رواية بليلة_الدخلة_اكتشفت_اني_زوجة_ثانية البارت_الرابع 4 بقلم وسام الفراجي حصريه وجديده
 |
فات شهاب بهاللحظة شكو ؟
الفليبينية تدور طلعات حلت بعينها المستشفيات
ركض ع سريع .. شالني واخذني .. كدام امه وضرتي .. لحكني ع المشفى
فحوصات وابر وتحاليل ..
النتيجة طلعت حامل وشربانة شي مال اجهاض طفل!! تخبل شهاب خبال
شهاب ..
حامل!! لا وبعد اجهاض! افرح ابجي ، افرح للحمل لو ابجي ع مرتي الي تريد تسقط الطفل وماتريد طفل مني
متمددة ومغمضة مابيه حيل افتح جفن ..
اسمع الضرة تكوللهم والله اذا صرتوا تفضلوها عليه اذا تجيب طفل اقسم بالله احجيلها كل الحقيقة
اريدها تحجي شنو من حقيقة هاي القوية الي تهددهم بيها صار فضول ملييييييار بس ياحظي من وين اعرف حيظل هالفضول يدور براسي لازم اعرفه
ام شهاب ..
كتلك من اول ما اجت خليها بس تجيبللك ولد وبعدين منعتك تقرب عليها لأن عرفتها عوبة مو مال اطفال انوب نبتلي بيها وبولدها بس انت ميفيدك وياك صرت خفاش تجي بتالي الليل ، هي بعمرها ما شافت نظافة ولبس هو يوم واحد من اجوا هالضيوف ساعة السودة الي اجوا بيها وضاكت عينك عليها تعباليها صارت ملكة ، ودنت نفسك عليها هاي النتيجة ،اصلا من طلعت التحاليل وكالوا حامل ما تفاجئت لأن اعرف سوالفك واعرف شدا سوي بالليل وهاي نتيجة سوايتك تحملها ، القصة خاصة بصفحة وسام الفراجي
الطفل الي انتظرته سنين هاي الافندية ما تريده ،لذلك عمدةً اني ماردت ابلغها حامل اني شفت تحاليل من اول مرة تخربطت بيها وكتلهم فقر دم حتى متسوي شي للطفل ..
بس الظاهر عرفت نفسها وصارت تشرب مال اجهاض الي متخاف من الله تريد تموت الطفل الي يسواها ويسوة اهلها
(هي تحجي هالحجي كله واني متمددة مغمضة عيوني كل ظنها اني نايمة مريضة ما اسمع كشفت كل حجيها وخططها وكشفت اني حامل رغم جنت شاكة بنفسي بس من رحت كالت فقر دم واني ماعندي ذيج المعرفة بهالشي فسكتت .. وتالي هاي ضرة تروح تجهض الطفل بدون اي رحمة مع العلم اني ماريده ماريده .. هو اني عايشة مثل الاوادم حتى اجيبلهم طفل !!)
المهم الطفل ما انجهض والدكتورة كالت لحكتوا بآخر لحظة لو متأخرين 10 دقائق الطفل يموت !!
بصراحة مرة فرحت ومرة حزنت
فرحت لان هاي نفس ببطني شنو ذنبها
وحزنت لان حيصير ابن ذولي ميستاهلون ابد
ونطوني موعد بعد 10 ايام اجي احلل واشوف اثر هالشراب ع الطفل وكذلك يجيكون التحاليل ..
رجعت بالبيت والمغذي بيدي وشفت عدهم وجوه جديدة بس ما سألت احد ..
صعدت لغرفتي بالجذب محد كال الحمد لله ع السلامة يعني اني مو بشر ليش يعاملوني هيج
تمددت واسمع صياح ام شهاب
لببببااابة .. لج طرش يلبابة! كلت هااا لان رافعة المغذي ع باب الشباك ومتمددة جواه
اجت ضربت الباب وفتحت وصفكت ايديها وكالت
" انتِ من غير حبل تتنسين"
تدورين النوم من قبل انوب هسة مرضانة يا حبيبي كملت السبحة!!
كتلها يخلص هالمغذي وافلته واجيج
كالت .. يبووو مسكينة فقيرة شنو هالاخلاق ..
ضربتني راشدي بس اصبعها ضرب عيني بصراحة اذتني هواي وحسيت بعيني تغوش ومن باوعتلها لكيتها حمرة ..
القصة خاصة بصفحة وسام الفراجي
انزلي من الدرج ع سريع ما سمعت الا صياح ام شهاب وصوت وكعة يستار لزمت المغذي بيد وطلعت ع باب لكيتها متزحلكة من 4 درجة او باية من الدرج وواكعة ع ظهرها وكبل ع الكاع !!
يبو هبطت وانخرعت خرعة اني اخاف من هيج مناظر
راسها دينزف ..!
واني المغذي بيدي نزلت اركضلها
جان تطلع ضرتي تصيح اويلي هاي الفصلية دفعت عمتي من الدرج الحكوني .. الله لا يسامحها تبلي كلشي براسي..
وام شهاب هي الوكعة لا تحركت لا صاحت كبل ع حلكها واكعة ..
طلعوا العائلة كلها من ضمنها هذا الجديد جايهم ما اعرفه منو واكو هيج مثل الحرك فوك عينه ع طول لراسه هيج الجلد عبالك محروك
صاحلها ..
يمة يمة يمة اكعدي .. وام شهاب فاقدة ولا حرف .. يريد يشيلها ما كدر .. مباشرة حطيت المغذي بالكاع وشلعتها من ايدي .. وايدي صارت تنزف من مكان شد المغذي ..
شلتها من رجليها وهو من ايديها طلعناها للباب نزلها كال مكدر اطلع .. يمعود شنو مكدر قابل انت بنت طلعها حتموت كال لحظة مكدر اكلج ..
لبس شماغ لفه ع وجهه كله يلا طلع و شلناها للسيارة ومفتاح سيارة عند شهاب الي بسابع نومة ومكلوبة الدنيا
فات للبيت هذا الغريب
شهااب شهااب وينك لخاطر الله ..
..
هذا الولد الغريب يكمز ويصيح ع شهاب وين نايم يمعود امك بين الحياة والموت ..
شهاب ركض ع سيارة شغلها وطلع بيها ..
استغربت هذا الغريب ما راح وياه
رجعت ع مغذي ابجي ع ام شهاب شلون وكعت وشلته حتى اصعده لغرفتي ..
واني صاعدة .. هذا الولد الغريب صعد وياي ..
لفت ظهري وباوعتله وين تريد ومنو انت ؟
ضحك .. وكال مو مهم .. اصعدي ع غرفة كتله ما اصعد
صار يصعد وهو مبتسم .. صعد انوب .. ضرتي باوعتلها تشوفنا من الحديقة .. كتلها تعالي منو هذا ساعديني
ركضت ع باب وهو ركض وراي وهو صاعد لزمت مباشرة الباب وقفلته وهو ضربه ديلحك يلزمه قبل ما اقفله بس انقفل ..
القصة خاصة بصفحة وسام الفراجي
كالي افتحي الباب ..
ما رديت
افتحي الباب هو انتِ بلا اهل خايفة ليش ؟
خليني افوت واوعدج ما اكول لاحد
مارديت ..
صار يصيح افتحي الباب ويضربه .. افتحي اكلج
.. مارديت
يممممة ايدي ترجف هذا منو وليش الضرة ماتحركت ساعدتني .. شنو ديصير مدا افهم شي اكو شي ما اعرفه ..
ظليت قافلته وسانده الباب بظهري ..
حدما بزع وراح بس شنو اني ما امنت ظليت مستندة ع باب احس القفل مو امان
تقريبا فوك النص ساعة اجت ضرتي دكت الباب كتلها شتريدين كالت افتحي احجي وياج !!
اني ما امنت كلت خاف هذا وياها وتريدني افتح
كلت الها ما افتح وراحت
البيت صاروا يروحون لام شهاب يشوفون حالتها بس الضرة وهالزلمة الغريب ما طلعوا الباب
صارت الساعة 9 بالليل او اكثر ..
اجه شهاب يريد بطانيات ومخاد حتى يباتون بالمشفى ويا امهم
صعد عليه لكه الباب مقفول افتحي
يولي يبنت ال ***
فتحته طخني ع ايدي دفعني ع كاع ناس وين و انت قافلة الباب شعندج ماعندج احساس
كتله وهو ديدور ع هويته يكول خاف واكعة هنا بالغرفة .. اقفله لان هذا الزلم الي حاطينه ببيتكم دا يتحرش بية .. ضحك ب استهزاء
مد اصبعه من فوك ليجوة يكول
يتحرش بيج انتِ؟ تهي بهي لتحلمين
كتله شبيها امك شكالوا عنها كالت مدتحجي يكولون شبه جلطة وهسة مدا تكدر تحجي الا قليل هيج لسانها ثكيل حيل .. كتله اريد اروح وياك .. ليش ؟ اعتني بيها اغسللها اشربها اعتني بيها يعني ليش
كال اي والله ياريت بس مو تسويلها شي
ضحكت كتله شسويلها غير مريضة وطريحة فراش
رحت وياه بس شنو هذا الزلمة الغريب من طلعت ويا شهاب من الغرفة للسيارة واشوفه يباوع من الشباك ما نزل عينه .. بصراحة صارت عندي رجفة قوية من هالغريب اريد افتهم هذا شنو محد ديساعدني ..
وصلنا المشفى العائلة شافتني ويا شهاب فتحوا حلوكهم ليش جاية وشعدها .. القصة خاصة بوسام الفراجي
طبيت عليها ويا شهاب وشفتها كوة تسولف بس تباوع عليه مدري خايفة ما ادري ..
فجأة الغرفة فرغت شهاب راح يجيب اكل والباقي الي ملتهي بالموبايل والي ويا مرته و الي يسولف ..
باوعتلها تذكرت كل ضربة واهانة ورزالة وفشار سببتها اليه هاي ..
باوعتلها شلون خطيتي سوت بيها هيج واتذكر كل غلطها وهاي عيني لهسة حمرة بسبب ضربتها
دا افكر واني كاعد يمها وهي بس نفس وتحجي بس اغلب حجيها مينفهم
صارت تحجي وياي .. واني مو فاهمة شي
قربت عليها مافهمت ..
تقربت حيل .. ما ادري شدسولف مدا اجمع كلامها وخايفة احد يجي ويكطع سالفتها صار عندي فضول اعرف شتريد تسولف وهي بهيج وضعية
الي فهمته بعد معاناة وتهجي كالت
احجي الج سر وتسامحيني ..
شنو هذا السر راح نعرفه بالبارت 5
شنو تتوقعون من خلال قرائتكم للقصة يكون السر متعلق بشنو ؟
🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹
ادخلوا بسرعه حملوه وخلوه علي موبيلاتكم من هنا 👇👇👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺🌺🌺🌺