رواية أبيض وأسود الفصل السابع والثامن والتاسع بقلم مني محمود بركات حصريه وجديده على مدونة أفكارنا
 |
رواية أبيض وأسود الفصل السابع والثامن والتاسع بقلم مني محمود بركات حصريه وجديده على مدونة أفكارنا
حادثه شريف كان نهايه الكبت فيها الانفجار بس يا تري اخر كبت بدور ايه ؟!
ـ-ـ-ــ-ـ-ـ-ـ-ــ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ
مؤمن خلص تشريح الجثه وكتب التقرير بتاعه وخرج سلمى للعسكري اللي واقف ادام الباب منتظره ورجع قعد علي مكتبه تاني بارهاق ... علي قد ما بيحب بهاء علي المستوي الشخصي علي اد ما بيكره الشغل معاه لانه بيضغطة جدا في الوقت عكس ظابط تانيه كتير
افتكر مكالمته مع علا وطلع التلفون واتصل بيها بس مردتش ... كرر الاتصال اكتر من مرة والنتيجة واحدة مفيش رد
ابتدي يقلق ويلوم نفسه أنه مستناش يسمع منها اي كلمة وبسرعه قام غير هدومة وخرج من المشرحة للبيت علشان يطمن عليها وهو ماسك التلفون وبيحاول يكلمها لكن بدون رد
ـ-ـ-ــ-ـ-ـ-ـ-ـ-ـ-ــ-ـ-ـ-ـ
في القسم بهاء كان معاه في المكتب واحد مختص علشان يفتحله التلفون لانه بباسورد
بهاء
ـــ قدامك كتير يا رامي ؟
رامي وهو مركز في اللاب اللي متوصل بالموبايل
ـــ لا أن شاء الله مش كتير اديني ربع ساعه بس وهيكون مفتوح
هز بهاء رأسه وبص ل بكر
ــ بكر اهل محمد فين ؟
بكر
ــ في الطريق يا باشا
بهاء
ــ لما يوصلو خليهم ينتظرو في اي اوضه تانيه لحد ما اخلص حوار التلفون الاول واشوف عليه اي
بكر
ــ اوامرك يا باشا
خبط العسكري في الوقت دا ودخل معاه تقرير الطب الشرعي وقعد بهاء يقري فيه بتركيز علي ما رامي يفتح له التلفون
وفعلا بعد ربع ساعه تقريبا سلم رامي التلفون ل بهاء مفتوح
ــ اي خدمة تاني يا بهاء بيه ؟
بهاء وهو مبتسم
ــ منتحرمش يا باشمهندس شكرا
رامي
ــ طب هخلع أنا بقا سلام عليكم
بهاء وهو مركز في التلفون
ــ وعليكم السلام... بكر اخرج استني اهل محمد برة واعمل زي ما قلتلك لما يجو
بكر
ــ حاضر عن ازنك
خرج بكر وفضل بهاء يقلب في التلفون وهو مستغرب جدا وبدء يكلم نفسه
غريبه اوي دي ... بس ازاي أنا كل مرة بشوف حاجة بتكون صادقه ميه في الميه اي اللي اتغير المرة دي ؟ معقول اكون توقعت غلط ؟ لا لا دي عمرها ما حصلت معايا ابدا في اي ... وبعدين ... انا هكمل وامشي ورا احساسي وزي ما تيجي بقا
خد نفس طويل ورن علي بكر أنه يدخله بسنت ومحمود وفضل منتظر وهو بيرتب أفكاره وكلامه اللي هيقوله
بكر خبط ودخل
ــ باشا محمود وبسنت زي ما سعادتك أمرت
هز بهاء رأسه ودخل محمود الاول وهي دموعه نازله وباين عليه التعب والارهاق والحزن وبعدها دخلت بسنت اللي كانت ملامحها جامدة شويه
بهاء
ــ اتفضلو اقعدو
بسنت
ــ شكرا ... هو احنا هنا تاني ليه ؟ مش خدتو اقولنا وخلاص ايه لزمتة الشحططة دي حضرتك شايف بابا عامل ازاي ؟
بهاء بحدة وصرامة
ــ احنا مبنلعبش يا انسه وجود حضرتك هما دلوقتي لانك كذبتي في التحقيق قولتي أن يوسف كان مع محمد ويوسف كان في مكان تاني خالص وفي شهود وكاميرات تثبت كلامة ازاي بقا انتي شوفتيه بنفسك واتكلمتي معاه وهو موجود في مكان تاني مع ناس تانيه اي كان عفريته اللي عندكم بقا ولا اي
محمود رفع عينيه باستغراب ل بسنت اللي اتوترت وفضلت تبص شمال ويمين ومش عارفه ترد
بهاء كمل
ــ الابواب والشبابيك مفيش اثار اقتحام ليهم يعني اللي دخل يا من جوة البيت يا حد من جوة البيت فتحله المجني عليه كان نايم وقت ما اتقتل تقرير الطب الشرعي اثبت دا يعني لو فرضا أن حد من برة هو يعرفه مع تقرير دا كدة يبقي مش محمد اللي فتح للقاتل دا لو القاتل من برة
محمود بتوهان
انا مش فاهم حاجة ... يعني اي الكلام دا الله يخليك وضح أنا مش فاهم حاجة
بهاء
يعني اللي قتل محمد ابنك يا استاذ محمود يا حد منكم انتم الاتنين يا شريك لحد فيكم وهو اللي فتحله الباب ودخله
محمود اتصدم
ـــ اي الكلام دا ... لا طبعا لا دا ولا دا اكيد في حاجة تانيه هي اللي حصلت انتم مكسلين تشتغلو ولا اي عايزين تلبسوها لاي حد يعني حرام عليكم
بهاء
ــ أنا مش هرد رد رسمي عليك عشان مقدر الصدمة اللي انت فيها ... واحب اقولك أن حتي احتمال الشريك طلع مش مظبوط لأن كاميرات اللي حوالين العمارة عندكم أثبتت أن وقت وقوع الجريمة لا في حد طلع ولا نزل من العمارة ... نبدء بقا من الاول سين قولي يا استاذ محمود انت كنت تعرف أن محمد واخد تلفون بسنت منها وشايله في اوضته ؟!
ــ اه اعرف بس دا داخله اي باللي بنتكلم فيه
ــ لو سمحت رد علي الاسئله اللي بتتوجهلك بوضوح من غير لف ودوران انت حاليا في تحقيق رسمي
محمود كشر
ــ عادي خناقه عاديه بين اخ واخته هي سافرت رحله للفيوم من غير ما تقولنا وهو عاقبها بسحب التلفون منها بس كدة
بهاء
ــ مممم اي رايك يا بسنت ؟ فعلا الموضوع كان كدة بس ؟ ولا ليه ابعاد تانيه
بسنت ساكته وبتفرك ايديها الاتنين في بعض
بهاء كمل
ــ تقرير الطبيب الشرعي بيقول أن محمد اتطعن ٨ طعنات نافذة عميقه أثناء نومه ب أله حادة وحاليا في قوة عندكم في الشقه في المطبخ تحديدا بتطلع سلاح الجريمة وهتجيبه علي هنا وهنشوف اخر بصمات عليه كانت لمين ليك يا استاذ محمود ولا ليكي يا بسنت
بسنت هنا رفعت عينيها وبصت بصدمة لابوها ورجعت نزلت عينيها تاني خدت نفس طوييييل ورفعت وشها ل بهاء واتكلمت بكل هدوء
ـــ بابا ملوش دعوة ب حاجة بابا كان نايم ومحسش باي حاجة حصلت
بهاء ابتسم
ـ قتلتيه ليه وازاي ؟
بسنت بملامح جامدة
ــ قتلته بالطريقه اللي قدامك في تقرير الطب الشرعي... ليه عشان كان بقاله مدة مخنق عليا في الخروج والدخول وبكلم مين وبهزر مع مين ومفيش رحلات واي اللبس دا اتخنقت منه ومن تحكماته ف استنيت لما نام وقتلته عشان احس بحريتي اللي حرمني منها خصوصا أن بابا كان موافقه علي كل حاجة لكن لما يموت وميكنش فضله غيري مش هيزعلني وهيسيني علي حيرتي دا اللي فكرت فيه وقتها
بهاء
ــ وحوار يوسف
بسنت
ــ أنا سمعت محمد وهو بيكلم يوسف في التلفون وكان فاتح الاسبيكر قاله يجي يسهر معاه شويه ويوسف قاله أنه ما صدق أن أهله مسافرين البلد وهينام براحته من غير ما حد يقلقه حسيت ان دي فرصه كويسه ليا عشان ألبسها ل يوسف لانه هيبقي نايم لوحدة ومعندوش إثبات أنه في بيته ف هيبقي كلامة قصاد كلامي وخلاص
محمود طول ما بسنت بتتكلم وهو ملامح الصدمة
بهاء باستغراب
ــ يعني دا بس الدافع اللي يخليكي تقتلي اخوكي ؟ ٨ طعنات نافذة وعميقه عشان تخرجي وتدخلي براحتك ؟ بس كدة ؟
بسنت
ــ يبان ل حضرتك موضوع تافه لكن ليا بجد كان موضوع خنيق وغير مطاق مقدرتش استحملة
بهاء باستنكار
ــ يعني مجاش في بالك مثلا أن بدل ما تقتلي اخوكي تهربي وتعيشي حيرتك براحتك ؟
بسنت
ــ اهرب اروح فين واصرف منين واتبهدل ليه ؟
بهاء بسخريه
ــ صح معاكي حق تقتلي اخوكي اسهل من كل دا
محمود اخيرا نطق بس الكلام كان طالع منه ضعيف اوي
ــ انتي مين ؟؟ فين بنتي ؟ فين بنتي ؟
مسك قلبه وفضل يضغط عليه وملامح وشه كشرت بالم
ــ اااه اااه منك لله... حسبي الله ونعم الوكيل فيكي اااااه
بهاء جري عليه وزعق انهم يتصلو بالاسعاف بسرعه وخدو بسنت علي الحجز وسط نظرات الجمود اللي مسبتهاش من اول ما دخلت
ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ
مؤمن وصل البيت وهو بيجري فتح وهو عمال ينده
ــ علاااا ... علاااا انتي فين ... علااا
اتفاجا أنها لا هي ولا بنته موجودين في الشقه كلها وقف محتار مش عارف يعمل اي مسك تلفون واتصل علي حماه وبعد اول جرس حماه رد
ــ أيوة يا مؤمن
ــ عمي أنا آسف اني بتصل بيك في وقت متأخر كدة بس بس يعني اصل علا
ــ علا ونيجار هنا عندي يا مؤمن لما تفضي وتخلص اللي وراك وتكون مهتم تعرف فيهم اي ابقي اتفضل نورني اي وقت البيت بيتك
ــ عمي اي اللي بتقوله دا افضي اي بس الله يخليك طمني علا ونيجار كويسين صح الله يخليك يا عمي طمني أنا قلبي هيقف
ــ وقلبك دا مقلقش عليهم ليه وانت مبتردش علي بنتي هه مقلقش عليهم ليه لما في الاخر اتكرمت ورديت وزعقت وقفلت من غير ما تسمع كلمة واحدة حتي جاي دلوقتي تقولي قلبي هيقف
ــ عمي ارجوك أنا
ــ قصره يا مؤمن نيجار كويسه علا اللي تبعت جدا واستنجدت بيك ولما مردتش حضرتك كلمتني وانا الحمد لله لحقتها في الوقت المناسب بس حاليا نايمة ومتعلق لها محاليل
ــ محاليل!! علا مالها فيها اي طيب
ــ لما تيجي أن شاء الله تبقي تعرف
ــ أنا مسافه السكة وهكون عند حضرتك معلش عارف الوقت متاخر بس مش هقدر استني للصبح لازم اطمن عليها بعد ازنك يا عمي
ــ اتفضل يا مؤمن دا بيتك يا بني لا حول ولا قوه الا بالله العلي العظيم تعالي يا مؤمن منتظرينك
قفل مؤمن معاه والندم والقلق مش سيبنه نزل جري علي عربيته وبدء يسوق بسرعه عاليه عشان يطمن علي علا
ـ-ـ-ـ-ـ-ـ-ـ-"-ـ-"-"-"-"-"--""-""-"-"---"--""
بكر في وسط كل الشغل اللي كان مكلف بيه كانت دماغه في حته تانيه ... كل شويه يتصل علي بدور ويستني أنها ترد عليه لكن مفيش رد كان قلقان عليها اول مرة تحصل ومتردش علي اتصالاته حتي لو نايمه بتقلق من رن التلفون وبترد عليه ... ولما القلق اتمكن منه مقدرش يصبر اكتر من كدة واستغل أن بهاء طلع مع محمود علي المستشفى وراح علي بيته بسرعه عشان يطمن علي بدور ويرجع تاني قبل ما بهاء يرجع القسم ويعرف أنه خرج
دخل الشقه بهدوء خاف يعمل صوت ل تكون نايمه ويقلقها الشقه كانت هاديه والانوار مقفوله ودا خلاه يحس أنه اتسرع وأنها اكيد نايمه فتح باب الاوضه براحه جدا عشان يتأكد لنفسه أنها نايمه وبس لكنه اتفاجا لدرجة أنه حس بجسمة بيتشل ومبقاش قادر يتحرك خطوة واحدة
ـ-ـ-ــ-ـ-ـ-ـ-ـ-ـ-ـ-ــ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ
في مكان تاني خالص حي شعبي وشقه بسيطة
كانت قاعدة بنت عندها من ١٨ ل ٢٠ سنه بتترعش بخوف شعرها متقطع وهدومها مبهدله دموعها نازله وضمه نفسها بدراعتها وتتهز ل قدام وورا بسرعه جدا وبيطلع منها بين اللحظة والتانيه همهمات بسيطة حواليها شاب واتنين ستات
ست منهم
ــ احنا هنفضل ساكتين كدة ومش فاهمين هي مالها واللي حصلها
ردت التانيه
ــ جوزها لسه تلفونه مقفول يا حوكشه
حوكشه
ــ اه مقفول ورحت فضلت اخبط علي الباب ملقتش حد هناك وسالت الجيران قالو ميعرفوش حاجة حاولي انتي معاها يا اسماء هي بتحبك يمكن ترضي تتكلم معاكي وتكون خايفه مني انا وامي
اسماء بدموع من منظر اللي قدامها
ــ حاولت يا حوكشه والله حاولت وهي مش خايفه منكم لا دي لسه من شويه مرميه في حضن خالتي نعمه وفضلت تعيط
نعمه ببكاء
ـ مين اللي عمل فيكي كدة يا ضنايا ... فيكي ايه يا حبيبتي طمنيني الله لا يسئك فيكي اي
قاطع كلامهم خبط جامد علي الباب فتح حوكشه لاقاه عيل من الشارع
ـ في اي يا ياض يا فتحي اي الرزع دا
ــ الحق يا عم حوكشه لاقو عم حودة جوز ابله رانيا في الخرابه اللي في اخر الشارع وطالع حاجات بيضا كتير من بؤة وعينيه مبرقه اوي كدة
عسل فتحي وربنا يلا بينا في جريمة جديدة
أبيض وأسود
مني محمود بركات
الفصل الثامن
ليس عليك أن تكون قوياً دائماً قر بلحظات الضعف ولا تخجل منها لأنها جزء من أنسانيتك
جبران خليل جبران
-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ
بهاء وصل مع محمود المستشفى ودخله الطوارئ وفضل منتظر برة لحد ما يطمن عليه ... كان صعبان عليه وضعه خسر في يومين بالظبط ولاده الاثنين اللي طلع بيهم من الدنيا واحد اتقتل والتانيه هتتحبس وحكم الإعدام مستنيها فضل منتظر حوالي نص ساعه لحد ما خرج الدكتور
ــ طمني يا دكتور حالته اي ؟
ــ الحاله مش مستقرة للاسف واحتمال نحتاج لتدخل جراحي قلب مفتوح ف لازم حد من أهله يكون موجود عشان الإجراءات
ــ تمام يا دكتور أن شاء الله في اقرب وقت هتلاقي حد من اقاريبه هنا ارجوك بس لحد ما حد يكون معاه خلي بالك منه دا رجاء شخصي
ــ متقلقيش يا بهاء هو معاه ممرضه مش هتسيبه لحظة وأن شاء الله خير
ــ أن شاء الله
ــ عن ازنك اروح اكمل شغلي
ــ اكيد اتفضل
مشي الدكتور وطلع بهاء تلفونه عشان يكلم بكر لاقاه فصل شحن ملاقش قدامه حل غير أنه يرجع علي القسم ويخلي بكر يتصرف لكن لما رجع القسم اتفاجا أن بكر مش موجود وان في قضيه جديدة والقسم مليان ناس اتنهد بغضب ودخل علي مكتبه الاول حط تلفونه علي الشاحن وبعدين راح مكتب ظابط زميله في القسم
ــ هو مفيش اي دم خالص يا احمد مش شايف أن في قلق برة وانا مش موجود مقمتش ليه تشوف انت في اي بدل وجودك اللي زي قلته في القسم دا
رد عليه اللس قاعد علي المكتب بكل برود
ــ في اي يا عم انت لكل دا وبعدين الباب دا معمول عشان تخبط قبل ما تدخل مش طابونة هيا
ــ بطل البرود دا ورد عليا أنا علي أخري
ــ في اي يا بهاء هو مش الأوامر أن قضايا القتل معاك انت وبس عشان انت الظابط اللي مفيش منك واللي اي قضيه مش بتقعد معاك غير ساعات وبس اللي برا دي قضيه قتل اول ما عرفت رجعت تاني ع مكتبي وقفلت عليا وقاعد مستني الفرج اهو
حاول يهدي نفسه ويعزره في رد فعله
ــ ملكش دعوة بالأوامر دي قوم شوف القضيه اللي برا وانا هخلي مدحت بيه يكلمك بنفسه يقولك أنها قضيتك قوم يا احمد متخليش انفعال بسيط من سيادة اللواء يخسرك شغفك وحبك ل مهنتك يلا بقا يا جدع متبقاش أتم كدة
ــ أنا آسف يا بهاء انت اكيد عارف معزتك عندي أنا بس
قاطعه بهاء بتفهم
ــ ولا بطل رغي وقوم شوف شغلك قلتلك ... بعدين أنا ماسك قضيه لسه متقفلتش وسي بكر دا كمان اللي اختفي دا يومه اسود التلفون يشحن بس وهتصل اشوفه بيهبب ايه
ــ يا اخي حرام عليك دا انت لو مشتري عبد مش هتعمل فيه زي ما بتعمل في بكر والغربيه أنه سكتلك
رفع بهاء حاجبه
ــ وهو يقدر يعمل حاجة ولا اي هتخيب دا أنا بهاء يالا.
ــ ماشي يا عم بهاء هقوم اشوف القضيه بس لو اللواء.
قاطعه للمرة التانيه
ــ متبقاش غتت بقا قلتلك هيجيلك تلفون من اللواء نفسه يلا أنا رايح اوضتي سلام
ابتسم احمد بحب
ـــ سلام يا باشا
بهاء رجع اوضته كان تلفونه شحن شويه وقدر يفتحة واول ما فتحة رن علي بكر اللي رد من تاني جرس وقتها بهاء اتكلم بكل عصيبه وحزم
ــ اول واخر مرة يا بكر اخرج من القسم واكون مكلفك بحاجة وارجع الاقيك مزوغ سامع ولا لا و
قاطعه بكر بصوت متعب ومخنوق
ــ بهاء باشا انا اسف طبعا اني مشيت قبل ما ابلغك بس انا مش مزوغ يا باشا انا اختي في المستشفى بين الحياة والموت أنا مليش غيرها ولا هي ليها غيري مينفعش امشي واسيبها
بهاء نبرة صوته هديت كتير واتكلم بقلق
ــ هي مالها يا بكر في ايه طيب طمني ؟
ــ والله ما عارف يا باشا انا اتصلت بيها كتير مردتش ودي مش عادتها قلقت عليها روحت اشوفها لاقيتها واقعه علي الارض وجسمها كله متلج ومتخشبه أنا للحظة فكرتها فكرتها
قاطعه بهاء
ــ اهدي بس لا حول ولا قوه الا بالله اهدي يا بكر قولي انت في مستشفى اي طيب
بكر قاله عنوان المستشفى وبهاء مترددش ثانيه واحدة أنه يكون جمبه... بكر بس مش شغال معاه من سنين وفاهمه وحافظة ومريحة لا بكر مسؤول منه ولازم يكون جمبه
كلف حد تاني أنه يتواصل مع حد من اهل محمود ويتاكد بنفسه أنهم وصلو لمحمود المستشفى وعمل تلفون للواء عشان يحل موضوع احمد زميله واتحرك ل بكر عشان يكون جمبه
ـ-ـ-ـ-ــ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-
في الوقت اللي بهاء كان في طريقه ل بكر عشان يطمن عليه كان مؤمن وصل بيت اهل علا واستقبله حماه
مؤمن بلهفه وقلق
ــ مساء الخير يا عمي طمني علي علا
قبل ما يرد صبري خرجت نجاة من المطبخ وهي مكشرة واتكلمت بحدة بس بنبرة صوت واطيه
ــ بقا هي دي الأمانة اللي معاك يا مؤمن ... بنتي تستنجد بيك وانت متكلفش خاطرك تطمن عليها إلا لما تخلص شغلك كدة يا مؤمن
قاطعها صبري بضيق
ــ خلاص يا نجاة مش وقته وبس بقا ل تسمعك وتتعصب تاني مش ناقصين
مؤمن بحرج
ــ أنا آسف والله العظيم متخيلتش أنها تعبانه ابدا اسف بجد بس طمنوني عليها الاول وبعد كدة اعملو فيا اللي انتم عايزينه مش هنطق والله
صبري
ــ ضغطها وطي جدا بتقول بقالها يومين مش بتنام عشان نيجار بتبقي صاحيه كتير بالليل ف تاخدها وتدخل اوضه تانيه عشان انت تنام ومتقلقش وقله النوم مع قله الاكل نزلو ضغطها ل ٤٠ كانت بتروح مننا لولا ستر ربنا الحمد لله
مؤمن بحزن
ــ الحمد لله ... طيب هي كويسه دلوقتي ؟ الضغط اتظبط طيب ؟
صبري
ــ الحمد لله دي تاني مرة نعلق محاليل زي ما الدكتور قال ساعه كدة وهنقيس تاني ونكلمة ونشوف هيقول اي
مؤمن
ــ أنا عايز اشوفها يا عمي لو سمحت
نجاة لسه هتعترض قاطعها صبري
ــ اتفضل يا بني دي مراتك مش هنمنعك اكيد بس ليا عندك رجاء شخصي
مؤمن
ــ اتفضل يا عمي حضرتك تأمر
صبري
ــ الأمر لله يا حبيبي ... ممكن لو حسيت انها مش قادرة تتكلم أو يعني
هنا نجاة مقدرتش تسكت واتكلمت بسخريه
ــ ما تقولو الصراحة من غير تزويق ( بصت ل مؤمن ) لو حسيت يا حبيبي انها مش طايقه تبص في وشك متضعطش عليها عشان الدكتور قايل الانفعال وحش دلوقتي دا اللي عمك عايز يقولهولك
صبري خبط أيديه في بعض بقله حيلة ومؤمن هز رأسه بحرج واتحرك ناحيه اوضه علا واول ما اتحرك من أقدامهم صبري بص ل نجاة بغضب وهي ردتله البصه ب لا مبالاة ودخلت تكمل اللي كانت بتعمله في المطبخ
دخل مؤمن كانت علا فاتحة عينيها وباصه للسقف في شرود لدرجة أنها محستش بيه الا لما قعد جمبها ومسك ايديها
ــ حبيبتي عامله اي دلوقتي
بصتله بعتاب وخذلان ورجعت بصت الناحيه التانيه وهي بتشدت ايديها من ايديه بهدوء
ــ الحمد لله كويسه
ــ علا أنا عارف اني غلطان والله بس كنت مضغوط وكزا قضيه ورا بعض وانتي عارفه بهاء بيوترني ازاي لما بشتغل معاه أنا مش ببرر اللي حصل أنا غلطان عارف بس غصب عني والله
فضلت ساكته خد نفس طويل وخرجة بضيق
ــ أنا مش هستحمل تزعلي مني كدة حقك عليا يا لولتي اخر مرة والله العظيم وحياة لولا وجيجي عندي ما هتتكرر تاني
علا ردت بصوت ضعيف من غير ما تبصله
ــ ولا تكرر تاني مش هتفرق يا مؤمن ... عادي دا شغلك ودي حياتك وانا وافقت عليها متشغلش بالك بيا طول عمري متعودة اداوي نفسي بنفسي مجتش عليك انت كمان يعني
ـــ اولا لا مش هتتكرر تاني يا علا ثانيا أنا معنديش اغلي منك عشان اشغل بالي بيه ثالثا أنا مش فاهم تداوي نفسك بنفسك من اي ومتعودة علي اي ؟
ــ أنا مش قادرة اتكلم ممكن كفايه كدة ؟
ــ ماشي يا علا مش هضغط عليكي عشان تعبانة بس
ــ شكرا
رد بغيظ
ــ شكرا ! ماشي يا علا ماشي تخفي بس ولينا كلام تاني
مردتش عليه كانت تعبانة فعلا وحسه أنها معندهاش اي طاقه للكلام غمضت عينيها وهربت بالنوم ... بص عليها واول ما اتاكد أنها نامت خرج بهدوء من جمبها صبري أصر عليه يبات معاهم لأن الوقت اتاخر وهو وافق خصوصا أن حماه قاله أن نيجار بتصحي بقالها كام يوم معظم الليل محبس يضغط عليهم بالسهر بيها ووافق يبات معاهم واخد نيجار من صبري وفضل قاعد بيها وهو قلقان علي علا وخايف حقيقي علاقتهم المستقرة تتأثر بالموقف دا
بس هل هي فعلا علاقه مستقرة ؟؟؟؟؟؟
ـ-ـ-ـ-ــ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ
وصل بهاء للمستشفى وطلع قدام الاوضه اللي فيها بدور لاقي بكر قاعد جمب الباب وساند رأسه بين أيديه
ـــ بكر .. ايه الاخبار طمني ؟
بكر بتوهان
ــ الدكتور بيقول جلطة قلبية بس الحمد لله لحقوها... جلطة ازاي أنا سايبها كويسه والله ازاي بس
ــ هو اي اللي ازاي اهدي كدة ووحد الله ... قول الحمد لله انها كويسه وأنهم لحقوها يا بكر
ــ الحمد لله ... الحمد لله
ــ طب مقالوش هتخرج أمتي ؟
ــ الدكتور بيقولي بكرة كمان يطمن علي حالتها وعلي بعد بكرة الصبح لو فضلت مستقرة هيكتبلنا علي خروج
ــ مش محتاج اي حاجة يا بكر وانت عارف انها مش عزومة
ــ عارف يا باشا تسلم خيرك سابق أنا بس ليا عند حضرتك طلب واتمني متكسفنيش
ــ قول يا حبيبي خير
ــ بدور ملهاش غيري يا باشا حتي لو خرجنا بعد بكرة من هنا مفيش حد يقعد معاها ف لو ممكن حضرتك توافقلي علي إجازة اسبوع بس لحد ما أطمن عليها واتصرف في واحدة تكون ثقه تاخد بالها منها في غيابي يبقي تشكر اوي يا باشا
ـــ غريبة وفين والدك ميقعدش معاها هو ليه بدل ما تفضل انت في البيت اسبوع بحاله ؟!
بكر كشر
ــ والدي اولا راجل كبير مش هيعرف يراعيها ثانيا هو مش عايش معانا عشان في شويه مشاكل بينا هو عايش لوحده وانا وبدور لوحدنا
بهاء استغرب بس محبش يسأل تاني عشان ميحرجش بكر
ـــ ماشي يا عم بكر لولا الظروف اللي انت فيها عمري ما كنت اتخيل اني امضي علي إجازة اسبوع بحاله لحد هه
ــ تسلم يا باشا منتحرمش
ــ طيب انا همشي بقا وانت اي وقت تحتاج اي حاجة كلمني علي طول متترددش والف سلامه علي اختك
ــ تسلم يا باشا الله يسلمك شكرا
اتحرك بهاء بس قبل ما يطلع من المستشفى عدي علي الحسابات وعرف أن بكر دافع جزء بس من الحساب دفعله باقي الحساب بالكامل وبعدين اتحرك علي بيته
ـ-ـ-ــ-ــ-ـ-ـ-ـ-ـ-ـ-ـ-ــ-ـ-ـ-ـ-ـ-ـ-ـ-ــ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ
وصل بهاء شقته ويادوب دخل اوضته يرتاح تلفونه رن برقم نيرة
بهاء بصوت عالي
ــ استغفر الله العظيم يارب لازم اليوم يختم بغم لاززززم
( رد)
ــ يا نعم ؟
ــ في حد يرد علي حد كدة يا حضرة الظابط
ــ أنا برد كدة خير يا نيرة
ــ مهاب عايز يشوفك بكرة ضروري وقالي ابلغك واشوف المكان والمعاد اللي يناسبك
ــ والله ! وهو مكلمنيش بنفسه ليه ؟ عينك سكرتيره ليه يعني
ــ اوووف انت ليه التعامل معاك متعب كدة ما تبطل اسئلة وتقولي المعاد اللي يناسبك ولما تقابل اخوك اساله زي ما تحب
ــ اوك يا نيرة هانم قوليله بكرة الساعه ٤ عندي في القسم لان مش فاضي اخرج والله لو تمام معاه أنا في انتظاره مش تمام براحته ها حلو كدة
ـــ مستفز بجد سلام
وقفلت السكة في وشه بص للفون وضحك بانتصار أنه قدر يضايقها بس ضحكته اختفت تدريجيا لما افتكر أن مهاب عايز يقابله وفضل قلقان مدة كبيرة بيفكر مهاب ممكن يكون عايزه في اي
صباح يوم جديد صحي بهاء فطر وشرب قهوتة واتحرك علي القسم اول ما دخل سال علي الامين اللي كان مكلفه بموضوع محمود والتأكد أن محمود معاه عيلته دلوقتي دخل اوضته وبدء يشوف شغله وفي وسط اندماجه خبط عسكري ودخل
ــ لا مؤاخذه يا باشا
ـــ خير يا بني
ـــ في واحد برة بيقول أنه ابو الامين بكر وعايز يقابل حضرتك ضروري بيقول موضوع حياه او موت
كشر باستغراب
ــ حياة أو موت !! دخله لما نشوف عايز اي
ــ امرك يا باشا
خرج العسكري ودخل بركات وهو باين عليه الحزن والتعب
ــ اهلا وسهلا اتفضل اقعد
ــ الله يعزك يا بني شكرا
ـــ خير العسكري قالي انك عايزني ف موضوع حياه او موت
بدء بركات يعيط جامد اتفاجا بهاء بحركته دي ومبقاش عارف يتصرف ازاي
ــ في اي يا حج لا حول ولا قوه الا بالله العلي العظيم اهدي بس اهدي في اي حصل لكل دا
ــ أنا جاي طمعان في كرم سعادتك تكلم ابني بكر وتحنن قلبه عليا يا باشا ( عيط تاني ) أنا راجل كبير خلاص ايامي معدودة وهو راميني مش بيبص في وشي حتي ولا بيسال عليا الناس في الشارع هي اللي بتخدمني وبيعطوفو عليا وابني عايش حتي بنتي حبيبتي منعها مني بالعافيه ومش بيخليها تكلمني حتي يرضي مين دا بس يارب اربي واكبر واعلم ولما يبقي راجل ملو هدومة يعمل كدة فيا ( عيط اكتر ) أنا تعبت واتذليت كتير اوي ربنا يهديه ... مش هقدر ادعي عليه لا ربنا يهديك يا بكر
في نفس التوقيت كانت بدور بدأت تفوق وتتكلم شافت رعب بكر عليها وهو قاعد قدامها علي كرسي ومتبت في ايديها وعقلها صورلها أنها اكيد صح في تصرفها من خوفها عليه حاولت تبان كويسه واتكلمت بصوت متعب
ــ بكر ... حبيبي نايم كدة ليه
صحي واتكلم بلهفه
ــ بدور .. حبيبتي قوليلي حاسه بايه في حاجة وجعاكي طيب ؟ طمنيني يا حبيبتي استني استني انده الدكتور يجي يشوفك
مسكت ايديها قبل ما يتحرك من مكانه
ــ أنا كويسه متقلقش كدة عليا أنا تمام والله
ــ طب خليني انده للدكتور يطمني اكتر الله يخليكي
هزتله رأسها في ضعف وهو خرج جري يشوف الدكتور فين ثواني ورجع
ــ الدكتور عنده مرور ربع ساعه كدة ويجي يطمني عليكي
ــ ماشي يا حبيبي اهدي بقا
ـــ اي اللي حصل يا بدور أنا كنت سايبك كويسه اي اللي حصل ووصلك للحاله دي ريحي قلبي واتكلمي بقا
عينيها دمعت وهزت رأسها بنفي ودا عصبه منها اكتر ومش قادر يضغط عليها في تعبها دا قبض علي ايديه جامد وخرج من الاوضه خالص من غير ولا كلمة وهي أول ما قفل الباب وراه دموعها نزلت بوجع عليها وعليه
ـ-ـ-ـ-ـ-ـ-ـ--ـ--ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ--ـ-ـ-ــ-ـ-
نرجع ل بركات وبهاء يا تري بركات عايز منهم اي وبهاء يكل خبرته وزكائه هيصدق بركات ولا لا ؟
علا ومؤمن علاقه مستقرة فعلا ؟
أهلها كويسين ولا وحشين ؟
القضيه بتاعت البنت جوزها اللي مات خلصت كدة ؟
مهاب عايز بهاء في اي ؟
واخيرا بكر هيستسلم زي كل مرة ولا هيقدر يعرف في اي من بدور ؟
أبيض وأسود
مني محمود بركات
الفصل التاسع
دائما أتسائل فيما أذنبت ؟ ولما اعاقب ؟ وماذا ينتظرني في اخر الطريق ؟
ـ-ـ-ــ-ـ-ـ-ــ-ـ-ـ-ــ-ـ-ـ-ـ-ـ-ـ-ـ-ـ
عند بدور في المستشفي الدكتور طمن بكر عليها وسمح لها بالخروج بس تاني يوم الصبح زيادة للاطمئنان و شدد علي الراحة التامة وعدم الانفعال بعد ما خرج الدكتور فضل بكر قاعد وباصص ناحيه الباب وساكت وهي عينيها عليه ومش عارفه تقول ايه بعد حوالي ربع ساعه من الصمت دا اتكلم بكر من غير ما يبصلها
ـــ لحد أمتي هتفضلي تداري عليه ؟ انتي فاكرة أنه سبنا في حالنا فعلا ؟ طب تعرفي أنه بقاله كام يوم بيزن عليا اني اروحله بنفسي اديله الشهريه ولما رفضت هددني أنه هيعملي مشكله في شغلي
بدور استغربت جدا بس سكتت وبكر كمل كلامة
ـــ أنا كنت واثق أن في سبب لاصراره اني اروح بنفسي هناك لحد ما عرفت السبب
سكت شويه وبعدين بصلها
ـــ مش عايزة تعرفي كان عايزني ليه ؟
نطقت بصوت مخنوق
ــ ليه !؟
ضحك ضحكه كلها وجع
ــ متخانق مع واحد من الزباله اللي بيشرب كل يوم معاهم واحد اسمه اشرف وأشرف دا بقا ابنه هو كمان بيشرب معاهم وشغال اصلا ديلر هو اللي بيجيبلهم الهباب اللي بيطفحوه كل يوم وطبعا لما بركات بيه اتخانق مع ابو الواد الواد بطل يدي بركات هباب ووصي كل عيال المنطقه اللي بيبعو ميدوهوش اي حاجة مهما عرض عليهم فلوس ف اخر كارت بالنسبه أني اروح هناك ب نفسي لانه وهم الناس هناك أنه اتصالح معانا وعلاقتنا كويسه ببعض الواد طبعا مصدقش لكن لما اروح بنفسي هناك وابان وانا داخل البيت وشويه وخارج الواد هيصدق ويخاف ويرجع يبيع لابوكي من تاني ... اي رايك في دماغه هههههههههههه دماغ متكلفه بصحيح مش كدة
معرفتش ترد تقول اي دموعها نزلت بقهر علي حالها وحاله واللي السبب فيه واحد هو بركات كمل بكر كلامة
ــ انتي مش عايزة تقوليلي هو عمل اي عشان مقتلوش وتبقي لوحدك مش كدة يا بدور ؟
بصتله بدهشه وسكتت ودموعها لسه نازله
ــ تفتكري أنا غبي للدرجة دي عشان مفهمش أن دا السبب .. طب تفتكري اني ممكن اعمل حاجة تخليكي لوحدك في الدنيا الزفت دي وبطولك فيها ؟ ريحيني يا اختي أنا في مليون سيناريو في دماغي كلهم العن من بعض وانا والله العظيم ما هتصرف بتهور ولا هعمل اي حاجة تخلينا بعيد عن بعض احنا ملناش الا بعض يا بدور بس عرفيني ايه اللي حصل متسبينش ل دماغي كدة لان لو فضلت علي الحال دا مع تصرفات بركات اللي بتزيد يوم عن يوم هتجنن فعلا وممكن اعمل فيه حاجة عشان ارتاح من الصراع اللي جوايا قوليلي في اي وانا اوعدك هحل كل حاجة بهدوء والله
ــ ملهاش حل يا اخويا .... انا غلطت وحرماني من بنتي كان التمن وانا راضيه بيه ... طالما هي بعيد عن القرف دا خلاص ... ابوك اذاني يا بكر قطم ضهري بس كانت الغلطة من الاول غلطتي أنا ... انا المجرمة في الحكايه كلها أنا اللي غلطانة واستاهل الشنق والله انا يا بكر أنا
انهارت في البكاء وبكر قام بسرعه وحضنها وحاول يهديها ولما فشل نده للدكتور اللي أداها مهديء
ــ كدة ما ينفعش أنا ماكد علي حضرتك عدم الانفعال والراحه عشان الحاله تفضل مستقرة لما تنهار كدة وهي لسه في المستشفى اومال لما تخرج هيحصل اي
رد بكر وعيونه بتلمع بالدموع
ــ مش هخليها تنفعل تاني ابدا ... إن شاء الله مش هيحصل يا دكتور ... بس هي كويسه دلوقتي ؟
ــ هنشوف لما تفوق الوضع اي عن إذن حضرتك
ــ اتفضل
خرج الدكتور وقرب بكر منها مسك ايديها وسمح لدموعه انها تنزل
ـــ هجبلك حقك يا بدور والله العظيم المرة دي ما ههدي الا لما اعرف واجبلك حقك منه ومن كل اللي اذوكي مش هسكت زي كل مرة خلاص مبقاش فيها سكوت انتي هتروحي مني لو فضلت واقف مكاني من غير ما اتصرف ولو انتي خايفه عليا ومتقدريش تكملي من غيري انا مقدرش اعيش وانا شايف انك كل يومي بتدبلي اكتر وافضل ساكت
ـ-ـ-ـ-ـ-ـ-ــ-ـــ-ـ-ــ-ـ-ـ-ـ-ـ--ــ-ـ-ـ-ـ-ـ-ـ-ـ-
في القسم خلص بركات كلامه ودموعه نازله ... كان متقن الدور جدا ومعندوش اي شك أن اكيد بهاء صدقه وهيخلي بكر يجي ويراضيه ويروحه لحد البيت كمان ... يمكن عيونه كانت بتبكي لكنه من جواه كان مبسوط باتقانه للدور وان خلاص هو بقا علي بعد خطوة واحدة من حل مشكلتة بس عدي وقت وهو ساكت ودموعه نازله وبهاء مخدش اي رد فعل ساكت وباصصله بتركيز شديد زي ما هو وهنا بدء بركات يتوتر وحس ان في حاجة مش مفهومه بتحصل اتكلم بصوت هادئ وضعيف
ــ انت ساكت ليه يا بني مش مصدقني ولا اي ... طبعا تلاقي بهاء قايلك عني كلام مش صح عشان يسكت اي حد بيساله هو عاق مع ابوه ليه ... عملها كتير قبل كدة جت عليك يعني
بهاء ضحك بصوت عالي لدرجة أن بركات بدء يخاف
ـــ تصدق عجبني الشو دا
( وغمزله )
رد بركات بارتباك
ــ شو ايه مش فاهم ؟
ـــ مممم تعرف يا بركات أنا شغال مع بكر ابنك بقالي كام سنه ؟ طب بلاش دي سالت عليا قبل ما تدخل وتكلمني ؟ سالت من بهاء الدميري قبل ما تفكر انك ممكن تعرف تضحك عليه بدموع التماسيح دي ؟ عيبك انك اتسرعت اوي يا بركات اوي ودي غلطة هتدفع تمنها حالا متقلقش
ــــ يا باشا اسمعني بس
قاطعه بحده وغضب
ـــ ولا كلمه انت اتكلمت كتير ودا وقت انك تسمعني ... لو سألت عليا يا بركات كنت هتعرف اني شخص شكاك جداااا ومش اي حد يشتغل معايا وابنك معايا بقاله سنتين كاملين مش بيفارقني بنقضي وقتنا مع بعض في الشغل اكتر من الوقت اللي بنقضيه في بيوتنا واني شغلي ومكانتي اللي وصلتلها تخليني اعرف اقري اللي قدامي كويس اوي واعرف الكداب من الصادق انت قولت معلومات كتير غلط ودي من ضمن غلطاتك انك محسبتش حساب اني اكون عارف حاجات عن حياة بكر الشخصيه اصلا ف دخلت عليا بقلب جامد وانت مطمئن انك هتعرف تضحك عليا بشويه دموع .. هههههههههههه تعرف كام قاتل ومغتصب وحرامي وبلطجي قعدو مكانك علي الكرسي دا وحلفو وعيطو وانهارو أنهم معملوش حاجة ؟
ـــ ا أنا مش مكنتش عايز غير اني اكون في حياه ولادي مش اكتر مش مش عارف ايه لازمة كل كلامك دا يا باشا
ـــ ممممم ماشي يا بركات عموما انا هسيبك تقوم تروح بس في خلال مدة صغيره اوي اوعدك أن هيكون في بينا مقابله تانية وهيكون بكر معانا ووقتها اللي له حق هياخده تمام كدة ؟
هز رأسه بالموافقة من غير ولا كلمة نظرات بهاء ونبرة صوته كانت مخلياه مرعوب وعرف أنه غلط لما دخل يتكلم معاه من الاول ومش بعيد الخطوة دي تكون فيها نهايته استأذن بسرعه وخرج بخطوات سريعه من القسم وهو حاسس. أنه قلبه هيقف من الخوف الخوف من اللي ممكن يحصل لو بهاء أتدخل فعلا في موضوعه مع بكر وبدور حس أنه تسرعه دا هيكون فيه نهايته وأنه لازم يتصرف في اسرع وقت قبل فوات الاوان
ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ
بعد ما بركات مشي بهاء كلف حد من العساكر اللي بيثق فيها أنه يراقبه ويعرفله كل حاجة عنه ... اتنهد بضيق وكان حاسس بشعور بغض وكره تجاه بركات بدون سبب واضح ... خبط الباب وسمح بهاء بالدخول دخل احمد زميله
ـــ يا اهلا يا اهلا ... ايه الاخبار يا نجم
ــ الحمد لله انت عامل اي يا باشا
ــ تمام ... اي القضيه خلصت ولا لسه ؟
ــ خلصت ومخلصتش
ــ فزوره دي يعني ولا اي
ـــ ولا فزورة ولا حاجة عرفنا مين عمل كدة في الواد ومراته كمان بس مش عارفين نمسكة هربان للاسف
ـــ مراته ؟! انا اللي اعرفه ان القضيه كانت جثه في خرابه مراته مالها بقا ؟
ـــ دا موضوع كبير اوي متشغلش بالك أنا بس كنت جاي اشكرك علي
قاطعه بهاء
ــ بطل هبل يا احمد وامشي ع مكتبك يلا ولما توصل للي عملها تعالي نشرب القهوة مع بعض واحكيلي كل حاجة ... يلا بقا مش فضيلك أنا اتكل علي الله
ـــ ماشي يا بيبو تسلم ... سلام يا صاحبي
ـــ مع السلامة يا سيدي
خرج احمد ورجع بهاء يكمل شغله كان مطلوب منه تقارير وتقفيل لآخر قضيتين مسكهم عشان كدة استغل أنه فاضي وفضل في المكتب يخلص اللي وراه ونسي خالص أنه مدي معاد ل مهاب اخوة الساعه اربعه
ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-
في بيت اهل علا ... صحي مؤمن تاني يوم علي حركة نيجار بنته بص علي علا لاقاها لسه نايمة والتعب باين عليها شال نيجار براحة من جمبها وخد الشنطة اللي فيها كل حاجتها وخرج بهدوء من الاوضه ... لاقي حماه قاعد قدام التلفزيون وحماته كانت قاعدة علي السفرة قدامها خضار بتحضره
اتكلم بحرج
ــ صباح الخير
صبري ونجاه
ــ صباح النور
نجاة
ــ حبيبه تيته صحيت
مؤمن
ــ اه ولاقيتها عماله تتحرك جمب علا خفت تصحيها خدتها وخرجنا
نجاة
ــ تلاقيها عايزة تغير وتاكل هاتها يا مؤمن
مؤمن
ــ لا لا خليكي حضرتك مش لازم تتعبي نفسك أنا هغيرلها واكلها
صبري
ــ اديها لستها يا مؤمن وتعالي اقعد عايز اتكلم معاك كلمتين قبل ما علا تصحي
مؤمن هز رأسه بقله حيله وساب نيجار مع نجاة وراح قعد قدام حماه اللي قفل التلفزيون وبصله
ـــ أنا عارف ان علا زعلانه منك بسبب اللي حصل امبارح بس لازم تعرف حاجة عن شخصيه علا مظنش انك تعرفها
ـــ حاجة اي يا عمي ؟
ـــ علا هتصحي تتعامل معاك عادي جدا وهتقولك يا حبيبي حصل خير ومفيش حاجة وانا خلاص والله مش زعلانة وكلام كتير من دا بس مش دي الحقيقه
ضم حواجبة باستغراب وسكت وصبري كمل كلامة
ـــ علا هتبقي لسه مجروحة منك وهتكتم الجرح دا جواها مش هتظهره هتخاف تعبر عن غضبها أو زعلها منك يا مؤمن
قاطعه مؤمن المرة دي
ــ عمي ارجوك توضح كلامك ... لما هي هتبقي مجروحة وزعلانه هتبين عكس دا ليه مش منطقي يعني ايه يخليها تعمل كدة اصلا ؟؟ أنا عمري ما شديت عليها ولا صوتي علي ولا تطاولت في الكلام معاها ولا طبعا رفعت ايدي عليها يبقي اي يخليها تكتم زعلاها وغضبها جواها وتبين عكس دا ؟ مش فاهم ولا مقتنع بصراحة
صبري بص علي الاوضه اللي فيها نجاة ورجع بص ل مؤمن واتكلم وهو موطي صوته
ـــ أنا مش هعرف افهمك هنا عشان نجاة متسمعش ... بعد ما نفطر سوا تعالي ننزل علي القهوة وهناك نتكلم براحتنا ماشي
ــ ماشي يا عمي أنا كدة كدة هتصل دلوقتي بالشغل واخد انهاردة إجازة لحد ما اطمن علي علا أن شاء الله
ـــ أن شاء الله... تمام كدة حلو اوي عندنا وقت كتير نتكلم براحتنا المهم مش هنا لما ننزل
ــ حاضر ... انا هقوم اشوف علا صحيت ولا لا مفروض في دوا تاخدة كمان ساعه يادوب تلحق
خرجت نجاة علي اخر جمله ل مؤمن
ــ فعلا في دوا كمان ساعه ودا بعد الأكل الفطار جاهز عشر دقائق ويبقي جاهز خد يا صبري انت جيجي وانا هحط الاكل علي السفرة علي ما مؤمن يصحي علا يلا
صبري
ــ حبيبه جدو تعالي يا قلبي اهلا اهلا بالصغنن الجميل
سابهم مؤمن ودخل ل علا اللي كانت صحيت وبتحاول تنزل من علي السرير بس الدوخة مش مخليها متزنة ف قامت وقعدت كذا مرة جري عليها مؤمن وهو بيسندها
ــ صباح الخير يا حبيبتي عامله اي طمنيني عليكي
ـــ صباح النور ... متقلقش يا حبيبي أنا بقيت احسن كتير
ـــ حبيبي !!
ــ اه مالك مستغرب كدة ليه ؟
ـــ يعني انا عارف انك لسه زعلانه من اللي حصل ف مستغرب حبيبي دي
ــ خلاص يا حبيبي حصل خير أنا مش زعلانه يعني امبارح زعلت شويه بس خلاص انت وعدتني وانا صدقتك ملوش لزوم النكد بقا
ـــ انتي كويسه بجد يا علا !!!!
ـــ اه يا حبيبي الحمد لله مالك مستغرب اوي كده ليه ؟
سرح مؤمن وافتكر كلام صبري اللي قاله من شويه وعرف أن فعلا في جانب تاني في شخصيه مراته هو ميعرفش عنه اي حاجة وقرر أنه لازم يفهم كل حاجة
عدي حاولي ساعه كانو فطرو كلهم سوا وعلا كانت بتضحك وتهزر ولا كان في حاجة ودا كان مخلي مؤمن غصب عنه نظراته عليها كلها ذهول وعدم استيعاب
نزل هو وصبري علي القهوة والفضول كان بينهش فيه
ــ ادينا بقينا لوحدنا يا عمي فهمني اي اللي حصل دا أنا استنيت الساعه دي بالعافيه والله
ـــ بص يا مؤمن علا شخصيه كتومة جدا وحساسه جدا ومبتعرفش تعبر عن اللي جواها وللاسف اللي زود دا هو طباع نجاة الحاده شويه ... نجاة الحب عندها يعني تربيه سليمة اخلاق كويسه الناس كلها تحلف بيها وتقول ماشاءالله علي تربيه نجاة ل بنتها لكن مفيش اظهار لاي عاطفه جواها ... ديما شايفه أن الحب والاهتمام للبنات دا دلع والدلع للبنت غلط وبيجيب مشاكل ف بالتالي بقت عنيفه طول الوقت معاها وعايزة كل حاجة بتتعمل تتعمل صح ومظبوط ف لما علا كانت بتزعل من كلام امها ليها مكنتش بتلاقي اللي يراضيها وللاسف أنا قعدت فترة كبيره اوي مقتنع ب اسلوب نجاة أنه هو دا الصح واني كدة بحافظ علي بنتي الوحيدة ف كانت علا بتقفل علي نفسها واللي عرفته بعدين لما بالصدفه قريت مذكراتها أنها بقت طرق تراضي بيها نفسها زي أنها تقعد تقول ل نفسها معلش يا علا ... انتي كويسه يا علا ... بكرة كل حاجة تكون احسن ... انتي تستاهلي الحب وهتلاقيه ... او تجيب ل نفسها حاجة بتحبها يعنيط يا حاجات زي دي لما قريت كلامها حسيت باللي احنا عملناه في شخصيتها للاسف بدل ما نربيها تكون قويه وسويه ربنها مؤدبه اه بس ضعيفه وحساسه وكتومة حاولت افهم نجاة كتير بس من شب علي شيء شاب عليه ف بقيت أنا في النص شويه ادادي في نجاة وشويه اكون جمب علا واهي ماشيه ولما حصل الموقف الاخراني بينكم عرفت اللي هتعطمله معاك ف استخرت ربنا وقررت افهمك كل حاجة عشان اللي احنا بوظناه انت بقا تصلحه بمعرفتك
مؤمن طول ما هو بيسمعه كانت ملامحة مكشرة وحاسس بخنقه ومع نهايه كلامه حس بضيق ومقدرش يسيطر علي نبرة صوته اللي طلعت كلها غضب
ـــ يعني حضرتك قعدت سنين عارف مشكله بنتك واي اللي وصلها ل كدة وبدل ما تحل المشكله بتقولي اهي كانت ماشيه وحل انت بقا ؟ دا بجد ؟ اللي بسمعه دا بجد ؟؟
ـــ ما أنا شرحتلك الوضع دي قناعات نجاة اعملها اي يعني اشنقها ؟ أما دي عجيبه والله بقولك اي أنا قلتلك وانت حر انت ومراتك أنا هقوم اجيب طلبات البيت اللي نجاة عايزاها عن ازنك
سابه مذهول وقام مشي وفضل مؤمن قاعد بيسترجع تصرفات كتير ل علا كانت غريبه بالنسباله وكان ديما يأجل أنه يتكلم معاها فيها وعرف أنه غلطان في طريقته مع مراته وبقي محتار يبدء منين
ـ-ـ-ــ-ـ-ـ-ـ-ـ-ــ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ-ـ
الساعه اربعه بالظبط العسكري دخل وبلغ بهاء أن مهاب موجود برة وطالب يقابله اتفاجا بهاء ب مجي مهاب فعلا كانت متاكد انه استحاله يوافق يقابله في القسم سمح للعسكري بالخروج ودخول مهاب ودخل مهاب وهو مكسر وباين عليه الضيق
ـــ اهلا يا مهاب اتفضل
ـــ اهلا يا حضرة الظابط يارب تكون مبسوط وانت مدخل اخوك القسم كدة
ــ استهدي طيب بالله كدة واقعد تشرب اي الاول وبعدين نتكلم ؟
ــ مش عايز اشرب حاجة خليني اقولك الكلمتين اللي جاي عشانهم وامشي
ـــ ماشي يا مهاب اتفضل قول
ـــ بسمه قربت ترجع من رحلتها ياريت تتكلم معاها انها ترجع البيت الباشا حالته صعبه جدا من يوم ما مشيت ولو علي العريس خلاص نيرة حلت الموضوع من غير مشاكل وعدت علي خير
ـــ نيرة ممممم طيب يا مهاب لما ترجع بسمة تقدر تيجي بنفسك وتتكلم معاها لكن أنا مش هقدر اسف
ـــ بطل انانيه لمرة واحدة في حياتك بقولك ابوك حالته صعبه وانت تقولي آسف مش هقدر ؟
ــ انانيه !! اللهم طولك يا روح بص يا مهاب بسمة قاعدة في بيت اخوها معززة مكرمة وانا لا منعها عنكم ولا ليا علاقه بعلاقتها بيكم لما ترجع اتكلم انت معاها أو خلي حلاله المشاكل والعقد نيرة هانم تكلمها دا اخر كلام عندي
قام مهاب وقف والغضب ماليه
ـــ هتفضل اناني ومستهتر طول عمرك هتفضل لوحدك لحد ما تموت أنا واثق أن مفيش واحدة تقدر تستحملك يومين بس مش تبقي مراتك العمر كله ... آسف اني فكرت الجألك نيرة كانت صح من الاول انت مفيش منك اي فايدة ... ومن غير سلام
خلص كلامة وخرج من المكتب وساب بهاء قاعد وهو كاتم عصبيته جواه ظهر قدامة طيف لعيل صغير حوالي تسعة أو عشر سنين واقف في ركن الاوضة هدومه متقطعه ووشه كله دم ومبستم ابتسامه خفيفه وهمس بكلمه واحدة ((( متسبنيش )))
وقبل ما يستوعب كلام مهاب أو ظهور الطفل له دخل احمد من غير استأذان وهو بينهج
ــ شوفت المصيبه اللي حصلت
اتكلم وهو حاسس انه تايهه ولسانة لاول مرة يكون تقيل
ــ ف في ايه ؟
ـــ ابن اللواء محمد البكري اتقتل والدنيا مقلوبه
انتفض من مكانه بصدمة
ــ انت بتقول اي دا ؟ ازاي دا حصل ومين يجرؤ يعمل كدة
ــ اللي قتله قتله علي طريق عام ووقف ورفع السلاح ل فوق وبلغ عن نفسه كمان تخيل
ـــ معقول ! طب ليه ؟ ليه يعمل كدة اصلا اللي اعرفه ان اللواء محمد انسان محترم وبتاع شغل وبس
ـــ والله يا بهاء الداخليه كلها مقلوبه ومحدش فاهم حاجة هما قبضو علي الراجل اللي عملها وبيتحقق معاه وحاليا عمر أن سيادة اللواء في المشرحة أنا لما عرفت جيت اقولك عشان نشوف هنروح الدفن ولا الدفن هيتاخر ف نروح نعزي ولا هنعمل اي
قاطعهم رنه تلفون المكتب بتاع بهاء رد
ــ أيوة يا فندم تحت امرك
ــ أيوة عرفت لسه عارف دلوقتي
ـــ ايه مات ازاي ؟ أنا عرفت أن مقبوض عليه ؟
ــ أنا !!!!
ـــ لا يا فندم تحت امر حضرتك حالا هكون عندك
قفل معاه وأحمد سأله بسرعه
ــ مين اللي مات تاني ؟ هو يوم باين من أوله
ـــ الراجل اللي قتل عمر جتله ساكته قلبيه وهو قاعد بيتحقق معاه ومات واللواء كلفني أنا أتابع التحقيق واعرف ملابسات القضيه واكتب التقرير بنفسي لانه هتعرض علي وزير الداخليه بيقولي أن في كاميرا مراقبه صورت الجرمية وأنها انتشرت جدا علي النت
ــ دي كدة احلوت اوي ... ربنا معاك يا بطل عم ازنك بقا
ــ جبان امشي غور
خرج احمد وبهاء لاول مرة يحس أنه مخنوق ... الطيف اللي ظهر يا تري له علاقه بالقضيه دي ولا لا وليه هو حاسس بالخنقه دي وليه حاسس ان لسه في حاجة وحشه وكبيره هتحصل اتنهد بضيق وخرج من مكتبه وهو بيحاول يهدي نفسه لكن اول ما خرج افتكر أن بكر في إجازة ودا ضايقه جدا وخلاه يحس بالضيق اكتر
ـ-ـ-ـ-ـ-ــ-ـ-ـ-ـ-ـ-ـ-ـ-ـ-ـ-ــ-ـ-ـ-ـ-ـ-ـ-ـ-ـ-ـ-ـ
في محافظة الشرقيه تحديد في بلبيس في شقه بسيطة خرجت طفله بتجري بسرعه من الاوضه ناحيه باب الشقه وخرج وراها راجل وهو بيجري وراها وبيقول
ــــ تاليا تعالي هنا لو خرجتي هزعل منك بجد مش كل شويه اجيبك من شقه حد من الجيران عيب كدة بقا تعالي هنا
جرس الباب رن وراح فتح بعد ما شالها علي كتفه
ـــ اهلا يا ست منال اتفضلي
ــ اهلا بيك يا استاذ امجد ... مالك صوتك عالي كدة ليه وبتزعق لل الكتكوته دي بقا بزمتك دي حد يزعقلها
ـــ تعباني والله يا ست منال ومبقتش قادر اسيطر عليها
ـــ طب هاتها أنا كنت جايه كدة كدة اخدها عمار ابن محمود جه وعمال يسأل عليها خليهم يلعبو مع بعض شويه ولو وراك انت حاجة خلصها
ـــ مش عايز اتعبكم معايا أنا عارف انها شقيه و
قاطعته منال
ـــ والله دا ولاد عيالي اشقي منها بكتيييير دي نسمة وسطهم هاتها بس وملكش دعوة أنت
ـــ شكرا يا ست منال
خدت منه تاليا وخرجت وهو قفل الباب واتنهد بحزن علي بنته اللي بقت يتيمه وامها عائشه بس نظرة الحزن اتبدلت لغضب وكره كبير
ـــ عمري ما نسيت عمري وقريب اوي كل حاجة هتخلص
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺