واحد مايقدر يتجرأ يهددك و يهدرلك على شرفك ) ،قتلو يعيشك عادل ماديرليش هكذا وش درتلك أنا ياك دايما تقولي نحبك وش صرالك اليوم _ هههه ماصرالي والوو هذا هو أنا ، مباعد بعدني ووقف يلبس في صباطو ، أنا وليت نرجف تمنيت نكون راني نحلم مستحيل وشي هذا ياربي علاه راه يديرلي هكذا في هاذيك الدقيقة تفكرت هذرت ماما كي قاتلي راني خايفة يكون حاب ينتاقم منك و ياخد بتار باباه ( وينك يا ماما ويينك راهم صدقو لي قالو لي مايخدش راي أمو حجرة تهد فمو إحساسك يا الغالية جامي يخيب) بصح أنا مستحيل نسكتلو و قفت رحت جيهتو كان خارج غلقت الباب طلع حاجبو _ وش تسحقي عند ربي بعدي من وجهي _ مالا زوجتني باه تاخد ب تار باباك مني والله ماتحشم كذاب خداع أدا هو لي تقولي انا مايهمنيش مانخممش كيفهم و تقولي نكره الكذب و نتا راك تكنبص من سنين باه تزوجني و تنتاقم لباباك و تحطمني ضربتو على صدرو بصح راك غالط أنا راني نور نحطم ما نتحطمش فهمت حطها ملييح في راااسك ا سي عادل ، حكمني من يدي لي ضربتو منها دورها ورا ظهري و لصقني فالحيط _ تخمام هذا يخمملو غير الجايح لي كفك ، انا كون عيني ننتاقم من باباك راني نضرو هو ماشي نتي فهتي العين بالعين و السن بالسن و لي يغلط هو لي يخلص ماشي غيرو و عمي ماعندو مادخلو بيني و بينك عمي على عيني و على راسي بصح نتي والله مانرحمك والله ماننسالك نهار لي طيحتيلي بكرامتي و رفضتيني و أنا ناوي لحلال و الله ندمك على نهار لي خممتي تزوجي بوليد و تبيعيني والله ماننسالك نهار جا ليا الن.... تا ولد خالك و قالي راني خاطبها و راهي مرتي مانسحقكش دور جيهتها ا ز.... واحد كيف هذاك تخليني على جالو ، ونفكرك نهار حطيتي كلمتي ف تر.... و عفستي عليا كيشغل طحان أنا مانيش راجلك و عندي الكلمة علييك و لقيتك خارجة من دارو و تقوليلي راني فالدووووش و بدا يعيط ،قيمتي ورجولتي جامي تجرأ واحد و قاسني منها تجي بنت البارح تلعب بيا ، ضربني على راسي _راني دايما نقلهالك ا نور إتقي شري و ماتستفزيش رجولتي باه مانلعبزلكش أنوثتك بصح نتي هذا و يضرب في راسي كاين فيه حمار راقد بصح راني انا لي نوضو ماتخافيش ، و درك قودي عليا ماتسالي مني واالو و مذابيك مادوريش بيا و توقعي مني كلش اي حاجة تجرحك و تحطمك راني ندييرها و درك راني رايح نفري واحد الشغل و نجيك نخمملك في حاجة مليحة نديرهالك و غمزلي و قبل مايخرج هز تيليفوني و راح ، هو خرج و أنا طحت فالأرض نبكي و نندب شعري هبطتو منحبش واحد يضلمني منحبش نحس روحي ضعيفة و مانقدر ندير والو وش راح ندير مانقدرش نرجع حتى لدارنا الناس كل تستشفا فياا و أولهم ماما راهي نبهتني 1000 مرة منو ياربي لعزيز وش دااني ، هففف ليلة لعمر تحولت لليلة الشر بصح لحاجة لي متأكدة منها جامي راح ننساها .. ...
ديري لايك يا المسمومة 😘
الحلقة 42💕
بقيت طايحة فالأرض و نبكي مخي حبس مالتخمام علاه راه يديرلي هكذا يا ربي هذا ماشي عادل لي حبيتو انا حبيت إنسان واعي و حنين ماشي حڨار كيفو حسبي الله و نعم الوكيل فيه ، مافقتش مع روحي من البكاء و الغش رقدت هكاك فالأرض نضت الصباح بصح لقيت روحي فوق السرير و مغطية عرفتها بلي هو لي هزني حيوان منعرف شكون عطالو الحق يمسني و يحط يدو الخامجة عليا ، بقيت فالسرير نتقلب و نخمم ونتفكر في كل كلمة قالهالي لبارح ، سمعت الحس برا الشومبرة عرفتو بلي راهو هنا المكلوب كنت واقفة ليه حتى سمعت تيليفوني يصوني بجنبي شفت لقيتها ماما هفف راهي باينة على ماه راح تسقسي وش نقلها أنا درك هففف هزيت _ ألو _ لاباس بنتي _ الحمد لله _ ليلتك عدات لاباس ياخي _ ( لالا ليلة و عليها الكلام ) ايه ا ماما _ الحمد لله مبروك عليك و تنهدت _ وشبيك ماما تباني مقلقة وش صرا _ شوفني نقلك بصح ماتتخلعيش انا راني فالسبيطار درك ، وقفت على طولي _ أخااه ماما وش صرا وش كاين فهميني _ وليد ولد خالك لبارح فاليل لقاوه مرمي برا فالشارع سايح بدمو ا بنتي ماعلابالناش حتى وش صرالو ، جا في بالي طول عزرائيل لي راني مزوجتو هاذي فعايلو باينة _ وش قالكم الطبيب ا ماما و وليد مقالش شكون ضربو _ راهو مزال دايخ وليد لدرك مافاقش مسكين و الطبيب قلنا عندو بزاف حالات كسور و سكتت و قاتلي روحي برك ا بنتي مانفسدلكش نهارك ( راهو فازد من عند ربي ) وزيد راني مع الناس خلي مباعد و نعيطلك _ نشاله ا ماما و طمنيني عليه _ نشاله صحا و كوبات ، أنا وقفت طول خرجت مالشومبرة نحوس على المكلوب لي طيحني فيه ربي لقيتو فالكوزينة قاعد و يفطر تحسب صح عريس و اليوم صباحية عرسو و قفت عند راسو هو مالتاش بيا كمل ياكل و في عقلو تانا قتلو _ نتا لي ضربتي وليد باينة نتا لي خليتيه مرمي براا ( نهدر و نعيط ) و الله مانطق كلمة مكمل ياكل انا تقريب هبلت جيت قابلتو في وجهو قد قد و نحيتلو الصحن من قدامو و قتلو بالعياط _ ياااو راني نهدررر م قبل مانكمل هدتي لقيت روحي لاصقة في حافة الطابلة و هو مزير عليا _ نقسي رب صوتك عليااا ، ايه أنا لي ضربتو غااضك الحال عليه ، _ نتا مرييض وش دارلك مسكيين ، قفلي فمي بيدو _ ماتقوليش مسكيين أرب بلعييي علياااا و زيد ملخر باه نهنيييك من جيهتو راني قلبتهولك مداامة راهوو فااسد ،و نحا يدو و بعد عليا_ كييفاااه عادل منيتك وش راك تهدر و نضت نبكي عادل قلي راك تتمسخر لا ماديرهاش و حطيت يدي على وجهي يااه نندب خسرتي حياة إنسان مسكين دمرتيه وش داارلك يا ربي وش داارلك ياك ذنبو الوحيد كي حبني بصدق و انا كي الحمارة فرط فيه ، عطاااني بوحد الكف ودنيا صفروو و حكمني من شعري و جبدني ليه _ كييفاه فرطي فيه ا رب العاالي وش تحبيني ندير فيك درك أنا وش حاااابة و يزير عليا من شعري ، أعدلي رب فمك معاااايا ا نووور راني خايف ندير فيك حاجة و نتقاس أنا كثر منك تسما أرحمي روحك و أرحميني معاااك ، و طلقني و راح بدل حوايجو و ردخ الباب و خرج ،رحت طوول للشومبرة سيبو لازم نعيط ل ماما و نحكيلها كلش سيبو مانقعدش عند حيوان كيما هذا والله يعدبني مايرحمني ......
ديري لايك يا المسمومة
الحلقة 43💕
رحت للشومبرة نجيب التيليفون حوست عليه فوق سرير مالقيتوش يارب ياخي حطيتو هنا ، خرااااا باينة داااه الله لا تربحو وليت نحوس فالدار على تيليفون فييكس مكانش قلت باينة لتحت يكون كااين رحت نفتح الباب تا هذا ليطااج لقيتو مغلوق حيواااان غلق عليا حاب يحبسني، بقيت غير نخمم في وليد شحاال غاضني مسكين زعما وش دارلو بعد جاوني كامل الأفكار في راسي تغميت أقسم بالله تقريب هبلت وانا حابة نفهم ، انا هكاك ناكل في بعضايا و هو جا رحت نجري لقيتو يغلق فالباب قتلو _ علاه غالق عليا و اعطيني تيليفوني هنا خزر فيا و عدا للشومبرة لحقتو _ ياني نحكي معاك أصلن فهمني وش درت لوليد بعد فهمني راسي راح يطرطق ماتقليش مسيتيه _ أقفل فمك و أعدلي كلامك معايا و أحشمي مانيش مهبول ( لالا مش مهبول خلاااص سامحنا حنا لي مهابل ) نمس راجل و نخسر روحي معاه بلعي علياااا _ مالا ضربتيه علاه ا عادل علاااه راهو حرام علييك ، قربلي همسلي قالي _ باه تخمي في روحك و فينا و تسيي ترضيني باه تربحي راحتك و تهنينا وليتي تحكيلي على وليد علاه راكي ديري فينا هك أصلن ولد خالك نتي سبابو راسك لخشين لي خلاني نضربو عقليتك لي خلاتني نقلب بيه الطونوبيل بسبتك كنت راح نقتل عبد ، غلطاتك يا نور لي خلاتني نولي هك راني دايما نقلك ماتخربيش فيااا راني نولي ماشي ملييح مي نتي لا غير تزيدي فيها أقسم بالله بعد الأكسيدو تاعو كنت راح ننسا كلش و كنت ناوي نروح و نطلب منو السماح مي نتي زدتي ڨعرتيييها و لقيتك خاارجة من دارو و ضاربة الحطة و كاذبة عليا تاني وش حابتني نديير فهمييني برك و درك جاية بكل صحانية وجه و تحكيلي عليه ياااااو أقفلي فمك علياااااا_ تسما دار أكسيدو بسبابك تسما وش قالي كامل كان صح ، حكمني من دراعي و ناض يعيط _ وش قااالك ا رب وش حكيييتو أنطقي _ نحي يدك عليا ماتمسنيش وحش أنا مستحيل نقعد مع واحد كيفك قادر يقتلني و يضرني في اي وقت بعدني و أخرج من حياتي _ ماشي ساهلة تبعديني عليك و تخرجيني من حياتك يا معايا يا مكاانش ، ضحك و ماتخاافيش راني نضر الناس كل بصح نتي لا و باسني على راسي و دخل للدوش مباعد عاود خرج قالي وجديلي لغداء حبيبي ندوق ماكلتك و دخل ، شوكاني شوك لحمي الشعر لي في صبع رجلي وقف من هدرتو و كلامو ياميمتي توخدت في حياتي و زوجت مهبوول ياربي حابني نطيبلو لغداء ياكل السم نشاله و نتهنى منو ، مريض نفسي ( المهم السبان تا ربي كامل سبيتهولو ) و قعدت فوق سرير مباعد خممت نشوف في ڨوقل زعما وش راح يصرا ل وليد كي ضربو قتلني تأنيب الضمير من جيهتو ، هزيت التيليفون و كتبت أصرار ضرب الرجل على... جاتني "قد يؤدي الى العقم اذا تقطعت انابيب البريخ ولم تعد المنويات قادرة على الوصول إلى البروستونا و القدف للوصول إلى التلقيح و الاخصاب ، و قد تكون الضربة عابرة و تعود الأمور الى مجاريها بعد فترة من الوقت " ، الحق مافهمت والو المهم فرحت كي قريت بلي قادر يرجع نورماال ....
ديري لايك يا المسمومة الزينة 😘
الحلقة 44💕
خرج مالدوش لقاني قاعدة و حاكمة التيليفون جا طول نحاهولي من يدي خزرت فيه لقيتو لابس غير شورط و مالفوق ما لابس والو و شعرو مبلول ( كون جات دنيا دنيا كون راني نتمتع بالمناظر الخلابة ماشي فالمشاكل ) قتلو _ وش راك الدير رجعلي تيليفون علاه تهز فيه بلاما تشاورني ، خزر فيا و ردخو على الارض ( عطيه ردخة خسرة عليه دم فادي باه شريتو ) _ وشبييييك _ ا دين ربي وش دخلك في ربو و الأضرار لي راح تصرالوو نتي حابة تخليني نقتلو ا ز.... باه تتهناي علاه تحوسي عليه فهميني برك وش تحبيني نفهم انا مالجاست هذا _ ماتفهم والو ولد خالي و غاضني و دارلي تأنيب الضمير من جيهتو بغسك سي راجلي هو لي دارلو هاذي العاهة المستدامة و بسبابي تانا و تحبني مانعرفش وش راح يصرالو لكان نتا بلا قلب و ضمير و تقدر ترقد نورمال فاليل انا لاء _ عابالك والله راني مطول معااك باالي خلاااه و أو بدا صبري يفض معاك خافي ربي فالناس لي تعرفيهم و أرزااني ا طفلة _ كييفاه _ اوقفي ديريلي ناكل اوقفي _ مانديرش غلبانة و ماهيش نافحتلي تخنزر فيا قالي _ نروح نجيب من برا و نجي، كي عدتي عروس برك نفوتلك هاذي السمانة مباعد ساهلة و خرج( طريق السد تدي ما ترد ) ،انا طابست هزيت التيليفون لقيتو تكسر بصح مزاال يمشي قلت لازم نعيط ل ماما و نحكيلها و تجي تمنعني من المكلوب لي راني مرتبطة بيه ، عيطتلهاا شحال من خطرة ماهزتش وليت عيطت ل منار هزت _ الو منار وعلاه ماما ماهيش تهز عليا _ وشبيك ا طفلة مخلوعة مكان والو راهي فالسبيطار لدرك ماروحتش تكون ماسمعتوش برك _ ونتم روحتو ل دار سيبو _ هيه باينة وش نقعدو ندير لتم كملنا الواجب و روحنا _ وش حوالو وليد _ لاباس راهو فطن قبيل شوي _ ( تخلعت ) و ماقلكمش شكون ضربو _ لالا ماشافوش قلك الضلمة و زيد جاني مالوراء _ و حالتو كيفاه ا منار اختي احكيلي _ نور ا طفلة ياخي راكي لاباس من وكتاه يغيضك وليد راهو باينة لاح روحو في كاش زبلة و هو مايقدرش عليها ضربوه _ الطبيب ماقالكم والو كيفاه راح يولي _ وش يولي ا نور مافهمتش وش راكي تروي عليا و أنا درك وين دخلت للدار راهي ضاربتني السخانة على و مانيش راقدة خلااه غير قولي ملخر ، مالقيتش كيفاه نجبدلها لحكاية حشمت و زيد معرفتش وش نهدر وليت قتلها _ ماما قبيل قاتلي راهم قاسوه من وحد الجيهة و هيا كانت خايفة عليه ( تسمع ماما بلي نزيد عليها فالهدرة تاكلني ) و ماحبتش تقولي وشي هيا لبلاصة و أنا توقعت المهم اك فهمتيني ا منار وش توقعت _ هههههه والله هبلتي صح نتي زوجتي ماليلة لولة وليتي تحكي على ذيك الحاجة ههههه _ أهدري برك _ ماصرالو والو نتي لي مخك خمجهولك نسيبي وليتي تخمي غير لتم الطفل ضربوه على راسو و كسرولو يد و رجل برك ماما باينة كانت تقصد حاجة من هاذم يا الخامجة هههه _ صح ا منار متأكدة مكيش تكذبي بيااا _ نور أختي كشما مخبيا علينا وشبييك من وكتاه يهمك وليد و لبلاصة هاذيك بعد معولة تطلقي و تزوجي بيه و حنا لاخبر _ بلعي شو هاذيك الهدرة راني نسقسي برك وزيد راهو غاضني مسكين ربي يشفييه _. نشاله و درك أخطينا منو و قوليلي كيفاه راكي يا العروسة وش حوالو نسيبي لعزيز _ لباس علينا هيا روحي مباعد و نعيطلك راحو جا صحاا و كوبيت ، الحمد لله والله غير فرحت خلاااه تسما كان يكذب بيا برك بصح علاه مافهمتش وش الفايدة ....
ديري لايك يا المسمومة 😘امواج قاسية
الحلقة 45 حتى 49
قلت لازم كي يجي نسقسيه علاه يكذب بيا مباعد خممت مانهدرش خيير مانزيدش الطيين بلة هو أصلن مش حامل وليد و أسمو كون زيد نجبد عليه المرة هاذي تاع الصح يقتلو ، وقفت رحت للخزانة نبدل مالبارح و أنا لابسة هاذيك الديزابي البيضة لا حشمة و لا حياء ، لبست بيجامة فساتان بوغضو جاية ضيقة شوي و مشطت شعري لميتو و غسلت وجهي توضيت صليت دعيت ربي يهديه وفرات درك سيبو طفرت فيا و راني مرتو و علابالي كون نحب نرجع ل دارنا مايخلينيش و يصراو مشااكل و فرااات و لي يستشفا فيا كثر من يقول عليا وخدي ، و انا فالحقيقة مزال عندي أمل يتصلح زواجنا ، كملت نحيت طقم الصلاة و فرزت هاذيك الشومبرة انا هكاك و هو دخل جاب معاه لغدااء فات للكوزينة و قالي ألحقيني ( تحسب كلبة تاعو انا ) درت روحي ماسمعتوش و كملت نفرز ،شوي و جا ردخ الباب و دخل _ وشبيك نتي راني قتلك ألحقيني علاه ماجيتيش _ ماسمعتش ( نهدر معاه و أنا عاطيتو بظهري ) _ دوري ليا هنا و أخزري فيا و أهدري ، سكتت ( مليحة هاذي حتى الهدرة يقولي كيفاه نهدر ووش ندير ) ، حكمني دورني ليه _ علااه راسك خشين معاايا امشي قدامي تتغداي _ شبعانة _ الله لا كليتي و راح وخلاني ، حيوان برك ماحولنيش حتى و انا راح نطييح مالجوع ماكليت والو من لفطور تا الباارح ، كملت فرزت الحالة رحت للكوزينة لقيتو مكانش لميت الدنيا من تم و لقيتو مخليلي غدايا بصح تاع الصح جيعانة بصح مش قادرة ناكل اول مرة تصرالي بلاك مالخلعة و الشوك بزاف تقفلت لابيتي ، سمعت التيليفون يصوني رحت نشوف لقيتو هازو شاف شكون و مدهولي تخنزرت فيه و خطفتو من عندو لقيتها ماما قعدت على سرير و هزيت _ الو ماما لاباس _ الحمد لله بنتي لعزيزة وش حوالك اني لقيت ليزابال تاعك درك وين روحت _ هاا اكي فالدار مالا _ ايه , محبيتش نسقسيها على وليد علابالي يكرز عليا , _ حقا بنتي اسمحيلي اليوم مقدرناش نجيو باه نديرو الصبوحي راهو حكا باباك مع عادل و أجلناه لغدوة و فرات والله سمحيلي تلهيت مع ولد خالك علابالي كون مانروحش يغيضهم الحال و مرة جاية يولو يسمعوني لكلاام _ معليش ماما براحتك خلااه ( انا أصلن نسيت على حاجة يسموها صباحة و تمسخير نسيت لكان راني عروسة مالأساس ) حكينا شوي بكيت شوي بغسك توحشتهم و زيد حاسة روحي تسرعت كي زوجت سيغتو من عبد كيما هذا علابالي راح نتعب معاااه بزااف ماما مسكينة غير تصبر فيا تقولي راكي تدللي وفرات كي تتوحشيني يجيبك لينا راجلك مهم كملنا حصة البكاء لي درتها و كوبيت ووليت نمسح في دموعي تخنزرت فيه لقيتو قاعد على السريير و يتفرج فيا حطيت تيليفون و جيت واقفة حكمني من طرفي و جابني عندو باسني على راسي و قالي نحبك والله ، ووقف خرج و خلاني انا تشوكيت منو هذا تاع الصح مهبول شوي يسبني و يعدبني و شوي يحبني و يولي حنين عليا ربي يستر وفرات و حطييت راسي و رقدت ( ناقصة نوم خلاااه أيامات العرس كنت نرقد فالنهار 3 ساعات ولا 4 بغسك كنت نسهر معاه مباعد نوض بكري نخدم و لعشي نقضي حواايجي ) ......
الحلقة 46💕
شوي و حسيت بيد فوق راسي ( قصدي حجرة سخونة برك ) حليت عينيا لقيتو في وجهي تخلعت و نضت _ وشبييك _ والو ( واحد راقد ينوض يلقا وحش قدامو و حابني مانتخلعش )_ عندي ساعة و أنا نوض فيك شكارة والله لا فقتي _ صح! ماحسيتش و أصلن علاه تنوض فيا راني درك وين رقدت خليني نريح على الأقل ولا هاذي و ستخسرتها فيا _ بلعي قالو درك وين رقدتي منيتك علابالك بلي راهو أذن العشاء _ وشياااا تتمسخر بياا ( ياه ننذب رقدت قبل ما يأذن العصر ) _ مش مصدقتني نوضي شوفي الساعة وحدك ، جيت نوقف من بلاصتي حسيت بالدنيا دور بياا ( باينة كثر من 24 صايمة ) عاودت قعدت و حكمت راسي _ قرب عندي و طابس تحت رجليا و قالي _ وشبيك نور صفا _ منعرف حاسة روحي دايخة و راسي يدور _ وش كليتي اليوم ، سكتت _ يااو راني نهدر ا رب _ والو ماكليتش , ناض يعيط _ علاه ا رب تسما نتي ما تطهلاي لا في روحك لا فالناس مانلومش كي راكي مش لاهية بيا ، تخنزرت فيه شو انا فاه و هو فاه _ هيا أوقفي تاكلي يلااا و ماتهدريلي حتى كلمة _ خليني لا مانيش قادرة نوقف حابة نرجع نرقد , وقف طول هزني _ ياااا سيبني وشبيك ووليت نضرب فيه ( نخرج فالغش و الدمار لي دارهولي ) ماهدرش معايا داني طوول للكوزينة و حطني فوق الكرسي و راح جبد لحوايج لي جابهم قبيل من الفرجيدار سخنهم و حطلي فوق الطابلة _ يالله كولي ، درتلو ب راسي تا لا ماناكلش _ تاكلي وحدك ولا نوكلك انا كي عدتي ذري صغيرة _ انا !!_ ايه ذراري صغار و مش هكذا و أنا نقول كيفاه تحاملتي مع لولاد فالحضانة و ياتاريكي راكي كييفهم بعد ، مخلانيش نهدر و قالي _ كولي راني علابالي بيك راح ترجعيلي الهدرة و راح نولي فالمشاكل و المشاكل يتحولو حاجة خلاااف و انا من عند ربي قلقان تسما غير مكلاه ا نور و كولي ، تخنزرت فيه و بديت ناكل و الحمد لله انا مانوقف حتى نخلص كلش و ندير اكرام الصحن و الطابلة قالي _ بصحتك حبيبي و صبلي الماء و شربني ( حسيت روحي صح بيبي صغيير ههه ) _ نعرف نشرب وحدي ماقتلكش شربني _ علابالي تعرفي ديري كلش نتي سيغتو كي تحبي تقلقيني ، قوليلي راحتلك شوي الدوخة _ باسها طاح قشها ( مثل نقولوه ) هصبر درك وين كليت ، ضحك و قالي _ أرواحي عندي نبوسك و نشوفو كيفاه يطيح قشك صح _ أحشم ا عادل _ وش نحشم ا رب حسستيني راني نحكي مع صحبتي ياك مرتي _ على ورقة برك _ أرواحي أرواحي درك نخلوها على ورقة و على حيط و فراااش و بدا يقربلي ، بعدتو _ وشبييك نتا غير مكلااه تمسني راهو يفوت شويا وقت و نطلقو و منا لهذاك الوقت نتا في حالك و انا في حالي كيما قلتيها لبارح ماندور بيك مادور بيا ، تسما يعيشك ماتفسدنيش حبيت نقعد جديدة .....
ديري لايك يا المسمومة 😘
الحلقة 47💕
ولا كي البركان حكمني من وجهي بيدو زيرني ، حسيت وجهي راه يطرطق بين يديه مقدرتش حتى نبعدو ولا نهدر معاه كلمة _ تسما نتشة تا العقل لي قعدت عندي راح تنحيهالي، نتي وشبيك برك ا رب جبتك عندي باه نخليك جديدة خوك أنا ، شوفي راني لدرك نسايس فيك بصح أنا هاني خارج نص ساعة نجي نلقاكي موجدتلي روحك ولا ورب العزة تشوفي وش ندير فيك بغسك نتي مش معاك العبد يكون مليح و حنين تحبي التزيار و الضرب ، دزني وخبط عليا الباب و خرج ( بربي نشاله لباب هذا نزيدولو يومين و نودعوه راح يطيرو من لخبيط ) ، قعدت فوق السرير نخمم وش ندير مستحييل نخليه يمسني لبارح كان يقولي نفضحك قدام باباك و اليوم يطلب فيا ،لمهبول هذا مانديرش فيه لامان مانيش عارفة وش ناويلي وزيد والله تاع الصح ماعنديش لكوراج للحاجة هاذي لبارح كي كنت عروسة و نحيت الخوف و تقدمت ليه بكل نية و حب و سلمتلو روحي و نفسي كي الجايحة صدني و سبني و هددني و خلاني مرمية فالأرض و نبكي و خايفة من مصيري معاه و اليوم حابني ننسى كلش و نخليه يقيسني و يديلي شرفي لي كان راح يطعنلي فيه و يحط راس بابا فالأرض و الله مايشوفها نخليه هكاك لكان هو راسو يابس انا راني بنت عمو و راسي خشين كثر منو ، بقيت نخمم و نعس فالساعة كون تكمل النص ساعة لي قالي عليها علابالي يدخل عليا كي الثور الهايج ويدي وش حاب مني حتى كون يغتصبني همجي و يديرها ( مكلوب ) بقلم آية أميرة ، خممت قلت نروح للشومبرة لي مقابلتني و نقفل الباب على روحي و نخليه يعيط حتى يشبع و يروح يرقد و لكان كسر عليا الباب اول حاجة نديرها نتعرا و نشرع رجليا مانستناهش هو لي يديرها خلااص ههههه ، جبدت بيجامة وديتلو لمخاد و الغطاء كامل لي لقيتهم الفوق ( يرقد على الحجر اليوم ) بقلم آية أميرة ،و رحت نجري غلقت على روحي الشومبرة و قعدت نستنى شوي و سمعت الباب تفتح حكمت قلبي ( نخاف منو والله كاش نهار يحبسلي قلبي ) كي مالقانيش ناض يعيط عليا _ نور ويينك ، شوي و جا يفتح فالباب تا الشومبرة لي راني فيها لقاه مغلوق خبطو واحد الخبطة أقسم بالله كون زاد الزاوجة راني خرجتلو نجري بلاما نخمم ، مباعد قالي _ ديري راايك مليح و نشوفو وين يوصلك الراي التالف ، حتى و ماشي اليوم غدوة ماعندك وين هاربة مني بصح أقسم بالله نهار طيحي في يدي مانرحمك ا نور اشفاي مليحة برك على الجاست تا اليوم ( نسا هو الجاست تا الباارح ) ، وراح انا كيشغل تهنيت علابالي راح نخلصها غالية مي المهم درت رايي و ماخليتوش يدنا ليا كيما دلني لبارح ندلو و 1000 مرة تانا ، حطيت راسي راح نرقد ( تحسب مارقدت قبيل زير نوم صح ) سمعتو يعيط _ تسما حارمتني من حقي و المخاد و الغطاء مانرقدوش معاك نتي ولا وش، الناس تجيب نساء عقل و ثقل و أنا نجيب ذراري تحسب حرقت الجوامع حتى ربي بلاني بلفعة كيفك ، بصح وش راح ندير القلب لحمة ا دين رب ، و فتح الباب و خرج ( باينة راح يجيب من تحت ) ، ضحكت نشبعت هههه مليحة فيه باه مرة جاية مايدورش بيا ، عدلت بلاصتي و دورت بيا المخاد و رقدت مرتااحة هههه ....
الحلقة 48💕
نضت الصباح بكري خرجت مالشومبرة رحت طليت عليه لقيتو راقد لي يشوفو وهو راقد يقول ملايكة و هو فالصح نار تحت التبن عديت جبدت غوب تحت الركبة شوية ، و دخلت للدوش دوشت و مكرة شعلت السيشوار نشيح في شعري باه يفيق بغسك علابالي نومو خفيف هو لي قالي قبل ، كي كملت خرجت لقيتو في وجهي تخنزر فيا و ضربني على كتفي و فات لدوش ،قتلو _ صبح صباح ربي و عديت للشومبرة لهزيت التيليفون لمكسر هذاك ( اعطيه كسرة نشاله ) لقيت لابال تا ماما عاودتلها قاتلي _ شوي و يجو ( حنا عادتنا نجيبو لغداء للعروس و القهوة ) بقلم آية أميرة ،رحت زربة وجدت روحي وحدي ( درت مكياج سامبل و كالعادة لازم نكحل عينيا ) شعري طلعتو و درتلو لمة خفيفة لبست قفطان سامبل فا الأخضر جيت حلوة نهبل سامبل و كيوت ، صورت شبعت تصوار ، و زاد طلعت عندي عجوزتي شايخنا شوي و عادل ملي خرج مارجع شكيت راح يجيب دارنا ، شوي و جاو تا دارنا سلمو عليا ماما ملي شافتني و هيا تبكي و تسقسي وش حوالي مع راجلي تقول حاسة والله ، بابا مسكين ماقدرش يطلع قعد التحت ، هبطو خاوتي يوجدو الغداء و يديرو الغناء و ماما قعدت معايا قاتلي كي جيت لقيت عمامتك و عمومك و جدااك و جدك قاتلي واحد فيهم ماعبرنا باباك مسكين راهي دايرتلو غصة في قلبو غاضني مزال لدرك يحوس يرضيهم و هوما مش لاتيين بيه مين نقولو خطيك منهم و نساهم يقولي والديا ولازم عليا نرضيهم قبل ماربي يهز أمانتو مهما يديرولي يقعدو تاج فوق راسي _ أنا حايرة من أي صنف بشر هوما كيفاه يقدرو يحقدو على ولدهم ا ربي و أصلن علاه جايين لصباحتي مكفاش حملتهم في عرسي زيد نلقاهم اليوم بزااف علياا _ درك لازم علييك تحمليهم حياتك كاملة ماتنسايش راهم عايلة راجلك هاني علاه ماكنتش قابلة بهذا الزواج غير بسبتهم مي درك سيبو تفرطت ربي يهنيك برك و بعدي عليهم على قد ماتقدري حبيبتي راهم يموتو على المشاكل ،نتي تلهاي بدارك و راجلك و أعرفي كيفاه تكسبيه ليك و نوصيك ا حبيبتي عليك و على حلاوة اللسان معاه كيما يقولو ناس زمان اللسان لحلو يرضع اللبة ا بنتي الغالية درك راكي كبيرة و تا دار و مسؤولية خطيك مالجياحة لي كنتي ديريها قبل لازم ترزاني و توزني هدرتك مليح قبل ماتخرجيها من فمك و عليك و على الصبر مهما وش يصرا ماتزربيش طول للعيب كوني دايما نتي العاقلة و الرزينة بغسك فالعلاقة الزوجية لمرأة لي لازم عليها دير لعقل و تعرف وش دير ماشي راجل داكور ا بنتي لغالية ( تحسب عادل لي وصاها تقولي هك مي علابالي كلامها كامل صحيح انا نعرف روحي طايشة و لي قيسني نخلفهالو و بعقليتي هاذي راح نتعب بزااف مع عاادل ) بقلم آية أميرة ،_ نشاله ا ماما ، باستني على راسي ، شوي و هبطنا التحت انا الحق ماسلمت حتى على واحد بخلاف بابا طلقت السلام عليهم و فرات ( على وجه ربي برك ) هوما غير يتخنزرو فيا و لامين بعضاهم في شوكة أقسم بالله يعيفو صح الحمد لله كي بعدنا ربي عليهم تاع الصح مايتحملووش ، مهم فاتت هاذيك الصبوحية على خير تغدينا و شطحنا شوي انا لبست غير قفطان و غوب تاع طرز بغسك عيانة و مش قادرة نبقا نطلع و نهبط باه يشوفوني هاذوك اللفعات و اللفاعي ، كي كملو تا دارنا القهوة لمو الماعن غسلوهم لبسو بعد قشهم يروحو و انا ماقتلهمش لا زيدو معايا بغسك علابالي مش حابين يقعدو مع الزبل كثر من هك رحت معاهم وصلتهم للباب وبكيت نشبعت انا و هوما حتى خاوتي لحجرات و قالولي نتوحشوك ، ودعتهم وسقسيتهم شكون راح يوصلهم قالولي عادل ( هذاك نهار كامل ماشفتوش حتى فالغداء كي قاتلو أمو نحطلك نتا و مرتك ماحبش قالها ناكل مع الرجال و هيا تاكل مع النساء محسوب انا ميتة باه نقابلو ) غلقت الباب و مسحت دموعي و عدلت روحي ( باه مايسشفاوش ههه ) و رحت للصالون عند العديان دخلت و ساميت عجوزتي و قعدت ، انا غير نتوانس مع خالتي فاطمة و أختها الباقي ماهدت معاهم حتى كلمة حتى نطقت عمتي لكبيرة ( السم لكبير ) قاتلي _ نور بنتي اوقفي جيبي المارة نشوفوها ( جاب ربي مكان حتى راجل برك غير نساء ) .....
الحلقة 49💕
_ وش تقصدي ا عمتي بكلامك هذا _ ماقصدت والو حبيبتي هاذم عادات و تقاليد تعنا _ تعكم ماشي تاعي هاذي الحاجة بيني بين راجلي حاجات خصوصية واحد مايشوفها و مايتجرأش أصلن و يعيشك قصي عليا لحكاية هاذي قلقتني ، نطقت بنتها ( وحد التعلوبة و جاية زوج عواد و طوييلة لازم نجيب سلوم باه نقدر نشوف راسها ) _ نشوف فيك خايفة علاه كشما كااين _ ههههه من ماه راح نخاف _ هاذي هيا عادتنا و مدام مزوجة من عايلتنا لازم عليك تطبقيها ( لي يسمع انا جاية من عائلة خلاف ) بقلم آية أميرة وقفت و قتلهم _ كي وليتو راح تطعنولي في شرفي و شرف راجلي درك نعيطلو هو يتفاهم معاكم على الحاجة هاذي و ماتنساوش تقولولو راهم عادات و تقاليد تعنا و غمزتلها و هزيت التيليفون حبستني عمتي قاتلي _ وشبيك هذا ماليوم لول راح تبداينا بالمشاكل حنا حكينا معاك نتي علاه دخلي فالراجل هاذي المارة تاعك ماشي تاعو _ لالا لمارة هاذي تاعو هو كثر ماتكون تاعي كي راكي تسقسي و شاكة هكذا تسما راكي تقولي على ولد خوك ماشي راجل أنا هذا وش فهمت و هذا وش راح نقولو _ ياه نندب ياه نندب اك تشوفي ا فاطمة وش زوجتي لوليدك راهي لفعة الطفلة راح ديرلي مشكل بيني و بين ولد خويا لعزيز الغالي _ عمتي شكون راه يدير فالمشاكل أنا ولا نتي ، سكتتنا عجوزتي قاتلنا _ سيبو أسكتو في زوج و نتي ا رقية ( اسم الافعة) بقلم آية أميرة، ماشي حق عليك تسقسيها و تحرجيها هكذا قدام الناس و زيد هاذي الحاجة تخصهم هوما أنا أمو و ماتهمنيش بغسك نعرف كنتي وش تسوى وولدي كيفاه داير قصو علينا هذا لكلام لا زيد يدخل عادل يسمعكم والله يهججنا كل مالدار راكم تعرفوه كيفاه داير ، سكتت و دارت توشوش مع اللفعات لوخرين ( أدوك قاعدين كامل يتفرجو تحسب سينيما وحدة فيهم مانطقت ) ، انا قعدت شكرت عجوزتي و طلبت منها السماح قتلها ماقصديش نرجع الهدرة و نعلي صوتي بصح والله مافقت مع روحي كيفاه نفاعلت _ معليش ا بنتي علابالي بيك ماشي غالطة راني نعرفها ملييح ملييح مرة جاية أزليها و كي تهدر معاك اوقفي و خليها ماتكسريش معاها راسك خلاه تجنبيها و تجنبي مشاكلها و ماشي نحكي عليها برك راهم كامل كيف كيف _ نشاله خالتي يعيشك ، شوي و دخل عادل لاح السلام و قعد بجنبي بصح حتى الشوفة ماشافهاش فيا أدوك هوما شافوها تقول نبي طل عليهم ناضو يضحكو معاه و يشايخو و هو كلمة قص أصلن يبان من وجهو مقلق و ماشي حامل حتى واحد كي كثرو بالهدرة قالهم _ أنا نطلع نريح شوي مباعد نشاله ، راح و مادارش حتى ليا أنا قلقت من تصرفاتو معايا حتى أختو فاقت بلي متعاركين قاتلي _ جيتي في نهار بدلتيلو مورالو مسكين ، تخنزرت فيها و وقفت مش قادرة نتزايد معاها فالهدرة علابالي نجيبها مالشعر بغسك انا روحي مش حاملتها ، رحت للكوزينة لي لتحت نطلع معايا الماء بغسك الفوق مالقيتش واقيلا فض، قبل ما نخرج لحقوني خاوتو لبنات ( زوج لكبار ) و معاهم مطرق الشواء بنت روقية العقروبة انا كي شفتهم هزيت الماء و جيت خارجة ، قاتلي أختو انصاف _ نور ماتعرفتيش على تسنيم ، قتلها نعرفها راهي بنت عمتي روقية و درت ليها متشرفين _ هيه بنت عمتي و خطيبت عادل خويا تانا _ كييفاه تتمسخري بيا نتي ( مزوجني و خاطب وش لهبال هذا ) _ والله ماني نتمسخر خطبها قبل و هاكي شوفي لافوطو نعتتهالي صح لابسين عادلين و الخواتم في يديهم انا حسيت الدنيا دارت بياا ، طلعت نجري لفوق دخلت خبطت الباب بكل قوتي كان راقد وقف طول عندي _ طيريه خيير وشبييك نتي تخبطي عليا فالباب راكي ملييحة في رااسك ( مسكين هو جامي خبطو )، قربت ليه ضربتو من صدرو قتلو _ صح راك خاطب تسنيم , حكمني من يدي لي ضربتو بيها دورهالي ورا رقبتي _ مزالت يدك تتحط عليا نكسرهالك ، انا والله ماواجعتني يدي على قد قلبي لي حاستو راح يخرج و دموعي لي راح يطرطقو قتلو بالعيااط _ جاااوبنيي عاادل ، تخنزر فيا و قالي _ ايه خاطبها ، حسيت بالدنيا ضلامت بيا و الله كنت حابتو يقولي راهم يكذبو و نتلاح ليه نحظنو بغسك تاع الصح تحرقت من داخل كي قالولي هكاك و زاد هو كي أكدلي قتلني علااه ياربي علاااه وش داني ندير فيه الثيقة بصح مستحيل نقعد معاه هنا و تخلاص بيناتنا ....
تكملة الرواية حتى الفصل التاسع والخمسون من هنا