رواية عشق الروح الحلقة السادسة حصريه وجديده على مدونة أفكارنا
 |
رواية عشق الروح الحلقة السادسة حصريه وجديده على مدونة أفكارنا
ابدلت ملابسها و ذهبت لتجلس الي جوار والدها
شروق : ايه الموضوع بقي ؟؟؟
محسن : بصي من غير لا لف ولا دوران كده , أيمن طلب ايدك مني و انا الصراحة موافق
شروق (بصدمة) : ايه ؟؟؟!
محسن : بقولك أيمن طلب ايدك مني
شروق (بارتباك) : ازاي ؟! يعني اقصد ليه ؟؟! و امتي اصلا ؟!! و حضرتك موافق ؟؟!
محسن (ضاحكا) : واحدة واحدة بس ايه كل الاسئلة دي , كلمني امبارح بالليل و طلب مني افاتحك في الموضوع و اشوف رأيك
شروق : طب و مفاتحنيش انا في الموضوع ده ليه ؟! ما انا معاه كل يوم في الشركة
محسن : الراجل حب يمشي بالاصول و يطلب ايدك من ابوكي الاول , نلومه يعني ؟؟
شروق : لا مش قصدي ...بس...اتفاجئت !
محسن : طيب مقولتيش رأيك يعني
شروق : رأيي في ايه بس يا بايا , لازم افكر طبعا الاول
محسن : طيب فكري براحتك بس انا عن نفسي موافق جدا
شروق (بدهشة) : و ايه اللي مخلي حضرتك موافق اوي كده ؟!
محسن : و موافقش ليه ؟! هلاقي مين احسن من أيمن اأتمنه علي بنتي ؟؟؟ ولد ابن ناس و محترم عارفينه و عارفين اهله من زمان , و مستواه الاجتماعي و المادي كويس جدا , مش لاقي اي سبب يخليني موافقش
شروق : ايوة بس احنا منعرفش بعض كويس
محسن : و ماله تتعرفوا بعد الجواز علي بعض علي مهلكوا
شروق (بصدمة) : جواز ؟!!!!
محسن : ايوة , ما هو أيمن عاوز نكتب الكتاب علي طول
شروق : كماااان ؟!! يعني انا لسة بقول لحضرتك منعرفش بعض تقولي كتب كتاب !!
محسن : و فيها ايه بس و بعدين ايه منعرفش بعض دي ما انتي بقالك شهور بتشتغلي في الشركة و بتشوفيه كل يوم ده غير انكوا تعرفوا بعض من و انتوا صغيرين
شروق : يا بابا يا حبيبي احنا كنا مجرد اطفااال بنلعب مع بعض اكيد مش هحكم عليه و هو كبير كده عشان كنت بلعب معاه زمان و احنا صغيرين !! و بعدين هما يدوبك 3 شهور اللي اشتغلتهم في الشركة و مكنتش بشوفه كل يوم ولا حاجة اصلا مفيش احتكاك مباشر بيني و بينه في الشغل و مكنتش بتكلم معاه كتير كل الكلام بيبقي في حدود الشغل و كان بيسافر كمان خلال الفترة دي
محسن : و لما استأذني و اتغديتوا برة ؟؟
شروق : ده كان يوم يا بابا , مرة و خلاص و اصلا محكاليش حاجة عنه انا كلمته عن نفسي شوية و خلاص و الكلام ده بقاله فترة كبيرة و انا مكنتش اعرف ان الموضوع هيوصل لكده !
محسن : خلال تتقابلوا و تتكلموا مع بعض و تتفاهموا قبل كتب الكتاب
شروق : تاني كتب كتاب !!
محسن : امال انتي عاوزة ايه ؟!! ما انتوا هتتكلموا مع بعض و تتعرفوا علي بعض زي ما انتي عاوزة اهو
شروق : طيب سيبك من الموضوع ده , شغله , سفره , انا هيبقي وضعي ايه لو اتجوزنا ؟؟
محسن : طبيعي هتبقي موجوده مطرح ما جوزك موجود
شروق (بذهول) : يعني حضرتك معندكش مشكلة اني اسافر معاه ؟؟؟
محسن : يا حبيبتي أيمن مش مستقر , بين هنا و امريكا بس بعد ما فتحوا الشركة اللي هنا هيبقي مجبور انه ينزل مصر اكتر من الاول و خصوصا ان رفعت و نادية خلاص استقروا في مصر و مش راجعين امريكا تاني , نادية متعلقة بأيمن جدا و اكيد هو هينزل عشان يشوف امه و ابوه كل شوية و بعدين لما تتجوزا الوضع ممكن يختلف , اتناقشي معاه في الموضوع ده
شروق : ايوة بس انا مكنتش حابه كده , انا عاوزة تبقي حياتي مستقرة
محسن : و أيمن ظروفه كده ظروف شغله و ظروف حياته كمان هو اتعود علي هناك انتي ممكن تجذبيه لهنا اكتر بس مش معقول هنرفضه عشان سبب زي ده ! مع الوقت هتتعودي يا حبيبتي صدقيني , اسمعي كلامي انا عاوز مصلحتك
شروق (بتنهيده) : حاضر يا بابا اوعدك هفكر
--------------------------------------------------------------
-سيندريلا
آسيا (ضاحكة ) : ايوة يا آدم
آدم : عامله ايه ؟؟
آسيا : الحمدلله كويسة , انا مكلماك عشان اقولك اني خارجه شوية مع شروق , كلمتني و قالت لي انها عاوزاني في موضوع ضروري
آدم : هتروحوا فين يعني ؟؟
آسيا : مش عارفه بس اكيد اي كافية يعني , مش هعرف اكلمك لحد ما اروح , اوكي ؟؟
آدم : طبعا شروق لسة متعرفش انك بتكلميني
آسيا : ايوة
آدم : اوكي يا آسيا خدي بالك من نفسك و اول ما تروحي طمنيني عليكي
آسيا : ان شاء الله
--------------------------------------------------------------
في احد الكافيهات ..
آسيا : مجرجراني علي ملا وشي , ممكن اعرف في ايه بقي ؟؟؟
شروق : أيمن
آسيا : ماله تاني ؟!!
شروق : عاوز يتجوزني
آسيا (بدهشة ) : ايه ؟؟!!
و بعد ان قصت شروق علي آسيا الحديث الذي دار بينها و بين والدها
شروق : الكلام ده من امبارح بعد ما رجعت من الشغل و من ساعتها انا مش عارفه اتلم علي بعضي و
بحمد ربنا ان النهاردة اجازة , مكنتش هقدر اشوفه بعد اللي حصل ده
آسيا : و مكلمتنيش من امبارح ليه ؟؟؟
شروق : مش عارفه يا آسيا , انا متلغبطة و تفكيري مشوش , كنت بفكر بس مقدرتش اوصل لحاجة
آسيا : طيب ممكن تهدي و تشربي الفراولة اللي انتي طالباها دي
صمتت قليلا , ثم تابعت حديثها
شروق : حاسه اني بحلم يا آسيا
آسيا : حلم حلو ولا وحش ؟؟
شروق : مش عارفه ! بجد مش عارفه , أيمن قدامي بقاله فترة بس .. بس انا عمري ما اتخيلت انه ممكن يكون جوزي
آسيا : عاوزه تفهميني انك مش معجبه بيه ؟؟ ده انتي كنتي مبهورة بوسامته و بدله و قوة شخصيته و لا نسيتي كلامك
شروق : منستش يا آسيا بس الاعجاب بالحاجات دي كلها حاجة و الحب لدرجة اني اقبل اتجوزه حاجة تانية , فهماني ؟؟!
آسيا : فهماكي , الاعجاب حاجة و الحب حاجة تانية بس مش ده بس اللي قلقك , انتي عموما مش بترتاحي لشخصيته , جرأته , موده المتقلب علي حسب كلامك , صح ؟؟؟
شروق : صح !
آسيا : مممممممم انا مش هكدب عليكي انا نفسي مش برتاح لشخصيته و قولت لك الكلام ده كتير قبل كده , بس ... هو مشي بالاصول و طلبك من باباكي , داخل جد يعني مش واحد بيتسلي , ده يمكن اللي كبره في نظري , غير كده مش عارفة بصراحة
شروق : موضوع كتب الكتاب ده كمان
آسيا : انتي ممكن تتكلمي معاه في انكوا تعملوا خطوبة الاول لحد ما تاخدوا علي بعض و تتعرفوا علي بعض كويس بعد كده تكتبوا الكتاب
شروق : انا مش عارفة اصلا هو ده الانسان اللي انا كنت مستنياه ولا لا هو ده الانسان اللي هبقي مبسوطة معاه لما يبقي جوزي
آسيا : انتي حاسة ايه ؟؟
شروق : خايفة و مترددة ! اول مرة مبقاش عارفه اخد قرار في حاجة في حياتي بالطريقة دي , و بابا كمان بيضغط عليا اوي , من ساعة ما فاتحني في الموضوع ده وهو موافق جدا و مقتنع ب أيمن 100% و يقولي انا مش هعيش لك العمر كله , انا عاوز اطمن عليكي , و كلام كده , بجد مش عارفة اعمل ايه
آسيا : دي الحاجة الوحيدة اللي مينفعش فيها اني اقولك تعملي ايه , لازم تبقي راضية و مقتنعة من جواكي , ده جواز مش لعب عيال
شروق : بابا كمان حكي لعمتي علي الموضوع و هي مرحبه و موافقة جدا بردو , انا مش عارفة الناس دي عاوزة تخلص مني كده ليه ؟!
آسيا (ضاحكة) : تلاقيكي بتاكلي اكلهم ولا حاجة
صمتت قليلا ثم تابعت بجدية , بصي يا شروق سيبك من كلام اي حد انتي اللي هتعاشري الانسان ده مش اي حد تاني , لازم تبقي مقتنعه باللي بتعمليه و راضيه بيه كزوج ليكي , موضوع السفر ده انا مش شايفاه ازمة , لو اتكلمتي معاه ممكن توصلوا لحل وسط يرضيكوا انتوا الاتنين , خلي باباكي يكلمه و يقوله انك حابه تتكلمي معاه الاول قبل ما تقرري اي حاجة , ده حقك , و علي حسب كلامك معاه و مدي ارتياحك ليه نبقي نفكر بعد كده
شروق : ده اللي هعمله
آسيا : ان شاء الله خير
--------------------------------------------------------------
-السلام عليكم
صلاح : و عليكم السلام و رحمة الله و بركاته , اتأخرتي ليه ؟؟؟
آسيا : متأخرتش ولا حاجة , يدوب خلصت كلام مع شروق و جيت علي طول
سمية : اخوكي اتكلم و سأل عليكي و انتي برة
آسيا : بجد ؟؟؟ وحشني اوي بقاله كام يوم مبيكلمنيش
صلاح : مطحون في شغله ربنا يعينه
آسيا : ربنا معاه يا رب , انا داخله اغير هدومي بقي
دلفت الي حجرتها و اغلقت الباب
امسكت بهاتفها و طلبت رقمه
-الوو
آسيا (ضاحكه) : الموبايل ملحقش يرن اصلا
آدم : كل ده يا آسيا , اتأخرتي اوي
آسيا : خلصت كلام مع شروق و جيت علي طول
آدم : طيب كانت عاوزاكي في ايه ؟؟
آسيا : و انت مالك ؟؟
آدم : كده يا آسيا ؟!
آسيا (ضاحكه) : خلاص متزعلش , موضوع كده لو تم فيه حاجة كويسة ان شاء الله هبقي اقولك
آدم : ماشي خليني وراكي
آسيا : طيب اقفل و خلينا نتكلم علي الفيس
آدم : لا خلينا هنا احسن
آسيا : ليه ؟؟؟
آدم : اقولك و تصدقيني ؟
آسيا : قول !
آدم : طول ما انا سامع صوتك بحس اني مرتاح و مطمن , بحس اني مبسوط !
شعرت بقلبها بنبض بعنف , صوت دقات قلبها كاد ان يصم آذانها , هي ايضا تشعر بذلك !!
مجرد سماع صوته يشعرها بالطمأنينه و السعاده
آدم : روحتي فين ؟؟
آسيا (بإرتباك ) : مروحتش , معاك اهو
آدم : ايه عكيت ؟؟
احنا متفقين مع بعض ان كل واحد يقول للتاني علي اللي حاسس بيه , صح ؟؟
آسيا : صح
آدم : طب قولي لي انتي كمان حاسه بإيه ؟؟؟
لم يري تلك الابتسامه التي داعبت شفتاها و لا بريق السعادة الذي اطل من عيناها
آسيا : آدم روح نام
آدم (ضاحكا) : علي فكرة انتي بتنصبي , عشان انا بقولك علي اللي انا حاسه و انتي لا
آسيا (بانفعال زائف ) : آدددم , اقفل يلاا انت النهاردة غلس اووي
آدم (ضاحكا) : ماشي غلوشي غلوشي , بس عارفه
آسيا : ممممممممممم
آدم : بردو بحس اني مبسوط طول ما انا سامع صوتك , سلام يا سيندريلا
نظرت الي هاتفها و ابتسمت بسعاده , ارتمت فوق فراشها و اخرجت دفترها الوردي
احتارت ماذا تكتب ؟؟ ما تشعر به لا تستطيع وصفه بالكلمات
نظرت الي الصفحة البيضاء و خطت فيها جملة واحده فقط
"سعيدة كما لم اشعر بالسعادة من قبل "
--------------------------------------------------------------
صباح اليوم التالي..
-بابا
محسن : ايوة يا حبيبتي
شروق : ممكن تكلم أيمن و تقول له اني عاوزه اتكلم معاه الاول قبل ما اقرر اي حاجة
محسن : طب ما انتي كده كده هتشوفيه في الشركة
شروق : لا انا مش هقدر اروح الشركة , لو سمحت يا بابا كلمه و قوله اني عاوزه اشوفه و تتكلم الاول
محسن (بدهشة) : ليه طيب كل ده ما تروحي شغلك عادي و انا هكلمه و بعد الشغل ياخدك و تروحوا تتكلموا في اي حته برة
شروق : لو سمحت ريحني يا بابا
محسن : حاضر اما نشوف اخرتها
هاتف محسن أيمن و اخبره بطلب شروق
محسن : شروق
شروق : نعم يا بابا
محسن : البسي أيمن هيعدي عليكي دلوقتي تروحوا تتكلموا في اي مكان
شروق (بدهشة) : دلوقتي ؟!
محسن : ايوة الراجل كتر خيره هيسيب شغله و يتكلم معاكي زي ما انتي عاوزه , مش ده طلبك !
شروق : ايوة ايوة ,خلاص هلبس اهو
ارتدت ملابسها في عجلة و اتي أيمن لاصطحابها من المنزل , استقلت بجانبه السيارة و هي تشعر بتوتر شديد
الحلقه السابعه حتى الحلقه الثالثه عشر من هنا
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺