سكريبت أنوثة_طاغية بقلم جمايكا_احمد الجزء_الآۆلْ_والاخير حصريه وجديده على مدونة أفكارنا
 |
مرحبا عزيزتي..حبيت اعرفك عن نفسي..انا ماني دكتورة او مرشدة نفسية. وماني حاصلة على اي درجة علمية..انا انسانة مثلي مثلك ..انهيت البكالوريا من عمري 17 واتفرغت للحمل والولادة وحياة المسؤولية يلي انتي مريتي او عم تمري او بدك تمري فيها..هالمرة القصة رح تاخد منا منعطف جديد..يمكن لبعض الصبايا معقد والبعض الاخر بسيط..جميعنا بنبلش نحلم بحياة زوجية رومانسية وليالي هنية مليئة ب الهدوء واجواء السهر على ضو القمر مع شوية شموع ..وكلمات ملغمة بالرمانسية والغزل يلي كلنا بنتمناه ...بس 95% منا بصيبهن اكتئاب من يكتشفوا ..انو هاد مجرد حلم لايدوم الا ليومين او اسبوع او مثل مابقولوا شهر عسل ..وبنتفاجئ انو فارس الاحلام هو مجرد رجل بليد..متنكر بزي قابل للذوبان خلال فترة قصيرة..وهون بقولوا ذاب الثلج وبان المرج..وانو مطرميز العسل خلص ووصلنا لمطرميز الزفتة..ناهيك عن هاي الحياة واختفاء الرومانسية والاحلام الوهمية عند اول حمل او اول سنة...بح انتهى.. فص ملح وذاب...بنبلش نتفاجئ بكمية النكد او النق او الحرمان او حتى الضرب ..وانو مو هاد الشخص يلي كان عم يطعمينا ويشربنا كلمات معسولة..وبنتصادف بعد كم سنة انو الحياة الزوجية صارت قابلة للانهيار ..واغلب الاسباب بترجع لانو عم يخوني او بضربني او بحرمني او بغلط عليه ..او بخيل معي ..او او او او ...جميعها اسباب بتضعف من كونك امرأة قوية لأمرة ضعيفة بتقبل بكل اشكال الظلم...وبتقبل كونها من ابنة رجل مدللة.. لزوجة رجل مذللة ..اختلاف النقطة لا اكثر .والفرق واضح ..99% من الزوجات بترضى بالقدر المحتوم ..وبتصبح جارية لزوج مغفل غافل عن وضع زوجتو ..او لخادمة حنونة لاطفالها..وبتصبح حياتها من مجرد اهتمام بأظافرها الناعمة لاهتمام أكبر انو عيلة زوجها مايزعلو منها او المحروس يلي مرتبطة فيه ما ينتكس بشي أكلة....منذ الصباح ومنذ الصياح ...بتبلشي تفتحي عيونك لعذاب يومي جديد من فطور وغدا وعشا .من جلي وغسيل وطبخ ونفخ..من اكل هاد ومالبس هاداك..من مرت عمي بدي ساعدها ..من بنت عمي يلي ماحاسة بتعبي وماعم تساعد امها.....وتتراكم الاوجاع بداخلك..لتصلك رسالة بآخر الليل تطلب منك...
(( جهزيلي حالك الليلة صرلي اسبوع ناطر))
بتفيقي على ابرة منشط انو لازم تاخدي حمام ساخن ..وتلحقي على الاقل تغيري الجلابية المبقعة بعذاب اليوم لفستان قصير مناسب يرضي شهوة زوجك ...وبس يفرغ رغبتو يلي كانت منكسة عليه يوموا..يدير ضهروا لانسانة بس وظيفتها تفريغ شحنات...( اولاد وزوج وعائلة زوج لاترحم.).الشكاوي بلشت تزيد والزعل ماعم ينتهي..ورفيقتي صارت تعرف بقصتي ..وجارتي بتقلي الله يعينك..لمطاف مواقع التواصل صارت تنزل قصتك بصفحات عامة بإسم اعترافات سرية..وهون بتبلشي تشكي وضعك لصبايا مثلك عم يمروا بنفس الوضع وعم يعيشو بطريقة اسوء من يلي عم تعشيها..لتلاقي منها نصيحة لحالتك بتقلك هاد التعليق...
(( احمدي الله يا اختي غيرك ماعم يلاقي زوج ..
((شوفوا هاي ناس محرومة من الاطفال وناس عم تتبطر على نعمة الله ..
(( بتجي الوحدة تشكي جوزي خاني البسي ورتبي حالك لالو..لاتخليه يشوف غيرك...
(( بتاخدي كل هالتعليقات المؤذية وبتقسيها على حالك بتلاقي نفسك انك عم تقومي بواجباتك على اكمل وجه وماعم تقصري بشي..انا حلوة ..والله مابلاقي ظفري ..انا بلبس وغلاوتكن عندي ماحد بلبس مثلي..انا بيتي نضيف اولادي مربايين ..حماتي مثل امي ماعم قصر فيها طيب ليش عم يخوني ..هاديك يلي عم يحبها بشو عم تفرق عني..
# رانيا :- طيب شفتي صورتها ..
# لميس: والله شفتها مابتسوى ضفري معفنة ماعرفاني شلون حبها عليه..يلي صدمني يارانيا اني قرأت لالو محادثات غزل ورومانسية ماسدقت انو هاد هو ..مش معقول مابسمع هيك حكي ..حتى لما بياخد يلي بدو اياه مني على السرير مابقلي شي..ومن اسألو قبل ماياخد رغبتو بثواني انا حلوة..بقلي اي ماشي حالك..ومن اسألو بعد ما ينتهي ويشبع ذاتو انا حلوة...بقلي مانك واثقة من حالك وحاجتك تسألي هيك اسئلة انتي صرتي ام ..وعندك اولاد ...تقليلو واذا انا ام ماعدت حلوة..يرد عليكي بالرد الصاعق تبعو ..انتي #خربتي_خلص ...
..
تاخدي شهقة مكسورة وتقومي تجمعي تيابك المقطعين يلي سببها الوحش الكاسر من على الارض..وتجمعي بقايا الاوساخ وتروحي على الحمام..توقفي قدام المراي وانتي دمعتك عم تحرق لالك خدك من كلمتو الموجوعة ..تسألي حالك انا خربت معقول ...تطلعي ناحية عيونك يلي الكل كان يشهد بجمالهن تلاقي الكحلة السودا عم تغطيهن بطريقة بشعة..وتلاقي احمر الشفايف صار بكل مكان بوجهك مبعثر ..تخطفك نظرة لموضع خصرك يلي اندفن تحت الجلد المهري المشبع بالترهلات.و.السيلوليت ..حالة الاكتئاب يلي كانت تصيبك زمان صارت عادة ..اخدتي حمام وارجعتي قعدتي على سريرك..عم تطلعي فيه ..طيب انا ليش صرت هيك معيوبة..ليش عم صرت تطلع فيني عيوب الكون كلو..
الحوار يلي بينك وبين حالك كان عم ينهش في قلبك..انا كنت حلوة بس الزمن هيك خلاني..ما انت عابك الزمن مثلي ليش ما اكسر خاطرك بنفس الحكي..بتشدي الغطا من تاني لتفيقي على نفس الروتين المعتاد...
لميس :- بنت عمي جوزها عم يدللها والله عم يعطيها مصاري بتروح بتشتري يلي بدها اياه وامو بتكون مبسوطة على حال بنتها ومن تشوفني لابسة شي جديد بنغص قلبها وبتحسسني اني عم اكل من لحمها ومن ابنها اشترى لالي هاي الكنزة..وبتصير تقلي.
حماتي :- جمعو مالكن حاجتكن بعثرة على الشي الما يسوى ..انتو عندكن اولاد بدكن تبنو لالهن مستقبلهن..
لميس :- جوزي من سمع امو بتقول هيك زاورني بعينو ورد عليها..
جوزي :- فهميها هالحكي ..بدك نسوان معدلة تفهمو..من اخد الراتب من هون بتبلش نق بدي وبدهم ...والله زهقت حالي بخلو الواحد يطفش ..وليش بقولوا اتزوج عليها من نقها وطلباتها..
حماتي :- انا شبعرفني يامو..انت يلي عودتها..
لميس:- بنتهي حديثو بكوني قمت وشلحت الكنزة يلي اشتريتها من بسطة بالشارع كانت معمول عليها تنزيلات بنص سعرها....
جوزي :- ليش اشلحتيها شو زعلتي بشوف..
لميس:- لاء مازعلت بس خبيتها كرمال من يجي ضيف البسها..وما ارجع اطلب منك كنزة جديدة..
جوزي :- ايوه هيك الصح..
(( الغصة يلي صابتك وضعفك بالتعبير عن يلي بدور جواتك اكبر سبب لينهدر حقك..انتي يلي حطيتي نفسك بهيك وضع ..لمعلوماتك..انتي السبب الاول لتعاستك ..اي ..انتي.. ..اول شخص لازم يتحاسب على حزنك هو انتي..لا جوزك ولا ابنك ولا حماتك لالهن ذنب بلي انتي فيه..انتي يلي صنعتي كل هالشي بإيدك ..شلون وكيف ..رح اقلك بقصتي والتفاصيل يلي مريت فيها بحياتي ...
لميس:- بدي كمل دراستي الله يخليك ..
احمد :- مارح تحسني مارح تقدري توفقي بين دراستك واولادك الثلاثة..
لميس:- انت بتساعدني ..
احمد :- شلون ساعدك وانا عندي شغلي..
لميس :- بخليهن عند حماتي واختك..
احمد :- اختي عندها جامعة كل يوم وامي لحالا مابتحسن شيلي هالفكرة من راسك وحطي لالنا غدا جوعان ..
لميس :- ياربي على حظي انا ..كل رفيقاتي خلصو جامعة وانا بس بيت واولاد..
احمد :- ليش ماخلصتيها عند اهلك..
لميس :- مو انت يلي دقيت على صدرك وقلت بدك تعلمني..
احمد :- هلاء انا دقيت على صدري كرمال اعلمك اي بعترف بس كان لازم قبل لتجيبي هالاولاد تدرسيها..
لميس:- انت هلاء نسيت مين يلي كان عم ينق ويمق بدو احمل ..مو انت يلي من اول شهر خليت مرت عمي ادور فيني على الدكاترة ليش ماحملت من اول شهر..
احمد:- والله شكلك اليوم بدك تنكدي على حالك..انا رايح اكل عند امي..
لميس :- لا خلص خلص تعال ..ماعاد بدي افتح واناقشك بهاد الموضوع...
احمد :- روحي لكن جهزي الاكل..
لميس :- حاضر..
احمد :- انزلتي الصبح عند امي كانت عم تسأل عنك..
لميس:- اي رحت كانت بدها اغسل الغسيل وعملتن والله تعبت شي حوالي 4 دورات غسيل ..وناديت على اخوك محمد ماقبل يشيل عني سلة الغسيل للسطح..دخيلك احمد والله ماني مجبورة اغسل تياب اختك واخواتك الشباب..انا عمي ومرت عمي على عيني وراسي بجيب تيابهن وبغسلهن هون..بس اختك صبية صارت ماحلوة نضفلا حتى اللبس الداخلي ..والله بنهد ضهري ..ماحد برحمني..
احمد :- مو قلت لالك النكد عم يمشي بدك ماعم تسمعي ماهيك..
لميس :- شو فيها من افضفض لالك والله بقلك من تعبي مو أكثر..
احمد :- حاسس اللقمة عم تنزل مثل السم بمعدتي لك خليني اتهني بالغدا لاقوم كبو على راسك..حاجتك نق قومي من وجهي..
لميس:- حاضر حاضر..
(( اكيد بهاي الحالة ما الك مكان تهربي فيه الا بين الاطباق يلي بالمجلي..مضت الساعات الاولى وانتي عم تسمعي بث الاخبار من قناة الجزيرة لقناة العربية بدون ملل او كلل..
احمد :- لميس لميس لك وينك.
لميس:- ليكني هون بالمطبخ..عم اكمل جلي..
احمد :- صرلك ساعة عم تجلي وكلهن كم طبق ..اشعلي لالي جمرات للارجيلة وجهزيها لالي رفيقي عبد جاي لعندي يشرب كاسة شاي..
((واكيد روحك الحلوة مارح تقول لاء لانها صارت تخاف من اي كلمة مؤذية او صوت عالي فالسكوت علامة رضا على الظلم....صوت الطرب عم ينطلق بعنان وانفاس الارجيلة والضحكات يلي عم تملى الغرفة بتخليكي تتمنى لو كنتي رفيقو لزوجك ..
احمد :- لك شو هالجمال هاد ..جسمها احلى من صوتها..
عبد :- هاي النسوان يا اخي هاي حطها بالبتارين واقعد بس اتفرج عليها ..
احمد :- والله شفتلك وحدة جسمها مثل هيك تمشي وتقول يا ارض إهتزي ماحد قدي..وشعرا لوسطا واصل ولا العيون لك تعرف صرت اتخيلها مرتي بالليل .
عبد :- وين هاي شايفا.. قلي خليني شوفا على الاقل يصير لالي نفس من اقرب مرتي اتخليها مثلك ..😂😂
احمد : لا مابدي اقلك عم خطط لاصيدها كثير..
عبد :- اخص عليك حباب نفسك هات هات الارجيلة .
احمد :- بالله مابخطر على بالك تتزوج..
عبد :- اتزوج مرة ثانية اعوذ بالله انا غبي اوقع حالي بالفخ مرتين.. بس اذا لقيت وحدة بدها تنبسط بدون زواج عين الله عليها
(( هاداك الحديث يلي لحظتها اسمعتو ماكان الحديث الاول لزوجي عن البنات ..كان دائما يتغزل قدامي عن صبايا هو بعرفهن..بس هالامر اذا اعترضت عليه كان يجيني الرد الصاعق بسرعة ..
عبد :- بلشنا انتي لمتى بدو يضل عقلك صغير هيك..لك مجرد حكي هااااد حكي ..لو بدي اتزوج ماباخد رأيك فهماني...
لميس :- شو بدي قلك ماني عارفي..
عبد :- لاتقولي شي خليكي مخروسة ..نقطيني بسكوتك..
لميس :- 😑
عبد.:- شو مانو عاجبك كلامي
لميس :- لا عادي اتعودت..
عبد :- على شو اتعودتي ولي اللي بسمعك بقول سامم بدنك ليل نهار ..مانهن شايفين مين يلي سامم بدن الثاني قومي طفي هالضو ونامي ..
لميس :- بكير بعدو
عبد :- اي لكان روحي برا ..انا بدي نام خليكي فايقة ..
...
(( الروتين والكلام القاسي صار عندي مثل شرب المي والوضع عادي كتير ولازم اتقبلوا مثل ماهو عليه...السنين مرقت ..وبلشت اكبر ...وانا على هاد الحال لوقت صار عمري 29 سنة ..وقت ما بلش احمد يعايرني بإني كبرت والشيب غزا شعري ..
لميس :- بدي روح للكوافير ..
احمد :- شو المناسبة..
لميس :- لاء بس بدي اعمل لون حلو لشعري..
احمد :- اها مانك بحاجة..
لميس :- لا بحاجي ..
احمد :- شكلك اتأثرتي كثير بكلامي بالليل عن الشيب يلي بشعرك..
لميس :- مابعرف ..
احمد :- اي اقعدي حاجتك افعال بنات صغار قال بدها تغير لون شعرا قال..
لميس :- انت ليش هيك معي ..اذا حماتي من يومين راحت الكوافير وغيرت لون شعرا..انا ليش لتقول عني كبرت وبنت صغيرة..والله تعبت من كلامك .
احمد :- مامعي مصاري وحاجتك تنوحي..
لميس :- من يومين بس قبضت راتبك.
احمد :- اي قبضت بس مامعي مصاري لشعرك.
لميس :- خلص مابدي منك مصاري ..
احمد :- اي بكون احسن...
(( نطرت اسبوع لحسنت روح لعند اهلي وهون اختي اخدتي لاحسن اعمل شعري وازبط حالي ووجهي ..كان يادوب شي بسيط عملتو ماكان مكلف وارجعت مبسوطة بشكلي على بيتي ..اخدت حمام ورتبت تيابي وجهزت قعدة ارجليه لجوزي والعشا ونطرتوا ليرجع من سهراتو المعتادة...
احمد :- شو في عنا ..شو يلي عاملتيه بحالك..
لميس :- حلو مو هيك انا عملت شعري..
احمد :- عملتي شعرك
لميس :- اي غيرت لونوا
احمد :- بدون اذني
لميس :- شلون
احمد :- عم تعملي يلي بدك اياه بدون اذني وبتروحي عند اهلي وبتطلعي تدشري براحتك لاني ماني موجود..مو هيك ومن وين جبتي حق القرف يلي عاملتيه..
لميس :- ممم من اختي
احمد :- رح اضلك طول عمرك شحادة ومذلولة ... مشان قصة شعر رحتي نزلتي من كرامتي لاختك وهلاء اختك خبرت جوزها ..وهالبغل هلاء بحكي للكل انو اختك محرومة وانا يلي حارمها او انا البخيل ...
لميس :- اختي مابتقول هيك ..
احمد :- انتي بدك تحطيني بوضع محرج ..وليش لتحطيني ما انتي دايما هيك..لعنة الله عليكي وعلى الساعة يلي قالت ارجع على البيت كنت مبسوط برا ..
لميس :- احمد وين رايح ..
احمد :- مقلووع هو انتي خليتي نفس ضل بالبيت حتى بيتي كرهتيني اياه ..
لميس :- 😢😢 الله يسامحك على افعالك دائما كاسر خاطري فوق ما انا متعبة حالي كرمالك..ياربي هو انا ليش هيك حظي ...
(( الشجب والتنديد والاستنكار كلها كانت ردود افعال جوزي والندم والزعل والعذاب دائما هو ردة فعلي..بس هالشي وعلى مدار سنين اتغير بيوم واحد وبلحظة وحدة من صار موقف لبنت حماي المتزوجة ..من رجعت لعند اهلها زعلاني ..
احمد :- خلينا ننزل عند امي ....
لميس :- ليش شوفي
احمد :- بعتتلي كرمال تاخدي منها ورق العنب ..تعمليه
لميس :- بس انا
احمد :- خلصي لميس اختي جاي عنا ووضعها تعبان..
((روبا هي اختو لهيثم ..هي اكبر مني بعامين ..واذا حد قدر عمرها بقول شي 20 سنة..زوجها انسان متعلم ومثقف ..وحياتها الكل كان يحسدها عليها..بس مشاكلها مع سلفاتا ماكانت تنتهي رغم انهن كانو عم يساعدوها حتى بتنظيف بيتها وبشهادتها هي نفسها..وكانت تنعتهن دائما بالخدم عندها..يمكن تعد هاي المرة 30 لرجوعها حردانة لبيت دار عمي..وهي اطلقت مرتين ..وكانت هاي المرة اللحظة الحاسمة بحياتها ..انزلت ومثل العادة اخدت الاغراض واطلعت لفوق ومن ارجعت ..اسمعتها وهي عم تحكي تلفون مع زوجها وتسبوا..وقتها اخدت حماتي منها التلفون وبلشو يصرخوا ويعيطوا بوجهو..وجوزي واقف ماحرك ساكن...لهدرجة كانت القوة فيهن ..ليتجاوزوا بهيك طريقة ..من شافوني قفلو باب الغرفة طبعا قبلها ..
احمد :- شو عم تعملي هون
لميس :- خلصت عم نزل الاغراض
احمد :- اي خلصي وخديهن لفووق..
لميس :- حاضر ليكني طالعة..
((الفضول خلاني لحظتها ارجع تاني لإسمع شو عم يصير ...
حماتي :- الحق عليكي لك قلتلك ليش لتعملي قيمة لاخواتو انتي مانك مجبورة تعملي عزائم..
روبا :- قلي هو رح يجيب جاهز . وياريت ماقبلت الجاهز كان شي قليل بالنسبة للي خلاني اعملو..والجلي كان لباب المطبخ..كان فيو يقول لنساوينهن ينزلوا يساعدوني ليش مو هني ازواجهن يلي اكلو عنا..
احمد :- طيب وين المشكلة . بسبب شو هو مد ايدو عليكي هاد الواطي..
روبا :- اتعبت وماحسنت اجلي بقلوا الجلاية ماعم تشتغل مني تعال ساعدني..بقلي مافيني اترك اخواتي واجي ساعدك..راح وتركني جن قلبي رجع بقلي حاول لاتضرب بالطناجر هيك واعملي لالنا قهوة هون خلص ماقدرت اتحمل اطلعت لسلافي لقلن..
احمد :- شو قلتي ..
روبا :- قلت لالهن هاي اول مرة واخر مرة تجو لعنا ..انا انسانة ماعندي قدرة اشتغل هيك شغل ..اللي بدو يجي ياكل عندي يجيب مرتوا تساعدني ..قام صامد مثل المجنون من مكانو وضربني كف وانا قدام خواتو رديتو لالو..كان بدو يموتني بس اخواتو وقفوه عني ..وانا ماقدرت اعمل شي غير جمع تيابي واجي لازم يتربى ..
حماتي :- لك والله لنربيه بس صبرك كل شي بوقتو حلو..
احمد :- المهم جبتي كرتك البنك وذهبك
روبا :- جبت كل شي..
احمد :- ابنك حسن بكرة بترجعيه لعند ابوه..
روبا :- لا حسن مابقدر صغير بعدو بيرضع..
احمد :- اي انتي مانك مجبورة تتعبي كرمال اولادو وهو يرتاح..
حماتي :- اسمعي كلام اخوكي هلاء يروح يعطيه لاهلو ..
روبا :- طيب لازم روح بلغ عنو الشرطة ..
حماتي :- شلون الشرطة مابتاخد بأقوالك الا من يكون عندك تقرير مشفى .
روبا :- شلون يعني..
احمد :- ماعرفتي تجرحي حالك لو عملتي هيك كان هو هلاء عم يتخ بالسجون..
حماتي :- اتركها عليه انا بحلها ..
روبا :- امي شلون قليلي هاد لازم ياخد عقابو..
حماتي :- رح روح جيب سلكة الجلي..شوية على ايدك وبنروح المشفى وبناخد تقرير وعلى السجن..
(( اسمعت صوت حركات حماتي وطلعت بسرعة من البيت وانا كلي مصدومة من طريقة كلامهن عن صامد وعيلتو ويلي بدهن يعملوه فيه..رغم انو هو افضل صهر عندهن ..ومن كان يجي لعنا كان يغرق البيت هدايا غير الكلام المعسول لحماتي وبنتها ..بقيت راقب الوضع يومها لوقت ماطلع احمد وحماتي وروبا ورجعوا وهني عم يتمتموا على الدرج..
احمد :- هلاء ببعتوا لالو بلاغ ..
حماتي :- اي الله يصطفل فيه..
روبا :- والله ما اتنازل عن هالبلاغ الا لما يعرف انو الله حق..
حماتي :- بس مابدنا يوصل الموضوع طلاق..
احمد :- لاء اذا صار وبنتك اطلقت اكلتي هوا انتي وهي بالمصاريف ..
حماتي :- لا لا تقولا..
..
(( انزعاج .وردت فعل احمد على اختو وقت ما انضربت رغم قلة ادبها .. كانت تخليني حس انو هو شخص مناصر للمرأة وبرفض انها تنضرب وتنهان او يمكن هو ماكان حاسبني منهن..يعني اتخليت حالي لو انا اتصرفت تصرف روبا كان هلاء اهلي فاتحين بيت عزاء لالي .لان على اتفه شي جسمي بصير مزرق وكلو كدمات ويمكن قليل يلي قلت لااهلي عن افعالو ودائما يرجعوني لجوزي مع كلمتهن المشهورة..(( المرا ما الها الا بيت زوجها...واللي بتطلع من دارها بنقل مقدرا وكلنا بننضرب وليكنا ببيوتنا ماطلعنا..يالا خدي اولادك وارجعي لجوزك..)) ارجع لعندو بدون ماهو يرجعني برجليه لحالي ...واوقات يرفض يدخلني البيت الا من اترجاه ..وبقيت اتحمل كرمال اولادي لان اهلي كانو كثير ينزعجوا منهن..ردة فعل كمان اهلي هي اكبر سبب لوضعي هاد..لو هني من الاساس حطوا حد لاحمد كان ما اتجاوز عليه بالطريقة هاي..وروبا كانت اول مرة رغم افعالها تنضرب وكانت ردة فعل احمد وامو انهن يسجنوه لصامد..اي طلع بإيدها وسجنتو اسبوع كامل ..وغير هيك ماقبلت تتنازل عن خروجوا من السجن الا بإعتذار منو لالها قدام اهلو واخواتو كلهن وترجع مستتة في بيتها بدون ماحد يزعجها ..وهاد يلي صار ...
احمد :- ليش قالبة خلقتك هيك..
لميس :- لا مافي شي ..الاسبوع الجاي عيد الاضحى..
احمد :- اي قلتيها الف مرة واعطيتك تشتري لاولادك ثياب شو جديدك ست لميس..
لميس :- بدي لالي ..مليت من نفس الكنزة والبنطلون البسهن بكل شي ..
احمد :- مابقي معي الا العيديات ..بدي اعيد امي خواتي وخالاتي وعماتي ..ماببقى معنا حق حتى اكل للبيت..
(( اتقبلت الامر وانا قلبي راضي. لاني متعودة .واجا العيد..واطلعت لاستقبل سلفاتي ..و قرايب دار حماي بنفس التياب..كان الجو كثير خنقة لالي الكل لابس على احدث الصيحات ..
سلوى :- عبير لك تيابك من اي محل جبتيهن ماشفت مثلن بالسوق
عبير :-جوزي وصالي عليهن من تركيا ..
سلوى :- بجننو حبيبتي بس شو يلي جايبتيهن معك..
عبير :- اها ولا شي..
حماتي :- تعي لميس خدي الكيس من عبير هاد لالك ..شوية تياب مابدها اياهن جابتهن لالك تلبسيهن ..
لميس :- بس انا عندي تياب مابدي..
احمد :- خديهن والله ماني ملحقة عليها تياب ..لك من الجحشة بتهري..
لميس :- انا مابدي تيابكن ..
احمد :-شفتو ووقحة كمان..
حماتي :- ياعيب الشوم منك هيك بتردي شي جايبتو لالك سلفتك..والله سدق اللي قال مابتستاهلي..
جابر :- حبيبتي عبير لاتدايقي ياعمري ارفعيهن اعطيهن لجارتك..
عبير :- لا حبيبي ما ادايقت عادي هي اختي ..
حماتي :- مابدك هالاخوة يلي مابقدر وبحترم شخص بساعدو مابتستاهل تكون اخت لالك ..
لميس :- انا رح روح اهلي جايين..
حماتي :- اي ميسرة..
احمد :-شو عم تعملي قاعدة مثل قرمية الشجرة لحالك هون وين اهلك ما اجو..
لميس :- اهلي مانن جايين ..
احمد :- ليش
لميس :- ابي تعبان واخواتي مانن فاضيين..
احمد :- اي عادي حلك تتعودي ماهني عيد هيك وعيد هيك ..يالا العيد الجاي بيجوا لعندك..شو عاملة غدا..
لميس :- عملت شاكرية لحمة..
احمد :- ماعملتي المعلاق يلي بعتلك اياه..
لميس :- نضفتن بس والله تعبت بكرة بعملهن..
احمد :- لاء قومي هلاء اعمليهن..
لميس :- اليوم اول يوم عيد مين بياكل هيك شي..
احمد :- انا
لميس :- بس مافيني اشتغل فيهن اليوم ..
احمد :- لا بدك تقومي تعمليهن..
لميس :- ياربي ماني قايمة..
احمد :- عم تعاندي..
لميس :- اي ماني قايمة واعلى مابخيلك اركبو ..
احمد :- ايوه شكلك بدك تتعيدي اليوم مزبوط..
لميس :- اي مافشرت ترجع تمد ايدك عليه..
احمد :- ما فشرت ايوه حلو ..حميني اكثر..لوقت مافك كلاش بنطلوني
لميس :- شوف رح اقلك شي..اذا انت ضعيف ومابتقدر الا على وحدة مثلي ضعيفة فهاد دليل على انت واحد مرا..واياك تحاول تمد ايدك وتضربني مثل كل مرة ..هالمرة انا رح وقفك عند حدك مارح اسمحلك ..اذا اهلي ماعم يسألو عني انا رح دافع عن حالي ..
احمد :- والله بدك ترباية من اول وجديد ياوسخة..
لميس :- والله اختك يلي بدها ترباية لك انا ولا عمري عملت ربع يلي عملتو اختك بجوزها ورحتو سجنتوه..والله اذا بتحاول تضربني لاروح على الشرطة واقلهن انو البلاغ يلي قدمتو اختك كاذب وانا كنت شاهدة ..
احمد :- شو قلتي..
لميس :- مثل ما سمعت ..
احمد :- اي تعي لكاان..
لميس :- اااااااخ لك الله يكسر ايدك ااااه ياعالم ياناااس ساعدوني ..
احمد :- لك اخرسي اخرسي..
حماتي :- شو في هون ليش هالصراخ ..
احمد :- بدها تربينا بنت غسال السجاد .
حماتي :-شو ليش ..والله الدنيا عيد يعني لازم تستفزيه ..انتي ماناوية على خير من الصبح ..عم تحفري على مشاكل والله حسيت..
لميس :- شوفي انا اتحملتكن سنين تحت الضرب والاهانة بس من بعد هالشي مافشرتوا ترجعوا تضربوني..
حماتي ..لك الله يلعنك بلسانك الزفر ..لك تستاهلي الضرب ولازمك ترباية والله..الحق علينا يلي متحملينك سنين ..
لميس :- انا يلي متحملتكن ..ومتحملة قرفكن انتي وابنك وبنتك عمر طويل..
(( بلشو هي وابنها يشدو فيني وانا عم شد في حالي لاطلع برا البيت..وهاد يلي صار اخدت اولادي الصغار من الشارع وبقيت دور بالشوارع ماعرفاني وين اروح ماكنت متحملة اصل بيت اهلي لاني بعرف رح يرجعوني لعند احمد وهو رح يزيد ضربوا لالي..حزنت على حالك وعلى علامات الضرب يلي كانت ملفتة للنظر..قعدت بحديقة وقت الظهر ..بين هالاطفال يلي عم يلعبو....وبقيت لصارت الساعة 6 المساء ..اخدت الفراطة((العيدية )) يلي كانت بإيد اولادي الصغار. واخدت تاكسي واطلعت لعند اختي منال ..
منال :- لميس شو صاير معك ليش وجهك هيك..
لميس :- ما انتي بتعرفي من مين 😢..
منال :- الله يكسر ايدو ..حتى بيوم عيد..اهلي بيعرفوا..
لميس :- اهلك اذا رحت لعندن يا رح يرجعوني يا اما اخواتك ونسوانهن يزيدو عليه..
منال :- تعي قليلي شو صار..
((بلشت احكي لاختي كل شي صار معي ..وادخل زوجي اختي ربحي..
ربحي :- بدك نصيحتي لاترجعي ولاتروحي لعند اهلك.
منال :- لكان وين تروح..
ربحي :- بيتي مفتوح لالها اضل فيه ..لازم حد يوقفوا عند حدو لهاد احمد ..اذا ماحد وقف بوجهو رح يتمادى هاد مجنون او شاف ضعف اهلك ..قدامو عم يتشاطر عليكي..
منال :- اذا اهلي عرفوا والله بقتلوها
ربحي :- انا رح دخل مختار العيلة ليحكي معهن..وانا عليكي عندي استاجرلك شقة تعيشي انتي واولادك فيها ..انا مابدي خراب بيتك بس قسم بالله لو اختي يصير فيها هيك لاقتلو ..ولو اختي غلطانة بشي ..والله لاحاسبها بس بدون ضرب..تعرفي الغلط مو منهن الغلط منك ..
لميس :-بعرف والله بعرف انا يلي كان لازم ارفض هالمعاملة من قبل..
ربحي :- قالت لالي اختك وانا ماكان عاجبني تصرفاتك معهن..كان لازم كل هالتعب والعذاب ترفضية ..الراجل يلي بتحني لالو ضهرك بركبك وباذيكي ...
منال :- هلاء انخبر اهلي شي..
ربحي :- هني اكيد هلاء عرفوا واذا ماعرفوا بكون افضل بس لارتب امور لميس اعطيني تلفوني اتصل على اخي سيف..
منال :- بدك تتأجر من عند سيف..
ربحي :- اي شقق اخي منيحة ومفروشة وبتساعدها كثير ..
لميس :- بس انا خايفة..
منال :- اختي الخوف هاد هو يلي مخليكي ورا الشمس اذا بدك تغيري وضعك بلشي من حالك..انتي قاتلة حالك على جوزك تقولي مافي رجال الا هو انتي بعدك صغيرة ..شوفي شلون وجهك تعبان من الهم وهو مثل الجحش رح يفوت الاربعين ..لا عليه شكل ولا عليه منظر ..ليش قاتلة حالك ليش رح تجننيني ..
لميس :- مشان اولادي
منال :- انتي بدك تكوني احن من الله عليهن..بعدين هني صغار ورح يضلو بحضانتك .
لميس :- ما اهلك مابدهن اياهن..
منال :- اهلي مابدهن اياكي ماسدقو وكل وحدة شافو لالها زوج ليرتاحو منها وانتي كان نصيبك هيك .
قومي غسلي وجهك وغيري تيابك الله يلعنو بنفس التياب دايما بتكوني .والله قلبي محروق عليكي يا اختي ..حظك تعبان ..
لميس :- اولادي جوعانين ما اكلو..
منال :- هلاء جوزي بجيب شاورما وبناكل كلنا روقي ربحي رح يوقف معك .
لميس :- خايفة يوقع بمشاكل بسببي..
منال :- لاتقلقي طول عمروا وهو عم يقول لازم حد يوقف معك ومن حكا من اخواتي صما بكما عميا غيروا الموضوع وانحرج المرة يلي قبل ..بس مادامك دقيتي بابو .رح يشيلك ع كفوف الراحة كان ناطر هاللحظة..خدي البسي هاي الثياب اشتريتهن غيار لالي للعيد ..رح تجي حماتي وابنها سيف لعنا كرمالك بعد شوي..حماتي طيبة فوق ماتصوري ..
لميس :- لحقت تعرف..
منال :- اي حكالا ربحي ..مشان تجي هي اختو لمختار عيلتنا..انتي بتعرفي وبتمون عليه..
لميس :- منال انا مابدي ارجع لااحمد بدي اطلق تعبت من هالعيشة ..
منال :- والله مابعرف يا اختي شو يطلع معهن بس هاد بدو ترباية ..وبدو قرص اذن ..كمان ماني حابة ترجعي لالو ويرجع يعمل نفس الشي فيكي وكمان اكلة هم اولادك الكبار ..اذا اطلقتي ..
لميس :- 😢
منال :- خلص هوني على حالك ..اليوم راجعي حسباتك ..وتغيري كل تفكيرك نقيه من الزعل والهم لازم تغيري من يلي جواتك قبل شكلك. لازم تقوي عقلك قبل قلبك..
(( معاملة دار حماها لاختي كانت احسن من معاملة اهلي..بقيت الاسبوع الاول عند اختي كانت اول ايام صعبة على يلي صار..بس الايام يلي بعدها بلشت اتعود..لوقت ماكانت الدني العصر من صار دق على الباب بالقوة وصوت عياط اخي زاهر على الباب...
زاهر :- لك افتحي يا وسخة ..
منال :- هاد زاهر ..
لميس :- شو في ..انا خايفة منال..
منال :- لحظة اتصل على ربحي ..اي ربحي زاهر على الباب عم يضرب بالقوة والله خايفة يأذيها للميس ..
لميس :- منال رح يسكر الباب..
منال :- ربحي ع الطريق..بدي افتحلو ..
لميس :- بدو يضربني
منال :- لاتخافي..شو بدك زاهر ليش عم تضرب الباب هيك..
زاهر :- وينها اختك الناقصة الوسخة ..
منال : -شو بدك فيها ..
زاهر :- بدي اكسرلا راسها لهالكلبة ..
منال :- شو ليش انت كمان جاي تكمل على اختك..
زاهر :- لميس لميس قسم بالله اذا ماطلعتي هلاء وقلتي لالي مين بكون ابن الحرام يلي عاملة عملتك معو..
منال :- عملة شوو
زاهر :- ليش مابتعرفي اختك الوسخة شو عاملة..
لميس :- انا شو عاملة ..
زاهر :- تعي لهوووووون.
لميس :- اتركني..
منال :- اتركها اياك تمد ايدك على اختك..
زاهر :- لك اختك بتعرف واحد على جوزها..
لميس :- شووووو
منال :- اي حاجي كذب ..
لميس :- والله هاد افترا وكذب
منال :- شو يلي جاي تقولوا
زاهر :- انتي بتنكري جوزك ليش طردك من البيت..اختك ياست بتعرف شاب ونازلة حب فيه على زوجها ..وصرلا اسبوع طافشة من البيت ..واتصل علينا جوزها اليوم ليخبرنا تجي تاخد اغراضها ..بدو يتزوج..
منال :- وانتو سدقتوه كالعادة وجيتو تكملو على اختكن ضرب..اختك من يوم العيد عندي . وانا وانت والكل بنعرف انها ماعندها هيك شي ..وانها حتى موبايل مثل الخلق مامعها..وانها بتتحمل زوجها الزبالة صرلا عمر رغم وساختو ورغم اكثر من مرة جابوه من سجن الاداب لانو عم يزني مع نسوان..اختك مابتعرف هالحكي الا انا وانتو وجوزي..مارح تكون كبيرة عليه يتهم اختك بشرفها لانها وقفتو عند حدو..اطلع زاهر من تصيروا رجال منيح على نساوينكن تعو اتمرجلو على خواتكن..
ربحي :- زاهر زاهر.
منال :- شو بدك تضربني انا كمان..
زاهر :- قليلات ادب..
ربحي :- مابسمحلك اتسب مرتي..
زاهر :- اختي هاي قبل لتصير مرتك وانا من حقي ربيهن..
ربحي :- اي هاد الحكي مو بييتي ومن ماتكون على ذمتي ..من تصير اختك في بيتكن مارس رجولتك عليها ..فوتي منال خدي لميس لجوا..وتعال انت لتحت ..نحكي..قفلي الباب منال...
زاهر :- راجعلكن ماني مطول ..من شعركن بسيطة..
لميس :- شفتي منال شفتي ..صار يتهمني بشرفي..
منال :- الله يجعل نحروا في دبروا ..اللهي يصطفل فيه..
لميس :- احمد كان عم يزني منال وانتي ساكتة ماخبرتيني..
منال :- اها..اي يختي والله وجوزي ادخل وراح طلعوا عن طريق معارفوا..
لميس :- كان ينام معي وهو زاني ..
منال :- حسبي الله ونعم الوكيل..
لميس :-لهيك ماعم املا عينو ودائما بعيبني الحرام قفل على عينيه الاتنين الله ينتقم منك يا احمد الهي ..حسبي الله ونعم الوكيل فيك..
منال :- احتسبي امرك لربنا 😢😢..
((بعد ويومين وبعد ماخبرني جوز اختي انو كلام احمد كلو كذب وافتراء لانهن كشفو كذبتو اجو اخواتي يرجعوني لعندهن وانا رفضت ..وصممت على رفضي وبعد معاناة كبيرة لحسنو يتقبلوا اني اعيش في بيت اجار مع اولادي الاربعة...لانها حماتي رمتهن لالي ..بعد ما الله سود وجهن..انتقلت للبيت يلي استاجروا ربحي ..وبلشت يوم عن يوم استقر..
منال:- اختي بدي احكي معك موضوع بس دخيل روحك لاتقولي اني بلشت انخنق من موجودك لا والله بس بدي تطلعي من جو هالبيت والتفكير يلي انتي فيه..
لميس :- شو ماقلتي اختي انا مابزعل منك ..
منال :- شو رأيك تشتغلي..
لميس :- اشتغل ?
منال :- اي اختي شغل يخليكي شوي ترتاحي من وضع هالبيت..
لميس :- اي انا موافقة .
منال:- بس الشغل آذنة ..
لميس :- آذنة..
منال :- اي انا اسفة بس اذا انتي ماشايفتيه منيح بلا منو .الشغل بمدرستي ..بالثانوية ..
لميس :- بالعكس مبسوطة كثير فيه ..واذا معك برتاح اكثر..
منال:- انا قدمت ملفك للمديرة..شغل خفيف بترتيبي غرفة المعلمات او غرفة المديرة بتعملي شاي..شغلات بسيطة بتساعدي بنت مريضة..
لميس :- بالعكس احلى شي مابهمني شو هو الشغل..المهم اني وقف على رجليه ..
...
بعد شهر تقريبا اعطتني اختي عقد العمل..هي معلمة فيها وانا آذنة هالشي مادايقني لان معاملة المعلمات كانت تحسيني اني وحدة منهن..وكنت قضي اكثر وقتي بالحكي مع المديرة والمعلمات هالشي عزز نفسيتي وقواها..نظرتي للعالم الخارجي اتفتحت شوي..وبلشت حياتي التفسية افضل..حديث المعلمات معي عن كياني وشلون اقويه هو يلي شجعني لافتح طريق بحياتي جديد .
لميس :- منال بدي احكي معك بموضوع..
منال :- قليلي اختي في حد دايقك شي بالمدرسة..
لميس:- لا والله اني مانفسي فارقها ساعة بس احكيلي مع المديرة ام سعد..بدي اعيد البكالوريا ..
منال :- تعيدي البكالوريا..
لميس :- اي بدي قدمها واكمل جامعة حابة والله ..بدي صير مثلك ومثل هالبنات..
منال:- تعرفي انها ثاني اجمل خطوة تخطيها بحياتك..
لميس :- جد وشو الخطوة الاولى..
منال :- انك حسنتي تتغلبي على حياة الذل يلي كنتي عايشتيها ..هاد افضل شي حسنتي تعمليه ولاتزعلي على فراق رجال..اياكي..انتي ماناقصك رجال ليكملك .بالعكس الرجال هو يلي ناقص وبدو مرة تكمل حياتو ..انتي كاملة بقلبك وعقلك وحنانك وتضحيتك وصبرك ..ويلي عملتيه لو صفوا رجال الكون كلو مارح يعملو ربعو..اذا صار واخدتي طباقك لاتشعري بالوحدة والنقص ..الدنيا مارح تقفل بابها قدامك ...واذا كنتي تفكري وخايفة من كلام الناس والمجتمع رح اضلك شي حشرة صغيرة والكل يدووس عليكي ...انتي اهم شي تعمليه بحياتك انك تقوي جذورك وتثبتي وجودك واهم شي انو الطلاق ما اتعسك بل العكس زاد طموحك وقوتك وخلا منك انسانة ناجحة..ليكك بيت وصار عندك ومانك عايشة عالة على حد ..اولادك حياتهن منظمة صارت واكلن وشرب برضاكي ..ويلي بدك اياه مافي حد يغط عليكي عيشتك تنظيف وتغسيل وشيل وحط ولاحمد ولا شكور..واخيرا شوفي بس بالفترة القصيرة هاي شو عملتي انتي عم تشتغلي عم تجيبي يلي بدك اياه صرتي تلبسي وتغيري من حالك ومن شعرك .وتلبسي اولادك يلي بدك اياه بدون ماحد يحاسبك على مصاريفك واخيرا انتي كم مرة طلبتي من يلي مابستحي تدرسي ..وكان ردو دايما الرفض..ليكي مين هلاء بحسن يمنعك ..انتي ماشيه صح ..صار عندك رفيقات اكابر ومتعلمات وعم يجو لعندك وعم يعزموكي لعندن ..صار وقت مشغول ..ماعدتي تفكري بحياة القرف يلي عشتيها..انا من بكرة رح رووح اخلص امورك ورح لحقك بامتحان البكالوريا واجبلك الكتب ..مشان السنة الجاي ان شاء الله اذا نجحتي تسجلي بالجامعة..بس هلاء ليش عم تبكي بدي افهم..
لميس :- لا مافي شي بس هيك ..
منال :- امسحي هالدموع ..بدك تنسيهن صار لازم تخافي على عيونك وقلبك..المهم مابقي معنا وقت ..لازم تلحقي تدرسي وانا رح احكي مع المعلمات يساعدوكي شوي..
لميس :- انا عندي الكتب ..اخدتهن من المخزن وتقريبا رح اختم اغلب المنهج..
منال :- تحكي جد..
لميس :- اي والله..
منال :- لك برافوا عليكي هاد هو الصح...
...
((بعد يومين بالزبط اجاني خبر انو احمد اتزوج..بالبداية بلشت بقلبي غصة ..بس من قعدت مع حالي سألت حالي ليش زعلاني ..زعلاني على الحرمان يلي كنت عايشتو زعلاني على الضرب يلي كان يوميا يصبغ جسمي..ولا على حياة الذل..شو هو فيه مميز ..هو بيني وبينو فرق عمر كبير وانا حتى 30 ماطبقت ..ماكان فيني الا وقفت قدام المراي.. لميس الزعل خلاكي ست نحيلة مريضة ...شحوب الوجه علامة على عذابك..الشيب والتجاعيد يلي حوالين عيونك كانت لالك اهانة ..وهلاء شو بدك اضلي زعلاني..يومها اتصلت على اختي لتحاكي ربحي ليطالب لالي بورقة طلاقي ..ونطرت الرد وطان هيك..
منال :-والله ياقلبي حكا جوزي معهن وبعتلن ناس قالو مابدن يطلقوا وقال ترجع في بيتها هي وضرتها يتفقوا مافيو شي..
لميس :- مسكنها في بيتي..
منال:- اي هيك فهمت .
لميس :- اي مبروك عليها بس انا مابدي ارجع يصطفل هو وهي الله يلعنهن..خليني هيك انا رضيانة ..خليه يعفن ويعرف قيمتي لهالمريض ..
منال :- بتمنى تكوني اخترتي الصح يختي..
لميس :- اي هيك منيح اولادي بحضني ..وعندي شغلي..
منال:- المهم شو خلصتي دراسة..
لميس :- ختمت نصوص وقواعد واداب
منال :- برافو عليكي كملي ياقلبي لاتضعفي ..هاد سلاحك بالدنيا..
بقيت على وضعي هاد لخلصت البكالوريا ..وهون بلشت المشاكل تزيد وادخلو اخواتي ليرجعوني لاحمد وانا كنت رافضة ومتمسكة براي..
زاهر :- احكي مع اختك يعني هاد حالها منيح عايشة في بيت لحالها شو يقولوا العالم ..لك اذا نسوان اخوتك صاروا يحكوا شرقي غروي عنها..
منال :- ماحد عندو لالها شي..هني مقهورات منها لانها بلشت تصير وبلشت تدرس جامعة وتشتغل انتو ونسوانكن من كانت اختك عايشة بالويل كنتو تزيدو عليها وهلاء لما صارت قد حالها صرتوا خايفين عليها ..شوف زاهر احمد الوسخ من عرف انها بشتغل وعم تدرس ولالها بيت صار بدو اياها..
..سؤال مو هو يلي قال بدو يرجعها وماعندو مشكلة اضل في بيتها وضرتها في بيت ..وانو يعدل بينهن ..شو جاوبني..
زاهر :- اي مشان ترضى اختك..
منال :- اي شو هالحقارة ..لك هو بدو اختي اضل في بيتها ويجي يعيش من خيرها احكيلو شو اشتقت لعيشة الهنا يلي اختي كانت معيشتك اياها..ولا مرتك الجديدة لهلاء عم ترمي وراك صرامي بالشارع ..لك روح شوف شلون العالم عم تحكي عن صوت مرتوا يلي طالع 24 ساعة ..هلاء عرف خيرها لاختك..الله يجحموا..انت واخوتك بعدو عنها ..من كانت حالها بالويل وضعيفة كبتوها..ومن لقيتو حالها قوية صرتوا تركضوا وراها ..على العموم ..مابدي احكي اكثر من هيك حلقي وجعني ..
.....
لميس :- شو قلك فهميني..
منال :- مثل ما اسمعتي ..لك كبيهن كلهن ماحد بستاهل كندرتك ..
لميس:- خايفة من احمد بقول بدو ياخد الاولاد ليضغط عليه فيهن..
منال :- خليه ياخدهن ..
لميس :- لا مابحسن مابتحمل يغيبوا عني..
منال :- من كانو اتنين عند حماتك وعندن بنفس الاسبوع كبوهن لالك..بدك مرتوا تربي 4 ..لك لاتردي عليه .بعدين اولادك الصغار مابحسن ياخدهن ..والكبار بقدروا عليها لاتخافي اولادك شاطرين ..هاد اذا اخدهن المهم كملي حياتك .ولاتفكري باي شي..انتي عقد زواجك وينو..
لميس :- معي
منال:- قديش كان متاخرك..
لميس :- ولا شي نسيتي ابوكي الله يرحمو شلون زوجني ..
منال :- يلي بنباع برخيص بصير فيه هيك الله يسامحك يابي ويخفف عليك ترابك..على العموم جوزي بدو يشوف محامي يرفع لالك قضية خلع .
لميس :- خلع..والله اخواتك بقتلوني ..
منال:- شو دخل خواتي..هو مانو دافعلك شي ..وبعدين قضية الخلع لصالحك ..فكري منيح بالعكس انتي هيك عم تردي لالو الجميل المنيح يلي كان يعملو فيكي..
لميس :- واذا صار خلع..
منال:- بتصير راسو بالارض ليعرف انو الله حق..بصيروا يقولوا هاد يلي مرتوا خلعتو يستاهل ..
لميس :- خايفة تزيد الامور للاسوء
منال :- اي وشو يعني..مارح تسئ اكثر من يلي شفتيه ..
(( قابلت اختي بالرفض يومها واني مابدي ارفع قضية خلع مابعرف كنت خايفة كثير..بس يلي صار انو احمد بعد سنة ونص كاملة ..بعتي ورقة امر بالطاعة من المحكمة واني لازم ارجع تحت طاعتو وهالشي صدمني بزيادة ..وتعب لالي نفسيتي وكان امر لابد منو ..ارجعت بس اسبوع واحد لانفذ قرار المحكمة المؤلم..شفت كل الوان العذاب ...
احمد :- بتقومي مثل الكندرة بتغسلي تياب ضرتك لحسن وربي ماتشوفي خير..
احمد :- دقي عليها خليها تفيق تتغدى ..
احمد :- لاتحلمي ترجعي تشتغلي ..وين كرت البنك تبعك قلت ..قسم بالله ان مارجع كرت البنك ماينوبك خير فهماني .
.((وكثير امور خلتني افتح الباب واتجه على المحكمة لاطلب الخلع واحكي للقاضي يلي امرني بالطاعة كل يلي صار معي..مشيت بأوراق الخلع وانا كلي يقين اني افضل من هيك قرار بحياتي مارح اخد..ماكان في شي عندي اتنازل عنو ماكان لالي اي حقوق..حتى الذهب يلي البستو يوم زواجي كلو اخدو..وهون تم طلاقي من احمد ..او تم خلع احمد ..ارجعت لبيتي ..ولشغلي ودراسي..ارجعت اقوى من قبل ارجعت البنت يلي لازم تكون شخصيتها الحقيقية يلي اندفت خلال سنين...التجاعيد بلشت تزول..والشحوب اخدها معو الزمن المر..من سنة لسنة لبلشت انجز كثير بحياتي ..اي انا لميس يلي كان احمر الشفاااه مخبى بين تيابها البالية ..اي انا لميس يلي فستانها الوردي مخبي بين ورق دراستها..اي انا لميس يلي كانت مخبية برفانها بين انجازتها ..انا المراة يلي لازم تكون قبل سنين..انا يلي اتمردت على حياة الظلم وقدرت من حالي كون انا...البجامة يلي كانت مبقعة بالزيت تركتها لصاحبها انا هلاء عم البس توب تفوقي توب تخرجي..كل اصابع متجهه ناحيتي...والله قدرت تكون قد حالها ..لك لو نحنا قوايا لصرنا زمان مثلها..لك مش بسيطة والله قوية خلعت جوزها وكونت حالها....شفتوو صار عمرها 28 سنة وهلاء اتخرجت . بكرة يلي مثلها ببتوظف وبجيها واحد يشيلا على كفوف الراحة..والله الزمن هاد مابيعرف مطلقة ..صار يعرف انها متعلمة ومعها مصاري....اي اي مثل مابقلكن هاد نظرتهن وكلامهن عني ..مو غلط درس كبير لالي ..قوم عوجي وصلح غلطي وفتح عقلي خلاني ميز بين الفستان القصير يلي كان المفروض البسو بليلة حمرا لشخص اذاني ..وبين فستان نجاحي يلي البستو بالايام السودة وغطاني ...
.
خلاني فرق بين احمر الشفاه يلي كنت حطو لاغريه وهو عينو لغيري ..وبين شفافي الوردية يلي فتح لونهن لاني بوست الحياة بالطريقة الصح..انا طلاقي ماكان بسهولة ومابحكي هيك لاني عم شجع صبايا كثير لطلاقهن..لا لا مو هيك انا قلت هيك لاقلن اذا ماقدرتي تغيري من مصير حياتك مع زوجك ..مافي غير هالباب وماعيب وماحرام..سدقيني..لاتسمعي للي بتقلك اكيد خانك لانك مهملتيه ..لاء لاء انتي مانك مهملتيه ..انتي مهملة نفسك يلي جواتك .هو من شاف داخلك فارغ وعقلك فاضي ماعاد يهتم لالك لو شو مالبستي..انتي قوتك هو علمك وظيفتك ..شخصيتك يلي لازم تبنيها قراراتك من حالك لا اب ولا اخ ولا عم ولا لام او اخت الحق بانهن يختاروا طريقك يلي رح تمشيه هني لالك بالنصيحة ..واذا شفتيها مابتناسبك لاتقبليها ..رح قفل قصتي وانتي افتحي خزانتك فتشي بين تيابك اذا لقيتي شي فستان يصنع لالك سعادة ادوم ايام تعي قليلي قصتك مالها معنى..اذا لقيتي احمر شفاه بخلي حياتك وردية تعي اعملي بلاغ على قصتي ...ارجعي اقعدي مع حالك وقفي قدام مرايتك شوفي وين انوثتك ..وين راحت ..مين يلي طفاها لالك..ارجعي انعشيها ..اسقيها يوم عن يوم ..سدقيني رح تطغي على كل الامك ..على كل اوجاعك رح تبني لالك احلامك...انوثتك الطاغية بفرض رايك على زوجك..اذا اهلك مانن سندك ابني لنفسك سند يقويكي ...حطي صوابعك العشرة بعيون يلي بيحكي عليكي وعلى ضعفك ..انتي ما انخلقتي جارية .انتي ما انخلقتي عبدة ..انتي انخلقتي من ضلع ..لا تقولي انخلقت من ضلع مكسور انتي انخلقتي من ضعفو لتكوني قوية وهو انخلق من طين ..وهاي كفيلة لتفهمك شو انتي.....
انتهت
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺