رواية حبيبي المدير الفصل الثامن والعشرين بقلم الكاتبه شيماء صبحي حصريه وجديده على مدونة أفكارنا
 |
رواية حبيبي المدير الفصل الثامن والعشرين بقلم الكاتبه شيماء صبحي حصريه وجديده على مدونة أفكارنا
حمزه بص لحنين بصدمة وقال بتساؤل: حبيبك! هو انتي متجوزة كمان؟
حنين قالت باعتراض:لا مش متجوزة، انا قصدي حموزه حبيبي دا قالت كلامها وهيا بترفع ايد اخوها الصغير قدامه وبتكمل كلامها وبتقول:اخويا برضوا إسمه حمزه..
حمزه بص للطفل اللي باصص عليه ومبتسم وابتسمله وبعدها رفع وشه تاني ليها وبصلها وقال:هي حنين دي منقذتي يا جماعه؟
انتبه ماهر واحلام لكلامه بدهشه لأن محدش كان قاله لسا علي موضوع تبرع الدم فحرك ماهر راسه وقال:بتسأل ليه يا حمزه؟
حمزه بص لحنين وابتسم وقال:شوفتها في حلمي بتساعدني بس مكانش باين ليها ملامح بس انا متأكد انها نفسها البنت !
حنين خجلت من كلامه واتوترت جدا فماهر حرك راسه بالموافقه وقال:احلام ساعدتك الاول وبعدها حنين يعني انت دلوقت نص دمك نسائي !
حمزه بصلهم بصدمه وقال :يعني ايه يا عني دمي نسائي يعني انا كدة هتحول لأنثي ولا ايه ؟
ضحكت حنين علي كلامه غصب عنها وهوا وقتها تاه في جمال ضحكتها وقال:يا نهار ابيض هو في كدا.
انتبهت احلام لكلام حمزه ونظراته لحنين فقالت وهيا بتقف جمب حنين وحمزه الصغير:انا وحنين دمنا نفس فصيلتك ويشاء القدر يا حمزه ان احنا الثلاثه بنمتلك فصيلة نادرة مش بيمتلكها غير٤٣ شخص بس علي مستوي العالم!
اتفاجئ حمزه من كلامها وبص لحنين وقال وهو بيحاول يستغل اي وقت في انه يناظرها :فعلا!
حركت حنين راسها بالموافقه وهوا بص لخاله وقال:شوفت بق يا خالي انا محظوظ ازاي!
ابتسم ماهر علي كلامه وقرب منه حضنه وهمس في ودنه وقال: انا مبسوط انك بقيت بخير يا حبيب خالك ..
حمزه بصله بحب ومسك ايد ماهر وقال:مكنتش متوقع بصراحه اني لما اصحي الاقيك جمبي وخايف عليا بالشكل دا؟
ضربه ماهر بخفة علي كتفه بزعل من كلامه وقال:انت بتقول كدا علشان تعرف غلاوتك عندي ولا ايه؟
بصله حمزة وابتسم بحب وحرك راسه بالموافقه وماهر بص لاحلام بحب كبير لانها مسبتوش لحظة من وقت ما حمزه عمل الحادث وقال وهو بيوجه كلامة لحمزه :عايز ابشرك ان احلام بقت رسميا عايشه معانا في القصر.
حمزه ابتسم بفرحه وحرك راسه بحماس واحلام ابتسمت علي رد فعله وفرحت من قلبها انه متقبلها … ولاكن حمزه قطع ابتسامتها لما قال بتساؤل وهو بيبص لخاله :صحيح يا خالي هو انت لحقت تحب احلام امتي وتتجوزها دا انت من كام يوم بس مكنتش طايقها ولا طايق تسمع اسمها؟
احلام اتفجأت من كلام حمزه فبصت لماهر بدهشه وماهر بص لحمزه بغيظ وقال بهمس:بتقول ايه يا حيوان انت بوظت الدنيا؟
حمزه باستغراب:هو انا عكيت الدنيا ولا ايه انا بس بسأل لاني مستغرب يعني جوازكم اللي جه بسرعه دا؟
حنين كانت بتبص لحمزه ومركزه معاه لانها بدأت تحس احساس غريب اتجاهه اول ما شافته واول ما لقته بيبص عليها نزلت عينيها بسرعه بخجل وحمزه حرك عينيه عنها وبص لاحلام وكمل كلامه وقال:انتي مش هتحكيلي الحكايه ولا ايه يا احلام؟
احلام بتساؤل:حكاية ايه؟
حمزه بابتسماه:حبكوا؟
احلام بضيق:انت في ايه ولا في ايه يا حمزه حكاية ايه اللي هحكيهالك وانت في الوضع دا؟
حمزه بدهشه من كلامها :انا بخير علي فكره هو انتي فاكرة اني يعني تعبان وكده استني بس دانا هقوم اطنطت دلوقت اهو دانا متعود علي الضرب ياعني دي مش اول مره؟
ضحك حمزة الصغير بقوة وهوا بيشوف حمزه الكبير بيحاول يقوم ولاكن مقدرش فبصلهم حمزه وقال باستسلام:خلاص انا هأجل الحكايه لحدما ابق كويس..
حنين انتبهت لاخوها وابتسمت علي ضحكته وحمزه بص عليها وقال بهمس :ياه متحرمش من الضحكة القمر دي..
ماهر بص لحنين ورجع بص لحمزه وقال بهمس:ايه يا قلب خالك تحب اقولها انت شغلتك ايه في الحياه..حمزه بصله بانتباه وقال: بتقول ايه ايه يا خالي انا توبت من الحجات دي …كمل كلامه بضحك وقال..بس دي مختلفه عنهم بصراحه؟
ماهر بشك:توبت !!انت هتقولي..
حنين انتبهت ليهم فحمزه حب يغير الموضوع بسرعه علشان متفهموش غلط وقال:صدقني خلاص انا بعدت عنهم من زمان!
ماهر لاحظ توتره من ان حنين تعرف ماضيه فقال بصوت واضح:اومال مين ديدي الفرتيكه دي اللي كنت بتكلمها لمدة ساعه قبل الحادثة!
حمزه بلع ريقه وقال بتوتر :دي ..دي واحده فقيرة بعطف عليها؟
ماهر حرك راسه باستسلام من حركاته وبص لاحلام اللي لسا بصاله بغيظ فقرب منها وقال:ايه انتي هتصدقي كلامه برضوا وبعدين هوا يعرف ايه عن حبي ليكي علشان يفكر بالشكل دا!
احلام سابته بزعل وخرجت برا الاوضه وهوا خرج وراها ووقتها حنين كانت واقفه وساكته وحمزه كان مش مصدق نفسه وانه لواحده معاها في الغرفه فقبل ما يتكلم ويغازلها لقي اللي بيقرب منه وبيقول بصوته الطفولي:عمو؟
حمزه نزل عينيه برفع حاجب وقال:ايه يا قلب عمو؟
حمزه الصغير بتساؤل:هو انت تعبان؟
حمزه بص لحنين اللي واقفه تبص لاخوها بدهشه من كلامه فحمزه قرر يرد علي الطفل وقال:لا يا حبيبي دا انا عامل وشم ..دا مش ورم خالص ؟
حنين ابتسمت بخجل من كلامه ولاكن اخوها مكتفاش بسؤاله دا وسأل حمزه تاني وقال وهو بيشاور علي دراعه المتجبس:طب ودا ايه ؟
حمزه باستغراب :دا..الطفل حرك راسه بالموافقه وحمزه رد عليه وقال:مفيش دا جبس بيجربوه علي ايدي؟
الطفل ابتسم وقال:ممكن آلمسه ؟
حمزه حرك راسه بالموافقه وهو مستغرب اسألته الكتيره وكأنه اول مره يشوف حد تعبان.. فالطفل لمس الجبس وضغط عليه ولما لقاه ناشف قال بدهشه:دا قوي اوي؟
حمزه حرك راسه بالموافقه والطفل لمس وش حمزهالوارم فجأة بقوه وقال:ودا قوي برضوا؟
حمزه بصراخ:ااااااااه؟
حنين مسكت اخوها بسرعه وبعدته عن حمزه اللي بيتألم ووقتها ماهر واحلام رجعوا علي صوت صراخه فأول ملاقوه بيبص للطفل بغيظ وماسك وشه بايديه التانيه وبيحاول يخفف الوجع سلله ماهر بقلق وقال:في ايه يا حمزه بتصرخ كدا ليه!
حنين بصتلهم بخجل وقالت بتوتر:احنا لازم نمشي لان ماما هتخرج النهارده ولازم نروح معاها؟
حمزه اول ما سمع كلامها نزل ايديه وهدل ملامح وشه كان محصلش حاجه واستني رد ماهر عليها واللي قال:طيب استني يا حنين هنيجي نوصلكم بعربيتنا؟
حنين برفض:لا متتعبوش نفسكم احنا هنتصرف..
لان احلام عارفه وضعهم قربت منها وقالت:مفيش تعب ولا حاجه دا أقل حاجه نعملها علشانكم ..
حنين ابتسمت وحركت راسها بالموافقه وقالت:طيب انا هروح ابلغ ماما وهنستناكم تحت!
احلام حركت راسها وحنين مسكت ايد اخوها وخرجت بسرعه من الاوضه وماهر قرب من حمزه وقال:مقولتليش كنت بتصرخ كدا ليه.
حمزه بحزن:هو انا صرخت !
ماهر:ايوا انا سمعت صوتك!
حمزه باعتراض وهوا ضامم حاجبه بحزن:لا مش انا؟
ماهر حرك راسه بالموافقة وقال:يعني انت كويس؟
حمزه حرك راسه وماهر بص لاحلام وقال:طيب احنا هنروح بسرعه نوصل حنين ووالدتها وهنرجع علي طول وبالمره هجبلك لبس بدل اللي عليك دا؟
حمزه بص لهدوم المستشفي وحرك راسه بالموافقه وبعدها قال:طيب يا خالي ؟
ماهر بص لاحلام وشاورلها يخرجوا وبعدها اتحركوا وسابوا حمزه لواحده فى الاوضه متضايق لان حنين مشيت وهوا كان نفسه تقعد معاه شويه كمان.
__________
وقت ما احلام وماهر كانو ماشين في اتجاه غرفة والدة حنين سألت احلام ماهر واللي واضح علي ملامحه الضيق وقالت: هو انت عرفت ايه اللي حصل لحمزه؟
ماهر حرك راسه وقال بضيق :عرفت انها حادثة مدبره بس مين بق اللي عملها لسا مش عارف؟
احلام شعرت بتوتر لان ياسر جه في بالها علي طول فبصتله وقالت بتساؤل :هو لو انت عرفت مين الشخص دا هتعمل فيه ايه؟
ماهر غمض عينيه للحظة وهوا بيستشعر كل الغضب اللي حاسس بيه وقال:هيكون ليلة امه سوده علي دماغه علشان فكر يأذيه؟
احلام خافت من كلامه لان شكله اتغير في اللحظه اللي فتح عينيه فيها تاني وكان واضح علي ملامحه انه مش هيسيب اللي عمل الحادث دا لحمزه غير لما ينتقم منه اقسي الإنتقام فقررت احلام انها تغير الموضوع بسرعه لما لقت انهم وصلوا لغرفة والدة حنين ..
______________
فلاش باك من ثلاث ايام؟
في قسم الشرطة كان الظابط قاعد علي مكتبه وواقف قدامه قاسم وواقف وراه اهل المنطقة.
الظابط بتساؤل:ضربت مراتك ليه يا قاسم؟
قاسم بتوتر:مضربتهاش يا باشا دي هيا اللي خبطت نفسها وبتتبلي عليا؟
الظابط برفع حاجب:بتتبلي عليك ازاي وليه تعمل كدا اشرحلي وانا سامعك ؟
قاسم رفع حاجبه وبص حواليه وقال:لمؤاخذه يباشا انا اكتشفت انها علي علاقه براجل غيري وعلشان مفضحهاش عملت كل القصه دي علشان تداري علي نفسها؟
الظابط بصله بشك وقال :والناس دي كلها بيتبلوا عليك هما كمان ولا ايه اصلهم بيقولوا انهم دخلوا عليك وانت بتتهجم عليها!
قاسم بص لاهل المنطقة بضيق وقال: يا يباشا دول ناس كدابه متصدقهمش بيحبوا الفاض/يح زي عينيهم ؟
اهل المنطقة اتصدموا من كلامه وكانوا هيعترضوا ويردوا عليه ولاكن الظابط رفع ايديه بيمنعهم وبص لقاسم وقال:وبنتك يا قاسم كدابه برضوا؟
قاسم بتوتر :بنتي؟
الظابط بجديه:ايوا بنتك اعترفت عليك وقالت ان دي مش اول مرة تضربهم وتعتدي علي امها وانك علي طول بتعمل كدا وأكتر؟
قاسم بغضب:البنت دي طالعه لأمها بتعشق الكدب يا باسا هقول ايه بس دي واحده فاج/ره مستني بنتها تطلع ايه غير..
الظابط اتضايق من كلام قاسم علي اهل بيته وكدبه عليه فقرب منه مسكه من هدومة وقال بتهديد:وحياة امك يا قاسم منت طالع منها علشان كدبك دا ..
الظابط نده علي العسكري وقال:ابعتلي يا بني الدكتور بتاعنا خليه يشوفلي الاستاذ دا مبلبع ايه ؟
العسكري مشي وقاسم بص للظابط بتوتر وقال:انا كويس اهو يا باشا انا مش شارب حاجه!
الطابط ضم حاجبه وقال:هو انا قولت ان انت شارب لا سمح الله وبعدين مالك اتوترت ليه هو انت بتشرب حاجه ولا ايه يا قاسم؟
قاسم بتوتر:لا يا باشا لا سمح الله انا سليم؟
واحد من اللي واقفين اتكلم وقال بغضب :ياباشا متصدقوش دا راجل كداب وعايش كده فرده علي الناس وسايب مراته تصرف عليه وتاكله ومش عاجبه كمان اللي هيا بتعمله ورايح يضربها !
قاسم بص للراجل دا بغضب وقبل ما يغلط فيه حظرة الظابط وقال:سكوت محدش يتكلم غير لما يستأذني الاول.. قاسم لف وشه بضيق وبص للظابط واللي قال:انت صحيح بتشتغل ايه يا قاسم!
قاسم غمض عينيه بضيق وقال:بشتغل ايه!
الظابط حرك راسه وهو مركز معاه وقاسم قال:مش بشتغل دلوقت ؟
الظابط:يعني كنت بتشغل ايه قبل دلوقت عايز اعرف؟
قاسم :مش بشتغل في حاجة يباشا بس انا مش عويل انا بس واخد راحه ؟
الظابط حرك راسه بتفهم وبعدها بص للناس اللي واققه وقال:بعد اذنكم اتفضلوا ارتاحوا برا لحد ما الدكتور يكشف علي البيه..قال كلامه وهو بيشاور علي قاسم بسخريه واللي بدأ جسمه يعرق من التوتر؟
اهل المنطقه خرجوا برا والدكتور دخل للغرفه وهوا معاه جهاز بيعرف من خلاله نسبة الهروين اللي في الدم وأول ما قرب من قاسم ..قاسم بدا يتوتر اكتر وزق الدكتور بغضب وبعده عنه وقال:انا مفييش حاجه انا كويس.
الظابط شاور للعسكري يكتف قاسم وبالفعل قدر العسكري يمسك قاسم بقوة ويكتفه لحدما الدكتور يكشف عليه ويشوفه وبعدما انتهي الدكتور وظهرت النتيجه علي الجهاز وراها للظابط بسرعه واللي فتح عينيه من الصدمة وقال:كويس ازاي يا قاسم وانت واصل للمرحلة الثالثه من الادمان.. قاسم حرك راسه برفض وقال :انا كويس مش بشرب حاجه…الظابط قرب منه وقال وهوا بيمسكه من هدومة: انت لسا مصدق اني هاخد بكلام واحد مدمن زيك يلا ؟
قاسم برعب:مضربتهاش ..دي بتتبلي عليا صدقني انا بريئ؟؟
الظابط بص للعسكري وقال:وديه علي الحبس وابعت اعرفلي اخبار مراته اللي اعتدي عليها ايه في المستشفي.
العسكري حرك راسه بالموافقه ومسك قاسم وخرج من غرفة الظابط وبعدها الظابط شكر الدكتور والدكتور مشي وبعدها خرج الظابط علشان يبلغ اهل المنطقه ان قاسم هيشرفهم في الحبس ثلاث ايام وبعدها هيتعرض علي النيابه.
وفي المستشفي وبعدما حنين اتبرعت لحمزه كان جسمها ضعف جدا فقرب منها الدكتور وركبلها محلول وبلغ ماهر و احلام انها ضعفت بسبب الدم اللي اخدوه واحلام فضلت جمبها طول الليل علشان تطمن عليها ووقتها الدكتور اللي كان مسؤل عن العمليه لحمزه خرج وبلغ ماهر ان حمزه عدي مرحلة الخطر الحمدلله بس ممكن ياخد اكتر من يوم لحدما يفوق لان تأثير الحادث أثر علي عوامل كتير ومن ضمنها الذاكره فوقتها خاف ماهر عليه جدا لان بتجربته مع فقدان الذاكره ممكن ينساهم فخاف جدا وبق يدعي ان حمزه يكون بخير؟
وتاني يوم صحيت حنين ولقت ان احلام نايمه جمبها علي الكرسي وهيا ماسكه جامد في ايديها ،،فاستغربت انها نامت هنا ونسيت اخوها ووالدتها فاتحركت بسرعه علشان تخرج من الاوضه ولاكن بسبب انها اصدرت صوت وهيا بتقوم احلام فاقت وقالت بنوم :انتي كويسه يا حنين..رايحه فين؟
حنين بتوتر:هطمن علي والدتي واخويا؟
احلام حركت راسها وقالت بتساؤل :هيا مامتك هنا؟
حنين حركت راسها بهدوء وقالت:ايوا ماما موجوده في غرفة الطواريء تحت !
احلام:طيب استني انا هاجي معاكي؟
حنين:متتعبيش نفسك وانا هروح اطمن عليهم انا؟
احلام حركت راسها بالرفض وقالت:لا استني انا هاجي معاكي!
وافقت حنين واحلام قامت وعدلت هدومها وطرحتها وبعدها بصت لحنين وقالت:يلا بينا؟
خرجت حنين الاول وبعدها احلام من الغرفه وكان وقتها ماهر ومنعم واقفين وبيتكلموا برا ..
ماهر قال وهوا بيتكلم مع منعم :يعني مفيش اي تسجيلات لاي كاميرا قريبه في المكان اللي حصل فيه الحادث؟
منعم:فيه ياباشا بس اللي ظاهر عربية نقل سواقها خافي وشه والعربية بدون نمر؟
ماهر اتضايق وقال:دي مش مجرد حادثة دي تبق محاولة قتل؟
منعم حرك راسه بالموافق وقال:دا نفس كلام فريق الجنايات يا فندم لانهم بعد التحقيق اللي عملوه اكتشفوا ان كل حاجه متدبرة ان يحصل الحادث دا وبالطريقه دي في نفس المكان.
ماهر بدا يتضايق ويتعصب اكتر واحساس الغضب والانتقام كان مالي قلبه وقتها فبص لمنعم وبلغه يستمر ويحاول يجيبله اي معلومه جديده وهوا هيدور معاهم بنفسه علشان يوصل برضوا لاي خيط يساعده ..
وقتها احلام قاطعت كلامهم و بصت لماهر وقالت:هروح مع حنين نطمن علي والدتها لانها طلعت مريضه وموجوده هنا في المستشفى .
ماهر بصلها وحرك رأسه بالموافقه وقال :استني انا هاجي معاكي اطمن عليها!
حنين بصتله بخجل وحاولت تمنعه ولاكن ماهر أصر يروح يطمن علي والدتها ويعمل الواجب…
فبص ماهر لمنعم وطلب منه يستناه لحدما يرجعله ويكملوا كلامهم ..وبعدها اتحرك ماهر واحلام وجمبهم حنين واتجهوا للغرفة اللي فيها والدتها..؟
واول ما وصلوا لغرفة نورا..حنين قربت منها بلفه وكانت نورا وقتها كان ملفوف علي دماغها شاش ابيض مكان الخياطه ..
حنين قالت بلهفه وقلق :انتي كويسه يا ماما.
نورا بابتسامه:ايوا يا حبيبتي الحمدلله.
حنين بصت لماهر واحلام وقالت بخجل :الاستاذ ماهر ومراته احلام جايين يطمنوا عليكي ياماما!
نورا بصتلهم وقالت بشكر:كتر خيركوا اهلا وسهلا!
قربت احلام من ايد نورا ومسكتها وقالت بلطف: ألف سلامة عليكي يا ام حنين !
نورا ابتسمت وحركت راسها بهدوء وردت عليها:الله يسلمك ياحبيبي …ابتسمت احلام وبصت لماهر واللي قال وهوا بيقرب منهم خطوه :حمدلله علي سلامتك ان شاء الله تكوني بخير وتقومي بالسلامه ؟ ..
نورا بابتسامه لطيفه :ان شاء الله ..اتفضلوا ارتاحوا متقفوش..ماهر بصلها وقال:لا متشيليش همنا احنا كدا كويسين..احلام حركت راسها بالموافقه علي كلامه ووقتها نورا كانت بتبصلهم وهيا بتسأل نفسها مين دول وليه جايين يطمنوا عليها لانها اول مره تشوفهم فقررت تأجل سؤالها لبنتها بعدين ووقتها افتكرت جوزها وانه ممكن يكون جايلها في الطريق فبدأت ايديها ترتجف وهيا بتقول بخوف :هو..قاسم .. ابوكي فين يا حنين !
حنين قربت من والدتها وقالت بقلق :في القسم يا ماما اتحبس بعدما اعتدي عليكي وجيرانا معاه !
ضمت نورا بنتها لحضنها وهيا بتبكي وبتقول:يارب ما يخرج علشان نعيش في راحه بق.
ماهر بص لوالدة حنين وقال:انا اسف لو سؤالي هيضايقك بس هوا اللي عمل فيكي كدا يبق جوزك؟
نورا حركت راسها بحزن وخجل منه وقالت:للاسف ايوا جوزي !
ماهر بص لاحلام واللي كانت حزينه من اللي بتسمعه فقال وهوا بيبص لوالدة نورا:انا ممكن اساعدكوا واوصي عليه ظابط حبيبي يتوصي بيه في القسم ويديله كام سنه محترمه؟
نورا اتفجأة من كلامه وقالت بتردد:بس دا والدهم وانا خايفه عليهم؟
حنين بصت لمامتها بحزن وبصت لماهر وحركت راسها بالموافقه علي كلماه وقالت بلهفه :ارجوك يا استاذ ماهر لو تعرف تعمل كدا احنا موافقين مش انت قولتلي تقدر تنفذ لي اي طلب اطلبه منك ..ماهر حرك راسه بالموافقه وهيا كملت كلامها وقالت:دا بق هيكون طلبي..
ماهر زعل من وضعهم واحلام قربت من حنين وقالت بجديه:انا عارفه ان ممكن تكوني بتكرهيه بس انتي واثقه انك عايزاه يتسجن فعلا؟
حنين للحظة افتكرت شكل والدها وهوا متهجم عليهم فجسمها ارتعش بخوف وقالت ببكاء:ايوا عاوزاه يتسجن انتي مش عارفه احنا بسببه عايشين ازاي وبنتحوج للي يسوا واللي ميسواش ..انا لو قولتلك سبب الخناقه دي كلها علشان خاطر ايه مش هتستوعبي..
احلام حضنتها وطبطبت عليها بحنيه وقالت بهدوء :الواضح كدا ان اللي بيأذونا فعلا هما اقرب الناس لينا..قالت احلام كلامها بحزن علي حالة حنين وحالها فبصت لوالدتها وقالت:ماهر جوزي يقدر يعمل زي ما قالك بس انتي فعلا عايزاه يتسجن وميخرجش!
غمضت نورا عينيها بآلم ولما فكرت في نفسها وفي عيالها وبالذات حنين اللي كانت بتتعرض للتنر بسببه داست علي قلبها بقسوة و حركت راسها بالموافقه وقالت:ايوا عاوزاه يتسجن..
ماهر حرك راسه بتفهم وقال:متقلقوش انا هتصرف واوعدكم اني هعمل كل اللي اقدر عليه علشان ياخد العقاب اللي يستاهله ..قوليلي اسمه ايه بالكامل وانا هتصرف؟
نورا بصت لبنتها وابنها بحزن وبصت لماهر وقالت:قاسم فؤاد الدهشيري؟
ماهر طلع تيلفونه وكتب الاسم عليه وبصلهم وقال:طيب انا هتصرف بس دلوقت انا هنقلك تكملي علاجك في مستشفي تبعي وطبعا احنا تحت أمرك في اي حاجه تحتاجيها؟
نورا حركت راسها بخجل من كلامه وقالت:تسلم يا استاذ متحرمش من اهتمامك..
حنين بصتلهم بابتسامه لانهم ناس كويسين فبصت لوالدتها اللي باين عليها الخوف والحزن وطبطب عليها وقالت:احنا هنفضل هنا لحدما ماما تخلص علاجها متقلقوش علينا!
ماهر خرج راسها بتفهم وقال:انا يهمني راحتكوا اللي انتوا عاوزينه!
حنين ونورا ابتسموا برضًا وبعدها ماهر بص لاحلام واستأذنهم يمشوا علشان وراهم حجات هيعملوا وبعدما حنين ومامتها وافقوا خرجوا الاننين من غرفتهم واتجهوا لغرفة الدكتور اللي متابع حاله حمزه وسألوه لو ينفع ينقلوا حمزه لمستشفي تانيه خاصه ولاكن الدكتور بلغهم انهم مش مقصرين مع حمزه وبيعملولوه كل اللازم لانه متوصي عليه جامد وبلغوه انه لسا مفاقش وانهم لو نقلوه ممكن يضروه فقرر ماهر يسيبه في المستشفي الحكوميه لحدما يفوق وبعدها بص لاحلام واستأذنوا من الدكتور وخرجوا فقرر ماهر انه يروح بيتها علشان يجيب حاجتها وينقلوها للقصر وبعدها فعلا اتحركوا وماهر بلغ منعم يفضل مع حمزه لحدما هوا يرجع ووصاه يكون عينيه في المكان ويبلغه باي حاجه تحصل حتي لو الدكتور دخل يطمن عليه ومنعم حرك راسه بالموافقه وبلغه انه يطمن وميقلقش وماهر وافق وقفل التيلفون وبص لاحلام اللي قاعده في العربيه سرحانه وقال:انتي كويسه يا احلام!
احلام بصت لماهر وقالت بتعب واضح في صوتها:الفتره دي حصلت فيها حجات كتير اوي لدرجة اني مش عارفه احزن علي ايه ولا ايه؟
ماهر لمس خدها بلطف وقال:متزعليش وتماسكي واوعدك ان كل حاجه هتكون بخير؟
احلام سندت براسها علي صدر ماهر لانها محتجاه جدا وماهر كان برضوا محتاج لحضنها لانه ضايع زيها بالظبط..
عدي دقايق وهما علي نفس الوضع لحدما احلام انتبهت لنفسها وبلغته يتحرك علشان ميتأخروش أكتر ويخلصوا كل حاجه بسرعه وماهر حرك راسه واتحرك بالعربيه …..
__________
في شركة ياسر كان قاعد مع مستثمر مصري قدر يتواصل معاه بسبب يوم الحفله وكان ياسر بيعرض عليه يستثمر في شركته وبيعرض عليه المشاريع اللي شغال عليها والمستثمر انبهر منها وقرر يوافق وفعلا مضوا العقود مع بعض وبعدما خرج المستثمر من الشركة كان وقتها وصل مستثمر تاني وكان ياسر مبسوط بنجاح خطته وبدأ يمضي معاه عقد وانتهي اليوم معاه بحصولة علي مبالغ كبيرة من المستثمرين وبلغ الشركة الايطالية ان الشحنه علي وصل وانهم يجهزوا فلوسهم ووقتها الشركة الإيطاليه بعتوله رساله ان فلوسه هتوصله يوم الاستلام ..
ياسر افتكر كلام احلام ليه وانه لازم يحرص وميثقش فيهم فقرر يبعتلهم انه لازم ياخد نص المبلغ قبل الاستلام لانهم لحد دلوقت مضوا العقود فقط ولاكن محصلش ياسر علي اي فلوس ..
وبسبب الرساله اللي بعتهلهم الشركة بعتتله بالفعل نص الفلوس علي حساب شركته ووقتها ابتسم ياسر لانه حصل علي كل اللي كان عايزه فرجع لبيته وهوا حاسس بسعاده كبيره ووقتها شاف مامته واللي قاعده مع رجال واعمال وبيلعبوا قمار علي مبلغ مقداره ٥مليون دولار وكان المبلغ دا نص ثروة والدته فاتصدم وقرب منهم وقال بغضب:ايه اللي بتعمليه دا يا ماما انتي كدا هتخسريل فلوسك وانا مش هدفعلك اي فلوس تاني؟
مامته استغربت من كلامه وقالت:ياسر انت بتقول ايه يا حبيبي استني بس اخلص وبعدها نتكلم ..
ياسر بضيق:يا ماما المبلغ كبير اوي في حد عاقل يلعب علي المبلغ دا؟
الرجال اللي قاعدين بصوله بسخريه وقالوا:ايوا عادي انت فاكر الناس كلها فقراء زيك!
ياسر اتضايق من كلامهم وبص لوالدته باعتراض ولاكنها حظرته بعنيها يمشي وبالفعل ياسر سابهم ومشي ووقتها والدته خسرت واضطرت تمضي شيك بالمبلغ وبعدما اتاكدت ان ابنها علي حق بصت لاصحابها وقالت:خلينا نأجل اللعب ليوم تاني؟
اصحابها اعترضوا وقالوا:هو انتي خايفه تخسري تاني ولا ايه ؟
حركت والدة ياسر راسها برفض وقالت:لا مش خايفه بس تعبت النهارده !
حركوا راسهم وقاموا وخرجوا من الفيلا ووقتها والدة ياسر دخلت لاوضتها وهيا حاسه بغضب كبير فبدأت تكسر اي حاجه تيجي قدامها لانها غبيه وقدرت تخسر بعدما وعدت نفسها انها لازم تتغلب عليهم وتاخد كل فلوسهم بس للاسف هيا اللي بتخسر كل مره .
فافتكرت نصايح ابنها ليها وقررت تاخد بيها وتبطل لعب لانها عمرها مكسبت وقررت تروح تشوفه ماله لانه كان داخل فرحان ولاكن رجعت في كلامها تاني لانها عارفه انه هيسألها عملت ايه ولو عرفته انها خسرت هيفتحلها موضوع كبير فقررت تتجاهل النقاش وتنام…
____________
"عودة للواقع "
بعدما وصل ماها واحلام لغرفة مامت حنين شافو حنين بتقرب من مامتها علشان تسندها تقوم فقررت احلام تساعدها وقربت منها وماهر قرب من حمزه و مسك ايديه وابتسم لانه بيفكره بحمزه ابن اخته وهو صغير لانه لما عاش معاه كان في نفس سن حمزه دا ..حمزه الصغير بص لماهر وقال بابتسامه:هو انا لما اكبر يا عمو هقدر اكون جميل زيك كدا واساعد الناس..
ابتسم ماهر وهيا بيشيل الطفل وبيقبله في خده وبيقول:طبعا وهتكون اجمل مني كمان!
ابتسم حمزه وبصله وقال:ماشي هصدقك!
ماهر ابتسم علي كلامه ونزله تاني للأرض واتحرك وهوا ماسك ايديه ووراه كانت حنين واحلام بيساعدوا نورا تمشي وهما ماسكينها كويس..
_________
اتحركوا كلهم للخارج وركبت احلام جمب ماهر وحنين ووالدتها واخوها ركبوا في الكرسي الخلفي؟
ماهر قال بتساؤل قبل ما يشغل العربية:عنوانكم فين!
وصفتله حنين العنوان بالتفصيل وقدرت احلام تعرفه لانه في نفس منطقتهم فشرحته لماهر بطريقة أسهل ووقتها قدر ماهر يعرفه..
وفي المستشفي كان حمزه مغمض عينيه وهوا بيحاول يفتكر كل اللي حصل معاه وقت الحادث وازاي الشاب اللي كان وراه كان خايف عليه رغم انه خبطه..ففضل حمزه يحاول يفتكر هوا مين لانه شافه قبل كدا ولاكن مش قادر يحدد فين بالظبط ،فحس انه محتاج يرتاح فغمض عينيه ووقتها حنين جت في باله وهيا بتبسم فحس بشعور غريب نحيتها فابتسم وهوا بيتمني انه يقابلها تاني ويشوفها كتير..
كانت شركة ماهر ماشيه كويس لحدما وصلهم خبر أن حمزه فاق واول ما سمع شوقي الخبر قام بسرعه وخرج من مكتبه وهوا بيتجه لمكتب ماهر علشان يبلغه بكل حاجه ولاكنه اتفاجئ انه مجاش الشركه لسا من ثلاث ايام.. فقرر يروح المستشفي ولاكنه تراجع في اخر لحظه لانه خايف من رد فعل ماهر وقتها لما يعرف فقرر شوقي يبلغه بكل الحقيقه برساله وهيبعتهاله عن طريق رقم مجهول وبالفعل شوقي طلع موبيله من جيبه ووقف في ركن هادي بعيد عن دوشة الموظفين وخرج خط اشتراه جديد بحيث انه لو معرفش يوصل لماهر تكون دي خطته البديله ..
شغل شوقي الخط علي الموبايل وجاب رقم ماهر وبدأ يكتبله الرساله وإيديه بتترعش لحدما خلص ووقتها بعت الرساله …
والرساله وصلت لتيلفون ماهر وهو سايق ولما انتبه ليها بلغ احلام تشوف مين اللي بعتله الرساله واحلام وافقت ومسكت تليفونه وفتحته وضغطت علي اشعار الرساله اللي وصلت وقالت:دي رساله من رقم مجهول مش متسجل؟
ماهر باهتمام:بيقول ايه الرقم المجول دا؟
احلام حركت راسها بانها هتقرأ الرساله وأول ما قرأت محتواها اتصدمت لان شكها طلع في محله فبصت لماهر بتردد وهوا كان باصص عليها باهتمام وبيحرك راسه فبلعت احلام ريقها وقالت: مفيش حاجه دا باعتلك قلب؟
استغرب ماهر وقال بسخريه: قلب؟ مين دي اللي باعتالي قلب ..احلام كان وشها احمر من التوتر ففهم ماهر انها غيرانه فابتسم وقال:علشان كدا وشك احمر ،غيرانه ولا ايه؟
احلام خجلت من كلامه وبصت لحنين ومامتها اللي قاعدين وباصين عليها فابتسمت وقالت برفض :لا مش غيرانه!
ابتسم ماهر ومسك التيلفون علشان يشوف مين اللي باعته القلب دا فحاولت احلام تمنعه يشوف الرساله دلوقت لانها عارفه انه ممكن يتهور فقالت:لا ركز في الطريق وشوفها بعدين!
استغربها ماهر ولاكن علشان ميزعلهاش حرك راسه بالموافقه وكانوا وقتها وصلوا لبيت حنين فنزلت احلام توصلهم وماهر وقتها كان هينزل ولاكن قرر انه يشوف الرقم اللي بعتله قلب فمسك التيلفون ونزل وراهم وعلي ملامح وشه ابتسامه لان احلام غارت عليه ولاكنه اول لما فتح الرساله اتصدم..يتبع بقلمي شيماء صبحي
تفتكروا ماهر هيتصرف ازاي اول ما يقرأ محتوي الرساله،وهل شوقي وياسر هيفضلوا مجهولين ولا هينكشفوا🤔
تفاااااااعل 📢
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺