رواية قيود امرأه البارت التاسع والعاشر بقلم جمانه السعيدي حصريه وجديده على مدونة افكارنا
 |
رويده...واخيرا صار عندي تليفون خاص بيه
اول مالزمت التليفون طرت من الفرح
فتحته كمت اتصفح بليوتيوب ودزيت كم طلب صداقه البنات مااعرفهن على الفيس
اريد صفحتي تقوى
اول بدايه كله اصفح بليوتيوب اطلع افلام ومسلسلات
وطبخ وملابس
وشغلات تحشيش وضحك بس لو لزمت التليفون انسى نفسي
كلما تصعب عليه شغله اروح الام حيدر تعلمني
من يطلع اياد افتح التليفون ومن اعرف موعد جيته للبيت اقفل التليفون
اقفله خاف يجي اشعار لو رنه ويحس بيه
مااريده يعرف اني صار عندي تليفون
اكيد مراح يقبل لان هو الحد الان عنده تليفون صرصر
عادي
اول ما انتشرت التليفونات صار عليها نقد بمجتمعنا
وهواي طلع حجي عليها مو مثل هسه شغله عاديه
والتليفون صار منتشر كبار وزغار عدهم تليفون
الفقير والغني جوه ايده تليفون
رحت الاهلي ولكيت العيطه كابه
مرتضى وزوجته متعاركين تريد بيت وحدها وهو يريد ابوي يبيع البيت وياخذ حصته
امي تبجي وابوي مريض
مدري اضوج عليهم مدري اتشمت بيهم كل عمرهم يفضلون مرتضى علينا
وهسه يريدهم يبعون البيت ويجهولون تالي عمرهم
امي تكول وين انروح
بعد كبرنا وما نكدر نطلع من هذا البيت
ووين نعيش
همزين طلعت من هذا البيت اياد وعيشته ارحم منهم
كعد شويه وطلعت
من طلعت من الاهلي ومريت على اختي جبت حسابه
حتى نتواصل اني وياها
لان هي زوجها جابله تليفون وعدهم شبكه
جمانه السعيدي
كمت اخلص شغلي بسرعه حتى اكعد اكنك
واذا اعرف اياد جاي احضر الاكل بسرعه حتى ياكل ويرجع الشغله
واذا شفته طول بلكعده لو بلنومه اكعده حتى يروح
اصلا ما اتحمل وجوده بلبيت
رويده...اياد اكعد راح عليك الوكت
اياد...بيش الساعه
رويده...الساعه ٣ العصر
اياد...اي توني نمت
رويده...صار ساعه ونص
إياد.. انتي شعندج هليام بس اوصل وكتلي روحي الحلال وحده
رويده...مزين اخاف على مصلحتك حلال هواي خير من الله وانت عايفه وحده
اياد...بس قبل ماجنتي تخافين علي
رويده.. غير انت تكول معيشنا اريد اخاف علي منا وهيج
اياد...خدري جاي اني هسه اكوم
رويده.. اي تدلل
مرات من يروح للحلال ياخذ زهراء ويااا
أخذه مره وكامت كلما يروح تبجي ورا تريد تطلع من البيت اضوج
العصر من يروح ياخذها ويااا
ابقى اني وحدي اكعد على التليفون وانسا نفسي
ست اشهر واني عندي تليفون وعندي صفحه واراسل اختي وأم حيدر جيرانه واياد مايعرف
مجرد مايدخل للبيت اقفل التليفون واضمه ومن يطلع
اطلع تليفوني
حتى هلكد ما انشغلت بلتليفون ابد ما نتعارك اني واياد
جاي افرغ الطاقه السلبيه بلتليفون
بس هو رجع يلح علمود موضوع الولد
اياد...اريد ولد ليش ما تحبلين
رويده....ايدك على ١٠٠ الف اراجع يم الدكتوره حتى يصير عندي ولد طبعا اني اجذب علي اني اخذ مانع حمل
ولأن اعرف هو أبو فليس ويموت على الفلوس كلما يطلب منى احبل اطالبه بفلوس
اياد...عليمن هلكد فلوس شلون حملتي بزهراء بدون دكتوره احملي هلمره
رويده....اول مره رب العالمين اذن وحبلت
اياد...وهلمره شنو المانع
رويده...اروح للدكتوره واشوف شنو المانع
اياد...روحي للمستوصف
رويده.. مابي تحاليل لازم تحاليل على حسابي
وهيج تحاليل تكلف
اياد...اني اريد ولد يساعدني بشغلي
رويده. هاااا فهمت هسه تريد ولد اطيح حظه بلشغل
عبالي تريد عائله تريد عزوه تريد ضهر
اياد.... باعي لا تكثرين حجي اني اريد ولد لو ازوج
رويده...تزوج هههههه ضحكتني لوووووش صلاوات
ازوج واني اتبرعلك بهاي غرفة النوم التحفه
وانطيها نص ملابسي ذني الماركه عبالك بنات العالم مثلي غشيمات اصلا اهلي يعرفون انت بخيل وقبلو بيك
سمعتك غالبتك
وين اكو وحده تقبل تعيش هيج وضع
جمانه السعيدي
بطني نصها جوع والمسواك الي يدخل للبيت
العزل الي البكاكيل يشمرونه انت اجيبه للبيت والباقي تاخذه للحلال يعني اني وبتك ناكل من اكل الحلال
احنا والحيوانات سوا
وين اكو وحده تصبر عليك مثلي شنو بنات الناس تايهات
انت حتى حقوقي الشرعيه ماكو
انت اذا تريد تزوج ازوج صخله لو نعجه
هي هاي الي تقبل تعيش وياك
بحملي الاول بزهراء الله ستر وعدت على خير
لا دكتوره ولا علاج وحتى من رحت اجيب شردت من المستشفى وعفتني
جمانه السعيدي
اياد...ازوج وغصبا ماعليج
رويده..... .ازوج ايجوز تقبل بلبدايه بس مستحيل تقبل تستمر وياك بطني خاست من العدس الأصفر وتمن الحصه
كمت من اشوف الفواكه مااعرفها
اياد...غيرج يتمنى هاي العيشه
رويده....ووينه الي تتمنى هاي العيشه اريد ابدل وياها
انطيها عيشتي واخذ عيشتها
روح ازوج واني اخطبلك بعد شتريد
اياد...اصبري اذا ماازوج واكسر خشمج
رويده...ازوج بلكت حضها احسن من حضي والي تحصله منك احصل مثله
بعد هاي المشكله كل واحد نام بمكان زعل عليه
يريد ولد بس كون بلاش الولد يجي بلاش ويكبر بلاش
ويشيل اسمه بلاش
ويساعده بلشغل بلاش عباله كلها مثل رويده
تتحمل وتسكت
فور دمي هم حاسب نفسه رجال عليه
امداني وامده حضي الاغبر
كلما اضوج اروح اشغل نفسي بلموبايل حتى انسى ضيمي
كلشي تعلمت بلتليفون
بعدين كمت اشوف اكو فرص عمل
جمانه السعيدي
عمل من داخل المنزل مندوبة مبيعات
راسلت ام حيدر لان اخاف ام حيدر دائما تحذرني من التليفون
تكول ديري بالج ترا جاي تصير من ورا بلاوي
وانتي زوجج مايعرف عندج تليفون
واهلج صعبين تصير المصيبه مصيبتين
راسلت ام حيدر
رويده.. هلو ام حيدر شلونج
أم حيدر... وينج يمعود لو ادري ما جايبتلج تليفون
ليش مااشوفج
رويده... من ورا هذا الجلب بس اطلع يكوم يحجي
أم حيدر....الله يساعدج ولله اني شايله همج
رويده...باعي اني اريد اشتغل اريد مصرف اريد فلوس اياد يابس
ما يطلع منه الربع
واني اريد ملابس اريد معطرات اريد اروح للصالون حالي حال البنات
اكو ينزلون اعلانات يردون مندوبات مبيعات
الشغل من داخل البيت هيج شغل يناسب وضعي
شنو رائيج خوما بي شي لو شغله موزينه
ام حيدر...لا مابي شي تنزلين اعلانات منتجات والفلوس حسب شكد تبيعين
رويده...يعني اشتغل مابيه شي
أم حيدر...اي اشتغلي بس اذا شفتي تجاوز لو شي اسحبي نفسج
رويده....اني راح اتواصل وياج انتي عندج خبره احسن مني
أم حيدر...اني بخدمتج اي شي تحتاجين كدامج
رويده.. تسلمين حبيبتي انتي اكثر من اخت
بعدها بديت اشتغل مندوبة مبيعات
اول شي بشركة علاج عشبي بس احصل كلش قليل
اشتغلت ٣ اشهر وعفته ارباحه قليله
عفته واشتغلت بشركة ملابس
هم المبيعات مو هلكد يعني ربحي قليل كلش
بعد ست اشهر من الشغل صارت عندي خبره
كمت ادور شركه ناحجه اشتغل بيها
كون شركه معروفه لان صارت عندي خبره بلشغل
الفلوس الي اجتني قليله ضميتها ما اشتريت بيها اي شي
وهم اخاف اسوي شي
واياد يسئلني منييلج وشلون جبتي هاي الاشياء
هو انشغل عني بشغله ونسا عنده زوجه محتاجته
واني انشغلت عنه بشغلي وعالم النت
بعد سنه من اشتريت الموبايل
اكو شركه مكياج تركيه منتجاتها كلها تركيه
عدهم فرع باربيل هذا الفرع توصله كل منتجات التجميل
ويوزعها على العراق
طبعا شركه كلش معروفه وشغلهم ماشي
منتجاتهم اصليه
المهم نشرو اعلان يطلبون مندوبة مبيعات
اني اتواصلت وياهم على الواتساب
مدير الفرع بااربيل اسمه هشام
دزيت رساله.... السلام عليكم
.اكو اعلان تردون مندوبة مبيعات
ماردو عليه بقيت منتضره طول النهار بس ماردو عليه
بليلتها اياد بات بلمحصار عنده نعجه مريضه ويخاف عليها تموت
بليل اجتني رساله
هشام.....تفضلي وياج استاذ هشام مدير الشركه
بس سمعت صوت الرساله رديت علي
رويده....اهلا وسهلا طالبين مندوبة مبيعات
هشام...اي عندج خبره
رويده...اي اشتغلت بشركتين قبل وحده منتجات عشبيه
ووحده ملابس
هشام...يعني عندج خبره
رويده.. جربني وشوف شغلي
هشام... احنا منتجاتنا اصليه وغنيه عن التعريف
الشركه الرئيسيه بتركيا وهذا اكبر فرع الها باربيل
رويده...الله يرزقكم
هشام...خلاص انجرب وانشوف شغلج
راح ادزلج صور المنتجات والإعلانات الي تخصها حاولي تنشرين بااكثر من مكان
كلما ازيد المبيعات ارباحج تعلى
رويده.. تمام توكلنا على الله
البارت العاشر
رويده... دزلي استاذ هشام الاعلانات
والصور وكل منتج يشتغل على شنو وشنو فوائده على البشره
توكلت على رب العالمين وبديت شغلي
دخلت كروابات جدد من غير الكروبات القديمه
بديت انشر
الصراحه هم مسوين اعلانات فخمه وتعبانين عليها
سويت صفحه خاصه بس بمنتجات هاي الشركه
وكمت انزل عليها كل منتجاتهم
بلبدايه كانت المبيعات كلش قليله بس اني بذلت جهد مضاعف اليل والنهار اشتغل
وانزل اعلانات كلما تجيني اعلانات جديده انزلها
الي تحجز وتستعمل المنتج اطلب منه تكتب رائيها
انشر على الصغحه
كمت اعرف كل منتج شنو
مثلا كريمات التفتيح كل بشره الها رقم
الباودرات انواعها وكل بشره اي درجه تجي عليها
الحمر ودرجاتها المسكاره والرميل
شويه شغلي مشى
بعدشغل شهر تقرببا
اجتني رساله من استاذ هشام
هشام... مساء الخير
رويده.. اهلا استاذ شغلي عجبك
هشام.. عاشت ايدج شكد رقم حسابج بلمصرف حتى اندزلج فلوسج
جمانه السعيدي
رويده...ماعندي حساب
هشام...ليش ماعندج
رويده....ماعندي
هشام...ضروري تسوين حساب
رويده.. اني قبل استلم فلوسي على حساب جيرانه
ابو حيدر لان عنده حساب بلمصرف
هشام... ضروري يكون عندج حساب حتى تضمنين حقج
رويده...انشاء الله اسوي حساب
هشام...اذا سويتي حساب دزيلي الرقم هنا على الواتساب
رويده...عندي اقتراح اذا عجبك واذا ماعجبك عوفه
هشام.. اي
رويده....نسوي بكج مكياج من منتجات الشركه ويكون علي عرض
بمناسبة راس السنه حتى يكون عدنا زبائن اكثر
يعني نقلل السعر شويه بس راح نعوض بكثرة المبيعات
اذا كثرت المبيعات راح يصير عدنا زبائن اكثر
اذا زودنا دائرة المبيعات وصار عدنا طبقه جديده من الزباين تستهلك منتجاتنا
راح ازيد المبيعات بلاشهر القادمه
هشام... عجبتني الفكره شوفي حددي المنتجات الي ممكن تصير بكج خاص
ودزيلي الصور واذا عندج فكره للبكج الي راح تكون
بي هاي المنتجات يعني شي يشبه شغلنا
وتكون علامة الشركه موجوده
رويده...راح اشتغل على هذا الشي وباجر ادزلك التصاميم وانت اختار الشي الي يعجبك
هشام.. تمام بس لا تنسين تسوين حساب مصرفي
رويده. تمام شكرا لانك سمعتني
هشام...تستحقين الاستماع لان تفكرين بمصلحة الشركه
رويده.. هذا شغلي ومن مصلحتي يطور
بس خلصت المكالمه اجا اياد قفلت التليفون وضميته
حضرته العشى تعشى وكبل نام هلكد ما تعبان
بقيت اليل كله افكر شلون راح يكون شكل البكج
دخلت على مواقع هواي بليوتيوب حتى تكون عندي مجموعة افكار
طبعا التليفون منطيته كتم خاف اياد يكعد ويشوفه
وصلت اخر شي تصميمين كل بكج حددت شنو من منتجات انخلي بي
كل بكج منتجاته تختلف عن الثاني
البكج الاول يكون على شكل شفه لونها احمر
وداخلها مجموعة حمر ومرطب شفه وتحديد
وباودر ومسكاره
والبكج الثاني يكون على شكل ورده لو نها وردي فاتح
بيها اساس وباودر وكنتور وملمع وحمره ومسكاره
جمانه السعيدي
من كملت دزيت الصور على الواتساب وقفلت التليفون ونمت
كعدني اياد من الصبح وياا الصلا
صليت وحضرت الريوك اتريك هو وطلع واني رجعت كملت نومتي
كعدت الساعه بلتسعه على صوته رجع
جايب حليب ويااا
اياد...بعدج نايمه لهسه شنو قصة النوم النهار كله نايمه
رويده... تريد شي مني
اياد....هاج هذا الحليب خثري بجدوره زغار كل جدر بكد هذا البطل حتى أخذه ابيعه
رويده...هسه اخثره اخذته وبديت افوره كعدت زهراء تريكنا اني وياها خثرت الحليب
صارت الساعه بلعشره وربع طلع اياد
فتحت التليفون لكيت استاذ هشام دازلي رساله
هشام.. صباح الخير شنو هذا النشاط يمكن ما نمتي البارحه
شغل كلش حلو عاشت ايدج
ثنيبنهن حلوات راح نشتغل النوعين
ونحضرهن انتي ابدي انشري عنهن مثل ما صممتيهن
انشري واكتبي عليهن مفاجئة راس السنه
من شركتنا
واي طلب او حجز يوصل المنتج بعد يومين او اتلاثه
راح نشتغل تصميم البكجات من هاي اللحظه
رويده...تمام بلتوفيق
قفلت التليفون
اخذت مستمسكاتي وانطيتهن الابو حيدر حتى يفتحلي حساب بلمصرف عندي ٤٠ الف كتله خليهن بحسابي
لان الي يفتح حساب لازم يخلي بي فلوس
واني مااملك غير هذا المبلغ
طبعا صدك الي كال الجار قبل الدار بيت ابو حيدر نعم الجيران احسن من اهلي
جمانه السعيدي
على فكره اني ابد ما اسئل على اهلي
مو جحود بس همه الي علموني مااسئل عليهم
لان لا يسئلون عني ولا بحالي
هذا البعد بدا منهم مو مني زرعو بداخلي البعد والقطعيه
لازم يتحملون النتيجه
وكلشي جاي يسوي بيهم مرتضى
يستاهلونه همه الي كبرو راسه منا لمن كام يتمادى عليهم
كل إنسان بحصد نتيجة اعماله
وأهلي جاي يحصدون نتيجة تربيتهم
الضهر ابو حيدر جابلي دفتر توفير وبي رقم حسابي
رحت دزيت رساله الاستاذ هشام
رويده. .شلونك استاذ هذا رقم حسابي
قفلت التليفون لان سمعت صوت اياد فتح الباب
اجا اخذ الخاثر وراح يبيعه بديت أحضر بلعشى
رجع اياد اتعشى ونام
فتحت التليفون لكيت استاذ هشام دازلي رساله
هشام...هسه احولج الارباح على حسابج من يجيج اشعار على التليفون من المصرف دزيلي اوكي
رويده...تمام شكرا استاذ
اجاني اشعار محولين ٢٥٠ الف هذا الشهر الاول
لان اني بلبدايه ماكدرت ابيع اله شي قليل
ثاني يوم من رجع اياد من العلوه اتريك واخذ زهراء وياا وراح للمحصار
بديت انزل البكج الجديد على رأس السنه ولأن الناس عدها ثقه بهاي الشركه صعدت نسبة المبيعات
واستاذ هشام كان فرحان بشغلي
دزلي رساله.....تستاهلين مكافئه افكارج حلوه
بعده يكتب راسا سمعت صوت اياد قفلت التليفون وضميته
جاب زهراء شايله
آباد....شو صخنت وكامت تتقئ
رويده...يمه بنيتي لزمتها صدك مصخنه
اياد...خاف ماكله شي
رويده.. لا بلاعيمها محتقنات ايجوز بردت اني ماردتها تروح وياك الدنيا بارده
خل ناخذها للمستشفى بلكت ينطوها ابرة التهابات
جمانه السعيدي
بدلتلها واخذناها وراحنا للمستشفى
ضربوها ابره وسجلو شراب من برا
طلعنا برا
اكو صيدليه على طريقنا
رويده. .جيب الها الشراب
اياد...عليمن مو ضربت ابره
رويده.. هسه مووكت حرصك هو الشراب ٣ الاف
روح جيبلها اليله شلون راح تنام
راح للصيدليه بلكوه علي ما قابل يروح
واني بقيت واكفه برا وشايله زهراء
الدنيابارده اني لافتها بطانيه واكفه بلشارع
اتاخر فوك الربع الساعه هو يحجي وياا الصيدلاني
رجع عليه ضايج
رويده ...هاا مالكيت العلاج
اياد...لا لكيته مايقبل بنزل من فلوسه اله ٣
ردت بديل اله ارخص ماكو
رويده.. انت هسه معطلنا بهذا البرد والبنبه ترجف
حتى تعامل هنا ٣ الاف
بس شكول ابو طبع مايبدل طبعه
رجعنا للبيت اياد نام
واني بقيت كاعده اخاف حرارتها تصعد
خليتها بحضني ونمت حتى إذا صخنت احس بيها
انام شويه واكعد اتفقدها الساعه ثنتين رجعت صعدت حرارتها كعدت شربتها من هذا الشراب
ودفيتلها حليب شربت
ساعه يله رجعت نامت مره ثانيه
بلاذان كعدني اياد اكعدي اريد ريوك
رويده... تليلةكله مانايمه كاعده وياا زهراء روح انت حضر ريوكك
اياد...لا انتي كومي يله بسرعه
غطيت زهراء وكمت حضرت الريوك واكفه على الطباخ وغافيه هلكد ما تعبانه
بس طلع رجعت نمت لمن رجع الساعه تسعه ونص كعدني
يريد اكل
كعدت وكعدت زهراء بعدها مصخنه
تربكنا كلنا سوا هو طلع واني تنطيت زهراء علاج
وبديت انضف واطبخ
نسيت استاذ هشام
الساعه ١١ فتحت التليفون
لكيته كاتب
...تستاهلين مكافئه افكارج حلوه
يمكن راح ازود نسبتج
وووينج ليش ماتردين ردي عليه
رويده...اسفه استاذ مارديت عليك بس بنتي مريضه
وأخذتها للمستشفى اعذرني اسفه
للحكايه بقيه تفاعل حلو مثلكم
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺