رواية أمواج قاسيه الحلقة 36 حتى 40 حصريه وجديده
 |
شوي و جات ليا جارتنا دارتلي شعري ويفي ( كي عاد طويل جا يهبل ) دارتلي مكياج برزتلي عينيا و كحلتهملي شوي ( من بكري مكحلين من عند ربي ) مهم جيت نسخف بقيت نخزر في روحي فالمرايا قاتلي راكي راح تعايني روحك هههه ، خلصنا هيا راحت وانا نعتت ل ماما و خاوتي و بابا كيفاه جيت قالولي كامل جيتي بوبية ( مشاء الله) ، خليتهم يوجدو في رواحهم و رحت لبست قفطان القاضي فالأزرق و dorée درت اكسسوارات تاعو انا هكاك و صونالي التيليفون لقيتو عادل هزيت _ ألو _ ربع ساعة و نكونو عندك فالدار و كوبا ، وشبيها هذا ماهدرش حتى معايا قد قد بصح باينة معاه الناس عليها ( عندو عقلية جاهلة كون تكون حتى أمو معاه يهدر معايا كيشغل صاحبو ) ، عيطت لخواتي شافوني و صورو معايا زاد جات ماما مسكينة شافتني ولات تبكي و بابا تانا عينيه مرغرغين قالي راح تسماط الدار بلا بيك ( صح والله انا كنت شمعة الداااار ههه ) ، أنا جييت نبكي معاهم خاوتي مخلاونيش خافو يفسد المكيااج ( عايلة كاملة ندابة ) ، شوي و جاو النساء دخلناهم للصالون و الرجال و معاهم الامام لي راح يفتحلنا فالشومبرة تاع لبنات فرشناها قاتلي منار بلي جات أمو و خاوتو لبنات و زوج خالاتو و عمتي لكبيرة و الرجال جاو زوج خوالو و راجل عمتي ، بابا كي شاف عمتي دارو حالة في زوج راحو للكوزينة و يبكو و يتحاضنو ، سيرين قاتلي عمتي هاذي فيها الخير _ كون جا فيها الخير راهي جات شافتو السنين هاذم كل شكون كان حاكمها على خوها علابالها بلي مريض منعرف درك كيفاه جاتها لحنانة و تفكرتو و تفكرت صلة الرحم _ أسكتي برك ا أم لسان و نص ربي يستر برك كون تقعدي هكا مع راجلك تخلاا، اني خايفة عليك كون كاش نهار يضربك ترجعيلو الضربة _ باينة هاذي كيما يدير ندير هههه _ نندب انا نروح نحدرو منك خير مسكين راح يطيح على راسو راهو ماكل دعوة شر عليها طاح فيك _ رخييسة تا وجهو يلقا وحدة كيفي ايوختي _ جات منار سكتتنا و قاتلي هيا راهم حابين يشوفوك _ شكون _ النساء _ وانا وش راح ندير بالنساء جيبولي عادل يشوفني ههههه _ درك يجيك عادل أصبري تقعدي شوي مع النساء و تشوفي الشر لي راكي رايحة ليه _ علاااه _ خاوتو مايتحملوش باين من وجهم جايين بسييف _ وش دخلني فيهم أنا صح في خوهم هوما الله يسهل عليهم بصح لي تقيسني ماتسلمش مني و فرات ، قاتلي سيرين راكي معولة على المشاكل مالنهار لول بعد ، قتلها منار _ خليها برك الهدرة اي ساهلة و حنا نعرفوها فيها غير الفم وقت الصح تجيبها غير بكاء _ أناااا _ اي هيا يزي بلا هدرة راح الحااال ، عدلت روحي شويا و خرجت، دخلت للصالون قلبي يخبط منعرف علاه خايفة ( عندها حق منار ههه ) سلمت عليهم أمو مسكينة باستلي حتى راسي و عمتي قاتلي _ خليتك قد صبعي و كبرتي و انا لي ربيتك و بنت الغالي ... ياخوتي لكذب يبان من عينيها تبان بلي شر و جايا على مصلحتها ثعلوبة ، خالتو يبانو سلميين و عاقلين كي أمو مشاء الله الخيمار فوق روسهم لابسين لبيض و نساء كبار يسخفو باسوني و قالولي ماغلطش لي سماك نور مشاء الله علييك ، و خاوتو ( الشرر ) سلمو عليا فوق القلب باينين صح جايين بسييف و يتغامزو عليا بصح الصغيرة فيهم تبان عاقلة من وجها ( كون قريت عادل كيما قريت الناس هاذم كل خيير ) .....
الحلقة 37💕
قعدت معاهم حكيت غير مع أمو و خالاتو الباقي غير يتفرجو فينا و عمتي مرة على مرة تطلق كلمة ( نحسها كي السم في وذني ) ، شوي و عيط بابا ل ماما منعرف وش قالها ناضت تزغرت عرفتها فتحولنا ووليت مرتو شرعا شعوور يهبلل مباعد جات قاتلي راهو جاي راجلك يلبسلك الخاتم ( انا تخلعت تحسب قاتلي راهو جاي يدخل فيك موس ههه ) حنا هكاك و دخل عادل غير شافني تبسم و باين من عينيها نظرة الإعجااب انا طول هبطت راسي ماقدرتش نخزر فيه حشمت خلااه و زيد جاتني الضحكة ( المواقف لي كيف هك طول يجيني الضحك منعرف علااه ههه) قرب ليا هزلي راسي و همسلي في وذني قمر مشاء الله ، تبسمت معاه و بدلت عينيا عليه طاحو طول في عمتي و خاوتو يا خاوتي أقسم بالله كون لقاو الموت كون راهم حطوها عليا ، انا مالتيتش بيهم خزرت في عادل لقيتو مانحاش عينيه عليا حتان قاتلو أمو _ ا وليدي ياخي قلتي الله يبارك برك أني خفت تعاين الطفلة قالها _ كاش واحد يعاين رزقو ا ماما _ ناضو كل يضحكو وأنا يا أرض ابلعيني مالف مايهدرش معايا قدام حتى واحد و درك تحمس و ولا يقلهم رزقي خلاااه ، مهم لبسنا الخواتم و وكلنا بعضانا ( العادات التافهة تعنا ههه) شطحنا شوي هههه و هو راح بصح همسلي في وذني ألحقيني للشومبرة مسحقك ، هو راح و أنا لحقتو غير دخلت جبدني ليه و غلق الباب _ ايي وشبيك تغلق فالباب هيا قولي وش تسحق _ ماشي هدرة _ كيفااه, اوووب مافقتش حتى لقيتو باسني بعدتو بصح ماقدرتش حييط ماشي بنادم المرة لولة كان يبوس فيا بشوي تقريب تفاعلة معاااه مباعد منعرف كيفااه تحول ولاو بوسااتو عضااات ووجعني خلااه سييت نحبسو واالو حجرة، حتان شافني سيبو النفس راح يتقطع عليا بااه بعدني قتلو و أنا ننهج_ وشبييك راك وجعتنيي ، وزيد حسيت بالدم في سناني ، همسلي في وذني قالي_ كيما ضريتيني نضرك ا نوور خزرت فيه قتلو _ كيفااه وشي وش راك تقول _ والو والو باسني على راسي وحطلي دراهم في يدي و خرج ، حرت فيه و بقيت نخمم في هدرتو بقات في راسي تحسب قالي لغز ،حتى دخلت عليا منار قاتلي نتي هيا الناس رايحة سلمي علييهم و خزرت ليا لقات شاربي بالدم قاتلي يا المهبولة ماقدرتيش تصبري لزوااج أرواحي هنا أمسحي روحك زيد تخرجي هك تبهدلي بينا وقفتني و مسحتلي انا والله ماني معاها باقية نخمم مباعد قلت بلاك مايقصد والو أنا موسوسة برك ، منار قاتلي أدي حاجة خفيفة دوختك هك نهار الصح وش يصرالك ضربتها على يدها باه تسكت و نحيتلها البابي و مسحت لروحي و عدلت لغوج و خرجت ليهم سلمت عليهم وودعتهم أمو حطتلي دراهم في يدي مام هيا و قاتلي حق الشوفة و راحت ، هو تغلق الباب و خاوتي راهو يجرو فتحوو الحواايج الحق لقيتهم جابولي كل خير كلش بالطبع و الشااان ، ماما قاتلي ربي يهنيك راهو باين يحبك و ميت عليك مي خاوتو بعدي عليهم على قد ماتقدري _ نشاله ماما ...
الحلقة 38 💕
فاتو ليام و قرب عرسي بقاو تقريب 10 ايام أنا كنت شايطة نوجد في حواايجي الفراش ماشي راد ندي بغسك دارو مكملة من كلش قشي برك و عدبني و عادل مكان يخليني نروح وحدي في حتى بلاصة لازم معايا ولا مع أمو ولا ماما بصح انا و خاوتي وحدنا لا يقولي نتوما بنات ويدورو بيكم ، هو يزيد شوي يبطل الخدمة و يخدم شوفار تاعي وليت كل يوم برا محسوب ،و علاقتي معااه تحسنت دايما نحكيو و عرفت بزاف حاجات عليه منها أنو مايحبش لي يكسرلو كلمتو عصبيي فوق اللازم حقودي بزاااف و حنين و ليه ليه يرضى ، المهم في هاذي ليام دار وليد أكسيدو خرجلو واحد بالطونوبيل قاتلي ماما راهو يقول تبلاني و شاريهالي ( و أنا نعرفو يحب يدير دراما برك ) مهم سطرو ربي تقرييب ماات ، تاع دارنا راحو كامل حمدولو السلامة بصح أنا مارحتش عادل كون نجبد أسمو برك على لساااني يقتلني مايحملوووش و حرم عليا دار خالي و دار جدي ، بصح ماما دايما فوق راسي كيفاه ماتروحيش لولد خالك ووش العيب هذا لي راكي ديري فيه و على وجه ربي و مهما وش صرا يبقا من لحمك و دمك و يقربلك و نهار الصح لقيناه غير هو و كون ماجاش يحبك مايديرش هكذا جابتها ورايا حتى قتعتني بلي لازم نروووح ، درت نهار في بالي نروح فيه ل دار خالي شوي و نروح بعد بغسك عادل قالي بلي راح يروح لتونس يومين و يرجع يجيب سلعة ( بياسات تاع طونوبيل بغسك يخدم في أجونس تخدم السيارات ) ، مهم جا هذاك النهار اول حاجة درتها عيطت ل عادل على صباح قبل مايمشي نستفسر ونشوف لكان راح ولا مزال هو تشوكا قالي كيفاه نضتي صباح و عيطتي ماشي من عوايدك قتلو حبيت نسقسي عليك برك ( معرفتش حتى وش نكذب وليت كليتو بالهدرة و كوبيت علابالي نزيد معاه شوي يفيقلي ) ، جات لعشي وجدت روحي لبست غوب مارون مع خيمار باج و أنطلقت لدار خالي ( محسوب قدامنا نمشي على رجليا برك ) رحت وحدي النهار هذاك بغسك راحو كل ليه قبل و علاقتنا معاهم فسدت شوي ماشي كيما قبل تسما لي راحت مرة ماتزيدش ترجع سيبو دارت الواجب تاحا ، وصلت طبطبت فتحتلي مرت خالي ل باب شافتني شنفت تكرهني زي السم ( شعور متبادل ) قاتلي _ مرحبا ( فوق القلب ) فتت رحت للشومبرة لي فيها وليد كي شافني فرح ( غاضني والله حسيتو بزااف حنين و ناس ملاح مهما وش درت فيه والله ماهزلي درة حقد ربي يهنيه نشاله و يلقا لي تستاهلو أنا مانستاهلش واحد كيفو ) حمدتلو السلامة قعدت معاهم شويا داق خاطري خلاااه عايلة كاملة زفت الحق سامطين رهج ووليد بقا يحكيلي كيفاه تبلاوه حتى دار أكسيدو أنا والله ماحطيت معاه ، قعدت وحد النص ساعة شربت فيها غير الماء ووقفت قلت نروح ( كون نزيد دقيقة نتغم ) قالي وليد زيدي شوي راكي ماقعدتيش خلاه _ لالا والله مرة الجاية منار تستنا فيا خارجين نشريو انا و هيا زيد حمدتلو السلامة مرة خلاف و ودعتهم و جيت خارجة هزيت التيليفون لقيت ليزابال من عند ماما منار سيرين و عادل تخلعت كي شفتو بصح لقيتو عيط مرة برك وباعث ميساج لقيتو قالي "وينك علاه ماتهزيش" ريبونديتلو " راني كنت فالدوش شويا و نعيطلك " ، لبست صباطي و خرجت صونا تيليفون وصلني ميساج من عند منار لقيتها قاتلي " نتي ا طفلة ماقلتيش ل عادل راكي رايحة عند خالي راهو جا و مالقاكش " فشلو رجليا ياه نندب ياااه نندب فاقلي اليوم يقتلني ياربي وش داني نكذب ، انا هزيت راسي و راح نطلق الريح لرجليا باه نوصل ليه ليه و انا لقيتو في وجهي ( حسيت الموت دخلتني من رجلي ) قالي _ مالا راكي تدوشي ...
الحلقة 39 💕
بلعت ريقي مالقيت وش نهدر جبدني من يدي و طلعني فالطونوبيل و شعلها و فر بينا و يعيط مالا هدرتي تحطيها في ت.... وزيد تكذبي بيا يا ق... وش ندير فيك أنا ياو راني مين نقول ننسا و نسامحك تخرجيلي ب خرجة أكثر من لوخرة _ يعيشك حبس الطونوبيل خلينا نحكيو بشوي والله نفهمك كلش والله راك ضالمني _ هيه ا دين ربي راني طول انا الضالم و خبطني بيدو على وجهي _ انا هبلت قتلو كيفاه تضربني وليت نعيط حبس عليا و هبطني و خلينا نفضو كلش مش معاك الهدرة نتا و أصلن مادرت حتى حاجة غالطة ولد خالي مريض كان لازم عليا نزورو نحمدلو السلامة مانيش كيفك و كيف عايلتك لي بابا من لحمكم و دمكم جامي واحد هز حتى التيليفون و عيطلو حبس خليني نرووح و روح أخطيني _ ماهدرش معايا فر بالطونوبيل ( حسيتو يتعارك معاها ماشي يسوق ) و عينيه راح يتفلقو حمر جمر و عروق رقبتو بارزين راح يتطرطق شوي و حبسني قدام الدار خزرت فيه قالي _ أهبطي ، هبطتت و هو مشا حرق الطريق مكلوب ، دخلت للدار لقيت بابا في وجهي قالي _ نتي ا طفلة وشبيك خارجة بلاما تشاوري راجلك وش العيب هذا ، قتلو ماما _ راهي راحت عند خالها ماشي براني تشاورو حتى على دورة راهو جارنا ، خليتهم يتناقشو و دخلت للصالون مانيش ناقصة والله نحيت قشي لبست بيجامة جاو عندي لبنات قالولي وش دارلك حكيتلهم كلش ( اول مرة نحكيلهم حاجة كنت مخنوقة و لازم عليا نفرغ قلبي ) قالولي لزوج راكي غالطة و زيد ترديلو فالهدرة بقيت نخمم و فهمت صح بلي راني غالطة بصح انا هك من بكري غير يغلط فيا الواحد مانفيقش وش نخرج من فمي هففف ،راحو لبنات و انا قلت نعيطلو خلي يسبني على روحو عندو حق ، عيطت شحال من خطرة بسيف هز _ ألو _....( ساكت ماهدر والو ) _ عادل حبيبي سمحلي والله ما قصدت نهدرلك هكاك قبيل راك تعرفني مانعرفش نهدر و زيد والله ماشاورتك بغسك علابالي راح تقول لا و انا كان لازم عليا نروح بغسك ماما بقات فوق راسي و كان لازم عليا نرضيها سمحلي ، سكت مباعد قالي _ ماصرا والو روحي درك مباعد نعيطلك راني خداام _ باهي صحا و كوبا ، حرت من ردت فعلو زعما سمحلي صح ، والله ماقدرت نفهمو قد قد مين نقول سيبو والفتو و قدرت نفهمو زيد يخرجلي بخرجت خلااف ضيعني فيه و في مخو كيفاه يخمم بصح على حسب مافهمتو شوي جاست كيما هذا مستحييل يفوتهولي هكاك
فاتو ليام و جا نهار العقد ( و غدوة العرس ) عادل حسيتو جبد عليا شوي يعيط يسقسي بصح مايكثرش معايا الهدرة و مايڨصرش معايا كي قبل بصح أنا كنت نقول معلييش نتزوجو و نرضيه و ينسا مهم لبست غوب قماش ساتان ( خيطتهالي ماما ) غوز كلااغ مع طالون بيض و خيمار و بوشات فالباج درت شوي مكياج ( ماسكرا حمرت فمي و خدي وفرات ) ماحبيتش نكثر عادل مايحبش و مانيش ناقصة مشاكل معاه ، شوي وجا خرجني كان لابس شوميز بيضة و سروال نواار كلاسيك و ياخوتي ديك اللحية كيفاه مطراسية و الشعر لرطب جا يهبل يهبل نقي و مسرار ياتيري من بعييد كي شفتو وليت نبتاسم وحدي عينيا مانحيتهمش عليه و هو كان يسلم على تا الدار بصح عينيه مرشوقين عندي حار فيا اول مرة نخزر فيه بجرأة كمك ( مابقاش فيا عقل ) جا ليا سلم عليا و قالي _ مباعد فكريني نمدلك تصاوري راهم كاينين بزاف _ قحرتلو بتاسم معايا و خرجنا ركبا كيف كيف وحدنا و رحنا عقدنا قالي بسيف وليتي تاعي شرعا و قانونا هههه انا غير نبتاسم لساني تربط ، عادل و صحابو دارو حالة فالطريق أول مرة نشوفو يشطح شبعت فيه تصاور ..
المهم فات هذاك النهار على خير و جا يوم زواجي و اليوم لي راح نولي معاه في دار وحدة و نولي تاعو و يولي تاعي النهار لي تكون فيه اي عروسة فرحانة و في نفس الوقت خايفة ......
الحلقة 40💕
صباح نضت بكري اول حاجة درتها دخلت للدوش نقيت روحي مليح تحسب جامي دوشت المعطرات وليكرام كل درتهم خرجت من هاذوك الدوش حمرة بصح نشعل الله يبارك أصلن لابو تاعي ملييحة و مايديرليش الحب خلاااه حتى كي تجيني هاذيك يديرلي ساعات خلاه هذاك الرقيق يومين و يروح بعد ، كملت رحت فطرت ( لاسقام لعرايس لا شكوبي ) خياتي و ماما راحو للحفافة يحكمو لبلاصة و أنا راح تجيني جارتنا تا الخطبة بعد الله يبارك خدمتها هاايلة بقيت مع بابا برك فالدار مسكين مين يشوفني يحزن يقولي راحت الوردة و النور مالدار كيفاه راح نقدر نعيش, بلا بيك دار ضلمة , مهم شوي و جات ليا الطفلة خرجتني مشاء الله دارتلي مكياج سامبل يهبلل خلاه ( أصلن انا مايخرجش عليا مكياج شارجي ) شعري لمتهولي لمة خفيفة و قاتلي مباعد كي تعودي خارجة بلاغوب نطلقهولك ( رايحة معايا ماشطة ) لبست لاغوب المشاطة غير تسمي قاتلي زينك وحدو مشاء الله لبست طاولن ( بصح نبقا شبر و نص ههه ) جاو خاوتي و ماما ، دارو حالة بالبكاء حتى المكيااج فسدوه انا كي شفتهم هكاك والله دمعت ماسيحتها مانيش حابة نخلع العراضة لي أصلن نصهم ولا أغلبهم عديان وحدة فيهم ماتحبني و ماتحبلي الخيير ، صورت مع العايلة شوي و سمعت لاصونات تاع الطونوبيلات و البارود و العيساوة ( يعرفوها جماعة الشرق ) الدنيا راح تتهز أنا قلبي يخبط خاوتي دارو خيمارات و خرجو يطلو ( ماجات ليا حتى وحدة لدار لا خالة لا عمة كل رايحين للصالة لي راح نديرو فيها العرس كي العراضة أصلن ماعندي ماندير بيهم ) جات ليا منار قاتلي راجلك راهو مقلب دنيا بالشطيح مع صحابو راني سخفتت نزوج ا طفلة ، ضحكت و قتلها نشاله كي اليوم نتي و سيرين ، شوي ودخل ليا باه يخرجني سيرين قاتلو والله ماتدخلها حتى تخلص مسكين تشوكا قالها وش نخلص تانا هههه _ حق الشوفة تا العروس هلا تشوفها بلاش بنتنا غالية ا خويا _ هههه مش خسارة في عروستي مدلها دراهم قتلو مغسي نسيبي لعزيز و بعدتلو جا ليا انا مهبطة راسي و مدايرة هاذيك الحية الفوق ( والله مانعرف وش أسمها ههه ) نحاهالي على راسي تبسم معايا بإعجاب عينيه قبالة يلمعو ( لابس كوستيم gris clair زادت فيه النص مشاء الله ) طابس عندي و قالي _ الزين ادا كامل ليا انا وحدي ، ضحكت معاه باسني على راسي و رجعلي هاديك الحية على راسي و زاد لبسلي البرنوص و خرجني و خاوتي و ماما يزغرتو ( هو ماجاب حتى وحدة معاه ) ، قعد بابا عند الباب مسكين بالكرسي تاعو حاب يخرجني على جناحو هنا دموعي سيبو ولاو ويدان ( حسيت بضعف بابا و حنانو عليا ) راح ليه عادل هزو ووقفو و دار بابا يدو على الباب و خرجت تحت جناح لعزيز الغالي ( ماننساهاش حياتي كاملة هاذيك اللقطة) ، جا حكمني عادل و زيرلي يدي و مدلي فيميجان نحكمها قالي بصح ماتهزيش دراعك بزاف و هبطي راسك قتلو راني نحرق روحي مانشوف والو _ ماتخافيش راني معااك ، حكمت انا وحدة و هو وحدة و صحابو تانا كامل مهم غطينا دنيا والله لا قدرت نشوف حاجة من بكري بسيف راني نشوف مافهمتش حتى كيفاه ركبت فالطونوبيل ، الحمد لله دارلي كورتاج كيما كنت نحلم و كثر ، صحابو زهوانيين خلاااه قلبو الدنيا ، وصلنا للصالة دخلنا قابلتني أمو بسنيوة فيها الحلاوة ( عادات تا الشرق ) نحاتلي على راسي سلمت عليا و مدتي ديك السنيوة رميت لي فيها وراية و دخلت انا و هو اليد في اليد ، الناس كل تتفرج انا مطلعة راسي و ماشية ماخلاوناش نقعدو دارولنا غناء باه نشطحو دارولنا الغنية هاذيك تا " داها مكرة فيكم داها مكرة فيهم كورتااجو يفوت عليهم " درنا حالة المهم ، هو هبط و أنا تصدرت لبست كاراكو عاصمي و اللفة العنابية و القندوة القسنطينية و الشدة التلمسانية
تكملة الرواية حتى الفصل التاسع والأربعون من هنا