سكريبت قذارة بشر الفصل الاول والثاني والثالث والاخير بقلم_Alimar_Gha حصريه وجديده على مدونة أفكارنا
 |
ام الجماجم: شو يلي وصلك لهون ... يعني بنت بعمرك محكومة مؤبد مرة وحدة
ريم :بين يوم وليلة ممكن تتزلزل حياتك بس بين يوم وليلة
بموقف صغير وتافه ممكن يخلي حياتك تتغير وتنقلب من فوق لتحت
رح احكيلك قصتي انا كنت بدرس بكلوريا علمي وشاطرة كتير بدراستي
ماما ماتت لما كان عمري 8 سنين ..ماتت هي وعم تولد بإختي رنيم وكان اخي رامي عمرو15 واخي راضي 16 سنة
كبرنا وكل واحد اعتمد على حالو وربا حالو بحالو
ابي بيشتغل لحام رهن حياتو كرمالنا ورفض يتزوج بس كرمال يدير بالو علينا ... وكلنا اهتمينا بإختي رنيم ودللناها كتير ...وانا بالذات اهتميت فيها بزيادة
اخواتي الشباب كبرو وما كملو دراستهن كرمال يشتغلو ويقدمولنا شو بنحتاج
اخي راضي اشتغل مع ابي بالملحمة ورامي اشتغل بفرن
حياتنا كانت طبيعية نوعاً ما بس وصلنا ليوم قلب حياتي وحياة عيلتي وغيرها بالكامل....
ـــــــــــــــــــــــــ قبل سنتين ـــــــــــــــــــــــــــ
اليوم عيد ميلاد اختي رنيم واتفقنا انا واخي رامي اني مر لعندو عالفرن بعد المدرسة وننزل عالسوق ونجيب هدية لرنيم وبالفعل خلصت دوام ومريت لعند اخي
ريم: كيفك اخي
رامي: اهلين يا روحو لأخوكي...يلا تئبريني رح خلص هي الطلبية وبنوصلها وبعدين بننزل عالسوق
ريم : وين الطلبية بدنا نوصلها
رامي: على شركة بدن غدا وهي على طريق السوق يعني ما بنتأخر ولا يهمك
ريم: أي كرمال لحق اعمل الغدا كمان
رامي: ولا يهمك ابوكي بعت لهون لحمة وعملناهن لحمة على عجين بالرجعة بنمر بناخدهن بكون شواهن الشغيل
خلص رامي الطلبية وطلعنا من الفرن ومشينا حتى وصلنا على مبنى فخم كتير وكان في لوحة كبيرة براس المبنى مكتوب عليها (شركة جابر للإستيراد والتصدير)
كان في رجل كبير بالعمر اعد على الباب ولابس ملابس شرطي
ريم: اخي بقدر ادخل معك وشوف الشركة من جوا ولا مرة اجيت على هيك مكان
رامي: اختي الفطاير رح اعطيهن للحارس ما رح ادخل ....مرحبا عمي ابو محمد
ابو محمد: اهلين ابني
رامي: دخيل عينك فيك تعطي هدول الفطاير للآنسة مايا
ابو محمد: والله يا ابني ما بقدر شوفت عينك قاعد لحالي هون وما بقدر اترك المحرس فاضي
رامي : طيب انا بعطيها ياهن
غمزني رامي وهمسلي انبسطي ست الحسن وهي رح تدخلي معي لجوا
دخلنا انا ورامي لجوا وكانت شركة فخمة كتير بعمري مو شايفة متلها
طلعنا للطابق التاني ودخلنا على غرفة صغيرة وكان في بنت حلوة اعدة ورا المكتب
رامي: مرحبا مايا
مايا : اهلين رامي كيفك ليش عزبت حالك وجبتن انت وينو ابو محمد
رامي: لك قلنا بنكسب شوفتك وبعرفك على اختي ريم
مايا: اهلين ريم تشرفنا
ريم: تسلمي وانا اكتر
ونحنا عم نحكي بيطلع من جوا رجل كبير بالعمر وجسمو معبا وكرشو مترين قدامو
وكان معو شب حلو طويل واسمراني وعيونو خضر
كان الرجال الكبير عم يطلع فيي نظرات غريبة وعم يفتل شواربو
مايا: جلال بيك انا طلبت غدا ورح اتغدا هون واكمل شغل بتحب اطلبلك شي
جلال: لا انا وابني جابر طالعين نتغدا برا وما رح ارجع على الشركة ابقي مري المسا وجيبي معك شوفي شغل عاوزك بموضوع
كان عم يقول هالحكي وما شال عينو من عليي هيك لحتى خلص حكي وطلع مع ابنو يلي اسمو جابر
رامي: شبو هاد ليش هيك عم يحكي معك وشو بدو منك ليش لتروحي عندو على البيت
مايا : طول بالك رامي انا طول عمري بوديلو الشغل عالبيت لما بيطلع بكير من الشركة وما تخاف بالبيت عندو مكتب متل هون يعني كلو رسمي
طلعنا انا ورامي من الشركة ومشينا بالطريق
ريم: شو اخي شكلك غيران على مايا الحلوة
رامي : بشرفك مو حلوة
ريم: أي ...طمني ان شاء الله في شي جدي
رامي : ان شاء الله هالفترة بدي اطلبها اذا وافق ابوكي
ريم: لك ان شاء الله الله يفرحني فيك انت واخوك وشوف ولادكن
رامي: وان شاء الله بشوفك احلى دكتورة
رجعنا على البيت انا ورامي وانا فرحانة كرمالو وكرمال فرحة اختي رنيم لما شافت الهدايا
تاني يوم كنت طالعة انا ورفيقتي هيام من المدرسة وافترقنا وكل وحدة راحت على بيتها من طريق ومن طريق بيتنا شفت سيارة حلوة كتير وفخمة واول مرة بشوفها بحارتنا كانت مبينة انو فاضية وقفت قدام شباك السائق وصرت اتفرج على حالي على شباكها واظبط شعراتي وفجأة انفتح شباك السيارة ....
#قذارة_بشر
#حكايات_ماء_الذهب
#بقلم_Alimar_Gha
#الجزء_الثاني
ريم : جاابر ؟؟؟...قصدي استاذ جابر ...
جابر: يعني لساتك متذكرتيني
ريم : اي مو مبارح شفتك لسا ...بس حضرتك شو عم تعمل هون بحارتنا
جابر: عم دور عليكي
ريم: عليي انا؟؟
جابر : اي عرفت انك ساكنة بهي الحارات وحبيت مر وشوفك
تركتو وانا خجلانة ومشيت ...اول مرة بوقف مع شب غريب وبحكي معو
صرت كل يوم شوفو ناطرني بنفس المكان ويحاول يحكي معي بس ما رد عليه... وبيوم وقف بطريقي وكان بإيدو وردة حمرة وعطاني ياها ...يومها بقيت كل النهار عم فكر فيه
بعد شي شهر وقف بطريقي وقلي انا بحبك ايمت رح تحسي فيي
حسيت وقتها حرارتي ارتفعت والبي صار يخفق بسرعة وزاد تفكيري فيه ما بنكر اني انا حبيتو كمان
بقيت كل يوم عم شوفو وبعدها اعترفتلو اني بحبو وتطورت علاقتنا من نظرة ثواني لوقفة وحكي كنت اوقف معو يومياً
ليوم وقف وقلي....
جابر: نحنا لازم نقعد بمكان وناخد راحتنا
ريم: بنقعد بكفتريا؟
جابر: كفتريا شو الناس رح تاكلنا بنظراتها ..انا برأيي نروح على بيتي
ريم: شوووو....انت شو عم تحكي مستحيييل
جابر: اهاا انتي ما عندك ثقة فيي
ريم :لا مو هيك بس..
جابر: بس شو ...انتي لو بتحبيني بتروحي معي وانتي مرتاحة بدون خوف ولا شك
ريم: طيب انا رح اثبتلك اني بحبك وما بشك فيك ولا خايفة منك ورح روح معك
جابر: اي هاا يسلملي البك شو بحبك ...ايمت بدك شوفي وانا جاهز بنروح وبنشرب قهوة وبنتعرف على بعض اكتر
ريم: ماشي بكرا رح غيب عن المدرسة وبنروح من الصبح
جابر: طيب رح استناكي هون بتطلعي معي وبنروح
#قذارة_بشر
#حكايات_ماء_الذهب
#بقلم_Alimar_Gha
#الجزء_الثالث_والاخير
رحت معو تاني يوم كان البيت بمنطقة كلها بيوت فخمة فتنا على البيت وكان متل الفيلا الصغيرة كنت مبهورة بكل شي عم شوفو فتت وقعدت بالصالون وكان مقابيلي تلفزيون كبير كتير متل شاشات السينما وراح جابر عمل قهوة واعدنا نحكي
جابر: ليكي حبيبتي هي خلصنا القهوة محضرلك شوية اغاني هون رح تحبيهن كتير ...اسمعيهن على بين ما انزل جيب اكل وارجع
ريم : اي بس ما تتأخر
راح جابر وتركني لحالي بالبيت كنت عم اسمع الاغاني كانو حلوين كتير وفيهن رومنسية بعد شوي انفتح باب البيت فكرتو جابر بس طلع شخص غريب دخل وحاول يتهجم عليي صرت اهرب من طريقو وبعدها قدرت اوصل للباب
لما حاولت افتح الباب واهرب شفت جابر قدامي وبعدها حسيت نعست كتير وما بقا قدرت اوقف على رجليي ووقعت بالأرض
..............
بعد ما فقت لقيت حالي بسرير بغرفة نوم كبيرة كتير وكنت بدون ملابس
ما قدرت اعرف شو صار حتى فات جابر وازرار قميصو مفتوحين
وقتها قدرت اتوقع شو صار
قرب مني وانا ما كنت قادرة ابعد لأنو كنت لسا شبه دايخه
ريم : بعد عني شو عملت خليك بعيد
جابر : حبيبتي شو عم تحكي والله انا بحبك
ريم: بتحبني ما بتعمل يلي عملتو لك انت دمرتني
جابر: مو بإيدي مو بإيدي غلطت والله غلطت وضعفت لما شفتك قدامي ..ليكي حبيبتي انتي رح تصيري مرتي ورح نتزوج بوعدك رح اجي واطلبك من اهلك بأسرع وقت
ريم : مو مصدقتك
جابر: قوليلي شو اعمل حتى تصدقي
ريم : تكتب تعهد
جابر: أمرك يا ست الكل ايمت ما بدك انا بكتبلك تعهد وقدام أي حدا حتى اذا بدك بالشرطة
ريم: لااا شو شرطة ما شرطة ما بدي فضايح عند محامي بيمشي الحال وانا بدي اختار المحامي وهلأ
رحت مع جابر عند محامية بتكون بنت عم هيام رفيقتي وكتب تعهد ووقع عليه واذا خالف التعهد رح ينسجن
وصلني على المكان يلي اخدني منو ورجعت على البيت
ابو راضي : وينك يا بنتي لهلأ ليش تأخرتي
ريم: أاأاأ ....اهلين ابي....اليوم عطونا دروس اضافي بتعرف قرب الفحص
ابو راضي: أي يلا شدي الهمة بنتي بدي ياكي احسن دكتورة بالبلد
ريم: ان شاء الله ابي ان شاء الله
رجعت على حياتي عادي بس رغم هيك كنت عم فكر بالشي يلي صار وكل يوم كنت شوف جابر ويحاول يحكي معي بس ما رد عليه رغم انو لسا البي معلق فيه ...هيك حتى اجا يوم وما شفت جابر بس شفت شب غيرو كان واقف بالشارع وجنبو موتور
مجهول: انتي الآنسة ريم؟
ريم: أي مين حضرتك
مجهول: انا عروة رفيق جابر ...بس جيت خبرك انو جابر مريض كتير وهو ببيتو وحرارتو ما عم تنزل وطالب يشوفك
تركتو ومشيت وانا البي شعل نار من خوفي على جابر رجعت عالبيت ومانمت طول الليل وانا عم فكر فيه وتاني يوم غبت عن المدرسة ورحت عند جابر على بيتو لقيت الباب مفتوح ..خفت اكتر وفتت وصرت اصرخ ونادي عليه...لقيتو بغرفة النوم بالسرير وكلو دم وجنبو سكين كلها دم...صرت اصرخ وقلو :جااابر قوووم ما فيني عيش بلاك قوم ...والله انا حبيتك كتير ...ما تتركني قوم
فجأة فتح عيوني وقلي : يعني مسامحتيني
ريم: لك أي أي مسامحتك بس ما تموت
جابر: طيب ليكني قمت ما تبكي ...هاد كلو مقلب مشان اعرف اديش بتحبيني
صرت ابكي وقلو : كيف بتعمل هيك كنت رح موت من خوفي عليك
جابر: يعني بتحبيني؟
ريم : أي
هي المرة جابر ما جبرني على شي وكل شي صار برغبتي
رجعت مع جابر متل اول واكتر وعلاقتنا اطورت اكتر ...وصارت حياتي متل أي وحدة متزوجة ..وكان مصروفي ما اصرفو غير على ملابس عرايس
مرقت حياتي وانا عم اتعلق بجابر اكتر وعم انسى دراستي ...وصرت غيب عن المدرسة بشكل كبير وكان جابر يجيب الي تقارير طبية مزورة مبررة للغياب
وبيوم فتح معي سيرة الزواج بس خبرتو انو ما بنقدر نتزوج قبل ما اخلص المدرسة والامتحانات بس هو قنعني انو نكتب كتابنا بالبيت وبعدها بيطلبني حتى نكون مرتاحين
كاتب العدل: يا بنتي بتقبلي تتزوجي هاد الشخص على سنة الله ورسولو
ريم : أي أكيد بقبل
مرت ايام كتيرة وانا اتعلق بجابر اكتر وصرت اقضي معو اوقاتي كلها وبأيام الفحص كنت شوفو بحجة اني عم اخد دروس وخلص فحصي وطلعت نتائجي وكانت سيئة بسبب إهمالي بس ابي واخواتي فكرو انو من ضغط الشغل بالبيت
اجو جابر وابوه حتى يطلبوني بس اهلي ما وافقو...
ريم : اخي بدي اسألك سؤال بس مستحية
رامي : قولي اختي
ريم : ليش ما وافقتو على العريس
رامي: اختي انا سألت عنو الشب صايع كتير وسمعتو مو كويسة وما عندو لا شغلة ولا مشغلة مقضيها صياعة ولسا ابوه سمعتو اضرب
ريم: بس انا حاسستو انو انسان مناسب
رامي : لا يا البي بعمرها ما تغرك المصاري مو كل شي بينشرا بالمصاري
اخي فكرني اني بدي مصرياتو وهو مو عارف شو يلي صاير بأختو وكنت بتوقع اذا حكيتلو رح يشويني بالفرن على عملتي او يخبر راضي ويعلقني بدل الخاروف ويسلخ جلدي عن عظمي
كنت خاف كتير من فكرة انو اتزوج حدا غير جابر واصلاً ما بقدر اتزوج غيرو لانو متزوجتو الو
صار جابر يقنعني انو لازم انقل على بيتو يلي حيصير بيتنا وهو ما عاد قادر يتحمل العيشة بدوني لهيك تركت رسالة لأهلي واخدت اغراضي ورحت عند جابر عالبيت ...
لما فتحت الباب بالمفتاح دست على ورد وكان الطريق كلو ورد من باب البيت لحد غرفة النوم وكان في شموع وموسيقة هادية فتحت باب غرفة النوم بس ما شفت جابر ...شفت ابوه وانصدمت
ريم : اه ... عمو انت شو عم تعمل هون
ابو جابر : عمو مين يا عيوني ...انا زوجك
ريم : ههههه شوهالمزح عمو ...وينو جابر
ابو جابر : ايوا يعني مو مصدقتيني ...طيب رح اتصل بجابر...الوو ..ابني قلتلك ما رح تصدق تعال فهمها بقا مو قادر اتحمل شوفها قدامي وابقى قاعد.. من زمان وانا بستنى هاي اللحظة
انا عم اسمع الحكي ومو فهمانة شي
دخل جابر ركدت عندو وضميتو بس هو بعدني عنو شوي شوي وبدا يحكي...
جابر: ليكي ريم رح فهمك كل شي ...بتتذكري يوم يلي شفتينا اول مرة بالشركة ...انتي عجبتي بابا ما عجبتيني الي ...ولما رحنا نتغدا طلب مني اني طبقك وازوجك الو ...لأنو بيعرف انو انا ما بتصعب عليي ولا بنت ... وبيعرف انو في احتمال كبير انك ما تقبلي فيه لانو كبير بالعمر وهيك انا زوجتك ابي ما اتزوجتك ... لما كتبنا الكتاب الزلمة سألك بتقبلي تتزوجي هاد الشخص ..يعني بدون ما يزكر اسم وطبعاً احنا كنا عاملين توكيل بموافقة ابي لهيك ما سألوني اذا بوافق اتزوجك... وهيك صرتي خالتي مرت ابي هههههههههه
ريم (تبكي):لك انت شو عم تحكي ...انت ما عندك كرامة لا انت ولا ابوك شو عم تطبقلو سيارة ولا طقم عجبو ...لك انت يا ابو جابر كيف بيجي منك تتزوج وحدة عايشة مع ابنك
جابر : اه طبعاً نسيت قلك عملنا هالتمثيلية لانو بابا ما بحب البنات وصادفت انك عجبتيه وكنتي بنت بقا انا كان لازم اتصرف و كل هالشي هاد مقابل سيارة من الموديل يلي نازل جديد
وقفت جامدة بأرضي ومو عرفانة شو رح اعمل بس بلحظة عرفت شو المفروض اعمل طلعت برا الغرفة وتركتن عم يحكو بعدا رجعت على الغرفة
ريم : اها طيب ممكن جابر تتركنا انا وزوجي لحالنا شوي
طلع جابر وبعد خمس دقايق طلعت
ريم : جابر ابوك بدو ياك شوي
دخلت ورا جابر على الغرفة وبعدا طلعت كانو اهلي عم يدقو على الباب وصوات اخواتي عم ينادوني وصوت الشرطة معهن ...هربت من الباب الخلفي للبيت لأنو اذا ما مسكوني اخواتي كانت الشرطة رح تمسكني لأني قتلت جابر وابوه بالسكين
حاولت اهرب بس بالأخير مسكتني الشرطة وحكمت المحكمة عليي بالمؤبد لما عرفت اني ضحية
ام الجماجم : ندمانة على الشي يلي عملتيه
ريم: لو رح اقتلهن ويعيشو رح ارجع اقتلهن مرة تانية وتالتة ومليون
ام الجماجم :حلال عليكي .... واهلك شو صار فيهن
ريم : ما عاد سمعت عنهن شي من لما شفتن بالمحكمة
ام الجماجم: شو مستفادة هلأ لو حكموكي اعدام مو كان اريحلك
ريم : لا انا مستفيدة من اني عم وجه رسالة لكل بنت وقول فيها لا تكوني حمارة متلي وحافظي على حالك وابعدي عن الحب لأنو ما في حب حقيقي غير بالحلال ولا تكوني ضحية شيطان او توسخي حالك بقذارة البشر واذا اهلك قالولك موتي نصيحة مني موتي
انتهت
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺