رواية للعشق كلمته الأخيرة (الجزء الثاني من رواية شمس تتحدى الغيوم) الفصل الاول والثاني والثالث والرابع والخامس بقلمي عبير سليم حصريه وجديده على مدونة أفكارنا

🌹🌹🌹🌹🌹🌹🌹🌹🌹🌹

ماهى الحياة؟ هل هي سعاده ام احزان؟

نعيم ام شقاء؟ حاضر ام ذكريات؟

اهي افراح نتقلب فيها ونتذوق شهدها أم هى الآلام التى نظل نصرخ من انينها

القلوب تتمنى والعقول ترتب ولكن الله أعلم بنا من أنفسنا وماتهواه

فلنرض بما كتبه الله لنا ولا نكون قانطين من رحمة الله

😥يزيد جوزى وحبيبي وكل دنيتي انا بحبك اوى يايزيد فوق ماتتخيل وفوق ماعقلك يتصور

عينيه فتحت على حبك قلبي عمره مادق ولا عشق غيرك من يوم ماوعيت عالدنيا وحبك بيجري فدمي

لما كنت بسمعك بتكلم علي عن البنت اللى كنت بتحبها وقلبك بيعشقها كنت بحس بخناجر بتضرب فقلبي قلبي الضعيف اللى محكوم عليه من يوم ماكان جنين فى بطن امه ان عمره قصير وانه مش حيستحمل كتير فى الدنيا دي

اتمنيتلك السعاده واتمنيت اشوفك مبسوط

عارف يا حبيبى لما كنت بتضحك فوشي وانت بتسلم علية كنت بحس ان الدنيا كلها بتضحكلي مكنتش ببقى عاوزة اغسل ايدي بعد ماتسلم علية عشان مامسحش لمسة إيدك لية

ويوم ماعرفت انك انفصلت عنها وانكم سيبتم بعض على اد ماكنت فرحانه لكن قلبي كان بيتقطع عشانك وانت حزين عليها لدرجة ان كان بيبقى نفسي وقتها إنى اروحلها واتكلم معاها عشان ترجعلك ومشوفكش تعبان ببعدها عنك

كنت بسأل عنك كنت باجي البيت عندكم عشان أشوفك وامتع عينيه بالنظر ليك

مكنتش متخيله ان ممكن ييجي اليوم اللي اكون فيه مراتك واسمي يرتبط باسمك

كان اقصى حلم لية ان تيجي فرصه عشان اتكلم معاك

انا فاكرة وانا صغيرة كنت بسمع ماما الله يرحمها وهى بتقول لبابا عليا صعبانه عليا اوى مش حتعرف تفرح زى كل البنات لا حينفع تتجوز ولا حتقدر تخلف ويكون عندها اولاد

بس بابا كان بيرد عليها ويقولها ربنا أرحم من انه يحرمها من فرحتها بالحياة اللى نفسها تعيشها

كنت وقتها بدخل اوضتي وافضل رافعه ايدي للسما وادعي ربنا طول الليل ان لو فى امنيه واحده نفسي انها تتحقق قبل مااموت تكون اني ابقى مراتك ولو ليوم واحد عشان تبقى جوزى فى الاخرة كمان

ولو مش حيكونلى نصيب من قلبك وحبك يسترد وديعته عشان انا قلبي مكنش حيستحمل اشوفك مع حد غيري

ويوم ماعرفت انك متقدملي كنت أسعد واحده في الدنيا كلها كنت حسه انى طايرة من السعاده

ياااه اخيرا حرتبط باللى قلبي مدقش لغيره

مكنتش مصدقه نفسي من الفرحه كنت عاوزة اجري اخبط على كل البيوت اقول لكل الناس فى الشارع يزيد حبيبي خطبني يزيد حيتجوزني انا خلاص حبقى مراته

وانت بتلبسني الدبله وقتهاعاهدت نفسي انى اعوضك عن اى حاجه وحشه حصلتلك عاهدت نفسي انى حخليك أسعد انسان في الدنيا كلها

انا حبيتك اوى اكتر من روحي وعمري وحياتي كلها

فاكر يوم فرحنا يايزيد عارف كنت حسه بايه يومها كنت حسه اني عاوزة اخبيك جوة قلبي

حنيتك وخوفك علية احساسك بية وبتعبي كانوا هما اللي بيشجعونى ويدوني دفعه انى اكمل ومستسلمش للالم اللى كنت بحس بيه

انا حبيت الحياة معاك كان نفسي اعيش مش عشان حابه الدنيا ومش عاوزة افارقها لا والله لكن عشان مبعدش عنك عشان مفارقكش واسيبك

انا آسفه يايزيد انا كنت أنانيه فحبي ليك انت اتحرمت معايا من الدنيا اللي كان المفروض تعيشها

قلبي الضعيف كان بيفرض عليك انك تتحرم من كل حاجه بيتمنى اى راجل انه يعيشها مع مراته

حبيبي انا دلوقتى مش معاك مبقتش فدنيتك لكن روحي حواليك قلبي بيدعيلك بالسعاده

عيش وافرح واتهنى

عيش الحياة اللى انا حرمتك منها

وحياة كل يوم عيشتهولي وحياة كل دمعة الم مسحتهالى تعيش يايزيد وتفرح وتحس الحياة وطعمها

انت تستاهل الحب تستاهل انك تحب وتتحب

قلبك الطيب اللى حبني وعشقنى برغم تعبي برغم تقصيري فحقك

الا انه عمره ماحسسني بضعفي بالعكس انا معاك كنت بحس انى ملكه على عرش قلبك

يزيد انا عشت معاك اسعد سنين عمري كلها

وراضيه والله راضيه كل الرضا فرحانه مبسوطه ان ربنا حققلي امنيتي واستجاب لدعايا

واني عشت ومت وانا مراتك ام ولادك

انا مش انانيه عشان اقولك احرم نفسك واترهبن بعدي بالعكس ده حيزعلني وحيقهرني عليك

انا خدت حقى وزياده حعوز ايه اكتر من كده اتجوزت وخلفت من الراجل اللى متمنتش غيره

ودلوقتى جه الدور عليك انك انت كمان تاخد حقك من الدنيا

يزيد عشق واخواتها فامانتك كان نفسي اوي اشوفها عروسه قدام عيوني لكن حنقول ايه ارادة ربنا فوق كل شئ

متبكيش يايزيد متبكيش علية ياحبيبي كفاياك دموع وبكى اطمن انا مرتاحه اوى قلبي هدا وارتاح

ارتاح من الادويه وارتاح من احساسه بالذنب ناحيتك وتقصيره فحقك

بوسلي عليا وسليم قولهم ماما بتحبكم اوى كان نفسها تشيلكم وترضعكم وتخبيكم جوة قلبها

خليهم يفتكروني يايزيد مش عاوزة ولادي ينسوني صحيح هماميعرفونيش لكن اكيد قلبهم حتحس بية

انا قلت للدكتور لو مت وانا بولدهم يخليهم يشموا ريحتى

كلمهم عني وريهم صورتي احكيلهم عن حبي ليك

بحبك يايزيد بحبك ياحبيبي

عيش ياحبيبي على اد مااسعدتني لازم انت كمان تبقى سعيد

متنسانيش ياحبيبي ابقى افتكرني بدعوة حلوة دعوة من قلب يزيد الطيب لعليا مراته وحبيبته وام ولاده

انا قلبي بيقوللى ان عليا حتبقى شبهي خدها فحضنك مش عاوزاها تحس انها يتيمة الام شم ريحتي فيها

وسليم كمان ابنك ياحبيبي اللى انا عارفه انك كنت بتتمناه خبيه فقلبك علمه وكبره وقلله اني كان نفسي اشوفه راجل اد الدنيا

عشق يايزيد امانه عليك عشق حطها فرموش عينيك وخللي انس يخلي باله منها قلله عمتك بتقولك لو زعلت عشق هى مش حتكلمك وحتخاصمك ومش حتجيلك فى الأحلام

مع السلامه يايزيد مع السلامه ياحبيبي

مع السلامه يايزيد مع السلامه مع السلامه

ثم يسمع تلك الأغنيه التى تمزق قلبه من آلام البعد

ياللى فارقت الدنيا كان بدري الوداع وطلعت فوق بعيد عن الزيف والخداع

واحشني ياطيب ياارق من الملاك

فاكرك وفاكر اد ايه اتهنيت معاك

وكنت اتمنى يكون عمري فداك

دلوقتي بحلم بس اعيش لحظه معاك

ياللى مشيت من غير ماحتى نقول سلام

حفضل على عهدك كاني معاك تمام

مين اللي قال البعد بينسي الحبايب

تعالى شوف حبي و شوف قلبي اللى دايب

واحشنى ياطيب ياارق من الملاك

فاكرك وفاكر اد ايه اتهنيت معاك وكنت اتمنى يكون عمري فداك دلوقتي بحلم بس اعيش لحظه معاك

مين بعد منك حيداويني فى يوم جروحي مين اللي فى حضنه الحنين حنسى روحي

مع السلامه ياحبيب قلبي وسلام

ياريت تزورني كل ليله فى المنام

واحشني ياطيب ياارق من الملاك

فاكرك وفاكر اد ايه اتهنيت معاك

وكنت اتمنى يكون عمري فداك دلوقتى بحلم بس اعيش لحظه معاك

😥😥تفتح عليه الباب فتراه جالسا نفس الجلسه التى يجلسها منذ ذاك اليوم الذي فقد فيه حبيبته ورفيقة دربه

جالسا على فراشه واضعا امامه اللاب لايريد أبعاد صورتها من أمام عينيه او نسيان صوتها الذي يدب فى أذنيه

وكلما انتهى ذلك الفيديو الذي كانت قد اعدته قبل فراقها له وتركته امانه عند هاله حتى اذا حدث واسترد الله وديعته تعطيه اياه

ليرتاح قلبها وتكون مطمئنه فى منامها الذي سيستمر للأبد

سمعه مرارا وتكرارا اعاد تشغيله مرة ثانيه وثالثه وعاشرة لم يمل او يصبه الملل من سماعه حتى انه حفظ كل كلمه تقولها عن ظهر قلب

تجلس بجواره على الفراش وتطبطب على كتفيه:مش كفايه كده بقى ياحبيبي

حتفضل قافل على نفسك كده لحد امتى فات شهرين دلوقتى على وفاة المرحومه وانت لا عاوز تقعد مع حد ولا عاوز تكلم حد

طب لحد امتى بس حرام عليك نفسك انت كده بتموت نفسك بالبطئ

يزيد :لحد ماتدخل علية لحد ماالاقيها بتضحك لي بوشها اللي كله براءة

لحد ماالاقي نفسي بترمي فحضنها عشان انسى كل التعب اللى انا فيه

هاله :اللي بيروح مبيرجعش ياحبيبي ولو الدموع بترجع اللى راح كنا بكينا عليها بدل الدموع دم

وهي دلوقتى فمكان احسن بكتير هي فدار الحق واحنا فدار الباطل

فوق يابني اللى انت فيه ده ميرضيش حد

حرام عليك ده انت مؤمن وموحد بالله

يزيد وهو يبكي بقهرة:مش قادر ياأمي غصب عني والله مش قادر

مش قادر استحمل غيابها عني مش قادر اصدق اني اتحرمت منها خلاص

وانها مبقتش موجوده فدنيتنا مش قادر أصدق إني مش حشوفها تاني خلاص

انا عمري ماتخيلت انها ممكن تمشي وتسيبني عمري ماخطر على بالي اني ممكن مشوفهاش تانى

صحيح كنت عارف ان قلبها تعبان لكن كنت دايما اقول لا مش ممكن ربنا يسيئني فيها لأنه عالم اني مش حقدر اتحمل غيابها

ليه ليه ليه تسيبني وهي عارفه اني بحبها ليه هنت عليها تسيبني وهى عارفه اني حتوجع بغيابها

هاله وهى تمسح دموعها :استغفر ربنا ياحبيبي ده النبي مات ياحبيبي وكلنا حنموت محدش حيخلد فيها ده كاس وداير علينا

قطر كلنا راكبينه واللى بتيجي المحطه بتاعته بينزل

يزيد :عارف والله عارف لكن أنا قلبي موجوع اوى فراقها صعب علية أوى

تطبطب عليه بحنو وهي تمسح دموعها هي الأخرى :حبيبي ربنا العالم الله يرحمها كانت غاليه علينا اد ايه بس دي حكمة ربنا ولازم نقول الحمد لله

يزيد :راحت عاليا راحت عاليا ماتت ياأمي ومش حتكون موجوده تاني انا عشت معاها أجمل سنين عمري هي دايما كانت حسه انها مقصرة فحقى لكن والله ابدا ياأمي انا كنت راضي معاها وفرحان بيها وبحبها وبحب قلبها الطيب حنيتها وخوفها علية كانوا عندي اهم مليون مرة من اى حاجه تانيه

ضحكتها اللى كانت بتضحكها فوشي رغم تعبها ومرضها كانوا بينسوني تعب اليوم كله

انا يوم ماقررت اتجوزها كنت عارف انها بتحبني

وكنت عارف ان القرار ده حيفرح بابا

وكنت متأكد انها حتقدر تنسيني اللى حصللي وانها حتعرف تحتويني

وانا كمان كنت خايف عليها اوى كانت نسمه زى الملاك قلت لامش ممكن اسمح لحد يتجوزها وميقدرش تعبها وييجي عليها

كنت بخاف عليها اوى والله

ثم يجهش بالبكاء :انا السبب ياامي انا اللى موتها انا السبب فموتها انانيتي هي اللى موتتها كان لازم مطاوعش قلبي كان لازم احافظ عليها اكتر من كده كان لازم اصون الامانه

اه سامحيني ياعاليه سامحيني ياحبيبتي

بس والله العظيم ياامي والله العظيم وربنا الشاهد على كلامي انا على اد حبي ليها ورغبتي فيها الا اني كان همي كله صحتها وانها تفضل عايشه قدام عينيه

بس فنفس الوقت مكنتش عاوز احرمها من حقها فى الحياة مكنتش عاوز اخليها تحس انها اقل من اى ست فى الدنيا مكنتش عاوزها تحس انها مش قادرة تسعدني

ده اللى كان بيخليني اضعف قدامها وقدام نظرة عينيها اللى كانت مليانه حب لية

هاله :الحب مفيهوش عذريه ولا رهبنه يابني

ومفيش اتنين متجوزين بيعيشوا مع بعض من غير مايخللوا قلوبهم تسيطر عليهم

ولا انت ولا هيه السبب فى حاجه

كله بأمره الكون كله ماشي بأمره وربك ليه حكمه فكل حاجه بتحصل فحياتنا

يزيد :لا اله الا الله لله الامر من قبل ومن بعد انا لله وانا اليه راجعون

عوضي عليك يارب عوضي عليك يارب سامحني يارب بس انت عالم انه غصب عني ومش بايدي فراقها صعب علية أوى

هاله :ربنا يصبرك ويصبرنا كلنا ياحبيبي

يزيد مش كفايه بعاد عن ولادك كده ياحبيبي

ولادك محتاجين حضنك يايزيد مش كفايه حضن امهم اللى اتحرموا منه ياحبيبي حيتحرموا من حضنك انت كمان

انت مشوفتهومش من يوم مااتولدوا غير مرتين تلاته كنت بتبص عليهم من بعيد وتخرج

هما ايه ذنبهم يايزيد دول غلابه اوى ياحبيبي مش عارفين هما مين ولا فين والدنيا واخداهم ورايحه بيهم على فين

قوم ياحبيبي خدهم فحضنك شم ريحتها فيهم دول عوض ربنا ليك اللي خلف مماتش يابني

عشق مبتبطلش عياط على أمها

وعاليا وسليم مبيبطلوش زن زى مايكونوا حاسين ياحبايبي

متحرمش نفسك من حضنهم يابني مش كنت بتتمنى الولد الصالح اهو جالك يابني سليم ابنك

وعاليا نسخه من امها كل ماحتشوفها حتشوف صورة أمها فيها

استعيذ بالله من الشيطان الرجيم وقوم ياحبيبي قوم معايا الله يرضى عنك ريحني يابني

ريح قلبي اللى انكتب عليه التعب كفايه علية ابوك اللى من يوم اللى حصل وهو فدنيا غير الدنيا

ضحكته وهزاره اللى كانوا ماليين الدنيا راحوا

يدخل للولاد اوضتهم ويقعد جمبهم شويه ويرجع اوضته تاني

الحزن ملى البيت والفرحه والضحكة راحت خلاص

الله يرحمك ياعاليا الله يرحمك ياحبيبتي ويصبر قلوبنا على فراقك يارب

رحتي واخدتي معاكي كل حاجه حلوة

علي حالته صعبه اوي صحيح بينزل الشركه لكن عمر بيقوللى انه فدنيا تانيه ولا كأنه موجود

ومروة بتقوللي طول ماهو فى البيت سرحان ومبيتكلمش

يزيد وهو يمسح دموعه :مين واخد باله من الولاد ياماما

هاله:كلنا ياحبيبي طبعا دول ولادنا ولادك انت والغاليه

انا وشمس ومروة وعهد حتى ايمان بتيجي على طول تشوف شمس وتطمن عليها وبتدخلهم وتقعد معاهم كتير

الكل بيحبهم ياحبيبي بس احنا كلنا مش حنقدر نعوضهم عنك انت حاجه تانيه انت ابوهم ياضنايا

تمسك يديه:يزيد احنا سيبناك الفترة دي كلها وقلنا حقك انك تزعل على مراتك وحقها ان يتزعل عليها

ومش يوم ولا اتنين لا دي عاليا حيتزعل عليها العمر كله

لكن الدنيا مبتقفش على حد يابني وبتمشي ومبيهمهاش احزاننا ولا الامنا الصغير بيكبر والدنيا بتتغير

عشق بتكبر وبقت عروسه جميله وبتقعد جمبهم تلاعبهم وتقوللهم انا بحبكم اوى يااخواتي

ثم تجهش بالبكاء :انت عارف يايزيد انا من كام يوم سمعتها بتقوللهم متزعلوش من بابا عشان مش بيجيلكم هو بيحبكم والله زى مابيحبني بس هو زعلان على ماما عشان ماتت وراحت عند ربنا

وتقول لسليم انا اللى سميتك سليم ياحبيبي

وتقول لعاليا بابا هو اللى سماكي عاليا على اسم ماما حبيبتي

وبعديها فضلت تعيط ياحبيبتي وتقوللهم ماما وحشتني اوى وبابا مبقاش بيقعد معايا انا عاوزة ماما عاوزة ماما

بنتك تعبانه يابني بنتك نفسيتها حتتعب الحق ولادك يايزيد خدهم فحضنك دول امانتها يابني حتفرط فى الامانه اللى سابتهالك

حتضيع الولاد اللى ضيعت عمرها وحياتها عشانهم

يقوم معها يزيد ويفتح باب غرفتهم فيستمع لصوت بكائهم وشمس تحاول تهدئتهم وتعد لهم الرضعه

يزيد :ازيك ياشمس

شمس:الحمد لله والله وحضرتك عامل ايه

يزيد :الحمد لله والله

انتي بتعملي ايه ياشمس

شمس :بعملهم الرضعه عشان جعانين

يزيد :اديني الولاد انا عاوز ااكلهم

تحمل شمس الصغيرة وتعطيها له :عاليا شوف جميله ازاي

ينظر إليها وكانما ينظر فى وجهها هي سبحان الله ماهذا الشبه الذي بينهما كأنما يراها أمامه

اخذ يشتم رائحتها ويدخلها بداخل احضانه ليشعر بانفاسها التى اختلطت بانفاسها

كانت هاله وشمس ينظران له ويبكيان بصمت قلوبهم حزينه لم يخلعا اللون الأسود بعد

ولكنهما فرحا لحنوه على اطفاله الصغار

سكنت الصغيرة فى حضنه اخذت تنظر اليه بعينيها التى تريد ان تخبره وتسأله أين كنت غائبا عنا؟ الم تشتاق لنا الم يحن قلبك علينا؟ نحن ابناؤك فلذة اكبادك

نحن الذكرى الخالدة ممن عشقها فؤادك

لنا حق عليك كيف تتناساه كيف لك ان تتغافل عنه

نحن لسنا بحاجه الا لك لسنا بحاجه لغيرك او سواك لا نريد غيرك

الا يكفى اننا حرمنا من امنا الا يكفي اننا لن نراها ولن نعرف شكلها سوى من بعض الصور لن ننعم بحضنها

اتريد ان تحرمنا انت الاخر منك ياابي لا فلتكن رحيما بنا عطوفا علينا لا نريد سواك

ماذنبنا لتتخللى عنا اتحملنا ذنب موتها واذا كنا نحن السبب فى موتها فماذا لنا ان نفعل ليتنا كنا نستطيع كنا اعطيناها عمرنا وضحينا به من اجل ابقائها

ياخذها فى حضنه ويجهش بالبكاء ويقبلها من كل وجهها ومن يديها الصغيرة

انا اسف ياعاليا انا اسف ياحبيبتى انا مش حبعد عنكم تاني انا بحبكم اوى انتوا ولادي نور عينيه بس غصب عني والله ابوكم تعبان تعبان اوى وفراق امكم واجعلى قلبي

بس حبقى كويس ايوه ان شاء الله حبقى كويس عشانكم انتم

شمس:ياحبيبتى دي نامت

هاله:عياطها مكنش عياط جوع يابنتي ده كان احساس بالخوف وماصدقت لقت الامان نامت على طول

وضعها فى فراشها وحمل الاخر وقبله:سليم ياحبيبي انت عارف انا كان نفسي اوى ربنا يرزقني بولد ربنا يخليك لية ويباركلي فيك يارب

يأخذ من شمس الببرونه ويضعها فى فمه حتى ينام هو الآخر

فيضعه فى سريره ثم يسال عنها هى الاخرى:فين عشق

شمس :عشق فى اوضتها

يذهب اليها ويفتح عليها الباب فيجدها نائمه على الفراش واضعه صورة امها امامها وتتحدث اليها:وحشتيني اوى يامامى انا عاوزاكي يامامى

فتسمع صوته الحنون:عشق

تقوم وترتمي فى احضانه:بابي حبيبي بابي

يزيد :بتعملي ايه ياحبيبتي

عشق :بكلم مامي انا بحكيلها كل يوم اللى حصل وباخدها فحضنى وانام مامي وحشتني اوى يابابي

يزيد :وحشتنا كلنا ياحبيبتي ربنا يجمعني بيها على خير

عشق :حنروحلها يابابي

يزيد وهو يحتضنها:ألف بعد الشر عنك ياحبيبتي ربنا يفرحني بيكي انتى واخواتك يارب وميوجعش قلبي عليكم ابدا

كفايه امكم اللى قلبي موجوع عليها

عشق :عاليا وسليم زعلانين منك وانا قلتلهم ميزعلوش وانك بتحبهم زى مابتحبني صح يابابي

يزيد :صح ياقلب بابي

انا بحبكم اوى انتوا الحاجه الحلوة اللى فحياتي وجودكم هو اللي حيهون علية غيابها

انتوا امانتها اللي لازم احافظ عليها لحد ماتوصلوا لبر الأمان

ربنا يخليكم لية ويعوض صبري بيكم خير

صحيح هى راحت خلاص لكن حتفضل عايشه فقلوبنا وعمرنا ماحننساها أبدا

انا لله وانا إليه راجعون

😥انا اسفه والله عارفه انكم زعلانين مني وكلكم كنتم بتتمنوا حاجه تانيه خالص وعاوزين تهربوا من هموم الدنيا بس مكنش ينفع عشان الاحداث الجايه كلها مبنيه على موت عاليا والا كانت الروايه حتخلص خلاص ومكنش حيبقى فيه داعي اني اكملها

الحلقه الثانيه من رواية للعشق كلمته الأخيرة

(الجزء الثاني من رواية شمس تتحدى الغيوم)

بقلمي :عبير سليم

🌹🌹🌹🌹🌹🌹🌹

من منا لا يتمنى ان تدوم السعاده له ولا يعرف الحزن له طريقا

من منالم يتمنى بعد ان يظل احباؤه بجانبه ولا يفرق بينهم شيئا

من منا لم يتألم لفراق حبيب او صديق

من منا ظلت الآلام لها السطوة على حياته للأبد

نعم فتلك الحقيقه نحزن ويقتلنا الحزن نظن أن الحياة قد انتهت بدونهم

نظن ان الحياة اصبحت بلا طعم نعيشها لأن القدر لم يكتب لنا ان نلحق باحبائنا بعد

ولكننا نعيشهاومع مرور الوقت تتأقلم القلوب وتتناسى العقول وتغمس نفسها فى طيات النسيان

لتتعايش تاخذنا دوامة الحياة بمصاعبها لتنسينا ما مررنا به من الالام وتفتح لنا ابوابها التي اما ان تكون طاقة نور اومصاعب جديده

تنام على الفراش المعد للكشف عليها وبجانبها حبيب قلبها ليريهما صورة اطفالهما ويسمعهما صوت دقات قلبهما التي تعلن عن وجودهما فى الحياة :سامعين دقات قلبهم

عمر :يعني هما كويسين يادكتور

الدكتور :لحد دلوقتي الحمد لله كله تمام

شمس :حضرتك تقصد ايه بلحد دلوقتى

الدكتور :بصي يابنتي انا لا اؤمن بحاجه اسمها فترة الأمان فى الحمل انا بحب اخد حذري لحد مااخرج الجنين بالسلامه من بطن أمه

واحنا تمام اوي لكن ده مش معناه اننا ناخد راحتنا بقى ومننفذش التعليمات

عمر:بس احنا ماشيين عالتعليمات والله

الدكتور :ايوة بس المدام مجهدة شويه وده مينفعش

شمس :اصل عندنا شوية ظروف في البيت والله

الدكتور :كلنا عندنا ظروف وبتاثر على حياتنا لكن احنا دلوقتي ربنا كرمنا والعمليه نجحت من اول مرة فى ناس بتعملها مرة واتنين وعشرة

يبقى احنا ربنا انعم علينا بنعمه لازم نحافظ عليها ومينفعش اننا نفرط فيها والا الله اعلم

باللي ممكن نعانيه لو لا قدر الله

عمر:لا يادكتور الله يخليك متقولش كده ان شاء الله حتكمل الحمل على خير

الدكتور :حركه قليله مجهود لاء نهائي

شمس :حاضر

🌹🌹🌹🌹🌹🌹🌹

تجلس على فراشها وكل الصور التي جمعتهما امامها تنظر لكل صورة وتتذكر ذكرياتها معها تقبلها وتلتقط الأخرى

تتحدث لصورتها :وحشتيني اوي ياعاليا ياحبيبتي الدنيا من غيرك ملهاش طعم خلاص

كده بردو تسيبيني وتمشي تسيبي اختك حبيبتك بنتك اللى ربيتيها وكبرتيها انا معرفش ماما مشوفتهاش مش فاكراها معرفش غيرك انتي ياحبيبتي انتي وبس

انا كل مابروح البيت عند عمي قلبي بيوحعني اوى وانا عارفه انك مش حتكوني موجوده

بفتكر لما كنت بجري عليكي وتاخديني فحضنك محدش كان بيحس بالامى غيرك

بفتكر لما كنت بطلعلك اوضتك واقعد اتكلم معاكي بالساعات

كل ده خلاص راح راح كده ومش راجع تاني

انا بروح هناك عشان ولادك لولاهم عمري ماكنت حقدر اروح هناك تاني وادخل مكان كان منور بوجودك فيه

أنا لحد دلوقتي مش قادرة أصدق انك خلاص

مشيتي ومش راجعه تاني

انتي عارفه انك كنتي بالنسبه لى مش مجرد اخت انتي كنتي اختى وصاحبتي وامي اللي ربتني

تحتضن الصورة وهي تبكي بشده:اااه اااه ياوجع قلبي عليكي ياعاليه انا جوايا نار عمرها ماحتهدى ابدا غير لما اروحلك ياحبيبتى

احنا كلنا بنحبك اوى وعمرنا ماحننساكي

انتي عارفه انا مش حسه انك موتي لا انتي بس سافرتي لمكان فترة وبعد كده حنروحلك كلنا أيوة انتي مش ممكن تكوني متي ابدا

يدخل عليها ليجدها على نفس حالتها منذ وفاة اختها فقليلا ماتخرج لزيارة اولاد اختها

غابت البسمه من على وجهها ذبلت ولم تصبح عهد التى كان يعهدها الجميع

كان قلبه مفطورا عليها لايدري ماذا يفعل لها ليخرجها من تلك الحاله

يجلس بجوارها وهى تحتضن الصور وتبكي:مش كفايه كده بقى حرام عليكي نفسك هو اللى انتي بتعمليه ده يعني حيرجعها

عهد:مش قادرة والله ياسيف مش قادرة صدقني غصب عني مش بايدي صورتها قدام عينيه طول الوقت صوتها بيرن فوداني

فويساتها اللى كانت بتبعتهالي عشان تطمن علية لسه بسمعها مش قادرة

سيف :ماهو انتي كده عمرك ماحتقدري تنسي لازم تشيلي الصور دي من قدامك عهد انا خايف عليكي ياحبيبتي

عهد وهي تريه الصور:بص ياسيف شايف صورها معايا فى الفرح انت عارف انا والله العظيم كنت حساها بتودعني فى الصور دي

هي مكنتش بتحب تتصور كتير لكن فى فرحنا اتصورت معايا صور كتيرة اوى فيها تعبيرات مختلفه بص هنا بتضحك ازاي شايف ضحكتها جميله ازاي وطالعه من القلب

وهنا بص كانت بترقص معايا وبتحضني اوى

انت عارف هى اللي راحت للدى جى وقالتله عاوزة ترقص معايا على اغنية امورتي الحلوة

قعدت تحضن فية وتبوسني كانت فرحانه بية اوى

اتاريها كانت بتودعني كانت بتودعني ياسيف وانا مش عارفه مفهمتش

ياحبيبتى يااختي ووحشتيني اوى ياعليا

سيف وهو يمسح دموعه:الله يرحمها

عهد:لا لا والنبي متقولش كده الله يخليك عاليه اختي عايشه اه عايشه فقلبي عمري ماحنساها ابدا

سيف :طب ايه رايك اخدك ونخرج اى مكان

عهد :استنى بص كده شايف الصورة دي كانت يوم عيد ميلاد عشق لما كملت سنه

يومها حضتني اوى وقالتلي انتي بنتي الكبيرة واتصورنا سوا

والصورة دي بص كان يوم عيد ميلادي لما كملت عشر سنين كانت فرحانه اوى اني كبرت

وحشتني اوى ياسيف لا انا مش قادرة لا مش حقدر اتحمل غيابها اكتر من كده يارب خدني يارب انا عاوزة اروحلها

سيف :واهون عليكي تسيبيني ياعهد تسيبي سيف حبيبك لوحده

عهد :سامحني ياسيف غصب عني والله مش بايدي

انا اسفه ياحبيبي انا عارفه اني ظلماك معايا من وقت وفاة اه اه مش قادرة اقولها ولا انطقها بلساني

عارفه انك عايش فى همي وحزني انت من حقك تفرح بس حعمل ايه مش بايدي والله مابايدي

سيف :اوعي تقولي كده ابدا انا بحبك اوى ياعهد انتي روحي وحياتي كلها ومستعد استحمل احزانك العمر كله بس انتي كمان لازم تساعدي نفسك ومتستسلميش للاحزان

أنا خايف عليكي ياعهد انتي كل دنيتي

يعني انا ماستاهلش انك تخففي عن نفسك علشاني هوني على نفسك ياحبيبتي

اختك ارتاحت ياعهد ارتاحت من التعب والأدوية ارتاحت من الالام اللى كانت بتحس بيها

هي مش عاوزة دموعك دى مش حتفيدها بحاجه هي محتاجه دعوة حلوة توصلها

قومي ياحبيبتي قومي معايا انا مش حسيبك واقف اتفرج عليكي لما تروحي مني

انا معنديش استعداد اخسرك

يحاول أن يساعدها لتقف فلا يجدها سوى فاقده الوعي بين يديه

يحاول ان يفيقها بلا فائده تملك الرعب منه بشده حملها سريعا ووضعها فى السيارة وذهب بها على اقرب مستشفى

قام الطبيب بافاقتها ووجدها تعاني من ارهاق شديد وهبوط كاد ان يودي بها وساله عن بعض الاسئله واخبره سيف بأنها حزينه بسبب وفاة اختها

الدكتور :احنا محتاجين نعمل التحاليل دي

انا حبلغ الممرضه تاخد منها عينة الدم وتعمل التحاليل

يتم سحب عينة دم منها بينما كانت هي شبه غائبه عن الوعي

بعد مرور حوالي ساعه:سيف انا فين

سيف :حبيبتي حمد الله على سلامتك انتي اغمى عليكي وجبتك هنا

متتحركيش الدكتور معلقلك محلول

ينفع كده بردو ياعهد شفتي بقى عدم سماعك كلامي كان حيضيعك مني ازاي انا قلبي كان حيقف حسيت اني اتشليت لما لقيتك مبتتحركيش ومش حسه بالدنيا

عهد:للدرجه دى خفت علية ياسيف

سيف :خفت عليكي انا وربنا كنت حاسس ان الدنيا وقفت بية عهد انا بحبك اوى انا عمري فحياتي متخيلت اني ممكن احب بالشكل ده

عشان خاطري ياعهد لو كان لية خاطر عندك تخللي بالك من نفسك شويه

انا والله مابقولك انسيها بس عالاقل حاولي تعيشي وتتقبلي الحياة

عهد :حاضر يا حبيبي حاضر ححاول والله

يجدون طرقا على الباب

الدكتور:حمد الله على السلامة يا مدام

عهد :الله يسلمك يادكتور

الدكتور :ينفع كده بردو نسيب نفسنا للاحزان بالشكل ده لا اكل ولاشرب طب ازاي وخصوصا وانتي فحالتك دي طب مش خايفه على نفسك خافى عالجنين اللى ملوش ذنب

ينظر عهد وسيف لبعضهما البعض:جنين جنبن ايه يادكتور

الدكتور:هو انتوا متعرفوش واللا ايه

سيف:لا وربنا مانعرف حاجه دكتور انت بتقول ايه

الدكتور :مراتك حامل وانتوا متعرفوش انتوا بتهزروا صح دي اصلا شكلها فى آخر الشهر التالت

سيف :حامل عهد حامل وربنا دكتور انت بتتكلم جد يعني انا مراتي حامل يعني انا حبقى اب لا بجد يادكتور

دكتور حضرتك متاكد من الكلام ده

الدكتور :ههههه ايوة والله انا اصلا شكيت لما كشفت عليها بس قلت نطمن اكتر فخليت المعمل عملولها تحليل حمل وفعلا هي حامل

سيف :الف حمد وشكر ليك يارب ربنا يخليك يادكتور

عهد الف مبروك ياحبيبتي الف مبروك ياعهد حتبقي احلى ماما فى الدنيا

عهد :انا مش مصدقه معقوله انا حامل بس انا محستش بحاجه ولا جه فبالي ابدا حزني على اختي نسانى كل حاجه بتحصل حوالية

ياحبيبتي ياعاليه يعني انتي متي قبل ماتعرفي ان اختك حامل

الدكتور :اطلبيلها الرحمه يابنتي

عهد :كانت طيبه اوي يادكتور اطيب حدممكن تقابله فحياتك

الدكتور :الطيبين ملهمش مكان عالارض يابنتي

بيبقوا ضيوف يعلقونا بيهم ويدونا الأمل ان فى ناس كويسه وبعد كده يسيبونا ويمشوا

هو انتي اختك كانت تعبانه

عهد :كانت مريضة قلب وماتت وهي بتولد

الدكتور :لا حول ولا قوة الا بالله ربنا يرحمها

انا بقى مراتي الله يرحمها كانت زي مابتقولى على اختك كده بالظبط ولا كانت تعبانه ولا فيها حاجه

ده احنا كنا بنتفرج على فيلم وبنضحك وفجاة لقيتها سندت راسها على كتفي كنت فاكرها بتدلع علية اتاري ربنا استرد وديعته

وفلمح البصر كل حاجه راحت سابتني انا وطفلين فى الدنيا

عهد :وحضرتك عملت إيه

الدكتور :تعبت طبعا لكن الوقت بينسي والخياة بتمشي

عهد :اتجوزت يادكتور

الدكتور :كان لازم اتجوز مين كان حيربي الولاد اخواتها واخواتي خدمونا شويه فى الاول وبعد كده كل واحد قال بيتي اولى بية

وكبروا والبنت دكتورة اسنان ومخطوبه واخوها فى صيدله والخياة بتمشي عمرها مابتقف على حد

خللي بالك من نفسك ومن الجنين اللى لو حصلله حاجه ذنبه حيكون فى رقبتك

انتي ضعيفه اوى وده حياثر بشكل كبير على نموه لازم تدخلوا عند دكتور النسا حالا يكشف عليكي ويديكي فيتامينات تعوضك شويه

وتحافظ عالروح اللى جواكي

سيف:حاضر يادكتورعهد عشان خاطري ده هدية ربنا لينا ياعهد ارجوكي حافظي عليه لو بتحبيني ياعهد حافظى عليه ارجوكي انا عاوزه ياعهد انا محتاجه اوى انا طول عمري كان نفسي ابقى اب وبالأخص منك ياحبيبتي

عهد:حاضر ياسيف حاضرياحبيبي

سيف بعد اذنك ممكن اطلب منك طلب

سيف :اطلبي عينيه اديهالك

عهد :عاوزة اروح لعاليا

سيف:تروحي لعاليا فين ياعهد

عهد :ازورها ياسيف محتاجه ازورها اوي

بعد مرور حوالي ساعه

تجلس على قبرها تضع الورود التي احضرتها معهاوتسقي قبرها بالماء

يترك لها سيف المجال لتتحدث إليها ويبتعد قليلا

لولو حبيبتي انا حامل يالولو تخيلي اني حامل من قبل ما تسيبينا ياحبيبتي وانا مش حسه ولا عارفه

بس كنت حعرف ازاي واللا احس بايه وانا اصلا من يوم موتك وانا فقدت كل الاحاسيس اللي فالدنيا

حتبقي خالتو يالولو مش كان نفسك اوي تطمني علية

اطمني علية ياحبيبتى انا ربنا بيحبني اوى ياحبيبتي انه بعتلي سيف

سيف بيحبني اوى مستحملني من يوم مارحتي وسيبتينا وهو راضي ومبيتكلمش بالعكس ده زعلان عشاني اوى

سيف ده هدية ربنا لية وكمان ربنا حققله اللى كان نفسه فيه

كان نفسي اوى تبقي معايا وتشوفيه عمل ايه لما عرف اني حامل كان حيموت من الفرحه والدكتور قعد يضحك عليه

واللا لما الدكتور سمعه نبض البيبي ووراهوله وشاف ايده ورجله حضن الدكتور وباسه

دعوتك لية ان ربنا يطمن قلبك علية اتحققت ياعاليه انا لو مكنتش اتجوزت سيف كان حيضيع مني حاجات كتير اوى

ثم تنهار فى البكاء :انا مش قادرة اعيش من بعدك ياعاليا مش قادرة اتحمل الدنيا من غيرك انا لحد ماعرفت اني حامل وانا بدعي ربنا اني احصلك واجيلك

لكن بعد ماعرفت اني حامل

سيف حلفني اخللي بالى منه واحافظ عليه

انا خايفه مقدرش اوفي وعدي معاه ادعيلي ياعاليا ادعيلي ربنا يقويني عشان اسعده زى ماهو بيسعدني

انتي عارفه يالولو اني انا وشمس كده مع بعض فى الحمل

وكده حنولد مع بعض بس شمس حامل فى توأم لكن انا الحمد لله واحد على ادي

عليا انتي وحشتينى اوى الدنيا من غيرك ملهاش طعم

يأتي إليها :مش كفايه كده ياحبيبتي

تقوم معه وهي تتحدث إليها :انا حجيلك تاني ياحبيبتى حجيلك على طول عمري ماحقدر امنع نفسي عنك ياحبيبتي

مع السلامه ياحبيبتي مع السلامه ياغاليه يااغلى واعز الناس

🌸🌸🌸🌸🌸🌸🌸🌸🌸🌸

تمر الأيام وليس لنا من الأمر شئ ليس بأيدينا أن نغير قدرنا ليس بارادتنا ان نمحي الذكريات من قلوبنا

أو أن نجعل عقولنا تتوقف عن التفكير

قلوب تنزف عقول شارده ولكنها مضطرة ان تسير فى ركب الحياة

يرتدي ملابسه وهو يتذكر كل ذكرياته معها يتذكر كيف كانت تتحدث إليه وهو يرتدي ملابسه يتذكر كيف كان يحبها ان تربط له الكرافت ليشعر بانفاسها وهي قريبه منه

يتذكر كيف كانت توصله الى الأسفل وتودعه وتدعو له الله ان يعود إليها سالما

ذكريات كثيرة تحيط به تكاد ان تفتك به

لم يقو على الوقوف بعد جلس على طرف الفراش الذي كان يحمعهما

دموع تجري على خديه رغما عنه مسحها بايديه

قام ونهض وتحرك خارج الغرفه وتوجه نحو غرفة صغاره فوجدهم نائمين وضع قبله على جبين كل منهما ودعا الله ان يحفظهما

وذهب لغرفة عشق وقبلها هي الاخرى

ثم نزل للاسفل فوجدهم على مائدة الفطور:صباح الخير يا جماعه

التفت الجميع له غير مصدقين أنفسهم اهو يزيد بهيئته التى اعتادوا عليها

لقد هذب ذقنه التى لم يحلقها منذ وفاتها

سحب احد الكراسي وجلس القى نظرة على ذلك الكرسي الفارغ والذي كانت دائما ماتجلس عليه لاتريد الذكريات ان تتركه تحاوطه من كل جانب

تذكر كيف كانت تطعمه وتمزح معه وتضحك على كلام عمر بأن منى تقدم له الحلوى كل صباح

حاول أن يعود للواقع:بابا ازى حضرتك

شاكر وقد هزل جسمه وفارقت الابتسامه وجهه:الحمد لله يابني المهم انت طمني عليك يابني عامل إيه

يزيد :حبقى كويس ان شاء الله المهم حضرتك تخللي بالك من نفسك

شاكر:ان شاء الله يابني ان شاء الله

هاله انا طالع فوق اقعد مع عاليا وسليم شويه

هاله :طيب ياحبيبي اطلعلهم وانا جايالك

شمس :انا خايفه على بابا اوى قلقانه عليه

هاله:ماهو ده حاله يابنتي من يوم

يزيد :عن اذنكم ياجماعه انا ماشي

عمر :يزيد تحب اخدك معايا فى العربيه

يزيد وهو يربط على كتفه:لا ياحبيبي انا حروح بعربيتي

شمس خللي بالك من نفسك الله يخليكي انا عارف ان البارد ده بيجيب معاه البيت شغل وانتي بتساعديه فيه وانا مش عاوزك تتعبي

شمس :انا بتسللى بس والله بدل مانا قاعده كده

انا كويسه والله متقلقش علية

يزيد :ربنا يطمني عليكم يارب

سلام عليكم

بعد مرور القليل من الوقت يدخل الشركه التى لم يدخلها اكثر من شهرين

توجه الجميع للسلام عليه كانوا ينظرون إليه وهم مشفقون عليه مما هو فيه

اتجه نحو مكتبه فقامت له منى:بشمهندس يزيد ألف حمد الله على السلامة

يزيد :الله يسلمك يامنى عامله ايه

منى:بخير الحمد لله

يدخل المكتب ليبدا فى مباشرة اعماله

تدخل له منى بكوب من القهوة:اتفضل حضرتك

يزيد:شكرا يامنى طمنيني يامنى ازاي اولادك عاملين ايه

منى:الحمد لله والله بخير المهم حضرتك عامل ايه يابشمهندس انا والله كنت بسأل عنك دايما وعن الصغيرين

يزيد :الحمد لله يامنى الحمد لله

منى:حتعدي يابشمهندس كله بيعدي الحزن هو الحاجه الوحيده اللى بتبتدي كبيرة اوى وتفضل تصغر مع الوقت

يزيد :الا حزني عليها يامنى بالعكس انا كل يوم بيعدي بحس فيه اني مفتقدها اكتر من اليوم اللي قبله

منى:متعزش عاللى خلقها يابشمهندس وكفايه انها سايبالك ذكرى جميله منها ربنا يخليهوملك يارب ويتربوا فعزك

يزيد :يارب يامنى يارب انا والله مافى حاجه مصبراني على بعادها غيرهم

منى:ان شاء الله بكرة يكبروا ويملوا عليك حياتك وينسوك كل الاوجاع اللى عيشتها

يزيد :تفتكري يامنى جرحي والآلام اللى بتغرز فقلبي ممكن تطيب فى يوم من الأيام

منى:حتطيب وبكرة ترجع زي الاول واحسن

طب والله لاضحكك عارف حضرتك لية خاله عايشه فى القاهرة اتجوزت وهي صغيرة كان عندها ١٨سنه وجوزهاكان عنده تلاتين سنه

كانت بتحبه حب مش عاوزة اقولك ولا عنتر وعبله فى زمانهم

واللا لما كانوا يجولنا زيارة كانت مرارتنا بتنفقع منها ومن هيامهم فبعض

جه وهو عنده خمسين سنه تعب شويه ومات

عارف وهما بيدفنوه نامت عالقبر وتقول للناس ادفنوني معاه انا مش عاوزة اعيش حعيش بعده لمين رحت وسيبتني ياغالي

والناس تشدها ويقولولها حرام عليكي كده انتى كده بتعذبيه

تقول عذابي فبعدي عنه ادفنوني معاه وتصوت

انا قلت ياعيني عليكي ياخالتي دي اكيد حتتجنن ياعيني

وقطعت هدومها وعملت عمايل يالهوي مش قادرة اقولك

وحياتك بعد سنه بالظبط لقيتهالك والله يابشمهندس احلوت وصغرت هى حرام كانت اصلا صغيرة ٣٨ سنه بس شكلها اتغير خالص

وقلعت الاسود مع انها كانت حالفه سته وستين يمين انها ماحتقلعه العمر كله

قلعته واعملت دايت اه وربنا وبقت مزة

راح متقدملها عريس راحت موافقه عليه

ولادها قالولها ميصحش ياماما احنا كبرنا وبابا حبيبك اللى كنتي عاوزة تدفني نفسك معاه نسيتيه

قالتلهم الله يرحمه ياحبايبي الف رحمه ونور تنزل عليه بس ياولاد الحي ابقى من الميت

وبعدين انتوا اللى كبار انما انا لسه صغيرة وفعز شبابي اه مانا مش حترهبن يعني وانا اخاف على نفسي من الفتنه

ووغلاوتك يا بشمهندس اتجوزت ولا همها حد ولا حداصلا عرف يقولها كلمه

يزيد :ههههههههه والله ست شاطرة

فجأة سمعوا من تتحدث:خيانه انتوا بتضحكوا من ورايا طب نادوني اضحك معاكم

يزيد :ايمان تعالي ياايمان

إيمان :الف حمد الله على سلامتك يابشمهندس

الشركه نورت والله

انا لما قالولي ان حضرتك رجعت انا قلت لازم اجي اسلم عليك

يزيد :تعالي ياايمان اقعدي

إيمان :منى ازيك عامله ايه وحشاني

منى:احسن منك ياجذمه

يرضيك يابشمهندس طول ماحضرتك مكنتش موجود متجيش المكتب عندي ولامرة تسلم علية ان مكنتش انا اللى كل ما توحشني الجذمه دي اروحلها هي ولا تعبر

إيمان :والله ابدا انا ضغط الشغل علية كتير وانتي عارفه وغياب شمس مأثر علية وانا وعمر الشغل كله فوق دماغنا

منى :عارفه والله ياموني هو فى حد برو يزعل منك ده انتي حبيبتي

يزيد :ربنا يديم بينكم المحبه

منى:ماشي طب انا حروح بقى اجهز لحضرتك كل الورق اللى المفروض يتمضى

يزيد :مااشي

اقعدي ياايمان عامله ايه

ايمان:انا كويسه الحمد لله المهم حضرتك طمني عليك عامل ايه دلوقتي يارب تكون أحسن

يزيد :الحمد لله والله بخير ياايمان

معلش بقى بنتعبك مع الولاد

إيمان :ياخبر يابشمهندس حضرتك بتقول ايه بس ده احلى وقت فحياتي اللى بقضيه معاهم شفت سليم نسخه من عمر

وعمر فرحان بيه اوي

يزيد :وعاليا نسخه منها الله يرحمها

إيمان :ربنا يرحمها ويغفر لها ويسكنها فسيح جناته

يزيد :يارب ياايمان يارب

إيمان :والله كل الناس اللى يعرفها واللى ميعرفهاش دعولها ربنا يرحمها يارب

يزيد :وانتي مفيش أخبار جديده

إيمان :ولا قديمه وحياتك

يزيد :وحسن مش كان متفق مع عمر انه حيسيب الشغل فشرم وييجي يشتغل معانا

إيمان :والله مانا عارفه كل شويه يطلعلي بحاجه شكله كده مش عاوز يسيب الشغل هناك هو اصله بيحب الشغل مع السياح اوى

يزيد :ده انا قلت انه مش حيقدر على بعادك

إيمان :ماحضرتك عارف بقى لهفة البدايات دي بتروح بعد الجواز

يزيد :مالك ياايمان شكلك مش عاجبني انتي فى حاجه مزعلاكي

ايمان:انا مفيش حاجه مزعلانى غير موضوع الحمل مش عشاني والله يابشمهندس عشان هو حيتجنن خلاص

الموضوع مسيطر عليه بشكل

مفيش مكالمه بيننا ولا زيارة الا لما لازم نتخانق بسبب الموضوع ده

يزيد :طب انتوا اخدتوا خطوة

إيمان :لسه والله

يزيد :طب وانتوا مستنيين ايه مانتوا بقالكم ست شهور اهوه متجوزين لازم تكشفوا بقى عشان حتى تطمنوا

ايمان:خايفه مكدبش عليك مش عارفه حعمل ايه لو فعلا طلع فى حاجه

يزيد :بشروا ولا تنفروا

ان شاء الله مش حيكون في حاجه بس عالاقل تطمنوا

ايمان:ان شاء الله هو اصلا جاي اخر الاسبوع حاخده ونروح نكشف ونشوف بقى

يزيد :ان شاء الله خير ياايمان

إيمان :يارب يابشمهندس يارب

تنهي عملها وتذهب لسماح

تطرق الباب فيفتح لها حماها:اهلا ياايمان اتفضلي

إيمان :مش معقول يااه والله ليك وحشه ده انا كنت قربت انسى انك عايش معاهم هنا فى البيت

حماها :لا مانا داخل تاني

إيمان :ادخل الكهف ياحاج يالهوي ده انت تشل وربنا الله يكون فى عونك ياسماح

سماح:يااختي بلا وكسه سيبك منه بقالك يومين مجيتيش ياجذمه

إيمان :معلش بقى الشغل كان كتير وتعبانه والله

سماح:يمكن تكوني حامل واللا حاجه

إيمان :لا والله ياسماح ادعيلي احسن انا بدات أقلق

سماح:ان شاء الله يا حبيبتي سبحانك ياربي بقى بسمه حامل وانتي لسه وله فى ذلك حكم

المهم قوليلي الولاد الصغيرين عاملين ايه

إيمان :حلوين اوى ياسماح طعمين بشكل ربنا يحميهم يارب

عاليا نسخه من امها وسليم نسخه من عمر عمه

سماح :بكرة ابوهم يتجوز

إيمان :لا مش ممكن استحاله هو اكيد حيقعد يربي ولاده

سماح:ماهو حيتجوز عشان يربي عياله بردو ويتربى معاهم بالمرة

إيمان :لا ياسماح انتي متعرفيش كان بيحب مراته ازاي ده انتي مشفتيهوش النهارده فى الشركه حالته ازاي

سماح :عادي يااختى بتحصل فى احسن العائلات

إيمان :بقى معقوله البشمهندس يتجوز ده انا وربنا كنت ازعل منه اوي

سماح :حيحصل وبكرة تقولي سماح قالت

🌸🌸🌸🌸🌸🌸🌸

فى المساء تنام على صدره العاري وهو يدخن السيجار:وحشتني اوى ياحبيبي بقيت بتغيب عني كتير

آدم :الشغل بقى

انجي:مانا عارفاك وانت بتشتغل ياادم وعمرك ماكنت بتتاخر عني ايه اللي حصلك نسيتني خلاص نسيت انجي

ادم:انا لو كنت نسيتك مكنتش حكون موجود هنا دلوقتى

انجى :انا بحبك اوى ياادم

يعلن هاتفه عن اتصال تمسك التليفون فتجدها مياده

دي مياده بتتصل ليه دي عاوزة ايه منك دلوقتى

آدم :"معرفش ردي عليها انتي

تفتح الخط:ايوة يامياده

تنصدم مياده من رد انجي عليها اهو معها :انجي

انجي:ايوة انجي عاوزة حاجه يامياده

مياده:هاه لا ده انا بس كنت عاوزة مستر ادم فحاجه

انجى :هو بياخد دش دلوقتى ابقى قوليله عاللى عاوزاه فى الشركه

مياده:طب ممكن تخليه يكلمني بعد مايخرج من الحمام

انجى:مياده متشتغلنيش انتي عاوزة ايه ادم عقله معايا دلوقتى ياللا ياقطه سلام وتغلق فى وجهها الخط

ده ايه البت دي تقوم وتفتح عليه باب الحمام وتجلس على حرف البانيو:هي ايه حكايتها الاخت دي عاوزة ايه

آدم :معرفش هو مش انتي اللى رديتي عليها كنت شوفيها عاوزة ايه

انجى:واسيبك ياقلبي مقدرش اضيع ثانيه مع حد وانت معايا ياروحي

مقلتليش عامله معاك ايه فى الشركه

ادم :عادي اديها بتشتغل حتعمل ايه يعني

انجي :محاولتش تلف على حد فى الشركه اصلها حتموت وتتجوز ياعيني ماتشوفلها حد كده من طرفك غلبانه بردو

ادم:بقولك ايه انتي حتضيعي الدماغ اللي عاملها عليها واللا ايه

انجى :ههههههه لا كله الا الدماغ دي متكلفه

آدم :طب تعالي بقى ويسحبها فى البانيو وتعلو ضحكاتهم

بينما تعلو شهقات الاخرى وتنهمر دموعها:بقى كده ياادم بتخوني معاها وعيني عينك كده بس انا اللى استاهل عشان صدقتك لما قلت انك بتحبني

ووثقت فيك ياريتني ماكنت طاوعتك يعني انا دلوقتى مرميه هنا وقاعده مستياك زى الكلبه

وانت نايم فحضنها هيا ماشي ياادم انا حوريك مياده حتعمل ايه

🌸🌸🌸🌸🌸🌸🌸🌸🌸

تجلس امام الدكتورة وتنتظر ردها بعد ان رات التحاليل التى اتت بها إليها

طمنيني يادكتورة الله يخليكي التحاليل فيها حاجه

الدكتورة :اطمني ياحبيبتى تحاليلك زى الفل مفيهاش اي حاجه

نيرة:بجد يادكتورة يعني انا حخلف

الدكتورة :ان شاء الله ياحبيبتي انتي متجوزة بقالك اد ايه

نيرة:حوال اربع شهور

دكتورة :كل القلق ده على اربع شهور ده انتي عروسه ياحبيبتي

سلمى:دي كانت عاوزة تجيلك من بعد شهر والله بس قلتلها الدكتورة حتطفشنا

الدكتورة:لا اطمني متعودة على النوعيه دي انا من يومين كان عندي عريس وعروسه بقالهم شهر واحد وجاي يعرف هي محملتش ليه

سلمى :ده مجنون بقى

الدكتوره:بصي هو فى حاجه غريبه وطبعا ده بسبب الهرمونات اللى فى الأكل والفراخ البيضه واللحوم المستورده والمواد الحافظه بتبوظ الدنيا تلاقي واحده تحمل يوم الفرح وواحده تقعد بالشهور وغيرها بالسنين وكله طبعا بمشيئة ربنا

نيرة:ونعمه بالله

طب انا حعمل ايه دلوقتي

الدكتوره :ولا اي حاجه حناخد بس منشطات تظبط الدنيا شويه وحقولك على مواعيدها

بس خللى بالك المنشطات دي احيانا كتير بتجيب توائم

سلمى :تواءم يارب

نيرة :اي حاجه انا راضيه بس افرح علاء بحتة عيل

💜💜💜💜💜💜💜💜💜💜💜💜