رواية من قلبي بقول اااااه الفصل الاول بقلم محمد منصور حصريه وجديده على مدونة أفكارنا
 |
رواية من قلبي بقول اااااه الفصل الاول بقلم محمد منصور حصريه وجديده على مدونة أفكارنا
لعشاق الدرما والانتقام.
القصة دي اقتباس لاحلي القصص اللي اتحولت افلام. والفيلم مصري و معروف لناس كتير فاللي يعرف اسم الفيلم ما يقولش الا بعد نهاية القصة. وانا في اخر حلقة هقول اسم الفيلم للي حابب يشوفه. وطبعا انا حطيت مناخيري في القصة وغيرت. شوية احداث نونو كدة.
★الحلقة الاولي★
كتابه. واقتباس
محمد منصور. منص
وقبل ما نبدأ الحلقة نوحد الله ونصلي علي خير خلق الله سيدنا محمد. وعلي بركة الله نبدأ
بسم الله توكلت علي الله. وهو رب العرش العظيم
★أنا صابرين عبد العاطي بت غلبانه من المنصورة حلوة اوي زي ما عيون كل اللي بيشوفوني بتقول. اللي انا هحكي دة حصل وانا عندي 13 س. لسة في بدايات سن المراهقة. وقت ما كنت عايشة مع ابويا نجار المسلح. الاسطي عبد العاطي. وامي ست البيت. فوزية. كنا عايشين عيشة بيحلفو بيها اهل المنصورة كلها ابويا بيحب امي اوي وامي بتعشق التراب اللي بيمشي عليه وانا بقي بحبهم هما الاثنين قد الدنيا كلها. كل دة حلو وحلو اوي حلو زيادة عن اللزوم ومعروف اننا في الدنيا مش لازم كل ايامنا تبقي حلوة اوي لازم تعدي علينا ايام تبقي مش زي ما احنا بنحب. ايام صعبة. ومهمه كانت صعوبة الايام مش هتبقي اصعب من الليلة اللي لقيت ابويا دخل عليه البيت وهو متجوز خالتي خضره. خالتي اللي كانت السبب في موت امي. ازاي هقول لكم.
بس ها رجع بيكم شوية لوراء. سنة 1970. يوم ما وقعت امي وهي في المطبخ بتحضر لنا العشاء. ساعتها جريت عليها وحاولت افوقها لكنها كانت مغمي عليها. جبت مية ورشيت وشها يمكن تفوق لكنها ما فاقتش طبعا ما كنتش اقدر اشيلها لوحدي جريت بسرعه علي العمارة اللي شغال فيها ابويا ونديب عليه وقولت له علي اللي حصل ل امي نزل جري رغم انه علي كان علي سطوح الدور الخامس واستاذن من المقاول بتاعه وخد منه فلوس ورجعنا جري علي بيتنا واحنا معانا دكتور المركز. وكشف الدكتور علي امي وبعد ما خلص كشف قال
مش عارف اقول لك اية. بس مراتك عندها بلهارسيا
وكان وقتها البلهارسيا مرض ملهوش علاج. وياما ابويا كان بيقول لامي بلاش تغسل المواعين في الترعه اللي قدام بيتنا بس امي ما كنتش بتسمع الكلام وكان قدمنا حل من اثنين انها تروح المستشفي ووقتها كان اللي بيروح المستشفي بيتبهدل. او تتعالج في البيت ابويا قال للدكتور
لا. هتعالجها في البيت
الدكتور
بس دة هيبقي مكلف
عبد العاطي
اصرف كل اللي حليتي. بس فوزية ما تتبهدلش في مستشفيات الحكومة
الدكتور وهو بيكتب روشته قال
طيب تمام روح هات لها العلاج دة وربنا يكتب لها الشفاء
وعدي بالظبط اسبوع علي الحال دة ابويا كان يجيب اليومية يدفع نصها علاج لمرض امي والنص التاني ناكل ونشرب بي. وكان علي قلوبنا زي العسل المهم انها قدام عينيا. وفي ليلة واحنا قاعدين بنتعشي يخبط باب البيت قومت افتح لقيت واحدة ست اصغر من امي بسنه. ومعها تلت شباب فيهم اللي في سني وفيهم اللي اصغر مني. قولتها
انتي مين
خدتني في حضنها وقالت
والله وكبرتي يا صابرين. انتي مش عارفاني طبعا انا خالتك خضرة
رحبت بيها وباللي معها وطبعا بتقولو ازاي تبقي خالتي وماعرفهاش. هقول لكم. خالتي اتجوزت وانا عندي خمس سنين وجوزها خدها وعاشوا في القاهرة ومن ساعتها واحنا ما نعرفش عنها حاجة. لكن اهه ظهرت بعد ما جوزها طفش منها ومن طلبتها اللي ما بتخلص وساب لها ولاده التلاته وطلقها وباع الشقة اللي كانوا قاعدين فيها وخد الفلوس. عرفت دة كله ازاي. من خالتي اللي كانت قاعدة قدام ابويا وامي وبتحكي لهم وهي بتعيط وقالت
علشان كدة رجعت المنصورة وسالت عنك وعرفت اللي صابك الف سلامه عليكي يا اختي يا حبيبتي
فوزية
الله يسلمك. والله وليكي وحشة يا خضرة
خضرة
يارب ابدأ ما شوف فيكي وحش
وعقبال ما خالتي ما خلصت حكايتها كانو ولادها التلاته كلو العشا كله. باين عليهم انهم جاعنين ومحرومين. وفضلت خالتي قاعده عندنا بحجة انها بتخدم امي وبعد شهرين بالظبط لقيتها واقفة علي الباب مستنيا رجعه ابويا من الشغل جريت عليه وخدت منه كيس الفاكهه اللي كان جايبة وهي بتسحب منه كيس الفاكهه. مسكت ايده مسكة يعرف الراجل معنها وقالت وهي بتسحب ايديها بسرعه
اية دة يقطعني.
لقيت ابويا بيلين وبيقول
وهو اية بس اللي حصل.
ضحكت وهي بتنزل تقلعه الجذمة زي ما امي كانت بتعمل قفلت باب الاوضة علي امي خوفت تشوف اللي يقهرها. ورحت ناحبة ابويا وقولت ل خالتي
عنك انتي يا خالتي. من بعد امي ما تعبت ما بقاش في حد يقلع ابويا الجذمة غيري
بصيت لي بكهن وقالت بصوت حنون ودافي يطلع من ملاك مش شيطان زيها
طول ما انا عايشة ما خدش يخدم سي عبد العاطي
وبصت في عيون ابويا وقالت بدلع
الا انا
عبد العاطي
خلاص يا صابرين ما تزعليش خالتك. وروحي حضري لي لقمة اكلها
خضرة
وربي وما اعبد ما حد يحضر لقمتك غيري. دة انا عمالك النهاردة الملوخية اللي انت بتحبها
عبد العاطي
ملوخية. دة انا كنت نسيت طعمها فين من كام اسبوع احر مرة كلتها قبل ما فوزية تقع من طولها
هنا وقفت امي عند باب الاوضة بصعوبه وقالت
انا خليت خضرة تعملها لك. بس يارب تطلع حلوة زي اللي كنت بتاكلها من ايدية
عبد العاطي
خضرة ما بتعملش حاجة وحشة.
فوزية بصوت حزين
كدة.
ومشيت راحت ناحية الحمام وكانت هتقع من طولها روحت بسرعه ناحيتها وسندها لغاية الحمام ودخلت امي الحمام وهنا سمعت خالتي بتقول
يا خويا انت هتفضل تصرف علي مرضها اللي ملهوش علاج دة لغاية امتي ما توديها المستشفي هناك هترتاح
رجعت لخالتي ووقفت قدام منها وقولت
ابويا لو معه اخر جنية في جيبة هيفضل يصرف علي امي. انتي فاهمه
خضرة بنفس الكهن والمسكنة
يا ختي هو انا قولت حاجة. انا خايفة علي فلوس سي عبد العاطي
ومشيت ايدها علي رجله وكانت فاكراني مش شايفها وهنا لقيت ابويا بيقول
بس انا شايف ان خالتك بتتكلم صح. والمصاريف بقيت كتير عليه.
صابرين
المصاريف زادت علينا علشان خالتي وعيالها التلاته اللي ما بيبطلوش اكل.
خضرة بصوت مكسور
لو اكلتي هي وعيالي السبب امشي
ولسة هتقف مسك ابويا ايديها وقال
تمشي تروحي فين. هو انا قليل الاصل علشان ارميكي انتي وعيالك في الشارع.
صابرين
طبعا ما ترماش هي. انما ترمي امي في مستشفي حكومة وتتبهدل هناك وتحكم عليها بالموت. دة عادي يابا
خضرة. باستنكار
طق طق طق. مالكيش حق يا صابرين تكلمي ابوكي كدة. هو علشان كويس معاكي تقلي ادبك عليه
قام ابويا من قعدته ووقف قدام مني بالظبط وضربني قلم سففني تراب البيت من قوته صرخت من الوجع وخرجت امي من الحمام وحاولت توصلي بسرعه لكن مرضها منعها ووقعت علي وشها قدام مني قومت وحاولت اعدلها وهي بصت لي وقالت
انا كويسة. انتي كويسة
مسحت الدم اللي نازل من قورتها وقولت
كويسة ازاي بس. دة انا دماغك بتجيب دم.
قامت امي بصعوبه لان مرض البلهارسيا بيصيب المريض بالهزلان وهمدان الجسم وقومتني وبصت ل ابويا واختها وقالت
تحب اروح المستشفي امتي
اتكسف عبد العاطي من نفسه وقال
فوزية انا ماقصدش اني، ،،،،،،
فوزية وهي بتعيط ودموعها بتجري علي خدها
انا مش زعلان صدقني. اي خيانه في الدنيا ملهاش سعر جنب خيانه صحتك ليك.
ومسحت دمها اللي نازل من قورتها وقالت
ولو عايزا يطلقني كمان علشان تتجوزي انا ماعنديش مانع.
خضرة
فوزية انتي بتقولي اية انا ابص لجوز اختي. طيب ازاي
لكن امي بصت لي وقالت
صابرين ما تزعليش ابوكي تاني. وجهزي لي الجلبية بتاعتي خليني البسها واروح بيها المستشفي، ،،،،،،،،،
وروحنا المستشفي واستنيت امي دور لغاية ما بقي ليها سرير وطبعا الاهمال في المستشفيات الحكومة بلاش احكي لكم عليه انتو عارفينه والاهم من كدة ان كل اللي كانو في المستشفي بيتعاملو مع مريض البلهارسيا انه ميت ميت وعديت الايام كلها شبه بعضيها الصبح اروح المستشفي لامي وبعد العصر ارجع البيت خدامه اغسل وامسح واكنس. وحضره هانم نايمة علي سرير امي وحوالين منها عيالها تسمع صوت ابويا تقوم مع السرير جري. وكانها هي اللي عملت كل حاجة في البيت لغاية ما شوفت بعيوني ابويا قبل الفجر كدة بيتسحب وبيحاول يحضن خالتي لكنها منعته وقالت بدلع
لا. انا قولت لك في الحلال اكون ليك
عبد العاطي
ازاي بس. واختك مراتي
خضره
اتصرف انت الراجل وجذمتك علي دماغي. بس بالحلال
عبد العاطي
يعني اطلقها وهي في المستشفي كدة. دول اهل البلد كانو اكلو وشي
خضرة وهي بتزقة برة الاوضة
يبقي خليك بقي كدة. قدام الجنة ومش عايز تخش علشان خوفك من اهل البلد
عبد العاطي
انا بعشقك يا خضرة. ومابقتش عارف اعيش بعيد عنك
خضرة
انسي
عبد العاطي
يعني كدة. طيب اعملي حسابك الخميس الجاي هتكون دخلتنا
خضرة
ازاي بقي
عبد العاطي
هطلق فوزية وفي نفس الليلة هكتب عليكي
عيط اوي ومابقتش عارفة اعمل اية وخصوصا ان في الفترة الاخيرة كنت كل ما تكلم مع ابويا يضربني عرفت تقلبة عليه طلع النهار روحت لاصحابه وحابيبة وقولتهم علي اللي ناوي يعمله وكلمو وماحدش قدر يخلي يرجع عن اللي في دماغه. خلاص عرفت تجيب رجله وجه يوم الخميس وعرفت امي من الناس اللي بيروحوا يزوروها من حريم البلد باللي ناوي ابويا يعمله. تعبت اكتر وجسمها بدأ يرفض العلاج والساعة اللي كان ابويا بيرمي عليها يمين الطلاق هي نفس الساعة اللي خرجت فيها روح امي من جسمها وصرخت والوجع جاب اخرة. ولقيت ايدين حنينة بتمسح دموع عينية بصيت للي بيعمل كدة لقيت محمد ابن خالتي خضرة الوسطاني بيبص لي وبيقول
دموعك دي غالية اوي عليه. واللي السبب فيهم امي.
بصيت له وانا قلبي قايد نار من ناحية خالتي وقولت بطريقة انا نفسي خوفت منها
معلش. دي برضو خالتي،،،،،،،،،،،،،،
لسة للحكاية بداية وانا وانتي والزمن طويل يا خضرة، ،،
اللي عرف اسم الفيلم. يكتب لي او حرفين من الاسم بس وانا هقول صح ولا غلط. ما يكتبش الاسم كله
مش هقول. علقو والجو دة. اكتب تقيمك للحلقة من
واحد ل عشرة. حلوة الصيغة دي.
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺