رواية مرجيحة الفصل الثاني بقلم محمود الأمين حصريه وجديده على مدونة أفكارنا
 |
رواية مرجيحة الفصل الثاني بقلم محمود الأمين حصريه وجديده على مدونة أفكارنا
لما صحيت مكنتش على السرير.. انا كنت على الارض قدام المرجيحه وكان في حد واقف.. رجلين واحده ست واقفه وبتبصلي وبتبرق، استعذت بالله من الشيطان الرجيم.. وحاولت اني اقوم لكني كنت متكتفه مش عارفه اتحرك!
وقربت مني عقلي كان هيتشل، انا متاكده اني شوفت الست دي قبل كده، بس فين مش قادره افتكر؟
واتكلمت وقالت
_ مش عارفاني يا ساره؟
رديت عليها وانا باخد نفسي بالعافيه
= لا لا معرفكيش.. معرفكيش
_ طيب ركزي جايز تعرفيني؟
ركزت في الملامح اللي رغم انها مرعبه لكن قدرت اعرفها، دي جدتي الله يرحمها
اتكلمت بصوت ضعيف وقولتلها
= انتي جدتي صح؟... ايوه انتي هي انا اه كنت صغيره لما انتي موتي لكن انا شوفت صورك مع جدي
_ برافو عليكي يا ساره.. كنت فاكره انك هتفضلي نسياني
= بس انتي ازاي هنا وفي نفس الوقت المفروض ميته؟
_ انا فعلا ميته يا ساره وجايه النهارده عشان اخدك معايا
= لا انا مش عايزة اجي معاكي.. انا عايز افضل هنا مع بابا وماما ومحمد
= خلاص مبقيش بمزاجك يا ساره.. انتي هتيجي معايا
....
ولقيتها بتقرب ايدها مني.. صرخت فضلت اصرخ لحد ما خرج بابا وماما ومحمد بسرعه، ومحدش كان فاهم انا رجعت هنا ازاي؟
لقيت بابا بيقومني وبيقولى
_ انتي ايه اللي رجعك هنا تاني؟.. هو انا مش سايبك انا ووالدتك في اوضتك؟
= معرفش، معرفش يا بابا؟.. انا كنت نايمه ولما فتحت عينيا لقيت نفسي هنا
_ ازاي يعني بتمشي وانتي نايمه ولا ايه؟
= مش عارفه يا بابا.. انا مش عارفه ايه اللي بيحصل؟.. انا عايز امشي من هنا عاوز امشي من هنا عايز ارجع بيتنا في الكويت
_ اه ده انتي واخوكي متفقين عليا بقى.. طيب اسمعوا بقى الكلام ده من الاخر، احنا مش هنرجع الكويت تاني.. وانتى من بكره هتتعرضي على اخصائي نفسي عشان يشوف المشكله فين؟
= قصدك ان انا مجنونه يا بابا؟
_ المرض النفسي ملهوش علاقه بالجنون، وبعدين ما احنا اهو عايشين في البيت ومش بنشوف حاجه اشمعنا انتي يعني اللي بتشوفي؟
...
كلام بابا خلى نفسي صعبت عليا.. وسبتهم وطلعت على اوضتي وانا بعيط، وكنت سامعه اخويا بيكلمه او بالمعنى الحرفي بيزعق معاه وكان بيقوله
_ انت مستني ايه يا بابا؟ مستني تخسر بنتك عشان حته بيت قديم زي ده.. انا مش عارف هنستفاد ايه لما نقعد هنا؟
= محمد انا مش ناقصك انت كمان.. انا خلاص قررت اختك هتتعرض على اخصائي نفسي بكره، والبيت ده مش هيتباع ريح نفسك
_ وانا بقولك ساره مش مجنونه ولا حتى عندها مرض نفسي، والبيت فعلا مش طبيعي وفي حاجه غلط
= اه قول كده بقى.. طيب لما اشوف حاجه بعيني يا سي محمد هبقى افكر في بيع البيت غير كده انا معنديش كلام واتفضل يلا على اوضتك
...
كل واحد راح على اوضته، وتاني يوم جابوني هنا فعلاً واديني قاعده بحكي لحضرتك كل اللي حصل
...
خلصت ساره كلامها وانا قاعد بسمعها باهتمام، وكنت بدون الملاحظات في النوت الخاص بيا.. وبعد ما خلصت
قومت من مكاني وطلبت من سارة ترتاح، واني هكتب التقرير وباذن الله خلال ساعات هتكون خارجه من المصحة
اه ساره هتخرج من المصحه، انا مش بكدب عليها ولا باخدها على قد عقلها.. روحت مكتبي وكتبت التقرير، واخدته وطلعت على مدير المصحه الاستاذ سامح
خبطت علي الباب وسامحلي بالدخول
دخلت وسلمت عليه وقعدت قدامه وحطيت التقرير قدام عينيه
بص في التقرير بتمعن، وبعدها اتكلم وقال
_ ايه الكلام اللي انت كاتبه ده يا دكتور مسعد؟
= كلام اي يا دكتور؟
_ ازاي ساره لا تعاني من مرض نفسي، وكل اللي شافته واقع وكمان بتطلب انها تتحول لمستشفى ويتم سحب منها عينه دم وتتحلل؟
= عشان انا متاكد يا دكتور.. متاكد مليون في المية، ان سارة مش مريضة نفسية..وهي مش بتكدب في حاجه غلط في الموضوع وانا طالب التحليل ده عشان أتأكد من حاجه لو طلعت صح يبقي خلاص سارة هتخرج
_ماشي يا دكتور مسعد رغم اني مش فاهم معني كلامك اي؟.. بس حاضر
...
وفعلا سارة اتحولت لمستشفي واتسحب منها عينة دم.. وكنت منتظر نتيجة التحليل علي أحر من الجمر
وبعد ساعتين ظهرت النتيجة فعلاً، واللي حسبته لقيته، لغة الجسد الخاصة بسارة متدلش أبداً أنها انسانه كدابة، سارة فعلاً شافت كل حاجه حكيتها لكنها كانت تحت تأثير علاج بيسبب هلوسة
وعلي حسب كلام سارة ان محمد أخوها.. هو اللي بيجهز الأكل في البيت بحكم انه شيف.. وليه عمل كده؟.. الأجابة واضحة
حسب كلام سارة محمد كان عاوز يبيع البيت والأب رفض، فاستغل أخته مدمنة أفلام وقصص الرعب وحطلها في الاكل عقار بيسبب هلوسة وبكده كل حاجه كانت بتشوفها ساره كانت حقيقيه من وجهه نظرها ومكنش ليها ذنب ولا حتى مجنونه
المذنب في الموضوع هو محمد.
...
أخدت التحليل وطلعت بيه على الدكتور سامح، وعرضته عليه
وفورا طلب خروج ساره من المصحه كان ممضي منه، اخدت ساره بعربيتي الخاصه لحد باب بيتهم.. خبطت الباب واللي فتح كان محمد
كان مصدوم وهو شايف ساره قدامه، دخلت في ايدي التحليل
وطلبت من ساره تطلع اوضتها.. وبعدها واجهت محمد قدام والده ووالدته.. في البدايه انكر لكن مع الضغط عليه اعترف انه عمل كده فعلاً عشان يضغط على والده ويوافق يبيع البيت
كان كلام صادم بالنسبه لوالد ووالده محمد، ابوه ضربه بالقلم وطرده بره البيت وانا استاذنت ومشيت وكنت فاكر اني عملت الصح لكن الظاهر اني كنت غلطان
****
انا مش مصدقة اني رجعت البيت تاني.. رغم اني زعلانه من محمد واللي عملوا فيا، الا اني فرحانه ان اللي كنت فيه كان مجرد بسبب علاج هلاوس، واني بخير والحمد لله، خلاص انا مش هشوف حاجه تاني وهرجع اعيش حياتي زي الاول واحسن.. هرجع للروتين اللي انا بحبه انام طول النهار واسهر طول الليل واتفرج على افلام الرعب بتاعتي وقصص احمد يونس اللي اتعودت عليها
قطع تفكيري صوت ماما وهي بتنده عليا.. ولقيت بابا وشه في الارض وبيطلب مني اسامحه وانه مكنش يعرف ان محمد هو السبب في اللي كنت بشوفه
طلبت منه ميعتذرش هو مهما كان ابويا.. ولو عمل ايه هيفضل سندي في الدنيا دي ولا يمكن ازعل منه
ولأول مره ومن فتره ماما هي اللي تجهزلنا الاكل.. عملت اكل كتير جداً واكلت والحمد لله
ورجعت اوضتي وقولت انام شويه عشان اصحى واسمعلي فيلم كالعاده
رميت جسمي على السرير ونمت شويه
لكني صحيت على صوت بيقولى
كده تغيبي عليا يا ساره.. انا مستنياكي من بدري عشان العبك على المرجيحه.. زي ما جدك كان بيعمل زمان، فاكره جدك يا ساره؟
فتحت عينيا ... قولت اكيد انا بحلم لكن دي سمعت صوت المرجيحه وكأن حد بيحركها قومت من مكاني وبصيت من الشباك عليها، لقيتها بتتحرك وهي فاضيه، وفي اللحظه دي في ايد اتحطت على كتفي ايد انا عارفاها كويس ايد سودا كلها حوافر بصيت ورايا ولقيت
يتبع الجزء الثالث
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺