رواية الاشقياء_الثلاثة بقلم_فيلوفوبيا الجزء_الخامس حصريه وجديده على مدونة أفكارنا
 |
رواية الاشقياء_الثلاثة بقلم_فيلوفوبيا الجزء_الخامس حصريه وجديده على مدونة أفكارنا
ماعاد نبضي يعزف لحن الهوى...
بل يبحث عن بر فيه يرسيكي
وصارت مشاعري للسائحين فقط
و انتهت وطنا" لطالما كان يؤويكي
فما يعني أن أقصي روحي عنك؟
وغصبا" عني تأتيكي....
وأن أعادي كل مافي لك..
وأنت لا أعاديكي
فلتسلمي ياذنبا" رغما" عني أحمله
لست بحاقد أبدا" إن كان هذا يعزيكي
لكن كفى!
كفى تظهرين في كل امرأة أعرفها
وتحبطين مسعاي في تخطيكي
باسل/خطيت هالحروف على صفحتي عالفيس بوك و انا مدرك تماما" حجم المشكلة اللي حطيت حالي فيها
بس انا بدي اتنفس!
بدي احكي لأي حدا شو بني و بدي حدا يسمعني
بدي حدا يطبطب على كتفي ويهون عليي و يقلي لاتخاف...رح ترجعلك بيوم
بعرف انو اللي صار ذنبي...بس كان كتير صعب عليي كون اناني مع رزان...هيه اللي ساعدتني
و ساعدت همسة....هيه الي عطتني كل المشاعر اللي بيتمناها اي رجل...ماعدايي!!
بس هيه لازم تكرهني....حتى ماحس بالذنب تجاهها
لازم تعرف انها اختارت غلط...و اني مابيشفي جروحي الا اللي كانت سببها...و انو قلبي خلق لنيبض ويحب انسانة وحدة وبس
و البقايا مجرد نسخ عم تحاول توصل لسموها وجمالها و نقاءها...
_رن جوالي_
باسل:الو....اهلا رزان
رزان:انت وينك!
باسل:بالبيت
رزان:انا جاية لعندك
_مسكت صورتها الي كنت مخبيها من سنين وحطيتها بجيب بجامتي و شغلت سيكارة ونطرت وصول رزان_
_بعد نص ساعة_
رزان:(بعصبية)فيني افهم شو هالحكي الفاضي الي نشرتو عالفيس؟؟
باسل:قصدك القصيدة؟؟
رزان:اي نعم...هي لهمسة موهيك!
باسل:لا...لشاعر تاني
رزان:باسل!!!مو وقت برادتك...فهمني ليش ناشر هالحكي!
باسل:خلص رزان بربك ولو
رزان:لساتك بتحبها؟
باسل:لاتسألي سؤال بتعرفي جوابو
رزان:طالما بتحبها ليش تزوجتني!!
باسل:اووف....مشان ارضي انانيتك...مشان حس بإني عم ردلك جميلتك عليي
رزان:ومن ايمتا الزواج بيقوم على هيك اشياء!!
باسل:من لما تكون الزوجة مدركة انو زوجها بيحب غيرها ومع هيك بتقبل فيه
رزان:بس انت اللي نكرت معرفتك فيها...انت الي مثلت تمسكك فيني ادامها انا ماطلبت منك شي...معقول اتنحى على جنب و شوفك عايش معها النهاية السعيدة لقصتكن!!
باسل:لا مومعقول تتنحي...وليكني ملكتلك حالي و تزوجتك و رضيت انوثتك...بس عفكرة انتي مابتفرقي عن عصام بشي!
رزان:شوقصدك!!
باسل:قصدي....انك بتعرفي اني بحب غيرك و مع هيك اصريتي تجربي الحياة معي...وعصام عمل نفس الشي
كان بيعرف انو همسة مابتحبو...ومع هيك اصر يعيش معها و يتملكها
رزان:بس هو شافها صدفة و ماكان بيعرف عنها شي!
باسل:هههههههه
_رميت جسدي عالكنبة و شغلت سيكارة و نفخت دخانها بالهوا!_
رزان:شو الشي اللي مابعرفو!
باسل(هزيت براسي وتنهدت)اكيد همسة حكتلك اني تركتا بعد ليلة عرس رفيقي
رزان:اي..حكتلي
باسل:الشي الي مابتعرفو همسة....انو عصام شافها بهديك الليلة...وسألني عنها.....
_قبل 8سنوات_
عصام:مين هي البنت الي ساعدتك باسل؟
باسل:هي مساعدتي بالمطبخ
عصام:كتير حلوة
باسل(ابتسم)مزبوط
عصام:طبقلي ياها ابو البيس!!
باسل:(بلعت ريقي)عفوا!!
عصام:لك اي...البنت مبينة ظريفة و عجبتني كتير...طبقلي ياها
باسل____
عصام:شبك سكتت!
باسل:ولا شي....تكرم عينك
_بوقتها حسيت كأني وقعت بدوامة...صديق عمري الي عشت معو سنين طويلة....اللي آواني ببيتو و ساعدني بدراستي و شغلي و مشروع حياتي...الانسان الي آمن فيني و طبطب عليي بالوقت الي الدنيا كلها تخلت عني فيه...عم يطلب مني حبيبتي!!!
البنت الوحيدة الي حبيتها و الي بتحبني بجنون!
هديك السهرة فكرت كتير و احترت
وتوصلت اني لازم رد جمايل عصام عليي
هو فضلو عليي كبير و انا لازم رد هالفضل....قلت لحالي يمكن اقدر حب مرة تانية..بس اكيد اني مارح لاقي متل عصام
بوقتها...قررت اتخلا عن همسة الو....وانقطعت عنها مدة
و اتفقت مع عصام انو باليوم الي رح اصرفها فيه من الشغل يكون ناطرها جنب المطعم كرمال يلعب دور الشب الشهم و النبيل و يساعدها
و من بعد ما تأكدت من زواجهن انسحبت من حياتهن للابد و ماعاد عرفو عني شي...
بس بعد سنتين مشاعري غلبتني....الشوق كان رح يقتلني
حسيت اني لازم اسمع صوتها او شوفها بأي طريقة كانت
بدون شعور ايدي مسكت التلفون و طلبت بيت عصام
مافيني اوصفلك شعوري لما سمعت صوتها!!!
وكأنها شقت صدري....و روت عطشي
متل ضربات الكهربا لما يعطوهن للميت و يرجع قلبو ينبض من جديد
متل لما تكوني غرقانة...ويجي حدا يشدك و تشهقي هديك الشهقة....الشهقة الي فيها حياة جديدة و روح جديدة
متل لما تصحي من كابوس بشع....وتحسي بالراحة لانو كان كابوس
مكالمتي معها ماتجاوزت ال10 دقايق...قبل مايجي عصام و يعمل اللي عملو فيها و الباقي بتعرفيه
بعدها اجيت لعندك تعالجت قلت بلكي بنساها
بس ماقدرت....لما قلتيلي بحبك...قلت لحالي خليني اعطي لنفسي فرصة بلكي لما شوف غيرها بنساها
بس لا!!!!!
انا لهلأ بشوفها فيكي...بشوفها بعيونك و بعيون كل انثى بلمحها...انا لهلأ قلبي ماحب غيرها
بعرف اني عم اجرحك بكلامي
بس انتي طلبتي تسمعي الحقيقة...وهي الحقيقة
كل مابقرب منك....بتخيلها هيه...كتير اوقات لساني بيجي ليزل و يقول همسة...و صدقيني مابعرف كيف برجع لوعيي وبقول رزان
بتفكري اني بهديكي من العطر الي بحبو عليكي...بس الحقيقة غير هيك...الحقيقة انو هو عطرها و بحب شمو كيف ما اتجهت
شو بدك لسا!!!اي انا بحبها...بحبها و بحياتي مارح اقدر شيل هالحب من قلبي...انا اسف..بس هي نتيجة قرارك بانك ترتبطي برجال...قلبو معلق بانثى غيرك
رزان(حطت ايدها على تما و عيونها مليانين دموع)ماعم صدق!!!يعني انت عيشتني 3 سنين كذب بكذب
باسل:ماكذبت...حاولت حبك كتير...بس فشلت..و انا حكيت كل هالكلام لتكرهيني
رزان:صدقني انت خلفت فيني جرح مستحيل يشفا!
باسل:لما قلتلك انو لازم حدا يضحي بمشاعرو ليسعد التاني...انا قصدت حالي...ضحيت بمشاعري و حاولت ادعس عليها..كنت معك زوج منيح لمدة 3 سنين...بس مشاعري ماعاد تنحمل!!!عم تفهميني...ماعاد اقدر عيش بدونها اكتر من هيك
رزان:كلو كذب!!!!.....كلو مبررات تافهة....عذر اقبح من ذنب...خيبت املي ياباسل
باسل:انا اسف...بس خلص...طاقتي للتحمل خلصت
رزان:بدك تركد لعندها موهيك!!
باسل:اذا قبلت فيني
رزان:هههه واذا ماقبلت بترجعلي؟
باسل:لا....رح ابقى حاول معها...لترضى
رزان:طلقني
باسل:انا اسف عنجد!
رزان:(صرخت)ولك طللللقنيييي
باسل:انتي طالق....طالق...طالق
رزان:منيح...رح ننفصل متل اي تنين حضاريين انفصلو
بدون مشاكل و بدون كتر حكي...مهري مسامحتك فيه
و هلأ رح اتركلك بيتك و امشي...هالبيت الي عم شوف همسة فيه كيف ما طلعت....يمكن همسة تقدر تصلح فيك الي انا عجزت عنو....يمكن هيه تقدر ترجع علاقتك بامك
باسل:وعديني نبقى اصدقاء...صدقيني انا مالي سيء...انا كتير بعزك و بحترمك...انا مو سيء ابدا رزان...انا عاشق..و العاشق مجنون!
رزان:يمكن بيوم اقدر سامحك...بس هلأ لأ...مارح اغفرلك ابدا...انا رايحة لغرفتي ضب تيابي
باسل/بعرف اني جرحت رزان كتير...بس وضعي يرثى له
هيه تركت البيت و مشيت و انا بلشت فتش عن طريقة توصلني لهمسة بس كيف!!
دورت عليها كتير...و عجزت لاقيها و لا بأي طريقة/
ريتا:همسة الناس كتير حابين البان كيك الي عم تعمليه
همسة:الحمدلله دخيلك والله ريحتيني
ريتا:لازم تجيبي حدا يساعدك!شوي تانية مابقا نلحق
همسة:هوهيك....بدي حط اعلان بالجريدة عن شيف
ريتا:ممتاز....خدي هي للطاولة 7...بدهن 1 بان كيك و 1 غوفر
همسة:طيب ثواني و بيكون الطلب جاهز
همسة/سافرت لمدينة تانية وفيها بلشت بمشروعي الخاص...استأجرت مطعم صغير انا وريتا الي تعرفت عليها هون....مطعم خاص بأكلات الفطور
يعني وجبات خفيفة مو اكتر...لاني مابقدر اتحمل تعب او جهد المطعم الكامل
اموري كتير تحسنت عن قبل و قدرت استأجر بيت صغير على قدي انا و أملي الي سجلتها بحضانة
و فيني قول انو الحياة و أخيرا قررت تبتسملي شوي
و تعطيني شوية حظ
بنفس اليوم رحت عالجريدة ونزلت طلب لشيف وجبات خفيفة...و نطرت حدا يتقدم/
ريتا:همسة...ماما عازمتك عالغدا اليوم
همسة:والله مابدي عذبكن بتغدا ببيتي
ريتا:دخيلك من بعد المشوار مانحنا جنب بعض...هاتي أملي و تعالي يلا
همسة:طيب....شوي و بجي
_ببيت ريتا_
وفاء(ام ريتا)دوقيلي هالمحشي
همسة:يعيشو ايديكي خالة
وفاء:صحة و هنا نشالله....شو ايمتا راجع ابو أملي من السفر؟
همسة(بارتباك)عن قريب نشالله
وفاء:والله لو انك بنت ماكنت تركتك تروحي من ايدي و ساويتك كنتي
همسة(ابتسمت بخجل)تسلميلي
وفاء:لكن في رجال بيترك صبية متل القمر متلك لوحدها و بيسافر!!
همسة:شوبدنا نعمل هيك نصيبنا
أملي:بابا بدو يذبلي اكلات طيبة من الثفر مو هيك ماما
همسة:طبعا حبيبتي!
وفاء:بس تحكي معو قوليلي مشان بهدلك ياه و خليه يرجع بقا
همسة:ههههه تكرمي خالة
_كيف بدي اتهرب من كلام الست وفاء مابعرف....كل يوم تقريبا بتفتح موضوع ابوها ل املي...وبتذكرها فيه و انا مابصدق كيف نسيها ياه!
كيف بدي احكيلا عنو وهو مجرم و ظالم و خريج حبوس!
احسنلا ماتعرف هيك اب....بس انا كذبت هالكذبة حتى ماحدا يحاول يتقرب مني و او يرتبط فيني لاني قررت اتفرغ لتربية بنتي و بس!_
____________________
باسل:ياربيع تأكد انو كل شي تمام
ربيع:ماتخاف شبك متوتر...كلو ماشي متل الساعة
باسل:لك هاد عرس ابن اهم مسؤول بالبلد...الغلطة بكفرة
ربيع:ولايهمك...وجهك رح يبقى ابيض
باسل:نشالله...انا رايح جهز حالي
_من بعد ماكان الي يومين كاملين عم اشتغل و حضر لهالعرس الضخم الي انطلب مني حضر كل حلوياتو و ضيافتو...رحت لبيتي لاتحمم و بدل تيابي حتى كون جاهز وقت العرس
فتت عالبيت الموحش بنظري....الي مافيه روح ولاحياة
دخلت على حمام غرفتي الداخلي و فتحت المي السخنة حتى تعبى بخار خلال دقيقتين...حاسس حالي تعبان
و مرهق...بكل نفس عم يطلع وينزل من صدري انا حاسس بالتعب!
مو تعب الشغل...تعب الوحدة و الفراق...مابعرف ليش تذكرت امي...يمكن الواحد لما يكون بأضعف حالاتو
بيحتاج لحضن امو يقويه و يدفيه
صرلي زمان ماشفتها ولاحتى اتصلت فيها!
اخدت قرار صعب بالنسبة الي...بس انا رح رجع همسة و امي لبيتي
و رح بلش باللي بعرف مكانها الي هيه امي..._
_بمأوى العجزة_
باسل:لوسمحتي حابب شوف والدتي
الممرضة:وأخيرا أجيت!!!صرلها مدة مريضة و عم تسأل عنك
باسل:كيف يعني مريضة!وليش ماحدا اتصل فيني خبرني!
الممرضة:عفوا...حضرتك مو تارك رقمك حتى نتواصل معك!
باسل:اي صحيح...طيب...لوسحتي تجهزيلي اوراق خروجها بدي طالعا من هون
الممرضة:عنجد فرحتني...الخالة ام باسل مابتستاهل القعدة هون!
باسل:بالاذن انا رايح شوفها
_ندمت كتير لاني تركتها كل هالفترة لوحدها!
كان لازم من زمان اجي و طالعها من هون...بس ماصار شي..هلأ رح خرجها و خليها تكمل باقي عمرها معي
نقرت باب غرفتها و دخلت_
باسل:مسالخير
مرفت:صدق الله العظيم(سكرت المصحف وحكت بتعب وارهاق)اهلا وسهلا....غايب متلك جاب هدية
باسل:حقك عليي ام باسل...حقك عليي
(نزلت على ركبي و بوست ايديها)
مرفت:شوصاير معك؟...ايمتا الله هداك كل هالقد!
باسل:(رفعت راسي و طلعت بعيونها التعبانين و غصيت بدموعي)طلعت الدنيا مابتسوا بدون ام!!
مرفت:(هزت براسها)اي...؟
باسل:طلقت رزان...و رجعت لحالي...عايش وحيد متل ماكنت
مرفت:كيف ضيعتها من ايدك!
باسل:قلبي مع غيرها....ماقدرت حبها...ولاقدرت انسى حبيبتي...هيه طلبت الطلاق
مرفت:وليش جاية لعندي
باسل:جاية اعتذر منك...ورجعك تعيشي معي...نرجع متل قبل 19 سنة...انا و انتي وبس...شوقلتي!
_عيونها المليانين حنية دمعو....مسحت على شعري و ابتسمت...بعد كل هالعمر و التعب الي مرق عليها...لساتها حلوة...وبس تبتسم..بتخلي الدنيا تبتسم!_
مرفت:كنت عرفانة انو قلبك رح يحن بيوم
باسل:نمشي؟
مرفت:خليني هون اليوم بدي ودع رفقاتي و بكرا تعال خدني!
باسل:(تنهدت و ابتسمت)على راحتك...بكرا الصبح بجي باخدك...هلأ خليني امشي عندي عرس
مرفت:الله معك حبيبي
باسل:امي!!!
مرفت:حبيبي
باسل:دعيلي لاقيها...والله تعبت!
مرفت:(ابتسمت)الله يجمعك فيها ياعمري....على فكرة باسل
باسل:شوفي!
مرفت:الليلة الي انت هربت فيها....انا كمان اكلت قتلة و تقلعت
من البيت....امك يا باسل شريفة...صح مرقت عليي فترة ضعفت وطاوعت اللي مابيتسمى...بس امك مابتعمل الحرام يا امي...و الله شاهد على كلامي
انا ماسلمت حالي لحدا بالحرام!
باسل/هزيت براسي و فتحت الباب و طلعت...حملتني امي ذنب20 سنة...ظلمتها فيهن...و اتهمتها بذنب هيه مالها علاقة فيه!
يالطيف على هالقدر تبعي شو موجع!..شوصعب
يمكن هيه غلطاتي!...او يمكن هاد قدري اني عيش كل هالشتات بحياتي!
بس هلأ خلص...رح صلح كل شي...رح يكون كل شي منيح
لانو صار لازم ارتاح!...صار لازم دوق طعم السعادة!
إللي خلص القراءه يدخل هيلاقي كل الروايات اللي بيدور عليها من هنا 👇 ❤️ 👇
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
جميع الروايات الحصريه والكامله من هنا
انضموا معنا علي قناتنا بها جميع الروايات على تليجرام من هنا
❤️🌺🌹❤️🌺❤️🌹❤️🌺🌹❤️🌺🌹❤️🌺🌹❤️🌺🌹🛺🛺🛺🛺🛺
تعليقات
إرسال تعليق