رواية أحببته رغماً عني الفصل الاول والثاني والثالث والرابع والخامس بقلم الكاتب اسماعيل موسي حصريه وجديده على مدونة أفكارنا
 |
رواية أحببته رغماً عني الفصل الاول والثاني والثالث والرابع والخامس بقلم الكاتب اسماعيل موسي حصريه وجديده على مدونة أفكارنا
كنت نايم على سريرى وكانت الساعه عدت نص الليل، سمعت تليفونى بيرن
اخدت التليفون من على الكرسى وبصيت فيه، كان رقم دولى غريب
الو مين؟
سمعت صوت اعرفه وبعد كلمتين همست علاء؟
ايوه انا علاء يا عم، يعنى مين هيكلمك بعد نص الليل ويقرفك غيرى؟
قولت يا عم انت تتصل فى اى وقت يعجبك، عامل ايه؟ وكيف اخبارك؟
علاء كان سافر دوله عربيه يشتغل فيها وليه اكتر من سنتين مكلمنيش خالص
همس والله الأحوال مش تمام، بس اانا مش بكلمك علشان كده، انا عايزك فى موضوع مهم يا ريت تصحصحلى كده؟
حسيت بقلق غريب، وان علاء واقع فى مصيبه اصل علاء من يومه بتاع مشاكل
قلت خير؟
قال انت عارف انك صاحبى الوحيد، احنا صحاب بقالنا اكتر من عشرين سنه واكتر من اخوات
_قلت فعلا معاك حق انت اكتر من اخويا إلى مولدتوش امى
همس علاء انا بقا عايزك فى معروف وخدمه ميعملهاش غير اخ لاخوة
_قلت علاء انجز انا قلقت
بص يا صاحبى انا عارف انه طلب تقيل اووى وغريب، بس الصراحه محدش يقدر ينجدنى غيرك ولا اقدر اثق فى شخص غيرك يعمله
همست بقلق ها؟
تعرف رودينه ؟
قلتله لا، رودينه مين؟
سكت علاء لحظات بعدها كمل، رودينه دى حب حياتى ومقدرش اعيش من غيرها ولا اتخيل حياتى من غيرها
وهى بتحبني اكتر من نفسها
__قلت ربنا يسعدكم يا علاء
انا بقا عايزك تتجوز ردينه يا ادم فى أقصى سرعه
الكلام وقف فى بقى وحسيت دماغى مهنكه، انت بتقول ايه يا علاء؟ حسيت انى مسمعتش الكلام صح
قال علاء عايزك تتجوز رودينة وقبل ما افتح بقى قال علاء
انا الظروف معايا مش تمام، ورودينة رفضت عرسان كتير علشانى لكن المره دى ابن عمها متقدملها وابوها راسه والف سيف يجوزها لابن عمها
انا عايزك تتقدملها وتتجوزها جواز رسمى لحد ما انزل مصر وتطلقها
علاء انت بتهزر صح؟
والله ما بهزر يا ادم ، انا عايزك تتجوز رودينه وتحافظ عليها لحد ما ارجع
اتأجرلها شقه وانا هدفع إيجار الشقه لو مش عايز تعيش معاها، ولو هتعيش معاها انا بثق فيك وعارف انك اخويا ولا يمكن تخونى
قلتله لحظه بس، جواز ايه إلى انت بتتكلم عنه وبعدين ايه ضمنك ان والدها يوافق عليه اصلا؟
__قال علاء، رودينه هتخليه يوافق، رودينه هتقول انها بتحبك ومش هتتجوز غيرك حتى لو دبحوها
انت اتقدم وسيب الباقى على رودينه ها ايه رأيك؟
سكت، معرفتش اقول ايه، عقلى كان بيضرب فى بعضه
همس علاء ارجوك يا ادم ابوس ايدك ورجلك وافق انت اخويا ومليش حد غيرك اقدر اطلب منه الطلب ده
دا موضوع كبير يا علاء ومش سهل، دا جواز ومصاريف وحجات كتيره
علشان خاطرى يا ادم انا مش هتأخر هبذل كل جهدى ان شاله اسرق وقبل مرور شهور هكون فى مصر واتجوز رودينه ودا جميل مش هنساه ليك طول عمرى، وافق ارجوك
لا انا محتاج افكر يا علاء ادينى يومين افكر لو سمحت
مفيش وقت يا ادم بقلك والدها عايز يجوزها لأبن عمها رودينه ممكن تعمل فى نفسها حاجه
قلتله طيب الصبح ارد عليك
دا هيبقى جواز كده وكده يا ادم يعنى مش حقيقى ارجوك ساعدنى بدل ما اقتل نفسى
قلتله طيب اصبر يا عم
همس أرجوك يا ادم ارجوك
قلتله طيب ماشى حاضر
تنهد علاء بعدها قال بس اوعى البت تعجبك يا ادم ودماغك تروح كده ولا كده
قلتله يا عم اسكت انا فى ايه ولا ايه
2
قفلت مع علاء ودماغى مهنكه عقلى كأنه بيقولى ايه إلى عملته ده؟
حاولت انام معرفتش وقعدت اقلبها فى دماغى، قلت الصبح هكلم علاء واعتذرله
نمت بالعافيه، الساعه عشرة الصبح لقيت تليفونى بيرن
هسمت بغيظ علاء تانى؟
مكنش رقم علاء كان رقم تانى، فتحت المكالمه وقلت الووو
وصلنى صوت هامس ازيك يا استاذ ادم!؟
قمت من مكانى بسرعه وقعدت على السرير
قلت الحمد لله مين معايا؟
__انا رودينة
عقلى فضل دقيقه على بال ما جمع، رودينه خطيبة علاء؟
ايوه انا وحسيت بضحكه فى صوتها لأنى قلت خطيبة علاء
قلت اهلا وسهلا بحضرتك
فيه حاجه حصلت؟ علاء كويس؟
قالت علاء بخير الحمد لله انا بكلمك بخصوص الموضوع إلى كلمك فيه علاء، علاء حكالى كل حاجه وانا شايفه مفيش طريقه ولا حل غير اننا نعمل كده
انا طبعا متفهمه مخاوفك واوعدك انى هسهل الأمور عليك
احنا هنعيش مع بعض فعلا لأنه مينفعش نعمل غير كده
لازم نبان متجوزين حقيقى علشان محدش يشك خصوصا والدى ووالدتى
بس اوعدك انى اكون اخوك فى الشقه راجل زى زيك مش واحده ست
لسه هقولها انا لسه بفكر
قالت انا فى ورطه حقيقيه والنهرده لو مجتش عندنا والدى هيجوزنى لابن عمى وانا مش ممكن اسمح بكده حتى لو انتحرت
قولت بسؤال طيب والدك يوافق ليه وازاى؟
قالت رودينه، انت بس تعالى اتقدم وانا هحل كل حاجه انا ممهده لماما وهتقف جنبى
هسمت ان شاء ابقى اجى
لا ارجوك همست رودينه انت لازم تلبس وتيجى فورا مفيش وقت، لو كنت فعلا بتحب علاء زى ما وعدته
غير هدومك وانا هستناك وهقول لوالدى ينتظرك، لكن لو مش ناوى قول دلوقتى؟
انتهت المكالمه وحسيت نفسى فى ورطه فعلا وخلاص مفيش مهرب، غيرت هدومى وروحت على العنوان بتاعهم
خبطت على الياب فتح لى شاب نفس عمرى رحب بيا وسألنى انت ادم؟
قلت ايوه
قعدت فى الصاله وبعد شويه ظهر والدها إلى كان صارم اووى
سألنى انت عايز تتجوز رودينه؟
قلت ايوه
بسرعه رغم انى كنت شارد رديت على اسألته الكتيرة المكرره المتزمته
طلعت رودينه وكانت اول مره اشوفها، كانت بنت متوسطة الطول بيضه جميله وقسماتها ناعمه ورقيقه جسمها مايل للنحافه
وسط الكلام والدها سألها انت موافقه على ادم ده؟
همست رودينه طبعا موافقه انا بحبه ومش ممكن اعيش من غيره وهو كمان بيحبنى
بابا أدم هو الشاب إلى هيقدر يريحنى ومع الوقت هتعرف انه راجل جدا ويستحق بنتك!
خبط الراجل على رجليه وقال تمام نقرا الفاتحه والدخلة الاسبوع إلى جاى
كانت كل حاجه بتتم قدامى وانا شارد كأنى مغيب، ارتفعت الزغاريد ورا بعضها والجيران دخلو يهنو العروسه ووالدتها
ومقدرتش الاقى نفسى غير لما خرجت من هناك وبقيت فى الشارع
كنت زى إلى بيتفرج على فيلم وفجأه لقى نفسه بطل من ابطاله
كلمنى علاء وشكرنى كتير وحلف انى ارجل صديق فى الدنيا كلها الاسبوع مر بسرعه وجه ميعاد كتب الكتاب والفرح
وفى خلال أسبوع واحد بقيت متجوز والفرح خلص وواحد مراتى إلى هى مش مراتى وطالع بيها شقتنا
٣
.
دخلنا الشقة وجسمى متلبش، مش عارف هعمل ايه ولا هتصرف ازاى، معنديش فكرة عن اى حاجة، نبضات قلبى كانت سريعه، حاولت اكون طبيعى، قولت بصوت واطى، اتفضلى اعتبرى البيت بيتك!!
اول ما دخلنا الشقه رودينة جريت على اوضة النوم وقفلت الباب على نفسها، قلت احسن وفرت عليه الاحراج والدربكه
اخدت دش وغيرت هدومى وقعدت فى الصاله حاسس بكسوف ملوش اخر
كنت جعان طلعت أكل من التلاجه وسخنته روحت اكل وحسيت بالاحراج اكل وحدى واسيبها؟
خبطت على الباب ببطيء وسمعت دربكة رودينة وخوفها منى
بعد شويه وصلنى صوتها عايز ايه؟
قلت مفيش انا هاكل، هتاكلى معايا؟
قالت لا شكرا انا شبعانه
قعدت اكلت وبعد كده مددت على الكنبه وحاولت انام لكن مجنيش نوم
وقعدت افكر ايه ممكن يحصل وازاى حياتى هتستمر فى الحصار ده
انا لازم أوضح كل حاجه من دلوقتى
عملت كوبيتين شاى وخبطت على رودينه وهمست من فضلك انا لازم اتكلم معاكى ضرورى
همست رودينه مش دلوقتى خليها وقت تانى
قلت مش هينفع، لازم نحدد طريقتنا فى العيش داخل الشقه
انتى اكيد عايزه تاكلى عايزه تشربى، عايزه تستخدمى الحمام مش معقول هتفضلى محبوسه جوه غرفتك
فتحت رودينه الباب كانت غيرت هدومها ولابسه عبايه كامله
قعدت بعيد عنى
قلتلها اتفضلى الشاى
همست تعبت نفسك ليه؟
قلت عادى
وانا بناولها الشاي ايدى لمست ايدها سرت رعشه فى جسمى ورودنية كانت هتوقع الشاى
همست بسرعه اسف مكنش قصدى
بصى احنا هنعيش مع بعض زى اخ وأخته، يعنى لو عايزه حاجه يا ريت تقولى وانا كمان هقول
قالت تمام كلام كويس
انتى هتنامى فى اوضه النوم الرئيسيه وانا هنام فى الصاله او فى غرفتى ووقت استخدام الحمام الشخص التانى يكون فى غرفته
الاكل هناكل مع بعض عادى مفيش مشكله
ايه رأيك قالت تمام
تليفونى رن ببص لقيت علاء
ابتسمت ورديت اول كلمه قالها علاء بتعملو ايه؟قلت ايه كلامك إلى يعصب ده انت فاكرنى عيل صغير
رودينه فى غرقتها وانا قاعد فى الصاله وبعدين خلى عندك شوية ثقه مش كل شويه هتكلمنى
قفلت مع علاء ورودينه سألتني كدبت ليه؟ مقولتش احنا قاعدين مع بعض؟
محبتش اوترة يا رودينه مش هيقدر يفهم اننا قاعدين بنتكلم فى حجات مهمه
ودخل واحد غرفته ونمنا، الصبح قومت قبلها حضرت الفطار
وانتظرت تخرج لكن بابها فضل مقفول
اكلت وغيرت هدومى وخرجت مرجعتش غير بالليل
كانت زيارة عيلتها خلصت
ورودينه بتحضر عشا فى المطبخ قعدت فى الصاله وعيني جات عليها
كانت بتحاول تجيب طبق ومش قادره تتطوله
مشيت على المطبخ ووقفت رفعت ايدى وجبت الطبق
رودينه حست بوجودى فى المطبخ فجأه اتنفضت من الخضه ورجعت لورا
فى اخر لحظه بعدت عنها محصلش تلامس لكن مرت لحظه كسوف بينا
انسحبت بسرعه ورجعت مكانى مش عارف ايه إلى حصل لكن الزيت انسكب وولعت نار صغيره
رودينه صرخت انا جريت على المطبخ وطفيت النار
وبدون ما أشعر قعدت اضحك من منظر خوفها وخضتها
#احببته_رغما_عنى
٤
شعرت بخجل رودينة من ضحكتى إلى خرجت غصب عنى، همست لو انتى محتاجه مساعدة ممكن تنادينى عادى :؟
قالت رودينه مفيش حاجه، انا بس متلخبطة شويه مش متعودة على وجود حد غريب معايا فى مكان واحد
للحظه حسيت الكلمه جرحتنى معرفش ليه لكن بعد تفكير قلت رودينه مقلتش غير الحقيقه ومفيش اى داع انى ازعل
وحسيت بزهق، قلت انا خارج ومش هرجع غير بالليل، تقدرى تقعدى فى الشقه براحتك
طلعت قعدت على القهوة وقابلت صحابى وفضلت لوقت متأخر برة البيت
الساعه ١١ بالليل تفاجأت برقم رودينه ظاهر على شاشة تليفونى
رديت بقلق خير يا انسه رودينه؟
واحد صاحبى قاعد جنبى لما سمع كلمة انسه رودينه عنيه برقت من الصدمه
بسرعه علشان ادارى على الموقف قلت ايوة يا حبيبتى
رودينه سكتت دقيقه متكلمتش، بعدها قالت الكهربة قطعت
وانا خايفه اقعد وحدى
قلت حاضر وبتردد همست يا حبيبتى
سبت صحابى، استأذنت منهم لان مراتى خايفه تقعد وحدها
وصحابى كأنه سمعو نكته
وهات يا تلقيح، هو فيه حد اصلا يسيب عروسته بعد يوم من الجواز ويجى يقعد على القهوة؟
ايه يا معلم هو انت منهم ولا ايه؟
خدت كلامهم بهزار ورجعت على الشقه وانا بفكر فى كلامهم
هو انت متعرفش ولا ايه؟ وضكهم وسخريتهم إلى خدتها بضحك
خبطت على الشقه، رودينه فتحت من اول خبطه كانت مولعه شامعه فى الصاله
همست الحمد لله انك رجعت، انا كنت ميته من الخوف، هى الكهرب ه بتقطع دايما هنا؟
قلت لا، بس حظك بقا
دخلت وقفلنا باب الشقه وقعدنا فى الصاله بعيد عن بعض
من غير كلام ولا حتى همس، مفيش واحد فينا فتح بقه
اخيرا بعد نص ساعه، رودينه قالت تشرب شاى؟
قلت ايوه مفيش مانع
مشيت رودينه خطوتين ووقفت، بس الدنيا ضلمه فى المطبخ
قلت بسيطه يا ستى
شلت الشمعه ومشيت وراها، كانت بتعمل الشاى وحاسس ان جسمها بيرتعش
قلت على فكره مفيش داعى انك تخافى منى، انا عند وعدى وعمرى ما حنت وعد اديته لحد
قالت رودينه انت فى التليفون كنت بتقول حبيبتى؟
لسانى وقف فى بقى لحظه وبسرعه قلت صحابى كانو قاعدين معايا وكان لازم مخليهمش يحسو بحاجه
انا اسف لو كنت ضايقتك
قالت لا عادى مفيش حاجه انا مش غبيه وفهمت طبعا
وصحابك قالو ايه كمان؟
كنت راجعين على الصاله وقعدنا فى اماكنا وكل واحد فينا فى ايده كوباية الشاى بتاعته
قلت قالو كلام كتير متشغليش بالك بيه!؟
يا سيدى هو حنا ورانا ايه؟، الكهربه قطعه ومش هينفع ننام
قلت كانو بيتريقو عليه لانى سايب عروستي وقاعد على القهوه تانى يوم الفرح، ميعرفوش انك زى اختى
ضحكت رودينه وشفت لمعان اسنانها فى ضوء الشمعه اتحمست اكمل كلامى وقلت من غير تفكير بيقولو هو انت متعرفش!؟
وش رودينه اتغير وظهر عليه الضيق والخجل وقامت بسرعه دخلت غرفتها وقفلت الباب
حسيت انى غلطت، غلط كبير اووووى واتكسفت جدا
انا ازى قلت كده بس؟
قعدت دقايق من غير حركه، بعدها خبطت على رودينه وقلت انا اسف مكنش يصح اقول كده، اسف بجد يا رودينة
مسمعتش رد ولا اى حاجه
كنت عارف ان غلطى كبير جدا، همست طيب على الأقل خدى الشمعه لانك بتخافى من الضلمه وممكن يطلعلك أشباح
فتحت رودينه باب الغرفه بسرعه واخدت الشمعه وقفلت الباب.
نمت على الكنبه وحطيت ايدى تحت دماغى وبعد شويه بداء النوم يداعب جفونى بين النوم والصحيان
سمعت الباب بينفتح ورودينه بتخرج منه فى ايدها اخر ضوء من الشمعه إلى خلاص هتخلص
معرفتش اعمل ايه، اتكلم ولا اسكت وانا بفكر سمعت صرخت رودينه إلى الشمعه لسعت ايدها وانطفت، الدنيا بقت ضلمه كحل وسامع انين رودينه وهى بتهمس ايدى وجعانى اوووى
#احببته_رغما_عنى
٥
همست الف سلامه عليكى ورينى كده؟
مسكت ايد رودينة ونفخت فيها اكتر من مره، كانت ايدها ناعمه ورقيقه وملمسها ناعم جدا، ورغم انى فضلت ماسك ايدها محاولتش تشيل ايدها
جسمى اتوتر، ايه بقيتى كويسه؟
همست رودينه بخجل ايوه متشكرة وشدت ايدها بعيد عنى
قعدت رودينه ولقيت نفسى ببص عليها مستغل الضلمه بتركيز واعجاب
انا تعبانه جدا ممكن انام هنا جنبك لحد ما النور ما يجى؟
كان لسه كلامى البايخ إلى قولته من شويه بيدور فى دماغى
قلت بأدب طبعا، نامى ولما النور ما يجى هصحيكى تدخلى غرفتك
تمددت رودينه على الاريكة وكان شعرها بيلامسنى ومفيش دقايق وراحت فى النوم
الفجر النور رجع، صحيت رودينه دخلت غرفتها وانا نمت مكانى من الإرهاق والسهر
الصبح رودينه كانت فى المطبخ بتحضر الفطور صوت تقطيع الخضار وهدير غلاية الميه كان مالى المكان
مشيت على المطبخ وأثر النوم على وشى لابس قميص وشعرى فوضاوى وقفت ابص عليها وانا مبتسم
قلت بصوت خافت صباح الخير !
بصت رودينه وهى بتحط شرايح الطماطم على الطبق وهمست صباح النور انت لسه صاحى؟
حطيت ايدى على الحيطه وانا بتابع حركة ايدها، مقدرش انام كويس امبارح اضطريت افضل سهران للصبح لأن فيه شخص خواف كان نايم جنبى
سرت حرارة خفيفه فى خدود رودينة تجاهلتها بسرعه
وهسمت بنبره محببة
شاى
ام
قهوة؟
قلت وانا باخد خطوة ناحيتها، شاى لكن خلينى اساعدك
انا بعرف اعمل شاي كويس جدا، احلى شاى ممكن تشربيه
اخدت الكوبايات من ايدها وقلت بعفويه
عارفه المكان بيبقى أجمل لما يشاركك شخص فيه
الوحدة قاتله جدا
بصت رودينه ناحيتى كأنها بتحاول تقراء شيء فى عيونى
بعدها رجعت لشغلها مغيره مجرى الحوار ادينى دقايق والفطار هيكون جاهز
بعد ما اكلنا خرجت ومرجعتش غير بعد المغرب
قعدت قدام التليفزيون اتفرج على فيلم وانا بفتش فى مجله قديمه
طلعت رودينه من غرفتها لابسه فستان بسيط، شعرها مرفوع بعفويه مش عايزة تثير الأنتباه
بصتلها وقلت بمزاح، انتى عندك حفله الليله ولا ايه؟
همست رودينه لا سهره ولا يحزنون
لكل شكرا للمجامله على كل حال ولما رفعت وشى ابص عليها رودينه جريت على غرفتها
الساعه عشرة خرجت رودينه من الغرفه فى ايدها كتاب تشرب ميه فى المطبخ وانا كنت لسه قاعد فى الصاله
رجلها تعثرت فى السجاده الكتاب طار فى الهوا ورودينه وقعت فوقى، سندتها بايدى وانا حاسس برعشة جسمها وارتباكها
وبعدت عنها فورا، قلت انا هخرج اقعد فى القهوة شويه
همست رودينه انت كل يوم هتخرج تقعد فى القهوه؟
انا بزهق وانا قاعده وحدى وبعدين النور بيقطع
شعرت بسخونه فى جسمى، قلت انا لازم اخرج دلوقتى ومش هتأخر وهربت من الشقه
رجعت متأخر من بره فتحت الباب بشويش النور كان مصطفى مفيش غير نور التليفزيون وتفاجأت ان جسد رودينه الصغير ممدد على الأريكه، ملامح وشها كانت بريئه كأنها طفله
شعرها كان منساب على الوساده وايدها حاضنه الملايه الخفيفه إلى مغطيه جزء من جسمها
فكرت اصحيها تدخل غرفتها لكن قررت اسيبها نايمه وحطيت ايدى اسحب الملايه واغطيها فتحت رودينه عنيها وهمست ادم انت رجعت امتى؟
قلت من شويه ليه مش نايمه فى غرفتك؟
نمت وانا بتفرج على التليفزيون شكرا لانك صحيتنى بلطف
الصبح
لما صحيت، رودينه كانت بتكلم علاء وبتحكيله بالتفصيل عن كل حاجه حصلت فى اليومين إلى فاتو وتفاجأت انها مغيره فى الكلام شويه ومطلعانى شخص قاسى متزمت من غير قلب ولا املك اى مشاعر
انتظرووووزوني
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺