القائمة الرئيسية

الصفحات

الأخبار[LastPost]

رواية العنيد الجزء الأول الفصل الخامس والسادس والسابع



رواية العنيد الحزء الأول

 الفصل الخامس والسادس والسابع

ادهم مع تلامذته بيراقبهم وهما بيلفوا حوالين نفسهم وفي نفس الوقت دماغه شغاله وبيحل القضيه في دماغه بيخرج معاهم ويرجع معاهم متابع صامت بس مركز في كل حاجه 

خلصت المده بتاعتهم

ادهم: هاه وصلتوا لايه؟؟ هتقبضوا علي مين؟ ولا فين السلاح؟؟ ولا مين هيوزعه؟؟ 

مؤمن: السواح هو هيستلم السلاح ويوزعه بس هيستلمه امتي وازاي وفين منعرفش 

ادهم: وهتعرفوا امتي؟؟؟ بعد ما يبقي في الشوارع؟؟؟ كنت متأكد انكم لسه عيال مش هيعرفوا يعملوا حاجه بس قلت اديكم فرصه تعملوا اي حاجه لكن طلعت غلطان 

مصطفي: السواح معاه بنت ما بتفارقوش ولا ليل ولا نهار اسمها ريفانا 

ادهم: وما استعملتوهاش ليه؟ 

مصطفي مردش ولا مؤمن 

عماد: محدش عرف يوصلها البنت محصنه 

ادهم: م ايه؟ نعم يا اخويا؟ مفيش حاجه اسمها بنت محصنه؟؟ بس كل بنت وليها دخلتها 

مؤمن: كل واحد فينا جرب طريقه معينه ومحدش عرف حتي يلفت انتباهها 

ادهم: انتوا بتتكلموا بجد بقي مش بتهزروا؟؟؟ انتو معرفتوش تعلقوا بنت وتاخدوا المعلومات اللي عندها؟؟؟ 

وانا كنت متخيل انك هتحلوا القضيه كامله هههههههه وحته بنت معرفتوش تدخلولها..... يالا بينا 

هما ركبوا عربيه كبيره متفيمه مجهزه وهو ركب عربيته وقالهم يروحوا وراه 

نزل من العربيه وراحلهم: استنوني هنا عشر دقايق بالكتير 

مصطفي: ده بيتك هنا صح؟ ليه؟ 

ادهم: هاخد شاور واغير هدومي ولا هروح كده؟ ؟ الشكل ليه عامل اساسي جدا وحيوي مش هتأخر 

طلع ونزل فعلا وما اتأخرش... نزل في منتهي الشياكه وريحه برفانه جايبه اخر الشارع 

ادهم: هنطلع علي الكباريه يالا بينا 

سابهم وراح ناحيه عربيته وطلبته بصينله 

مؤمن: اذا كان انا راجل ومعجب بيه هو مش شايف نفسه شكله ايه ولا ايه؟ 

مصطفي: انا لو بنت كنت هعاكسه بنفسي 

كلهم بيضحكوا 

ادهم ركب عربيته وهما وراه لحد ما وصل الكباريه اللي ريفانا وماجد السواح بيسهروا فيه 

ادهم نزل وراح لرجالته: هلبس كاميرا ومايك علشان تشوفوا وتسمعوني مش محتاج اي حد فيكم يدخل لان ممكن يتعرف شكله وخصوصا لو شافوكم مع بعض.. انتو هتستنوا هنا تتفرجوا وتتعلموا وبس

دخل المكان وبص حواليه لحد ما شاف ريفانا بصلها من فوق لتحت وهيا لاحظت نظرته وتخيلت انه هيعجب بيها بس ادهم بصلها من فوق لتحت وتجاهلها وراح للبار قعد عليه وطنشها تماما 

مصطفي: ده طنشها خالص 

عماد: الممنوع مرغوب ممكن علشان معبرهاش تروحله 

مؤمن: مش كده وبس الطريقه اللي بصلها بيها مستفزه وكأنه بيقولها ايه ده؟ شايفه نفسك علي ايه؟ 

رجعوا يتابعوا ادهم تاني والبنت بتحاول تلفت انتباهه بانها تروح جنبه او تلزق فيه او تعمل اي حاجه وادهم ولا معبرها 

ريفانا: انت متعمد تتجاهلني ولا ايه؟ 

ادهم: انا اعرفك؟؟؟ 

ريفانا: لأ بس معنديش مشكله نتعرف 

ادهم بيفكر وبيبصلها عادي جدا 

ريفانا: ايه ده انت بتفكر؟؟؟ 

ادهم: وايه الغريب اني افكر ما بحبش احكم بالظاهر او الشكل وما بتعجبنيش البنت اللي تعتمد علي جمالها 

ريفانا: امال ايه اللي بيعجبك؟؟ 

ادهم: ده ( شاور علي عقلها) بتشدني البنت الذكيه 

ريفانا بتقرب منه وبتهمس 

ريفانا: طيب مش يمكن اطلع ذكيه ما تحكمش بالظاهر زي ما بتقول... ايه رأيك لو نرقص؟؟ 

ادهم: انتي اكيد قاعده مع حد وانا مبحبش اخد حاجه حد 

ريفانا: اللي بقعد معاه مجاش النهارده ده غير اني بتاعت نفسي مش بتاعت حد 

ادهم: لو كده يبقي يالا بينا 

رقصوا كتير وادهم بيرقص معاها وبيجننها في نفس الوقت... بيعشمها وما يطولهاش... بيقرب ويبعد... يقرب جدا من شفايفها وتستعد انه يبوسها وتلاقيه مره واحده بعد عنها 

لحد ما هيا استوت علي الاخر ووقفت 

ريفانا: شقتي قريبه من هنا لو معندكش مانع؟ 

ادهم: واللي كان المفروض يسهر معاكي مش هيعترض؟؟ 

ريفانا: ما انا قلتلك انا بتاعت نفسي 

ادهم: يالا 

ادهم اخدها ومشي وهو خارج بص لرجالته ورمي الكاميرا والمايك بحيث يشوفوهم 

مصطفي: ابن المحظوظه 

مؤمن: دي بيضاله في القفص يا ابني انت وهو 

عماد: البت ما اخدتش في ايده غلوه 

هشام: ده شغل علي فكره مش بجد؟ يعني بتحسدوه علي ايه مش فاهم انا؟؟؟ 

خالد: علي فكره بقي ده كده حرام اتقوا الله 

مصطفي: شيخ خالد مش ناقصاك خالص المهم نروح احنا المكتب نكمل شغل ونستني تليفون منه ولا نروح 

خالد: انا هروح مراتي هتموتني بقالي يومين ما دخلتش البيت 

هشام: طيب روح انت واحنا هنستني تليفون من المقدم وهنبلغك لو في جديد 

استنوا وبعد تلات ساعات ادهم جه المكتب ولقاهم مستنين x

دخل وخالع جاكته وحطها علي ظهره وابتسم اول ما شافهم زي الكلاب الصغيره 

ادهم: انتو لسه هنا؟؟ 

مؤمن: كنا عايزين نطمن علي حضرتك بس 

ادهم: اه تطمنوا عليا وماله؟؟ المهم الصفقه هتم بكره بالليل الساعه 2 في الصحراوي عند الكيلو 11 طريق مصر اسكندريه 

والسواح بنفسه هيكون هناك واحنا برضه هنكون هناك بس من بعيد لحد ما نتأكد ان الصفقه فعلا بتتم هنهجم فهمتوا؟؟ 

مصطفي: انت عرفت تقررها ازاي؟ يعني اكيد مسألتهاش كده؟ قولتلها ايه؟ وطبعا انا مش قصدي اتطفل نهائي 

ادهم: انا مقولتلهاش اي حاجه انا حسستها انها محتاجه تتكلم ومحتاجه حد يسمعها ويقدرها وكنت انا الحد ده... خلتها تكره واقعها وتشتكيه ليا وخلتها تحس ان انا حد تثق فيه وتقولي ادق اسرارها وبس 

مصطفي: وده ازاي بقي؟ ازاي تخلي واحده تثق فيك؟؟؟ 

ادهم: بانك تكون حد يعتمد عليه من الكل وحد الكل بيثق فيه وساعتها شكلك نفسه هيوحي بالثقه ده مع حاجات تانيه بتكتسبها بالخبره والممارسه... هتتعود ما تقلقش... روحو ارتاحوا لان بكره هندرب علي اللي هيحصل بالليل ما تجوش بدري تعالو علي 12 كده 

روحوا وادهم روح ونام علي طول واستغرب هو ازاي روح وازاي نام 

مصطفي راح بيته كانت ليلي صاحيه مستنياه حطلته العشا وهو بياكل عمال يحكلها من غير ما يوقف عن مهمته الجديده وهيا مشركاه حماسه لحد ما وصل لادهم 

مصطفي: بس يا ستي راح ادهم فضل يتريق علينا اننا معرفناش نعلقها وهو راح لبس واتشيك واتبرفن وكان ايه ولعه... وخلال نص ساعه كان مطبق البت وواخدها تحت دراعه وراحوا علي شقتها ورجع من عندها بعد يجي 3 ساعات كده وهو مبسوط وعنده تفاصيل القضيه كلها 

مصطفي بيحكي والنار بتولع في ليلي... نار غيره مش عارفه ايه مصدرها ومش عارفه ليه بتغير عليه اصلا 

دخلت اوضتها وقفلت علي نفسها وطلعت تيشرته تفتكر ريحته وتشبع منها وفجأه مسكت موبيلها

عند ادهم كان نايم وتليفونه رن وهو مش متعود حد يكلمه متأخر الا لو في حاجه 

لقي رقم غريب ورد: ايوه مين؟ 

محدش رد عليه بس سامع انفاس حد 

ادهم: الحكايه مش طالبه استظراف عايز انام 

## نمت معاها صح؟ 

الصوت مش غريب عليه حاسس انه عارفه وحافظه كمان... الاسلوب نفسه... طريقه السؤال 

ادهم: مين بيتكلم؟؟؟ 

بيسأل وهو عارف كويس هيا مين 

## رد علي السؤال نمت معاها ولا لأ؟؟؟

ادهم: ويهمك في ايه اجابه السؤال... ما سبق وقولتلك لو عايزه معنديش مانع؟؟؟ ولا انتي ابعد من نجوم السما 

ليلي فهمت انه عرف هيا مين وكانت هتقفل بس هو اتكلم 

ادهم: علي العموم علشان اريحك اه نمت معاها واستمتعت جدا معاها عندك اسئله تانيه؟ 

ليلي قفلت السكه بتعيط وهو عارف انها بتعيط ومستغرب ليه بيحب يجرحها ويبعدها ؟ ليه مقلهاش اي اجابه تريحها؟؟ ليه عايزها ديما بعيد عنه؟؟؟ 

المهم جه وقت الهجوم وتوقيف صفقه السلاح والكل متمركز في مكانه 

ادهم ورجالته... الامن اللي معاهم... العصابتين اللي هيسلموا واللي هيستلمو والكل مستني لحظه الصفر.... 

ادهم والقائد بتاعه موجود وبيدي امر بالهجوم 

ادهم: لأ استنوا محدش يتحرك من مكانه استنوا شويه 

القائد: يستنوا ليه؟ 

ادهم: لان في حاجه مش صح 

القائد: ايه اللي مش صح؟ الناس قدامك وعلب الاسلحه اهي نستني ايه؟ لما ياخدوها ويروحوا؟؟؟ 

ادهم: في حاجه مش مظبوطه.... وانت قولت بنفسك اهو العصابتين موجودين والاسلحه موجوده يبقي مستنين ايه؟ 

القائد: قصدك ايه؟ 

ادهم: قصدي هما مستنين ايه؟ ولا هما عارفين ان احنا موجودين ومستنينا؟؟؟ 

القائد: وهنستني قد ايه؟ 

ادهم: معرفش لو حضرتك وراك حاجه ممكن تتفضل انا موجود!!! 

القائد: انا مواريش..... 

ظابط: يا باشا بدؤا يسلموا صناديق الاسلحه 

ادهم مسك المنظار وبيشوف ايه اللي بيحصل 

القائد: اتحركوا اهجموا 

وفعلا هيبدؤا يتحركوا 

ادهم: لأ كل واحد يقف مكانه محدش يتحرك... دي مجرد لعبه ده فخ لينا احنا 

القائد: انت بتهرج ولا ايه؟ بيسلموا الاسلحه قدامك اهوه 

ادهم ناوله المنظار: اتفضل وقولي حضرتك شايف ايه؟ 

القائد بعد نظره طويله: شايفهم اهو بيسلموا الاسلحه وهيخلصوا ويمشوا ويمدوا لسانهم لينا 

ادهم: طالما حضرتك مش شايف حاجه يبقي لو سمحت سيب اللي شايف ياخد القرار 

القائد: وهو سيادتك شايف ايه انا مش شايفه؟؟؟ 

ادهم: لا انا شايف كتير قوي.... شايف عمليه تسليم بتتم فيها لكاعه مشفتهاش قبل كده.... شايف واحد بيتلفت حواليه وكأنه مستنينا وفعلا عايز يمدلنا لسانه... شايف صناديق المفروض انها صناديق اسلحه بس الرجاله شايلينها وكأنها ورق مفيهاش اي ثقل،...


ادهم مسك رشاش من ايد واحد من العساكر وحدفه للقائد 

ادهم: وزنه ايه في ايدك؟؟؟ تخيل لو ميه منه في صندوق هتشيلهم ازاي؟؟؟ علي الاقل لازم اتنين رجاله يشيلوا الصندوق قصاد بعض 

القائد: كل اللي بتقوله ده ولا يدخل دماغي حتي... يمكن السواح بيحب يتلفت حواليه كتير... يمكن هو راجل لكعي وبياخد وقته... يمكن رجالته اقويا وكل واحد يشيل صندوق بسهوله انا مش هضيعهم من ايدي علشان يمكن دي؟ 

ادهم: وانا مش ههجم برجالتي علي اساس يمكن دي برضه 

القائد: يعني ايه؟ 

ادهم: يعني مش ههجم 

القائد: وانا بأمرك انك تهجم 

ادهم: اسف في المهمات الخارجيه اللي زي دي انا خبرتي اكبر من خبرتك بكتير فرأيي انا اللي صح وبعدين مش هضيع مجهود رجالتي واطلع العمليه فشنك 

مؤمن: ماهو هنقبض عليهم 

ادهم: بتهمه ايه؟ سهرانين في الصحرا ولا محملين صناديق؟؟ هنقبض عليهم وهيخرجوا خلال ساعه ونبقي احنا خسرنا وهيأجل الصفقه او يلغيها خالص او يخلي غيره يقوم بيها لكن لو هو اتطمن ان محدش مراقبه هيقلل حذره وساعتها نقبض عليه باسلحته 

القائد: بقولك ايه اتحرك انت ورجالتك اقبض عليهم 

ادهم: اسف... مصطفي انت ومؤمن شايفين ايه؟ ايه رأيكم دي في الاول وفي الاخر مهمتكم 

مصطفي: فعلا هو بيتلكع بطريقه مريبه وكأنه فعلا مستنينا ده غير ان الصناديق فعلا شكلها خفيف... احنا نراقبهم اكتر

ادهم: حضرتك سمعت بنفسك 

القائد: انت هتمشي وري كلام شويه عيال وتقولي مش هضيع مجهودهم 

ادهم: دول مش شويه عيال دول ظباط تعبوا واتخرجوا واتعينوا واتدربوا علشان يقدروا ياخدوا قرار زي ده وبعدين دول رجالتي مش عيال نهائي 

القائد: انت وهو المقدم ادهم موقوف عن شغله اتحركوا اهجموا 

الكل واقف مكانه ساكت 

القائد: قولت اتحركوا 

ادهم: حضرتك قعدتك علي المكتب نسيتك ان العساكر والضباط رئيسهم هو اللي بينزل معاهم هو ده اللي يدينوله بالولاء مش اللي قاعد علي مكتب نهائي... وبعدين دول شويه عيال عايزهم يسمعوا الكلام ازاي؟ مفيش عيال بتسمع الكلام 

عماد: سياده المقدم بص حضرتك 

عطاله المنظار وادهم بص وابتسم 

ادهم: اتفضل حضرتك شوف بنفسك 

القائد: ايه ده؟ دي مجرد بنت مربطه وهيفكوها اهو 

ادهم: دي مش مجرد بنت.. دي البنت اللي بلغتنا بمعاد الصفقه اتكشفت يبقوا هما كانوا مستنينا اعتقد كده اتاكدت ولا ايه؟ 

القائد سابهم وركب عربيته ومشي 

مؤمن: هنعمل ايه؟ 

ادهم: حاليا ولا حاجه بس حد فيكم هيراقبهم وهنحاول نخرج ريفانا من وسطهم لاني اعتقد انه اول ما الصفقه تخلص هيقتلوها 

مصطفي: ما يقتلوها 

ادهم: وانت كظابط وظيفتك ايه؟ ولا عادي الناس تتقتل قدامك كده؟ مش انت اللي تحدد مين يستاهل ننقذه ومين لأ مفهوم؟؟ يالا روحو وشوفو مين هيراقبهم وفي اي وقت تحس انهم هيقتلوها تتدخلوا


ادهم روح بيته وتلامذته روحو ماعدا عماد ومؤمن كملوا مراقبه 

مصطفي اول ما روح كالعاده بيصطاد اخته ويقدملها تقرير مفصل 

حكالها الخناقه بين ادهم والقائد وان ادهم مشي كلامه علي الكل وليلي ابتسمت لانها عارفه ان شخصيته قويه زي ما هيا متخيلاها 

واتضايقت جدا لما عرفت انه خلاهم يراقبوهم علشان ريفانا 

ادهم سهران في بيته لا له مزاج يخرج يسهر ولا له مزاج يشرب قاعد كده وبس

تليفونه رن واول ما شاف الرقم اتردد يرد ولا لأ بس في الاخر رد 

ادهم: افندم 

ليلي: للدرجه دي تهمك فحطيت حراسه عليها؟ ؟ ؟ 

ادهم: لو كان كلب اعرفه كنت هحط عليه حراسه مش بني ادم وبعدين انتي مالك؟ شاغله نفسك ليه؟ 

ليلي: وانا اشغل نفسي ليه انا؟؟ تطلع مين انت علشان اشغل نفسي بيك؟؟؟ ده فضول مش اكتر

ادهم: طيب ياريت تحتفظي بفضولك ده 

قفلت السكه وهو قام بعدها ينام واستغرب هو معقوله كان مستني تليفونها علشان ينام؟؟؟ 

الصبح استدعوه في شغله وراح لمدير المخابرات وهو داخل كان القائد بتاعه خارج 

المدير: اتفضل يا ادهم 

ادهم: افندم 

المدير: بلغني انك اتخانقت مع القائد بتاعك وكسرت كلامه وعصيت الاوامر؟؟؟، 

ادهم: انا ما نفذتش اوامره اه بس لا اتخانقت ولا هنت 

المدير: المفروض تنفذ الاوامر مهما كانت 

ادهم: انفذها لو صح حتي لو هتكلفني حياتي لكن تبقي غلط وهنخسر فيها يبقي اسف 

المدير: يعني ايه اسف؟؟؟ نشتم القائد بتاعنا ونعمل اللي يناسبنا وطظ في الباقي؟؟ 

ادهم: انا ما قولتش كده بس انا لو كنت هجمت كنت هخسر والصفقه كانت هتم بس من ورانا لكن دلوقتي هما ادونا الامان وساعتها هنقبض عليهم متلبسين 

وبعدين انا شرحتله وجهه نظري لكن هو رفض 

المدير _:ما يمكن له وجهه نظر؟؟ 

ادهم: ده واحد قاعد علي مكتب ماله ومال المهمات الميدانيه؟؟؟ وجهه نظر معدومه وملهاش قيمه وهو اللي مقتنعش بالمنطق 

المدير: خلاص اللي حصل حصل المهم دلوقتي تروح تعتذرله؟؟؟ 

ادهم: نعم؟؟ اعتذرله؟؟ انا؟؟ 

المدير: ايوه تعتذرله 

ادهم: لا طبعا لا يمكن


 

المدير: ولو قلتلك ده امر نفذ؟؟؟ 

ادهم: هقولك اسف... انا مش هعتذر علي خطوه صح اخدتها ومش هعتذر لانسان عايز يمشي رايه علي حساب اي حاجه المهم ان رايه يمشي وبس 

المدير: ادهم انت لازم تعتذر 

ادهم: اسف ولو هتصر هقدم لحضرتك استقالتي 

المدير: انت بتهددني ولا ايه؟ 

ادهم: مش بهدد انا بقولك اللي هيحصل... انا بعتذر لو غلطت ومن غير ما حد يطلب مني لكن اعتذر علي حاجه مغلطتش فيها لا بالعكس ؟؟؟؟ اعتذر علشان خاطر واحد شايف ان كبرياؤه اهم من المهمه اللي بيشتغل فيها واهم من امن البلد؟؟؟ ده اللي انت عايزني اعمله واعلمه لرجالتي؟ انهم ينفذوا الاوامر ويرددوا زي البغبغوات وخلاص ويلغوا عقلهم؟؟ لو ده المطلوب مني يبقي اسف انا مستقيل... حدد سيادتك عايز ايه وانا تحت امرك... عايزني اعتذر ولا اكمل شغلي ؟؟؟ 

ادهم خرج والكل مترقب ومستني ادهم هيعتذر ولا لأ؟؟ 

حتي تلامذته عايزين يسألوه بس معندهمش الجرأه اخيرا مصطفي قرر يسأله 

مصطفي: هشام وخالد حاليا بيراقبوا ريفانا وعماد ومؤمن روحوا يرتاحوا شويه 

ادهم: اوك كويس ومفيش اي جديد؟؟؟ 

مصطفي: لا لسه؟؟ 

ادهم: والدك اخباره ايه والدكتوره؟؟ 

مصطفي: الحمدلله كويسين.... 

ادهم: اختك دي تؤامك صح؟ علي كده انتو قريبين من بعض و لا زي اي اتنين عادي؟؟ 

مصطفي: انا وهيا ما بنفارقش بعض عاملين زي الحبيبه كده مش مجرد اخوات معرفش استغني عنها وهيا كمان وعلي الرغم من كده ما بنبطلش خناق نهائي 

ادهم: وطبعا كل اخبار الشغل ومهماتك واسرار الشغل اختك عارفاها؟؟؟ 

مصطفي ارتبك: لا لا مش كله... بس الحاجات العاديه اللي ينفع اي حد يعرفها 

ادهم: وهو مرواحي مع ريفانا كان عادي؟؟ ولا تعيني حراسه عليها كان عادي؟؟؟ 

مصطفي: أ. أ أأ وحضرتك عرفت منين؟؟ 

ادهم: وهو ده المهم عرفت منين ولا انه كلامي صح انك بتقولها كل حاجه؟؟ انا معرفتش انا بس كنت بشوف ايه اللي قلته وايه لأ؟ والظاهر ان كل خطوه اختك بتبقي عارفاها؟؟؟ 

مصطفي: أ. أ

ادهم: ما تأوأوش... علاقتك باختك شيئ جميل بس خليها بره الشغل لو سمحت يا 

مصطفي: من غير يا 

ادهم: شوف وراك ايه؟ 

مصطفي خرج وبيتشهد وزمايله قابلوه وبيسألوه عرف ايه؟ 

مصطفي: سيبوني في حالي ده عصرني جوه... هو في حد عاقل يدخله برجليه؟؟ قال اوقعه في الكلام قال؟؟ ده فتحلي تحقيق جوه انا مسألتوش سؤال واحد 

عدي من جنبهم اكرم 

اكرم: انتو واقفين كده ليه ما كل واحد يروح شغله


اكرم دخل لادهم 

اكرم: عامل ايه انت في العيال؟؟ 

ادهم: انا معملتش حاجه 

اكرم: امال الواد اللي خرج من عندك ده معصور كده ليه؟ 

ادهم: ههههههه هو كان فاكر نفسه هيدخل يعرف اخبار من عندي بيستهبل ده ولا ايه؟ 

اكرم: المهم هتعتذر ولا؟؟ 

ادهم: اعتذر علي ايه؟ 

اكرم: انت مسحت بكرامه الراجل الارض 

ادهم: لا طبعا ده اضافات العيال ان بس رفضت اهجم ودقايق والامور وضحت ولو كنت هجمت كنت هخسر القضيه كلها 

اكرم: وطبعا دي كانت هتبقي سابقه لادهم 

ادهم: مش حكايه سابقه حكايه اني اخسر ليه طالما بايدي ان امنع صفقه زي دي تتم؟؟؟ هو المفروض يجي يعتذر علي اصراره علي الغلط مش انا 

بالليل راح لتلامذته اللي بيراقبوا ريفانا كلهم كانوا متجمعين 

ادهم: انا لازم ادخلها لازم اعرف الصفقه هتم امتي؟ 

مصطفي: وهتدخل ازاي؟ في حراسه

ادهم بصله من فوق لتحت وسكت 

ادهم: يعني لما بسمعكم بنسي انكم ظباط اصلا ولا انتو منظر علي الفاضي 

ادهم سابهم واتحرك يدخل الفيلا اللي عليها حراسه 

ماشي وايديه في جيبوبه وبص يمين وشمال وعدي الشارع واخر حته قبل الرصيف جري ونط كان فوق السور واتطمن ان محدش شايفه نزل ووصل لتحت البلكونه وخلال ثواني كان جوه البلكونه 

ورجالته بره مش مصدقين انه من اقل من دقيفه كان واقف معاهم


اتأكد ادهم ان محدش جوه الاوضه وخبط عليها وفتحتله واول ما شافته رمت نفسها في حضنه 

مؤمن: الله يسهله 

مصطفي: البنات بتترمي تحت رجليه 

ادهم دخل لريفانا 

ريفانا: انت ظابط صح؟ وارجوك ما تضحكش عليا 

ادهم: ايوه ومش هضحك عليكي انا فعلا ظابط 

ريفانا: وليه ما قبضتش عليهم في المعاد اللي قولتلك عليه 

ادهم: وهو كان في تسليم بجد؟ انا شكيت لما شفتك انه مجرد كمين 

ريفانا: لو كنت هجمت كانوا هيقتلوني لانهم شكوا فيا وعرفوا اني كنت بايته مع حد غريب 

ادهم: بس معرفوش ان الحد ده ضابط مجرد شك وانا نفيته اهوه وعليكي حراسه بره لو اي وقت حسوا ان في خطر عليكي هيتدخلوا


ريفانا: بتعمل كده ليه واهمك في ايه يقتلوني ولا لأ؟ 

ادهم: عمري ما اتخليت عن حد او حد احتاج مساعدتي واتأخرت انتي في حمايتي ولو تحبي اخرجك من هنا هخرجك حالا 

ريفانا: في مقابل اني اديك معلومات الصفقه؟؟؟ 

ادهم: في مقابل انك تعملي الصح؟؟؟ التليفون ده معاكي اهوه صامت خبيه واول ما تعرفي حاجه بلغيني 

ريفانا: انت ليه واثق اني هبلغك؟؟؟ 

ادهم: لانك ذكيه مش مجرد وجه جميل ولانك هتعملي الصح وعايزه تعيشي صح ده اللي عرفته منك وانتي سكرانه انتي محتاجه تعيشي حياه تانيه ملك نفسك مش ملك حد وانا بعرض عليكي ده واعتقد انك ذكيه كفايه تعملي الاصح ليكي... مستني منك اي اخبار 

ادهم خرج زي ما دخل 

مصطفي: وبعدين؟ انت متخيل انها فعلا هتبلغك؟؟ انت بتحلم 

ادهم بصله 

مصطفي: سوري مش قصدي 

ادهم: هتتصل وحاليا هنستني انا هروح البيت محتاج اريح شويه وانتو هتفضلو هنا لو في جديد بلغوني 

ادهم روح واخد شاور وقاعد زهقان بيدخن تليفونه رن 

اول ما شاف الرقم ابتسم 

ادهم: معترضه علي ايه النهارده؟ 

ليلي: ثقتك زياده عن اللزوم في انسانه متستاهلش... واحده مستعده تبيع نفسها وهيا اصلا بايعه نفسها تثق فيها ازاي؟؟؟ 

ادهم: بنفس الطريقه اللي انتي وثقتي بيها في انسان سكري وخمرجي ودخلتي بيته دي زي دي 

ليلي: وانت مين قالك اني بثق فيك انت مش اهل للثقه نهائي 

ادهم: ولما انا مش اهل للثقه وانتي ما بتثقيش فيا بتكلميني كل شويه ليه؟ شاغلك نفسك بيا ليه؟ طلعيني من دماغك شويه 

ليلي: اطلعك من دماغي؟؟؟؟ هو انت مين انت علشان ادخلك دماغي اصلا؟؟؟ انا بس حبيت اقولك انك غبي النهارده وانك هتخسر مهمتك بسبب ثقتك في البنت دي 

ادهم: اممم طيب برضه ما تشغليش بالك لان شغلي بقي انا الوحيد اللي بثق فيه وما بسمعش لاراء حد تاني غيري فهمتي؟؟ 

ليلي: انت حر انا غلطانه 

قفلت السكه وادهم مستمتع بمناغشتها واستغرب امتي مصطفي لحق يكلمها ويحكيلها كل اللي حصل 

ادهم تليفونه رن تاني بس المره دي انتبه 

ادهم: ايوه 

ريفانا: النهارده في نفس المكان ونفس التوقيت... انا هكون معاهم واعتقد انه هيقتلني بعد ما يستلم وانا مش عايزه اموت 

ادهم: ما تخافيش 

ادهم اتحرك وجمع رجالته واتجهزوا كلهم 

وقفوا في نفس المكان يراقبوا 

القائد بتاع ادهم والمدير بنفسه كمان راحو يتابعوا 

القائد: سياده المقدم المبجل هيحدد امتي نهجم ولا ايه؟ 

ادهم: لما يبدؤا يسلموا 

القائد: وحبيبه قلبك المتربطه دي مش هتلغي علشانها؟؟ 

ادهم: أولا دي مش حبيبه قلبي لاني مبحبش حد وثانيا هيا متربطه لانهم ناويين يقتلوها بعد التسليم 

ادهم عطي للقائد المنظار 

ادهم: اتفضل حضرتك شوف صناديق الاسلحه شيلينها ازاي المره دي 

كان كل صندوق شايله اتنين قصاد بعض بالعافيه وبيحملوه العربيه واتنين بياخدوا منهم 

ادهم عطي اشاره للكل يهجم وفعلا طبقوا عليهم من كل ناحيه 

المدير للقائد: ادهم ظابط له وضعه وما عملش اسمه من فراغ وما بيخطيش خطوه غير وهو متأكد منها 

القائد: يعني يهزقني واسكت،؟؟؟ 

المدير: هو قال ما هزقكش وادهم ما بيغيرش في كلامه او افعاله ابدا لانه ولا بيهمه حد ولا بيخاف من حد... هو رفض تنفيذ امر كان هيخسرهم وده يخليك انت اللي المفروض تعتذر ان رايك كان غلط 

القائد: انت كمان عايزني اعتذرله؟؟؟ 

المدير: انا بقول اللي المفروض يتم المهم يالا نشوف اللي اتقبض عليهم ونتابع تحريز الاسلحه يالا 

ادهم قبض علي الكل وفك ريفانا 

ادهم: انتي حاليا بقيتي حره وحياتك قدامك 

السواح كان وراهم واقف وسط رجالته المقبوض عليهم 

كانوا لسه بيكلبشوهم واحد واحد وبيفتشوهم 

فجأه السواح طلع مسدس مخبيه في رجله وضرب رصاصه ناحيه ادهم وريفانا 

والرصاصه صابت هدفها بالظبط وسط صرخات ذهول من الكل 

الظباط انقضوا عليه وكتفوه بس بعد ايه؟

🌺🌹🌺🌹🌺🌹🌺🌹🌺🌹🌺

الفصل السادس

في المستشفي الكل بيجري وحاله طوارئ اتعملت 

ادهم داخل شايل ريفانا بين ايديه والدكاتره كانوا في انتظاره اخدوها منه 

ليلي كانت من ضمن الفريق ده واتقابلت عنيهم في نظره طويله مع ادهم اللي هدومه كلها دم 

نظره خوف وقلق شافتها في عنيه واستغربت للدرجه دي هيا مهمه بالنسباله 

رجالته جم وراه ووقفوا معاه في صمت محدش عنده المقدره انه يفتح بوقه او يتكلم 

ليلي خرجت تبلغهم الاخبار وادهم اول ما شافها راح ناحيتها بلهفه 

ليلي: للدرجه دي خايف عليها؟  كنت فاكراك ما بتهتمش بحد 

كانت بتتكلم بتريقه 

ادهم: انا مش فايقلك نهائي دلوقتي حالتها ايه انطقي؟؟ 

ليلي: هتعيش ما تخافش طمن قلبك 

ادهم: مالكيش دعوه بقلبي 

ادهم سابها ومشي وهيا راحت لاخوها وطمنتهم عليها 

ليلي: هو ليه مهتم بيها قوي كده؟  هيا حبيبته؟؟؟ 

مؤمن: لا ادهم مش بتاع حب بس يمكن علشان فدته بنفسها 

ليلي: يعني ايه؟  قصدك ايه؟  

مصطفي: ادهم كان مدي ظهره للسواح واحنا كنا يدوب بنكلبش فيهم راح مطلع مسدس وكان هيقتل ادهم لولا ريفانا لمحته ووقفت قدامه فالرصاصه جت فيها هيا ووقعت بين ايديه علشان كده شالها وجري بيها علي هنا....  هو ما بيحبش حد يموت بسببه ما بالك بقي يفاديه بروحه 

ليلي بصت لادهم بطريقه تانيه...  شبه راحه جواها ان خوفه عليها تأنيب واحساس بالذنب مش حب!! او ده اللي هيا عايزه تفكر فيه؟  

ادهم بعد العمليات روح بيته غير هدومه وارتاح ورجع المستشفي تاني 

دخلها اوضتها وفضل جنبها 

ليلي دخلتله: هو انت هتفضل جنبها علي طول؟؟ 

ادهم: وده مضايقك في ايه؟  

ليلي: لا طبعا انت حر بس انت هتتعب 

ادهم: برضه ده يضايقك في ايه؟  

ليلي: انا مجرد بتكلم مش اكتر 

ادهم وقف وبصلها: وانا مش عايز اتكلم ولا مالاحظتيش ده؟  

ليلي بصتله من فوق لتحت ومشيت وبعد ما مشيت دمعه نزلت من عينها 

ادهم اتخنق من نفسه ومن طريقه كلامه معاها...  ليه بيعاقبها علي ذنب مش ذنبها؟؟؟  ليه بيبعدها علي طول كده؟؟؟ 

يومين وادهم تقريبا موجود علي طول...  بيروح ساعتين تلاته شغله ويرجعلها تاني وليلي بتبعد تماما عنه وادهم كان فاكر نفسه هيرتاح من بعدها بس اتضايق واتمني لو تيجي تضايقه تاني 

كل رجاله ادهم جم يزوروها قبل ما تخرج 

وبعد ما خرجوا من عندها 

مصطفي: بس انت ايه اللي خلاك وثقت فيها 

ادهم: دي نظره للامور ومع الوقت هتفهم امتي تثق وامتي لأ 

مؤمن: طيب وايه اللي خلاك تثق ان السواح هيقولها؟؟  

ادهم: اللي اتعود علي حاجه بيبقي صعب يغيرها بسهوله وهو اتعود يحكيلها كل حاجه (بص لمصطفي)  اللي فيه داء ما بيبطلوش 

مصطفي فهم انه بيلقح عليه وبص للارض 

مشيوا وهو دخل لريفانا 

ريفانا: انا متشكره يا ادهم علي وقفتك معايا دي 

ادهم: هو مين المفروض يشكر مين بس؟؟؟  انتي ليه عملتي كده؟  ليه خاطرتي بحياتك علشاني؟؟؟ 

ريفانا: لان انت الوحيد اللي حسستني انا بني ادمه وبتحس!!!  لان انت الوحيد اللي اديتني حريه الاختيار وقولتلي اختاري،!!!

لانك الوحيد اللي شوفتي انا.. ما شوفتش شكلي او جسمي!!  وفوق كل ده لاني بحبك قوي 

ادهم: انا عملت الصح وبس.... 

ريفانا: يعني ما ردتش؟؟ 

ادهم: ارد علي ايه بالظبط؟؟؟ 

ريفانا: علي كلمه بحبك 

ادهم: شوفي يا ريفانا انا انسان بعيد تماما عن الحب وعمري ما فكرت ابدا احب ولا عمري هفكر احب...  فشيلني خالص من دماغك وبعدين اللي انتي حاساه ناحيتي ده مش حب 

ريفانا: امال ايه؟ لا انا متاكده ان   ده حب 

ادهم: الحب علشان يكون لازم يكون متبادل بين اتنين يراعوه فيكبر وينمو لكن اللي انتي حساه ناحيتي ده اعجاب انبهار اي حاجه من المسميات دي وزي ما انتي قولتي انا اول واحد احسسك بحاجات كتير وعلشان كده انتي متهيألك انك بتحبيني لكن الحقيقه لأ...  انتي اللي بتجبري اللي قدامك يا اما يحترمك يا اما يملكك ويتحكم فيكي...  انتي اللي بتحددي 

فياريت من هنا ورايح تختاري الانسان اللي يحترمك ويقدرك وما تسمحيش لحد يتملكك فاهمه؟  لكن انا مفيش رجا مني نهائي 

ريفانا: بس اللي حصل بينا مالوش معني بالنسبالك؟؟؟ 

ادهم: وهو ايه اللي حصل بينا؟؟؟ 

ريفانا: انت نمت معايا 

ادهم: انتي فاكره ان انا نمت معاكي؟؟؟  فاكره اي حاجه حصلت بينا؟؟؟  انت سكرتي وشربتي كتير وانا اقنعتك اني نمت معاكي زي ما تقولي كده برمجت عقلك الباطني لكن الحقيقه انا مالمستش شعره واحده منك؟؟؟ 

ريفانا: وليه ما استغلتش الظروف؟؟  ايه ما بتنمش مع بنات نهائي؟؟؟ 

ادهم: هههه لا مش كده؟؟؟  بس الحكايه اني عرفتك علي نفسي وكأني راجل عادي اتعرف عليكي في بار والحقيقه كانت غير كده... "كنت بنتحل شخصيه غير شخصيتي فلو نمت معاكي دي كده تبقي نوع من انواع الخيانه لاني بضحك عليكي وانا ما بحبش الخيانه...  وانا اسف حاليا اني ضحكت عليكي بس كان لازم 

ريفانا: ممكن اطلب منك طلب؟؟ 

ادهم: اتفضلي 

ريفانا : ممكن تبوسني بحيث تبقي ذكري حلوه؟؟؟ 

ادهم: انا اسف انا عمري ما بوست واحده قبل كده!!!  

ريفانا: بس انت لسه قايل انك نمت مع بنات قبل كده؟  

ادهم: بنات كتير جدا كمان 

ريفانا: امال ايه؟  

ادهم: اشرحهالك ازاي؟  البوسه بالنسبالي دي رمز للحب وانا ما حبتش قبل كده فامش هبوس واحده الا اذا كنت بحبها...  اما البنات اللي عرفتهم قبل كده فدول كانوا لمتعه جسديه مش اكتر والمتعه الجسديه ما بتشترطش اني ابوسها فانا احتفظت بالحاجه دي ليا انا فهماني؟؟؟ 

ريفانا: احتفظت بيها للي تحبها 

ادهم: ده اذا حبيت اصلا او فكرت اني احب 

ريفانا: الحب ما بيستأذنش قبل ما يدخل 

ادهم: اهي مستوره معايا لحد دلوقتي 

ريفانا: طيب هطلب تاني اخف 

ادهم: اه اتفضلي 

ريفانا: تاخدني في حضنك بس حتي لو هتعتبرني اخت ليك؟؟

ادهم: واكتر كمان من اخت 

ادهم ضمها في حضنه وهيا كانت ماسكه فيه جامد وهنا الباب اتفتح ودخلت ليلي ولقتها في حضنه 

ليلي: علي فكره دي مستشفي؟؟؟ 

ليلي كانت عايزه تضرب ادهم او تضرب ريفانا بس مش عارفه تعمل ايه؟  

ريفانا: اسفين يا دكتوره 

ليلي: الدكتور كتبلك خروج خلاص بس كشف نهائي وتتفضلي من هنا 

ريفانا: اه طيب كويس 

ليلي لادهم: ممكن بقي تطلع بره علشان اكشف علي الجرح قبل ما تمشي 

ادهم يدوب هيخرج بس ريفانا مسكت ايده ومنعته 

ريفانا: معنديش مشكله في وجوده خليه جنبي 

ليلي: انا عندي مشكله في وجوده 

ادهم: هستني بره لحد ما تخلص ما تقلقيش 

ريفانا: طيب اوعي تمشي 

ادهم خرج وليلي هتولع منهم وبتكشف عليها بعصبيه 

ريفانا: سوري لو كنا ضايقناكي بس انتي ما تتخيليش انا كنت محتاجهله قد ايه؟  هو غير حياتي كلها وعطالها معني جديد؟  عطاني فرصه جديده للحياه...  خلاني اعيش من الاول وجديد فما تستغربيش لو مسكت ايده علشان يفضل جنبي مش كل يوم بتلاقي انسان زيه 

ليلي كان نفسها تقولها انها عارفه الكلام ده لانها حبته قبلها والمفروض يكون ليها هيا مش لواحده غيرها بس سكتت وخلصت ومشيت 

خرجت بره كان ادهم بيتكلم في تليفونه واول ما شافها شاورلها تستني وهيا تجاهلته ومكمله طريقها فمسك دراعها ووقفها وخلص تليفونه 

ليلي: دراعي وجعني 

ادهم ساب دراعها: يبقي توقفي وتسمعي الكلام 

ليلي: ما تدخل لحبيبه قلبك وتسيبني في حالي 

كانت بتتكلم بعصبيه ظاهره قوي 

ادهم: غيرانه؟؟؟  الغيره هتطق من عنيكي 

ليلي ضربته في صدره وفضلت تزق فيه 

ليلي: انت مين انت هاه؟؟؟  اغير ليه عليك؟؟؟  انت فاكر نفسك راجل يتغار عليه!؟؟  ولا انا هغير من السلعوه اللي جوه دي هاه؟؟؟  واغير ليه اصلا؟؟؟  

كل جمله كانت بضربه علي صدره لحد ما ادهم مره واحده مسك ايديها الاتنين وحطهمولها وري ظهرها وده قربه منها قوي وهيا اتكتفت تماما 

ليلي: سيبني احنا في مستشفي وممكن حد يشوفني كده سيبني 

ادهم: يبقي تهدي طالما خايفه حد يشوفك ....  اولا دي مش حبيبه قلبي ولا في بينا حاجه اصلا....  ثانيا لما دي تبقي سلعوه فين البنات اصلا؟  انتي؟  بالضفيره دي ( شد ضفيرتها)  ولا بالبنطلون اللي علي طول لبساه؟؟  ولا بوشك ده اللي شكلك قايمه من النوم يدوب طسيطيه بشويه ميه ونزلتي ولا ولا ولا والف ولا؟؟؟؟  بصي لنفسك في المرايه الاول قبل ما تقولي علي غيرك سلعوه 

ليلي: هو انا علشان مش بتمايص ولابسه محزق وملزق وحطالي كيلو بودره علي وشي يبقي سلعوه؟؟؟  لا طبعا انا جميله من غير اي اضافات وعارفه اني جميله واجمل من اللي جوه دي مليون مره واتحداها تقوم تغسل وشها زي كده وانت هتلاقيها قوقه بجد 

ادهم: يا ستي لا تحطي بودره ولا تلزقي ولا تحزقي بس سيبيني في حالي...  يالا يا شاطره بعيد 

لمس خدها كده بحركه فزقت ايده فمسك ايدها وشدها عليه 

ادهم: ما تضايقينيش وتثيريني لانك مش قدي وانتي جربتي قبل كده لما بتضايق ببقي ايه؟  خليكي بعيد احسنلك انتي لسه صغيره ومش فاهمه حاجه فالعبي بعيد او العبي مع اللي في سنك يا شاطره 

ليلي: انت شايفني قدامك عيله؟؟

ادهم: عيله وبضفاير كمان (وشد ضفيرتها)  يالا هششس العبي بعيد هششش

ليلي كانت عايزه تضربه باي حاجه ولما معرفتش انسحبت من قدامه وابتسامه عريضه علي شفايفه وحزن جواه لانه مستمتع بمضايقتها 

ادهم اخد ريفانا ومشيوا ولاحظ ان ليلي مرقباهم وبصلها بصه طوويله وهو ماشي 

ريفانا قررت تسافر بره مصر وادهم وصلها بنفسه للمطار وقصتها انتهت هنا 

ليلي كل ما تفكر في ادهم تفكر نفسها بمشهد ريفانا في حضنه وتشيله من دماغها 

عدي فتره وليلي نفسها تشوف ادهم او حتي تلمحه لحد ما في مره وهيا في الشغل كانت يدوب هتستلم ورديتها وصاحبتها ألاء اول ما شافتها 

ألاء: هنا هنا هنا 

ليلي: ايه هو اللي هنا؟ 

ألاء: الضابط المز 

ليلي: قصدك ادهم؟؟؟  بجد فين؟؟ 

الاء: لسه واصل من ربع ساعه 

ليلي بلهفه: اوعي يكون متصاب

الاء: لا بعد الشر عليه ده مع حد وتقريبا مجرم لانه متكلبش 

ليلي: طيب 

الاء: ايه طيب دي؟  مش هتروحي تشوفيه؟؟ 

ليلي: اشوفه ليه هو من بقيت اهلي 

الاء: بقولك مز 

ليلي: مز علي نفسه 

الاء: انتي حره انا هروح اشوفه 

الاء مشيت وليلي وقفت مش عايزه تروح تشوفه مع انها هتموت وتشوفه 

الدكتور رئيسها استدعاها وكلفها انها تراقب حاله المجرم ده لانها معروف عنها انها جد قوي وهتعرف تتعامل معاه 

راحت بحذر بس ما لقتش ادهم هناك ولقت المجرم فعلا متكلبش وكان تعبان جدا وطلب منها اي مسكن يخفف المه وصعب عليها جدا فعطته حقنه مسكن 

ادهم جه زي المجنون عنده كانت ليلي جنبه بتسنده وتعدله المخده تحت راسه لان محدش عايز يدخله والممرضات خايفين منه 

ادهم دخل: ابعدي عنه بتعملي ايه انتي؟؟؟ 

ليلي: مريض زي اي مريض 

ادهم: لا طبعا ده مجرم ولولا اني محتاجه كنت قتلته مش جبته يتعالج...  بما انك بقي قلبك رهيف كده يبقي اطلعي بره لاني محتاج معلومات منه والطريقه اللي هاخدها بيها مش هتعجبك 

ليلي: طول ما هو هنا فهو في مسؤليتي ومش هسيبه 

ادهم: انتي حره 

ادهم راحله ووقف فوق

ادهم: هتجاوبني علي طول ولا هتتعب نفسك؟؟ 

خميس: انا معرفش حاجه اصلا 

ادهم: ما تعرفش البرنس موجود فين؟  

خميس: لا لا معرفش مكانه 

ادهم خبطه مكان الجرح بتاعه وفضل يضغط عليه لحد ما اتفتح ونزف تاني وليلي هتتجنن 

ادهم: هو فين؟  

خميس بعياط: معرفش...  معرفش مكانه صدقني 

ادهم: للاسف مش مصدقك 

طلع مطواه صغيره وبدأ يلعب بيها وبيهدد بيها 

ادهم: هاه هو فين؟؟؟ 

خميس: ما اعرفش 

ادهم بالمطوا ودخلها في ايده وهو بيصرخ جامد 

ليلي هنا ما استحملتش وشدت ادهم 

ليلي: انت ايه؟  انت مش بني ادم؟؟؟ 

ادهم: امممم 

من غير تفاهم شدها من دراعها وهيا بتعترض وخرجها بره ودخل وقفل الباب وهيا بتخبط بره وبتشتم فيه 

ليلي بره سامعه صريخه جوه وحست ان ادهم هيقتله 

الدكتور امين رئيسها جه علشان يتابع مريضه خميس ولاقاها بره كده 

ليلي: ادهم جوه هيقتله 

دكتور امين: ادهم مين؟  

ليلي: مقدم ادهم بيحقق معاه 

دكتور امين: اه ياريت يقتله ويخلصنا من الاشكال دي 

ليلي بتبصله باستغراب 

دكتور امين: مستغربه ليه؟  زي ما انتي بتقومي بشغلك هو بيقوم بشغله...  وساعات كتير الامان ما بيتحققش غير بالقوه 

ادهم خرج: هو تحت امركم....  وانتي تعالي معايا محتاجك 

ليلي: انا مش هاجي... 

ملحقتش تخلص جملتها لانه شدها من دراعها وبيجري وبيجرها معاه وما بيردش علي اي سؤال 

وهما عند باب المستشفي كان مصطفي ومؤمن داخلين وشافوا ادهم وليلي 

ليلي: مصطفي 

ادهم ما وقفش ومصطفي جري وراهم 

مصطفي: حضرتك رايح فين؟  

ادهم: تعال وانت ساكت 

ادهم فتح عربيته ودخل ليلي جنبه ومصطفي ومؤمن ركبوا الاتنين وادهم طلع بالعربيه 

ادهم: اربطي حزامك هسوق بسرعه 

ليلي: لما تقولي الاول رايحين فين 

ادهم اخد فرامل جامد لدرجه ان ليلي كانت هتتخبط في تابلوه العربيه 

ادهم: اربطي الحزام....  كلكم اربطوه 

ادهم شد الحزام بتاع ليلي وربطهولها غصب عنها 

ليلي: انت انسان مستفز 

مصطفي ومؤمن مستغربين من ليلي وسكوت ادهم ليها

ادهم سايق بسرعه مجنونه وبيطلع علي الرصيف واي حاجه في وشه بيشيلها وليلي حاولت ما تصرخش بس ما قدرتش ده حتي مصطفي ومؤمن كانوا هيصوتوا 

وصلوا مكان مقطوع وادهم وقف علي جنب ونزل 

كلهم نزلوا وليلي رجعت ومصطفي كان هيرجع 

ادهم نازل عادي جدا 

ادهم: استنوني هنا كلكم 

ادهم دخل ويدوب خطي خطوه لقي التلاته وراه 

ادهم: هو ايه نظام عيال ولا ايه؟  

ليلي: انت جبتنا غصب عننا يبقي نكمل غصب عنك 

ادهم : خليكي ورايا انتي وانتو طلعوا مسدساتكم وما تترددوش فاهمين؟  

دخلوا بحذر شديد واتفتح ضرب النار وليلي بتصرخ وماسكه في ادهم 

ادهم: انا قلتلك استني بره 

ليلي: انت ما قولتش ان في ضرب نار 

ادهم مره واحده زق ليلي بعيد وطلع اربع رجاله وفي لحظات كانوا علي الارض وليلي مش مستوعبه ضربهم ازاي...  فجأه لقت نفسها جوه فيلم اكشن 

ادهم في واحد معين كان عايزه واول ما شافه 

ادهم: استني هنا وارجوكي ما تتحركيش المره دي 

جري ادهم وري الراجل لحد ما مسكه 

ادهم بدأ يضرب فيه جامد جدا وبيسأله هيا فين؟؟ 

مصطفي ومؤمن بيضربوا... بس بيصيبوا بس لكن ما بيقتلوش حد 

الكل راح لادهم وهو بيضرب في الراجل ده لحد ما نطق 

البرنس: حطتها في المحطه جوه تانك 

ادهم: تانك ايه؟  

البرنس: تانك ميه وخلال دقايق المحطه هتشتغل ومش هتلحقها هههههههه

ادهم: انهو تانك...  رد 

البرنس: هما سته جنب بعض واحد فيهم الوقت بيمر تك تك تك 

ادهم ضربه ورماه لمصطفي: خدوه...  ليلي محتاجك 

شد ليلي وركبوا العربيه وجريوا تاني بس المره دي ليلي كانت ساكته وما سألتش اي سؤال 

وصلوا المحطه ونزلوا يجروا 

ادهم دخل: وقف المحطه دي بسرعه 

واحد: انت مين انت؟؟؟ 

ادهم طلع بطاقته: انا المقدم ادهم من المخابرات وبقولك شوف مين المسؤل ووقف المحطه دي بسرعه اتحرك 

الراجل طلع يجري وكله هرج ومرج وفوضي سادت المكان كله وادهم مسك ريس العمال 

ادهم: فين التانكات اللي هنا؟  

الريس: في ست تانكات هناك عايز انهو فيهم؟  

ادهم: لو المحطه اشتغلت ايه اللي بيحصل جوه التانكات دي 

الريس: الميه اللي جواها بتغلي والتربوهات بتشتغل...  دي زي سلسله كله بيتحرك وري بعض 

ادهم: لو حد جوه التانكات دي واشتغلت

الريس: هيموت في لحظات 

ادهم: في بنت صغيره جوه تانك من دول وانا مش هلحقها لوحدي محتاج مساعدتك 

الريسس: احنا كلنا هنساعد انت روح حاول توقف المكن وانتوو يالا ندور علي البنت دي بسرعه 

الكل طلع يجري ويطلع التانك ويفتحوه دوروا في الكل وكانوا في سباق مع الوقت لان معرفوش يوقفوا المحطه لانه تسلسل بيشتغل وري بعض وما ينفعش يقفلوها والتانكات بدات تشتغل 

ادهم طلع اخر  واحد وفتحه وفعلا شاف البنت 

وبيحاول يمد ايده يجيبها ومش طايلها 

كل الرجاله بيصرخوا انه يقفل التانك وينزل لان خلال دقيقه هيشتغل ولو اشتغل هو كمان هيموت 

ليلي بتدعي بصمت انه ينزل بسلام 

ادهم نزل بجسمه  جوه التانك رجليه شابكهم فوق ونزل بجسمه تحت  وكلهم صوتوا بس طلعوا لادهم ياخدوا البنت منه

الميه بدأت تسخن جامد مد ايده بالبنت وطلعوها و هو

بيرفعوه من جوه التانك لان الميه بدأت تغلي 

نزلوا البنت ونزلوا ادهم 

وليلي واقفه بتتفرج 

ادهم: اعملي حاجه امال انا جايبك ليه؟  

ليلي فاقت وبدأت تنعش في البنت وتعملها تنفس صناعي  وتحاول تنشط قلبها تاني واخيرا البنت استجابت والاسعاف وصلت واخدوا البنت 

ادهم: ليلي اطلعي معاها 

ليلي: في دكتور معاها انا هفضل معاك انت ايدك اتحرقت 

ادهم: ده حرق بسيط جدا روحي انتي معاهم وانا هاجي بعدين روحي 

ادهم كان اول مره يكلمها براحه وبرقه 

كلهم مشيوا وهو فعلا راح وراهم وعالج ايده بس مش عندها 

ليلي: مقولتليش ليه ان في بنت صغيره في الموضوع؟؟ 

ادهم: مكنتش هخلص من اسئلتك ومكنش في وقت 

ليلي: بس مكنتش اعرف ان عندك قلب وبتنقذ اطفال 

ادهم: ومين قالك اني عندي قلب ولا بنقذ اطفال؟؟؟  ده شغل يا دكتوره...  دي بنت وزير الداخليه والراجل ده بيهدد ابوها فده شغلي مش اكتر 

ليلي: بس خوفك عليها بيقول غير كده 

ادهم: ده انتي عايزه تشوفي كده لكن ده شغلي وانا بهتم بشغلي جدا وبسمعتي في شغلي ما تعيشيش نفسك في وهم اني عندي قلب والحوار الفاضي ده

ادهم عدي علي خميس قبل ما يمشي وليلي وراه 

ليلي: لو سمحت فك ايديه قبل ما تمشي 

ادهم: ليه بقي ان شاءالله؟  ده مجرم 

ليلي: ده تعبان وانت عورته في ايديه وبعدين هيعمل ايه يعني؟ 

ادهم: لا من جهه يعمل فيعمل كتير سيبيه في حاله وياريت ما تتكلميش معاه 

ليلي: انت فعلا معندكش قلب 

ادهم جاوبها بضحكه منه وهو ماشي وده غاظها جدا فدخلت واخدت المفتاح من بتاع الامن بحجه انها هتعمله اشعه وفكته 

اول ما فكته وخميس اخد الامان فضل يشكر في ليلي كتير...  دكتور امين استدعاها فبعتتله واحده من اصحابها تقعد معاه وهيا راحت للدكتور امين 

شويه وكان في دربكه وقلق كتير وليلي وامين طلعوا يجروا يشوفوا في ايه؟  

ليلي لقت ممرضه مضروبه بالنار في الارض وصاحبتها كمان وقبل ما تتحرك لقت خميس في وشها وحط مسدس علي داسها 

خميس: متشكر لقلبك الرهيف ولا نقول عنادك؟؟؟  انتي هتخرجيني من هنا اتحركي 

ادهم خرج وركب عربيته واتحرك شويه وحاله قلق سيطرت عليه وحس ان ليلي ممكن تتجنن فرجع 

ساعتها كان مصطفي ومؤمن جايين يطمنوا علي البنت 

خميس شد ليلي ونزل بيها في القاعه اللي في مدخل المستشفي وهنا مصطفي شافهم فطلع مسدسه وهدد خميس والموقف اتأزم 

مصطفي: سيبها بقولك 

خميس: نزل مسدسك يا اما قسما بالله هفجر نفوخها 

مصطفي: هقتلك سيبها بقولك 

خميس ضرب رصاصه وجت في كتف مصطفي ووقع في الارض وليلي بتصرخ 

خميس: كله يبعد من وشي ابعدوا كلكم 

هنا ادهم دخل ومسدسه في ايده 

خميس: سياده المقدم المبجل!!!!  انت بقي لو قربت خطوه هقتلها.. مش هضرب عليك زي الغبي التاني لكن المره دي هقتلها هيا....  نزل مسدسك واحدفه ناحيتي 

ادهم نزل مسدسه فعلا 

ادهم: حاضر كل اللي انت عايزه هعمله مسدسي اهوه 

رماه في الارض 

خميس: شوته عندي 

ادهم برجله شات المسدس لعند خميس 

خميس: للدرجه دي هيا مهمه؟؟؟  طالما مهمه يبقي هتفضل معايا لحد ما اخرج من هنا 

ادهم: سيبها وهسمحلك تخرج لكن لو مصر يبقي هقتلك هنا 

خميس: اههههه بموت انا في تهديداتك يا سياده المقدم لكن المره دي انا في ايدي السلاح وانا في مركز القوه 

ادهم: بجد انت شايف كده؟  طيب اتفضل 

ادهم ركن علي جنب وشاورله يخرج 

خميس ماشي وليلي قدامه والمسدس علي دماغها وبيتحركوا وعينه علي ادهم 

لحد ما جه قصاد ادهم وراحت ليلي مره واحده زقاه بعيد وجريت علي ادهم اللي زقها ومسك ايد خميس وقع المسدس منه وضربه جامد 

وهنا كان الامن اللي استدعوه وصل وبيقولو لادهم خلاص يسيبوه 

ادهم للحظه كان هيسيبه بص لليلي كانت في الارض 

وبص لخميس 

ادهم: انا ما برجعش في كلمه بقولها 

وراح ماسك رقبته ولفها اتكسرت في ايده ووقع ميت في لحظه 

الكل ساكت وحاله صمت سيطرت علي الكل 

ادهم جري علي ليلي ومسكها 

ادهم  بتوتر: انتي كويسه!؟؟  فيكي حاجه؟؟  اتعورتي فيكي اي حاجه؟؟؟  (زعق)انطقي 

ليلي: انا كويسه ما تخافش عليا بس مصطفي 

ادهم استوعب ان في ناس كتيره اتصابت فقام وراح لمصطفي وشاف جرحه 

ادهم: ده سطحي...  قوم اقف ما تعملش فيها متصاب واشكر اختك علي اصابتك دي وتاني مره في موقف زي ده ما تتهورش كده لانه ممكن يقتلك او يقتل اللي في ايده...  في حاله الرهائن بنسمع كلامه لحد ما نلاقي فرصه فاهم ولا لأ؟

وانتي كنتي بتفكري في ايه ساعت ما زقيتيه؟؟  غبيه 

ليلي: مصطفي انت كويس؟؟؟ 

ادهم: بجد انتي بتسألي

كانوا بيحصروا الاصابات وكان في ممرضه ودكتوره متصابين بجانب الامن اللي كان علي الباب 

اصاباتهم مش خطيره 

ابوهم عم محمد جه يجري  لان مصطفي كلمه

قاعد معاهم هما الاتنين وليلي بتعيط جامد وبتقول لابوها ان هيا السبب 

كانت في حضن ابوها لمحت ادهم ماشي فجريت عليه 

ليلي: سياده المقدم انا اسفه 

ادهم: ليه بتعتذري ليه؟  مش لايق عليكي الاعتذار انتي بس عارضي واعندي في اي شيئ بغض النظر ايه النتايج...  انا مش عارف انتي ازاي فكيتيه؟؟؟  ازاي جتلك الجرأه انك تفكي مجرم؟؟  ما خوفتيش يقتلك؟؟؟  ما بتفكريش؟؟  عقلك ده موجود بجد ولا زينه؟؟ 

ادهم كان بيزعق فيها جامد وهيا بتعيط بصمت 

عم محمد: ما براحه ايه؟  انت ما صدقت تغلط ولا ايه؟  

ادهم: اه حضرتك هنا وكالعاده عيالك ما بيغلطوش لكن اللي حواليهم اللي بيغلطوا...  بنتك النهارده اتسببت في موت المجرم ده واصابه دكتوره ووممرضه وابنك وحضرتك جاي تزعقلي انا؟؟؟  انا سايبهالكم وماشي 

ادهم سابهم ومشي وهو خارج قابله القائد بتاعه 

القائد: سياده المقدم استني...   مش معني ان معاك كرت احمر انك تقتل ببرود كده؟  انت مقبوض عليك بتهمه سوء استغلال منصبك اقبضوا عليه 

فعلا العساكر اتلموا علي ادهم وحطوا الكلبشات في ايديه واخدوه وهو مشي معاهم واتقابلت عنيهم هو وليلي وكأنه بيقولها ارتاحي بقي 

ليلي: مصطفي هو ينفع يقبضوا عليه؟  

مصطفي: مفيش حد فوق القانون وبعدين قائد عبد السلام مستنيله غلطه علشان يرد اعتباره 

ليلي: ممكن يعملوله ايه؟  

مصطفي: معرفش يتوقف او يطرد او ممكن كمان يتحبس ده قتل ولو اتثبت انه قتل عمد بدم بارد ممكن يتعدم فيها 

الكلام نزل عليها زي الصاعقه

🌺🌹🌺🌹🌺🌹🌺🌹🌺🌹🌺

الفصل السابع

ادهم اتقبض عليه ومشي معاهم بهدوء اخدوه مبني المخابرات واول ما وصلوا مدير المخابرات طلع بنفسه وقابلهم في القاعه بره 

المدير: قي ايه بيحصل هنا؟؟ 

ادهم: انا اهوه سمعت كلام حضرتك وما عارضتوش وجيت متكلبش لحد هنا...  علشان بس ما تقولش اني بتعمد اقلل من شأنه 

ادهم دخل ايده في جيبه وطلع حاجه صغيره زي المسمار او الدبوس وفك كلبشاته في لحظات وحدفهم لواحد من العساكر وراه 

ادهم: انا جيت لهنا بمزاجي ممكن اعرف بقي ايه اللي هيتم حاليا؟؟ 

القائد: انت هتتحول للمحاكمه العسكريه وهتكون بكره ان شاءالله اما النهارده سيادتك هتبات في الحجز 

المدير: ليه كل ده؟  

القائد: ده قتل هو لعب عيال ولا ايه؟  

ادهم: ماشي براحتك خالص اللي حضرتك عايزه هيتم فين الحجز اللي عايزيني ابات فيه؟  

القائد: خدوه الحجز 

ظابط واقف وري ادهم ومش عارف يعمل ايه؟  

ادهم: ايه مالك؟  خدني علي الحجز يالا 

ادهم مشي والظابط وراه لحد باب الحجز وادهم دخل وقاله يقفل الباب 

المدير :افهم بس قصدك ايه من انك تقبض عليه؟  

القائد: يتأدب 

المدير: بجد؟؟؟  انت كده بتأدبه؟؟؟  بأيه بقي؟  بانك تخليه يقضي ليله هنا بمزاجه؟؟  

القائد: هيتحاكم وممكن 

المدير قاطعه: ممكن ايه؟  ياخد حكم؟؟  ولا يتوقف؟؟  ولا ايه؟  

القائد: ليه لأ؟  هو فوق القانون؟؟ 

المدير: لا مش حكايه فوق القانون...  بس حكايه انه اسطوره في مجاله...  محبوب جدا من زمايله ومن تلامذته...  له مكانته....  هيتحاكم بتهمه ايه؟  

القائد: القتل 

المدير: دفاع عن النفس 

القائد: لا طبعا مش دفاع عن النفس 

المدير: وفين دليلك؟؟؟ كنت موجود؟؟؟ 

القائد: لأ بس 

المدير: عندك شهود؟؟؟؟ اه....  انت متخيل انك هتلاقي حد يقف ويشهد ضده؟؟؟  حظ سعيد علي مهزله بكره

شويه واصحاب ادهم عرفوا باللي حصل وجوله كلهم 

اكرم ومحمد وعلاء فتحوا باب الزنزانه ودخلوله 

اكرم: يالا من هنا بلا كلام فاضي 

ادهم: انت متخيل ان انا هنا غصب عني؟؟  خليني هنا النهارده الدنيا مش هتتهد

محمد: تبات هنا؟؟ 

ادهم: فيها ايه؟  بس انت سهران ليه؟  مراتك فين؟  رقيه فين؟  

محمد: في البيت بس هيا عارفه انك ليك معزه خاصه فعدتها 

كلهم ضحكوا 

علاء: انا موصي علي عشا ايه؟  متوصي.. مشويات وكفتات ومحمر ومشمر ومشوي وهيصه 

ادهم: انت بتحتفل بيا ولا ايه؟  

علاء: طبعا هو كل يوم سياده المقدم بيتحبس ولا ايه؟  واحلي حاجه بقي ان الليله دي مش علي حسابي  

ادهم: بجد والله؟؟؟  امال علي حساب مين؟  

علاء:  انا بكح تراب واكرم هيتجوز عن قريب وخطيبته منتفه ريشه ومحمد متجوز وهيخلف قريب فاضل مين؟؟؟ 

ادهم: مين؟؟ 

علاء: ابو الكرم كله 

ادهم: ايوه ده اللي هو مين يعني؟؟ 

علاء: هو في غيرك 

ادهم: انا؟؟؟  اتحبس وادفع؟؟؟  بمناسبه المحاكمه بتاعت بكره ولا ايه؟  

محمد: محاكمه ايه سيبك؟؟؟ هيحاكموك بتهمه ايه؟ هو في حد اصلا ممكن يشهد ضدك؟؟ 

علاء: الاكل وصل اجدعان...  ادهم خليك حلو بقي 

ادهم: اه منك عايز كام؟؟ 

علاء: مش كتير 1500 بس

ادهم: يخرب بيت ابوك علي ابوه علي ابوه...  انت طالب ايه؟  ولمين؟؟ 

اكرم: يا ابن المفتريه 

علاء: جعان واكيد انتو جعانين اقوله يرجعه؟؟ 

ادهم: علي ايه خد...  علي الله بس يطمر فيك...  غور هات الاكل 

خرج علاء يجري وهما بيضحكوا عليه 

ادهم: حددت معاد الفرح ولا لسه؟  

اكرم: اه حددناه اخر الشهر ان شاءالله 

ادهم: يا واطي وما تقوليش نفترض اتحبست انا بقي دلوقتي؟  

اكرم: اولا انت مش هتتحبس وبعدين لاقدر الله الغي امه مش اجأله...  ده انت السبب في جوازي ده 

ادهم: انا لا سبب ولا نيله انتو بتتنيلوا بتحبوا بعض من زمان 

قضوا السهره كلها عند ادهم اكلوا وشربوا...... وهزار وضحك للصبح وصوت ضحكهم جايب اخر الدنيا والكل مستغرب ايه اللي في الحبس دول

عند ليلي في البيت 

ليلي: مصطفي احنا لازم نطمن عليه؟  اعمل اي حاجه؟ ؟  

مصطفي: اتصلت بزمايلي وقالولي انه هيبات الليله في الحجز ودخلوه وحبسوه بس زمايله سهرانين معاه 

ليلي: طيب انا لازم اشوفه واعتذرله تعال نروح 

عم محمد: تروحي فين دلوقتي؟  

ليلي: اروحله 

عم محمد: تروحي ليه؟  

ليلي: بابا انا السبب...  انا اللي اتسببت في الناس اللي اتصابت دي وانا اللي اتسببت في جرح مصطفي ودلوقتي هو اهوه اتحبس بسببي 

مصطفي: انا عايز افهم انتي ليه بتعترضي علي كلامه ليه؟  انتي مالك وماله؟  بتعارضيه في كل حرف افهم ليه؟  ظابط له وضعه وعطي امر ليه مش بتنفذيه؟؟؟  مش قادر افهم ليه؟ 


ليلي مردتش ليه؟  بس ابوها عارف ليه؟  وخايف من ليه دي؟  بنته اخيرا لقت ند ليها؟؟  حست بضعفها وانوثتها قصاده وعلشان كده بتعارضه لمجرد انها تثبت لنفسها انها لسه قويه وانها مش ضعيفه وانها راجل وبالف راجل 

عم محمد: ادخلوا نامو يالا وانتي بطلي بقي الهبل ده؟  وتاني مره طالما اشتغلتي في مستشفي عسكري يبقي تنفذي الاوامر يا قسما بالله لقعدك في البيت فاهمه ولا مش فاهمه؟؟ اتفضلوا من قدامي


بعد ما مشيو امها ناديه: مالك يا اخويا في ايه؟  متعصب كده ليه؟  فيها ايه لما البنت تحس بالمسؤليه ناحيه غلطها؟؟؟ 

عم محمد: انتي فاكره انها حاسه بالمسؤليه؟؟  علشان الناس اللي اتصابوا ولا اخوها حتي؟؟ 

ناديه: امال ايه؟  

عم محمد: مفيش بقي 

ناديه: لا انت تقولي في ايه؟  وتفهمني 

عم محمد: حاسس والله اعلم انها بتحب 

ناديه: بجد 

عم محمد: وطي صوتك يا وليه انتي 

ناديه: ليه ده يبقي يوم المني...  مش انتو بتتكلموا عن الظابط رئيس مصطفي اللي ليل نهار مصطفي يرغي عنه؟؟؟ طيب ماله بقي؟  هو كبير ولا ايه؟  

عم محمد: مش حكايه كبير وصغير

ناديه: شكله وحش؟؟؟  ماهو اكيد مش ماديا لان رواتبهم حلوه ده ابنك اهو ما شاء الله راتبه كويس وهو لسه متعين امال ده بقاله قد ايه اكيد 

عم محمد: يا وليه مش حكايه فلوس ولا سنه ولا شكله؟؟ نازله لوك لوك لوك 

ناديه: امال ايه حيرتني معاك؟؟؟ 

عم محمد: مهواش كبير ده يدوب في اول التلاتينات ده لو كان وصل للتلاتين وشكله حلو وشقته شكلها متكلفه بس اخلاقه...  اخلاقه زفت يا ام ليلي 

سكر وشرب وبنات وعربده واحنا مش بتوع الكلام ده؟؟  وبعدين تربيه ملاجئ؟؟  يعني لا يعرف عيب ولا حرام ولا حلال؟؟  ولا له كبير ولا اهل ولا حد يقوله يمين ولا شمال؟؟ وزي ما انتي شايفه وسامعه قتل الراجل لمجرد انه قال كلمه وبكره تشوفي لما يخرج منها زي الشعره من العجين 

ناديه: يعني هو كان قتل شيخ؟؟؟  ماهو قتال قتله ويستاهل القتل 

عم محمد: يا وليه مش القصد....  القصد ان القتل بالنسباله حاجه عاديه...  الحياه ملهاش وزن ولا قيمه 

ناديه: اممم وزي ما بتقول تربيه ملاجئ...، وبعدين بيشرب  ما ممكن لما يتجوز يتعدل ويتصلح حاله؟؟

عم محمد: انتي اتجننتي يا وليه انتي ولا ايه؟  جواز ايه اللي بتتكلمي عنه؟؟؟ 

ناديه: طيب لو البنت فعلا بتحبه؟؟؟  

عم محمد: بكره تنساه لان هو مش بتاع جواز 

ناديه: ربنا يختارلها الخير يارب ويرزقها بسيد الرجاله كلهم يارب 

عم محمد: يارب يارب 

... الصبح في المحاكمه 

القائد راح شغله واتجنن لما عرف ان الليله كلها كانت ضحك وهزار 

راح للزنزانه لقاها مفتوحه ودخل لقاهم الاربعه نايمين 

وكأنهم في سهره مش حبس


 خرج بره وعمل دوشه علشان يصحوا 

راحوا الكل للمحاكمه 

ادهم دخل والكل موجود رجالته..  زمايله...  ليلي وابوها....  القاعه مليانه 

المحاكمه شغاله ومحامي بتاع القائد بيرغي كتير وبيقول قد ايه ادهم مستهتر بالحياه وبيقتل وخلاص 

والقائد وقف وقال ان ادهم ما بيلتزمش باوامر 

وما بيهتمش باي شيئ غير صورته وشكله 

الكل بيتكلم كلام كتير قوي 

القاضي: فين محامي المتهم؟؟ 

ادهم: مفيش محامي...  انا محامي نفسي 

اولا سياده القائد بيقول اني مش بنفذ اوامر...  ده كان امر واحد في قضيه كان سيادته بعيد عنها وانا كنت متابعها مع رجالتي ولو كنت نفذت الامر ده كنا هنخسرها وكنا هندخل شحنه اسلحه البلد قيمتها تعادل ال 20 مليون فتخيل حجم الاسلحه كان قد ايه؟  وساعتها انا محبتش اخاطر باني اخسر لو نفذت الامر فاعتقد ان ده مش غلط....  

اما بقي بالنسبه للقتل العمد فده كان دفاع عن النفس...  المجرم كان معاه سلاح بيهدد بيه وكان ماسك دكتوره طبعا بغض النظر عن كميه الاصابات اللي هو عملها كان هيقتل الدكتوره اللي معاه وانا اتدخلت والموضوع ما اخدش لحظات 

القاضي: مكنش ينفع تقبض عليه؟  

ادهم: لو كان ينفع كنت قبضت عليه 

القاضي: في شهود ان ده قتل عمد..؟؟ 

القائد: اكيد في كتير من الموجودين هنا كانوا موجودين 

استدعوا كذا حد والكل بيقول انه دفاع عن النفس 

مصطفي: انا حاولت اتفاهم معاه او اقبض عليه او حتي اصيبه بس للاسف انا اللي اتصبت وبعدين كان ماسك اختي وبيهدد بقتلها 

القاضي: اختك؟؟؟ 

مصطفي: اه اسف  ماهيا الدكتوره كانت اختي...  لولا سياده المقدم اعتقد كان هيبقي في حالات وفاه مش اصابات بس...  انا نفسي مديون بحياتي وحياه اختي له 

استدعوا ليلي 

ليلي: انا كان في مسدس متوجه لراسي وكان ماسكني جامد ورائد مصطفي اخويا حاول يلحقني بس للاسف ضربه رصاصه لحد ما جه المقدم ادهم وهو انقذ الموقف كله...  

القائد: ليه المقدم مضربوش بالرصاص؟؟  ليه الطريقه المتوحشه دي؟؟ 

ليلي: هو طلب منه يرمي مسدسه بعيد وفعلا المقدم ادهم رمي مسدسه بعيد وعلشان كده كان اعزل وكويس انه قدر يتغلب عليه من غير سلاح وبعدين هو ضربني انا وساعتها ادهم استغل انشغاله معايا ومسكه وضربه 

القائد: انتي محدش ضربك 

ليلي كانت متعوره في دماغها وعليها لزقه بس الشعر مداريها 

ليلي رفعت شعرها وورتهم جرحها وشالت اللزق اللي عليه 

ادهم استغرب لانه المجرم مالمسهاش...  هو اللي زقها لما جريت عليه ما اخدش باله نهائي انها وقعت واتخبطت في راسها واتعورت كمان...  هو سبب الجرح ده مش خميس 

القاضي: هاه يا سياده القائد عندك شهود تانين؟؟؟ اعتقد ان سياده المقدم كان بيقوم بشغله ولا ايه؟  وحاليا احنا مديونينله بالاعتذار 

ادهم: انا مش عايز اعتذار انا عايز اقوم بشغلي وبس..  انا عمري يا سياده القائد ما استغليت تصريح القتل بتاعي في اني اقتل حد لمصالحي الشخصيه او لمجرد اني متضايق منه وبعدين انتو عارفين كويس تصريح القتل ده انتو مدينهولي ليه؟  فبلاش نفتح ملفات سريه؟  وبعدين لو تصريح القتل ده مضايقكم قوي الغوه او ارفدوني انا من شغلي 

القاضي: سياده المقدم...  انت لاغني عنك في شغلنا وانت ليك وضعك ومكانتك هنا وبعدين انت من الظباط اللي ما ينفعش يسيبو شغلهم نهائي...  اولا لكميه اسرار البلد اللي انت عارفها وثانيا لان جميع اجهزه المخابرات يتمنوك معاهم فانت ما ينفعش تسيبنا لانك لو مش معانا تبقي ضدنا 

ادهم: وانا عارف ده كويس وعارف اني مش هسيب شغلي ده وانا علي رجليا بس طالما انتو عارفين ده يبقي محدش يتدخل في طريقه شغلي

القائد: خلاص سياده المقدم براءه من القتل العمد بس سؤال بسيط 

السلاح اللي كان مع خميس جابه منين؟  ومين فكه اصلا؟  مين المسؤل عن كل اللي حصل ده؟  اكيد الظابط اللي كان هناك فلازم ياخد عقابه 

ليلي وقفت مره واحده: انا اللي فكيته الظابط ملوش دعوه 

ادهم كان عايز يضربها هنا وبصلها بطريقه وبص لاخوها يسكتها 

ادهم: حضرتك عايز تقبض علي اي حد؟؟؟  الدكتوره كانت هتاخد خميس للاشعه وما ينفعش يدخل بالكلبشات فطلبت من الظابط يفكه لحد ما تخلص 

وطبعا بما ان الظابط جديد والدكتوره عيله وفرحانه بشهادتها فالاتنين معندهمش خبره واللي حصل كان النتيجه؟؟؟  ما تقدرش تقول حد غلطان 

القائد واحد من رجالته جاله وهمس معاه بكام كلمه 

القائد: بتدافع عنهم غريبه؟؟؟  ولا الدكتورة الجميله دي مهمه لحضرتك لدرجه انك تدافع عنها دلوقتي؟ وانها تكسر كلامك وتفكه؟ وانك ترمي مسدسك لما هددك بيها؟؟  هيا جميله محدش ينكر 

هنا ادهم انفجر فيه 

ادهم: شوف انا مستحملك من بدري ومن بدري قوي كمان وسايبك تتكلم براحتك وتعمل كل اللي نفسك فيه لكن لحد هنا ولأ....  هتتكلم عن اعراض الناس وهتلمح لحاجات سخيفه مش هسمحلك....  اولا دي عيله وثانيا اخت تلميذ عندي....  هتزود في الكلام قسما بالله هقتلك علشان تبقي تقول بستغل تصريح القتل.....  هيا المحاكمه دي مش هتخلص ولا ايه؟  ولا فاضيين وبنتسلي... وبعدين يا سياده القاضي انت لسه قايل انا لو مش معاكو ابقي عدو فياريت ما تخلونيش عدو لان عداوتي وحشه 

القاضي :حضرتك بتهددنا ولا ايه؟  

ادهم: لو حضرتك تعرفني كويس تعرف اني ما بهددش 

المدير اتدخل: بس كفايه كده المحاكمه دي انتهت خلاص ولا ايه يا سياده القاضي...  العداءات الشخصيه ملهاش مكان هنا....  سياده المقدم احنا متأسفين علي المحاكمه دي اتفضل 

المحاكمه انفضت والكل بدأ يمشي وادهم ماشي ووراه زمايله الكل موسعلهم الطريق 

ادهم لمح ليلي وابوها ومصطفي قدامه واول ما وصل عندهم وقف للحظه 

ادهم: غبائك هيدخلك في متاهات انتي مش قدها (بص لعم محمد) لم بنتك وفهمها ان العناد بيجي فوق راس صاحبه...  اه وسوري علي الجرح اللي في راسك ده 

معطاش لاي حد فرصه يتكلم وسابهم ومشي 

مصطفي: انا مازلت عايز افهم انتي بتعندي عليه ليه؟  

ليلي مشيت وما ردتش وابوها احساسه اتأكد من نظره ليلي لادهم وعنيها المتعلقه بادهم 

ليلي روحت وفرحانه ان ادهم وقف زي الاسد دافع عنها وفرحت انه اخد باله من جرحها وان هو السبب فيه...  

ادهم روح بيته بيفكر في ليلي وغبائها ومش عارف يبعدها ازاي عنه؟  ويعمل ايه علشان تشيله من دماغها؟؟


اخيرا جه فرح اكرم اللي طال انتظاره قوي 

قصه حبهم الاسطوريه اكرم ومني 

مني بقي دي زميله للاربعه دول ومعاهم من سنين واتعلقت باكرم وهو اتعلق بيهم بس محدش ابدا صرح بحبه 

الكل كان معزوم في الفرح...  مصطفي طلب من ليلي تروح معاه وابوه وابوه...  ليلي واقفت ورحبت جدا لما عرفت ان اكرم الانتيم بتاع ادهم وابوها وافق علشان يراقب بنته وناديه وافقت علشان نفسها تشوف ادهم شكله ايه؟  

ليلي نقت فستان خرافه وغالي جدا وامها مستغربه جدا لان ليلي بتكره الافراح موت 

ليلي كانت عايزه تثبت لادهم انها مش سلعوه وانها جميله لو حبت تكون جميله وفعلا كانت آيه في الجمال لدرجه ان اخوها تنح اول ما شافها 

مصطفي: بت انتي حلوه كده ليه؟  وايه الفستان ده؟  انا اول مره اشوفك كده؟  وبعدين افضل انا طول الفرح اتخانق مع الشباب صح؟  

عم محمد لمراته: مش قولتلك انها رايحه علشانه؟؟؟ 

راحو الفرح اللي كان وهم وليلي عنيها بتدور عليه ومش لقياه 

ناديه: واد يا طفي 

مصطفي: ايه يا ست الكل 

ناديه: امال اللي اسمه ادهم فين؟  

مصطفي: لسه مجاش ثواني 

قام وراح لاصحابه 

الكل بيدور علي ادهم وخصوصا اكرم ومني وليلي دول اكتر تلاته مستنينه 

علاء: البوفيه امتي يا اكرم؟  جعان 

اكرم: اتنيل بقي....  ادهم فين وتليفونه مقفول ليه؟  

ليلي ترابيزتهم جنب الاستيج وقريبه منهم وسمعاهم ومركزه قوي معاهم

علاء: تلاقيه مع مزه من المزز... 

اكرم: ادهم هيسيب فرحي علشان مزه؟؟؟ 

علاء: لا ميعملهاش هطلع اشوفه 

ليلي مستنياه وابوها وامها مراقبينها 

فجأه الجو كله اتغير والدنيا بقت ظلمه والجو كله اتكهرب و......

ونكمل بكره استنوني 

ادهم فين واتأخر ليه؟  

ايه اللي هيحصل في الفرح ده؟  

ادهم ازاي كان السبب في جواز اكرم ومني؟؟ 

ليلي هتعمل ايه مع ادهم؟

🌺🌹🌺🌹🌺🌹🌺🌹🌺🌹🌺

يتبع

تعليقات