رواية حبيبي المدير الفصل الثالث والاربعون بقلم الكاتبه شيماء صبحي حصريه وجديده
 |
رواية حبيبي المدير الفصل الثالث والاربعون بقلم الكاتبه شيماء صبحي حصريه وجديده
"اتجه حسن لـ بيته وهو بيفكر يا تري أدهم بيخطط لأيه لأنه مستحيل يسيب مريم في حالها لأنه بيتوعدلها من أكتر من ٨ سنين .
واول ما دخل حسن للبيت اتجه بسرعه لغرفته اللي كانت قاعده فيها مريم وقعد علي السرير وبدأ يفتكر شكلها وهيا نايمه علي السرير وكان قلبه بيدق بقوه ..
فـ رِجع بضهره علي السرير وهو مغمض عينيه وبيفكر هيتصرف ازاي معاها بعدما وقع في حبها بشده.
وفي الجبل كانت مريم اتجهت مع بنات العم سينا للفرح اللي قالولها عليه..
وأول ما دخلت مريم لبيت كبير وكان مليان بالحريم البدويه قلبها دق بتوتر ..كانوا الحريم كلهم خالعين النقاب اللي بيلبسوه ولابسين لبس من اللي بيصنعوة وكان شكلهم يجنن..
اول ما شافوا مريم استغربوا وعرفوا انها غريبه علي طول لانهم اول مره يشوفها فقربت واحده من قمر وقالت:مين هذي الصبيه يا قمر؟
قمر ابتسمت وهيا بتشاور علي مريم وبتقول:هذي مريم من مصر..وهيا قاعده معانا لحدما جوزها يرجع من السفر؟
كل الحريم اللي في البيت بصوا لمريم بانتباه واللي كانت خجلانه منهم جدا فقربت ليلة منها وقالت :لا تخجلي يا مريم كلنا هنا حريم مع بعض ومستحيل اي رِجال يدخل هنا؟
مريم ابتمست وحركت راسها وقعدت براحة شويه فبدأ الحريم يتقبلوها وبعد ثواني العروسه خرجت وهيا لابسه الزي الخاص بحفلتها وبدأو الحريم يغنوا بدوي والكل فرحان وبيرقص ومريم قاعده بتتفرج عليهم وساكته لحدما واحده مسكت ايد مريم وقالت:بما انك من مصر..ايش رئيك ترقصي مصري..احنا بنحب طريقتكم في الرقص بس مش بنعرف نرقص غير بدوي؟
مريم بصتلهم باستغراب والعروسه قالت بابتسامه:معايا اغنيتين حلوين للرقص ايش رئيك ترقصي معايا ..
"مريم بصت علي قمر وليلة واللي حركوا راسهم بالموافقه فحركت راسها بالموافقه وقامت بخجل والكل اتحمس يشوفوها وهيا بترقص والعروسه شغلت الأغنيه الشعبية ..
مريم غمضت عينيها في البدايه علشان متخجلش وبدأت تتمايل بخصرها علي نغمات الموسيقي وبدأت تحرك جسمها بخفه وكان الكل بيبص عليها ومبهور ..
وبعد ثواني مريم بدأت ترقص بُحرية وتغني مع الأغنيه بابتسامه والكل بيسقف بإعجاب شديد وهيا كانت بتبصلهم وبتضحك لأنها بقالها سنين مرقصتش بالإحترافيه والطلاقة دي..
وبعد دقايق الاغنيه الأولي خصلت ومريم بدأت تندمج معاهم فقالت وهيا بتشاور علي العروسه:شغلي الاغنية التانيه؟
العروسه حركت راسها بالموافقه وجريت بسرعة وشغلت الأغنية الثانيه ومريم قربت منها ومسكت ايديها ورقصوا الانين قصاد بعض والكل كان مبسوط وبدأوا يحبوا مريم لانها اجتماعيه واتعاملت معاهم علي انهم اصحابها .
وعند حسن في القاهرة كان لسا نايم بيفكر هيا عامله ايه دلوقت وهو قاعد كدة وبيفكر فجأة تيلفونه رن برقم واحد من أصحابه ..
عدل حسن جسمه بسرعه ومسك التيلفون ورد عليه وبعدما سمع كلام صاحبه وقف بصدمه وقال:فيين.
صاحبه:في العمارة اللي كنا فيها من اسبوعين..دلوقت مسكنا شقة دعا/رة وكل اللي فيها رجال اعمال؟
حسن بدهشه:طيب ،طيب انا جاي حالا!
حسن انهى كلامه وخرج بسرعه من الشقه وكان وقتها أدهم وصل قدام بيت حسن واول مشافه خارج وبيركب عربيته ابتسم بسخريه ولما حسن اتحرك بالعربيه اتجه ادهم للداخل وقدر يفتح باب الشقه بسهولة ودخل بسرعه للشقه لانه شاكك ان مريم موجوده جوه؟
_____________وفي القصر..
ماهر كان بيبص لأحلام اللي قاعده بتوريله صور الفستان اللي هيا عايزاه وهو كان بيحرك راسه بالموافقه فقرب منها وقال:طيب ولوازم الدلع ايه..مش هتاخدي رأي فيها!
بصتله وحركت راسها بضيق:احترم نفسك يا حضرت المدير ..انت فاكر اني الحجات دي العريس بيشوفها قبل الفرح كده عادي؟
ماهر حرك رأسه بانبهار وقال:دا علي كده بق الحجات دي مثيرة جدا وانا هتدلع لما اقول بس..
افتكرت أحلام طقم الكنغر وسمكة القرش فـ ضحكت وهو بصلها وقال:شكلي هتبسط مش كده..
احلام حركت راسها بالايجاب وقالت:هتتبسط اوي اوعي تقلق..ابتسم وقرب منها وقال وهو بيبعد اللاب توب عنها وبيسحبها علي رجليه وبيقعدها بإحكام:بقولك ايه يا أحلام انا عاوزك تفضلي كده قعده علي رجلي شويه لان شكلك حلو النهاردة وعاملة زي الأطفال؟
احلام كان قلبها بيدق بقوة ومش قادره تنطق من الخجل والتوتر اللي هيا فيه دلوقت فبصتله وحركت راسها بالرفض وهو ابتسم علي شكلها وقرب من خدها بسرعة قبلها وقال:مالك يا احلام احنا متجوزين عادي متقلقيش..وبعدين هو انتي مش عارفه اني دي حقوقي ولا ايه؟
احلام اتكلمت بصوت متقطع وقالت:نز..لني يا ماهر..وعيب اوي اللي بتعمله دا انا مش طفله هتقعدني علي رجلك!
ماهر تجاهل كلامها وقربها عليه اكتر وحط رقبته عند صد/رها وقال بابتسامه:مش عاوز ابعد عنك خليكي جمبي شويه يا روح قلبي من جوا..
بصتله بتوتر وبدأت تاخد انفاسها بصعوبه وهو كان مكمل مشاكسة ليها ومخليها مش قادرة تتنفس وبعد وقت بعد عنها وقال:خلاص يا احلام وشك هينفجر من الإحمرار ..مكنتش اعرف انك خجولة اوي كده.
قامت من علي رجله بسرعه لما لقت فرصتها في الهروب وجريت علي الحمام تداري كسوفها وهو فضل يضحك علي شكلها وقدر يعرف ازاي هـ يسكتها بعد كده وياخد حقه منها .
وبعد دقايق خرجت احلام وهيا بتاخد نفسها براحه واول ما عينيها جت في عينه بعدت نظرها بسرعه وقربت من السرير علشان تنام ولاكن ماهر منعها وهو بيشيلها وبيقول:بتهربي مني ليه يا حبيبتي احنا لسا الليل معانا طويل؟
قالت بخجل :ماهر..انت قولت نأجل اي حاجه دلوقت علشان يوم الفرح صح..!
لفها ليه وبص في عيونها وقال برومانسيه:انا قولت كده..ضم عينيه بتذكر وكمل كلامه وقال:بصراحه مش فاكر حاجه!
سحبت نفسها من تحت ايديه بسرعه وقالت :طيب حاول تفتكر بق ومتقربش مني تاني !
سحبها تاني عليه وبص في عيونها بحب:يرضيكي انام من غير ما ابوس مراتي حبيبتي؟
احلام وشها احمر تاني وهو حاوطها بايديه الاتنين علشان متهربش منه فقرب اكتر منها وقرب شفايفه من شفايفها وهيا بدأت تغمض عينيها بخجل فابتسم علي شكلها وقبلها بحب لانه مش هيقدر يعدي اليوم من غير ما يلامس شفايفها اللي بدا يدمنهم وهيا استجابت معاه.
_________في غرفة حمزه"
كان قاعد علي كرسي متحرك ووهو ماسك موبايله وبيبص عليه وكان مفتوح علي رقم حنين. بسبب انه كان بيلاحقها لفترة عرف من جيرانهم انها معاها تيلفون وكمان طلع عندها أكونت علي فيسبوك بس لانها بنت محافظة مش بتظهر كده قدام الناس..
فكان قاعد وبيبص لرقمها بتوتر ،عاوز يتصل عليها ويقولها انها وحشته جدا وانه نفسه يقابلها ولاكن خايف من رد فعلها لانهم من اخر مره شافها فيها عند مدرستها مقبلهاش تاني ..
وبعد تفكير طويل قدر حمزه يستجمع شجاعته وضغط علي رقمها واستناها ترد..
وعند حنين كانت خلصت مذاكرة وبتساعد اخوها في حل الواجب بتاعه وكانت مامتها وقتها نايمه وسيباهم مع بعض هما الاتنين .
اول ما تليفونها رن وبصت فيه ولقت انه رقم غريب طلبت من أخوها حمزه يرد علي المكالمه علشان لو طلع راجل يقفلوا بسرعه ويعملوا حظر علشان ميتواصلش معاها تاني وبالفعل حمزه سمع كلامها ورد علي التلفون وقال بطفوله:الو..مين!
اتفاجئ حمزه ان اخوها اللي رد عليه ففكر ان اكيد حنين مش موجوده علشان كده الطفل رد بدالها ..فقال بتساؤل:مش دا رقم حنين برضوا؟
حنين اول ما سمعت صوته قدرت تعرفه وقلبها دق بسرعه لانها متوقعتش انه قدر يجيب رقمها بسهوله برغم انها مش بتديه لاي حد .. فـأخوها بصلها وشاورلها يرد يقول ايه وهيا همست في ودنه وقالت بطلب:قولو ايوا وانت مين وعاوزها ليه ؟
حمزه حرك راسه بتفهم وقال:انت مين وعاوز حنين ليه ؟
حمزه ابتسمت ورد عليه:انا عاوزها علشان موضوع مهم اندهلها و خليها بس ترد عليا الأول !
حمزه سمع صوت طفل جارهم بينده عليه فبص لاخته وقال برجاء:حنين خدي بق ردي عليه انتي وانا هروح العب مع الواد مشمش؟
حنين اتفجات وحمزه ابتسم لما عرف انها كل دا موجوده وسامعاه فاستني لما هيا تبدأ معاه كلام الأول ..وهيا بصت لاخوها وحركت راسها ليه بالموافقه واول ما خرج الطفل حنين حطت التيلفون علي ودنها وقالت:ايوا انا حنين مين حضرتك!
حمزه بابتسامه:انا واحد واقع في حبك يا أنسه من الدور العاشر ..ولو مُت واتولدت من تاني وبروح جديده هحبك تاني وتالت ورابع؟
ضمت حنين حاجبها وتجاهلت كل اللي قاله وقالت بتساؤل:حضرتك برضوا مقولتش انت مين!
مسك حمزه ضحكته وقال:انا حمزه يا حنين..معقول معرفتيش صوتي؟
حنين قالت بتوتر بتحاول تداريه في صوتها:انا معرفش حد بالاسم دا غير اخويا فلو حضرتك عاوز تقول حاجه قبل ما اقفل المكالمه اتفضل؟
حمزه اتصدم من كلامها وقال بلهفه:لا اوعي تعملي كده يا حنين دانا كنت اموت فيها صدقيني..وعلي فكرة بق انا تعبت جدا لما جبت رقم تيلفونك هو انتي اي يا بنتي مجهولة الهوية؟
حنين بخجل:انت ازاي تسمح لنفسك تاخد رقمي وبعدين مين دا اللي ادالك الرقم وانا اروح اتحاسب معاه؟
حمزه ابتسم:ليه الاذيه دا كتر خيرة اللي عمل معايا الواجب الكبير دا؟
حنين بتساؤل:يعني اللي ادالك رقمي راجل ..اكيد دا عمي بندق بتاع السوبر ماركت؟
حمزه حرك راسه بالايجاب لانه فعلا اخد رقمها من بندق دا فقال وهو بينكر كلامها:ومين قال بس انه راجل انا قصدي كتر خيرها اللي عملت معايا الواجب دا ؟
حنين بسخريه:يبق مفيش غيرها طنط حنان اللي علي اول الشارع مش كده ..!
ابتسم وقال:لا متظلميهاش دي ست طيبه وكتر خيرها انها كلمتني عنك وخلتني أحبك أكتر؟
اتوترت حنين وسكتت وهوا قال:انتي ونعم الاخلاق يا حنين اي يا بنتي الآدب دا كله دانا من خجلي خوفت لا من كلامي معاكي اوسخ/ك؟
حنين بصدمة وصوت واضح:أفندم ..حضرتك بتقول ايه؟
حمزه بتوهان:بقول بحب ،بحب يا ناس وحبيبي قافل قلبه بترباس ومش راضي عني ،حد يقوله اني بحبه ،حد يقوله انه حبيبي،روحوا هاتولي اجمل ورده علشان أهديها لنور عيني..
بدأت تبتسم بتلقائيه علي كلامه ومن خجلها مردتش عليه فكمل حمزه وقال:عيونها زي النجمة فيها لمعه وجمالها ساطع فيها قلبي واقع ورموشها جنه قلبي فيها طامع وقلبي قاال بإصرار عايز حنين والنبي يا خال؟
حنين ضحكت غصب عنها وقالت بتساؤل:هو انت بتقول شِعر ولا انا بسمع غلط!
ابتسم حمزه ورد بسرعه:لا والله انا بقول اللي حاسس بيه بس اوعدك اول ما نقعد مع بعض هقولك أحلي شِعر هكتب فيكي قصايد وارويهالك يا حنيين ..لان انتي يا حنيني ملامحك زي البحر من جوا مليانه تفاصيل..نظراتك ليا بتحسسني اني أسعد انسان في الدنيا خصوصا لو كانت نضرات عشق؟
حنين اتوترت اكتر وقالت:انا ..انا هقفل علشان الوقت اتاخر وميصحش اتكلم معاك في التيلفون اصلا؟
برجاء :ارجوكي اديني فرصه انا والله شاريكي ومستحيل اخدعك..انتي عارفاني وعارفه خالي وكمان عارفه عنواني..لو عملت اي حاجه متعجبكيش..اتصلي بخالي فورا وانا مستعد للعقاب..
سكتت وهيا بتفكر في كلامه وهوا قال:فيها ايه لو ارتبطنا ..نفسي اشوفك كل يوم نفسي اسمع كلمة بحبك منك..انا صح بسمعها كتير بس منك هتكون مختلفه؟
بدات حنين تشعر بالغيره بعد سماعها لكلامه وقالت بتوتر:بتسمعها كتير..يعني ايه بتسمعها كتير؟
انتبه حمزه لكلامه وقال بتوتر:مش قصدي يا حنين أنا قصدي اني مهما سمعتها من أي بنت منك انتي هتكون مختلفه وتدخل في القلب علي طول؟
حركت راسها وقالت بخجل:طيب انا هقفل علشان ميصحش نفضل نتكلم كده واحنا مفيش اي علاقة تربطنا ؟
قال بلهفه واضحه في صوته:طيب ايه مش هتحني عليا وترقي!
ابتسمت علي كلامه وقفلت بسرعه المكالمة وهو فضل قاعد مصدوم مش مستوعب انه سمع صوتها تاني فحط ايديه علي قلبه وقال:هانت يا حمزه وحبيبت قلبة هترضي عنك .
كانت حنين متوترة ومش عارفه تعمل ايه ولاكن لما افتكرت كل الكلام اللي قاله ابتسمت لانها لاول مره قلبها يدق بقوه لشخص ..فحست ان حمزه فعلا بيحبها لانه لحد دلوقت معملش حاجه هزعلها ولاكن بالعكس وقفته جمبها هيا مش هتنساها..فابتسمت وقررت لنها هـ تبلغه بموافتقها ولاكن بشرط انه يجي ويتقدم ليها رسمي.
____________
وفي يوم جديد وفي القسم.
كان موجود ادهم وهو بيراجع ملف في ايديه وكان الملف دا يخص حسن وعيلته ..فافتكر ادهم لما راح لبيته امبارح وملقاش مريم ولاكن لقي اللي يثبت ان شكة طلع صح..
كان أدهم ماسك في ايديه فردة حلق نسائي لقاها في غرفة النوم بتاع حسن ولان الحلق دا كان نفس اللي كانت لبساه مريم يوم اما كان بيشدها من شعرها وشافه ..فاتاكد ادهم ان حسن انقذها ومنفذش مهمته صح وانه طلع خاين….
فطلع ادهم سلاحه من الدرج وهو مقرر يعاقب حسن لانه اتعهد بكده وافتكر كلامه لما هدد مريم وقالها:انه هيقتلها هيا واللي هيدافع عنها..فخرج من مكتبه بسرعه وهو مقرر يروح لحسن ويواجهه وبعدما ينتقم منه هيعرف منه مكانها ويروح يخلص عليها.
واول ما ادهم خرج من القسم كان حسن داخل ولان ادهم كان الغضب مسيطر عليه فاتحرك بسرعه بعربيته ومنتبهش لوجود حسن وراه وحسن لما شافه اتفاجئ من شكله فحس انه اكيد عرف حاجة عن مريم فجري بسرعه لمكتب ادهم يشوفه كان بيعمل ايه دلوقت ..
واول ما حسن دخل للمكتب ادهم شاف الملف والحلق موجودين علي المكتب ففتح الملف واتصدم انه يخصه هو وعيلته فقرر يقرأ الملف بسرعه ويشوف ادهم عرف عنه ايه وياتري عرف عن بيتهم اللي في الجبل ولما اتاكد ان كل المعلومات عاديه ارتاح ولاكن لما شاف حلق مريم اتصدم وعرف انه اكيد كشف الحقيقه وانه مخبيها فقرر يتحرك بسرعه ورا ادهم ويتابعه ويعرف هوا بيخطط لإيه بالظبط وبالفعل حسن في خلال دقايق فقط كان ركب عربيته واتحرك في نفس الطريق اللي مشي أدهم فيه ولحسن حظة انه قدر بسهوله يلحقه بسبب عطل كان علي الطريق..فكان حسن قاعد في عربيته ومتابع ادهم واللي كان وشه احمر بغضب وبيتوعد لحسن ومريم بالقتل ..
_________وفي شركة ياسر كان وصل فريق من الشركة الايطاليه وكان معاهم شيك مصري بباقي الفلوس وبعدما ياسر اخد الشيك منهم ابتسم وقرر يروح يصرف الشيك النهارده بعدما يسلمهم الشحنه لانه واثق فيهم وبعد وقت اتحركوا كلهم للميناء علشان يشوفوا الشحنه وهيا بتتسلم وبالفعل وبعد وقت كبير تم تسليم الشحنه للشركة الايطاليه وكانت الشحنه اتحملت في السفينه اللي متجه لايطاليا وبعدما انتهي وقت التسليم اتحرك ياسر للبنك علشان يحول الفلوس اللي في الشيك علي حساب الشركة واول ما وصل للبنك ودخل ..قابل المدير واللي كان مبسوط لوجدوه لانه عميل مهم جدا فقال بترحيب:اهلا وسهلا يا مستر ياسر حضرتك نورت البنك!
ابتسم ياسر:دا نور حضرتك!
المدير بتساؤل:ممكن اعرف حضرتك هتعمل ايه النهارده..هتعمل سحب ولا ايداع؟
ياسر بصله وقال وهوا بيطلع الشيك اللي فيه المبلغ من هدومه:هحول لحساب شركتي المبلغ اللي في الشيك دا؟
المدير اخد منه الشيك وقرأه وحرك راسه بالموافقه وقال:اتفضل حضرتك تحب تشرب ايه لحدما نخلص كل الاجراءات..
ياسر بامنتنان:شكرا لحضرتك انا كدا تمام بس لو تخلص الموضوع بسرعه هكون ممتن جدا ليك!
المدير حرك راسه باحترام وخرج من المكتب بسرعه وبلغ اهم موظف عنده انه يحول المبلغ لحساب الشركة بتاع ياسر بيه وبعدها رجع تاني للمكتب وبلغ ياسر ان الاجراءات هتاخد دقايق بس وياسر حرك راسه وهو بيتخيل المبلغ اللي شركته كسبته في الفتره الاخيره ولكنه ملحقش يفرح لان جاله اتصال من عنايات واللي كانت بتبكي وبتقول:الحقنا يا ياسر بيه الحكومة هجموا علي الشقه واخدوا البنات ورجال الاعمال اللي كانوا موجودين وانا الحمدلله اني هربت منهم قبل ما يمسكوني انا كمان؟
ياسر وقف من مكانه بصدمه وقال:بتقولي ايه داحصل امتي كل دا؟
عنايات ببكاء:امبارح بالليل يا باشا..اخدوا كل البنات وكسروا الشقه كلها ..
ياسر حرك راسه بضيق وقال:طيب واخبار السديهات الي اتسجلت ايه. ..اتحولتلي علي اللابتوب اهم حاجه!
حركت عنايات راسها واجابته:كل حاجه عند سعادتك بس هو انت هتسكت يباشا يعني مش هتخرج البنات؟
ياسر بضيق:ملكيش انتي دعوه يا عنايات وشوفيلك اي حته ارتاحي فيها وهدي اعصابك كده وانا يومين وهكلمك؟
عنايات بخوف:حاضر يا باشا..حضرتك محتاج حاجه مني قبل ما اقفل؟
ياسر:لا يا عنايات..اهم حاجه انتبهي لتقعي تحت ايديهم انا مش ناقص مصايب وخلي بالك علي نفسك!
عنايات حركت راسها بتوتر وقالت بالايجاب:حاضر يباشا مع السلامه!
ياسر قفل المكالمه بضيق وهو بيبص للمدير اللي متابع المكالمه بانتباه فقال ياسر بضيق:حضرتك قولتلي دقايق وهتخلص ممكن اعرف الدقايق دي هتخلص امتي؟
المدير بصله بانتباه وقال باسف:معلش يا فندم ثواني وهرجع لحضرتك تاني!
كان المدير خارج من المكتب ولاكن الموظف قاطعه لما دخل عليهم وقال:يا فندم في مشكله في الشيك دا..الفلوس اللي كانت فيه كانت متاحه من عشر دقايق بس ولاكن الحساب اللي كنت هسحب منه المبلغ فجأة صفر وبكده الشيك دا يبقي من غير رصيد؟
اول ما ياسر سمع كلامه وقف وقال بصدمه:نعم..انت بتقول ايه دا..دي الشركه مأكدة عليا وانا وريته للمحامي وقالي انه تمام!
الموظف بتوتر من اسلوب ياسر العالي:يا فندم انا بقول لحضرتك ان الحساب من عشر دقايق بس كان متاح ولاكن فجأة صفر وهو حضرتك متاكد ان الفلوس دي متاحه لحضرتك وانك كنت هتسحبها !
ياسر بضيق وهو بيسحب الشيك من ايديه:انت اكيد بتهزر وأكيد حصلت حاجت غلط..جرب تاني!
الموظف:يا فندم صدقني انا جربت اكتر من مرة بس حضرتك الشيك دا من غير رصيد؟
ياسر وهو بيحط ايديه علي راسه بصدمه:يعني ايه..يعني انا اتضحك عليا..انا شركتي متوقفه علي الفلوس دي ولو مكانتش موجوده خلال اسبوع بالظبط الشركة هتتدمر..شوف حل تاني بسرعه؟
الشاب حرك راسه بيأس وياسر قرب منه ومسكه من هدومه وقال بتهديد:اكيد العيب منك الشركه دي محترمه ومستحيل يعملوا معايا حركه واطيه زي دي!
المدير قرب من ياسر وبعد عنه الشاب وقال:اهدي يا ياسر باشا اكيد حصل عطل وهيتحل تاني بس مينفعش حضرتك اللي بتعمله دا؟
ياسر بصلهم بضيق وصرخ في وشهم وسابهم وخرج علشان يتواصل مع الفريق اللي سلمه الشيك ولاكن كانت تيلفوناتهم خارح التغطية..فاتواصل ما السكرتيره اللي في ايطاليا لقاها مش بترد فصرخ في التيلفون بغضب وهوا بيقول بقهر:مستحيل ..مستحيل يعملوا فيا كده..انا ياسر غنيم يتنصب عليا..ينصبوا عليا انااا؟
يتبع
تتوقعوا ادهم هيعرف مكان مريم فعلا..وياتري ياسر هيحصل في ايه بعدما اتعرض للنصب والاحتيال؟
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺