رواية خطيئة المراهقة بقلم الكاتبة ورود الخالدي البارت الاول حصريه وجديده على مدونة أفكارنا
 |
رواية خطيئة المراهقة بقلم الكاتبة ورود الخالدي البارت الاول حصريه وجديده على مدونة أفكارنا
هدير
رجعت من الدوام احس راسي صاير طبل من الصداع.. اول مدخلت:
مساء الخير
هلا ماما...
ورجعت تسولف بالموبايل طبعا تحجي ويه ابنها.. اكثر الاحيان خصوصا بالفترة الاخيرة صارت اتصالاتهم مستمرة من يوم الي رجع ابنها من الامارات واستقر بالعراق ومو بس اتصالات لا اكثر الاحيان.. يجي عليها ياخذها. من راس الشارع..ويطلعون مطاعم ومولات.. ويشتريلها ملابس وجنط واحذيه واشترالها كومه ذهب بتوت وملاوي ومحابس وكلادة شطولهامن هاي اليسموها سبحة طويلة.. طبعا هي طايرة من الفرح وتحس نفسها دتعيش احلى ايام حياتها.. وانه رب العالمين عوضها عن ايام الفقر والعوز والقهر العاشتهن ويه ابويه الظالم.. اي افضل تسمية.. ممكن اسميها لابويه هي ظالم.. لان ظلم امي وكان السبب بموتها ومن بعدها ظلم مرت ابويه وعيشها ايام سودة والي دا احجيلكم عنها هسه هي مرت ابويه واسميها ماما نجاة.. لان هي الي ربتني وتعبت عليه بوقت الي مجان احد يعرف عني ولااحد عنده وقت.. يخصصه لطفله يتيمه تيتمت وهي بعمر سبع سنوات.. جانت بيبي الله يرحمها تخاف من ابويه.. صح دارتني فترة الى ان تزوج ماما نجاة بس مو ذاك الاهتمام لان هي اصلا جانت جبيرة بالعمر وبيها اشكال وانواع الامراض.. واذا تردون تعرفون السبب الي خلاني تيتمت ارجع واكولكم ابويه هو السبب ابويه مجان يريد امي تخلف بنات.. لان قبلي جابت بنيه وعمرها سنه وماتت وبعدي حبلت مرتين وكلما تاخذ سونار يكولولها بنيه فابوية يجبرها تنزلها.. وتشوف الموت بسبب الاجهاض.. وبالطفلة الاخيرة قررت تخليها ومتجهضها لان ضلت توهوس وتكول اذا جهضتها هالمرة اموت ومن سألها بابا كالتله:
الطفل ممبين بالسونار لان طابك رجليه لازم ادخل بشهر السادس يله يبين
وضلت تتوسل بيه وتكوله خلي نعوفة بلكي يطلع ولد.. الى ان دخلت بشهر السادس اخذها بيده للدكتوره والكارثة انه الدكتورة كالتله نوع الجنين بنت رجع للبيت الطريق كُله وجهه مدخن.. اني جنت طفله عمري سبع سنوات بس اتذكر كل هالتفاصيل.. مطبوعة بذاكرتي لان بسببها فقدت امي.. المهم وصلنا للبيت اول مدخلنا.. ضل يكفخ بماما يكولها:
تضحكين عليه احلام.. تضحكين عليه ولج تدرين بيها بنيه وضامة عليه كل هالوقت كتلج ما اريد بنات..
امي جانت تبجي وتتوسل بيه.. بس هو نار ومن ضمن الي اتذكرة من حجيها وهي تبجي؛
مبصير انزلها بعد اني بشهر السادس
بس هو عبالك شيطان متلبس، بيه مجان يسمعها وصار بينهم صياح وعياط وشفته لزم ماما كطعها تكطع دفرات وبوكسات الى ان فقدت وعيها عافها وطلع بيبي اجت ع الصياح كعدتها وشربتها مي وضلت ادعي عليه الله ياخذه.. ثاني يوم الصبح.. امي جانت حيل.. مريضة بحيث متكدر تتحرك من فراشها هي جان عدها اخ واحد جبير اكبر منها بعشر سنوات واخت اكبر منها ب6سنوات ابوها وامها.. متوفين خالو نجاح جان رجال حيل مسالم وفقير وخالتي جانت متزوجة بالريف وشبعانه ضيم اكثر من امي.. لهذا جانت امي على كد ايد ابويه شابعها اهاين وبسط ومان عليها لان تزوجها.. عبالك هو فد شي.. مميز وهي شي منبوذ رغم امي جانت حلوة وبيضة وشكلها طفولي بس مجان عدها اهل بيهم خير لو ظهر تستند عليه جانت شبه وحيدة بهالدنيا فمن جان ابويه يضربها لو يهينها لو يعيرها باستمرار بت الفكر جانت تسكت لان تخاف تتطلك وتواجه مصيرين.. اما تاخذني وتضل حايرة بعيشتي وهي لا اهل ولا وظيفة ولا صنعة واما تعوفني وتطلك ويحرموها مني لان خالو الله يرحمه هم جانت حالته المادية زفت ومزوج وحدة اكبر منه وماعنده حتى جهال وهيه معيشته براتبها مال التقاعد.. المهم صفت امي وحيدة ومتحملة عذابها ومستسلمة لابويه الي جان قاسي وجاف وياها ويحس نفسه متفضل عليها حتى بالمي الي تشربه ابيته
المهم للعصر تخربطت اكثر وسمعتها تسولف ويه بيبي وتكولها:
النزف زاد عليه!!
بيبي رادت تاخذها للمستشفى بس هي جانت تنتظر ابويه يرجع.. رغم صار المغرب وهو مجاي.. ومن تأخر الوقت وحالة امي ساءت اضطرت بيبي.. تاخذها للمستشفى وهناك دخلوها لغرفة العمليات الي دخلتها عايشة ةطلعت منها جثة..
طبعا ابويه اجه اثناء العمليه وجان يتصرف طبيعي وكانه زوجته متعرضة لحاله اجهاض عادية بظروف عادية ولا كانه هو الي سبب الها الاجهاض والحاله الي هي بيها والاغرب انه بعد سمع انه امي توفت اثناء العمليه.. كلب الدنيا بالصياح والتهجم ع الكادر المشرف ع العمليه ويصيح بعلو صوته ويضرب البوب بوكسات والناس كوه لازمته:
موتو مرتي كتلتوها.. انتو موتوها مرتي مابيها شي جتكم تمشي على رجليها.. موتو مرتي وابني!!!!!!!!!
ومسكت عند هالحد راح اشتكه ع الطبيبة وادعى انه الطبيبة هي الي تسببت بموت امي بس الحقيقة الي نعرفها بس اني وبيبي وعمتي انه هو الي قتلها بالضرب والدفرات والبوكسات وخله الطفله تموت ابطنها وتسبب الها النزف القاتل..
وراحت امي عن الدنيا وضاع دمها هدر وبقى ابويه القاتل يصول ويجول بهالدنيا لا.. ومكتفة بموتها وره شهرين بس كام يدور على مرة جديدة حتى يتزوج.. وطبعا بيبي تخاف منه وعمتي هم جانت تكرهه وتموت منه رغم هي اخته الزغيرة والوحيدة جانت تكرهه ومن يفوت للبيت.. ادردم بصوت ناصي وتكول لاهله ولا مرحبا.. بس عمتي مجانت ملاك.. هم جانت.. موشويه ومو قليلة حيلة صح هو جان يضربها ويومية طلابه بسببها بس مو من فراغ بصراحة عمتي جانت حيل خفيفة وبرغم اني جنت زغيرة بذاك الوقت بس مثل مكتلكم اتذكر هواية اشياء ومن ضمنها انه عمتي جانت من يطلع ابويه جانت تبدل وتكشخ وتتمكيج وتطلع .. وجانت تروح فترات طويلة يله ترجع ومرة اخذتني وياها لمحل واحد يبيع دشاديش نسائية ومكياج هيج محل بسيط وزغير ومكانه ختله وكعدتني ع الكرسي وكالت:
ابقي هنا هسه اجي
.وفاتت هي والولد ابو المحل لغرفة اعتقد غرفة تبديل صايرة بنهاية الممر المعلكة بيه الدشاديش وبقت يمكن نص ساعة او اقل ما اتذكر بعدين طلعت من الغرفة ترتب بملابسها وهو طلع وراها وشفته انطاها فلوس وانطاها علاكة.. مدري شنو بيها.. وطلعنا مجنت فاهمة شنو يصير لان جنت طفلة.. واستمرت تصرفاتها وعلاقاتها محد يدري بيها.. ابويه جان دائما يضربها ويزوركها.. وحتى من تزوج ماما نجاة هم مشاكله هو وياها مستمرة جانت ماما نجاة تكوله:
خطية ليش هيج ويه اختك.. جاي تاذيها وتضربها ضربات قويه تره ضربه تخيب وضربة تصيب وتروح تبتلي بيها
يكولها:
لا تدخلين بيني وبين اختي..
ورة كم سنه من زواج ابوية.. وتحديدا بوكتها جان عمري 10سنوات.. دخلت الموبايلات هاي النوكيا.. وطبعا الكل اشترة منها حتى بيبي عدها واحد بس عمتي مخلاها ابوية تشتري.. واكيد عنده اسبابه.. بس اني اكتشفت انه هي عدها واحد ومخليته صامت وشفته بيدها كم مرة وكالتلي.. ديري بالج تحجين لاحد وتكولين مروة عدها موبايل.. وفعلا مكلت لاحد.. وصارت من ينامون تدخل للاستقبال وتكولي كعدي بالباب سوي نفسج تلعبين واذا اجه احد بسرعة ركضي ونبهيني.. وجانت تحجي ويه اكثر من شخص ودائما نفس القصة تسولفها تكولهم اني مطلقة وعايشه بعذاب عند اهلي حتى حقوق ماعندي لان تزوجت بس بعقد سيد وماعندي عقد محكمة ومن تطلكت ما اخذت لا مؤخر ولا نفقة وعايشه حياة تعيسه وتستمر بكلام كوله مو حقيقي.. مدري ليش تكولهم مطلقة وهي اصلا مامتزوجة ومن ضمن السوالف.. جانت تطلب منهم ارصدة وكل الي تتصل بيه تحجي وياه فترة وتضل تلح شوكت تخطبني وشوكت تخطبني
الى ان بيوم من الايام اجوي عليها خطابة من البصرة.. وماصدك ابويه تنخطب بسرعة وافق وتزوجت وراحت للبصرة.. وره فترة اجتنا.. ع اساس، تزورنا.. هي، وزوجها.. وبقت عدنا يومين بس من راحت اكتشفت بيبي انه محبسها مبيوك وياه مبلغ فلوس مو هواية بس المهم بيبي انباكت بالبداية تهمت ماما نجاة بس ابويه كلها بتج الي باكتج لان فلوسج ومحبسچ صارله سنين ابوفيتچ محد مد ايدة عليه.. من اجت بتج اختفن.. وخابر اخته وتعارك وياها وغلط عليها وكلها حرامية ووراها ضل يلح ع بيبي ويكولها..:
هاي بتج.. متبرين منها.. وحتى ورث ماتاخذ، من عدنا سجلي البيت باسمي..
وبقه يوميه يحجي براس بيبي حتى تكتب بيتها باسمه.. وفعلا سجلت البيت بأسم ابويه صح البيت كولش بناءه قديم وتعبان بس.. مساحته 200متر وركن على شارعين يعني موقعة تجاري.. بس ابويه مجان عنده امكانية يرممه لو يفلشة ويبنيه ورة سنتين توفت بيبي والبيت كام ينز والكاشي كفع وارتفع عن الكاع وقرر ابويه يعالج الارضية.. طبعا بيبي من توفت بقت غرفتها مقفوله سنه كامله.. بيها جرباية خشب ام نفرو بوفيتها وكنتور ابو٣بوب ونضيدة كولها فراشات ومخدات كطن ولحف ستن من هاي القديمة وسجاجيد حياكة بس من فتحنا غرفة بيبي جان المنظر يخوف ويبجي الغرفة كولها نسيج عنكبوت اسود.. والفيران والجريذيه ماكله الفراش والسجاجيد وماكو ولا قطعة مامكرضة.. المهم ابويه اخذ الفراش للنداف وباعة ع شكل كطن والكنتور والبوفيه والجرباية صعدهن للسطح وبقن سنين بالسطح بالمطر.. وماما نجاة تلح عليه:
يارجال نزلهن من فوك السكف مالنا تعبان والاخشاب صكطن من المطر لوتنزلهن اتذبهن لو تبيعهن
بس مجان يقبل فبقن فوك
يمكن طولت هواية بالكلام عن بيبي وعمتي.. واجه الوقت الي احجيلكم بيه عن ماما نجاة.. وعن قصتها المأساوية الي جبرتها تتزوج ابويه وتضل عايشه ويه شخص ظالم مثله.. طبعا الي راح احجي عنها قسم منه عن لسانها هي مسولفته الي وقسم منه عشته اني وياها لحظة بلحظة
ماما نجاة جانت طالبة صف ثالث متوسط.. بس جانت احلى بنيه بالمدرسة جسم وشعر وجمال وجه.. وصوت وهي لحد الان
تجنن رغم عمرها48سنه بس بعدها جسمها يجنن وجمالها ياخذ العقل وشعرها ليل سرح وطويل وعيونها يموتن.... بعمر ال48 وهي هالشكل لعد من جانت مراهقة شلون جان شكلها وجمالها.. المهم وهي بصف ثالث متوسط بدت قصتها ويه ابو ابنها او طليقها.. وملخص تعارفهم انه صديقتها مشترية حذاء من محل راقي.. وطلع الحذاء زغير عليها وتستحي ترجعه لان صارلها اسبوع من اخذته وتخاف لا صاحب المحل ميقبل يرجعه فماما نجاة كالت الها:
بكيفه ميرجعة بعده ماملبوس شنو تذبين فلوسج بالشط..
المهم راحن اثنيهن للمحل.. ومن فاتن للمحل ابو المحل شافها وعقله طار بجمالها واسلوبها وعيونها وحاول ياخذ وينطي وياها بالكلام مكدر لان هي شريفة وثكيلة متنطي مجال ومن طلعن من المحل قرر يلحكهن بالسيارة ويعرف وين ساكنه ويجمع معلومات عنها.. وضل يدور فرصه حتى يلتقي بيها بس.. الفرصة.. جانت صعبه الى ان قرر يتعرف على صديقتها الي انطته مجال.. المهم.. عن طريق صديقتها كدر يوصللها فكرة انه هي متروح من باله وقصدة شريف ويريد يتعرف عليها اكثر ولان الشاب جان صاحب محل راقي.. ومبين حيل غني قررت تسمع منه بلكي يطلع صادق بكلامة ويخطبها ويطلعها من بيت الفكر العايشه بيه هي وامها وابوها واخوانها الثلاثة الشرانيين.. المهم التقت بيه وتعلق بيها وصارت تروحله للمحل يسولفون وعاشو قصة حب سنه كامله بس حب شريف... وطبعا جانت تخاف لا تنلكف واخوانها.. يجرمون بيها اذا عرفو عدها علاقة ويه احد.. وكامت تلح عليه يتقدم الها وهو هم جان يموت عليها.. ويتمنى يتزوجها.. وفعلا فاتح اهله بالموضوع.. وهنا جانت الكارثة اهله رفضو رفض قاطع خصوصا امه.. جانت تكوله على جثتي تتزوجها.. وطبعا ابوه جان رافض بسبب فارق المستوى.. بينهم وبين اهل البنيه.. اليحبها ابنهم همه جانو اصحاب املاك محلاتهم تارسه السوك وبيوتهم وسياراتهم وجانو من اغنى العوائل رغم جانت فتره بداية التسعينات حصار.. ومعظم العوائل بدو يعيشون تحت خط الفقر بس هو جان من عائلة غنيه ومعروفة عكس عائلة ماما نجاة الي جانو ومازالو عايشين الفقر بكل تفاصيله فأكيد هيج زواج ميتم الا بمعجزة. لكن الشاب ما استسلم.. وهددهم لو اتزوجها لو اخطفها وانهزم بيها واسويلكم طلابه... اضطروا اهله يخطبوها.. وفعلا تزوجها وطبعا هي بطلت من المدرسة والتهت بزوجها جانت تحاول تسعدة بكل الطرق وتحاول ترضي اهله حتى يحبوها.. وتكدر تعيش وياهم بسلام.. بس ماصار الي جانت تتمناه عاشت عدهم شابعة ذل ومسبه واهانه من امه واخوه واخواته.. بس متحمله لان تحبه وتتامل يطلعون ابيت.. ورغم همه اغنياء بس اهله مجانو يسمحون اله يعزل عنهم فاضطروا يبقون وياهم وحملت وجابت ابنها الوحيد وكرست حياتها لزوجها ولابنها وتجاهد تمشي الحياة طبيعية.. بس للاسف اخوانها الزبايل ما خلوها بسلام جانو يدخلون بحياتها ويحاولون يستغلون نسيبهم الغني حتى يرفع من مستواهم ولان جان يستحي منهم يضطر ينطيهم فلوس كلما يطلبون... بس ما اكتفو وصلت بيهم الجرأة والوقاحة الى ان يداينون من ابوه مبلغ جبير.. ومن داعاهم بيه نكروا عليه.. و صارت مشاكل لاتعد ولا تحصى تهديد وغلط.... الى ان ابو زوجها اشتكه على اخوها.. وذبه بالسجن ولان اخوانها شرانيين..
تعرضو لابو زوجها.. وهددو بالقتل.. اذا ميتنازل عن اخوهم وينسه موضوع الفلوس.... ورغم تصرفات اخوانها الكارثيه بس زوجها.. جان باقي عليها ومتمسك بيها ويحبها.. باعتبارهاام ابنه وحبيبته.. وشي اكيد اهله.. اول شي فكرو بيه انه يطلكوها من ابنهم ويخلصون من هالنسابه الزبايل.. بس هو وكف بوجه اهله ورفض وكلهم اطلع بيها بيت وحد وطبعا رفضو اقتراحه وجان ردهم ثابت اذا ميطلكها.. يتبرون منه طول العمر وبسبب ضغوطات اهله وامه وابوه.. قرر يطلكها بالنهاية.. ويحرمها من ابنها الي عمرة 3سنوات...
انتظروا بارت2
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺