رواية لعبة الخداع الفصل الاول والثاني والثالث والرابع والخامس والسادس والسابع بقلم الكاتبه نشوه عادل حصريه وجديده على مدونة أفكارنا
 |
رواية لعبة الخداع الفصل الاول والثاني والثالث والرابع والخامس والسادس والسابع بقلم الكاتبه نشوه عادل حصريه وجديده على مدونة أفكارنا
حرام عليك انت بتقطع الفلوس ليه ربنا ينتقم منك ده انا قاعدة طول النهار ف البرد عشان اجمعهم عشان اكل
اخرج حزمة بها مبلغ كبير وألقاها أرضا امامها رفعت وجهها ونظرت اليه باستغراب حين قال: اظن لو عيشتى عمرك كله تشحتى مش هتقدرى تجمعى نص المبلغ ده
امسكت المبلغ وقالت: ايه الفلوس دى كلها
+ اعتبريه عربون لاتفاق
قالت بعبوس: اه انت مفكرنى واحدة من اياهم مش كده
القت المال ف وجهه وقالت: انا اموت من الجوع ولا انى اعمل حاجة تغضب ربنا اتفضل امشى من هنا قبل ما اصوت والم عليك خلقه
+ انتى فهمتى ايه ي بتاعة انتى انا مش قصدى اللى ف دماغك ده
ـ والله بجد طب فهمنى معاليك تقصد ايه
+ تعالى اركبى معايا العربية وانا هفهمك كل حاجة ف الطريق
ـ اركب معاك فين انت اهبل هو انا اعرفك اصلا ولا اعرف انت مين ولا واخدنى ع فين
+ اسمى كمال المصرى رجل اعمال
ـ برضه مش هتحرك من هنا الا لما افهم ف ايه وانت مين وعاوز منى ايه
ف نفس الوقت نزلت فتاة ف اواخر العشرينات ويبدوا عليها الثراء وقالت: ايه ي كمال اتأخرت كده ليه
كمال: معليش ي لقاء ي حبيبتى اعمل ايه بقى ف اختيارك كنا جيبنا اى حد تبعنا وخلاص
نظرت لقاء لتلك الفتاة وقالت: هاى انا لقاء المهدى مرات كمال وانتى اسمك ايه
+ اسمى ياسمين
لقاء: اسمك جميل جدا وشكلك بتفهمى ف الاصول وهتساعدينى مش كده
ياسمين بعدم فهم: اساعدك ف ايه انا مش فاهمة اى حاجة
كمال: احنا مش هينفع نقف نتكلم هنا ممكن تيجى معانا نقعد ف الكافيه اللى هناك ده وهنفهمك كل حاجة
ياسمين بقلة حيلة: تمام بس الاول هات الخمسين جنيه اللى قطعتها
لقاء: خدى الفلوس كلها ليكى
ياسمين: لا الفلوس دى المفروض انها العربون ي مدام ع الحاجة اللى انا لسه معرفهاش ومعرفش اذا كنت هوافق عليها او لا
لقاء: اعطيها ي كمال الخمسين جنيه خلينا نخلص بقى
اخرج كمال المال واعطاها اياه ابتسمت براحة وقالت: تمام بس صاحب الكافيه هيرفض يدخلنى بشكلى ده
كمال: ملكيش دعوة انا هتصرف وهدخلك بس خلصينا بقى
بالفعل تحركوا اتجاه المقهى وتحدث كمال مع مالكه ورحب بهم كثيرا بل كان يتعامل مع ياسمين وكأنها من اصحاب المكان واختلفت المعاملة تماما فضحكت بتهكم فالمال حقا يفعل الكثير وبعد ان جلسوا وطلبوا مشروب ساخن لكل منهم
ياسمين: ادينا قعدنا ممكن افهم ف ايه ومطلوب منى ايه
كمال: شوفى ي ستى هى خدمة بسيطة جدا وف المقابل هتاخدى ١٠٠ الف جنيه
اتسعت اعينها بصدمة: ١٠٠ الف وايه هى الخدمة دى ي باشا
كمال: هنعرفك ع شخص مطلوب منك تخليه يثق فيكى ويطمن ليكى ع الاخر ويعرفك كل اسراره بما فيهم المكان اللى بيعين فيه فلوسه
ياسمين: حلو اوى الكلام ده يعنى حضرتك بمنتهى البساطة جاى تطلب منى انصب واسرق دى فعلا خدمة حلوة خالص
وقفت وقالت: عن اذنكم يفتح الله
خرجت ياسمين من المقهى وتبعتها لقاء وكمال وهما يندهان عليها لكن دون رد امسكت بها لقاء وقالت: استنى بس انتى فهمتى غلط
ياسمين: واحد بيقولى قربى من واحد وخليه يثق فيكى ويعرفك مكان فلوسه يعنى انصب واسرق واخون الثقة كمان وتقوليلى فهمتى غلط
لقاء: انتى سمعتى نص القصة بس اسمعى الباقى وبعدها احكمى سواء هتساعدينى او ترفضى
ياسمين: اتفضلى
لقاء: الشخص اللى انا عاوزاكى تقربى منه ده يبقى خالد اخويا
ياسمين: كمان اخوكى فعلا بقينا ف زمن ما يعلم بيه الا الله وبقينا ف اخر الزمن
كمال مقاطعا: انتى ايه راديو كل شويه تقاطعى الكلام ما تعطيها فرصة تكمل للاخر
لقاء: اهدى ي كمال هى عندها حق ...نظرت لياسمين بحزن وقالت: بعد ما بابا مات وطبعا ملناش اهل الورث اتقسم علينا احنا الاثنين بالتساوى وبابا قبل ما يموت كتب نصيبى فلوس يعنى الشركات والمحلات مليش فيها بعدها اتفاجئت ان خالد سحب كل الفلوس اللى بالبنك وخباها ومعملش اى حساب ف بنوك باسمه ولما طالبته بحقى قاله انه مش هيعطيه ليا لانه قال ايه خايف على فلوسى وعارف انى هضيعها
ياسمين: لا حرام يعمل حاجة زى دى المفروض يعطيكى حقك بما يرضى الله وانتى حرة فيه ان شاء الله تولعى فيه حتى هو يضمن منين انه يعيش عشان يرده ليكى
لقاء: بالظبط كده وانا حاولت كتير اطلبه بالحسنى لكن مفيش فايدة
ياسمين: طيب واحد مش واثق ف اخته يعرفها طريق فلوسها هيعرف واحدة غريبة ازاى
لقاء: ما هو ده دورك انتى بقى وانتى وشطارتك
ياسمين: طب افرضى كشفنى
لقاء: اطمنى انا هقدمك ليه ع انك واحدة صاحبتى
ياسمين: برضه ده مش ضمان كافى وانا معنديش اى استعداد اخاطر فأنا اسفة مش هقدر اساعدك
لقاء: طب لو قولتلك انهم هيبقوا ١٥٠ الف برضه هترفضى
سكتت ياسمين وحينها اخرجت لقاء كارت وقالت: ياريت تفكرى تانى وده رقمى خليه معاكى لو غيرتى رأيك كلمينى بس ياريت يكون قبل يوم الخميس يعنى معاكى يومين بس
تركتها لقاء وزوجها ونظرت ياسمين الى الكارت باستغراب وضعته ف جيبها ومشيت الى ان وصلت امام صيدلية واخذت منها دواء للبرد واتجهت الى غرفة فوق سطح لبيت اوشك ع الانهيار طرقت برفق الى ان فتحت لها صديقتها بالغرفة واكثر من اخت لها وتدعى شيماء
شيماء: اتأخرتى كده ليه النهاردة
بدأت ياسمين تحكى لها ما حدث .... شيماء: وعملتى ايه
ياسمين: رفضت طبعا
شيماء: نعم رفضتى انتى عبيطة ي بنتى حد يرفض النعمة ي شيخة منك لله
ياسمين: يعنى كنتى عوزانى اوافق تضمنى منين انها قالت الحقيقة ولا تضمنى منين ان اخوها ميعرفش حقيقتى ويقتلنى
شيماء: وهو هيعرف منين هو رئيس مباحث انتى مش بتقولى انك معاكى رقمها
ياسمين: ايوة
شيماء: كلميها وقولى ليها انك موافقة ولو مش عاوزة تعملى كده انتى انا اروح مكانك عادى ووو....
التاني
- كلميها وقولى ليها انك موافقة ولو مش عاوزة تعملى كده انتى اروح انا مكانك عادى
ياسمين: انا مش مرتاحة للموضوع ده حاسة ان فيه حاجة بجد وراهم
شيماء: هو الحاجة اللى بجد هتحصل هتكون لينا احنا الست زينات طلعت النهاردة وفرجت عليا الدنيا ده هيكون تالت شهر مندفعش تمن الاوضة الحزينة اللى بتنقع علينا ومش هيكون حيلتنا مكان نروح عليه وبعد ما كنا بنتبطر ع دى هنلاقى نفسنا بالشارع
فكرت ياسمين قليلا لتتابع شيماء: صدقينى ي ياسمين المبلغ ده قليل اه وميعملش حاجة دلوقتى بس ع القليل نبدأ بيه ف اى مشروع ناكل منه عيش بدل الشحاتة والذل للى يسوى واللى ميسواش
ياسمين: طب افرضى طلعت كذابة وكانت وخدانى كبش فداء لاخوها العمل هيكون ايه وقتها
شيماء: ان شاء الله مفيش حاجة من دى هتحصل متقدريش البلاء قبل وقوعه وكل ما انجزتى ف السريع هيكون ف مصلحتك
بدأت ياسمين تستجيب لكلام صديقتها وقالت: تمام هكلمها بكرة
شيماء: وليه مش دلوقتى يعنى
ياسمين: عشان معييش رصيد ارتاحتى يلا خدى العلاج ونامى
ف الصباح وبعد زن طويل من شيماء اجرت ياسمين مكالمة مع لقاء الذى قالت: الو مين
ياسمين: انا موافقة اساعدك
لقاء: عين العقل ي ياسمين وكويس انك متأخرتيش ف الرد عليا عشان نلحق نجهز
ياسمين: تمام بس انا ليا شرط واحد
لقاء: اكيد
ياسمين: عاوزة الف جنيه مقدم دلوقتى محتاجاه ضرورى جدا
ضحكت لقاء وقالت: بس كده هبعتلك 5000 دلوقتى عندك فودافون كاش
ياسمين: لا معنديش هنزل اجيب رقم من السوبر ماركت
لقاء: اوك وعرفينى مكانك لما تجهزى هبعتلك السواق يجيبك لحد عندى
ياسمين: هحتاج هدوم معايا
لقاء بضحك : لا طبعا هدومك متنفعش انا هوفرلك كل حاجة ولما تيجى هنتفاهم يلا باى
نزلت ياسمين جابت الفلوس وطلعت خبطت ع شقة زينات صاحبة المنزل وما ان فتحت ورأت ياسمين قالت: ي فتاح ي عليم خير جاية بأسطوانة ايه المرة دى عشان متدفعيش ما هو شوفى بقى لو وقفتى ع دماغك اخركم معايا يوم ٥ لو الفلوس مجيتش انا ...............
ياسمين: ابلعى ريقك شويه ي ست زينات .... اخرجت المال واعطته لها وقالت: اتفضلى عدى فلوسك
زينات وهى تنظر للمال بدهشة: دول كام
ياسمين: دول ٢٠٠٠ جنيه فيه كمان شهر مقدم
زينات وهى تنظر لها: وجيبتى ي اختى المبلغ ده منين سرقتى سريقة ولا نهبتى نهيبة
ياسمين: ملكيش فيه انتى ليكى فلوسك وبس
زينات: ع قولك انا مالى
تركتها ياسمين وذهبت للاعلى وكانت اشترت بعض الطعام والحلويات لشيماء
شيماء: الله الشكولاتة دى كان نفسى فيها اوى وكان نفسى ادوقها
ياسمين: وانا تحت افتكرتك وانتى بتبصى عليها وبتقولى نفسك تدوقيها فجيبتها عشانك
احتضنتها شيماء وقالت: ربنا يخليكى ليا ويوسع رزقك واعيش واردلك الجميل
ياسمين: بطلى عبط احنا اخوات المهم انا عطيت للزفتة اللى تحت دى الايجار كله وشهر مقدم كمان عشان تنزل من ع دماغك وخلى ١٠٠٠ جنيه دول معاكى ومفيش نزول للشارع تانى عاوزة تنزلى تدورى ع شغل ف اى مكان محترم ماشى كده كده هيكون معاكى فلوس ومتقلقيش كل فترة هبعتلك فلوس
شيماء: انتى هتمشى دلوقتى ولا ايه
ياسمين: ايوة هى قالت هتبعتلى السواق هطلع ع الرئيسى استناه
ما ان انهت جملتها ووجدت رقم غريب يتصل عليها فقالت: ده اكيد السواق
اجابت عليه وكما ظنت كان السائق ودعت صديقتها ونزلت وكان السائق ينظر اليها والى ملابسها وشكلها بإشمئزاز وصلت ع بوتيك كبير ودخلت باحراج
لقاء: اهلا ي ياسو اعرفك ع صديقتى لارا دى صاحبة البوتيك ده ودى يا سيتى ياسمين اللى كلمتك عنها
لارا بتكبر: اهلا
لقاء: مش هوصيكى بقى ي لارا عاوزها النهاردة تكون اجمل بنوتة
لارا: امممم دى محتاجة معجزة لو وراكى حاجة انتى روحى احنا ادامنا موال
ياسمين: تروح ع فين انتى هتسبينى هنا ليه
لقاء: متخافيش فيه هنا بيوتى سنتر هيظبطوكى ويظبطوا شعرك وشكلك انتى خايفة ليه
ياسمين: معليش خليكى معايا
لقاء: اوك يلا ي لارا لو سمحتى شوفى شغلك
عدى من الوقت ما يقرب من ٦ ساعات وبدأت لقاء خلال تلك الساعات تباشر عملها عن طريق الهاتف ثم خرجت لارا وجلست امامها
لقاء: ها طمنينى
لارا: عيب عليكى هتشوفى دلوقتى التحفة الفنية بتاعى ثم قالت: تعالى ي ياسمين
خرجت ياسمين وهى ف كامل جمالها وانوثتها ي الله ع بديع خلقه الجميل وقفت لقاء بذهول وهى تراها ترتدى فستان اسود طويل مجسم وترفع شعرها كعكة وبعض المساحيق الهادئة تزينها فكانت كالاميرات
لقاء باعجاب: واو حبيت اوى بجد شكرا لارا
لارا: العفو وجيبت ليكى كل الهدوم بنفس المقاس وهما دلوقتى ف عربيتك
لقاء: اوك يلا ياسمين
اخذتها لقاء الى منزلها وكانت فيلا كبيرة وفخمة من يراها يظن انها تاج محل الهندى كانت ياسمين تنظر بانبهار وتحسر وف قرارة نفسها: ناس عايشة ف قصور وناس مش لاقية قوت يومها سبحانه موزع الارزاق
لقاء: هاى ي بيبى
كمال وقد انبهر بجمال ياسمين ولم يتعرف عليها قال: هاى ي روحى مين الانسة دى صاحبتك ولا ايه
لقاء بفرحة: ايه ده معرفتهاش ولا ايه
كمال وهو يأكل ياسمين بأعينه: محصليش الشرف مين الهانم
لقاء بضحك: دى ياسمين
كمال: ياسمين مين
لقاء: ايه ي حبيبى انتى فقدت الذاكرة ولا ايه ياسمين بتاعت امبارح
كمال بصدمة: نعم ازاى يعنى
لقاء: معنى انك معرفتهاش انا كده اطمنت اوى
كمال: معرفتهاش ده انتى لو حلفتى ليا ان دى نفس البنت بتاعت امبارح مش هصدقك
ياسمين: لو حضرتك بطلت اهانات ممكن نكمل كلامنا وافهم باقى المطلوب منى
كمال: انا اسف مش قصدى
لقاء: يوم الخميس عيد ميلادى وخالد هيكون موجود وانا هعرفكم ع بعض ع انك صديقتى اللى كانت عايشة مع اهلها بألمانيا ونزلت مصر بعد ما اهلها اتوفوا ودورك بقى هو انك تخليه يتعلق بيكى
كمال: متفكريش الموضوع سهل لان خالد كان متجوز ومراته هربت منه وميعرفش عنها اى حاجة ومعقد من الستات وووو.....
الثالث
ـ متفكريش الموضوع سهل لان خالد كان متجوز ومراته هربت منه وميعرفش عنها اى حاجة ومعقد من الستات
ياسمين باستغراب: هربت ... هربت ازاى ولا راحت فين وليه اصلا تهرب من جوزها
لقاء: الحقيقة مفيش رد ع اسئلتك دى لاننا منعرفهاش اصلا ولا عمرنا شوفناها
ياسمين بصدمة: نعم ازاى يعنى متعرفيش مرات اخوكى
لقاء: خالد اتجوزها بالسر ومعرفناش عليها لكن بعد حوالى ٦ شهور اتفاجئنا بخالد بيقول انها هربت وميعرفش عنها حاجة ولا يعرف السبب حتى ومن وقتها وهو حرفياً مش بيتعامل مع ستات ولا بيثق فيهم حتى شركته مفيش فيها واحدة توحد ربنا كلهم رجالة
ياسمين: ي نهار اسود وجاية تقوليلى الكلام ده دلوقتى لا ي سيتى يفتح الله انا مليش دعوة بالحوار ده
لقاء: وانتى خايفة ليه هو هيعضك وبعدين انا اختارتك انتى لسبب مهم
ياسمين: ايه هو بقى ان شاء الله
لقاء: انتى هتعرفيه لوحدك بعد بكرة ف الحفلة
ياسمين: لا ده جنان رسمى انا مش هكمل ف اللعبة السخيفة دى انا همشى
لقاء: تمشى فين بس احنا هنبقى معاكى و....
كمال مقاطعاً: خلاص ي لقاء خليها تمشى عادى بس قبل ما تمشى ايدك ع ٥٠٠٠ جنيه اللى اخدتيهم وكمان فاتورة البيوتى سنتر وتكاليف الهدوم ادفعيها
ياسمين: انا مجيبتش هدوم اصلا والمفروض قبل كل ده كنتم تعرفونى الليلة ع ايه ولو ع ال ٥٠٠٠ جنيه انا هردهم والله
لقاء: ي سيتى مش مهم ال ٥٠٠٠ المهم الفواتير تدفع لانها باسمك ولو متدفعتش بفون واحد ل لارا دلوقتى هتحبسك وتتهمك بالسرقة والنصب
ياسمين بصدمة: انتى بتقولى ايه
طلعت لقاء بطاقة من شنطتها وقالت: ياسمين احمد محمد عبد التواب رقم البطاقة ٢٩٩*********
اتصدمت ياسمين وفتحت شنطتها وملقتش البطاقة غمضت عيونها بقهر وقالت: هستغرب ليه يعنى ما علينا ايه المطلوب منى
كمال: احنا مش هنفضل نعيد ونزيد كتير قولتا تخليه يثق فيكى وتعرفى مكان الفلوس وبس
ياسمين: تمام ينفع اروح ولا لسه فيه حاجة
لقاء: تروحى ع فين
ياسمين: ع بيتى طبعا هيكون فين يعنى
لقاء: لا انا حجزت ليكى بفندق هتقعدى فيه ومتقلقيش مدفوع تكاليفه وكل حاجة السواق هياخدك دلوقتى ويوديكى
ياسمين: تمام اى اوامر تانية
لقاء: خدى الفون ده خليه معاكى فيه خط عشان لما احتاجك بس خلى بالك منه ها ده غالى جدا
ياسمين: تمام عن اذنكم
مشيت ياسمين وراحت ع الفندق وكانت ف سويت جميل جدا وكبير
ياسمين: يخربيت الجمال ي حبيبتى ي شيماء ياريتك كنتى معايا
عدي يومان وخلالهما تعلمت ياسمين الكثير من لقاء فى كيفية الطعام والمشى والتحدث بلباقة وغيرها
لقاء: انتى كده بقيتى جاهزة خدى بقى الفستان ده عشان تلبسيه بكرة
ياسمين: نعم ده فستان
لقاء: ايوة ليه
ياسمين: هو ايه اللى ليه ده انا فكرته قميص نوم ده كاشف اكتر ما ساتر
لقاء: اومال عاوزة تلبسى ايه انتى لازم تكونى شيك
ياسمين: وهو مينفعش اكون شيك باحترامى لازم ابين جسمى بصى انا مش هلبس البتاع ده شوفيلى فستان مقفول لو سمحتى
لقاء: هو انتى مينفعش تقولى حاضر لازم تقاوحى ف كل حاجة
ياسمين: معليش خدينى ع اد عقلى ي سيتى وفيه حاجة كمان
لقاء: ايه تانى
ياسمين: مينفعش تقدمينى لاخوكى ع انى كنت عايشة بألمانيا افرضى طلع بيعرف يتكلم ألمانى يبقى ازى الحال وقتها
لقاء باعجاب: ي بنت الذين ازاى مفكرتش ف كده كان عندى حق لما اصريت عليكى مش بس حلوة وكمان ذكية
ياسمين: ولسه الجاى هيعجبك اكتر ويمكن ١٥٠ الف يبقوا ٢٠٠
لقاء: زى ما قولتلك انتى وشطارتك
جاء موعد الحفل الذى اقامته لقاء فى الفيلا الخاصة بها وعزمت الكثير من الاصدقاء والمعارف وسيدات الاعمال وغيرهم وصل خالد فى موعده
لقاء: دايما ف ميعادك بالثانية
خالد: ما انتى عارفانى بقدس المواعيد جدا كل سنة وانتى طيبة ي روحى وعقبال المليون
لقاء: وانت طيب ي حبيبى
خالد: اتفضلى هديتك اتمنى زوقى يعجبك
اخذت الهدية وقالت: طول عمرك زوقك جميل
فى نفس الوقت وصلت ياسمين ومعاها هدية للقاء وقالت: لولى هابى بيرث داى
لقاء: ياسو ايه المفاجأة الحلوة دى انتى رجعتى امتى من السعودية
ياسمين: من يومين بس خبيت عليكى عشان حبيت اعملها ليكى مفاجأة
لقاء: احلى مفاجأة اوبس سورى نسيت اعرفكم ده خالد اخويا ودى ياسمين صاحبتى واكتر من اختى
رفعت ياسمين نظرها لخالد وما ان التقت اعينهم حتى رجفت يداها التى امدتها لتسلم عليه
خالد: اتشرفت بمعرفتك ي انسة
ياسمين بتوتر: انا اكتر
خالد: احنا اتقابلنا قبل كده
نظرت له لقاء بخوف اما ياسمين اجابت بثقة مذبذبة: معتقدش انا لسه نازلة مصر من يومين وبالعادة مش بنسى اى وش اتعاملت معاه بعد اذنك ي لقاء ممكن اروح التواليت
لقاء: اكيد ي روحى اتفضلى
دخلت ياسمين الى المرحاض وهى تضع يدها ع قلبها انه هو ذاك الشخص التى جمعتهما الصدفة فى اول يوم تنزل فيه الى الشارع كبائعة ورد وكانت تلطخ وجهها بالمساحيق والتراب لكى تخفى ملامحها رجعت بذاكرتها الى ذاك اليوم التى كانت تجلس مختبأة من الشمس ف جانب مع بعض الورود حين نزل خالد من سيارته وذهب اليها ووو....
خالد: مساء الخير
رفعت ياسمين وجهها قائلة: مساء النور ورد ي بيه
خالد: اكيد
ياسمين: اختار حضرتك اللى انت عاوزه
خالد: محتار ما تنقى انتى ع زوقك
ياسمين: يمكن زوقى ميعجبش حضرتك ولا البنت اللى هتاخده ليها
خالد: لا انا واثق انه هيعجبنى
نظرت له بدهشة وجمعت بعض الورود الزرقاء وقليل من الورود البيض وقالت: اعتقد ده هيعجبها
اخرج خالد المال وقال: شكرا
اخذت ياسمين المال ثم قالت: ده كتير اوى
خالد: دول ليكى قومى روحى الجو النهاردة حر لا يطاق .... ثم مد يده بالورد وقال: اتمنى تقبليه منى وعاوز اقولك ع حاجة ربنا قال اسعى ي عبد وانا اسعى معاك وان شاء الله اجيلك ف يوم اشترى منك بس من البوتيك الخاص بيكى
ثم تركها وذهب مع حيرتها من ذاك الملاك المتمثل فى شكل بشر هل حقاً هو حقيقى ام انها تحلم افاقت من ذكرياتها ع صوت لقاء وهى تقول: انتى مجنونة مالك اتوترتى كده ليه وبقيتى ترتعشى قصاده ووووو....
الرابع
- انتى مجنونة مالك اتوترتى كده ليه وبقيتى ترتعشى قصاده كنتى هتكشفينا
ياسمين بدموع: انا عارفة الشخص ده كويس انا قابلته مرة قبل كده ومعنى ان هو قالها ليا يبقى يبقى افتكرنى اكيد
لقاء: مستحيل كمال زى خالد قويين الملاحظة ولما كمال شافك بالنيولوك الجديد معرفكيش ويوم ما خالد قابلك ملامحك مكنتش باينة اصلا يعنى مستحيل يعرفك
ياسمين: ثانية بس انتى عرفتى منين انه قابلنى
لقاء: لانى يومها انا كنت معاه واستغربت لما نزل وكلمك وشوفته وهو بيعطيكى الورد وساعتها قولت انك الوحيدة اللى هتقدرى تعرفى مكان الفلوس بسهولة
ياسمين وهى تغمض عيناها بوجع: وانا مستحيل اساعدك انا همشى
لقاء: بقولك ايه بطلى الاسطوانة دى عشان انتى عارفة كويس اوى انا ممكن اعمل ايه ومصيرك هيكون ايه فاهدى كده ع نفسك ونفذى المطلوب منك احسنلك
ياسمين: انتى لا يمكن تكونى بنى ادمة انتى اكيد شيطان
لقاء: شيطان ليه عشان بدور ع حقى
ياسمين: طب ما انتى معاكى فلوس وعايشة بفيلا وراكبة عربية غالية احمدى ربنا غيرك مش بيلاقى يجيب عشا
لقاء: اولا دى فلوس جوزى ثانيا ده حقى وانا حرة اعمل فيه اللى انا عاوزاه ثالثاً انتى مش هتعملى كده لله انتى هتاخدى مبلغ متحلميش بيه وخلاص انتى دخلتى الحدوتة ومش هينفع تخرجى منها الا ف حالتين ي تتكشفى ي تنجزى معاكى دقيقة وتكونى برة
خرجت لقاء وبكت ياسمين يا الله لقد بحثت عنه كثيراً وحاولت مراراً وتكراراً ولكنها فشلت ويوم ما تتلقى به يكون هو لعبتها مسحت دموعها وحاولت ان تكون عادية وخرجت لهم
لقاء: ايه ي ياسو التأخير ده انا مردتش اطفى الشمع من غيرك
ياسمين: اسفة كنت بظبط الميك اب
كمال: تمام يلا نطفى الشمع بقى
جلس الجميع على مائدة كبيرة وكان خالد يجلس الى جانب ياسمين التى لم تستطع رفع اعينها حتى لا تلتقى بعينيه فبادر قائلا
خالد: انتى بقالك اد ايه عايشة بالسعودية
ياسمين: من وانا صغيرة بابا كان شغال هناك واخدنى معاه بعد ما ماما اتوفت بس هو كمان الله يرحمه عشان كده قررت انزل مبقاش ليا حد هناك افضل عشانه
لقاء: طب وولاد عمك هتعملى معاهم ايه
ياسمين: هما ميعرفوش انى رجعت مصر
لقاء: بس ممكن يعرفوا ف اى لحظة
ياسمين: عشان كده بحاول الاقى مكان ف اسرع وقت محدش يعرفنى فيه لازم ابعد عن القاهرة بأى شكل
لقاء: انا عندى حل كويس
ياسمين: ايه هو
لقاء: تروحى تعيشى مع خالد هو عايش ف الجيزة ع فكرة يعتبر بعيد شويه
خالد بصدمة: انتى بتقولى ايه
لقاء: معليش ي خالد دى فترة مؤقتة بس لحد ما تدبر امورها
خالد: مستحيل طبعا انتى عارفة انى عايش لوحدى هتعيش معايا ازاى
ياسمين: استاذ خالد عنده حق ولو هو وافق انا مكنتش هوافق
ف هذا الوقت رن هاتف ياسمين برقم غريب اجابت وقالت: الو مين
............: سكرتارية الاوتيل مع حضرتك ي فندم
ياسمين: خير فيه حاجة ولا ايه
............: فيه شخص جه سأل ع حضرتك وع رقم الغرفة اللى انتى فيها وبيقول انه ابن عمك بس انا عرفته انك مش موجودة
ياسمين: ايه ...طب هو لسه عندك
............: ايوة موجود ومستنيكى
اغلقت ياسمين الهاتف وقالت: انا لازم امشى حالا
لقاء: استنى بس ف ايه وهتمشى تروحى ع فين
ياسمين: الاوتيل اللى كان بيكلمونى وبيقولوا ان ابن عمى هناك وبيسأل عنى اللى خوفت منه حصل انا لازم اهرب
خالد: استنى هتروحى ع فين
ياسمين: مش عارفة
خالد: تعالى معايا
ياسمين: ع فين
خالد: ع بيتى
ياسمين: كتر خيرك بس انت لسه قايل من شويه انه مش هينفع
خالد: متخافيش انا مش عايش لوحدى اوى يلا بينا
بعد محاولات اقناع وافقت ياسمين وركبت معه سيارته وبعد ان ركبت ابتسمت له وبعد وقت وصلت الى حيث المكان الذى يسكن فيه ونزلت معه وصعدت الى شقة فخمة فى الطابق الاخير فتح خالد الباب وجاءت سيدة كبيرة بالسن لتقول: حمدالله ع سلامتك ي ابنى
خالد: الله يسلمك ي دادة اعرفك الانسة ياسمين هتكون ضيفة عندنا هنا كام يوم ودى ي سيتى دادة كريمة تقدرى تقولى امى التانية
كريمة: اهلا ي بنتى اتفضلى خالد لو سمحت عاوزاك ف كلمتين
توجه خالد معها وقال: نعم
كريمة: اول مرة اشوفك داخل بواحدة هنا دى تبقى مين ولا ايه حكايتها
خالد: متقلقيش انتى عارفة انى مش بعمل حاجة غلط المهم دلوقتى خلى أروى تجهز ليها غرفة عشان تنام فيها وانا هفهمك كل حاجة بعدين
كريمة: أروى تعالى
أروى: نعم ي دادة
كريمة: جهزى اوضة الضيوف للانسة
استأذن خالد ونزل الى عمله ودخلت ياسمين الى الغرفة واغلقت الباب باحكام اخرجت الهاتف الاخر من شنطتها واجرت اتصال بشيماء
شيماء: عاملة ايه ي قلبى وحشتينى اوى وعندى ليكى خبر هيفرحك
ياسمين: خير يارب
شيماء: لقيت شغل فى محل ملابس وبمرتب كويس بس شيفت ١٠ ساعات قولت مش مهم المهم انى لقيت شغل يلمنا من قرف الشارع ها طمنينى عملتى ايه
ياسمين: انا مش بخير ي شيماء
شيماء: ف ايه ي بنتى
ياسمين: فاكرة الشاب بتاع الورد اللى قلبت الدنيا عليه هو نفسه اخو اللى اسمها لقاء
شيماء وقد اتسعت اعينها من الصدمة: ي خبر طب عرفك
ياسمين: انتى اللى يهمك اذا عرفنى ولا لا
شيماء: اومال هيهمنا ايه غير كده
ياسمين: انا مش هقدر اخدعه واغشه ده باين عليه طيب وابن حلال اوى ومتأكدة ان اللى اسمها لقاء دى كدابة وبتتبل عليه انا هقوله الحقيقة واللى يحصل يحصل
شيماء: انتى اتهبلتى ي بت لا طبعا اوعى تعملى كده انتى مش اد لقاء واذاها
ياسمين: طب مش حرام اخون ثقته
شيماء: وهو مش حرام عليه ياخد حق اخته ووو....
الخامس
ـ. وهو مش حرام عليه ياخد حق اخته بلاش تتخدعى فيه ي ياسمين وخلى ف دماغك انك بترجعى الحق لاصحابه ركزى ف اللى انتى رايحة عشانه وبس
ياسمين: خايفة ي شيماء
شيماء: هتخافى من ايه هيعملك ايه يعنى اللى المفروض تخافى منها بجد هى لقاء اسمعى كلامها وتلاشيها
ياسمين: تمام انا هقفل دلوقتى
اغلقت ياسمين الهاتف ووجدت احد يطرق باب الغرفة ذهبت وفتحت
أروى: دادة كريمة بتقولك خدى البسى العباية دى نامى فيها للصبح
شكرتها ياسمين واغلقت الباب وذهبت الى الحمام واخذت دش دافئ ثم خرجت وارتدت العباءة ووضعت رأسها على الوسادة على امل ان يغلبها النوم لكنها لم تستطع فتحت الباب وخرجت واثناء خروجها كان خالد قد عاد ابتسمت وقالت: حمدالله ع السلامة
خالد: الله يسلمك ايه اللى مصحيكى لحد دلوقتى
ياسمين: مش جايلى نوم
خالد: ده قلق ولا خوف ولا تفكير
ياسمين: تقدر تطلع منهم ميكس واعتبر ان ده حالى دلوقتى
خالد: طيب ممكن اسألك سؤال سخيف ولا تضايقى
ياسمين: من حقك طبعا اتفضل
خالد: انتى ليه بتهربى من اهلك
ياسمين: لأنهم عاوزين انى اتجوز ابن عمى بالغصب عشان فلوس بابا وانا عارفة كده كويس وانا مش بحبه قولتلهم خدوا الفلوس وسيبونى ف حالى لكن طبعاً خايفين ع شكلهم ادام الناس
خالد: هو لسه فيه ناس كده طب قرايب والدتك فين
ياسمين: هتصدقنى لو قولتلك انى معرفش عنهم حاجة
خالد: متقلقيش ان شاء الله خير ... احم عن اذنك لازم انام لان الوقت اتأخر وعندى شغل بدرى
ياسمين: اكيد اتفضل بس ........
خالد: بس ايه
ياسمين: كنت حابة اشكرك ع وقفتك جنبى واوعدك ان فى اقرب وقت همشى عشان مسببش ليك اى مشاكل
خالد: متقوليش كده انا جنبك متخافيش يلا تصبحى ع خير
تركها وذهب إلى غرفته نظرت الى طيفه بحزن وتأكدت من ان الجميع نائم استغلت الفرصة وقامت تبحث عن اى مكان داخل الشقة لعلها تجد ما تريده لقاء وتقريباً لم تدع ركن الا وبحثت فيه حتى خلف اللوحات والصور وغرفة المكتب ولم يتبقى سوى غرفة خالد وغرفة كريمة واروى استسلمت يائسة وذهبت للنوم
فى اليوم التالى استيقظت من نومها ع صوت الهاتف
ياسمين: الو ي مدام لقاء
لقاء:ها طمنينى وصلتى لحاجة
ياسمين: انا امبارح قلبت الدنيا ف الشقة دى رأسا ع عقب لدرجة انى كنت بدور ف الحيطان ع سراديب سرية زى الموجودة بالافلام لكن ملقتش حاجة ومش فاضل حالياً الا غرفة الشغالين واخوكى ومش عارفة ادخلهم ازاى
لقاء: اعملى اى حاجة المهم تنجزى وخلى بالك كريمة دى مش سهلة ولية حرباية
ياسمين: تمام
اغلقت الهاتف وقالت: والله ما حد حرباية ويستاهل الحرق الا انتى
قامت ياسمين وخرجت ولم تجد احد ذهبت الى المطبخ ووجدت كريمة فقط
ياسمين: صباح الخير
كريمة بابتسامة: قولى مساء الخير احنا داخلين ع المغرب
ياسمين: ياااه انا اسفة والله اصل منمتش كويس امبارح
كريمة: عادى ي بنتى
ياسمين: هو خالد ليه مش عايش فى فيلا كبيرة زى لقاء مع انه رجل اعمال وعنده شركات
كريمة: خالد طول عمره بيحب البساطة واللمة ع عكس لقاء
ياسمين: واضح فعلا انهم مش زى بعض اومال فين اروى
كريمة: بتنضف اوضة خالد
ياسمين: طيب انا هروح اسلم عليها تحبى اساعدك ف حاجة
كربمة: لا ي حبيبتى اتفضلى
مشيت ياسمين وذهبت الى غرفة خالد .... ياسمين: ازيك انا جاية اسلم عليكى
اروى: اها انا كويسة يلا بسرعة انجزى مفيش وقت كتير
ياسمين باندهاش: مش فاهمة قصدك ايه
اروى: يعنى دورى براحتك وانا هراقب المكان لان الولية اللى اسمها كريمة دى بتيجى ع سهوة ولو حست انى اتأخرت هتيجى ع هنا
ياسمين: ايه ده هو انتى ...........
اروى مقاطعة: ايوة عارفة كل حاجة والست لقاء هى اصلا اللى بعتتنى هنا يلا خلصى ولو سمعتينى بكح اعرفى انها جاية
بالفعل بدأت ياسمين بالتدوير ف كل انش داخل الغرفة وكانت اروى تراقب الصالة خوفاً من قدوم كريمة
ياسمين: مفيش حاجة هنا كده مش فاضل الا غرفتكم
اروى: مفيش فيها اى حاجة انا دورت فيها كويس قبل كده
سمعوا نداء كريمة فخرجوا مسرعين من الغرفة ودخلت ياسمين الى غرفتها واجرت اتصال بلقاء
لقاء: لقيتى حاجة
ياسمين: لا انا دورت كويس واسألى اروى
لقاء: طب وبعدين
ياسمين: هو مستحيل يحتفظ بفلوس كتيرة زى دى ف شقته اكيد شايلهم ف مكان تانى حركة غباء انك تدورى ف شقته
لقاء: بقولك ايه انا مليش فيه اتصرفى واعرفى المكان بنفسك
وقبل ان تجيب ياسمين اغلقت لقاء الهاتف ف وجهها تأفأفت بزهق وقالت: ربنا يستر
حل الليل سريعا وشعرت ياسمين بوجود شخص ما داخل الغرفة كادت ان تصرخ لكنه سريعا ما وضع يده ع فمها وعندما نظرت الى عينيه التى تعرفها جيدا هدأت واطمأنت
ف اليوم التالى صباحاً استيقظت ياسمين باكراً لتجد الجميع بالخارج
ياسمين: صباح الخير
خالد: صباح النور ...احم انا اسف بس هو كان فيه حد عندك امبارح بليل
ياسمين بتوتر وصوت مهزوز: حد ...حد مين وهيدخل ازاى اصلا
خالد: مش عارف يمكن كان بيتهيألى
ياسمين: اكيد طبعا ولو كان عندك شك كنت ممكن تخبط عليا عادى ع العموم انا النهاردة ان شاء الله همشى من هنا
خالد: تمشى تروحى ع فين
ياسمين: لازم اجيب حاجتى من الاوتيل ضرورى والاقى شقة انا مش هينفع افضل هنا اكتر من كده
خالد: انا دبرت ليكى شقة هنا ف العمارة الدور اللى تحتى ع طول عشان تكونى قريبة لو حصل حاجة لا قدر الله ولو ع حاجتك انا هعرف اجيبها بمعرفتى متشغليش بالك
صعدت اروى وقالت: انا جهزت الشقة ي استاذ خالد زى ما طلبت
ياسمين: ممكن انزل
خالد: طبعا اتفضلى خديها ي اروى
نزلت الى الاسفل وتركتها اروى وصعدت دقائق لتجد الباب يطرق ذهبت وفتحت وصعقت عندما رأته وقالت: كمال انت اكيد مجنون ووو...يتبع واتمنى تعملوا متابعة للصفحة بتاعتى فضلا وليس امرا
السادس
- كمال انت اكيد مجنون ايه اللى جابك تانى ولا انت مش هترتاح غير لما نتكشف
كمال: مين بس اللى هيكشفنا ولا هيكشفنا ازاى
ادخلته ياسمين واغلقت الباب وقالت: خالد شافك امبارح وانت عندى بالاوضة
كمال بصدمة: شافني ازاى
ياسمين: معرفش ان انت شخصيا لكن تقريبا حس او سمع لانه سألنى اذا كان فيه حد معايا امبارح ف الاوضة
كمال: وقولتيله ايه
ياسمين: حاولت اتوه الموضوع وقولتله مكنش فيه حد
كمال: وهو صدق
ياسمين: اعرف منين بس واضح انه مش سهل
كمال: بس انا واثق فيكى ي قلبى اى حد يدوب قصاد عيونك ولا ناسية اول يوم شوفتك فيه
ليعود بذاكرته الى اول يوم يراها فيه حين دخلت الى مكتبه لمقابلة عمل
ياسمين: السلام عليكم انا كنت جاية بخصوص اعلان الشغل
كمال وقد انبهر بها وبجمالها الخلاب: اهلا ممكن اشوف السى فى بتاعك
اعطته ياسمين الملف وقالت: هو الحقيقة انا مشتغلتش ف شركات قبل كده بس والله انا شاطرة جدا وبتعلم بسرعة
كمال: هنشوف ده ف فترة التدريب
وبدأت تتدرب عنده وتقرب منها وهو يخدعها بحبه دون علمها انه متزوج وحينما علمت وبخته وقررت البعد عنه لكنه اقنعها انه سوف يتخلى عن زوجته لكن يجب ان يؤمن مستقبله
ياسمين بانهيار: انت واحد كذاب ومخادع ضحكت عليا وفهمتنى انك بتحبنى وانت متجوز
كمال بحزن: ياسمين ارجوكى متظلمنيش انا فعلا حبيتك وده غصب عنى والله لان انا محبتش لقاء اصلا وخوفت تبعدى عنى لما تعرفى الحقيقة
ياسمين: انت كذاب وانا لا يمكن اثق فيك
كمال: طاوعينى بس المرة دى انا محتاج ليكى بجد اقفى جنبى حتى لو موافقتيش تكملى معايا بس صدقينى هأمنلك مستقبلك واعتبريه تعويض
ياسمين: اقف جنبك ف ايه وهتأمنلى مستقبلى ازاى ان شاء الله
بدأ كمال يقص عليها عن خالد وكيف ان لقاء تود ان تسترجع ميراثها منه وان خطتها ان تضع انثى بطريقه فسوف تكون ورقتها الرابحة
ياسمين: لا انت اكيد اتجننت انت عاوز تورطنى فى مصيبة
كمال: انا مقدرش اجازف بيكى انا فعلا بحبك وواثق انك الوحيدة اللى تقدرى
ياسمين: وهتقدمنى لمراتك ع انى مين ان شاء الله
كمال: انا مش هيكون ليا اى صلة بيكى انا هخليها هى اللى تتعرف عليكى وتطلب مساعدتك كمان
افاق من ذكرياته وقال: وبعدها لعبنا لعبتنا وهى صدقت انك واحدة متشردة ودخلتى اللعبة برضاكى
ياسمين:انت جاى ليه ي كمال
كمال وهو يقترب منها: جاى لانك وحشتينى اوى
ياسمين وهى تبعده: وفر ع نفسك اى كلام لانى لسه عند موقفى الموضوع هيخلص واخد حقى وهمشى ومش عاوزة اشوف وشك تانى
كمال: تمام ي ياسمين انا هسيبك تهدى بس واثق انى مش ههون عليكى
تقدم للباب فقالت: استنى عندك اما اشوف ليكون حد نازل
بالفعل امنت على الطريق وهو خرج اغلقت الباب وقالت: فعلا الطيور ع اشكالها تقع انت ومراتك متختلفوش عن بعض كتير
فى المساء كانت تجلس امام التلفاز حين دق جرس الباب قامت وسألت: مين
صوت من الخارج: انا خالد افتحى
فتحت الباب بابتسامة وقالت: اهلا اتفضل
خالد: اتفضلى دى حاجتك اللى كانت بالاوتيل
ياسمين: شكرا جدا ع تعبك معايا انا مش عارفة اقولك ايه
خالد: متقوليش حاجة يلا غيرى هدومك وتعالى عشان نتعشى
ياسمين: مفيش داعى
خالد: لا فيه يلا ده الاكل بيحب اللمة ودادة كريمة بتحضر الاكل وهيبرد وانتى اللى هتخسرى
بالفعل ابدلت ملابسها وذهبت الى الاعلى ووجدت الجميع على الطاولة بما فيهم اروى نظرت ياسمين باحراج واستغراب فقد ظنت انهما سيبقيان بمفردهم
خالد: انتى مستغربة عشان الدادة واروى معانا
ياسمين: الحقيقة يعنى اول مرة اشوف كده
خالد: دادة كريمة دى الست اللى ربتنى وغلاوتها من غلاوة امى واروى اه لسه جاية جديد بس بعتبرها اختى وف الاخر كلنا بشر
انزلت ياسمين رأسها خجلاً بالله كيف يكون ذاك الملاك هو ذاته الشيطان الذى يحاولان كلا من لقاء وكمال ان يجعلوه هكذا فى نظرها
خالد: تحبى تخرجى حاسك اتخنقتى من القعدة ف البيت
ياسمين: الحقيقة اه بس مكنتش عاوزة ازعجك واتقل عليك
خالد: ولا ازعاج ولا حاجة جهزى نفسك بعد العشا هاخدك جولة كده ف السريع
ابتسمت ياسمين وانهت طعامها سريعا ونزلت الى شقتها وارتدت اشيك فستان لديها ووضعت بعض المساحيق فكانت كالبدر ليلة تمامه نزلت للاسفل حيث كان خالد بانتظارها وما ان رأها ثبتت عيناه عليها قائلا بهيام: انتى جميلة اوى
خجلت ياسمين وقالت: شكرا هنروح فين
خالد: تحبى تروحى فين
ياسمين: معرفش اماكن هنا ممكن نلف بالعربية ونروح مكان ع النيل مثلا
بالفعل لبى خالد طلبها وذهبوا الى ممشى النيل وركبوا المركب وقاموا برحلة صغيرة وكانت ياسمين سعيدة للغاية وتأخر الوقت وقرروا العودة للمنزل وحينما وصلوا ونزلت ياسمين
خالد: بقولك
ياسمين: نعم
خالد: هو انتى عاوزة تروحى اوى يعنى
ابتسمت ياسمين: بصراحة لا بس عشانك انت
خالد: طب اركبى هو احنا متأخرناش اوى يعنى
صعدت بفرحة واخذها بسيارته ف جولة اخرى واثناء الحديث
ياسمين: هو انت حبيت قبل كده
خالد واغمض عينيه: كنت وياريت نقفل الموضوع
تمضى الايام وتتقرب ياسمين من خالد اكثر وترى فيه من الطيبة واللين ما لم تراه ف غيره كانت دائما تنظر إليه بحب وفى يوم طلب منها خالد ان تذهب معه ف عشاء خاص ووافقت ووصلت الى مطعم فاخر
ياسمين: ايه المطعم الغريب ده
خالد: ده مطعم سوشى بصراحة انا مجربتوش قبل كده بس حبيت تبقى اول مرة معاكى
طلبوا الطعام وجلسوا سويا ....خالد: هتعترفى ولا اعترف انا
ياسمين بخوف: اعت ...اعترف بايه
خالد: انك معجبة بيا زى ما انا معجب بيكى وووو..
السابع
ـ انك معجبة بيا زى ما انا معجب بيكى ويمكن اكتر كمان
ياسمين بصدمة: معجب بيا انا
خالد: دى الحقيقة اللى حاولت اخبيها كتير ومقدرتش من اول يوم شوفت عيونك فيه وانا حاسس انى مخطوف فيكى حاجة غريبة تجذب اى حد من عقر قلبه ليكى وانا بعترف انى واحد منهم مع انى اخر واحد ممكن يفكر ف الحب ويثق فيه من تانى
دمعت ياسمين يا الله ما هذا الاختبار القاسى عليها كم تمنت ان تجد الحب ويوم ان تلقاه يكون ممن تلعب به
خالد: ساكتة ليه لو مشاعرك ليا عكس احساسى متخبيش وقولى
ياسمين مسرعة: بالعكس ان اللى جوايا ليك اكبر بكتير من مشاعرك بس ..........
قاطعهما النادل الذى جاء بالطعام والذى يبدو شهيا جدا وبعد ان ذهب
ياسمين: خالد هو انا ينفع اقولك ع حاجة
خالد: طبعا ينفع بس بعد الاكل لانى بصراحة جعان اوى ولما بكون جعان مقولكيش بتحول والله
ابتسمت ياسمين ولم تستطع الاكل بالعصا ولاحظ خالد ذلك فبدء هو باطعامها تحت نظرات الموجودين ممن يتهامسون باعجاب عنهم وبعد الانتهاء ذهبوا لرقصة جميلة وبعد الانتهاء وتصفيق الجميع اخذها خالد لمكانها المفضل فى ممشى النيل
خالد: تعرفى انى اول مرة من حوالى سنة اضحك من قلبى بجد
ياسمين: هو انت لسه بتحبها
خالد: مفيش داعى نفتح ف مواضيع اتقفلت المهم دلوقتى انتى وبس
نظرت ياسمين الى النيل وقالت: خالد هى لو رجعت تانى ممكن تسامحها
خالد: اسامحها تفتكرى ينفع اسامح ف كسرة قلبى ووجعى وذللى قصاد الناس اسامح اكتر حد وثقت فيه ف الدنيا وامنته ع قلبى وحياتى وجزائى منها انها خدعتنى وغشتنى انا مستحيل اسامح شخص كذب عليا ولعب بقلبى وثقتى
دق قلب ياسمين لتنزل دموعها بوجع وحزن ليمسك خالد وجهها ويمسح دموعها: مش حابب اشوف دموعك
ياسمين: خايفة
خالد: من ايه
ياسمين: من ان يجى اليوم اللى تسيبنى فيه
خالد: مقدرش انا ما صدقت روحى ترجعلى تانى وانتى السبب
ياسمين: انت عارف ان كلنا بنغلط صح وساعات الظروف بتجبرنا نعمل حاجات غصب عننا والحوجة والظروف بتكون اقوى مننا
خالد: مش فاهم قصدك ايه
ياسمين وهى تحتضنه: اقصد انى والله بحبك ي خالد اوى ارجوك متزعلش منى لو جه يوم وعملت اى حاجة تزعلك منى
خالد: مستحيل ازعل منك انتى روحى اصلا
وفى قرارة نفسها تقول: وتسامحنى بالله
خالد: متعرفيش انا فرحة الدنيا كلها فيا دلوقتى حاسس ان ربنا بعتك ليا ف الوقت ده عشان تعوضينى عن كل اللى شوفته
ياسمين: طب مش يلا بقى نروح الوقت اتأخر وانت عندك شغل بدرى
تمضى الايام ويزيد تعلق خالد بياسمين اكثر فأكثر وكانت تود ان تبوح له بالحقيقة لكن الخوف من خسارته يلجم لسانها وفى يوم كانت فى ضيافة لقاء اخذتها على جانب اخر وحدهما
لقاء: ها لقيتى الفلوس ولا لسه
ياسمين: لسه والله بحاول على اد ما اقدر ولا تحبى اروح اسأله مباشر
لقاء: اسمعى انتى شكلك استحليتها
ياسمين: هى ايه دى اللى استحليتها تقصدى ايه بالظبط
لقاء: لا انتى فاهمانى كويس اوى انا قصدى ايه عايشة بشقة متحلميش بيها اغلى لبس واحسن اكل وحلويات وشاب وسيم واقع ف حبك وبيعمل المستحيل عشانك بس شكلك صدقتى اللعبة وانك بنت ناس فعلا
ياسمين بحزن: انا فعلا حبيت خالد جدا ومن قبل ما اعرفك اصلا لكن انا فعلا لسه معرفتش مكان الفلوس فين
لقاء: تمام معاكى اسبوع واحد مفيش غيره لو معرفتيش طريق الفلوس وقتها صدقينى ههد المعبد فوق أصحابه وعليا وع اعدائى
اقترب خالد وقال: جرى ايه احنا جايين عشان نقعد مع بعض مش عشان كل واحد يبقى فى ناحية ولا ايه ي عم كمال
كمال: معليش بقى ي صاحبى مشافوش بعض بقالهم فترة وانت عارف حكاوى الستات مبتخلصش
لقاء: بقى كده ي كراميلا ماشى اتفقتوا علينا
كمال: مقدرش ي روحى انتى
خالد: طيب بما اننا كلنا متجمعين انا اخدت قرار مهم جدا
لقاء: خير ي حبيبى
خالد: انتم بقالكم فترة بتذنوا عليا عشان انسى اللى حصلى وابدء حياتى من اول وجديد وان مش كل الناس زى بعضها وانا كنت دايما بقولكم ان شاء الله واكبر دماغى لكن دلوقتى الوضع اختلف واخيرا لقيت اللى خطفت قلبى ورجعتلى الحياة من تانى
صدم الجميع بما فيهم ياسمين حين وجدته جث على ركبتيه امامها واخرج خاتم فخم قائلا: تقبلى تتجوزينى
وقع كأس المياه من يد لقاء وقالت: انت بتقول ايه ي خالد لا طبعا مينفعش
خالد باندهاش: هو ايه بالظبط اللى مينفعش
لقاء بتوتر: اقصد يعنى انتم متعرفوش بعض كويس فمفيش داعى تتسرعوا
خالد: ما انا عشان كده بقول نتخطب حاجة ف العلن وبعد كده نحدد ميعاد الفرح
ياسمين: طيب عن اذنكم بس عاوزة ادخل الحمام
اخذت لقاء خالد ع جنب وقالت: انت مجنون انت تعرفها اصلا
خالد: انتى بتتكلمى وكأنها واحدة غريبة دى صاحبتك وانتى اللى معرفانى عليها
لقاء بتوتر: ايوة بس ...بس دى حوارتها كتير اوى مع اهلها وهما مش ساهلين وانا خايفة عليك
خالد بتهكم: بجد خايفة عليا
لقاء بصدمة: اكيد طبعا ليه بتقول كده؟
خالد: امممم انا فيه حاجة مهمة اوى عاوزك تشوفيها بنفسك
لقاء: حاجة ايه
جذبها خالد من ذراعها قائلا: متعمليش صوت وتعالى ومعايا
اخذها معه داخل الفيلا واقتربوا من الحمام ....كمال: انتى عملتى ايه عشان يجى يطلب ايدك
ياسمين وهى تبعد يده عنها: ابعد ايدك دى عنى واوعى تفكر تلمسنى انت فاهم وحياتى الشخصية ملكش دعوة بيها
خالد: انتى بتاعتى وملكى ولا نسيتى ان انا اللى جيبتك وعرفتك ع لقاء وكل ده عشان بس تكونى جنبى ووووو.....يتبع فضلا وليس أمرا متابعة لصفحتى❤️
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺