رواية ليلة البلوط قصص رومانسي كوميدي بقلم Souad_Amri الفصل الاول حتى الفصل العاشر حصريه وجديده على مدونة أفكارنا
 |
رواية ليلة البلوط قصص رومانسي كوميدي بقلم Souad_Amri الفصل الاول حتى الفصل العاشر حصريه وجديده على مدونة أفكارنا
مقدمة
*عمار: خضضضرة خضضضرة ..ً.....نسمع في صوت بابا عينيا خرجو العياط هذا مايكون غير كيف يكون جايبلي البلوط من عند صاحبو خرجت نجري من الصالة قبل مايسبقوني خوتي ويضيع رزقي .وندحم في السجاد جيت مكبوبة على فمي ..لرض دارت بيا نضت نسب .*خضرة: نعللل******" . الحلقة_1..5
ختفووووو ......*عودة: تفو تفيك وربي يعميك .امشي دلكي خبز عوز الوالي لي لصقت فيها ....حسيت احلامي ضاعت تحطمت قاتلي دلكي الخبز مانيش مصدقة ....*خضرة: ماااا مااااا ياااا مااااا والله ماني طايڤة يرحم باباك علاش ماولدتيش بنت قبلي ولا جيبو خدامة كل يوم لاصقة فيا حلت عينيها فيا حسيت روحي نتفرج في سكار موفيز ....*عودة: تمشي ولا ماتمشيش ؟؟.....*خضرة: نمشي نمشي والله غير نمشي لحمي زراق بسبة ولادك ...مشيت على زهري رميت الطحين وبيدون ما رجعتو بغرير من الغش اضطريت نزيد الطحين ..المهم خبزت 12 خبزة حسيت روحي رجعت للخمسينيات نخبز للمقاومين في الجبل.... .*خضرة: كولو وخ*** نعلبو زهري الطحان ..وقتاش نتزوج ونتقلش على راجلي يخرجني برا ناكل ولا نديرلو لقطة اروهي مسلسل حب خادع ونطيح باش مانخدمش في الدار .بصح لازم رواحة في الشمبرا باش شعري يديه الريح .....المهم بعد عراك طويل درت العشا لي عبارة على شوربة حرفية وملحتها حتى لصقت لباابا في الحلق...لصقت ماما في بلاصتي جاب الفجر وهو يعيط عليها علاش خلاتني نطيب ..ضحكت بخبث إنه الإنتصار هاهاهاها باش ماتعاودش تقولي طيبي ....المهم فات النهار وجاب معاه نهار ثاني ...مشيت لبابا طول للصالة ...*خضرة: بابا ماعليش نهدر معاك ....*عمار: ارواحي ....*رحت قعدت حذاه ...خضرة: بابا خصني شوي بلوط جيبلي من عند صاحبك والله نبغيه تاع يامس كلاوه ولادك وجوه الشر عاود قولو عندو جنان ياربي ...*عمار: هذا مابقالي نطلب البلوط نحلف حلفان يلا رجعتلو قتلو عليه يامس قالي هاك هاذ الشوي والباقي رانا نعطوه للخيول والغنم والمعيز ..معزة نتي تاكلي البلوط كل قيس ..نفخت كارهة...*خضرة: زحي تقول نطلبو عليه في الموز هذا غير بلوط ختفوووووو بقيت نزعف والدفال يطير على وجه بابا مسح وجهو وطرطڨ عينيه فيا بزعاف عطيت الريح لرجليا....نهار طول ندور وماما جايبتها ورايا ماهنات حتى خرجت فيا ليلة لبارح عوقتني بضربة للظهر حتى دخل وليت نمشي بصدري لقدام كي البطريق ..المهم تعشينا بابا رڨد شخيرو واصل لعندي طليت من التاقة المسافة مش بعيدة على جنان جارنا ضحكت بخبث غزرت لأختي راڤدة ....جريت للصالة وين راڤد بابا وماما هزيت قشابية بابا الخضرة وخرجت للكيروال ديت البوط تاعو مالف يخدم بيه في الحرث حتى هو خضر لبستهم وانا متحمسة الضحكة لوذنيا حتى بانو ضروسي تاع العقل لبستهم وحطيت الڨرمونة تاع القشابية على راسي وخرجت بالساكت ..سكرت الباب بهدوء شمرت القشابية ورحت نجري مع الحقل كيف الراجل نص الليل متوجهة لأشجار البلوط متوجهة لعشقي وحبي هاهاهاها..حطيت حجرة صغيرة تحت لساني ونردد في تعويذة الأمان الخاصة بيا ...*خضرة: خضرة حشيشة طالبة المعيشة خضرة حشيشة طالبة المعيشة خضرة حشيشة طالبة المعيشة ...حتى وصلت للأشجار عينيا لمعو كيما يلمعو عينين سلطع في سبونج بوب كي يشوف الدراهم ....المهم عنقت الشجرة بصح المهمة الصعبة كيفاش نلحق للبلوط ضرك وهو بعيد امتار للسما .......تسلقت بالشوي حتى لحقت لفوق ونتلفت جهة اسطبل جارنا لي مبعوث منو الضو خايفة يخرج فيا حد بالجرم المشؤوم .......
كان قاعد فوق بوطات التبن ورا باب الإسطبل يغزر للفرس وولدها لي عندو يوم من لي زاد .تلفت للحصان متاعو غزرلو لحظات ومشى خرج جبد سيڤارة شعلها ويتكيف وبقى يتمشى قدام الإسطبل رمى عينو ويغزر لشجرة كاملة تتهز بكلها بالقاوي والبلوط يطيح رفع حاجبو مضيق عينيه والدخان يخرج من فمو .....*الحبيب: بسم الله الرحمان الرحيم!!!!!!!!......يتبع نضت نجري لحقت عندو لقيتهم مدابزين الحرب ....ااااحي ننندب .....*خضرة: يااااو عليكم ويييين حقي .......*مراد: تالي عوالي ....*محمد: والله ماتدي حبة.....غزرت لأختي مولات عشر سنين دارت روحها ماتعرفنيش وهربت لبرا ..بابا رجع خرج وما خليتها تتفرج في التيفي ماتحوس عليهم. ......*خضرة: نتوما بغيتو على رواحكم ...مسحت على وجهي ومشيو لخويا محمد مولى 15 عام هجمت عليه ...شدني من شعراتي ...ماعليش كلشي يهون في خاطر البلوط .....عضيت يدو تشرتل البلوط في لرض .. عينيا ولاو قلوب جاء الفرج .....دزيتو وطحت في لرض نلم وخويا مراد مولى 17 عام ..نزل يدي في رزقنا ...دزيتو طاح بلوطو من تريكوه....مهم بعد حرب طاحنة دامت سوايع ربحت الحررب ب22 حبة مع بعض الخسائر البدنية ..جلدة شعري مش حاسة بيها وعظامي قريب انطحنو الله يطحنهم الحڨرة عيني عينك جريت للصالة لقيت مسلسلي المفضل كمل وبدى وحدوخر ...*خضرة: بسبتهم ..يتبع...الحلقة2:
🌰🌰🌰#ليلة_البلوط🌰🌰🌰
🌰🌰#سعاد🌰🌰
..واش هذا!!!!!!؟......رمى السيڤارة عفس عليها وقرب جهة الشجرة لي تتحرك من بين الشجر حاير ........*خضرة: انها تمطر بلوطا يامامي هزي الشجرة يا خضرة هزي الشجرة ياخضرة هزي هزي هزي ....حبست الهز ونزلت بالشوي كيما طلعت باقية تتشبط مع الشطوط......*الحبيب: شكوون هنا؟!!!!....تهزت وتحطت عينيها وساعو سوطات للرض بسرعة البرق طاحت على دريارها والقشابية غامتها كضمت الألم تسب مابين سنيها وناضت مضرورة ....*الحبيب: هدرت شكوو...قبل مايكمل هدرتو زربت تجري ...عقد حواجبو يشوف ...*الحبيب: ماشي هاك احبيبي ورما خطواتو يجري وراها .....*الحبيب: حبببس عنننددك .....*خضرة: خطيي جررتي على حبة بلوط نعلبوك جار ختفوو بسبتك راحو ترامي وجه البوم ...وصلت للسور بجرية سوطات فوقو بلاما تخمم دهشت في روحها .*خضرة: ياااه وكان يعرضوني في كاش فيلم اكشن حق ربي ندي اوسكر برك زهر الشعر متالبني تلفتت نص دورة وتلقاه سوطا وراها شهقت تلفتت تجري وتدز في صخرة طاحت جا وجها في زبل بڤرة ....*خضرة: ااااااع اااااعق تلفتت لقات باقي خمس خطوات بيناتهم جايها طول ..غزرت للرض لمت حجرات ورمات عليه وحدة جاتو في الجبهة ....*الحبيب: ااا..نع******ليوم ناخضك ولد الكلب .ً..هجم عليها رمات عليه الزاوجة جاتو في الذراع وهربت تجري بجهدها وتضحك بشر ....*خضرة: شحححح رزيتني في ترامي الغاليين ااي ........شاد جبهتو ويسب يشوف فيه تخفى في الضلام ....*الحبيب: يجي نهارك ونعرفك شكون يلا مارميتكش للكلاب مانتسماش الحبيب ولد منصور ..ضررب الحجرة برجلو بعصب ورجع
....
نهار جديد حلت عينيها على ضو الشمس ناضت كي المصعوق بالضو شعرها ضاربة فيه عاصفة ...*خضرة: ااه ياترمتي نندب !!! عين مغمضة وعين محلولة تستوعب في الوضع غزرت للساعة بالاك راهي تحلم لقاتها 10:00 تاع الصباح....*خضرة: مانيش نحلم وحق ربي ماني نحلم ..ناضت تجري كيفاااه امها مانوضتهاش قبل 8:00 كيفاه ماصبحتش على شلاكتها نيميرو ربعة وربعين ....*خضرة: سجل ياتاريخ سجل يازمن أن روحي لقات السلام وان عظامي لقاو الإستقلال .بدات تشطح يمين يسار يمين يسار ....وحبست فجأة عينيها وساعو تفكرت فيلم ....*خضرة: ماتت !!!؟! لالالا لالا خرجت تجري 11 متر حرڤتهم في ثلث ربع خطوات ....*خضرة: هااا ما مامتتيش مامتتيش يرحم باباك ماتموتيش حتى تزوجيني هااا ما خرجت من الكوزينة تجري للصالون دخلت تنهج جسمها يسطر من آلام لبارح حلت فمها على منظر امها في لرض تلفتتلها امها وهزتلها حواجبها لفوق وتحت بضحكة من الطرف للطرف...الحلقة3:
🌰🌰🌰#ليلة_البلوط🌰🌰🌰
🌰🌰#سعاد🌰🌰
خضرة: ما؟!؟ واش راكي ديري؟؟؟.....وواش راكي تقراي؟؟؟..ضحكتلها بخبث وهزت حواجبها لفوق وتحت بحماس .....*عودة: نقرى في خطوات تجهيز العروس ياعروستي ورجعت هزت حواجبها لفوق وتحت...*خضرة: واش؟؟ عروستي!!!! ماسمعتش مليح واقيل .....*عودة: واه ياروحي وااااه خطبوني فيك ...*خضرة: احللللللفيييي!!!!!!......ناضت من لرض حطت الكتاب ومشات لبنتها ....*عودة: امشي دوشي غدوا يجو ولد سعدية جا من حاسي مسعود لولبارح وقالها روحيلهم جاتني صباح بكري تقول غادي تهربي واقيل راهو شايفك ياالعڨرب فرج ربي باش نزفك امشي وعيطيلي نحكلك ظهرك ....*خضرة: ما حبسي ✋...؟!!.*عودة: واش خصك!؟.....*خضرة: عاودي من الجديد واش كنتي تقولي .....قربتلها وصاحت في وجها حتى طار الدفال عليها ...*عودة: خطبوووو وووني فييييييييييييك .......*خضرة: ااااااااحي اااااااحي يانتزوج وندير دار هااانا ويانا اكرهت الڨعدة في الدار هاااانا ويانا .....مشات حلت التيفي وطلڨت الغنا للطرف حزمت خصرها وتعطيه ....*خضرة: اييوا ايييوا ايييوا ايييوا احي احي احي ..انضمت امها معاها تضرب في الكلوة والصرة حتى بدى العرق يسيل منها .مشات دوشت طحنت روحها .. غزرت لوجها منور ....*خضرة: اخاااه زبلة لبارح فادتني اووه خرجت افيكاس على كريماتي ..تفكرت جارهم وواش صرالها لبارح كشرت لروحها في المرايا .....*خضرة: نعل**** وجه البوم اففف منصور راس البغل شيبة النار خصو غير الما يحمى كيفاش يجري هكذاك افففف مشطت شعرها وقفت تغزر لروحها ....*خضرة: لاصدر لاترام زهرو عوج كي زهري يتخذ هوو بغااااا هووواااا بغاااااا صار من ممتلكاتي هاهاهاها تفكرت الفايس جرات حلتو وبدلت اسم فايسبوكها زوجي سر سعادتي وطلعت منشور قصف للبايرات مع فوطو خطبة ....*خضرة: موووتو يالغايارات نهار طول ونتوما تفريمو علينا كرهتونا ختفووووو ااه سمحلي كوندوري مانيش عليك ومسحت الدفال من تلفونها سكرت وخرجت تجري للمطبخ دير زعما في الڤاطو والحالة مڤلوبة والميناج ....امها دارت كلش خلاتها معرسة في الصالة في قنت وهي ميتة بالسعادة على التقلاش تتدرب على كلمة قابلة خالتي سعدية قابلة ..خضرة: اووه لالا ماشي هاك ..خالتي سعدية وهاذي هدرة مانلقاش كي ولدك ، كي ااسكر وعسل النحلة بصح عندي قرن ماشفتوش من لي كان عمري 10 سنين واش من عسل نحلة اففف مهم راجل اووه قصدي راجلي رااااجججليييي العزيييز....الحلقة4:
🌰🌰🌰#ليلة_البلوط🌰🌰🌰
🌰🌰#سعاد🌰🌰
خضرة
فات النهار وانا مع الفايس وماما من هيه تصنف وتعجن وتنقي وانا ميتة بالسعادة الليل مارڤدتوش وانا نخمم في عشقي تاع غدوا لي غادي يجي يشوف حسب ماعرفت من امي لي علمها بابا طبعا
حليت عينيا على صوت تلفوني طفيتو ورجعت رڨدت رجعت حليت عينيا على وسعهم ...*خضرة: اليووووم الموعووووود ....تنفضت من بلاصتي رحت طول للدوش غسلت ورجعت لغرفتي غزرت للساعة مالحقتش 6:30 ...رحت للمرايا استيكيت العمر ولبست ومشطت دخلت ماما باش تعيط لقاتني كيف العروسة حلت فمها ....*عودة: وقتاش نضتي نتي؟؟.....*خضرة: 6:30 ...رفعت يدها تشالي بيها....*عودة: سبهان الله سبهان الله .حسيت روحي نتفرج في MBC بوليوود ...مهم خرجت وخلاتني لحقت 11:00 قريب 12:00 نسمع في الحس برا ..جات اختي تجري من برا ماشي هاذي كانت تقرى وقتاش لحقت ....*بدرة: جااااو جاو جاو جاو جاو جاو جاو ...سرفقتها بكف ....*خضرة: بلعي كملولك البيلات فضحتينا تفووه....*بدرة: تفووووه خانزة ....*خضرة: شميتيني اخرجي عليا ..خرجت وانا رايحة جاية رايحة جاية حسيت الباب تحل تلفت طل عليا طفل صغير هذا ولد سعدية صغيرة يهبل يقتل اااخ باين راجلي كيفو ....*محمود: خالتي خضرة...لمعو عينيا ياعمري على التربية .دخلتو مصمصتو بالبوس ..نسمع في ما تعيط عمري خرجت جيت خارجة قص عليا ...*محمود: خالتي خضرة ترمتك كلاتلك ڨندورتك ...*خضرة: وااش!!!!!!!؟؟ غزرت لترامي لقيت ڨندورتي لصقت من بينهم غمضت عينيا وحليتهم نغزرلو ...*خضرة: برائة ز******.......(النكتة هاذي منقولة حبيت نوظفها😂😂) محمود: بصح ماعندكش ز**** نتي خالتي انا لي عندي .....*خضرة: اخخخخررررج عليا نعدين باباك تفووووو.ً...خرج يجري بالدموع جيت نلحقو بصح دخل الصالة عند الرجال ..عضيت لساني غادي يضيعلي مستقبلي...مهم مشيت للشمبرا لخرى دخلت على النسا لقيت امو واختو الكبيرة ضحكت بسعادة تامة سلمت عليهم وقعدت ....*خضرة: لاباس عليكم واش راكم ...*سعدية: كي شفتك وليت لاباس ياعمري على الزين تبارك الله ..حطت يدها على فخضي وتمسح عليه حتى طيباتو حتى بغيت نقولها بعدي من ثم مش بلاصتك ومش خدمتك بصح لاعلينا كلشي يكون في خاطر حبيب ڨلبي وزوجي .....اخته تغزرلي باغا تاكلني ماهوش عاجبها الحال منعرف علاه ...دايرة كي البرميل وكان تتبرعلي بذاك اللحم نفرح بيه راجلي مافيا مايتكل ....*سعدية: بنتي راكي قابلة ماهومش مسيفين عليك؟؟؟.....لمعو عينيا مانيش مصدقة حسيت العريس نزلي على ركبة يطلب فيا غزرتلها....*خضرة: قاابلة قاابلة خالتي سعدية مانلقاش خير منكم.....*سعدية: فرحتيني بنتي هيا عودة نخرجو باش يجي ولدي يشوفها ويتفاهمو وان شاء الله مايكون غير الخير ..قريب ندوخ شدوني ياناس تقول باغي يدخل عليا هزيت يدي نروح بيها ....يتبع
لي ماهيش تشوف لي فوطو نقولك ضيعتي ابنتي😂👌✋..الحلقة5:
🌰🌰🌰#ليلة_البلوط🌰🌰🌰
🌰🌰#سعاد🌰🌰
خرجو راحو للدار لخرى بلعت ريقي نغزر للباب ڨلبي يبندر خص غير الغيتار يامامي نسمع في خطوات تحل الباب وخرجلي وجه المقلا خويا مراد غزرلي بضحكة تبهليل عوجت فمي وقبل مايخرجلي هو وراه دورت وجهي للتيلي نتفرج ما دايرة المجد الله الله من FM و هاواي وآرابيكا تيفي للمجد الله يرزقنا توبة نصوحة ..حسسيت ببه يقرب ڨلبي دف طاخ دف طاخ دف طاخ تفكرت طول حلقة . القط والفار كي خرج ڨلبو من ترامو هاكذاك حسيت .....*زيدان: السلام وعليكم ....على صووتو هزيت راسي بأنوثة شفت ليه وڤلبي لي كان يدق تصعق وجهي ولى رمادي كيما في المسلسلات حسيت لرض دارت بيا تخنقت قريب عيطت نندب نندب عينيا محلولين فيه قريب نبكي واش الزهر هذا احلامي ضاعت مستقبلي تحطم جات لبالي طول غنية عبد الحليم حافظ بصح بكلمات خضرة ..أحول ياحوالاني مين قااسك عللليا ..بتزيييد عزابي لييه ويهوون شبابي ليييه والڤرح لي فألبي إزاي اداويه اداويه ااه ...احول يازحي احولللل ....*خضرة: س..لام ....غزرت ورايا للحيط عين تشوف فيا وعين تشوف في الحيط قريب حسبت روحي مقسومة ....*زيدان: واش راكي!....اااع زادو كملو عليا سنيه مهدود ياربي مهدود سقساني واش راني واش راني راني على حافة الموت راني في الإحتضار والروح تخرج من الجسد راحت البوشابوش لي تخيلتها مع اختفاء سنيه ماقدرتش ماقدرتش خلاص دمعتي نزلت حسيتو تشوكا وخويا من هيه داير بالظهر ...*زيدان: واش بيك ياطفلة ....*خضرة: تأثرت برك من القرآن صوتو ناعم حسسيت ليوم يوم القيامة .....*زيدان: الله يبارك إيمانك قوي.....*خضرة: لااالا ماشي قوي انا عاصية مانصليش ونغتب ونقتل الحيوانات ..قتلت قطة خطرة على ڨرويشة فروج طاحتلي وحرقت النمل في جهنم الماءالفايض على ذيك خايفة يعذبني وثاني مانصومش رمضان تعرف كي كنت نقرى لقاوني ندير في بوشابوش مع واحد على ذيك حبست الباك مانعرفش نطيب مرة درت باطة دوا النمل في المرڤا حسبتها جونبو خاطر الباطات صفر في زوج حتى شافتها ما في لرض مقطعة رمات ذاك العشا ستر ربي تعرف .المهم حبيت نصارحك يقولو الصراحة را.....ناض قبل مانكمل غزرت في وجهو قطرة الدم مافيهش ...*زيدان: الله يهدي اسمحيلي مانقدرش نتزوجك ومشى خارج خويا مافهم والو خرج وراه وانا نقزت للسما جاء الفرج هزة يمين وهزة شمال ..تفكرت طول بلوطي الغالي عشقي الأول والأبدي قريب خنتو ان شاء الله يسمحلي غدوا نروح نزورو تبسمت براحة وسعادة..@الجميع #الحلقة6:10
🌰🌰🌰#ليلة_البلوط🌰🌰🌰
🌰🌰#سعاد🌰🌰
قصت عليا طول ما داخلة تندب ...*عودة: واش صرا واااش صرا علااش راااحو ً...*خضرة: حول ياما خرج حول ومهدووود ....*عودة: باغا تمصي عينو وسنيه ياخرا خلق ربي راجل بلوطوه وجاب الملايين من خدمته ....*خضرة: ياااختي تساليني باغا نمص عينه وااه ماشي حتى يشوف فيا يشوف في الحيط عقدني ياازح .....*عودة: نندب واش قتيلو ....*خضرة: مانصومش ومانصليش ونقتل الحيوانات ومانعرفش نطيب وبطلتوني خاطر لقيتوني مع واحد نبوشابوشي ..ضربت راسها حتى حمارت جبهتها ....*عودة: ويااااافضييييييحتي ويااااافضييييحتي فضحتنا سعدية فضحتناااا في الفيلاج برتي في راسي شكون يديك ضروك شكوووون يخطبك غادي تبشر بينا الوطية حملت فيا بضربة للكتف حتى نمل ذراعي .....*خضرة: اححح خلي تبشر لرض.....*عودة: بلعي !!!!!آووااه لازم نهدر مع بيك بجيبلك كاش شايب يتزوج بيه وغادي نخبرو بخدايمك .....*خضرة: ما حرام عليه عمري 25 برك ....*عودة: وكان بغيتي وكان قفلتي فمك تفوووه شاجبت من كرشي وراحت وخلاتني ...*خضرة: تزوجوني بشايب حق ربي نهرب من الدار نفخت رحت للشمبرة جبت تلفوني وضربتها بقعدة مريڤلة في الصالة نتفرج لا علاقة بالي صرا تحيا البوران وحرية الدوران..
...يتمشى في الفيلاج فوڨ الحصان تاعو توحش جوها ..ريحة القهوة وروايح الطياب لي تتشم قدام كل دار أصوات الكلاب والغنم والبڨر الخيول مع المغرب الذراري الصغار ڨدام كل دار .كره من خدمة المدينة وكان يلقى مايخرجش من هنا خلاص وقف ڤدام دار حذا نهر صغير ونزل غزر على جنبو البيت المقابل لقى وحدة تطل من التاقة غير شافتو تخبات ..عوج فمو العفايس لي يكرهم هنا برك ...خرج صاحبو من الدار تقول حس بيه ....*رامز: يااااه الحبيييب...مشى تحضنو ....*الحبيب: لاباس الحالة واش راك ....*رامز: والله غير لاباس خبارك نتا وقتاش جيت ....*الحبيب: عندي يومين برك حوال الدار ....*رامز: والله غير لاباس واش بيها جبهتك؟؟؟!!!.....*الحبيب: وحد الطحان لبارح لقيتو في جنان البلوط في وحدة من الشجر ماعرفتوش شكون كي شافني هرب لحقتو رمى عليا الحجر مافهمتش حتى واش كان يدير حرت ....*رامز: يديرلكم في السحور باينة .....*الحبيب: واش من سحور نتا ثاني السحور في شجر البلوط ...*رامز: ايا خلينا من جدو وخلينا نمشو نڨصرو في جنانكم عندي مدة ماجيتش من جيهتكم ..والعشية راك معروض عندي وحتى المبات عندي والله وبراس ميمتي غير تبات عندي هاني حلفت ...*الحبيب: هاذي المرة الثالثة لي تحلف عليا مرة اخرى تحلف بلاما تدي رايي تدي بونية ....*رامز: خسارة عليك والله غير نبغي نباتو كيف كيف ونعرفك ماتبغيش تبات برا بزاف على ذيك نحلف.....*الحبيب: صحة هيا مالا ماتكثرش الكلام ....*رامز: صحة نخبر الدار ونجيب حصاني ونجي ....*الحبيب: خف برك .....شعل ڨارو وحك جبهتو ضراتو سب مابين سنيه .......خرج رامز ومشاو للجنان متسابقين بالخيول لين وصلو للجنان .....هز البلوط وياكل فيه ....*الحبيب: واش راك دير؟؟......*رامز: واش ندير ناكل في البلوط .....*الحبيب: تحطو في فمك والله تصوم ثلث ايام نتعشى ونمشي على روحي والمبات والڨصرة نسااها ..*رامز: هههههههه علاه .......*الحبيب: راك عارف علاه قتلتني المرة لي فاتت ياديني ......*رامز:
هاذوك دبابات اسرائيل ههههههههههههههههههه دوا صاحبي ......*الحبيب: امشي نعل**** ...هرب من ڨدامو يجري مع الحقل متشرك ضحك. الحلقة7:
🌰🌰🌰#ليلة_البلوط🌰🌰🌰
🌰🌰#سعاد🌰🌰
نهار جديد فاقت على شلاكة 44 ....*خضرة: ااااح ياما حرام عليك علاش هاك كل يوم .....*عودة: نوضي من ليوم كل الخدمة ديريها نتي تاع برا ولداخل براس ما نخرج فيك فاكرتي ديجا بوك ماهوش طايڨ نتي ليوم تحلبي المعزات قبل مايديهم راعي سي منصور ...ً.حليت عينيا على اسم منصور جيت قافزة...*خضرة: واااش راعي تاع سي منصور واش راكي تڤولي !؟؟.....*عودة: قتلك راعي سي منصور واه....*خضرة: ياخي ماشي كانو عند سي حسين ....*عودة: من يومين رجعهملنا خاطر عطى الغنم تاعو وتاوعنا عطيناهم لراعي سي منصور ڨريب وحتى سي منصور ناس ملاح قبلهم عند الراعي تاعو وكان وحدوخر بدراهمو كان رفضهم وهو قبلهم روحيلهم قوليلهم باغا نحلب معزاتي ......"خضرة: كيفاه شيبة النار هاذاك ناس ملاح بالاك راكي غالطة ياما...*عودة: نوضي يسكت حسك ولرض دسك عييتيني ....*خضرة: بصح ياما ك...قصت كلامها فجأة عينيها لمعو بلوطات في بلاصة ڨلوب ...تبسمت بخبث ناضت تجري بسرعة الضوء لبست وماعرفتش روحها حتى شتا لبست ..امها تسمي وتلعن مع بعض ..خرجت تجري داية طريق السور في يدها شمعة وبريكة مصممة على البلوط والإنتقام ...*خضرة: الإنتقام الإنتقام تيرااااا تيرارارارارارا اديسيو بابيلونس تيرااا تيرارارارا ..في خاطر ترامي ووجهي وڨاع ضواحيه ..دقت على دارهم خرجلها منصور غزرتلو من تحت للفوق ....*خضرة: صباح الخير عمو غادي نحلب المعزات قبل ماتدوهم ....*منصور: روحي الإسطبلات ورا البيت راكي تعرفي معزاتكم بالصبغة الحمرة ...*خضرة: واه نعرف ايا باي قصدي السلمعلكم ....بلع الباب في وجهها ودخل ...مشات تسب رايحة ورا البيت وسط الفيرما تاعهم مستغربة ....*خضرة: زحييي هذا لي جرى ورايا لبارح حتى صووتو ماشي هو اواااه .....دخلت وسط الإسطبل ...مشات لمعزاتها تحلب لقات وحدة منهم في علاقة هي هاربة والذكر يجري وراها .....*خضرة: نعدين باباك بعععععد عليها بوڤرون الخانز تفووووو ماتحشمش اغتصاب عيني عينك ختفووووو هزت البيدون باش تضربو نطحها كبش على جنبها ......*خضرة: ااااااع اااااااع تفوووو اااي جنبي ااي علاه ياسيدي ربي اااع تفووو بعددد عليها راس الشحم اغتاصبها الحلوف اغتاصبها وعيني تشوف تفوه اي ايي ااااح نندب اي جنبي مادارت فيا عايلة منصور وحيواناتو اصبرو تشوف نخرجها فيكم واحد واحد ...حلبت المعزات سكرت البيدون حطاتو لفوق فوق تاقة ومشات جرت ذاك الكبش وذاك العتروس تحوس على اسطبل التبن حتى لقاتو دخلتهم والعرق يسيل عليها ......*خضرة: سأحرقكما حيين ترزقان هاهاهاها.....طلڨتهم جبدت بريكة وشعلت الشمعة ...خرجو هاربين لبرا ....*خضرة: ارجعوووو نعللل*** وين هاربين ليوم نشويكم ..جات خارجة وتسمع خطوات رجعت طول للإسطبل ورا الباب ڨلبها يدق تهردت عليها شكون ذا ....سمعت صوت صهيل جنبها تكسلت لقات فرس بولدها واضح ليها لي عاد كي زاد من شكلو محجوببن ببوطات التبن عضت شواربها ورجعت غزرت للباب لي تحل كثر حتى ضربها للنيف ..*خضرة: ااااااااااع ....هز حاجبو بلع لباب شافها ..غزرلها من تحت للفوق حاير.....*الحبيب: شكون نتي!؟؟!!!!!!....حلت عينيها وفمها فيه بصدمة....يتبع ..الحلقة8:
🌰🌰🌰#ليلة_البلوط🌰🌰🌰
🌰🌰#سعاد🌰🌰
حط يدو يشالي بيها على وجها...*الحبيب: نهدر معاك شكون نتي واش ديري هنا ؟؟! فاقت من خلعتها فيه على صووتو مرة اخرى نفس الصوت لي سمعاتو ليلة البلوط هو بذاتو هو بذاتوو غزرت لجبهتو مضروب معناها هذا لي جرى وراها هذا لي خلى ريحتها زبل ليلة كاملة بدات تسب بالمڤلوب ....*خضرة: بغل ......*الحبيب: كيفااااه؟!!!،!؟؟؟.....غزرت للشمعة وضحكت ضحدة صفرا ....*خضرة: اهههيهييييهييه البغل هاذاك لي زاد جيت نحتافل بعيد ميلادو باين زايد جديد.....*الحبيب: مهر هذاك سمو ماشي بغل وشكون نتي ...*خضرة؛ المرة الجاية نجيببلك دفتر العايلة ...*الحبيب: واش راكي تهدري ياطفلة اخرجي تشوف بيك بشمعتك باغا تحرڨينا واقيل ....*خضرة: بعدنيي شكوون نتا واش دخللك واقيل نتا راعي الغنم ....*الحبيب: نععم ؟؟؟ ....خضرة: نعم مالا نتا الراعي ..روح سرح وتهلى في معزاتي وماتخليش عتروس سي منصور يڨربلهم راني شفتها كانت هاربة حتى شدها وتألمت بزاف والمرة الجاية حل الباب بالشوي حاسة الشم قريب راحت بسبتك وضرك بعد من طريقي تشوف وجه الفرماج ...*الحبيب: ويين رااايحة قبل ماتفهميني شكوون نتي وواش كنتي ديييري ..وشددها من ذراعها طيحت الشمعة وسط التبن ....*خضرة: اططللقڨ جدي وااش بييك ياخي حالة واش خصك .....*الحبيب: اهدري ملييح معااايا الالا ولا ن...الدخان طلع غزر على جنب لقى النار ثڨبت .....*الحبيب: نعلل**** ...واش درتي ...دزاتو ....*خضرة: بسبتك ياالحمااار .....*الحبيب: كيفاااااااااش!!!؟!!،!!! ....النار زادت سب بالمڤلوب ونتر شالها بالزربة ونزل يطفي ......*خضرة: ااااااااااع لاااااااا تاع جدددة الله يرحمها الاااااااا شدتو تنتر فيه دزها ويطفي في النار بيه قبل ماتزيد ....*خضرة: بغللل حمااار نعلبووك تفووووه والله تجبدو والله تولدو ونزلت سب ...طفاااها وناض نترها بالقوة جهة بوطات التبن تعثرت بوحدة شهقت وجات طايحة طاح فوقها ......*خضرة: اااااع اااااع بعددني ن....قبل ماتكمل بلعلها فمها .....*الحبيب: بغل؟؟! وحمار؟؟ ونعلبوك!؟ ....مازادش لي سبني ولي سب بابا جيتي نتي تخطي عليا واش ندير فيك ضرك ..بدات تفرفط عضتو من يدو.....*الحبيب: نعللل..دزتو من فوقها بكوتبي وناضت تجري وتسب ....*خضرة: تفووو عليك وخرجت طيارة لاسطبل الغنم دات بيدون الحليب ورجعت بسرعة البرق باش تطلع طول بيتهم تحل باب إسطبل التبن خرج ينهج بالغش والعصب صاحت ومشات تجري لباب الزريبة جا قدامها قبل .....*الحبيب: وين هاربة بلا حساب ليوم تخلصيها ....هزت حجرة من لرض ورماتها عليه تجنبها قريب جات فيه ...هربت من قدامو شدها من حزامها يسب ...الحلقة 9:
🌰🌰🌰#ليلة_البلوط🌰🌰🌰
🌰🌰#سعاد🌰🌰
الحبيب: وكان جيتي راجل وكان راني فلعصتك بصح ليوم نوريك الهدرة كيفاه يلا ماحللتينيش نطلڨك مانيش راجل .......حلت البيدون تاع الحليب وفرغاتو عليه ....*خضرة: نموت ومانحللكش يا دابة .....رفع يدو صاحت ..قريب ضربها كبس يدو بغش ورجع حلها بلعلها فمها وكركرها برا الفيرما وصل للخلا رفدها على كتفو ....*خضرة: ااااااع سلكوووني اااااع وين دايني اطلڤني ياحمار حطني يابغل حرقت شالي جدة غادي تغضب عليك وتخرج فيك....*الحبيب: بلعي لازمك تربية من الجديد نتي ياطفلة ....وصل للبير حلت عينيها على وسعهم ....*خضرة: ياما خيتي باغي يقتلني ياما سلكوووووني حطني غادي ترزيني في عمري ....*الحبيب: اطلبي السماح باذ مانرميكش في البير ....*خضرة: محااااال نتا الغالط كسرت نيفي وحرقت شالي .....*الحبيب: سقسيتك شكون خاطر لقيتك في الإسطبلات تاعي زدتي في الهدرة اطلبي السماح قتلك ....*خضرة: نتا هو ولد منصوور تاع المدينة .....*الحبيب: الحمد لله لي فقتي انا مولى البلاصة لي كنتي فيها .......*خضرة: نفضل نمووووووت ومانطلبش السماح من ولد منصور ..*الحبيب: خلاص مالا ماتشكيش .ً....قرب للبير كثر عينيها خرجو ...*خضرة: يبيعوني لآمون والفراعنة بابا يبكي عليا ياحصرتي على خضررة ياحصرتي على بنيتي خضرة، شيباني كبير حرام عليك يعمى من عينيه اطلڨني ....ضم شواربو قريب يضحك الطفلة هاذي مهبولة في التاريخ ماتلاقاش بكائن غريب كيفها ...._*الحبيب: استغفري راكي تكفري ياطفلة .....هبطها جا يحطها وسط التينة تاع البير (بيدون واسع) لصقت فيه تصيح ...*خضرة: ااااع اااااع ..ااااع سلكوني اااع سلكوووني ......*الحبيب: خنقتيني نعل**** اطلللبي السماح ....*خضرة: بعدني خليني خليني نروح لدارنا خليني .ً...*الحبيب: اطلبي السماح خفي ....*خضرة: حطني نطلب السماح ..*خضرة: باش تهربي .خفي اطلبي السماح ....وجا يرميها .......*خضرة: ااااااع اسمحلي اسمحلي خلاااص نزلني ياماااا اااع ماااا وبدات تنزل في دموع التماسيح وتشهق بالكذب .....حطها على رجليها يشوف معاها مطلع حاجبو ..هربت طول تتنهد بالراحة بعدت عليه ......*الحبيب؛ مصيبة نتيا شفقت على داركم كيفاش عايشين معاك .....*خضرة: ماطلبتش السماح منك كنت نمثل راس الجدرة نكرهك ولد منصور شيبة النار تفوو عليك وعطات الريح لرجليها ....*الحبيب: بصح نحكمك المرة الجاية بصح ماشي نرميك في البير نرميك للكلاب ......*خضرة: ترمي الشعر وكملت جريها للدار وتسب .....*خضرة: خسارة الزين فيه تفووووه تفووه خرج ولد منصور، هو لي حاربني على بلوطي وضيعلي ترامي ..نكرهو بسبتو ضاع شالي وحليبي ليوم تاخضني ما وصلت لجنان البلوط غزرت في لرض لقات زوج حبات ثلاثة.....*خضرة: غنم الزمان والشر كلاوهم ڤاع هبطت هزتهم وتتلفت وراها لقاتو جاي يتمشى طلعت حاجبها تاكل في حبة البلوط كي قرب شوي فز عليها ....ناضت تجري رمات جيهتو القشور وفزت ....*خضرة: هاهاها والله ماتحكمني وخرجتلو لسانها ...وقف يشوف معاها يديه على حزامو تجري وتتلفت وراها حتى تخفات مسح على شعرو وضحك....*الحبيب: ماتترباي غير على يدي صبري برك ..غزر لشوميزو مبلولة حليب حالتو حالة عض شواربو حك لحيتو ورجع للدار...الحلقة 10:
🌰🌰🌰#ليلة_البلوط🌰🌰🌰
🌰🌰#سعاد🌰🌰
دخلت للدار حالتها حالة تندب امها جات تجري ....*عودة: اسككتي فضحتينا ..مالكي وين راه الحليب ؟؟؟؟....*خضرة: حاوزني كلب منصور شيبة النار الحليب ساح ودالي شالي قطعو بسنانو ....*عودة: ياااويييلي هاتي نشوف رقبتك ....*خضرة: مابيا وااالو هربت.....*عودة: كلاب سي منصور رابطتهم ماهمش في الإسطبلات كيفاه هاذي....*خضرة: وييين علابالي انا حتى لغدوا يحلبهم بابا راني رايحة نريح رجليا وجعوني من الجري ....*عودة: لا غدوا لاهم يحزنون تروحي العشية المغرب تحلبيهم نحتاج الحليب في الدار ......حلت عينيها على وسعهم...خضرة: واااش!!؟؟؟؟؟؟؟؟!!مانرووووووحش الحانووت عندك وروحي شري الحليب ....*عودة: حانووووت بييييك خاطر ...*خضرة: صحة ارسلي مرااااد علاااش انا....*عودة: بايت في الإقامة وماتكثريش الهدرة امشي من ڤدامي خير مانتبلى فيك .....نفخت ومشات شافت بوها ورجعت لغرفتها تمدت ...*خضرة: راس البوم والله نخرجلك ڤلبك وغمضت عينيها بالنوم رڤدت شوي وناضت ..تسمع في التوشويش في الصالة راحت طلت لقات جاراتهم زوج طلعت حواجبها دخلت سلمت ..وخرجت تسب ....*خضرة: واش جابهم هاذو بففف راحت للكوزينة دارت فطور خافوفي وداتلهم .....*خضرة: ياكلو الرهههج .....مريم: علا بطلتي القراية خضرة .*خضرة: طلعتلي ....*سومية: ممم انا قلت بالاك كاش ماهدرو فيك ....*خضرة: وعلاه يهدرو فيا؟؟؟....*سومية: راكي عارفة الفيلاج لي ماشافوهاش يخرجو الدخان بلا نار ....*خضرة: هيه صح ويلقطو لخبار على صباح ربي ثاني من ديار الناس باش يلحقوها حامية يخافو تهربلهم تعرفي ...نيشان خالتي مريم والله راني غالطة؟!؟. ...*مريم: هيه عندد الصح تبانلي طولنا سومية نروحو رانا بشغالاتنا ....*خضرة: لاااااا لااا وين رايحييين رانا متحاكيين مازال الحال راه عاد الصباح وماسقسيتكش اذا ولدك خرج من الحبس ولا لا ونتي خالتي سمية يادرا فاطمة بنتك رجعت لراجلها ولا مازالها باغا تتطلق .....*عودة: لالا خضرة راه باقيله عامين ولدها مازال الزطلة تعرفي ماشي ساهلة ً...وفاطمة مسكينة تطلڤت محال يسمحلها مادام خرج فيها تهدر في التلفون ....*مريم : راكم تعرفو الشيطان يغر العباد ويوسوسلهم انا نخليكم ..سمية يلا تبغي تبقاي ابقاي راني نستنى في الخياطة تجيبلي لباسي ....*سمية : لالا حتى انا نروح الغسالة راهي خاسرة وواحد باغي يجيبو راجلي يصنعها تعرفي ولازم يتضيف ....*خضرة: ماعليش خلي مريم التور تاعها الخطرة الجاية تقعد ضرك لازم تمشي تخلص الخياطة تخافي تجيبلها الجدارمية للباب كيما حال الخياطة لب فاتت شحال كانت تسالك ياربي؟؟ سبع ملايين واقيلا..
يتبع
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺