رواية سرق قلبي الفصل الثاني والثالث والرابع والخامس حصريه وجديده على مدونة أفكارنا

رواية سرق قلبي الفصل الثاني والثالث والرابع والخامس حصريه وجديده على مدونة أفكارنا 

رواية سرق قلبي الفصل الثاني والثالث والرابع والخامس حصريه وجديده على مدونة أفكارنا 

نزل من سيارته بإتجاه نور 

منير ...مرحبا 

حَنت راسها لجنب شوي وركزت بمنير 

نور .... اهلا

منير ... كيفك؟ 

نور.... اهلا وسهلا فيك تفضل 

مَشى بحدها وكان متوتر وقلبه بدق على غير العاده،  لحد المكتب الخاص فيها بالسنتر 

نور .... تفضل ، كاني شايفتك قبل هيك!!!! وجهك مألوف الي 😅

منير(بأبتسامه) .... انا عرفتك مجرد ما شفتك😁

نور.... يبقى شايفك قبل هيك وين؟؟ 

منير.... من شهرين تقريبا لما ضربت سيارتك من ورا بتتذكري؟

نور(بابتسامه عريضه).... اااه والله انت هههه

منير ... صدفه غريبه!! 

نور....  سبحان الله ، كنت بعمان وقتها وانت من باربد؟؟ شغلك هون ؟! 

منير ... لا للأسف شغلي بالمفرق ، بس يومها كان عندي شغل بعمان بالقياده العامه.

منير... يبقى اجا الوقت لأرد معروفك، انتي سامحتيني بهذاك اليوم ، واليوم رح اساعدك، شايفه العدل ههههه

نور .... انا بصراحه خجلانه منك كتير

منير ... متى رح نبلش تصوير ؟! 

نور.... بس نص ساعه بتشرب فنجان قهوه وبنطلع

منير ... وين بدكم تصورو

نور ..... ببيتي ، عندي حديقه كتير بعتني فيها، وجلسات حلوه كلها نباتات مختلفه، في شخص بدير باله عليها كل يومين   

منير(بينه وبين نفسه).... بيتها؟!! هنيال زوجها فيها ...

 انا بحب العنايه بالزرع والنباتات، فيها متعه حلوه 

نور.... شكلو هوياتك كتيره ما شاء الله

منير .... هههههه والرسم 

نور..... جد؟!!!! كتير حلو 

منير .....  هوايات بتسليني، باوقات الفراغ

نور ..... هنيالك عندك وقت فراغ 

منير .... ممكن سؤال لو سمحتي

نور .... تفضل 

منير .... انتي دكتوره، بس  يعني بيوتي سنتر و..... قاطعته نور

نور .... انا حصلت على شهادة الدكتوراة من قبل شهرين في علم الاجتماع، والسنتر مشروع كان صغير وبعدها كبر ، مو انت بس عندك هوايات هههههه انا هوايتي الميك اب وتصفيف الشعر 

منير ..... بس هاد بده ممارسه وتعليم كمان 

نور.....نميت هالموهبه بتعليم بدورة خاصه، واخدت مزاولة المهنه 

منير . ... ما شاء الله عنك 

نور ...  لازم الواحد ما يضل ماشي بطريق وحده ، يمشي بعدة طرق لربما طريق من هالطرق، تكون افضل لحياته، ويتخذها مَسير اله.  

منير .... كلام جميل، يبقى انتي بترسمي متلي بس بطريقه مختلفه 

نور .... كيف يعني ما فهمت 

منير .... انا برسم لوحات ومناظر طبيعيه ، وانتي بترسمي الألوان على وجوه البنات هههههه

نور .... ههههههههه، الله يسامحك هيك انتو الرجال ماخدين فكرة عن مهنة التجميل ، خليني احكيلك،  الانثى مهما كان مستوى جمالها هي جميله، جميله برقتها ، وبقلبها وحنانها ، احنا مُجرد بنجمل الوجه لشي احسن بس اما الجمال موجود بالانثى.

منير.... صحيح، بس انا بقصد الألوان هههه

نور .... الكلام اخدنا اشوف الصبايا خلصو الشغل وننتقل لبيتي ... بعد ازنك 

منير .... تفضلي 

طلعت نور من عنده هو براقبها بكل حركه 

منير( غمض عيونه ورجع فتحهم ، وبشرب بقهوته )....  اسلوبها وطريقة كلامها ونعُومتها، فهمانه ، وراقيه ،وغير الجمال وووووف،، استغفر الله العظيم ،اعوذ بالله من الشيطان الرجيم .. اهدا يا منير

رجعت نور بعد شوي

نور .... جاهزين البنات رح انقلهم بسيارتي وانت بتكون ورانا بسيارتك ، غلبتك انا كتير .

منير .... لا ابدا ابدا  انا مبسوط لاني رح أمارس هوايتي 

.

.

. 

في بيت نور (بيت العيله)

نور .... يا بنات كل بنت رح نوخد الها اربع صور بأماكن مختلفه 

منير .... ممكن اختار اماكن التصوير معك؟! 

نور .... اكيد 

بلش منير بالتصوير، وكان هدفه الاول انه نور تعجب بتصويره ما يخذلها باختيارها اله 

منير .... ما شاء حديقة بيتك كتير حلوه وفيها نباتات جميله جدا 

نور .... ماما الله يرحمها كانت تحب الزراعه وانا حبيت استمر بالعنايه فيهم من بعدها ، شايف هاد كله اكتره ماما زرعته بأديها 

منير(مستغرب)..... هاد البيت لاهلك؟!!

نور .... هاد بيت العيله وانا اشتريته من اخواني وصار الي 

منير.... اها فهمت هلأ

نور .... اه كنت مفكر انه بيتي وانا متزوجه موو؟! 

منير ..... بصراحه اه 

نور .... لا مو متزوجه 

منير.... بس البيت كبير وانتي... قاطعته نور

نور ... انا مو ساكنه فيه ، بس بجي عليه كتير وبتفقده، والبيت فيه كل شي جوى ، بيت كامل لانه احيانا بيجي اولاد عمي الكبير الله يرحمه  زيارة من العقبه بقيمو فيه ، ولما اخي يجي من بره البلد بسكن انا وياه فيه  

منير .... يعني عدم المؤاخذه ، لانك بنت ما شاء الله عنك ،فكرت انك عايشه فيه لوحدك ، واستغربت

نور.... احنا بمجتمع شرقي والعادات والتقاليد والعرف ما بتسمح لبنت تعيش لوحدها ببيت ، وهاد هو الصح طبعا، انا ساكنه ببيت عمي الصغير، بعد وفاة ماما وبابا. 

منير.... انا آسف، لاني سألت بأمور شخصيه.  

نور.... لا عادي جدا 

انتهى التصوير 

منى..... نور خلص هيك

نور .... بكفي  

منير.... صورنا اكثر من خمسين صوره، اذا بدكم بصور كمان  

نور .... كتير بكفي ،  يعطيك العافيه 

منير .... بتقدري تختاري الي بدك اياه منهم 

نور ..... في كم صوره عجبوني بس بدهم شويت تعديل ، بتقدر تعدلهم

منير ..... اكيد ، بس انقل الصور على لاب توب بعدلهم بس حدديلي ايا منهم بدهم تعديل 

نور .... بس تبعتلي اياهم على واتساب رح احدد ايا منهم 

منير..... ما تصورتي الك صوره انتي؟

نور..... ليش بدي اتصور ههههه 

منير..... مع البنات انتي صاحبة الشغل، وحلو انه العالم تعرف انك صاحبة السنتر 

نور...... فكره حلوه 

وقتها منير كان حابب يكون في صوره لهالبنت المميزه معه 

منير.... لازم ارجع لاربد ، وانا بالخدمه باي وقت 

نور .... وين ؟؟! انت ضيفنا اليوم ومستحيل ما تتغدا عنا 

منير ..... لا شكرا الك 

نور ..... لا ابدا لازم. على الاقل اترك النا مجال نشكرك ، احنا غلبناك اليوم ، وجبناك من اربد، ما بصير ترجع بدون غدا ابدااا وانا مصره 

منى .... لا تقطع رزقنا يا ابن الحلال بنتغدا احنا وصبايا معكم😅

منير كان اله ثلثين الخاطر 😂، بس ليضل 

منير ... طيب بنتغدا 

طبعا نور كانت موصيه على  سدر منسف فاخر جدا وصل لعند بيتها 

لما منير دخل جوى البيت انصدم من جماله واثاثه الفاخر وكان كبير    

على طاولة السفره  الصبايا ومنى ونور

منير .... اذا بدك اتغدا فعلا انا ما باكل المنسف بمعلقه ههههه، بدي غسل ايدي

نور..... خد راحتك ، تفضل على المغسله من هناك

ومنير بغسل بعيد عن مسامع نور ومنى

منى .... الشب بتصرف على طبيعته ، ما في تصنع

نور ... ما في احلى من الطبيعه

منى.... متجوز؟!                 

نور ... ما بعرف 

منى....  شخصيته حلوه 

نور ... الله يخليله شبابه ..هشششش اجا اسكتي    

.

.

.

رجع منير على اربد زي المضروب على راسه ، كان ما بعرف شو ماله ، حالته تلخبطت ، اول مره بصير معه هيك ، خيال نور مش رايح من باله 

.

.

ام محمد .... وين كاين اليوم ؟! مرتك بشغلها وانت داير، وبناتك اوجعولي راسي 

منير .... بشو غلبوكي يا حجه كلهن كبار 

ام محمد .... طالعات لامهم كثيرات حكي ما بفوت لسانهم بثمهم 

منير ..... ههههههههه بتتسلي ، تعالوا بابا الحقوني فوق، خلي جدتكم ترتاح

ام محمد ... اها، لا حمدا ولا شكورا

منير قرب على امه وهو مبتسم وباس راسها 

منير .... والله انتي بركتنا ، ولولاكي ما بعرف شو اعمل الله يباركلي بعمرك يا قلبي ♥️

ام محمد ... ما ماخذ منكم الا الزعبره الكذابيه

منير .... انتي بتعرفيني اني ما بزعبر واني بموت فيكي 

ام محمد .... الله يرضى عليك والله انك بتختلف عن اخوانك ما حدا بفقدني الا انت وكل اشي بدي اياه انت ملزم فيه 

منير ..... هاذ واجبي يا حجه انتي الروح 

ام محمد .... بدك تتغدا خليتلك حصتك 

منير .... لا اتغديت ، البنات اتغدوا ؟

ام محمد .... غديتهم لعاد ليش طبخت مشانهم ومشانك

منير..... الله يكبر شانك يا يما  

.

.

.

ندى..... ليش امك قايله لبناتي انتوا كثيرات حكي زي امكن

منير .... لا حول ولا قوة الا بالله ، تقول الي بتقوله يا ندى ، امي ست كبيره، بكفي بدير بالها على بناتنا واحنا غايبين ، لولاها البنات بتمرمطوا

ندى ... اه والله تسب عليه وعلى اهلي لانها بلشانه بالبنات ، هذول بناتك مش بناتي لحالي

منير .... ندوش استهدي بالله ، وعلمي بناتك لا ينقلوا الكلام ، المفروض، لما قالولك، زعلتي منهم،لا ينقلوا الحكي حتى لو كان عليكي او عليه او على حدا ثاني هاي صفه مش حلوه يتعلموها البنات

ندى .... قلب السولافه للاخلاق !!!! امك ما بتحبني كله مشان ما خلفت ولد بعدني 

منير(باندفاع).... بتعرفي انه عقلك صغير ؟!  

ندى (بزعل).... شو يا منير؟! عقلي صغير؟! الله يسامحك

منير..... آسف يا ندى مش قصدي بس كلامك هاد غلط ما لازم يكون تفكيرك هيك 

ندى زعلت وقامت من حده بس منير ما بحب يكسر بخاطر ندى ويزعلها، مسك ايدها وقعدها 

منير..... لا تزعلي مني مش قصدي 

وحضنها وباسها 

منير.... شو رايك اسكر الباب 🙈

ندى ...  البنات 

منير .... ينعن ابوهن.

..

..

..

رامي .... وين كنت اول مبارح رنيتلك عشر مرات ما رديت 

منير ..... انت بتعرف اني كنت بعمان ، والتلفون كان بالسياره ، ومتذكر ارنلك بس شفت مكالماتك ونسيت 

رامي ..... صحيح كيف الشغل ههههههه

منير .... شغل!!!  

رامي ..... اها آسف مساعده ههههههه

منير..... لو تعرف شو صار ؟؟ 

رامي(بأستغراب)..... شو صار؟!! 

منير .... متذكر البنت الي حكيتلك عنها مش رايحه من بالي 

رامي ....ايوااااا، لا تقلي ارجعت شفتها  

منير ..... شفتها 

رامي..... لاااا شو هالصدفه؟؟! 

منير ..... مش  اي صدفه يا رامي ، طلعت نفسها الي بدها مساعده مني 

رامي..... وووال !!!! شو هالصدفه 

منير..... شايف ، والله صدفه غريبه 

رامي.... رجعت شفتها؟! 

منير .... شفتها وحكيت معها ، ما شاء الله عنها، دكتوره ، وفاتحه سنتر، وكلامها رزين ومرتب وانيقه ولطيفه و... قاطعه رامي

رامي.... على مهلك على مهلك شو صارلك يا منير  

منير..... ما بعرف 

رامي..... عرفتك لما شافتك؟؟؟

منير..... بالبدايه لا كان عندها شك انها شايفيتني قبل هيك ، بس ذَكرتها بالحادث تذكرت مباشره 

رامي .... احكيلي بالتفصيل شو صار 

منير حكى لصديقه كل الي صار معه  

.

.

بعد كم يومين 

بعث منير الصور لنور ، ونور اختارت كم صوره لتعديل عليهم ، وتم تعديلهم ، 

المحادثه على واتساب ..

نور.... الصور جدا حلوين ،، بشكرك كتير كتير

منير .... عفوا ، المهم انه الصور عجبتك 

نور..... صحيح لما بعتلي الصور كان في صوره مو الي بينهم 

منير رجع يتفقد الصور ليعرف شو باعث 

منير.... ههههه هدول بناتي اسف بالغلط

نور..... يا قلبي حلوين الله يخليلك اياهم 

منير.... شكرا 

نور..... باين عليهم شطورين

منير.... وقويات هههه

نور.... احسن يكونوا البنات قويات، لحتى يبنوا لنفسهم شخصيه للمستقبل ، بس اهم شي قويات بأدب واحترام

منير .... الحمدلله 

نور ..... شكرا الك مره تانيه سلام 

منير .... سلام 

فتح منير على الصوره الي صورها لنور مع الصبايا وصار يتفرج عليها بتمعن واخذ نفس وابتسم .....  بعد لحظه 

منير(بينه وبين نفسه) ...... شو قصتك يا منير انت مش هيك ، اصلا حرام اتفرج عليها شو صرلي شوووو صرلي

استغفر الله العظيم 

.

.

كان منير بواجه موجة مشاعر ملخبطه ونور ما بتفارق مخيلته ، رغم انه كل ما بتيجي بباله بتوضأ وبصلي لحتى ما يفكر ..

ندى .... منير انا حامل

منير(بفرح).... جد؟! الحمدلله 

ندى.... فرحان؟! 

منير .... اكيد  ديري بالك على حالك، وحاولي توخذي اجازه سنويه الك بهالفتره، مشان كمان ديري بالك علي 

ندى.... ادير بالي عليك؟!! 

منير ...  ندى انا بحاجه لاهتمامك وحنان منك ، ما بدي تهمليني، ولا تهملي البيت 

ندى.... شو الجديد علينا يعني؟؟ 

منير... بدي اكون اشي مهم في حياتك، انك ما بتقدري تستغني عني، خلينا نٍكسر روتين حياتنا ، احنا بحاجة انه نغير نظام حياتنا 

ندى..... مش فاهمك؟! كله هاذ لاني حامل ؟!

منير.... لااا تفهميني غلط ، انا بحاجه لهاذ الشي منك من زمان، الشغل ماخذ كل تفكيرك، ماخذك منا كلنا

طبعا منير بحب اسرته وزوجته وبحب الاستقرار والهدوء ، بس لخبطت مشاعره،خلاه يطلب هالشي من ندى لحتى تفكيره ما يروح لبعيد وينشغل  

بعد شهر...

 منير ما نسي هاي البنت الجميله ، كانت يوميا تخطر بباله ، طبعا الصوره حذفها، بس صورتها مرسومه بمخيلته 

بعد شهر ..  

ام محمد(بصوت عالي)..... الو يماااا

منير.... خير يما شو فيه مش عادتك ترنيلي بالشغل؟ 

ام محمد..... مرتك طلعت من الدار ومعها شنطه وخلت البنات عندي وحكتلي بطنها بوجعها 

منير(بخوف) .... ليش ما رنت علي؟؟ 

ام محمد.... سألتها قالتلي بجوز الي ببطني ينزل، عليها نزيف 

منير ... لا اله الا الله، انا مناوب شو هالورطه ، لشوف يما رح اتصل فيها 

اتصل منير بمرته

منير .... شو يا ندى؟! 

ندى.... وينك انت

منير.... بالشغل

ندى .... في نزيف ورح اعمل عملية تنظيفات 

منير ...  لا حول ولا قوة الا بالله، انا عندي مناوبه، والدوام خلص والكل روح ما رح الاقي زميل يداوم محلي 

ندى ..... مش مشكله اتصلت بامي هيها جايه مع اخوي ومرته

منير .... رح احاول اجي 

ندى .... لااا بلاش ما رح تعملي اشي هيني بدي افوت على العمليه 

وبكره الصبح بطلع مع اهلي على بيتهم، بقعد كم يوم عندهم وانت بكره بتجيب البنات عندي.  

منير .... الله يسامحك يا ندى 

ندى .... منير مش وقته 

منير.....بس تطلعي من العمليه اتصلي فيه لاطمن عليكي

....

ام ندى.... شو الي عمليته؟؟

ندى.... شو بدك اعمل لعاد يما !!

ام ندى.....جوزك المفروض على دراية بالموضوع، كيف لو كشفك؟!

ندى..... ما رح يعرف،  

ام ندى.... بس حرام يما

ندى.... يما صعبه عليه يعرف، والله لتنقلب حياتي. 

ام ندى ... حبل الكذب قصير 

ندى..... منير بحبني ، بس موضوع متل هيك ممكن الرجل يتغير 

ام ندى..... قصدك يتزوج؟؟ 

ندى.... احتمال، وعنده حجه كبيره ليعملها. 

ام ندى.... مع انها صعبه علي، الا انه حقه والله، وانتي من البدايه الغلط منك، ما درتي بالك على حالك،

ندى.... تعبانه يما والله تعبانه 

ام ندى ... من العمليه، اكيد بتوجع صعبه شوي ،ارتاحي وربك كريم 

.

رن تلفون منير ،وكانت...  نور 

قلبه نغزه بفرح

نور.... مرحبا استاذ منير

منير(بينه وبين نفسه).... يالله الصوت ما احلاه..... يا هلا بالدكتوره نور 

نور ... كتير خجلانه منك 

منير ... عادي تفضلي 

نور.... معلش تبعتلي الصوره تبعتي اكيد لساتها عندك

منير.... للأسف حذفتها

نور .... ييييي😔 يا خساره  راحت من عندي حزفتها بالغلط 

منير .. ... آسف

نور .... يعني كل الصور حزفتهم

منير ...  لا بس هي

نور.... ليش هي بس الله يسامحك يعني لاني موجوده فيها؟!!! 

منير(تاتأه ) .... ااا.اا.. يعني لانه ما بعرف اا

نور.....مو مشكله ، ممكن طلب تاني لو سمحت

منير ....تفضلي انت بتأمري

نور.....  انت قلتلي انك بترسم ممكن تبعتلي بعض رسوماتك شوفهم 

منير.... ببعثلك ما عندي مشكله، بس ليش هالطلب لتكوني بدك ارسمك 

نور.... بجوز ههههههه 

منير ... بتشرف 

نور..... جد بتقدر ترسم اشخاص ؟؟ 

منير....  اه برسم، بس انتي رح يكون صعب 

نور.....  ليش؟!! 

منير .... بصراحه صعب ارسم شخص مثلك ، ملامحه جميله جدا رح اظلمك بالرسم 

نور .... ......  

منير(عرف انه خبص وخَجل نور).....  انا آسف اذا ..... قاطعته نور

نور .... على كل حال، ازا يوم كنت بعمان زورنا بنتشرف 

منير .... ان شاء الله  

سكر التلفون

منير..... شو الي قلته الها تجاوزت حدودي بلشت اخبص

وبعثلها صور افضل رسماته 

.

.

رجع منير من شغله ثاني يوم الصبح واستنى لرجعوا البنات من المدرسه واشترى فواكه ولحمه وجاج وراحوا لبيت عمه 

منير ...السلام عليكم 

ام ندى..... هلا يا عمه تفضل ،، ليش مغلب حالك   

منير ... وين ندى؟؟

ام ندى..... بالغرفه جوى فوت جاي

منير قرب من ندى وباسها ، وبناتها حضنوها 

منير..... الحمدلله على سلامتك 

ندى.... الله يسلمك 

منير .... ليش هيك شكلك تعبان 

ندى..... ولا اشي 

منير..... ولا يهمك، ربك بعوض، هاذ امر الله ، ما النا فيه نصيب، بيجي غيره

ام ندى..... اقعد يا عمه اعملك قهوه 

منير .... خلي البنات يروحو عند اولاد خالهم بدي احكي مع ندى شوي 

ام ندى.... خذو راحتكم 

...

طلعت عمته وضلوا لوحدهم

منير .... انا ما رح الومك لعدم الاهتمام بحالك، لصار الي صار،  بس بلومك لقرارك تطلعي من المستشفى لعند اهلك بدون ما تشاوريني 

ندى.... معلش منير لا تزعل مني، بس ما حبيت تنعجق بالبيت ، وهون بلاقي الي يخدمني 

منير ... مش اول مره بتنزلي، نزلتي قبلها مرتين وقمتي بنفس اليوم ، وانتي بتعرفي ما بحب اني اثقل على حدا 

ندى..... انا بنتهم وعادي بثقل عليهم ما بضايقوا مني 

منير..... وبناتي ؟! 

ندى.... خلص يا منير ، مش ناقصني نكد 

منير.... نكد؟!!! طيب ما بدي احكي، مقدر ظرفك بدي اروح وبعد بكره باجي باخذك 

ندى ... لااااا ، اخذت اسبوع  اجازه بدي اضل هون والبنات خذ الهم اذن بكره من المدرسه، وجيبلهم ملابس لاسبوع 

منير .... ممتاز!!!!! اجازه اسبوع وعند اهلك!!!!! ومقرره بدوني ولا كأني زوج الك!!!! 

قام من مكانه بسرعه 

منير(الزعل باين على وجه) .... ديري بالك على حالك وعلى البنات ..سلام 

لقته عمته على الباب

ام ندى ... القهوة يا عمه

منير .... معلش غلبتك، لازم اروح في شغله مهمه ، ديري بالك على ندى والبنات .. سلام عليكم 

ام ندى..... وعليكم السلام 

ندى ..... منير زعل مني 

ام ندى..... حكيتله اشي؟!! 

ندى ..... لا بس زعل من قراري اني اظل عندكم والاجازه بدون ما يعرف  

ام ندى..... حقه يزعل لو زلمه ثاني بعملها قصه

ندى.... انتي بتعرفي يما انه لازم اقعد فتره ، لو ضليت بالبيت بنفضح  

ام ندى ....انتي مش صغيره لظل اهدي عليكي ، المفروض جوزك عارف كل اشي 

ندى صارت تبكي .

.

.

.      

رامي.... شو مالك ؟؟ 

منير..... عايف حالي

رامي .... انت صاحب الضحك والمرح منكد؟!!! 

منير .... اففف يا الله

رامي....  لاااااا تعال تعال خلينا نروح مكان هادي ونحكي براحتنا

منير ... اه والله اني بحاجة طلعه هاديه واحكي الي بدي اياه

رامي .... السياره فيها كل اغراض الطلعه جاهزة تعال 

منير .... على طول

رامي اخذ منير لمكان  هادي ارض واسعه وخضرا وبعيده عن الناس 

وجهزو القعده وعملو فنجانين قهوة 

منير .... اااخ يا رامي

رامي .... يا ستار 😳 عمرك ما قلتها شووووو؟؟! هاي ثقيله؟!!! 

منير .... نور

رامي ....  مين نور🤔

منير.... الدكتوره

رامي.... اااه قلتلي 🤨 مالها؟! 

منير .... معجب فيها 

رامي.... يا اخي شو شفت منها لتعجب فيها؟!!لعاد كل بنت حلوه بنشوفها نعجب فيها ونصير نفكر فيها 

منير ..... صدقني مش بس شكلها

رامي ..... هات من الآخر 

منير ..... بفتح كل يوم على بروفايلها اتفقده، بتحكي كلام بجذبك ، بتدخل لقلبك بكلامها

رامي.... هي دكتورة شووو

منير..... علم اجتماع 

رامي ..... فلسفه يعني ، علم نفس 

منير .... شو دخل ، بس حتى لما بتحكي كلامها مثل البلسم 

رامي .... يا سلام !

منير .... لا يروح فكرك لبعيد ، انا معجب فيها بس 

رامي .... ما هو اوله اعجاب يا بطل 😌 

منير ..... ومرتي الله يهديها 

رامي..... لتكون عرفت؟!! 

منير .... شو تعرف انت الثاني ، بقصد بتشتغل على راسها وصايره تتصرف بدون علمي 

رامي .... عادي معظم النسوان هيك 

منير..... كانت حامل ونزلت ، وانا بصراحه كنت مستني هالحمل على احر من الجمر ، كله بسبب شغلها المتعب، مع هيك ما بَبَين الها انه بهمني الموضوع لحتى ما اجرحها واكسر خاطرها

رامي .... بعين الله يا منير ، بس نصيحتي بما بخص دكتورتك ، بلاش تواصل معها بكون افضل ريح راسك، ما بتعرف شو ممكن يصير 

.

.

.

منى .... شو يا بنت اهدي

نور..... ليش ؟!

منى.... المره الاولى الزلمه خدمك هالخدمه وجبتيه من اربد لهون 

هو ضابط يعني شغل ما بشتغل ممنوع افهمي شو رح تحكيله هالمره 

نور .... شوفي ما احلى هالرسمه عجبتني كتير

منى..... عمان مليانه رسامين بنات وشباب شوفيلك حدا يرسمها 

نور...   ما رح يرسموه بروح

منى ..... بروح !!؟!! 

نور..... مو كل الي برسموا رسماتهم فيها روح وحتى تصويرهم 

منير كل اشي بعمله بكون فيه حياة 

منى ..... هااااا لتكوني !!!! هاذ متجوز وعنده بنات 

نور......لا يروح فكرك لبعيد انا معجبة فيه بس 

       (( نفس عبارة منير ))

       ‏

منى ....   ما هو اوله اعجاب يا حلوه 😌   

        ((نفس عبارة رامي ))

نور ..... هلأ بشو بدي اتحجج ليجي يرسملي هالرسمه ببيتي

منى..... يا حبيبي وبالبيت كمان؟؟ 

نور .... شو قصتك انتي ، اذا بوافق بعطيه المفتاح وبرسمها على مهله باي وقت بدو اياه، انا ما بروح البيت اصلا وانتي بتعرفي 

منى .... اسمعي يا صديقتي، مو لانه عمك تارك الك الحريه بكل اشي تصيري تشتغلي على راسك 

نور .... منى لا تنسي اني مو صغيره، وعقلي بوزن بلد، والثقه الي عمو معطيني اياها مستحيل ازعزعها ، كمان انا بعرف شو بعمل، واكتر من مره جبت عُمال لبيتي وكنت مشرف عليهم ، وعمو ما اعترض بالعكس كان معجب بكل شغله بعملها ...  

منى .... على راحتك ، ليوافق الزلمه بالاول 

نور..... حاسس انه رح يوافق  

 ......

ام محمد..... مرتك  متى راجعه

منير.....اليوم رايح اجيبها

ام محمد.... الله اعلم متى رح تحبل مره ثانيه 

منير .... يما مشااان الله لا تجيبي سيرت الحمل قدامها، حرام 

ام محمد.... يحرم جلدها عن عظمها، ليش ما انتبهت لحالها، شغلتها تعبه ، بتولد نسوان ، يعني شد وقوة، ليش ما دارت بالها على حالها 

منير..... اشي وصار بلاش نظل انلومها، يعني هي حابه تنزل يمااا؟!! الله يعينها

ام محمد.... اه والله،  الله يعينها ، ربنا يعوضكم عن قريب

منير .... آمين 

رن تلفون منير 

مجرد ما شاف اسم (الدكتوره نور) كهربا ضربت جميع انحاء جسمه 

اخذ نفس 

منير..... السلام عليكم 

نور.... وعليكم السلام كيف استاز منير 

منير ..... الحمدلله 

قام من عند امه وسكر السماعه شوي

منير..... انا رايح اجيب منى والبنات 

ام محمد.... الله معك 

فتح السماعه 

منير ... كيفك دكتوره

نور ... ماشي حالي ، انا خجلانه منك كتير كتير مو عارفه كيف بدي افتح الموضوع معك 

منير .... لا تخجلي تفضلي 

نور .... بالنسبه للرسومات الي بعتلي اياهم من اسبوع عجبتني رسمه كتير 

منير..... على حسابك بس انزل لعمان رح جيبلك اياها هديه مني 

نور .... مشكور كتير كلك زوق بس مو هاد طلبي☺️

منير(باستغراب)...شو؟!

نور .... والله خجلانه منك ، بس انا لما يعجبني شي بكون مميز بحب يكون عندي والي 

منير .... صفة القوة والثقه بالنفس 

نور ... بدي نفس هاد الرسمه تنرسم على جدار ببيتي 

منير(بدون تردد) ..... تكرمي 

نور .... جد بتحكي؟؟ 

منير .... اكيد دكتوره

نور .... بس هالمره الك اجره

منير (بزعل).... هيك بطلت انا آسف ما رح ارسم هاد تعتبر اهانه 😡 

نور.... لاااااا 🥺 انا آسفه والله انا آسفه ، ما عاش الي يهينك ليش قلت هيك  

منير .... دكتوره لما الواحد يقدم خدمه او مساعده لشخص حابب يقدمله هالشي عيب نوخذ مقابلها 

نور(صوتها تغير وصار فيه رجفه كانها بدها تبكي )..... اقبل اعتزاري بترجاك وخلص اعتبرني ما طلبت هالطلب آسفه آسفه

وشكرا الك  سلام 

منير( حس بشعورها) .... لا استني دكتوره ، انا ما بقدر ارفضلك طلب ابدا 

نور (صوت متقطع)... معلش برجع رنلك 

منير .... زي ما بدك  سلام  

كانها صارت تبكي ؟! لهدرجه حساسه اففففف 

اخذ نفس طويله وراح يجيب ندى والبنات 

...

ام محمد.... الحمدلله على السلامه

ندى..... الله يسلمك عمه

ام محمد..... ليش هيك نحفانه وجهك اسود اسود

ندى ..... ....

منير .... يماااا 

ام محمد.... شو قلت انا ؟!! ئي

ندى ... يلا يا بنات فوق 

طلعو على بيتهم

ندى .... اسمع اقلك امك ... قاطعها منير

منير ... ندى امي بتحبك بس بتحبني اكثر وفهمك كفايه 

ندى ....  ايوااا هيك قصدك 

منير... بابا روحو لغرفتكم 

البنات راحوا 

منير ... مليون مره قلتلك همه البنات موجودات ما في نقاش بهيك مواضيع قدامهم 

ندى .... شو بدي اتحمل لاتحمل 

منير.... تتحملي؟؟  ندى كل الي احنا فيه انتي السبب 

ندى .... انا 

منير.... انتي الي مصره على الشغل واهمال بيتك والبنات، حتى انا وصلني الاهمال يا ندى 

ندى .... ...  

منير .... الحمل راح بسبب اهمالك لنفسك بتنكري؟؟! 

ندى... ..... 

منير .... ليش ساكته

ندى.... .....  

 منير .... على كل حال الحمدلله وبعوض الله ، وبرجع بحكيلك ديري بالك علينا وعلى حالك، وبالنسبه للقرارات الي بتعمليها بدون علمي ما بدي اياها مره ثانيه، والحمدلله على سلامتك 

 ‏ندى..... وين رايح 

 ‏منير.... البيت اله اسبوع بدونك ، بدي اشتري شويت اغراض 

 ‏ندى.... طيب   

 ‏ما حب يزعل ندى وقرب منها وباس خدها ، وطلع بره البيت

  ‏

شو رح يستجد احداث بالجزء القادم  ؟؟

 

السلام عليكم 

الرجاء من القراء عدم الحُكم على اي شخصية بالقصة الان، ورجاءاً من المتابعين النقاش والتوقعات الي ممكن تحدث فيما بينكم؟! 

واليوم اكتشفت في متابعين للصفحه بقرأوا  مش متكلفين انهم يتفاعلوا، على الاقل شجعوني!😡! اشكروني طيب 😭   

لا تنسوا انه القصة واقعية والبطل متابع معنا ، بنوجه تحية من خلال الصفحة اله ..   

نتابع ...... 

الجزء الثالث 

رن تلفون منير هو بالسوق، اتجه ناحية سيارته وفتح الخط 

منير ... تفضلي 

نور ... بعدك زعلان؟

منير(بابتسامه).... لا ابدا ،بس اخذت على خاطري شوي

نور .... الي شي ساعتين متردده ارجع رنلك لاني حاسس اني زعلتك فعلا

منير .... مو مشكله 

نور .... يعني سامحتني 

منير .... اكيد الي مثلك ما بنزعل منه ابدا 

نور... ... 

منير(بينه وبين نفسه).... يييييي شو خبصت مره ثانيه 😳

قصدي انه ما كان قصدك 

نور .... يبقى متى رح تبلش

منير ... بلش شووو ؟! 

نور .... ههههههه 

منير..... هههههه بمزح معك ، متى ما بدك

نور..... شوف شو رح تحتاج من فَراشي رَسم، والوان وابعتلي رساله، وانا بشتريهم، بكونو جاهزين بالبيت 

منير.... رح ابعثلك اياهم اليوم ، بس ممكن سؤال 

نور.... اه تفضل طبعا

منير .... ليش اخترتي هاي الرسمه بالذات لتكون لوحه على حائط

نور .... بصراحه لانه فيها حب وحنان ورقه 

منير ..... كله هاذ برسمتي موجود ؟! 

نور .... واكتر من هيك

منير ... كيف شفتي كل هاذ من الرسمه ؟!

نور..... الرسمه مو مجرد الوان وخطوط ويطلع بالآخر منظر او صوره شخص، الرسمه روح بتتكلم، بالنهايه اللوحه بتكون عاكسه شخصية الي برسمها  

منير(مبتسم) ... يعني انا حنون ومُحب ورقيق ؟! هههههه

نور (بخجل).... انا هاد الي شفته باللوحة 

منير ... كيف شفتيه وحللتيه

نور .... لا تنسى اني دكتوره يعني علم الاجتماع جزء من علم النفس هههههههه

منير..... ههههه صحيح 

نور .... كم بدك وقت لتخلص الرسمه ؟

منير .... حسب مساحة الجدار 

نور .... هو 5 في 5 

منير ... ووووو  المساحه كبيره! بدها تقريبا اسبوع 

نور .... اشتغل على مهلك،ممكن تضل بالبيت وتبات فيه وكل شي بوصل لعندك ، وبتقدر ترسمها على مراحل متى ما بدك بتجي بتكملها

منير .... ما بيزبط على مراحل مزج الالوان ممكن يختلف واللوحه تصير مو حلوه 

نور .... شو المناسب وانا مستعد 

منير ... طيب اليوم بالليل بردلك خبر بأذن الله 

نور .... اوك 

.

.

رامي .... انت مش مزبوط

منير .... يا زلمه عرضت علي مصاري بس ما قبلت 

رامي .... بعرف انك مش بحاجة مصاري ، انت في ببالك اشي 

منير .... رامي هالبنت مش عارف ارفضلها طلب، باجي ارفض اشي بمنعني، ولما البي طلبها بنبسط كثير وقلبي برقص فرح 

رامي .... يا عيني وقعت ما حدا سمى عليك 

منير..... شو وقعت ما وقعت سكر ثمك بلا جنان 

رامي .... انت على مشارف الاربعين لتكون هاي المراهقه الثانيه 

منير .. ... ما في من هالسوالف انت بتخبص

رامي.... اصلا انت عن دون شباب حارتنا ما حبيت حب مراهقه ولا عمرك انتبهت لهالشغلات ، بجوز تأجلت لهاذ السن هههههههه  

منير ..... يعني حط حالك محلي ، بترفض تقدم هالخدمه خاصه اذا كنت بتحبها 

رامي .... ايوااااا بتحبها اعترفت 

منير ..... يا اهبل قصدي بحب هالخدمه يعني الرسم ، لا تصير تلفلفلي يمين وشمال 

رامي.... فكرت بتحب البنت 

منير .... رامي البنت دكتوره وغنيه وملكة جمال انا وين وهي وين 

رامي( بمسخره) .... الحب لا يعرف المستحيلات 

منير .... صرت تتمسخر  يلا سلااااام 

رامي ..... بمزح معك 

منير ..... تعبان بدي اروح انام  سلااااام 

رامي ..... ههههههه سلاااام يا دكتور ههههههههه

..

.

صف سيارته قدام البيت، وسرح شوي وغمض عيونه واخذ نفس 

وتخيل ملامح نور وابتسم 

منير .... شو الي بصير معي ؟! 

تلك اللحظة التي تتسلل مـلامحكِ فـي ذاكرتي، هي من أكثر اللحظات الجميلة التي تجعلني ابتسم لا إراديًا.

بعث لنور لائحة بالاغراض الي بحتاجها الرسمه 

وبعثلها رساله 

منير....(( رح اخبرك متى رح انزل لعمان، ان شاء الله ))

اجا رد سريع من نور 

نور...(( بالأنتظار..... شكرا كتير ))

.

.

.

ندى .... تأخرت !!!

منير ...  البنات نامو

ندى.... اها

منير .... مشتاقلهم نامو بكير  الي اسبوع ما شفتهم ولعبت معهم 

ندى .... البنات عندهم مدرسه غايبين الهم فتره ، يا ريت بكره الصبح تروح معهم ، وتخبر معلماتهم يكتبوا لكل وحده الدروس والواجبات الي راحو عليهم لحتى يدروسها 

منير..... انا اروح؟!!!!! وانتي ؟!

ندى .... بدي اداوم  

منير .... يا سلام ، وانا ما عندي دوام يعني؟؟ 

ندى ... منير الي اسبوع مجازه ولازم اداوم بكره ما أتأخر 

منير .... والله انا شغلي اهم ، هاذ اولا ،وثانيا، هذول بنات انتي زوري مدرستهم لو مره وحده يا ندى مره وحده بس، لو توخذي اجازه كمان يوم ما رح تخرب المستشفى وراكي 

ندى ...  طيب ، اصلا انا لو داومت ما رح ادوام داخل غرفة الولاده  هالاسبوعين  

منير ....  تصبحي على خير .

.

.

ندى ما عرفت تنام، طلعت من غرفتها ورنت على امها 

ام ندى .... شو في بنص هالليل جوزك عرف 

ندى .... لا يماا 

ام ندى ... لعاد شو مالك

ندى ..... مضايقه 

ام ندى .... وحدي الله واهدي، هاي ارادة الله 

ندى ...... حاب اخذ اجازه طويله 

ام ندى..... شو مانعك ، اصلا حالتك بدها راحه شهر 

ندى..... دوامي اسبوعين بالخداج ، هناك افضل وراحه 

ام ندى .... طيب يما روحي نامي وانتبهي لجوزك وبناتك 

ندى .... تصبحي على خير 

.

.

.

منى.... وافق؟ 

نور .... اها

منى..وبعثلي شو بحتاج الوان واغراض لازمه 

منى..... بدون مقابل 

نور .... اكيد بدون مقابل 

منى.... عرضتي عليه 

نور.... زعل واعتبرها اهانه وضايق كتير

منى.... اه وبعدين 

نور..... اعتزرت منه وقبل الاعتزار 

 منى.... انتي ملاحظه انه هالقصه فيها إن ؟!! 

 ‏نور.... بعدين معك منى ، لا ان ولا كانَ، انتي مستوعبه انه الزلمه متزوج وعنده بنات مستغربه من تفكيرك والله 

 ‏منى.... هاد الي بدي اظل اذكرك فيه ، متزوج وعنده عيله واولاد لا تنسي ابدا فاهمه لااا تنسي يا نور .

نور .... وانتي لا تنسي انه نور تقدملها كتير شباب بمواصفات اي بنت بتتمناها ، وما وافقت، لا تنسي، فاهمه،، لا تنسي يا منى اففففف 

 ‏.

 ‏.

 ‏. 

ام محمد ..... ليش مرتك وهي نازله اليوم ما سلمت عليه، مرت من حدي ولا كأني قاعده  

منير.... يماااا انتي العاقله والكبيره اتركينا منها ، ندى بحاله نفسيه تعبانه ما بتنلام حاليا 

ام محمد ... مش اول مره بتنزل الي ببطنها!! ليش هالمره يعني؟!! 

منير ....  انا تعبان نفسيا اكثر منها 

ام محمد..... سلامتك يا قلبي

منير .... الله يسلمك بدك اشي ؟ طالع على شغلي 

ام محمد...  الله معك ويحميك ويرضى عليك 

.

.

.

.

نور .... بعد اذنك عمو 

عادل.... يعني عمو شغيل ويبات ببيتك مو زابطه 

نور..... عمو منير مو شغيل هاد ضابط بالآمن، مَعرفه 

عادل .... ضابط؟! 

نور .... اها، وبرسم وطلبت رسمه منه هو ما قصر وحكالي تكرمي 

عادل.... يعني هاوي 

نور.... بالضبط

عادل .... المهم انك متأكده من شخصيته ، وانا رح مر بس يبلش،  اتعرف عليه 

نور..... ممتاز رح خبرك بس يبلش

.

.

.

نور على سريرها بتتصفح رسومات منير وبتدقق فيهم، غمضت عيونها واخذت نفس ، وشافت خيال منير  

نور .... 

 ما هي  المعجزة التي وضعها ربي فيك حتى افكر بك 

 ‏.

 ‏.

 ‏.

ندى..... ليش يعني اسبوع؟ 

منير.... الشغله بدها اسبوع 

ندى.... كل يوم بتروح وبتيجي ليش لتضل هناك 

منير .... تعب علي كل يوم اروح واجي 

ندى(بصوت عالي) .... يعني صاحبك هاد مو مقدر انه عندك بيت؟!!

منير.... معلش بلاش الصوت العالي انتي بتعرفي ما بحب هالصفه ‏

وثانيا، لما حضرتك اخذتي اجازه بدون علمي وقضتيها بعيده عن بيتك ليش ما فكرتي انه عندك بيت 

ندى.... الوضع بختلف

منير(بحنيه) ...  ندوش بعرف انه الوضع بيختلف ، مشان الله انا بحاجة هالاسبوع، انا مضايق وتعبان نفسي افهميني 

ندى..... على راحتك 

منير ... ورح اتصل فيكي فيديو كمان تشوفي الي بعمله 

ندى.... ..... 

منير.... بالنسبه للبنات امي ما بتقصر ، بس الافضل انك تراضيها لانها ماخذه على خاطرها منك

ندى .... ..... 

.

.

.

بعث منير رساله لنور خبرها 

منير ... بكره الصبح رح كون باب البيت 

كان رد نور متأخر ساعه 

نور..... آسفه كنت مشغوله ، اي وقت تقريبا الصبح

منير .... عشره 

نور .... بازن الله عشره الصبح بكون بالبيت بستناك 

.

.

.

صباح اليوم الثاني...

وقف قدام المرايه وحاول يكون مرتب كتير وانيق ، وجهز بعض الاغراض الخاصه الي بحتاجها بهالاسبوع 

وساعه عشره الا ربع  كان منير باب بيت نور  ، واقف قدام سيارته 

اجت نور من بعيد بسيارتها وابتسمت اول ما شافته، كان انيق على غير العاده 

نور .... صباح الخير ، لا تحكيلي اني تأخرت عليك الساعه عشره بالضبط

منير ... صباح النور ، مش متأخره بس انا جيت بكير 

نور .... تفضل

 ومشت وفتحت باب البيت 

 ‏نور.... كل الاغراض موجوده ممكن تتفقدها ازا في شي ناقص 

 ‏

 ‏اتفقد منير الاغراض 

 ‏

 ‏منير.... تمام ، واذا بحتاج شي بروح وبجيبه 

 ‏نور..... لا تغلب حالك اتصل فيه وانا بجيبه مباشره 

 ‏منير... طيب، ممكن اعرف وين رح أنام ههههههه 

 ‏نور مشت باتجاه ممر بالبيت 

 ‏نور..... تفضل 

 ‏

 ‏وفتحت غرفه 

 ‏

 ‏نور.... هاي غرفة اخي وائل ، بتقدر تنام فيها وخد راحتك 

 ‏منير.... الغرفه حلوه ما شاء الله عنها 

 ‏نور..   فيها حمام خاص 

 ‏منير..   اها (واجا نضره على بابين باخر الممر) انتبهت نور 

 ‏نور..... الغرفه على اليمين لبابا وماما الله يرحمهم ، والي على شمال غرفتي

 ‏منير..... البيت حلو كتير ومنظم 

 ‏نور.... شكرا ، انا عملت شغلات كتيره فيه بعد ما صار ملك الي

 ‏منير... ذوقك حلو 

 ‏نور ابتسمت

 ‏نور.... بالنسبه للقهوه والشاي ، كله موجود بالمطبخ وشغلات خفيفه ، والاكل رح يوصلك لهون ، 

 منير ... لا تغلبي حالك بدبر حالي 

 ‏نور...  لا ما بصير انت ضيف عندي وببيتي ، صحيح بتعرف تعمل قهوه او شاي ؟!!

 ‏منير.... بحاول هههه

 ‏نور.... جد بحكي ازا ما بتعرف بعملك كميه  ب coffee keeper

 ‏منير.... لا بمزح بعرف اعمل ، اصلا انا هاوي رحلات واغراض الرحله دايما بسيارتي واكيد القهوه اشي اساسي 

 ‏نور.... حلو كتير، انا بحسدك 

 ‏منير... على شو؟؟

 ‏نور..... بتمارس كل هواياتك وعندك وقت لالها 

 ‏منير..... بتقدري تعطي لنفسك وقت ، وتتمتعي 

 ‏نور..... صحيح بس انا كسوله بحق نفسي 

 ‏منير.... ممكن سؤال بعد اذنك 

 ‏نور.... تفضل 

 ‏منير..... ليش اخترتي هالحائط لينرسم فيه؟ 

 ‏نور(ابتسمت)....  انت لو مطرحي اي حائط بتختار؟؟ 

 ‏منير.... بصراحه نفس الي اخترتيه 

 ‏نور..... ليش؟! لشوف نفس اسبابي 

 ‏منير..... اولا الجدار الي مقابله يخلو من اي رسومات او لوحات معلقه ، وثانيا قباله مباشره قعدة الصاله يعني الي بكون قاعد بتمتع بالرسمه الي بتشعره بوجود الطبيعه امامه ، وثالثا اهم اشي ،الالوان الي بالرسمه رح تعطي للصاله روووح وحيوية 

 ‏نور(متفأجاة، ومعجبه برأي منير).... ووواااو  

 ‏منير..... شووو؟؟ 

 ‏نور..... نفس افكاري تماما 

 ‏منير...... لانه الصح 

 ‏نور...... فعلا 

 ‏منير... رح بلش شغل 

 ‏نور..... وانا رايحه لشغلي واي شي بتحتاجه رنلي 

 ‏منير..... ان شاء الله 

 ‏

 ‏نور وهي طالعه، منير راقبها ودقات قلبه بدق بكل خطوه بتخطيها  اتذكرت نور شغله والتفتت بسرعه لقت منير بطلع عليها ، هو بسرعه نزل نظره لتحت  

 ‏نور.... استاذ منير 

 ‏منير.... نعم

 ‏نور..... بدي منك طلب لو سمحت 

 ‏منير..... انتي بتآمري

 ‏نور.... انت مُدخن فيا ريت لو تكرمت يكون بره البيت ، ريحة الدخات بتعلق بالبيت مباشره ، بدون زعل ☺️

 ‏منير..... ان شاء الله ، انا اصلا ما بدخن ببيتي، دايما بره البيت ، هيك متعود 

 ‏نور.... ممتاز ، وشكرا الك كتير

  ‏.

  ‏.

  ‏.

  ‏منى..... ليش تأخرتي 

  ‏نور.... كنت بالبيت اليوم منير بلش الرسم ، شو يا منى نفس ما فكرت بخصوص الرسمه هو مفكر ، واسلوبه بالكلام بجذبك غصب عنك

  ‏قاطعتها منى 

  ‏منى..... لوحدكم؟؟ 

  ‏نور...... ليش هالسؤال ؟! 

  ‏منى..... يعني ما بصير 

  ‏نور..... منى انا مو صغيره ، وهاد شغل 

  ‏منى..... بس مشانك بحكي 

  ‏نور.... بعرف ، بس انتي بتحسسيني انه في شي بيني وبينه 

  ‏منى..... لانه فعلا في شي

  ‏نور.... شووو؟!!! انت انجنيتي

  ‏منى..... هيك الي شايفه ، اعجاب ، وديما بتمدحيه، وبدك تظلي تحكي عنه 

  ‏نور...... شو يعني؟ 

  ‏منى... انا صاحبتك من زمان ، وتعاهدنا نكون خوات ، انتي مو بس معجبه بهالشب انتي بتميلي اله 

  ‏نور... قصدك بحبه؟!!! 

  ‏  ‏منى..... مش حب حب ، بس بتميلي كتير اله وهون الخوف، اذا بتستمري بالحكي معه ، وبلقائه رح تقعي، هيني حذرتك وانتي متل ما بتحكي كبيره مو صغيره 

  ‏نور..... طيب اسكتي بلا هبل ، صحيح معجب فيه وبحب اناقشه واستمر بالكلام معه بس مو لهدرجه 

  ‏منى.... انا الي عليه حكيته الك انتي حره .

  ‏.

  ‏.

  ‏.

ثاني يوم انجز منير بالرسمه كتير 

رامي .... الو يا منير بيك 

منير... هلا 

رامي ... وين صرت 

منير... داخل بيت بجنن وحلو بكل ما فيه حتى صاحبته بتجنن 

رامي.... اه يا عم ، شكله علقت الصناره 

منير .... شو رأيك تيجي بكره عندي

رامي .... وشغلي؟

منير ... بعد الدوام 

رامي .... والمره شو بدها تعمل فيه 

منير ..... احكيلها زياره لصديقي بعمان 

رلمي .... واذا مرتك حكت مع مرتي 

منير..... عادي بنكون صادقين اكثر الاثنين عند صديق النا بعمان 

رامي .... لبكره بردلك خبر، بس ليش بدك اجي 

منير .... بنتسلى شوي وبتشوف هالبيت ما شاء الله 

رامي .... وبشوف الدكتوره ها ها ها 😈

منير ...  رامي ، استحي ، اصلا ما بتيجي بتبعثلي الاكل دليفري 

ما شفتها الا مبارح الصبح ومكالمه وحده 

رامي .. يا زلمه بمزح 

.

.

.

.

 ندى ... لا تزعلي مني يا عمه والله كانه مضروبه على راسي

 ‏ام محمد .... ما بلومك ، بس الدنيا ما انتهت هون، بكره بتحبلي وبتعوض ان شاء الله ، بس لا تهملي بحالك وترجعي تتأخري بالحمل 

منى(بحزن)..... ان شاء الله 

ام محمد .... بعد شهرين بتراجعي دكتور شاطر وبتشوفي وضعك بلكي اعطوكي اشي لتحبلي بسرعه 

ندى(بحزن اكثر)..... معلش عمه نغير هالموضوع 

ام محمد .... اه زعلتي يعني لاني بدي اياكي تحبلي بسرعه 

ندى .... لا ما زعلت 

ام محمد .... مهو العمر اله دور، وكل ما كبرتي، بتقل فرص الحمل

ندى....  بعرف يا عمه

ام محمد .... لا تزعلي مني يا ندى ، انا ام مثلك ، وحاب لابني ولد ، حطي حالك مكاني، والله قلبي ناطف على ولد لمنير 

ندى..... لعاد انا قلبي مو ناطف على ولد يا عمه، حابب اخ لهالبنات 

بس ربك راد اني ... (وسكتت شوي) ... اجهض

.

.

.

.

ثالث يوم.....

نور ..... صباح الخير 

منير(بفرح).... صباح الورد 

نور..... يعطيك العافيه

منير ... يعافيكي، شوفي الشغل واحكيلي رأيك 

نور ... وووااو  بلشت ملامح الرسمه تبان والالوان قصه لحالها ، برافو عليك.  

كانت نور متل الطفل الصغير الي فرحان بلعبه جديد ، مركزه بالصوره وبتتطلع على منير وبتبتسم ، وكان منير مش اقل منها فرح ، ابتسامة نور بتدخل قلبه وبتنعشه وبتزيد دقات قلبه

 

منير .... اول يوم اشتغلت لساعه 12 بالليل ، ومبارح كمان 

نور ... يعني مستعحل لتخلص 

منير .... انا لو بأيدي بضل سنه ارسم فيها لحتى......  ((وسكت خوف من انه يخبص بالحكي لانه حريص على كل كلمه بتطلع منه لنور وكمل كلامه )) استمر بالرسم بهالبيت الحلو 

نور..... بدك تعزرني اني ما بشق عليك ، بسبب شغلي 

منير.... لا عادي خذي راحتك

نور .... محتاج شي؟! 

منير(بأندفاع).... بدك تروحي؟! ااا.. ااا. قصدي خلص رح ترجعي لشغلك؟

نور ..... للأسف اه استاذ منير

منير حاول يفكر بسرعه لحتى يفتح معها موضوع وتضل موجوده 

منير .... بلاش من استاذ هاذ الكنيه ما بتناسبني ههههه

نور .....منير بيك ؟! 

منير .... معلش بلا كنيه بكون افضل 

نور .... ازا بدك هالشي ، وانا كمان بلا من الدكتوره 

منير..... اتفقنا 

نور.... معلش سؤال شخصي منير 

منير .... تحت آمرك اسئلي الي بدك اياه 

نور ... انت شو دارس ؟؟! 

 منير ..... انا درست بكلية عسكريه ومباشرة التحقت بالامن العام 

 ‏نور.... اها  وزوجتك

 منير .... تمريض 

 ‏نور..... ليش من البداية ما درست بجامعه وكملت الدراسات العليا

 ‏منير..... لانه مش كل الناس ظروفها بتسمحلها تدرس 

 ‏نور.... اها انا آسفه 

 ‏منير..... لا تتأسفي ، بس بالوقت الي كنت بدي ادرس فيه، ابوي توفى واخوي الكبير كان ملتزم ماديا بمشروع اله وبعدها تزوج ، وكنت انا المسؤول عن اخواني وراتب ابوي التقاعد ما كان بكفي، 

 ‏وقعت المسؤولية عليه ، والحمدلله ما قصرت مع الكل ، وحاليا همه متزوجين ومستقرين.

 ‏نور..... كتير حلو ، اكيد هنه ممنوين الك 

 ‏منير..... علاقتي معهم جدا ممتازه، وهاذ كان واجبي تجاهم كوني كنت الاكبر بعد اخوي الكبير 

من بعيد سياره وقفت ونزل منها عم نور ، هي قامت وتوجهت اله 

نور.... هلا عمو

عادل.... فكرتك طلعتي لشغلك 

نور .... مريت على استاز منير لشوف اذا بدو شي ، (وطت صوتها وقربت من عمها) هو ضيفنا ما بدنا نقصر معه 

عادل..... السلام عليكم 

منير .. وعليكم السلام

عادل..... يعطيك العافيه

منير.... يعطيك الصحه ربنا

نور..... هاد عمي عادل، وهاد الاستاز منير عمو

منير..... اهلا وسهلا فيك

عادل..... نور اذا اعجبها شي اكيد بدها اياه ههههههه

منير..... الدكتوره نور بيطلعلها كل اشي عمي 

عادل .... انا كنت قريب من هون وحبيت امر اشوفك 

نور..... تعال عمو شوف هالرسمه 

عادل..... انا ما بفهم بهيك شغلات بس يخلص الرسم كله بشوفها 

نور .... على راحتك

عادل..... انتي روحي لشغلك انا بدي اضل هون شوي 

نور..... طيب ، اذا بتحتاج شي استاز منير اتصل فيه سلااام 

منير(بينه وبين نفسه ) .... شو جابه هاذ كنا بنحكي 

عم نور من النوعيه الي بحب يدخل بموضوعات اقتصاديه لانه طبيعة شغله تجاره ، ومنير شخص مثقف بكل اشي تقريبا ، واعجب عادل فيه وبأسلوبه، ومعرفته بالامور الاقتصاديه ، وطرح على عادل فكرة مشروع مطلوب بالبلد ، واعجب عادل فيها وصار يفكر بالموضوع.... 

وخلال الحديث رن ابن اخوه لعادل الي بالعقبه على عمه (ابن عم نور )

يوسف.... وينك يا عمو 

عادل .... ببيت نور 

يوسف شو بتعمل على هالصبح 

عادل.... في شب معرفه لنور بيرسم على جدار الها 

يوسف(تغير نبرة صوته).... شب بيرسم؟؟ 

عادل ... ما شاء الله عنه رسام وغير هيك بيفهم بالتجاره

يوسف.... ايواااا كم عمره؟؟ 

قام عادل من عند منير وصار يتمشى بالحديقه 

عادل .... بالثلاثين 

يوسف ... هي بنت اخوك ما بدها تعقل 

عادل... نور اعقل وحده فيكم كلكم

يوسف.... يعني لمتى؟! 

عادل..... انسى يا يوسف نور ما بدها اياك عدنا هالقصه الف مره 

يوسف.... دمي بفور بس اعرف انها قريبه من شي اسمه ذكر 

عادل .... نور هي الي بتقرر شو بتختار احنا ما بنقدر نفرض عليها رأينا ، مو لانها بدون اب وام نضغط عليها ، كمان عندها اخ بتوخد رأيه 

يوسف .... وائل؟!!! هو هاد اخ ،!؟! بآخر الدنيا ما بهمه اله دراسته والشغل ، معتمد عليك مشانها

عادل ..... انا عمها بمثابة ابوها يعني الشغله ما بدها فلسفتك  

يوسف.... وحضرة الي برسملها متى رح يخلص شغله ببيتها

عادل .... اله ثلاث ايام  وكمان قدهم اذا مو اكتر ، لانه ببات بالبيت رح ينهيها بسرعه 

يوسف(ولع راسه).... شو بتحكي ؟! بنام؟!! يا سلام وانت يا عمو موافق ؟!  

عادل .... الي بيسمعك بفكر نور بتنام بالبيت كمان!!! اعقل بلا تخبيص 

يوسف .... هلأ رح اجي على عمان 

عادل..... لا حول ولا قوة الا بالله ، كل ما نحكي شغله بتخص نور ، بتيجي لعمان ، اقعد واهدا الشغله مو محرزه 

يوسف.... محرزه ونص سلام (وسكر التلفون)

عادل..... الله يهديك 

(( يوسف ابن عمها عمره 31 سنة ، عنده تجاره كبيره خاصه اله بالعقبة، ماجستير ادارة اعمال ، بحب نور ومن همه صغار ، بس نور بتعتبره اخ مثل وائل ، ورفضته اكثر من مره، وبغار عليها، وبحاول بكل الطرق انها توافق عليه ))

.

.

بعد العصر .. 

منير .... وينك ؟؟

رامي .... على الطريق ، ابعثلي اللوكيشن 

منير .... طيب

 

بعد نصف ساعه  

 رامي(بعد ما صَفر ) ..... شو هاذ يا زلمه  ؟!!! 

 ‏منير.... شايف؟! 

 ‏رامي.... بس الصراحه اشي كُباري 

 ‏منير .... شايف جمال هالبيت ، جمال نور اكثر بكثير

 ‏رامي( بسخريه).... يا سلااام اه يا قلبي (وحط ايده على قلبه)

 ‏منير(بزعل)..... رامي اذا بدك تقعد معي باقي هاليوم اقعد بحترامك 

 ‏رامي..... هههههههه  ما شفت وجهك لما قلت "جمال نور اكثر بكثير"  

 ‏منير..... شوو؟!! 

 ‏رامي.... عيونك بتلمع وكلك رقه وحنيه ، شو يا وحش ، وين منير بيك (بصوت عالي ) ههههههههههههه

 ‏منير..... ما رح تبطل جنانك 

 ‏رامي..... بدي اشوفها 

 ‏منير..... مين؟! 

 ‏رامي.... نور 

 ‏منير..... يا ريت تيجي بس اليوم الصبح مرت شوي واجا عمها كمان 

 ‏رامي.... كل العيله جاي لعندك 

 ‏منير...  مش عارف الاقي حجه اخليها تيجي

 ‏رامي.....  انه لون من هالالوان خلص

 ‏منير..... ما في لون بدو يخلص

 ‏رامي..... لعاد شو 

 ‏منير اجت ببالي فكره 

 ‏

 ‏منير رن عليها 

 ‏

 ‏منير..... ممكن تمري عليه شوي اذا فاضيه

 ‏نور..... خير في شي؟؟ 

منير .... في فكره حاب اخذ رأيك فيها 

نور ... شو هي ؟! 

منير..... ما بيزبط احكيها على التلفون لازم على الواقع 

نور.... طيب ، بس حاليا مشغوله في زبونات كتير بالسنتر، بحاول اجي 

منير .... بأنتظارك.       سكر التلفون 

رامي .... شو جايه؟! 

منير .... مشغوله رح تحاول

رامي ...... يلا بنشوفها مره ثانيه ،،، تعال فرجيني البيت من جوى

منير .... بس بشرط لا تلمس اشي، هاذ امانه

رامي .... تعال اكيد ما رح المس اشي 

منير ... هاي الغرفه بنام فيها ، لاخوها دكتور الي بره البلد 

رامي..... ووووووو ولا عمرك حلمت تنام على هيك غرفه 

منير .... ههههههههه شايف 

رامي..... طيب هالغرف هاي شو فيهم 

وكان بدو يفتحهم بس منير منعه

منير .... ما بصير مسكرات عيب 

رامي .... يزلمه بدي اشوف

منير..... غُرف نوم 

رامي .... شو عرفك

منير..... نور حكتلي ، انها وحده غرفتها وحده لابوها وامها الله يرحمهم 

رامي..... بدك تقنعني انك بعدك ما شفت غرفتها 😉

منير .... هاااا لا  والله ما شفتها 

رامي ..... منيييير 🤨

منير .... بصراحه فكرت اني افتحها واشوفها بس ترددت كثير ، شعرت اني بخون الأمانه 

رامي.... بلا فلسفه تعال نشوفها 

منير ..... لااااا تعال جاي اعملك فنجان قهوه وارجع اكمل شغلي 

لا تلهيني 

رامي ..... طيب امري لله هههههههههههههههه.

.

.

 منى ... وين رايحه وتاركه هالعجقه 

 ‏نور... . واصله البيت شوي 

 ‏منى.... اي بيت بالضبط؟!🤨 

نور .... بيتي

منى..... لاااااااا نور مو وقته

نور ...  اقل من ساعه بس

منى ..... ليش بدك تروحي

نور... في شغله بده يقلي اياها منير مهمه قبل ما يبلش فيها ياخد رأيي

منى..... يا ربي ، اول مره من لما بلشنا شغل بهالسنتر بتتركي الشغل وبتطلعي 

نور ...... شو قصدك؟! 

منى..... ما قصدي شي الله معك بس لا طولي علي 

نور..... طيب     بااااي

.

.

بعد ساعه 

دخلت نور على بيتها وتفاجأت بوجود رامي 

نور..... مرحبا 

منير....هلا 

رامي بس شاف نور انبهر بجمالها ما توقع تكون مثل ما حكى عنها منير لدرجة انه ضل قاعد بمكانه ما تحرك 

منير. ...رامي هاي الدكتوره نور ، وهاد رامي صديقي استاذ مدرسه 

رامي....تشرفت بمعرفتك دكتوره، طلعتي احلى مما وصفك منير 

منير انحرج من كلمة رامي، وقرب منه وبصوت واطي

منير..... فضحتني، انتبه لكل كلمه بتقولها 

خجلت نور من كلمة رامي وبان عليها الخجل

 

نور .... اهلا وسهلا فيك

منير .... معلش دكتوره ، اعذريني لانه صديقي رامي هون ببيتك ، كان بعمان بشغل خاص وطلبت يمر عليه شوي

نور .... عادي منير ، اصدقاءك ضيوفي، كان المفروض خبرتني لحتى نقوم بالواجب ، مشان الغدا 

رامي..... شكرا الك كلك ذوق والله 

نور .... شو هي الفكره الي حاب تحكيلي اياها 

منير(بتأتأه).... هو ااا. ااا. كن كنت بدي اخد رأيك انه نغير لون الخلفيه اليمنى  للابيض بلاش الازرق الفاتح

نور..... هههههه كان خبرتني على التلفون الله يسامحك يا منير جبتني على ملا وجهي وتركت الشغل

منير ...  آسف بس فكرت انه ممكن يكون الك رأي ثاني والرسمه تكون قدامك افضل 

نور .... الي بتشوفه مناسب اعمله انا بثق بذوقك 

منير .... ثقه بفتخر فيها من شخصيه متلك

 

رامي كان بالوسط بذبل عيونه وبطلع على نور مره وعلى منير مره 

نور ..  اقل من ساعه بوصللكم احلى غدا، عن اذنكم بدي ارجع لشغلي

 وابتسمت لمنير 

منير...  الله معك  

طلعت نور وركبت سيارتها وراحت  

رامي.... شووووو هااااذ😍 ؟!! شووووو هاااااااذ😍 

منير .... شو فيه ؟!! 

رامي .... ما بلومك يا صاحبي ، البنت قنبله، صاروخ، قنبله ذريه قاتله مدمره  

منير .... عيب عليك استحي 

رامي ... راح المزح واجا الجد،ويا رفيق عمري يا صاحبي يا توأم روحي ، اذا بتستمر تحكي معها وتشوفها رح تُوقع بحبها لا محاله

..

..

معقوله متل ما حَكى رامي يصير ؟! 

وممكن بنت متل نور تحب شب مزوج وعنده عيلة متل منير ؟!

 بنشوف شو ممكن يصير ، شو في احداث جديدة

 ‏

 ‏السلام عليكم 

الرجاء الرجاء من متابعين الصفحه الدعم ، ودعوة اصدقائكم للاعجاب والمتابعه لها، ما رح يكلفكم أشي،. يا ريت اليوم اشوف فعلا دعم، وشكرا

نتابع ..

الجزء الرابع

منير ..... هيك رأيك؟! 

رامي .... اكيييييد ، بالنسبه الي اذا بتوافق علي ، بتزوجها من الصبح 

منير .... ههههههههه ومرتك وولادك !

رامي..... هاااا هههههههههه المهم توافق ، وبعدها مش مهم اي حدا 

منير..... نور اكيد الها مواصفات خاصه، بتحلم فيها بشريك حياتها ، مش مثل حالاتنا ، متزوجين وعنا اولاد 

رامي..... احكي لحالك هالحكي

منير .... انت مُصر على اتهامي؟! 

رامي .... اسمع لما بدك تحكي الي بقلبك، انا موجود.....وغمزة😉

رجع رامي لاربد 

*****

 منير شعر بتعب المغرب، اخذ دش ورن تلفون على ندى يطمن عليها وعلى البنات ، شده الانتباه لغرفة نور ، وتردد يفتحها 

منير... يا رب ما تكون مسكره 

مسك مقبض الباب وفتحت الغرفه ، ابتسم منير كانها نور امامه، الغرفه كبيره مرتبه بشكل راقي جدا اثاثها ناعم بمعنى الكلمه، مشى خطوتين لجوى الغرفه، شعر انه بيعمل غلط تراجع وسكر الغرفه وبعدها عمل فنجان قهوه وطلع للحديقه يدخن سيجاره

اما نور الي طول فترة الشغل بتفكر بمنير وحاولت تنشغل اكثر لحتى ما يجي ببالها لكن هيهات هيهات 

بعد ما وَصَلت نور منى لبيتها ، قررت تروح لعند منير بعد تردد ، بس في اشي بشدها، رغم انه عارفه ان الوقت غلط ودنيا العشا 

وصلت للبيت وكان ضو الصاله شغال توقعت انه منير ما زال برسم 

اقتربت من الباب السيكوريت(باب الزجاجي ) شافت منير بصلي صلاة العشاء ، وَقفت لحتى ينهي صلاته.

طال منير بالدعاء بس نور نفذ صَبرها ودقت على باب باظفرها التفت منير مباشره ، وابتسم وقلبه رَقص فرح 

منير .... مساء الخير

نور..... فكرتك بعدك بترسم 

منير ... تعبت ، بكره ان شاء بتنتهي، ظل لمسات اخيره 

نور .... حلوه كتير متشوق اشوفها منتهيه كيف رح تكون 

منير .... رح تعجبك 

نور .... بتأكيد ...ممكن اقعد شوي 

منير .... هههههه البيت بيتك 

نور..... لتكون تعبان وحابب تنام

منير .... لسى بكير كثير لنام 

نور.... تعشيت؟؟ 

منير..... ما بتعشى 

نور .... جد؟!! وانا متلك ما بتعشى 

منير .... اعملك قهوه

نور..... انا بعمل 

منير..... انتي اكيد بتعرفي تعملي، بس حابب اذوقك قهوتي 

نور..... اوك ساده

منير .... متل قهوتي 

نور ... اها

بلش منير يعمل القهوه ونور قباله (المطبخ فاتح على الصاله ) عيونها بتتراقص على كل حركه بعملها منير 

نور... زمان الك بتصلي؟

التفت منير وابتسم

منير..... وعمري 11 سنة 

نور..... ما شاء الله ملتزم فيها 

منير .... اكيد 

نور.... كنت بتدعي كتير!! 

منير ... الدعاء مخ العبادة 

نور.... صحيح 

منير(بينه وبين نفسه)... لو تعرفي بشو كنت ادعي يا نور ، الله يبعدك عن طريقي اذا قُربك رح يأذي حياتي ويتعبني 

منير .... تفضلي 

نور.... شكرا 

منير.... شو رايك بقهوتي 

نور .... انت فنان بكل شي 

منير..... اذا بتحب اشي بتتقنه 

نور ... نعم صحيح وهاد الشي انا مقتنع فيه تماما 

منير .... معلش نور بدون ما تزعلي اشربي قهوتك وإرجعي للبيت 

نور(أنحرجت) ... انا آسفه ازا بحرجك بس.   قاطعها منير

منير(باندفاع) .... انا حابب تظلي طول الوقت هون .... قصدي هون بيتك بس وجودي .... قاطعته نور

نور.... فاهمه عليك ، انا آسف مره تانيه 

بهاللحظه اجت سياره وقفت باب بيت نور ونزل منها يوسف ابن عمها لما شافته نور اتفاجأت وتوترت 

نور ..... يااااا ربي 😣

منير..... مين هاذ؟!

نور .... ابن عمي 

يوسف شاف سيارة نور بره ولع النار براسه ، دفع باب الصاله 

يوسف(بغضب واضح).... نوووور 

نور .... الحمدلله على سلامتك ليش جاي من العقبه ما خبرتني 

يوسف .....وشو بتعملي هون لحالك بهالليل

نور..... الدنيا لسا العشا ومريت لشوف  الاستاز منير  شو محتاج 

يوسف اطلع على منير وشافه بلبس كاجول وقهوه قدامه وماخذ راحته على الآخر 

 

يوسف ( اطلع على منير بقرف).... والي بكون شغيل ببيتنا بيوخد راحته هيك 

منير (وقف على رجليه ).... عفوا  شو بتحكي؟! 

نور(بغضب واضح)...... يوووووسف احترم نفسك هاد ضيف ببيتي مو شغيل ، كمان منير ضابط بالامن ، لو سمحت اطلع بره 

يوسف ..... بتطرديني من بيتك يا نور 

نور ..... يوسف انت اهنت ضيفي عيب مو عادتنا 

منير ....ومعلش دكتوره نور انا رح اطلع وبعدين بكمل الرسمه باي وقت ثاني

يوسف..... بكون افضل 

نور زاد زعلها وقفت بين منير ويوسف

نور ...  يوسف اطلع بره لو سمحت 

يوسف .... اها طيب يا نور 

طلع والشرار بقدح بعيونه  

نور(كأنها بدها تبكي) .... آسف آسف منير 

منير ... بتعرفي انك بتزيدي جمال بس تزعلي 

نور ... .... 

منير(بصوت واطي)..... شو خبصت. قصدي انه ..

نور.... والله ما  بتروح قبل ما تتنتهي الرسمه تماما  

 

منير هز راسه بمعنى موافق 

نور .... اكيد هلا رح يخبص قدام عمي خليني الحقه .  سلام 

هون قرر منير انه يسهر على الرسمه رغم انه تعبان، وينهيها بهالليله،  وبكره يرجع لاربد، ما بدو مشاكل لنور بسببه

.

.

.

ببيت عادل

يوسف .... مسخره يا عمو ، السيد حاطط رجل على رجل وبنت اخوك قباله بشربو قهوه وماخدين راحتهم على الآخر 

نور..... كمل شو كمان !!!

يوسف.... انتي بالنهايه بنت ، يعني اذا عمي اعطاكي الحريه، بتتصرفي على هواكي وتمشي على حل ....... قبل ما يكمل صرخ عمه 

عادل .... يووووسف اسكت ، نور بالف رجل وبتعرف شو بتعمل ، لولا ما انا عارفها ما بترك الها الحرية ، كمان الرجل الي انت اهنته هاد ضابط شرطة مو واحد من الشارع، وبيعمل لنور خدمه يعني ، فوق هيك غلطت فيه وهاي مو عادتنا 

نور.... كان منير بدو يطلع بس انا منعته لانها مو حلوه بحقنا ، وشعر بأحراج واهانه يا عمو

يوسف.... بدكم اشوفك بهالمنظر واضل ساكت 

قربت نور منه وبصوت واطي وملامح الغضب والزعل باينه عليها 

نور ..... ما رح اقبل فيك لو كل الرجال الي بالكون انقرضوا فااااهم لهيك لا تتعب حالك 

يوسف زاد غضبه وصار يتنفس بسرعه واجت القنبله من عمه عادل..... بوجهك على الشب بتعتذر منه بأدب وبكل ذوق واحترام

يوسف..... شوووو😳 طبعا لاااااا 

عادل..... لعاد ما بدي اشوف وجهك بالمره يلاااا  اطلع بره

نور(تفاجأت) ... عمي!!! 🥺

عادل ... انا صبرت عليك كتير بتصرفاتك المستهتره واخوك كل يوم بشكيلي منك ، وكل مره بتعيد فصولك الناقصه ، الناس كلها احسن منك على شو شايف حالك، المصاري عمرها ما كَبرت حدا 

يوسف اخذ نفس طويل وطلع من بيت عمه، زعلان   

وعادل رن تلفون على اخو يوسف الاكبر منه وحكاله عن الي عمله يوسف 

عادل.... تعالي يا نور

نور.... نعم

عادل.... بغض النظر عن الي صار كله الا انه وجودك ببيتك والدنيا ليل، غلط وارتكبتيه ، بتعرفي لو رحتي لبيتك وهو فاضي أفضل من انك تروحي وفيه شب انتي وياه وحدكم  

نور .... انا آسفه يا عمي، بس اشتريت كم شغله لمنير بحاجتها وكان عامل قهوه وشربتها كان وجودي ما تعدا خمس دقائق 

كنت واقفه بدي اروح اصلا 

مرت عمها..... خلص يا عادل اشي وراح بحاله الله يصلحك يا يوسف ، روحي حبيبتي ارتاحي 

.

.

.

دخلت غرفتها ، وكل همها الاهانه الي تلقاها منير من ابن عمها ، حساسيتها لهيك امور بتخليها تبكي 

نور(بينها وبين نفسها).... كان كتير هادي ردة فعله عجبتني ،، يا ربي ، شو الي بصير معي ، شووووو.... متأسفه يا منير 

ونامت بصعوبه من التفكير

 الساعه اربعه الفجر انهى منير الرسمه ونظف كل اشي حواليه ورتب البيت تماما واخذ دش وصلى الفجر، ولبس وجهز اغراضه ، وضبط المنبه على الساعه 8 

 ‏

ساعه8 رن تلفون على نور 

نور(صحيت من النوم وبكل حنيه ورقه ).... منير

منير(بينه وبين نفسه)..... يا ويلللي  شو هالصوت 

صباح الخير 

نور.... صباح الورد 

منير.... ورد؟! 

نور.... ههههههه 

منير لمجرد سمع صوتها وضحكتها كأنه الشمس اشرقت على قلبه وضحكتها مثل النغم الي هَمس على مسامعه ومرور طيفها على خياله بتنسيه كل الشقاء الي مر بحياته 

منير..... نور انا انهيت الرسمه 

نور ... جد متى؟! 

منير .... بعد الي صار مبارح ما حبيت اظل اكتر ، فسهرت للفجر وكل شي جاهز

نور .... كتير انا آسفه مشان مبارح ، عمو عمل الواجب معه وطلب انه يعتذرلك بس هو رفض وعمو طرده من البيت 

منير .... مش مشكله ، وين ممكن اوصلك مفتاح البيت 

نور..... ممكن تستناني نص ساعه؟

منير ....  اكيد

.

.

.

نور..... قبل ما تروح بدي شوف الرسمه 

منير .... شوفيها واحكيلي رأيك

نور وبس شافت اللوحه سرحت فيها وهي مبتسمه 

منير كان براقب ملامح وجها 

نور(وهي منسجمه بالرسمه)..... بتجنن يا منير يسلمو دياتك، مو عارفه كيف بدي اوصفها ، شعرت كانها اخدتني لبعيد وعشت جواتها، انت كنت بكل حركه بالفرشاه تمزجها من روحك، الرسمه فيها منك كتير مزجت شخصيتك فيها 

منير بسمع لكلام نور ومعجب بوصفها لشغله 

نور..... حقيقه بتمس الروح بتعيش فيها براحه،  اختياراتك اللونية صحيحه ،اللوحة قصيدة بدون كلمات

منير..... احم احم خجلتيني هههههه

نور التفتت لمنير وابتسمت 

نور ... أنت بترسم بنفس الطريقة الي بغني بها الطائر بشكل جميل.

منير..... واو وصف حلو انا انحرجت فعلا

نور.... بتعرف انه تكون فنان هو أن تؤمن بالحياة وبجمالها 

منير ..   انتي خجلتيني يا نور بكفي خلتيني اشعر اني بفان جوف او بابلو بيكاسو

نور ... بتعرف انك افضل منهم ، هيك رأيي انا ما بجامل لاني مو مُجَامله ابدا ، بتعرف ليش؟؟ 

منير.... ليش؟؟

نور..... انت راسمها بسر شو السر يا منير ؟! 

منير .... سر؟!!! 

نور ... اها ، في شي جواتك مزجته مع اللوحه صح؟؟ 

منير(تأتأه).... اااا..ااا. ممكن 😁

نور ... شايف ههههه تخميني صح 

منير..... انا تشرفت بمعرفتك نور وشكرا على حسن ضيافتك 

نور..... انا الي اتشرفت فيك وبشكرك جدا جدا على هالعمل الفني المميز 

منير ... تفضلي هاد المفتاح 

نور مسكت المفتاح وطلعت حواليها 

نور .... حتى انك منظف كل شي 

منير ... بحب كل اشي يكون منظم

نور .... مو عارفه كيف بدي اكافئك

منير..... شو انا طالب لتكافئيني ههههه  يلاااا سلام عليكم 

نور.... وعليكم السلام .

.

.

مرت عشر ايام ما في تواصل بين نور ومنير ، بس احوالهم اتغيرت 

منى ..... نور بشو سرحانه

نور .... ولا شي 

منى .... انتي كتير متغيره

نور.... متغيره بشو

منى ...مو انا بس ملاحظ البنات بالسنتر بيحكولي نور شو مالها 

نور..... لا تجننوني انا ما فيه اشي 

منى.... انتي بتتواصلي معه .. قاطعتها نور

نور .... لا ليش اجا على بالك ؟! 

منى..... لانه السبب بحالتك

نور .... ......

منى ..... سكوتك بأكدلي الي ببالي، احكيلي يا نور شو ؟ 

نور(بعد ما اخذت نفس طويل )....كل الكلمات عاجزةً اني اصف مشاعري يا منى، الي بنبض فيها قلبي حيرانه قدام هالمشاعر والأحاسيس ، بكل الي بصير معي، ما توقعت واحد متل منير يحرك هالشي جواتي الي اله نايم سنوات، بحاول ما اتواصل معه، ولا لخبط حياته، حرام عنده بيت وزوجه وبنات، بس مو متحمله بعده بشتاقله بقوة ، لصوته ،لعيونه، لكلامه، لكل شي فيه ، ااااخ يا منى انا حيرانه شو اعمل؟؟ 

منى..... يا صلاة النبي ، وبتحكيلي حيرانه!! واضحه يا حبيبتي انتي غرقانه لشوشتك الله يكون بعونك 

نور.... شو بتحكي انتي ؟! 

منى..... اعترفي ليش بتكابري ، نصحتك من البدايه ما رديتي عليه 

نور..... .....

منى..... شو يا نور؟!

نور..... منير متلي بيشبهني 

منى.... منير متزوج وعنده بنات 

نور بلشت تبكي 

منى ....  يا ربي على هالوقعه، المشكله ما شفتيه الا كم مره 

نور (وهي بتبكي)... شو اعمل شو اعمل .

.

.

.

بعد شهر ..

منير نايم على سريره وسرحان بنور 

ندى .... منير 

منير ... .... 

ندى.... منييير 

منير .... نعم نعم كم مره حكيتلك ما بحب الصوت العالي 

ندى..... ناديت عليك اكثر من مره ما رديت 

منير .... البنات وين؟ 

ندى ... بلعبو تحت

منير .... بكره مداومه 

ندى.... اه

منير..... ما بدك تاخذي كم يوم نطلع للعقبه ، نغير جو

ندى ... ما رح يصحلي 

منير(نفرزه).... على راحتك

ندى.... زعلت؟ 

منير....لا لا.      مد ايده 

منير ... تعا نامي هون 

ندى نامت على ايد منير، وضمها على صدره 

منير.... خليكي معي لا تبعدي عني

ندى(بأستغراب).... شو مالك؟؟؟

منير.... بدي ما تغيبي عني 

ندى..... وين بدي اروح هيني بجنبك

منير(بتعب) .... كل وقت ظلي معي يا ندى كل وقت 

ندى ..... ...... 

.

.

رامي ..... منير ليش شكلك هيك؟؟ 

منير .... ماله شكلي  

رامي..... مريض؟! 

منير ... لا مثل الحصان 

رامي..... ايوااااا بعدك بتتواصل معها 

منير... مين ؟! 

رامي..... بتتخوث ؟!! الدكتورة يا روميو

منير..... ......

رامي......سكوتك يدل على ما يجول بخاطري  يا عزيزي

منير (بوجع)..... قلبي بوجعني يا رامي 

رامي..... سلامة قلبك يا وحش 

منير ... اشي غريب عليه يا رامي ، اشي غريب بهجم على قلبي 

رامي.... الله يعينك بصراحه ، بعرف انه الصراع جواتك بخوف 

منير .... مش عارف شو بدي اعمل 

رامي .... لا اله الا الله 

***

منير كان بحاجه كبيرة يحكي الي بقلبه كله لحدا ، وطبعا ما في الا توأمه منار(الي خبرتنا بقصته) رن تلفون عليها 

منار...يا هلا بحبيبي منير وين عنك زمان ما زرتني 

منير .... حابب احكي معك 

منار.... تعال اتغدا عندي واحكيلي الي بدك اياه

منير..... اسمعي بعد ساعه باجي باخذ شو رأيك ؟؟ 

منار.... بخبر زوجي وبجهز حالي  

منير اخذ اخته منار للمكان المفضل اله 

منار .... المنظر هون خرافي 

منير ... باجي بقعد هون كل ما أكون تعبان او مضايق 

منار...   حاسس انه بقلبك في حمل كبير احكي لشوف 

منير .... انتي بتعرفي يا منار انك نصي الثاني، وانتي الي بتفهميني ،وانتي اغلى وحده بخواتي عليه اولا لانك توأمي وثانيا اكثر صفاتنا مشتركه بينا وبنفهم بعض 

منار .... احكي كلي اذان صاغيه 

منير خبرها من اول ما شاف نور بعمان يوم الحادث لحتى اخر مره شافها وحكى معها 

منار .... يعني بتحبها؟! 

    

منير ... اشي غريب عليه يا منار ، اشي غريب بهجم على قلبي بسببله وجع، ظهورها بحياتي صدفه وبكل مره بتنعاد الصدفه، وبترجع تظهر ، بَدعي ربي تبعد عني ، بس بترجع تظهر ، اسمها ، صوتها ، كلامها جمالها ، كل اشي فيها سَهم بنغرس بقلبي ، بَتمسك بندى، لحتى تروح من تفكيري ، بس ندى مش مساعديتني مُصره تظل بعيده وما تهتم 

منار .... يعني ندى السبب انك تتعلق بنور؟!!  لانها مهمله فيك وبالبيت والبنات من زمان؟! 

منير ......  لا يا منار، ندى تعودت عليها، مش السبب ابدا، بتوقع حتى لو كانت ندى مثالية جدا ، رح يصير الي صار ، حاسس نور ، قدر رح يرافقني بحياتي .... وسكت شوي واخذ نفس 

منار..... كمل حبيبي كمل لا تخلي اشي بقلبك

منير .... الي انا فيه بصير غَصب عني ، مش بأيدي والله العظيم مش بأيدي، انتي بتعرفني انا عمري ما آمنت بالحب ولا بحدوثه ، وكنت اضحك على كل واحد بيحكي عن الحب، انا تعبان ، وتعبي بزيد يوم عن يوم، لو الناس تعرف الي فيه رح ينتقدوني ويحكوا عيب عليه ، رجل عمره 37سنة ومتزوج عنده بنات ، هاذ ما بستحي مراهق ، يشوف بيته وينتبه لبناته، بس ما بيعرفوا انه بصير غصب عني ، وبحرقني ، آلم ممزوج بوجع وبحيرة وبشوق الها، الي عشر ايام بمسك حالي مشان ما أرن عليها ، ولا اتواصل نهائي معها مشان أنساها، وبالعكس بصير معي ، بشتاقلها اكثر، النوم هجرني، وبطلت اركز بشغلي ،  ااااخ يا منار ، شووو اعمل شووو اعمل

منار ...  اسمع يا اخوي، حاول تبعد عنها،ما تتواصل معها، وتشوف ممكن نزوة صابتك، وظرف بروح بحاله، ممكن كمان كونك ما عشت اي قصة حب حتى بمراهقتك لا من بعيد ولا قريب، تأثرت بسرعه،كون البنت مثل ما حكيت جميلة جدا .

منير .... انا مش مركز بشي يا منار ما بعرف 

منار..... طيب البنت بتتوقع بتشعر نفس المشاعر هاي  

منير.... هاذ الي ذابحني، اني بتعذب ، وتكون هي ولا على بالها

منار ... نصيحتي يا اخوي تبعد وتنسى، حاول 

منير ...  طيب واذا ما قدرت

منار .... لا تغرق اكثر ، وبالآخر البنت انت ولا ببالها، هون الوجع اكبر على قلبك، رح يتضاعف عذابك 

منير ..... كيف ممكن اعرف انها....  قاطعته منار

منار .... ما رح تعرف الا اذا هي حكت او انت سألتها 

منير ... احيانا بحس انه عقلي صغير وبتصرف بجهل ومراهقه ،وبستصغر حالي يا منار

منار .... اسمعني ممكن تكون محتار بحقيقة مشاعرك وبتظن أنّك وقعت في الحب، تصرفاتك تغيرت ومشاعرك كلها تلخبطت، لكن بالبداية لازم تتأكد  من هاي المشاعر، مش قصدي انك ترفضها ما  تعترف فيها، بدك تعطي نفسك الوقت الكافي لتفهمها والتأكّد منها، ومن مبادلة الطرف الآخر الها، وصِدقها وثقتها فيك، بتجلس مع حالك بتفكر منيح وبشكل صحيح ، ومنطقي، بدون اي تأثير من اي شخص ، اعطي لنفسك فرصه لتفهم حقيقة مشاعرك منيح، شرط انك لا تنطوي على نفسك ، تعال احكي معي ، واتصل فيه، وفضفض،  لأنه جلوسك  لوحدك بعيد عن الناس ،وتفكير المستمر فيها لوحدها، رح يخليك تظن انك بتحبها فعلا، والي بدنا اياه حقيقة مشاعرك الصحيحة 

منير.... يعني ممكن هالمشاعر تكون عابره ؟!! 

منار ...  احتمال كبير

منير ..   واذا كانت غير هيك 

منار..... وقتها الله يعينك، لانه الحب، طبيعه بشريه بتملكنا غصب عنا

منير .... واذا نور ما بتبادني هالمشاعر 

منار..... حكيتلك بكون وجعك وعذابك مضاعف يا قلبي

منير ..   واذا بتبادلني نفس المشاعر 

منار .... وقتها الحل موجود 

منير..... الحل ممكن......... قاطعته منار

منار .... لوقتها فرج يا منير ، انت خلي امرك لله وادعيله ، وربك كريم ادرى منا كلنا بامور حياتنا 

منير ... والنعم بالله  

 

***

منى .... شو رأيك نعمل قعده حلوه ببيتك بلكي تغير نفسيتك

نور..... فكره حلوه

منى .. بكره المغرب شو رأيك؟!  ما في ضغط شغل بكره عنا 

نور.... اعملي الي بناسب ما عندي مانع 

اليوم الثاني ....

فعلا كانت قعدة بنات ببيت نور ، والكل اعجب بالرسمه الي على الجدار

منى..... ليش وجهك تغير بس حكولك انه اللوحه بتجنن

نور..... يعني ما بتعرفي !؟! 

منى .... اتذكرتيه؟!  

نور..... يا ريت انسى لحتى اتذكر   

منى .. منير عنده بيت وزوجه واكيد بحبها، حياته مستقره ، وانت عجقتي حياتك بسببه، هو مرتاح وبنام وبشتغل ولا كأنك موجوده 

نور..... حاسس عكس هالحكي، 

منى .... كان رنلك على الاقل 

نور .... مستحيل منير يرنلي، هو متلي بالضبط بكابر متلي 

منى .... الشب مو متل البنت ديما هو ببادر بالأول 

نور .... منير مو متل الشباب انتي ما بتعرفيه  

منى .... وحضرتك عرفتيه بالمرتين التلات الي شفتيه فيهم ؟!!

نور .... انتي ما بتعرفي، شو شفت بمنير بهالكم مره 

منى .... احنا عملنا هالقعده لحتى نغيرلك جو وانتي مُصره منير يظل بفكرك 

نور..... .......

*****

بعد كم يوم 

ندى.....عَمه بدي احكي معك مشان منير 

ام محمد.... ماله منير؟!

ندى .... مش على بعضه باخر فتره، ليكون مريض ما بدو يحكيلنا ؟! 

 ام محمد .... تفي من ثمك بعيد الشر عنه 

 ‏ندى.... يا عمه وضعه مش مزبوط، انتي مش ملاحظه عليه ؟؟

ام محمد..... اه والله ، متغير ، كان ديما يقعد عندي ما اخلص من سوالفه، صاير يجي يمد جسمه على هالفرشه ويصفن بالسقف 

ندى ... يعني مش انا لحالي شايفته تغير

ام محمد... حتى المطبخ مبطل يفوت عليه ليتفقد شو طابخ  

ندى ... شوفيه اليوم شو قصته 

ام محمد... بس يرجع من شغله بسولف معه  

****

رجع منير من شغله 

منير ...  السلام عليكم 

ام محمد.... وعليكم السلام

منير..... بدك اشي يما ؟؟

ام محمد... تعال جاي 

منير..... حاضر  

ام محمد .... اقعد قدامي 

منير ..... يا ستار خير يما ، هاي الكلمه متعود عليها من وانا صغير يعني تحقيق 

ام محمد ..... انت مش على بعضك من فتره ، والكل ملاحظ عليك ، مرتك، وانا، واخوانك، حتى خواتك البنات ، وحتى بناتك الصغار، شو مالك ؟! انت مريض يما ؟! 

منير .... هههههه لا يما انا صحتي ممتازه والحمد لله 

ام محمد ... برضاي عليك اذا مريض تحكيلي 

منير .... والله والله ورحمة ابوي وغلاتك اني مش مريض ولا فيه البلا 

ام محمد..... يبقى عَشقان 

منير ... عَشقاااان😳

ام محمد ..... يعني الي انت فيه واحد من اثنين يا مرض يا عشق 

منير .... ......

ام محمد..... شوووو؟!!  بس لو اشوفك بعيوني ما بصدق ، انت بالذات 

منير.... ليش ما الي قلب يمااا؟! الله يسامحك

ام محمد .... الك يما ، بس القصد انك ما عملتها زمان ، حتى لما نويت تتزوج، حكيتلي انتي شوفي اي بنت بتعجبك وانا بوافق عليها 

منير ..... بدك اشي ثاني بدي اطلع 

ام محمد .... بس ما قلتلي شو مالك

منير .... ارتاحي يما ما في اشي ، انتي بس ادعيلي

فتح الباب وطلع على الدرج على بيته

 

ام محمد (بصوت عالي ).... الله يهدي بالك ويرزقك وينولك الي ببالك ويعطيك ليرضيك 

منير.... آمين يما آمييين 

يا سارقاً قلبي أتتك جوارحي

طوعاً بلا أمرٍ ولا إستئذانِ

فأنا الذي أهملته وتركته

كنزاً للص هواكَ حين أتاني

فأرفق بهِ ما دمتَ تملكُ امرهُ

وإحفظهُ حفظَ الصدرِ للرئتانِ

      يا ويل قلبي😍

مساء الورد .. 

اليوم رح اتركم لضميركم بالنسبه للاضافة  الاصدقاء لصفحة، لاني ما شفت متابعين جدد انتوا ضفتوهم بهالايام ، على كل حال بتمنى لكم متابعة ممتعة..

الجزء الخامس

طلع خيوط الفجر ونور سَهرانه ، التعب واضح عليها ، قررت تكون المبادره منها ،لتحكي مع منير ، وتحكي بكل صراحه معه ، وتشوف ردت فعله ، شو شعوره هو تجاها، شو رح يصير  بعدها.

.

.

الصبح ساعه 8:30

على طريق المفرق ومنير بسيارته لوحده باتجاه شغله ، مشغل مسجل السياره ...

أصابَكَ عشقٌ أم رُميتَ بأسهمِ

فما هذهِ إلا سـجيّـةُ مُغـــرَمِ

أصابك سَهـم أم رُميتَ بنـظـرةٍ

فمـا هـذه إلا خطيئةُ مـن رُمـي

سكر المسجله واستغفر ربه ، واخذ نفس طويل 

منير(بصوت عالي ومخنوق).... بحبهاااا بحبهاااا بحبهاااا يا الله ، يا ربي انت اعلم بحالي ما في بقلبي ، اذ هالبنت رح تخرب حياتي وبيتي ، ابعدها عني ، ساعدني يا رب انساها يااااااا رب 

بهاي اللحظه صار اشي مع منير ، خلاه يصف السياره على جنب 

ويظل سرحان بتلفونه الي استمر برنين ، واسم الدكتوره نور بيظهر امامه على الشاشة، وفجأة بدون تردد 

منير (بلهفه) .... الو نور  

نور(بلهفه) .... الو منير كيف حالك طمني عنك

منير..... الحمدلله كيفك انتي طمنيني عنك

نور .... ماشي حالي الحمدلله بس... 

منير .... بس شو في اشي؟؟ 

نور.... بدي احكي معك ضروري ممكن؟؟ 

منير.... احكي تفضلي 

نور.... انا بعرف انك هلا بطريقك شغلك، فيا ريت تركن جنب الطريق وانت تحكي معي بخاف يصيرلك شي 

منير..... السياره واقفه من لحظة ما رنيتي علي 

نور ...  بتقدر نقعد بشي مكان عام نحكي اليوم او بكره 

منير .... ما بينحكا على التلفون ؟!

نور..... بينحكا بس... 

منير ... شوو؟!! 

نور .... لازم احكي لازم    (صوتها صار يرجف)

منير تأكد انه نور عندها حكي صعب عليها وعليه لهيك ...

منير.... نور الي بدك تحكيه رح يزيد صعوبته علينا لما نكون قبال بعض ، الافضل على التلفون 

نور (بلشت تبكي بصمت)... بعرف، بس حابب شو.. شوو. شوفك 

منير(بدون تردد).... وانا حابب اشوفك   

غمضت عيونها من كلمة منير الي فيها حنيه وحب وشوق

منير .... احكي يا نور الي عندك كله ، غمضي عيونك واعتبريني مو موجود احكي كل الي بدك اياه، بس تحكيلي خَلصت ، رح احكي انا 

بعدك 

نور..... ......

منير..... لا تسكتي انا بأنتظار الي بدك تحكيه، على احر من الجمر ،

غمضي عيونك واحكي الي بقلبك كله انا بسمعلك

نور اخذت نفس طويل، شَعر فيها منير بحرارة ،وحَركت كل خليه بجسمه 

نور..... كنت بنت مميزه الكل يحسدها بجاملها وبشطارتها بالمدرسه 

ولما دخلت الجامعه كنت ما رافق اي حدا لا بنت ولا شب، كنت بحالي ، الهدف اني كون على لوحة الشرف بأمتياز، اتهموني بالتكبر 

واني شايفه حالي، ما اهتميت لانهم ما بعرفوني، فقدت بابا  وكانت من اصعب مراحل حياتي ، حُلمه انها نور يكون لقبها دكتوره ، اصَريت احقق حلمه، وظليت بعيده عن اي علاقه ، تقدملي كتير شباب لزواج من عائلات كبيره وشباب متعلمين واغنياء بس كنت ارفظ لانه كل هاد مو ببالي، هدفي واضح ومحدد، ماتت ماما وتركتني( بلشت نور  تبكي، وقفت شوي ، ومنير ولا كلمه بس بيسمعلها ) ماما كانت كل حياتي احكيلها كل شي اشكليها همي وتعبي وجعي ، راحت، وخلتني وحيده، اختي مزوجه والها بيتها،واخي بدراسته 

  وَقفت على رجليه من جديد ، واصريت احقق كل شي بدي اياه، كنت بحب بيت العيله كتير بعشق كل زاويه فيه، حصلت عليه بعد اتفاق معهم، واخدو اكتر من حقه مني ، بس مو مهم، المهم صار الي ، فتحت صالون صغير لمارس هوايتي واخدت دورات ومزاولة مهنه ، بجانب دراستي ، وكبر الصالون وصار سنتر كبير، حصلت على الدكتورا ، هون كانت اول كلمه من الكل قبل مبروك الدكتورا

  ‏(ما الك هلأ حجه ترفضي الزواج ) بهداك الوقت كنت متعرف عليك ، ما كنت متوقع هالشب يغير حياتي، شب كتير عادي مزوج وعنده بنات، كنت اضحك على حالي بس تيجي ببالي، يعني الموضوع مو حلو ،من تاني مره شفتك تغير كل شي تماما، كنت اعاند بحالي ، واحكي لا يا بنت، هاد رجال عنده بيت وزوجه واولاد ، كيف بدك تُدخلي على حياتهم وتخربي عليه !!!، لااااا.   

  صارعت عقلي بكل قوة ، بس ضعفت ، ما تحملت ، كنت بتشبهني حتى بابسط الامور،كنت احكي مع حالي، ليش يا نور منير؟! شب مزوج تعليمه متوسط، وضعه عادي ليش هو؟! ليش منير ؟!! لانه الله كاتبلي انك تكون اول شخص سرق قلبي بهدوء.

  ‏

  ‏منير بيسمع وكلام نور بركان ثائر بكيانه ، عيونه فيهم دموع ، وصوت نور المتقطع الممزوج مع البكاء وَجَعله قلبه اكثر واكثر ، كانه نور بتلوم نفسها وبتلومه على الي صار 

  ‏

  ‏منير....نور  

  ‏نور(صوت ضعيف)... نعم 

  ‏منير.... كلمة نعم منك الي لوحدها سهم قاتل بقلبي، كل حرف بطلع منك وبوصل لمسمعي بكون سهم بقلبي ، شهرين النوم جفاني والاكل صار عدوي ، في حرب جواتي ، طيفك ما بفارقني يا نور

  ‏طول عمري بستهزء بكل شخص بوصف الحب والعشق وآلآمه ، عشت لهاذ العمر، ما فكرت اني ممكن اقع بحباله، خاصه بعمري ، او ممكن يدخل قلبي بدون سابق انذار بهالسهوله، الناس الي حوليه بيعرفوني ، هادي، متزن، وملتزم،  ما الي بحدا، بيتي مملكتي، ما بعرف انك رح تيجي وبسرعه تسرقي قلبي وتغيريني (صوته بلش يضعف)  نور انتي سرقتي قلبي وجعتيه كثير، انا بتآلم ، لانه وضعي صعب صعب 

  ‏كانت نور بتسمع لمنير ودموعها شلال بدون صوت، خيم الصمت لدقيقه بينهم وبعدها ...

  ‏منير...   نور 

  ‏نور.... اه 

  ‏منير.... الحل موجود لازم نلتزم فيه

  ‏نور.... شو هو ؟!

  ‏منير.... ولا كأنه بنعرف بعض،  احظري رقمي وانا بحظر رقمك، انا وانتي مو صغار ولا مراهقين ، لازم نعرف نحلها بدون ما نؤذي بعض والوقت كفيل انه ننسى، هاذ افضل حل النا.  

  ‏نور(بتبكي)...  طيب 

  ‏منير.... انتي من اروع الاشياء الحلوه الي صارت بحياتي

  ‏نور.... ....

  ‏منير..... انتبهي لنفسك وظلك قويه زي ما كنتي طول عمرك 

  ‏نور(بصعوبه).... اها

  ‏منير.... سلام عليكم       وحظر رقم نور

نور .... وعلكيم السلام      حظرت رقم منير

والاثنين حظرو بعض على المسنجر 

منير نزلت دمعه من عينه ورفع راسه لورا 

منير .... رح اجبر قلبي يا نور ينساكي 

وشعر بوخزه بصدره وَجَعته، وحط ايده على قلبه

منير..... اااخ  لا اله الا الله شو هالوجع ااااخ يا ربي 

كان منير بتألم بوجع بقلبه منعه يقدر يكمل طريقه للشغل

اتصل بالشغل وخبرهم انه على الطريق مش قادر يكمل ، وبعثو سيارة فيها زميل اله واخذوه على المستشفى 

في المستشفى...

الدكتور .... ما شاء الله عنه ما فيه اشي لا تجلطات وقلبه سليم 

منير.... الحمدلله ، بس شو سبب الالم الصدر وضيق التنفس وتسارع الدقات

الدكتور ... ما شفنا اي شي مَرضي، تخطيط القلب سليم،، انت اهتم بصحتك ونام منيح ورتاح لا تتعب حالك 

منير ... ان شاء الله 

.

.

اما نور الي صابها نفس اعراض منير ، بس كونها مختصه نفسيه عرفت انها اعراض(القلب المكسور ) نفس اعراض الأزمه الصدريه، وقررت تعالج نفسها 

.

.

.

 واىل.... هلا حبيبتي 

 ‏نور(بصوت تعبان)  .... كيفك 

 ‏وائل.... الحمدلله ليش صوتك هيك مريضه شي؟؟ 

 ‏نور.... تعبانه نفسيا شوي 

 ‏وائل.... سلامتك

 ‏نور..... الله يسلمك، اااخ يا وائل  

 ‏وائل.... اه هيك انتي خوفتيني عليكي 

 ‏نور.... وائل طول عمرنا سر بعض انا وانت صح 

 ‏وائل... من واحنا صغار ، بس ديما اسراري كانت كتيره وانتي لا 

 ‏نور.... بدي اجي لعندك زيار شهرين 

 ‏وائل.... تعالي حبيبتي ، انتي معك فيزا لخمس سنين وبعدها فعاله ، ‏بس مستغرب زيارتك بهالوقت؟؟ 

 ‏نور.... ..... 

 ‏وائل..... غريبه زياراتك بتكون ديما ببداية الشتا وقتها شغلك بالسنتر بكون شغله خف

 ‏نور.... انا بحاجه لتغير نفسيتي مو مهم السنتر يروح بداهيه

 ‏وائل.... احكيلي شو مالك؟؟ 

 ‏نور..... بس اجي لعندك بحكيلك كل اشي 

 ‏وائل.... متى جايه

 ‏نور..... رح اتصل بمكتب طيران واشوف اقرب رحله واحجز 

 ‏وائل.... طيب خبريني بس تحجزي مشان افضي حالي 

 ‏نور.... لا تحكيلي انك مشغول متل عادتك

 ‏وائل..... حبيبتي انا بلشت بالاختصاص يعني دراسه وشغل بالمستشفى، بس اكيد رح اخلي وقت الك 

 ‏نور.... طيب بس احجز بردلك خبر 

 ‏.

 ‏.

 ‏.

رامي .... سلامتك 

منير ... الله يسلمك

رامي ... طيب اذا ما في اشي بالقلب ليش صار معك هيك

منير ... ممكن تعب

رامي.... تعب شو يا ابو تعب ، انت شو بتعمل لتتعب 

منير .... رامي بدي انشغل بشي بعد الدوام ، يوخذ كل وقتي 

رامي ... ايوااااااا انا الي بفهمك، بدك تنساها 

منير (بجديه كثير).... رامي لو سمحت اذا بدك تساعدني ، لا تجيب سيرتها ولا اسمها بتاتا، ولا حتى تلميح 

رامي ... لهيك صار معك الي صار ... طيب طيب ، شو رأيك كونك فنان ، ترسم على سور بيتكم مناظر طبيعيه ، وتعمل تجديدات ببيتك ، وكل يوم جمعه نطلع شمت هوا ، بس على حسابك طبعا لانه حضرتي مفلس وانت ما شاء الله، خمسه بعين الحسود جيبتك مليانه ههههههههه

منير .... فكره حلوه  رح بلش فيها من بكره.

.

.

منار..... طلعت بتبادلك نفس المشاعر؟!

منير ... اها

منار.... شو قررتوا؟!! 

منير... نبعد عن بعض 

 منار....ممتاز يا منير، خير ما عملتوا، انتو الاثنين واعيين ومثقفين وصدقني بعد فترة رح تبان النتيجة

 ‏منير(بتعب وصوت ضعيف).... حاسس اني جزء مني راح ما عاد يرجع

 ‏منار.... شعور طبيعي

 ‏منير(بتعب)..... واذا ما قدرت يا منار

 ‏منار...... وقتها هي كمان ما رح تقدر اذا فعلا بتبادلك المشاعر بِصدق مثلك 

 ‏منير..... رح احاول اشغل حالي 

 ‏منار....  لو مرتك الله يصلحها تقدر تفهمك هي .....   قاطعها منير

 ‏منير..... ندى ما الها لا من قريب ولا من بعيد بحالتي 

 ‏منار... منير باي وقت اتصل اذا حاب تحكي 

 ‏منير...... اكيد  .

 ‏.

 ‏.

منى(بزعل وصوت عالي) ....  شو يا نور انت انجنيتي ؟!!! 

نور.... لا تعلي صوتك اهدي 

منى ..... شو اهدا ، في حدا بترك شغله وهو بعز الموسم ،وبتركه وبسافر 

نور .... لازم اسافر

منى .. .بتسافري ببداية الشتا متل كل مره ،هلا عنا حجوزات والصيف موسم الشغل المنيح

نور (بلشت عيونها تدمع وصوتها يتغير).... افهميني لازم سافر، بدي اغير جو 

منى ..   ايوااااااا هيك افهمت ، بدك تنسيه!!!؟ 

نور .... لو سمحتي حاولي ما تذكريني فيه نهائي 

منى ... يا حبيبتي.   (وحضنتها)  ما رح اقدر ادير السنتر لحالي يا نور ، شو بدي اعمل 

نور .... من كم يوم خبرتيني انه ساره جايه من الإمارات زيارة الصيف صح؟! 

منى. .... صح

نور ..... بتساعدك وبتعطيها راتب متلك بالضبط 

منى.... بس ساره اختي جايه ترتاح 

نور .... انتي اعرضي عليها وانا متأكده ما رح ترفض ، سلميها الاشياء الي ما بدها خبره ، واذا ما رضيت  شوفي اي حدا بتثقي فيه ،السنتر بأمانتك

منى .... حملي ثقل يا نور الله يسامحك 

نور .... معلش اتحمليني ، بدي اعالج حالي

منى ...  سلامتك يا نور 

.

.

نور ومنير اتخذو اسلوب الهاء النفس لحتى افكارهم ما تفتح ستارة هاذ الحب من جديد ويرجعو الى نفس النقطه، تصرفهم كان عقلاني 

.

.

سافرت نور بعد اربع ايام لعند اخوها وخبرته بكل الي صار معها 

وائل...طيب شو المشكله!! 

نور .... متزوج وعنده بنات تلات

وائل.... ايواااا هون الوجع

نور .... حكيتلك كل الي صار، وهلا بترجاك لا تفتح هاد الموضوع معي نهائي، انا جيت لعندك لحتى انسى اوك 

وائل(بينه وبين نفسه).... ما اظن تنسي ...  حاضر يا نور

.

.

بعد شهرين 

منير صابه حالة اكتئاب وصار عصبي ، رغم انه هالشهرين انجز شغلات كتيره اخذت منه وقت ، بس ما قدر يسيطر على قلبه، ولا عرف ينسى نور الي حُبها تربع بقلبه وتمكن منه كل التمكين.

اما نور الي نحف جسمها وبان عليها ، كانت اقدر من منير انها تتحكم بتصرفاتها ما تغير من طبيعتها ،الشهرين مرو بسرعه ونور رجعت لعمان، ورجعت لحياتها الطبيعيه..

بس اللوحه الي ببيتها رح تضل تذكرها فيه، كل ما تشوفها ،واسمه الي موقع بأسفل الجدار سهم جارح بوجع قلبها، اتصلت بعامل دهان يجي للبيت بكره، ويدهن الجدار ويخفي ملامح اللوحه تماما 

بنص الليل 

نور دعت ربها متل كل يوم انه يبعثلها الافضل لحياتها ، ويريح بالها

مدت جسمها على سريرها ،وبعد ساعة غفيت وراحت بالنوم 

** بالمنام   **

 شافت منير لاول مره ، كان واقف بعيد وامها وابوها بالجهه التانيه 

ام نور .... تعالي 

ابو نور..... تعالي 

نور ...  نعم  شو بدكم ؟! 

ام نور .... روحي لعنده 

نور .... ما بدي 

ابو نور..... روحي ما رح تندمي 

ام نور .... روحي هو الي رح يحميكي 

نور..... بس..  

ابو نور وام نور مع بعض ........ روحي عنده

صحيت من نومها شغلت الضو كانت متوتره وبترجف غمضت عيونها وفتحتهم اكتر من مره وحطت اديها على وجها وبعدها شربت مي 

نور .... يا ربي شو هالمنام ، حتى بمنامي يا منير ، روح بعيد ابعد عني ابعدددد  بدي ارتاح ااااخ يا ربي 

.

.

.

نفس الليلة...

منير..... طفي الضو 

ندى .... بدي احكي معك قبل ما نام 

منير.... احكي 

ندى .... عصبيتك جننت البنات طول نهارك صياح، كنت ما تحب الصوت العالي شو صارلك ؟! 

منير .... طفي الضو ونامي الله يرضى عليكي ، بلاش عصبيتي تيجي فيكي هسا 

ندى .... تيجي فيه ولا تيجي بالبنات 

منير ..   طيب اتركيني انام وبكره بنحكي 

ندى ...انا عندي دوام بكره ومناوبه ، يعني لبعد بكره الصبح لارجع

منير(زادت نبرة صوته حده) .... هاذ الي شاطره فيها مناوبه وشغل ومستشفى وزفت.

ندى..... شو مالك؟!!    

منير .....انتي ما حاولتي حتى تستوعبيني ، تغيري من نفسك شوي ، تغيري روتينك معنا، شغلك اهم منا كلنا 

ندى..... موالك هاذ زمان عنه ، ليش غنيته هسا 

منير .... لاني تعبت يا ندى تعبت

ندى ....  وانا تعبت ، اسمع احكيلك اشرب واكل عليها، شغلي ما بستغني عنه لو تنطبق الارض على السما 

منير ... حتى لو طلبته وترجيتك  

ندى..... لا ابدا انا آسف

منير .... انتي متأكدة

ندى .... منير شغلي مش مأثر عليك ولا على البنات 

منير .... ها  مش مأثر؟!!!  كل الي احنا فيه ومش مأثر يا ندى ،

احكيلي اخر مره طلعنا سوى احنا الخمسه؟!! مشوار ، زياره ، رحله ، نزله مع بعض على مول، حديقة، متى متى ذكريني !!؟!! 

ندى .... مش ضروري 

منير (صوت عالي ).... لااا ضروري يا ست ندى ضروري 

ندى .... وطي صوتك الدنيا ليل!!! 

منير ..... انا كل مره بحاول اتقرب منك وانتي بتعرفي اني كم حنون عليكي، بس انتي مش عارفه تكوني حنونه علي 

ندى ..... يا منير ، علاقتنا الزوجيه هاديه ما فيها مشاكل هاذ لحاله بكفي ، الا اذا انت بتفكر بدك ولد لانه بعده ما آجا 

منير ..... وانتي بتعرفي انه مش فارقه معي ، عندي ثلاث بنات احسن من الف ولد تفكيري مش رَجعي ولا متخلف 

ندى ... والله بعرف 

منير .... على راحتك .. تصبحي على خير 

تقلب منير  بسريره لحتى نام

**بالمنام **  

ابو منير..  ليش بتبكي يابا

منير ..  تعبان يابا 

ابو منير..... شيل التعب عنك ورميه

منير..... مش قادر يابا

ابو منير ..... بتقدر...   بس انت خايف 

منير .... شو اعمل؟!  

ابو منير .... روح واعمل الي بريح قلبك، ورح تلاقي كل الخير 

صحي من منامه اخذ نفس طويل وشال سيجاره وطلع من البيت ونزل لحوش بيتهم شغل السيجاره وسرح لبعيييد  

.

.

.

بعد اسبوع المنام تكرر مع نور ، وتكرر مع منير كمان بنفس الاشخاص ونفس الكلام

نور.... منى بتعرفي حدا بيفهم بتفسير الاحلام

منى(بأستغراب) .... للأسف لأ   ليش؟؟

نور..... شفت حلم وتكرر مره تانيه بنفس الأحداث 

منى..... اذا تكرر بدك تشوفي حدا دارس شريعه وفاهم بالدين بكون افضل

نور.... طيب

.

.

منير.... يما شفت ابوي من اسبوع بالمنام ومبارح رجعت شفته بنفس الحلم بالضبط

ام محمد.. اللهم اجعله خير !! شو شفت ؟!

منير .... سئلني عن حالي وحكيتله تعبان ، وقلي روح اعمل الي بريحك وشيله عن ظهرك   

ام محمد.... يعني بتشكي لابوك بالحلم وانا موجوده ما بتشكيلي؟! 

منير .... هههه بدك تزعلي علي من حلم يا حجه 

ام محمد ... ليش لتقله تعبان ؟؟! 

منير .... لاني تعبان يما 

ام محمد ...ريت التعب فيه يا يما ولا فيك ، ارميه التعب ولا تفكر فيه

منير .... مش قادر يما 

ام محمد ... هو هالتعب الي مش راضي تقلي عنه ما اله حل؟؟! 

منير.... اله حل بس صعب 

ام محمد ...  جربت؟؟؟ 

منير..... لا 

ام محمد .... جرب يما بلكي ربك حلها وربك كريم 

منير..... يعني ارد على ابوي زي ما شفته بالمنام 

ام محمد .... يعني بدك ترد على ابوك بالمنام ما بدك ترد عليه بالحقيقه؟!!!  قوم اقلب وجهك، الحق عليه الي بسمعلك

منير .... هههههه الله يسامحك ،حتى ابوي هو ميت مش خالص منك 

.

.

.

نور ...  شفتي شو حكت هاي الشيخه

منى ... انا ما بعرف الحلم شو هو لاحكم 

نور.... فسرته انه رساله الي 

منى .... يعني؟!! 

نور.... ولا شي خلص اسكتي 

منى ..... سكتنا 🤐.

اتصلت نور بالدهان واعتذرت منه، بطلت تمحي اللوحه 

.

مسك منير تلفونه، بدون تردد ،ورفع الحظر عن رقم نور ورن ، بس رقمه محظور 

منير .... نور وين انتي والله اشتقتلك وقلبي ملتاع عليكي 

..

..

نور..... معقول منير شايل الحظر عن تلفوني، كيف بدي ارنله هلأ

شالت الحظر بس ما رنت، حاولت اكتر من مره، بس كانت تتراجع 

وركبت سيارتها وراحت لمنطقه بعيده عن ازمة السكان هاديه ، وركنت سيارتها وسرحت ..

بنفس الوقت، منير بكل مره بشعر بالضيق، بروح على نفس المكان القريب من بلدته بقعد فيها لوحده ، بشد على قبضه ايده وبسرح لبعيد 

منير(اخذ نفس طويل ) .... شو اعمل كيف بدي احكي معها، مشتاق لصوتها 

رن على رقمها على امل انها تكون رافعه الحظر    

تلفونها برن تراقص قلب منير ونور اخذت نفس وقلبها زادت سرعاته ، وفتحت الخط بسرعه 

نور(بلهفه)..... منير 

منير (بلهفه).... نور

نور ... ....

منير ... دخيلك لا تسكتي يا نور لا تسكتي 

نور(بصعوبه).... ااااانا ببببححححبببكككك 

منير ... وانا بعشقك ، بعدك ذبحني ، طمنيني عنك؟!! 

نور(صوت حزين وبرجف)......  لا تسلْ عن حالتي

فملامحي في الشوق خيرُ بياني

للدمع والليل الطويل تركتني

وتقولٌ لي في البعد ما أضناني

عجباً لأمركَ كيف عن حالي تسلْ

أوَلمْ تكنْ في البعدِ مَنْ أرداني

دعْ عنك ما قد فاتْ وإسمع ما يلي

فالعمر مهما طالَ طولٌ فـاني

داوي المسامع بالكلام وداوني

بالوصل إن فراقنا أعيَاني

منير.... سلامة قلبك يا نور العين، بدي اشوفك، لازم نحكي 

نور .... فعلا لازم نحكي 

منير..... شو رايك بكره 

نور..... ليش بكره؟!  هلأ

منير..... على طول جايكي 

.

.

.

بالطريق للبيت اتصل باخته منار وخبرها عن المنام الي شافه، واتصاله بنور واعترافها بحبها اله ، وانها كاينه مسافره بره البلد لتهرب من حبه، بس ما تحملت . 

منار..... والله مش عارفه شو بدي احكيلك يا منير ، موضوعكم غريب بجد بكل احداثه.

منير ... انا بطريقي للبيت ابدل  ملابسي ونازل لعمان اشوفها 

منار..... منير شو بعد ما تشوفها بدك تعمل؟؟ 

منير ... لا تخافي يا منار انتي بتعرفي اخوكي

منار .... رح ادعيلك من قلبي انه ربي ييسرلك الافضل ويبعد عنك التعب والهموم

منير.... الله يسعدك حبيبتي 

منار.... انا متأكده اي اخت مكاني، رح تكون مع اخوها ، وانا معك ، لاني بعرف منير منيح، وبعرف طيبة قلبه وحنيته ، مستحيل يكون جاهل ومتهور بتصرفاته، روح الله معك،وحط الله بين عيونك .. 

.

.

. 

 وصل منير البيت بدل ملابسه  بسرعه، وهو نازل 

 ‏ام محمد.... وين العزم ان شاء الله؟!! مشخص ولابس الي على الحبل وريحتك بتهفهف عُطر

 ‏منير(الفرح باين على وجه).... مشوار ضروري يما ، ادعيلي ربي يريح بالي 

 ‏ام محمد .... الله يريح بالك يما 

 ‏منير.... كثري من هالدعواي يا حجه 

 ‏ام محمد ... اااخ بس لو افوت برأسك واعرف بشو بتفكر.

 ‏منير..... هههههه (قرب على امه، وباسها بوسه طويله على خدها) بفكر بأشي بجنن وحلو وبوخذ العقل ههههههه

 ‏ام محمد...... الله يثبت علينا العقل والدين يا رب 

 ‏منير..... اللهم آمين     سلام انتبهي للبنات،  ادعيلي 

ام محمد.... مش عاجبني هالولد في اشي مخبيه عني، الي فتره ما شفته مبسوط.هيك 🤔 شو في وراك يا منير يا ابن بطني!!!! 

 ‏.

 ‏.

 ‏.

بالطريق شغل مسجل السيارة على...   

قولي أحبك كي تزيد وسامتي فبغير حبكِ لا أكون جميلاً قولي أحبك كي تصير أصابعي وتُصبح جبهتي قنديلاً الآن قوليها.. قوليها ولا تترددي بعض الهوى لا يقبل التأجيلا سأغير التقويم لو أحببتني أمحو فصولاً أو أضيف فصولا وسينتهي العصر القديم على يدي وأقيم عاصمة النساء بديلًا ملكٌ أنا لو تُصبحين حبيبتي أملو الشموس مراكبًا وخيولًا لا تخجلي مني فهذي فرصتي لأكون بين العاشقين رسولاً....        

                      (يا ويل قلبي♥️😅)

                      ‏

 ‏كان اللقاء بينهم بمطعم هادي ، دخل منير من الباب وعيونه بتلتفت يمين وشمال كليانه شوق غامر،  شافته نور من بعيد وانشرح قلبها لشوفته وابتسمت، وتراقصت دقات قلبها شوق، ورفعت ايدها اله ، شافها منير وابتسم، كان نفسه يحضنها بين اضلاعه يوخذها بحضنه ما يتركها، بس دينه واخلاقه ما بتسمحله حتى سلام باليد 

 ‏منير..... نور كيفك

 ‏نور.... بس شفتك صرت منيحه

 ‏منير.... من وقت كل واحد راح بطريقه، وأنا شايف الدنيا بدون اللوان، ولا بسمع أصوات الا نبضات قلبي المتسارعة الي بتهمس باسمك في كل دقيقة.

 ‏نور..... كانت الكره الارضيه بكبرها، ضيقة كثقب الإبرة المُعتم صار العالم كله فارغ حتى من الهواء ، وانت بعيد 

 ‏منير.... انتي متغيره كأنك نحفانه؟!  

 ‏نور..... وانت كمان متغير 

 ‏منير.... انتي السبب

 ‏نور.... وانت السبب

 ‏نور.... ليش خليتني اروح

 ‏منير.... كان لازم نعمل هيك

 ‏نور.... هو فعلا لازم ، بس ما في فايده 

 ‏منير..... كنت بدي اتأكد انه هالشعور مو مجرد نزوة بحياتي، مع الوقت بروح ، بهالفتره اتأكدت انه وجودك بحياتي متل الهوا الي بتنفسه

 ‏نور..... انا كنت متأكده انها مو نزوة بحياتي 

 ‏منير ..... ليش؟؟

 ‏نور..... لاني كنت ما بطيق فكرت انك تختفي ،وسافرت مباشره من كل البلد 

 ‏منير(هو بطلع بعيونها)....  انا بحبك يا نور وحبي الك غريب كثير ، لانه تملك كل اشي فيه، قلبتي حياتي كلها

 ‏نور....... ...... 

 ‏منير..... اسمعي يا نور من الآخر، انا انسان ملتزم وبخاف من ربي ، مستحيل اظل اتواعد معك بدون حل,  قال تعالى(( لا تُوَاعِدُوهُنَّ سِرًّا إِلَّاأَنْ تَقُولُوا قَوْلًا مَعْرُوفًا)) صدق الله العظيم 

 ‏نور..... يعني؟! 

 ‏منير.... تتزوجيني؟؟! 

 ‏نور.(بسرعه)... اكيد اه 

 ‏منير(مبتسم بفرح).... واهلك؟؟  

 ‏نور...... اكيد رح اسمع حكي وانتقادات كتيره 

 ‏منير....  وانا اكيد رح يصير حرب عليه، وندى رح تترك البيت وتاخذ البنات وانحرم منهم

 ‏نور.... بتعرف منير هاد الشي الي دابحني كتير ، اني كون بخانة الي بتخرب البيت 

 ‏منير..... هاد غصب عنا 

 ‏نور.... انا رح وافق بس بشرط يا منير ولازم يتنفذ، لحتى يكون بالك وبالي مرتاحين

 ‏منير..... شو هو الشرط؟!! 

 ‏نور......  ندى والبنات 

 ‏منير..... شو ما لهم؟!؟. 

 ******

يتبع..... 

 شو ممكن يكون شرط نور؟! 

ممكن اهلها يوافقوا على زواجها من منير؟!

بكره بأذن الله رح نشوف من الاحداث الاقوى بقصتنا 

بداية الروايه من هنا