رواية خادمة_الصقر الجزء_التاني الفصل الاول والثاني والثالث والرابع بقلم يوستينا سامي حصريه وجديده على مدونة أفكارنا
 |
رواية خادمة_الصقر الجزء_التاني الفصل الاول والثاني والثالث والرابع بقلم يوستينا سامي حصريه وجديده على مدونة أفكارنا
صقر بحده كان واقف بيرمي فازة علي نغم بغل بسبب كلامها المستفز ليه
نغم و هي بتتلاشي الفازة وبتبصله بصدمة / يا نهارك اسود انت عايز تموتني يا صقر ، طب ده انا هخرب بيتك والله
صقر بحده قرب منها / باقولك ايه اوعي تكوني فاكره علشان جوزك مسافر اليومين دول انا مش هاعرف اخذ معاكي حق ولا باطل سامعة يا نغم
و بعدين مش كفاية تربيتكم للعيال بوظتوهم .. حسبي الله و نعم والوكيل
نغم وهي بتبعد عن صقر بحذر و بتحط ايدها علي راسها بصدمة / انت بتحسبن عليا يا ابن الحديدي طب والله لاقول لخالد اول ما يرجع يشوفلي حل معاك .. و بعدين مالها تربية عيالي . ما هم زي القمر
شوف كارمن مجتهدة و شاطرة
صقر بغييظ / كارمن بس علشان انا لحقتها منك لكن فهد ده اني نظامه هاااا ، ابنك يا هانم بقي معروف في القسم اكتر من الظباط نفسهم من كتر مشاكله وانتي مش بتعملي حاجة غير انك تدافعي عنه و بس ، طب بذمتك ده شكل ام ...
قمر خرجت من المطبخ / يووه انتوا مش بتتعبوا من خناقكم ده . انا بجد زهقتلكم مش كدة .. استهدي بالله يا صقر و ادخل مكتبك و نغم مش هتضايقك تاني
نغم بغيظ و كانت علي وشك العياط/ طب ايه رايك بقي اني هضايقه و اعمل اللي انا عايزاه .. ده بيت جوزي و لو مش عاجبك امشي
صقر بيغيظ / شايفة البجاحة .. شايفة 😑
روح يا خالد الله يخربيتك كان لازم تتعمي و تتجوزها تصدقي و تامني بالله تلاقيه بيسافر كتير طفشان منك يا شيخة ..
...دخل صقر مكتبه علشان يتابع الشغل و نغم فضلت واقفة متضايقه وبتفكر في كلام صقر وهل فعلا ممكن يكون خالد بيخونها .
قمر قربت منها و حطت ايديها ع كتفها / متزعليش صقر عصبي شوية بس والله بيعزك .. انا يعني اللي هقولك بس قوليلي اي سبب الخناق النهاردة بقي .
نغم بتركيز / والله من كتر الخناقات مبقتش اركز ع السبب .. سيبك انتي جوزك ده بومة انا هطلع اطمن علي كارمن احسن اتخانقت مع بنتك النهاردة جامد
________________________________________________
تعالو نتعرف بقي علي ابطالنا الجديدة و نشوف خلفة خالد و نغم 😂❤️
في الجامعه 🏢
...فهد الحديدي كان واقف ماسك تليفونه بيتكلم مع والدته و كان لابس تيشرت اسود عكس لون بشرته فهو شبه نغم بدرجة كبيره لكن واخد عصبية عمه صقر الحديدي وبخفه دم والده خالد
فاجاه قربت نسمه من فهد
( وهي زميلة فهد مجتهدة جدا و اولي علي دفعتها لكن مش مهتمية تماما بشكلها و فهد بيعامها كواحد صاحبه )
نسمة بعصبية خضت فهد / كل ده تاخير يا استاذ فهد
فهد اتخض جامد و بدا يزعق / يا منجي من المهالك .. في ايه يا ماما انتي مش هترتاحي الا لما تجيبي اجلي في يوم يا نسمة مش كدة
نسمة بحده / والله وكمان ليك نفس تعلي صوتك يا بجح ..والله حرام عليك يا فهد بقالي نصف ساعه واقفه مستنياك المحاضره بدات .
فهد بضحك / اه قولتيلي محاضره .. انا بصراحة ماليش مزاج احضر .. وعايز اروح افطر
نسمة بصدمه / يا بارد بقي كدة يا فهد ماشي بس خليك فاكرها
و بعدت نسمة عنه و رجعتله تاني بغيظ
و قالتله /تصدق بقي ان انا بجد زهقت منك و من النهاردة ماليش دعوة بيك ابدا
....وفعلا مشيت نسمه وهي متعصبه جدا من فهد اللي كان واقف ورافع حاجبه بضحك وبيقول بينه وبين نفسه / اعرفها بقالي ثلاث سنين وكل يوم تقولي نفس الكلام لا مره بعدت سابتني في حالي
ولسه فهد هيمشي اتفاجئ بحد بيحط ايده على كتفه
________________________________________________
في اوضة كارمن 🏩
كارمن تبقي بنت خالد و نغم الكبيره و هي عصبية و مندفعة نسخة من نغم
قربت نغم بحذر علشان تتصنت عليها لكن لقت كارمن بتفتح الباب بسرعة و هي بتضحك / طب والله عيب يا ست ماما .. هو مش خالد قالك بطلي بقي العادة الزفت دي
نغم باحراج/ احم . عادة ايه اصلا انا كنت بخبط ع الباب بقالي ساعة بس انتي زي عادتك مش بتفتحي بسهولة..
و قربت منها و مسكتها من شعرها / و بعدين تعالي هنا يا بت انتي .. انتي ايه حكايتك بقي بتعاملي جميلة بنت عمك كدة ليه .. مش هتبطلي غلك ده
كارمن بوجع / اه شعري يا ماما في ايه .. و بعدين مين جميلة دي اللي اغل منها طب دي ماتجيش فيا حاجة .. طب دي ضالمة حتي ووشها يقطع الخميره من البيت ..ولا موتها في الكلام و سهوكتها يا ساتر يارب
نغم بتلقائية/ يا بت لاا هي مش بتتسهوك .. هي طبعها كدة زي امها ملزقين كدة في نفسهم. دي امها كانت بتنقطني كدة
و فاجاه لاحظت نغم اللي هي قالته / اي ده .. مقصدش كدة خالص .. بقولك ايه انتي اول ما ترجع هتعتزريلها .. سامعة يا بنت خالد ابوكي راجع النهاردة و انا مش عايزة مشاكل
....و خرجت نغم من الاوضة و كارمن قعدت علي السرير بحزن و فتحت موبايلها و حاولت تكلم ادهم لكنه مكنش بيرد
كارمن بغيظ / طبعا تلاقيه معاها و مش فاضيلي .. بس بعينك يا جميلة انك تخطفيه مني
________________________________________________
نرجع تاني للجامعة 🏢
التفت فهد و لقه شخص لابس بدله رمادي وكان واضح عليه جدا كريزمته الطاغية و قرب الشبه بينهم
فهد بخضه / حرام عليك يا معاذ خضتني في حد بيخض حد كده علي الصبح مش كفاية عليا ابوك
معاذ قلع النظاره وحطاها في شعره وقاله
وهو بيضحك /اتخضيتي يا بيضة .. حقك عليا معرفش
انك خفيف كدة
فهد بصله بقرف/ اديك عرفت يا اخويا .. عايز حاجة تاني ، اوعي بقي من طريقي ما انا مش مجبر اشوفك في البيت و الجامعة كمان علشان انت ابن عمي مثلا
معاذ مسكه من تيشرت بتاعه / تعال هنا ياض مش انا بكلمك.. بعدين في حد يبقي واقف يكلم نفسه كده
انا حسك متغير .. غريبة انك هادي و ساكت كدة
مش بتعمل مشاكل مع حد
فهد بضحك قرب و حط ايده علي كتف معاذ / عيب عليك يا يسطا مين ده اللي مبقاش يعمل الخناقات .. طب ده انا لسه بافكر ازاي ارخم على عمر واجر شكله النهارده بس بادور على طريقه كريتف
فجاه معاذ اتكلم بحديه ووشه كشر و زق ايد فهد
من عليه /شفت عمرك ما هتتغير انا عارف انك بتاع مشاكل وقلت الف مره لابوك انه يمشيك من الكلية هنا ..انا معيد و مينفعش كل يوم ابن عمي يتهزق و ياخد رفد
فهد كان واقف فاتح بقه بصدمة من تحول معاذ و تخيل انه شايف عمه صقر قدامه وقاله / يا ستار هو انا مش منبه عليك الف مره قبل كده تسيب صقر الحديدي في البيت قبل ما تيجي الكليه
انا مش هاستحملكم انتم الاثنين وبعدين يا عم سبق وقلتلك اي حد يقولك تعرفه قولهم لا وريح نفسك يا ابني وريحني معاك ، طب لعلمك بقى انا بتكسف اقول ان انت ابن عمي
معاذ بصدمه مسكه من التيشيرت بتاعه /نعم يا عين امك بقى انت تتكسف ان انا ابن عمك ليه بقى ان شاء الله
فهد بيبص حواليه بحراج / يا ابني انت بتستمع بالمسكة دي يعني ..نزل ايدك و اهدي انا هافهمك
انا لو قلتلهم ان انت ابن عمي هيفتكروني دمي ثقيل و معقد و و هيخمنوا أن في فرع في عيلتي برضو دمه ثقيل اللي هو ابوك يعني .. مش محتاج اوضحلك انت عارف لوحدك
وهما عارفين ان انا سكر و شربات .. و بعدين لما خالد بيجي الكلية كل الناس بتتجمع حواليه بيتاكدوا من المعلومه ولما يشوفوا امي بيحبوها موت ....فتخيل بقى تبقى انت ابن عمي هتبوظ مصير العيله فهمت يا معاذ .. ادركت المشكلة اللي انا بعاني منها
معاذ ضرب كف على كف وفضل يضحك من كلامه
وقال / يا ريتك ما كنت اتكلمت يا فهد
انا هافضل كده مش عارف اخذ منك لا حق ولا باطل عشان انت ابن خالد .. اكثر واحد باحبه في الدنيا دي كلها
ومشي معاذ و فهد كمان ...
توضيح.. 💪😂
معلومه فهد يبقى ابن خالد الصغير واتولد بعد كارمن
ومعاذ اكبر منه بحوالي ثمان سنين
و من كارمن ب 5 سنين
_____________________________________________
في ورشة تصليح عربيات 🚒
...واقفة بنوتة اسمها لارا و هي تبقي بنت عساف الوحيدة و بتعشق العربيات و الفرهدة و رافضة تقتنع أن والدها لوااء و جدها مساعد وزير ..
رمزي/ صباح الفل يا اسطا لارا والنبي عسل الناس كلها بتشكر فيكي على فكره في الورشه
و بتقول ان يدك تتلف في حرير واحسن واحده تصلح عربيات في مصر كلها
لارا وهي بتطلع من تحت العربيه / صباح الفل يا عسل ..
و قربت منه و مسكته من قفاه / انت ياض مش انا سبق و قولتلك لما تيجي تصبح بلاش الشويتين دول مش انا اللي بيتاكل بعقلي حلاوه ده انا لارا
رمزي / طب والله وماليكي عليا حلفان ... انا ما باكل بعقلك حلاوه انا اصلا ما باعرفش اضحك عليكي يا اسطا اه صحيح عم خيري كلمني وقالي ان ومحتاجك تنزلي من اول الصبح لحد بالليل مش بس ساعتين في اليوم
لارا / لا لا طبعا ما اقدرش اعمل كده انا باشتغل من وراء ابويا يا رمزي ولو عرف ان انا باجيء الورشه ثاني هتبقى مصيبه سودا وانا مش ناقصه الصراحه بقى ..باقولك ايه ما توريني جمال قفاك وتروح تجيبلي كوبايه قهوه عشان انا اظبط الطاسه علشان مش عارفه اكمل شغلي
....وفي اللحظه دي لارا شافت جميله.. وهي بنوته رقيقه جدا على النقيض لارا ....و جميلة تبقي بنت قمر وصقر الصغيره
لارا جريت علشان تحضنها بس جميله لحقتها و مسكت ايديها / انتي عبيطه هتحضنيني بالبس اللي انت لابسه دوت ..ده انتي كلك شحم
لورا بخنقه / اللهم طولك يا روح في ايه يا بنت الحديدي ما تصطبني كده قولي يا صبح انتي جاية تعكنني عليا ... و بعدين انتي ايه اللي جابك هنا
جميله / ما فيش عربية باظت وقلت اجيبها عندك تصلحيها عشان الزفته اللي اسمها كارمن دي الصبح قعدت تلعب فيها بوظتها ليا انا مش فاهمة هي ليه بتكرهني قوي ليه كده
لارا بضحك و بتضربها في كتفها / يا سلام بذمتك مش عارفه بتكرهك ليه يا ست جميله يمكن يعني عشان لازقه لادهم اليومين دول
جميله باستغراب/ حتى انتي بتفكري فيا كده وبعدين هو فين ادهم اصلا ما اديكي شايفه حالته عامله ازاي
ده خلاص بينهار بقيت كل الاماكن اللي بيروحها مشبوهة يا اما المقابر لوالده و والدته .. و بعدين انتي عارفة كويس اوي أن كارمن بتغير مني في العموم
لارا بضحك / طب ما انتي كمان بتغيري منها اوي علشان معاذ اخوكي بيعاملها احسن منك و بينصرها دايما عليكي .. صح يا عسل ولا انا غلطانة
جميلة اتوجعت اوي من كلامها و قالتلها بحده / بطلي طريقتك دي بقي ... و بعدين انا عارفة ان معاذ اصلا مش بيحبني و طول الوقت حاسس اني جيت الدنيا دي و اخدت كل الاهتمام منه ..بقولك اي بلاش تنكدي علياا و شوفي العربية
______________________________________________
في شركة الحديدي ..
في شاب واقف لابس بنطلون اسود و جاكت اسود و قميص ابيض و واضح علي ملامحه الصرامة و الحده .. واقف قدام عساف و كريم
يزن بعصبيه / يعني ايه ادهم بقاله اسبوع سايب البيت وما حدش يعرف عنه حاجه ايه يا بابا هو للدرجه دي هاين عليكم قوي كده هو مش ده ابن اعز صاحب عندك ولا ده كلام بتقولوه و خلاص ..
كريم بصله بعصبية وقاله /اول واخر مره تعلي صوتك عليا يا يزن سامع .. ولا انت علشان بقيت ضابط هتفتكر انك كبرت علينا ومن حقك انك توبخنا كمان
عساف / اهدوا يا جماعة .. معلش يا كريم هو اكيد ما يقصدش هو بس خايف على ادهم
يزن بحزن بص لعساف / انا مش بس خايف عليه يا عساف .. انا مرعوب ادهم حرفيا نفسيته بقت زي الزفت وخصوصا بعد موت أبوه كمان و مبقالهوش اب او ام .. يعني محتجني جمبه اوي
عساف ابتسم من مشاعر يزن وخوفه الشديد على ادهم وافتكر نصيحه صقر ليهم ان لازم يتربوا على حب بعض وخوفهم علشان يبقوا سند بعض في الدنيا
كريم بص ناحيه عساف وتفاجيء ان هو مبتسم قاله/ ايه عساف فرحان قوي ده عمال يزعق قدامنا وكان احنا السبب في موت جاسر و مراته
وبص كريم لابنه وحزن وقاله / واوعى تفتكر انك هتخاف عليه اكتر مني ده ابن اخويا بس غصب عني انا كمان مش قادر اقف علي رجلي بعد موت جاسر
انا باصبر نفسي و اقول ان دي سنة الحياه و لكن لما ببص لنفسي في المراية بفضل اكلم نفسي زي المجنون و اقول يا ترا الدور علي مين تاني بعد ما عزه ماتت وجاسر حصلها
يزن اتكسف اوي من نفسه و بصلهم بحزن / انا مش قصدي حاجه والله ...بس انا خائف عليه جدا واديك شايف فهد مش واخذ باله من اي حاجه
ومازن مهتم بشغله و بس .. حقك عليا يا بابا انا و الله ما اقصد
و خرج يون من الاوضة و هو موجوع جدا من كلام والده ليه اول ما خرج يزن من الاوضه
كريم قعد على الكرسي وفضل يعيط بحسره وحزن على صاحب عمره واخوه اللي الموت خطفه وبص في صورته قال / مشيت يا جاسر واخذت معاك كل الذكريات الحلوه وسبتلي ابنك اللي رافض يتعامل مع الدنيا في غيابك ..يا خساره يا صاحب عمري كان نفسي تبقى جنبي
عساف ما قدرش يتحكم في اعصابه وبكى مع كريم
وقال / الله يرحمه .. وجعنا كلنا بغيابه بس متقلقش انا عارف مين هيقدر يحتوي ادهم الفتره دي .
استوووووب عارفة ان كتير هيزعل من موت جاسر و هيسالوا عن السبب بس اصبرواااا لسه كل حاجة بتوضح واحدة واحدة و البارت ده كبير علشان تعريفاااااات شوية
ركزوااااا 🎊🎊
معاذ و جميلة .. دول عيال صقر و قمر
فهد و كارمن .. دول عيال خالد و نغم
يزن ابن كريم و ياسمين
ادهم ابن جاسر و عزة
لارا بنت عساف و همس ❤️
#خادمة_الصقر
#الجزء_التاني
#يوستينا_سامي
2
في قصر الحديدي ..
وبعد مرور حوالي ساعتين رجع خالد من ايطاليا و كان معاه معاذ
في الجنينه 🌹💐🌺
معاذ و هو شايله الشنطة و بيتكلم بفرحه / والله منور مصر يا خلود ده انت كنت واحشني يا جدع انت .
صحيح هو انت ليه بتغيب كتير اوي الفتره دي شكل كدة الحكاية فيها انه
خالد رفع حاجبه و ابتسم / لا جامد يا واد و حويط اوي و يا تري بقي ايه الحكاية يا ناصح
معاذ بضحك وقف و حط الشنطة علي الارض و سند ايده علي كتف خالد بهزار و قاله / يعني يمكن و الله اعلم طبعا ، تكون بتلعب بديلك من ورا نغم و حنيت لايام الشقاوة مثلا .. بس نصيحة من اخوك الصغير ابقي تعالي قولي حتي علشان اداري عليك يا جدع
خالد بصله بصدمة ورفع حاجبه و زق ايده
من علي كتفه / ايه ده.. ايه ده هو انا اعلمك الصياعه تيجي تصيع عليا انا .. بقولك ايه يا ابن صقر احترم نفسك ده انا مهما كان عمك برده .. يعني تبص في الارض و انت بتكلمني ياض سامع
معاذ ضحك جامد بعلو صوته / عمي طب والله ما لايق عليك الجو ده خالص .. انت خلود و بس .. انا مش عارف ازاي انت و بابا اخوات اساسا .
خالد ابتسم/ تصدق وتؤمن بالله انا نفسي مش عارف لا ومش اخوات عاديين .. ده احنا توام كمان بس قولي بقى صحيح هو فهد ليه ما جاش خذني من المطار هو سهران بره برده
معاذ اتتوتر جدا لانه ما كانش يعرف فهد فين اساسا
وقاله / اه تقريبا كان عنده امتحان بكره فاكيد قاعد
بيذاكر مع اصحابه يا خالد
خالد رافع حاجبه باستهزاء وقاله / لما بتكذب و تحور علياا انا باعرفك عيب ده انا اللي ربيتك مش ابوك .. فعيب تصيع عليا انا
معاذ حط ايده في شعره باحراج وقاله / اعمل ايه بقى يا خالد ما انت عارف ان فهد مصايبه كثير قوي ودائما بغطي عليه بس بجد المره دي ما اعرفش هو فين ... بس اكيد يعني بيصيع
خالد بزعل / ماشي يا معاذ يلا بينا وانا هاعرف ازاي اعدله الفتره دي انا قعدتله في المصر اما اشوف اخرتها معاه
ودخل خالد الفيلا هو و معاذ و قعدوا يتغدوا مع بعض و كانوا مبسوطين اوي
________________________________________________
في اوضة خالد 🤪
نغم كانت واقفه قدام الدولاب بتحط هدوم خالد وبترتبهم قرب خالد منها وحضنها من ظهرها وقالها / طب بذمتك في واحده يكون جوزها لسه راجع من السفر وقاعده بترتب الهدوم طب ده كلام والنبي
نغم بزعل / وهو في واحد يغيب عن بيته و مراته كل ده .. هو احنا مش بنحوشك يا خالد .. طب انت بتوحشنا علفكره
خالد اتاثر بكلامها اوي و قربها ليه و باسها / صدقيني انتي وحشتيني اوي فوق ما تتخيلي ، اومال انا جاي مخصوص ليه و سايب الشغل هناك يضرب يقلب
نغم اتكسفت اوي و بعدت عنه / خلاص يا خالد مصدقاك بس ابعد شوية بلاش التلزيق ده احسن حد من العيال يدخل وانت عارف كارمن
خالد شدها من وسطها ناحيته / يالهووي عليكي بعد العمر ده كله و لسه بتتكسفي مني ، و بعدين فيها ايه لما كارمن تدخل يعني هو احنا بنعمل حاجة غلط اسمعي بس و طوعيني
نغم بعدت عنه بحرج / يوه بقي طب اقفل الباب علشان محدش يدخل .. تموت انت في الفضايح
خالد ضحك من قلبه علي مخزي كلامها / شقية انتي يا نغووم .. طب هقفل الباب و اجي .
______________________________________________
في مكان أشبه بالديسكو ☺️
...فهد كان واقف مع صحابه البنات و بيهزر و بيضحك معاهم و خصوصا انه معروف بخفة دمه
بنت بتحط ايديها علي فهد / طب يا فهود انت كل يوم بتروح بدري ما تسهر معانا ، طب ده احنا هنروح مكان يجنن بعد ما نخلص السهره هنا
فهد بضحك / يا ولية بروح بدري ايه انا كل يوم بروح وش الفجر ، انا عمي لو قفشني هينيمني في حضن الكلب اللي في الجنينة
البنت بضحك / هو عمك ده صقر الحديدي مش كده
يا مامي انا بسمع عنه انه عنيف جدا مع كل الاي شغالين معاه
فهد ابتسم بقلة حيلة / لا والله ده سمع اهون بكتير ده جاحد ، اسكتي ربنا يجعل كلامنا خفيف عليهم احسن دول بيجوا علي السيره هو و ابنه
...و قعدوا يهزروا مع بعض و الوقت اخدهم و ماخدش فهد باله من كم اتصالات معاذ بيه علشان يبلغه ان ابوه وصل
_______________________________________________
في فيلا الحديدي 🎊
..قدام التليفزيون كان قاعد خالد و معاه معاذ و جميلة اخته و كارمن بيتفرجوا علي فيلم هندي كارمن مختاراه
خالد بملل كان بيتفرج علي لقطة اكشن و رافع حاجبه / هما هيفضلوا يطيروا كدة كتير مافيش حد بيموت في الاخر ولا ايه
معاذ و هو بيضحك / معتقدش والله يا خالد .. بس الاكيد ان الواد اللي لابس ازرق ده هو اللي يكسب في الاخر
خالد بستغراب / ليه يا اخويا بقي انشاءلله مكتوب علي قفاه ولا ايه
معاذ ضحك / لا يا خلود علشان هو البطل .. صح يا كوكي
كارمن ضحكت جامد / صح يا زوز .. كفك يسطاا
خالد بغيره زق معاذ من جمبهم و اخد كارمن في حضنه بحب / مدلعيش حد غيري يا بت انتي انا بغير
و بعدين الواد ده ملزق
كارمن ضحكت و هي في حضن خالد و باسته من خده / والله كانت وحشاني القاعدة دي يا خالد اوي .. خد فشار ده انت واحشني موت
خالد بياكل الفشار من ايديها و هو بيضحك / طب والله نغم لو شافتك وانتي بتاكليني كدة هتعضك
معاذ بضحك / ايوة يا عم بتغير عليك .. ما هو ده الحب بقي عقبالنا يارب
خالد اخد حبة فشار و رماهم علي معاذ / بطل تحسدني روح احسد ابوك و امك ياض .. انا مش ناقصك .. احسن من ساعة ما جيت و هي لابسة وش الكلب و مش عارف ليه
جميلة كانت مضايقة ان معاذ بيعاملها بجفاء و قررت انها تغلس علي كارمن و قالت / انا مش بحب الفيلم ده .. و مش بحب الهندي لانه تافه ، بعد اذنك غيري الفيلم و هاتي حاجة عليها القيمة
كارمن بغيظ / والله يا حبيبتي مش عاجبك روحي اتفرجي في اوضتك ، و علي الاقل تبقي ريحتينا من وجودك القيم ده
خالد بعد عن كارمن بزعل و قال / كارمن اي الكلام ده
جميلة تقعد في المكان اللي يريحها و اعتذري ليها حالا
معاذ بغيظ / تعتذر ليه يا خالد . جميلة هي اللي بترخم و بتعمل كدة علشان تنكد بس علينا اصلك مش عارف هي عملت ايه هي و فهد من يومين ...
...جميلة بصتلهم بزعل و كانت علي وش البكاء و قامت دخلت اوضتها
خالد بصلهم بزعل / ايه ده .. ايه اللي حصل لكل ده
صحيح عيلة نكد و غم ، جاتكوا القرف نكدتوا عليا
و في اللحظة دي دخل صقر اللي كان سامع اغلب حوارهم و سمع طريقة معاذ مع اخته و بصله بحده
و قاله بصرامة / تعال ورايا علي المكتب
..و خرج صقر من الاوضة و معاذ بص لخالد بقلق و راح وراه ابوه
______________________________________________
في مكتب صقر 😟
دخل صقر و كان مستني معاذ يدخله و اول ما دخل صقر قرب ناحيته و اتكلم بحده و عتاب
صقر / انا مش هكلمك عن طريقتك مع اختك اللي زي الزفت لان دي ليها قاعدة لوحدها يا محترم
بس انا عايزك في حاجة تانية ..
ايه من ساعة ما خالد جيه و انت قاعد معاه برا و بتهزر و تضحك و لما انا و امك نقولك اقعد معانا و اخرج من اوضتك تقولي عندي شغل .. ايه يا بشمهندس دلوقتي شغلك خلص يعني
.....معاذ بصله برهبة و سكت هو بيحترمه جدا و ممكن في بعض الاوقات يخاف منه
صقر بعصبية اكبر / لا انا لما اكلمك ترد علياا .. فضيت علطول اول ما خالد جيه مش كدة ، ايه ردك
معاذ بادب / كان واحشني مش اكتر يا بابا و بعدين انا عملت ايه غلط لكل الزعيق ده ، ما جميلة علطول ما صحابها او في النادي و برضو مش في البيت
صقر بعصبية و صوت عالي / و انت مالك باختك و بتعدلها نزولها ليه يا معاذ بيه حاطط راسك براسها و كانها عدوتك ، و بعدين جميلة بتخرج مره كل فين و فين و انا اللي بطلب منها كمان تخرج علشان متبقاش لوحدها لانك علطول مش موجود .. بتحب تعتزل عن العالم حضرتك مش كدة
....في اللحظة دي دخل خالد المكتب اول ما سمع صوتهم و قرب من معاذ اللي كان حاطط عينيه في الارض رهبة من صقر و حط ايده علي كتفه ..
خالد / في ايه يا صقر صوتك عالي كدة ليه و مالك مذنب الواد ليه كدة .. ده انت شوية و هتخليه يرفع ايده لفوق كمان
و بص خالد لمعاذ و قاله / ارفع راسك ياض .. هو انت بتغض البصر مثلا ولا ايه
معاذ في اللحظة دي ابتسم غصب عنه من كلام خالد و ده عصب صقر اكتر و بص لمعاذ
و قاله / اطلع علي اوضتك يا معاذ علشان تخلص شغلك واياك اشوفك تحت
و فعلا خرج معاذ منغير ولا كلمه و خالد بص لصقر باستغراب و قاله / انت مش هتبطل ابدا تعامل ابنك بالطريقة دي .. افهم بقي يا صقر ابنك كبر ده كلها سنة او اتنين و يخليك جد ، يعني عامله كراجل
صقر بغيظ / انت بتنصحني انا اني اعامل ابني كراجل .. ده انا طول الوقت بعمل كدة بنشف عضمه علشان يبقي شخص يعتمد عليه و يبقي ضهر امه و اخته بعد ما اموت .. لكن انت بتعمل ايه بقي بتبوظه
مش كدة يا خالد عايز ابني يبقي صايع و مالوش لازمة زي ابنك..هترتاح لما يبقي مستهتر زي فهد
....خالد اتصدم من كلام صقر و مردش عليه و خرج من المكتب و راح قعد في الجنينة يستني رجوع فهد وهو في قمة غصبه
_______________________________________________
بعد حوالي مرور ساعتين رجع فهد و هو شبه سكران و بيتمشي في الجنينة
فهد وهو بيضحك و بيكلم نفسه / ضحكت يعني قالها مال .. وافقت تبقي بنت شما*ل معروفة
وفضل يضحك بصوت عالي و فاجاه سكت اول ما شاف خالد واقف قدامه و علامات الغضب و العصبية مرسومة علي وشه
فهد حاول يستجمع تركيزه / بابا حبيبي .. حمدالله علي السلامة يا غالي ، انت جيت مصر امتي
فضل خالد بيبصله و مش بيتكلم و فهد بدا يلعب في شعره بعدم تركيز و يكلم نفسه بصوت عالي/ اي ده هو انا بحلم ولا ايه .. هو انت مش خالد برضو ولا فيديو كول
خالد اتصنع الضحكة / والله.. فيديو كول يا ابن نغم
تعالي هنا ياض
و شد خالد فهد من قميصه و ضربه بالبوكس في وشه وقاله بغيظ / هاا عرفت اذا كنت حقيقي ولا لاء
..فهد مسك بوقه بوجع و بدا يركز في كلام خالد و بدا يدرك انه في لحظة صعبة دلوقتي و انه داخل في قتال
فهد بدهشة / مالك يا خالد يا حبيبي ايه معصبك كدة ..انا فهد ابنك حبيبك و بعدين ايدك تقلت كدة ليه هو انت بتروح الجيم من ورايا
خالد قرب و ضربه بالبوكس التاني / و كمان بتستظرف يا ابن الظريفة .. وانا وحياه امك فضيتلك علشان هربيك
فهد وقع علي الارض قدام خالد و مسك في رجل بنطلونه وحاول يتكلم بهدوء عكس وجعه / حقك تعمل اللي انت عايزه يا غالي . انا محتاج تربية برضو بس مش تاخدي في حضنك الاول و تقولي وحشتني ياض يا فهد ، اي حاجة من حنية الابهات دي يا خلود
خالد ضربه في كتفه جامد / ايوا يلاا ركبني الغلط ما انا عبيط و هصدقك كلامك و احس قد ايه اني ظالمك .. و بعدين تعالي هنا انت كنت فين علشان اخدك في حضني ... كنت مع صحابك الفشلة الصيع مش كدة يا ابني يا حبيبي
فهد وقف باطمئنان / طلاما قولت يا ابني يا حبيبي تبقي هديك .. ايوة كدة ارجع خالد بتاع زمان
و قرب فهد علشان يحضن خالد / خش في حضن ابنك يا خالد
...خالد حاول يكتم ضحكته و خصوصا انه بيحس ان فهد نسخة مصغره منه لكنه قاوم و ضربه في بطنه بالرجل
لكن قطع ماتش الملاكمة ده نزول قمر و هي بتصرخ بعلو صوتهاااا
#خادمة_الصقر
#الجزء_التاني
#يوستينا_سامي
3
فجاه في الجنينة فهد و خالد شافوا قمر واقفة علي السلم بتاع الفيلا بتصرخ جامد .. جريوا عليها
و صقر خرج من مكتبه خضوض و كذلك جميلة و كارمن
فهد بتوتر / بتصرخي ليه .. في فار في الفيلا
قمر بعياط / معاذ واقع علي الارض في اوضته و حواليه دم بحاول افوقه مش بيفوق
خالد في اللحظة دي حس ان قلبه اتخطف و جري علي اوضة فهد منغير ولا كلمه و و الباقي برضو
________________________________________________
في شقة كريم و ياسمين 🌺
ياسمين بتجهز العشاء و كريم قاعد قدام التليفزيون
ياسمين / طب ممكن افهم انت ايه مزعلك مني كدة
طب انت متخانق مع يزن انا مالي
كريم / مالك ازاي يعني .. هو يزن ده مش تربيتك برضو لا و واخد نفس عندك انتوا الاتنين دماغكم محتاجة تتكسر .
ياسمين قربت من كريم و قعدت جمبه و حطت راسها علي كتفه بحب / و اهون عليك يا كريم .. معقول عايز تعمل فيا انا كدة
كريم حاول يهدي و بص لياسمين بزعل/ انا زعلان اوي يا ياسمين ، الواد بيعاملني كاني عدو . و اه لو تشوفي الطريقة اللي بيكلمني بيها كاني متهم عنده
بدا كريم يكلم نفسه بغيظ / طب ما انا طول عمري بتتعامل مع عساف وهو ضابط واصحابي كلهم ضباط حتى يوسف الله يرحمه وعمرهم ما كانوا بيكلموا باسلوب ده ..
ياسمين بدلع / خلاص بقي وحياتي عندك ، طب بص انا اوعدك اني هقعد اتكلم معاه هو بيسمع مني بس قوم خلينا نتعشي مع بعض انت عارف اني مش باكل من غيرك
كريم ابتسم/ يلا يا ستي . ما انا عارف اني مش هاخد في ايدك غلوة بدلعك ده
و قعدوا ياكلوا مع بعض لحد ما فاجاه لقوا الباب بيتفتح و بيدخل يزن اللي بيبصلهم منغير ما يسلم حتي و بيدخل اوضته و ده بيعصب كريم جدا
_________________________________________________
في اوضة معاذ 😟
معاذ كان واقع في الارض فاقد الوعي و مناخيره و بقه منزلين دم .
خالد قرب منه و اخده في حضنه بلهفة و حاول يفوقه بخوف / معاذ رد عليا يا حبيبي .. انا خالد يا حبيبي رد عليا متقلقنيش عليك .. قوم بقي بطل مقالبك السخيفة دي
.....في الوقت ده صقر كان قاعد جمب خالد بس مكنش قادر يتكلم بدا او مكنش قادر بتحرك من مكانه و بدا يحس ان ممكن ابنه بضيع منه في غمضة عين
لكن صقر فاق من خوفه علي صوت خالد العالي
خالد بصوت اب موجوع علي ابنه / صقر فوق و اتصدل بالدكتور بسرعة ابنك قاطع النفس .. بسرعة
..و فعلا جري صقر و نزل مكتبه علشان يتصل بالدكتور و جميلة جريت علي صقر علشان ميبقاش لوحده .
في المكتب صقر ماسك التليفون و ايده بتترعش. / الو دكتور وليد .. انا صقر الحديدي الحقني ارجوك معاذ ابني قاطع النفس متتاخرشي انا مش عارف اتصرف
و قفل صقر التليفون و لقه جميلة بتقرب منه و بتحضنه / متخفشي يا بابا هيقوم و يبقي كويس والله .
صقر في الحظة دي انفجر في العياط و اخد جميله في حضنه و قال بصوت مبحوح / يارب قومهولي بالسلامة .. انا ماليش غيرهم هما الاتنين.. دول اللي طلعت بيهم من الدنيا مش هقدر اتحرم من واحد فيهم.
...و بعد وقت قصير جدا وصل وليد و كشف علي معاذ و طمنهم ان الدم ده من الضغط العصبي الشديد اللي كان عليه و انا محتاج يرتاح الفتره دي ..
الدكتور / ها يا معاذ قولي حاسي انك بقيت احسن
معاذ كان في حضن نغم و بيتكلم بتعب / اه يا دكتور انا تمام ، انا بس تقريبا ضغطي كان عالي بس دلوقتي انا كويس
صقر كان بيحاول بيتكلم بهدوء و قال للدكتور / معلش يا دكتور تعالي نتكلم تحت و نسيبه يرتاح
...و اخد صقر و خالد الدكتور و نزلوا يتكلموا معاه علشان يطمنوا اكتر
نغم كانت وخداه في حضنها و بتكلمه. / كدة برضو يا معاذ توجع قلبي عليك .. انت مش عارف انت لو حصلك حاجة انا ممكن اموت بعدك
فهد بغيره/ يسلام يا اختي ده انتي عمرك ما قولتيلي انا الكلام ده ..لا وخداه في حضنك يعني جو العشق الممنوع اوي
نغم بتاخد المخده من ورا معاذ و بتقوله / معلش يا حبيبي هضربه بيها و ارجعهالك تاني
و حدفت المخدة علي فهد و قالتله / معاذ ده اول ما شافت عيني وبسببه انا دخلت البيت ده و اتجوزت ابوك ..و بسببه انا شوفت الفرحة في حياتي
معاذ حضن نغم اكتر و قالها/ ربنا يخليكي ليا يا نغم
قمر كانت قاعدة جمبهم / قولي يا معاذ ايه اللي كان ضاغطك كدة الفتره اللي فاتت يا حبيبي .. ما انت كنت كويس و بتهزر و تضحك من شوية
نغم قاطعتها في الكلام / هيكون مين يعني غير الشبح اللي عايش معانا .. هو صقر علطول ضاغط علي الواد و قارفه ، انتي عارفة يا قمر لو صقر ضايقه تاني او داسله علي طرف كدة تاني انا هقطعه بسناني كله الا ولادي
...في اللحظة دي دخل صقر الاوضة هو و خالد الاوضة
صقر بحده / شايف مراتك بتقول ايه يا خالد . ابن فاكره نفسها هتخاف علي ابني اكتر مني مثلا
نغم قامت من علي السرير ووقفت في وش صقر و يمكن دي اول مره تعملها و خصوصا في وجود العيلة كلها/ اه هخاف عليه اكتر منك ، معاذ ده ابني و اللي قولته في غيابك يا صقر بقوله تاني .. انت لو ضايقت حد من عيالي التلاتة انا مش هسكتلك و هاخدهم و همشي من البيت
خالد بصوت عالي فزع كل الموجودين / نغغم مش عايز اسمع صوتك تاني و اطلعي علي اوضتك حالا
نغم بصلته بعتاب و راحت اوضتها و كارمن راحت وراها
فهد قرب من معاذ و قاله بصوت واطي / كل ده بسببك .. مش بقولك بومه ، يلا تصبح علي خير يا زوز
و خرج كمان فهد من الاوضة و وقف صقر قدام خالد و قاله بحده / اديك سمعت بودانك اسلوب مراتك معايا ، تفتكر دي لما تبقي امك عيالك هيطلعوا ازاي
شوفت اخره اختياراتك يا خالد بيه
خالد بحده / دي تاني مره تتكلم عن عيلتي يا صقر
بس المره دي انا مش هسكتلك ، وانت عارف كويس ان لولا نغم مكنتش انا و انت اتصالحنا و كان زمنا دلوقتي بينا عدوات الدنيا و الاخره و عيالنا ميعرفوش بعض
و لازم تعرف ان نغم حتة مني و اهانتك ليها تعتبر اهانة ليا و ده انا عمري ما هسمح بيه علشان كدة انا قررت اني هاخد عيالي و هامشي من الفيلا دي
و مشي خالد من الاوضة و صقر خرج هو كمان و هو متعصب و لحقته قمر و اتبقت جميلة و معاذ
معاذ و هو نايم علي السرير حزين ان كلهم سابوه بص لقه جميلة واقفة جمبه تجاهلها و حاول يجيب كوباية الماية بس مكنش طايلها
جميلة جريت تجبهاله / حاسب احسن تقع .. خد اهي
معاذ زق ايديها بكره/ و مين قالك اني عايز منك حاجة .. انا مش عاجز واعرف اساعد نفسي كويس اوي
جميلة دمعت / انا عارفة انك مش عاجز بس انا حابة اساعدك علشان انت اخويا
معاذ قام من السرير بتعب و قالها / انا مش اخوه حد
ياريت تبعدي عني ، اقولك اعتبريني ميت
و سابها معاذ و دخلت الحمام و خرجت جميلة برا الاوضة و سابته
_______________________________________________
في شقة كريم
و خصوصا في أوضة يزن
كريم دخل و هو متعصب و فتح باب اوضته و يزن كان بيقلع قميصه
كريم بحده / في حاجة اسمها انك لما تدخل من باب الشقة تقول السلام عليكم .. مساء الخير انت مش عايش في زريبة يا بني ادم انت
يزن ببرود / ماشي .. مساء الخير و السلام عليكم هااا في حاجة تاني يا بابا علشان عايز اخد شاور و انام ساعتين قبل ما اروح الشغل علشان عندي مامورية
كريم بيبص لياسمين و هو مستفز جدا / شايفة الواد بيكلمني ازاي .. شايف ابنك ..واد يا يزن تعالي خدني قلمين علشان انا حاسك مضايق مني او اني تقيل علي قلبك مثلا
يزن ضحك بتعب / قطع ايدي يا حاج قبل ما اعمل كدة بس انا مودي وحش و حقيقي موضوع ادهم قارفني
بس علشان كدة تلاقيني غشيم شوية
ياسمين بحده/ لا انت غشيم علطول اتفضل اعتذر لابوك حالا و تعالي علشان تتعشي معانا و بعدها ابقي نام .. يلا يا يزن احسن والله ازعل منك و اخاصمك
كريم بصدمة / هو انتي كمان بتتحايلي عليه علشان يعتذرلي
طب اي رايك بقي ياض انت لو قربت مني لاديك بالبوكس
ولا انت فاكر علشان بقيت ظابط هخاف منك
يزن ابتسم و قرب من كريم باس راس و قاله / ايه الكلام الغلس ده يا بابا عموما حقك عليا يا حبيبي و علشان متزعلش مساء الجمال يا سيدي ..يلا بقي نتعشي مع بعض
كريم بصله بشمئزاز / تصدق و تامن بايه انت عيل غلس و تحرق الدم
يزن ضحك و قاله / لا بس متربي تقدر تنكر يا كيمو
كريم ابتسم و حط ايده علي كتف يزن و قاله / لا يا اخويا مقدرش انكر .. تعالي اطفح معايا ده انت واحشني اوي
________________________________________________
في اوضة فهد كان بيحاول ينام بعد كل البهدلة اللي شافها و سمع صوت كارمن و هي في اوضتها بتذاكر بس بصوت عالي
فهد بغيظ بيشيل المخده من علي راسه. / و بعدين في التورة اللي فاكره نفسها في ميدان العتبة دي
طب والله ما هسيبك يا كارمن المره دي
...و قام فهد و خرج من اوضته و بدا يخبط علي اوضة كارمن جامد و ردت كارمن ورا الباب منغير ما تفتح
كارمن / مين اللي علي الباب
فهد / وحياه امك فاكره نفسك في موقف اتوبيس هو مين هيخبط عليكي في ساعة زي دي غيري علشان يقولك اتنيلي اتخرسي و خشي اتخمدي انا عايز انام
كارمن/ بس يا فاشل يا سقوطة انا ورايا مذاكره كتير اوي و مطبقة للصبح .. يعمي كدة كدة مش هتعرف تنام يا فهد
فهد بغيظ/ بقي كدة ..هو انتي بتكلميني من ورا الباب ليه يا بت ايه خايفة مني مثلا .. و بعدين مين ده اللي فاشل يا اللي جايبة ملحقين و مخبية علي صقر علشان خايفة منه
كارمن في اللحظة دي فتحت الباب بسرعة. / احنا فينا من فتش اسرار يا سي فهد .. بقولك ايه انت لو ممشتش من هنا حالا والله لاكون مدخله القلم ده في عينيك اعورك
فهد رفع حاجبه بدهشة/ انتي عايزة تعوريني انا يا ام اربعة و اربعين .. ماشي يا خنفسة طب لو انتي راجل اعمليها
كارمن ضحكت بتريقة / ما علشان كدة مش هعملها
و ضربته علي قفاه و جريت قفل الباب بتاع اوضته بسرعة
فهد بغيظ/ بنت .. والله لاضربك افتحي يا كارمن انا مش هسيبك النهاردة و هقعدلك علي باب اوضتك ما انتي مسيرك هتخرجي .. مش هتموتي جوا يعني
...و بعد ما استناها كتير و هي مخرجتشي قرر انه يدخل ينام و خلاص ..
________________________________________________
في اوضة معاذ .
كان قاعد زعلان و مش جايله نوم و قعد يفتكر حب صقر ليه و اهتمامه قبل ما جميلة تتولد و بدا يعيط بضعف .
لكن فاجاه لقه الباب بيتفتح و دخل ..
تفتكروا مين اللي دخل الاوضة 🤫💪
#خادمة_الصقر
#الجزء_التاني
#يوستينا_سامي
4
في اوضة معاذ اتفاجاه ان باب الاوضة اتفتح و دخل خالد و معاذ اول ما شافه زعل اوي لانه كان مستني صقر هو اللي يجيله
خالد بهدوء/ صاحي و فايق اتكلم معاك ولا تعبان
معاذ حاول بتكلم بهزار / عيب عليك انا اسد . ادخل يا خالد
خالد دخل و قرب منه و قعد علي الكرسي و قاله بصوت هادي عكس غضبه / ليه بتعمل في نفسك كدة يا معاذ ، ليه طول الوقت بتفضل انك تسكت و متردش علي صقر او حتي تعاتبه ، شوفت اخرتها النهاردة اديك وقعت من طولك
معاذ بحزن / عمري ما اتعودت ارد علي صقر دايما بسمع كلامه ، دايما حسه انه حاجة كبيره
و كلامه أوامر تطاع و بس و منغير نقاش .. انت عارف اني ساعات بحسد فهد انه بيرد و بيهزر معاك
و اقول بيني و بين نفسي ليه انا مش مكانه بس بغير راي في اخر لحظة
خالد بوجع / وليه بتغير رايك في اخر لحظة يا معاذ
معاذ بدموع محبوسة / علشان انا بحب صقر اوي و نفسي هو كمان يحبني و عايزه هو اللي يبقي ابويا و دايما شايفه قدوتي في الحياه ، هو ناجح اوي يا خالد و جدع مع كل الناس .. نفسي ابقي زيه علشان تشاور و تقول هذا الشبل من ذاك الاسد
بس للاسف انا فاشل!!
خالد قرب و قعد جمب معاذ و اخده في حضنه / اوعي تقول الكلمة دي تاني .. انت عمرك ما كنت فاشل ابدا .. ولو مش عارف انت عملت ايه انا ممكن اقولك
و فاجاه ضحك خالد اوي من قلبه و هو واخد معاذ في حضنه و معاذ استغرب / طب انا زعلان و عارفين السبب ، انت بقي فرحان ليه
خالد / لا بضحك علي خيبتنا انا و صقر معرفناش نكون ابهات عليها القيمة
معاذ ضحك جامد / ايه اللي انت بتقوله ده بس .. هو المفروض انك انت عمي و الشويتين دول بكلامك ده
خالد ضحك بتريقة / عمك بالتبني .. بص يا زيزو انا عايز اقولك حاجة واحدة صقر مش بيحبك صقر بيموت فيك .. لو الدنيا حكمت عليه يختار بينك و بين نفسه ، هو عنده استعداد يموت الف مره علشانك
هو بس محتاج دماغه تتظبط شوية .. قرب منه ابوك محتاجك الفتره الجاية
معاذ / خلود هو انت فعلا هتمشي و تسيب الفيلا
خالد بص لمعاذ بوجع وقاله / نام يا معاذ و يحلها بكره الف حلال .
____________________________________________
تاني يوم الصبح
في الورشة كانت لارا شغالة في عربية و فاجاه دخلت الورشة عربية غالية اوي
رمزي / اي العربية النضيفة اوي دي يا ست لارا .. يا خوفي يكون حد من عيلتك
لارا طلعت من تحت العربية/ اه صحيح .. لا بس انا اول مره اشوف النوع ده ، تعال لما نشوفه عايز اي
....و فاجاه خرج واحد من العربية لابس بدلة سوداء و شكله انه ابن ناس جدا و لابس نظاره شمس و قرب من لارا و رمزي بغرور
الشاب/ انتوا انا عايز حد يشوف العربية دي بسرعة علشان مستعجل ، بس المهم في حد بيفهم هنا ولا لاء
لارا اتعصبت اوي / مالك ياض ما تتكلم عدل اي حد بيفهم دي و بعدين انت ما تشيل النضاره دي من وشك و كلمنا زي البني ادمين كدة
ولا انت عاملي فيها ابن ناس
الشاب بغيظ قلع النضاره من وشه / نعم يا اختي عاملك فيها ابن ناس اومال انا ايه
وضحك بتريقة / بس طبعا انا بكلم مين واحدة شغالة في ورشة هيكون مستواها ازاي ، بقولك ايه انا ميشرفنيش اني اتكلم معاكي اساسا ..روحي شوفيلي اي زفت يشوف العربية
لارا بصدمة / يا نهار ابوك و كل اللي خلوف اسود و منيل بنيييلة
رمزي في اللحظة دي كان عارف ان لارا هتتهور علي الراجل و مسك ايديها بسرعة وبدا يبعدها عنه و قالها / استهدي بالله يا ست لارا و حقك عليا انا
لارا بصوت عالي سمع كل الورشة و الناس اتلمت عليهم حتي هو اتخض
لارا / اوعي يا رمززززي .. ابعد عني خليني اجيبه من شعره اللي فرحانلي بيه ده و اوريله انا ابقي مين و يعرف ان الله حق
رمزي و هو بيشدها / خلاص يا يسطا والنبي حقك عليا انا ، انا هقول لاي حد تاني يشوف عربيته
لارا و هي بتحاول تقرب من الشاب بس رمزي مانعها / والله ابدا مافيش حد هيعلم علي الواد الحلوو ده غيري وربنا لاعلمك عليك يا حيلتها
والله لاغزك في كرشك .. سيبني يا رمزي
الشاب بصدمة / اي ده .. انتي حقيقي متشرده انا غلطان اني جيت المكان المقرف ده بس هي الحوجة
و يكون في علمك انا هوديكي فب داهية
و مشي الشاب علشان يركب العربية بس لارا مسبتوش و جابت اله من شغلها بس تقيلة و جريت علي العربية بتاعته و بدات تكسرت الازاز بتاعهاا بغل
لارا بغيظ و هي بتكسر / اي رايك يا ابن الزوات .. خلوة العربية مش كده .. حلوة ولا مش حلوة يلااا
....الشاب بصدمة كان حاطط ايده علي راسه و هو في العربية و مش مصدق ان هي كسرت ازاز عربيته و اضطر يسوق العربية بسرعة و يهرب من المجنونة دي
الشاب / وحياه امي لاحبسك يا بنت المجانين بس اصبري
و جري الشاب برا الورشة بسرعة ولارا بصت لمزي بهدوء و قالته / انا عايزة حلبة حصا و متتاخرشي سامع
رمزي بقلق / سامع طبعا يسطا .. حالا تبقي عندك
________________________________________________
في فيلا صقر الحديدي
خالد كان بيتكلم في التليفون و صقر كان نازل علي السلم
خالد في التليفون/ لا انا قولتلك امبارح اني عايز امضي العقود النهاردة بالكتير يا مدحت .. اه انا عايزك تتصرف و ترد عليا خلال ساعتين بالكتير انا مش فاضي للعب العيال ده .. ماشي سلام
صقر بخجل / احم صباح الخير يا خالد .. قولي انت بتتكلم عن عقود اي علي الصبح كدة
....خالد بصله و سكت و مرديش يرد عليه
صقر رفع حاجبة بستغراب / يسلام ده قمص يعني ولا ايه .. ولا تكون فاكر اني هسيبك تنفذ الكلام العبيط اللي قولته امبارح انك تسيب الفيلا و الجو ده
خالد / بعد كل اللي قولته ده و لسه بتقاوح .. يا بجح اعتذر و قولي انا اسف و ساعتها هفكر امشي ولا اقعد
صقر بصله بحرج و قاله / ماشي انا اسف بس الصراحة مراتك صعبة يا خالد بقولك ايه ما تاخدها معاك و انت مسافر و انا اوعدك انك هترجع تلاقي عيالك متربين و محترمين بجد
خالد و هو بيخبط صقر علي كتفه / لا انا عايزهم مش محترمين ، عيالي وانا حر فيهم يا حبيبي
صقر ضحك / طب كلم مدحت بقي و قوله ميجيبش حاجة و بطل بواخة
خالد بص علي التليفون و ضحك / لا انا موبيلي فاصل اساسا و مكنتش بكلم حد بس انا عارفك مش هتيجي تعتذر من نفسك علشان رخم فقولت امثل الدور مش اكتر
صقر ضحك جامد و حضن خالد و قاله / وانا اللي هتجنن و بسال نفسي ازاي انت مستحمل نغم اتاريكم نفس الغباء صحيح حلة و لقت غطاها
خالد ضحك اوي / شوفت نغم طفحت عليك ازاي بقي .. بقولك جباره وانت مش مصدقني
و بعدها اتجمعوا كلهم علشان يفطروا مع بعض و كان فهد بيتوعد لكارمن من تحت لتحت و استغل انها خرجت الجنينة
______________________________________________
في الجنينه 🌹
كارمن / علفكره كلنا قلقنا عليك اوي يا معاذ .. دي طنط قمر كانت بتعيط جامد عليك امبارح حتي عمي
معاذ بملل / عادي انا خلاص بقيت كويس .. بقولك ايه تعالي اركبي معايا اوصلك في طريقي اهو نفرفش شوية
و فاجاه فهد جيه من بعيد و نط علي كارمن ووقعها في الارض و قعد فوقها و معاذ كان مصدوم من حركته
فهد و هو فوق كارمن و ماسك شعرها / فاكراني هسيبك لا و كمان بتضربيني امبارح وبتهربي اديني قفشتك اهوو .. طب والنعمة لاعضك
و مسك ايدها و بدا يعضها جامد و معاذ بيحاول يزقه من عليها
معاذ / ايه اللي انت بتعمله ده انت اتجننت يا فهد
انت مش هتكبر ابدا كدة و تعقل
كارمن جريت ورا معاذ و بتقوله / الحقني يا زيزو
فهد بص لمعاذ بغيظ / يا عم انت يا تخليك حكم منصف يا تسكت شوية و سيبني اجيب حقي .. دي امبارح كانت عايزة تخليني اعور اساسا و طول ما احنا بنفطر بتغيظني .. و شوف دلوقتي بتتمسكن ازاي
كارمن و هي ماسكة ايديها مكان العضة / وربنا لاقول لامك اخليها تقعد عليك تفطسك يا فهد الكلب
...خالد و صقر قربوا منهم و شافوا كارمن و هي علي وشك العياط
خالد بقلق/ مالك يا قلب ابوكي بتعيطي ليه مين زعلك بس
فهد بتريقة / اهو يا اختي الكلب بنفسه جيه ينقذك
خالد بصله بصدمة / مين ده اللي كلب يا ابن ...
فهد و هو بيستخبي ورا معاذ / وانا مالي يا لمبي والله دي هي اللي قالت فهد الكلب و يبقي حضرتك الكلب .. غلط انا كدة
صقر بصله بغيظ / يا اخي يخربيت تربيتك و طريقتك و بعدين اي لازمتها حضرتك دي بعد الكلام اللي زي الزفت اللي بتقوله ..
و بص صقر لكارمن و سالها بحب / مالك يا كارمن هو الحيوان ده ضربك ولا ايه
كارمن بدات تمثل العياط و اترمت في حضن خالد / اه يا عمي .. شايف يا بابا ابنك المتوحش عضني ازاي و منغير ما اعمله حاجة والله و اسال معاذ
فهد اتكلم بصوت واطي في ودن معاذ/ اكيد مش هتعترف عليا و تبيعني يا ابن عمي يا اصيل
معاذ بتريقة / ده انا لو خيروني بينك و بين لبانة هختار اللبانة يا معفن و ابيعك
خالد اتغاظ / بقي انت بتعض بنتي انا يلااا
فهد بدا يتوتر / اهدي يا حج و استهدي بالله و بعدها استعيذ من الشيطان الرجيم و اقري الفاتحة في سرك بقي ..
معاذ ضحك / هو اي كلام وخلاص علشان تتوه ده انت غريب با اخي بجد .. بص يا عمي فهد جري و نط فوق كارمن و عضها و هي بصراحة معملتش حاجة
فهد بخوف بدا يرجع لورا و بيحاول يهدي خالد / اي يا خالد هتصدق واحد طويل يعني و تكدب ابنك
خالد / لا ازاي و دي تيجي
و بدا يجري خالد ورا فهد لحد ما مسكه و بدا يضربه
_______________________________________________
في القسم عند يزن ابن كريم
يزن قاعد علي مكتبه و هو متعصب اوي و خبط أيده علي المكتب و هو بيكلم صاحبه / يعني ايه لسه متعرفش مكان ادهم .. بقولك ايه يا عز انت هتقلبلي مصر كلها لحد ما تلاقيه
سامعني ولا لاء
عز رفع حاجبه بستنكار / خلاص يا يزن هدور عليه والله بس اهدي شوية احنا عندنا شغل كتير .. هتعمل ايه مع الناس الي لسه ممسوكة اد*اب هما محجوزين تحت علفكره
يزن بيطلع سيجاره و بيبدا يشرب بشره و هو في قمة غضبه و قاله / اعملهم ايه يعني هما مش اعترفوا خلاص يبقي مالي و مالهم بقي
عز / ياريت كان زماني ارتاحت . بص هما كلهم اعترفوا ماعدا واحدة فيهم مطلعة عين امي رافضة تتكلم و عايشة في دور الخرساء
يزن حط رجله علي المكتب بغرور و هو مستمر في شرب السجاره و قاله / اه عايشة الدور حلو اوي يبقي جابته لنفسها انا اساسا مودي وحش و عايز اتسلي علي حد ..هتهالي يا عز وانا اوعدك ساعة زمن و تعترف بكل حاجة
عز ببتسامة / طبعا يا باشا .. هجيبهالك و هجيبلك كل المعلومات عنها كمان علفكره هي ملهاش اي سوابق
و خرج عز و ساب يزن يستعد للقاء البنت دي ..
__________________________________________________
بليل في فيلا كانت شكلنا غريب و ناس بترقص و اشكال مشمئزة
نسمه بخوف / ايه المكان اللي انت جايبني ده فيه يا فهد بقى .. انت جايبني مكان مقرف زي ده علشان اشرحلك
فهد بضحك / اعملك ايه مش انتي اللي قولتيلي نفسي اعرف العالم بتاعك .. اهو هو ده العالم بتاعي يا ستي
نسمة بقلق / بس انا مش شبهك و انا غلطت اني حاولت اساعدك و ابسطلك المنهج .. بعد اذنك يا فهد انا عايزة امشي
فهد حس بخوفها و ان حقيقي هي مش شبه المكان ده تماما هي كانت لابسة نظاره و بنطلون و اسع و تيشرت و شكلها طفلة ..
فهد قرب منها و مسك ايديها/ مش عايزك تخافي طول ما انتي معايا يا نسمة .. صدقيني مافيش حاجة ممكن تحصل انتي صحبتي و زي اختي كمان و مش ممكن اذيكي ، تعالي معايا نقعد في المكتب اللي جوا في الفيلا علشان نعرف نركز من الدوشة دي
و اخدها فهد و قعدوا في المكتب في هدوء و فهد بدا يطمن نسمة و هي طلعت الكتاب و بدات تشرحله الاجزاء المهمة ..
برا المكتب في الحفلة ..
عمر بشماته / حلو اوي يعني هو معاها واحدة دلوقتي في الاوضة يبقي خلاص يا اسامة نفذ بقي
اسامة / اه بس انا معرفش مين البت اللي معاه دي بس هي شكلها خام اوي
عمر بستغراب/ بص مش فارقة هو انت مش مثبت كاميرات في الاوضة يبقي نفذ و انا هروح اجيلك البرشام من العربية .. بص يا اسامة انا عايزها فضيحة بمعني الكلمة
أسامة/ حلوو جدا بس انت امشي من الفيلا علشان محدش يشك فيك و انا اول ما اخلص هبعتلك الفيديو . سلام يا وحش
يتبع
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺