نوفيلا فطين وفطنطن جميع الفصول كامله بقلم الكاتبه عزه كمال حصريه وجديده علي مدونة عالم الروايات والمعلومات
يلا يا اولاد عشان نلحق نفطر الأذان خلاص على وشك.
يطلع فطين من الاوضه بيبص على السفره يلاقي الأطباق فاضيه راح قايل بغضب:
- في إيه لحقتوا كمان تاكلوا الأكل كله ده الأذان لسه ضارب، ارحموني شويه.
ردت عليه فطنطن وقالت:
- ههه لا يا اخويا ما تخافش أنا ما رضيتش أصلا أغرف الأكل، وشايفه يعني أن كل واحد يجي يقف على حله وياخذ منها معلقتين وبلاها كتر مواعيد.
فطين:
- يا ستي ارحميني حتى في رمضان مش عاتقة ما تغرفي وانا اغسل المواعين المهم ناكله.
فطنطن:
- بصي يا اخويا انا بالنسبه لي مش هغسل المواعين اللي عاجبه ياكل من جوه الحلة يجي ورايا واللي مش عاوز يستنى بقى لما اخلص اكل وبعدين أغرف له.
 |
- منه له اقول ايه ساعه مغربيه.
ممدوح:
- ما تقولش حاجه يا بابا وتعالى بقى عشان ما تعملش زي السحور وتقول الاكل خلص، بصي كده حواليك وانت هتعرف.
بس فطين لقي فطنطن ماسكه حلة اللحمة وقاعده تاكل اكني ما حدش واقف معاها.
فطين:
- طب هاتي حته لحمه.
فطنطن:
- ما انت عندك الحله بتاعه الرز ما تاكل هو طمع في الحله اللي في ايديا ليه يا جماعه انا شقيانه طول النهار من لف وخدمه في البيت وغسيل ومستخسرين فيا حته اللحمه يا ناس يا كفره.
فطين:
-احنا اللي كفره انت بتقولي حته لحمه مش 2 كيلو لحمه هاتي حته يا ست انت.
فطنطن:
- انا مش حدي لحد منكم حاجه مكان قدامكم الحلة ما حدش خدها ليه.
في الوقت ده ممدوح خطف الحله من امه وجرى دخل الاوضه وقفل الباب.
فطنطن:
- روح منك لله انت وابنك ارتحت اهو خطف الحلة وده بالذات محدش يعرف ياخد منه حاجه.
فطين راح الأوضة ممدوح:
- افتح يا ممدوح يا حبيبي ده انا ابوك برده.
- لا مش فاتح وسيبوني بقى عشان اكل اللحمه بمزاج هي اه زي الكاوتش وبتشد بس برده حاكلها.
فطين:
-افتح يا ابني يا حبيبي وارحمني طب اقول لك انا حنزل تحت البيت ونزل في السبت حته لحمه.
ممدوح:
- مش حفتح الباب ومش حدي لحد حته لحم.
فطين:
- منه له أنت وأمك امر لله هرجع اخد حله الرز واكلها بقى اهو حاجه اكسر عليها صيامي.
دخل المطبخ لقى فطنطن ماسكه حله الرز بتاكل آخر معلقه.
فطين:
- هو في ايه يا ربي ولا أنت ولا أبنك عاتقين اروح افطر على مائده الرحمن.
فطنطن:
-اه الهي تنستر وانت راجع كمان جيب لي طبق عشان ما فطرتش كويس.
فطم مش عارف اقول لك ايه غير منه له.
الفصل الثالث
صباح الخير يا فطنطن خلي بالك النهارده والدتي جايه تفطر معانا عاوز آكل عليه القيمة، اوعي تعملي عامله من عمايلك اللي بتقل القيمة، امي اه ست من الزمن القديم بس ليها مكانه وبتاخد بالها من أي حاجه، فخلي بالك مش ناقص مشاكل خلي اليوم يعدي، وانا عارفك مش بتسكتي وسيد مين يعمل المشاكل.
فطنطن:
- اخص عليك انت بتقول عليا انا بتاعت مشاكل، أنا ست محترمه وأن شاء الله هشرفك قدام الحاجه بس خليها تيجي على الفطار عشان ما تقعدش كتير يا دوبك تيجي المغرب يأذن تلاقي الاكل قدامها، اه ما ستات الكبار دول بيبقوا محتاجين رعايه شويه وكمان عشان ابقى فاضيه عشان اعمل لها اكل عليه القيمه، يلا بقى هات فلوس عشان انزل اجيب لها اكل.
فطين:
- خدي الفلوس جيبي فراخ وجيبي لحمه وخلي بالك مش عاوز مشاكل اخر مره انبه عليك.
فطنطن:
- أن شاء تنستر حاضر.
بعد ما ما مشي فطين، نادت على ممدوح:
-واد يا ممدوح تعال عاوزاه اقول لك كلمه.
ممدوح:
- نعم يا ماما.
- بصي يا حبيبي انت امبارح أكلت حله اللحمه كلها وما اتكلمتش رغم اللي مفروض اخصمها منك شهر رمضان كله ما تدقش لحمه بس يلا عشان قلبي الطيب انزل بقى جيب لي الحاجات اللي هكتبها لك في الورقه وما تجيبش حاجه زياده.
قعدت فطنطن تكتب في الورقه وفي الآخر خدها ممدوح بص في الورقه:
-يا نهار اسود انت هتعملي الاكل ده النهارده وتيته جايه لا ده انت ناويه على المشاكل.
فطنطن:
- واد احترم نفسك وانزل جيب الاكل اللي قلت لك عليه وعلى الله تفتح بقك ولا تكلم ابوك.
نزل ممدوح وجاب لامه كل اللي مكتوب في الورقه وقال:
- بقول لك ايه عشان هو شكل البيت هيقوم حريقه انا هروح اكل على مائده الرحمن اللي تحت البيت.
فطنطن:
-بجد طب يا ريت تاخد ابوك وستك في ايديك وانت نازل اهو تبقى عملت مع امك واجب ووفرت اكل النهارده.
ممدوح:
- ما فيش فايده امتى يا رب اتجوز وارتاح ويبقى ليا بيت خاص بيا اتحكم في مراتي اللي هتجوزها واكل الاكل كله وما اكلهاش حاجه.
جه وقت الفطار وفطين جاب امه عشان يفطروا وهو بقى فرحان وهم قاعدين على السفره جابت فطنطن الاكل وقالت:
- يلا كله يغمض عينيه يلا دمار دمار النهارده، يلا هتشوفوا اللي عمركم ما شفتوش.
ام فطين:
- عامله ايه يا مرات ابني اكل النهارده، ما انا عارفاك عملك اسود ومهبب من ساعه ما اتجوزتي ابني وما دخلش علينا الخير.
فطنطن:
- ليه يا حماتي ده النهاردة عيد ده انا اعمل لك النهارده أكل تحفة حتنبهروا.
رفع فطين الغطاء وانصدم لما لقي نجاحات.
فطين:
- فطنطن هاتي بقيه الفرخه يا غاليه.
فطنطن:
- انا عملت النهارده الاكل كده عشان احنا كل يوم بناكله فراخ فالنهارده بقى خلاص مش قادرين واكيد برده حماتي بتاكل فراخ في قلت النهارده اغير نوع الاكل وهو حاجه على قد ما قسم وكده كده الولا ممدوح هياكل على مائده الرحمن.
ام فطينبصيت لها وقالت:
- لها انت عازماني على جناحات ليه فاكراني فرخه وحطير ياعيني زمان الفرخة دلوقتي مش عارفه ترفرف، هاتي بقيه الفرخه احسن لك.
فطنطن:
- أن شاء الله أع. دمك يا حماتي ما عملت الا دوله.
ام فطين:
- قومي احسن لك مخلي يومك النهارده ما يعدي.
طلعت فطنطن البلكونه ونادت على ممدوح:
- واد يا ممدوح.
ممدوح:
- في ايه ياما خير ما تسيبيني بقى ده انا منمر على طبق عشان اقعد جنبه.
فطنطن:
- واد هات لي فرخه من المائده وخلص بسرعه طلعها بدل ما اطلق وتقعدي انت وابوك بقيت رمضان على المائدة.
ممدوح:
- ايه هي الجناحات ماكنتش.
فطنطن:
-هات الفرخه يا ابن الجزمه واطلع الهي تنستر.
ممدوح بالفعل سهى الراجل وخد الفرخة وطلع يجري عند امه.
فطنطن:
- اهو يا حماتي انا كنت بهزر معاكي وانا برده اعمل لك جناحات لا يا غاليه ده انا عامله لك فرخه محمره كمان، أنت مش عارفه الفراخ النهارده بكام ده معديه ال 200 جنيه بس لا لما فطين قال ان انت جايه قلت لازم اشرفه هو انت بتزوريني كل يوم ده النهارده زارنا النبي.
وهم قاعدين بياكلوا لقوا الباب بيخبط وعيل بيقول:
- عمي فطين بيقول لك عم احمد بعد الفطار تبقى تنزل تدفع له 300 جنيه حق الفرخة اللي اخذه ممدوح من على مائده الرحمن.
فطين بيبص لممدوح ممدوح شعار على أمه.
فطنطن: ههه الهي تنستر.
فطين:
الهي تنفضحي يا بعيده منه له.
الفصل الرابع
فطين:
- واد يا ممدوح يا ترى أمك عامله لنا النهارده فطار ايه.
ممدوح:
- الفطار زي كل يوم هي أمي هتغلب.
فطين:
- يا ابني انا بديها كل يوم فلوس ما اعرفش بتوديها فين.
ممدوح:
- بابا كفايه كلام عشان انا صايم وامي مش بتخلص ولا بتيأس هانت فاضل 10 دقائق على الفطار وهنعرف هي عامله لنا اكل ايه، بس مش عارفه ايه عادتها أنها تحط الاكل والاذان بياذن.
فطنطن من ضهره وقالت:
- عشان ما تلحقش يا حيلتها تنزل تقعد على مائدة الرحمن يعني أنت تأكل على مائدة الرحمن واحنا ما ناكلوش يبقى كلنا زي بعض سواسية.
ممدوح:
- يا ماما انا مش بكلفك حاجه و سيبيني أكل عندهم ده اكلهم حلو هو حرام.
فطنطن:
- اه لما تنسى امك وتروح تاكل وما تجيبلهاش اكل يبقى انت ابن عاق ايوه ،وبطل بقى عشان احط الاكل قبل المغرب ما يأذن.
حطت الاكل فطين وممدوح بصوا لبعض.
فطين:
- واد يا ممدوح ايه ده.
ممدوح:
- مش عارف شكلها اكله جديده ماما اخترعتها.
فطين:
- هي فيها ريحه توم بشبه عليها.
ممدوح:
- مش عارف ماما بتجرب فينا الأكل دي وإحنا صايمين عموما هسالها وأمري لله.
فطين:
-خلي بالك وأنت بتسالها مش ناقصين مشاكل.
ممدوح:
- ماما يا ست الكل الأكل شكله تحفه تسلم ايدك بس اسمها ايه يعني عشان اشوف ابداعك.
فطنطن:
- أن شاء الله تنستر دي ملوخيه.
فطين:
- ملوخية ايه الملوخيه إللي إحنا بناكلوها غير دي.
فطنطن:
- ما انا بصراحه ما قدرتش اخرطها فجبت الورق بتاعها وحطيته في الشوربه من الصبح عشان يطبع اللون وقلت بدل ما ناخده بالمعلقه ناخده بالورقه.
فطين:
- اللهم لا اعتراض أنا مش هتكلم بلاها ملوخيه ايه يا غاليه اللي جنب الملوخيه ده.
فطنطن:
- سلامه النظر يا عيني مش شايف ما كانش يومك يا فطنطن الرجاله كلها مفتحين وتاخدي انت الاعمى.
فطين:
- خدي بالك من الملافظ وانت سبحان الله لسانك بينقط سم انا شايف ايه اللي جاب الكفته جنب الملوخيه طب قولي لي انت جبت ازاي الشوربه اللي عملت بها الملوخيه.
فطنطن:
- اه أنت بتسأل على الكفته ما كنتش واخده بالي لا ما أنا النهارده أقول لك كان في بقيه شوربه إمبارح بتاعت الجناحات عملت عليها الملوخيه ده وكان عندي طبق بسله في الفريزر بحته لحمه قلت مين اللي هياخدها مش هيكفي فبعتها لام اعتماد وقلت لها يا اختي النبي قبل الهديه وكمان شامة عندك ريحه كده ايه تحفه فقلت ولازم ادوقك اكلي.
ام اعتماد خدت الطبق ولقيتها بتقول تصدقي انت بنت حلال كنت عامله الاكل النهارده بزياده استني اجيب لك طبق واعطيتني طبق الكفته ده عشان تعرف انا ست مدبره.
ممدوح:
- ماما بدل ما كنا نشحت من الجيران كنت نزلت قعدت على مائده الرحمن.
فطنطن:
- واد اتلم ولا أخذ منك صباع الكفته ده كمان ام اعتماد طلعت كريمة وعطتني كثير قوي مش عارفه ممكن بتزكي عن صحتها يلا مش مهم المهم استفدت.
وهم بياكلوا لقوت ام اعتماد داخله تعيط.
فطنطن يا لها شكل الست جاية تاخد طبق الكفتة.
فطنطن:
- تصدقي بالله لسه كنا بنجيب في سيرتك اصل كلنا طبق الكفته كله.
ام اعتماد:
- يا لهوي ده انا كنت جايه الحقك اصل طلعت اللحمه لحمة بهايم ولسه مقبوض على الجزار.
ممدوح بص لامه:
- انا اكلت صباعين كفتة.
فطنطن:
- ايه يا ابن الجزمه انا مش عطياك صوباع واحد اهو اخره الطفاسة عشان تعرف تمد ايدك على الصباع الثاني اه طلعت بهايم.
فطين:
- هي مشكلتك عدد صوابع الكفتة وما ركزتيش في كلمه بهايم روحي منه له.
الفصل الخامس
يا ترى اعمل أكل أيه بقى النهارده يا فطنطن خضار ولا سمك لا الخضار عاوز لحمه يا فراخ ودي تخرب اي ميزانيه انا هعمل لهم سمك بس اجيب نوع ايه يلا مش مهم انزل السوق واشوف.
فطنطن دخلت الأوضة لفطين.
- فطين ايدك على فلوس عشان اشتري اكل.
فطين:
- انا من وجهه نظري عشان كده كده بتذلينا نأكل على مائدة الرحمن او نتعزم عند حد من قرايبنا.
فطنطن:
-قرايب مين اللي نتعزم عندهم هو حد لاقي يأكل.
فطين:
-أنا بصراحة بديكي الفلوس ومش بتعملي لنا اكل مش عارفه بتودي الفلوس.
فطنطن:
- مسيرك تعرف أن أنا ست مؤدبه ومدبره ايدك بقى على الفلوس علشان الحق اجيب الحاجه.
فطين:
- أمري لله خدي الفلوس وانزلي اشتري يا ستي ويا ريت تعملي لنا اكله عشان من اول رمضان وانت شغاله توفري.
فطنطن خدت الفلوس ونزلت السوق وكل ما تسال حد على سعر حاجه وتعرف تمنها تقول له:
- يا خرابي الناس هتجيب منين اتقوا ربنا احنا في رمضان المفروض تطلعوا الحاجه زكى على صحتكم.
واحد من بايعين:
- ولما احنا نطلعه الحاجه زكى حنروح بالليل لعيالنا بايه عشان يفطروا.
فطنطن:
- تروحوا بالدعوه الحلوه.
الراجل:
- لا يا حاجه خلي الدعوه الحلوه دي بقى ليكي وتبقي تطبخي عليها اي حاجه في البيت.
فطنطن:
-تصدق بالله انت مش وش نعمه وانا مش داعيه لك.
الراجل:
- مش عايزة الدعوه لو كانت من وشك واوعي بقى من هنا عشان الناس تشتري.
فطنطن بقى كده طب والله ماشي:
- يا ناس تعالوا الراجل ده بيبيع السمك متلج على عيني لسه فاكك التلج دلوقتي هو بيبيع على أنه طازة.
الراجل بس السمك بيتنطط اهو يا ست.
فطنطن:
- ده هتلاقي سمكتين بس اللي انت حاطتهم على الوش علشان تخدع الناس يا راجل يا ضلالي.
الناس اللي بتشتري واحده من الستات:
- يا ستي ما السمك كله حي اهو بيتنطط.
فطنطن :
- لا ده بيضحك عليكم السمك الحي هيسيبه لغايه اخر البيعه صدقيني انا لسه شايفاه الكراتين المثلجه.
الراجل:
- منك لله يا بعيده هتوقفي حالي .
فطنطن بتقول له انت كنت قايل لي كيلو السمك ب 60 انا بقى عاوزاه ب 30 ولا اكمل كلام الراجل:
- خدي كيلو وغوري بالسم الهاري مش عارفه جوزك سايبك علينا ليه.
فطنطن :
هي دي توابل جديده بتتحط على السمك عاوز الكيلو وخد ال 30 جنيه عشان انا مش بحب اكل على حد.
واحده من الستات:
- طب يا اختي بدل انت بتقولي سمك مثلج بتشتري ليه.
فطنطن:
-الامر الراجل ده 100 100 وسمكه مش هتلاقيها عند حد.
فطنطن بتوطي على الراجل تديني كيلو جمبري وخلي الناس يشتروا الحاجه دي كلها منك.
الراجل:
- لا شكرا امشي خلاص بقى مش خدت السمك.
فطنطن:
- اصبر افهمهم حكايه الجمبري.
الراجل:
- كان يوم اسود يوم ما طلعت النهارده عشان اشتغل كنت اخذته اجازه انت مش اخذت كيلو السمك ما تمشي يا ست.
-لا انا عاوزه كمان الجمبري تحسي انه شكله حلو ومتزغط.
الراجل:
- هو نص كيلو مش هطلع لك ازيد من كده ده غالي روحي منك لله خسرتيني على الصبح شيء مشويات.
فطنطن :
-ما عندكش بقى طماطم وجرجير وجزر وخيار وحبه رز عشان اعمل جنب الاكل.
الراجل:
- ايه عاوزاني اروح اشتريهم لك كمان ولا ايه امشي بقى واصطبحي على الصبح بدل ما اخد منك الحاجه وافطر عليك دلوقتي.
فطنطن:
- خلاص راجل ظالم ومفتري حسبي الله ونعم الوكيل انا ماشيه اهو من غير ما تزق مش مهم متمن الجيران اخد من واحدة طماطمايه ودي خيارة ودي جزرايه طب الرز بقى اعمل ايه انا ممكن ابعت الواد ممدوح على مائدة الرحمن يجيب لي الرز نفطر بيه هي مش المائده دي للناس الغلابه وانا يعتبر ست غلبانه.
رجعت البيت وهي فرحانه انها جابت كل حاجه من دي.
فطين:
- عندك انا اعطيكي 100 جنيه يا دوبك يجيبوا السمك ويا دوبك كيلو رز جبت الجمبري منين يا غاليه.
فطنطن :
-انا ست مدبره جبت من كل حاجه حبه.
فطين:
- ده نص كيلو الجمبري عدى ال 100 جنيه انطقي انا مش ناقص على الفطار يجي حد يخبط عليا ويقول لي علي فلوس.
فطنطن:
-عيب يا فطين انت تعرف عليا انا اشتريت السمك من السوق بعد ما فصلت مع الراجل واعطاني نص كيلو جمبري هديه.
فطين:
- فطنطن ما تطيريش عقلي انت عاوزه تقنعيني نص كيلو جمبري هديه اغلى من كيلو السمك مسكتي في الراجل وبوظتي له البيع فقال يديك الحاجه عشان يخلص منك ما انا عارفك.
فطنطن:
-ايه ده هو انا اتشهرت ما كنتش اعرف انهم حيذيعوا اللي انا عملته على الفضائيات ايه اللي عرفك.
فطين:
- انت نكدتي على الراجل واخذت منه ااحاجه غصب .
فطنطن:
-ما هو اللي راجل ضلالي ورفع الاسعار.
فطين:
-نفسي اعرف هيجي لك نفسي ازاي تاكلي الحاجه وانت واكله من الراجل فلوس.
فطنطن:
-بقولك ايه حأكل الجمبري يعني حأكل الجمبري مش عاجبك انزل على مائده الرحمن وادعي لي بالهدايه وانا حأكل أنا وممدوح ولا اقول لك خد ممدوح في ايديك ما انا اللي جبته يبقى انا إلي حأكله لوحدي.
فطين: منه له.
الفصل السادس
ما تنساش تجيبي السحور.
فطين:
- ماشي كويس إللي أنا حجيب السحور أهو نعرف نتسحر النهارده.
فطنطن:
-ما تجيبش حاجات كثيره عشان انا مش هحاسب إللي على الحاجه إلي أنا عاوزاها هتجيب من دماغك يبقى تدفع من جيبك، اه ما حدش يبقشش من جيبي.
فطين:
- ماشي حاضر حجيب السحور الاقتصادي بتاعنا عادي.
طبيعي نزل فطين وغاب ساعه ورجع.
فطنطن:
- يا لهوي جوزي نزل لم الحاجه كلها اللي في المحل.
فطين:
- حاجه إيه أنا جبت ربع جبنه بيضاء وثمن تركي وتمن بيفي وب 10 جنيه بيض وب 5 جنيه فول وجبت اثنين زبادي حتى ما جبتش لنفسي قلت بلاها.
فطنطن:
- ومين اللي هيدفع حق الحاجه دي ده الحاجه دي خراب بيوت.
فطين:
- ده الحاجه دي بحوالي 75 جنيه يعني ما جبتش حاجه كثير.
فطنطن:
- انا كانت طالعه من نيتي 20 جنيه للسحور هي دي اللي هديها لك وانت تدفع الباقي.
فطين:
- ارحميني هنجيبه ايه نتسحر بيه ب 20 جنيه ارحميني.
فطنطن:
- عادي حته جبنه بيضاء بخمسه جنيه وجبنه تركي ب 5 جنيه ولانشون ب 3 جنيه وبيضايه واحده ب 4 جنيه وزباديه يبقى كده ال 20 جنيه انت بقى عملت من دماغك تبقي تدفع الفرق.
فطين:
- انا غلطان طب خدي وراح جايب السكينه وقطع حته من الجبنه البيضاء دي ب 5 جنيه واعطاها شريحتين جبنه تركي ب 5 جنيه وعطاها شريحتين بيفي ودوله ب 3 جنيه وناولها بيضايه وزباديه ايدك على 20 جنيه .
فطنطن:
- وباقي الحاجه هتاخدها توديها فين هترجعها.
فطين:
- مالكيش فيه انت اتكلمي على 20 جنيه اللي انت هتطلعيها ما لكيش دعوه بقيه الحاجه فاهمه.
فطنطن:
- يعني انت هتاكل من الحاجه من انه حاجه عموما وفرت لنا كتر خيرك الزبادي بدل ما يتقسم على ثلاثه هتتقسم على اثنين والبيضايه بدل ما تتقسم على ثلاثه برده على اثنين وشريحه الجبنه التركي اقسمها بيني وبين الولد ممدوح وقطعتين البيفي انا هاخد حته وهو حته.
فطين:
- لا مش هيحصل انا كمان هاكل معاكم من ابو 20 جنيه اما بقى بقيه الفلوس دي هرجعها للراجل.
فطنطن:
- طب انا عندي فكره احلى انت تنزل للراجل وتقول هات 55 جنيه وكل يوم اجي ادفع لك منهم 20 جنيه.
فطين:
- يعني عاوزاني اخذ الحاجه وارجع اخد من الراجل بقيه الفلوس واقول له بكره.
فطنكن:
-اه يا اخويا انا سبته مدبره لازم افكر لك .
فطين:
-طب والراجل ذنبه ايه هو باع الحاجه مش بيبيعها شكك غير هيقول لي رجع الحاجه اللي انت اشتريتها .
فطنطن:
- تصدق يبقى راجل ما عندوش دم ما عندهوش نخوه عشان يظن فيك السوء.
فطين:
- يعني انت يا فاتحه محل وحد بعد ما دفع الفلوس جاي ياخد الفلوس ويقول لك انا هدفع له كل يوم 20 جنيه حق الحاجه إللي هاكلها في البيت انت هتعطيه له حاجه.
فطنطن:
- ايوه حعطيه.
فطين:
- هتدي له إيه يا غاليه .
فطنطن:
- حدي له بالشبشب ليه هم فاكرين أني فاتحه الدكان سفلقه يبقى ما يعرفنيش .
فطين:
- أنت قصدك إللي أنت عاوزه الراجل يديني بالشبشب .
فطنطن:
- لا يا اخويا مش قصدي انت بس بعد كده بقى تنقي الراجل اللي تجيب منه يكون غلبان وما يقدرش يتكلم انت جايب الحاجه دي من مين.
فطين:
- من عند عم احمد .
فطنطن:
- اه الراجل ده انا مش برتاح له كل ما اروح اشتري منه حاجه يقول لي فلوسك الاول اشوفها وامسكها في أيدي.
فطين:
- ما انت عمايلك سوداء فاكره لما اخذت منه الحاجه وما رضيتيش تدي له فلوسها عنده في الدكان.
فطنطن:
-طب بذمتك انا كنت غلطانه انا حلفت بالله إني ما اخذتش حاجه طلعت بيها بره الدكان ادفع فلوس حاجه ما اخذتهاش ليه.
فطين:
- ما تشلنيش ما أنت اخذتي الحاجه اكلتيها جوه الدكان هو ماله هو كان عزمك.
فطنطن:
- ما انا اكلت الحاجه جوه الدكان ادفع فلوسها ليه عارفه لو كنت جبتها البيت كنت دفعت فلوس.
فطين:
- ما هو بسببك الراجل منع أنك تدخلي الدكان وحاطط صورتك على باب الدكان ومكتوب عليها الجميع يدخل ما عاد هذا الكائن.
فطنطن:
-شفت صورتي كانت جميله ازاي لا وعملها لي بوست طويل ده لولا حرام وشهر رمضان كنت سرقتها منه وحطيتها هنا في الصاله بس عامه بعد رمضان ما يخلص هروح اخدها .
فطين:
- منه له.
الفصل السابع
صباح الخير يا فطنطن متأخرة ليه النهارده مش من عادتك .
فطنطن:
- إحنا لسه بدري و اليوم طويل فححضر الأكل على مهلي.
فطين:
- يا رب يكون أكله حلوه الا الواحد عاوز يأكل أكله حلوة في رمضان .
فطنطن:
- لا اكله النهارده هتخليك ترم عضمك.
فطين:
- بجد انا اتعشم ولا اروح أكل على مائده الرحمن.
فطنطن:
- لا يا اخويا خدها مني نصيحه اكلة النهاردة تحفة.
ممدوح:
- ماما.
فطنطن:
-نعم يا روح امك.
ممدوح :
- طب ده اعتبره شتيمه ولا مدح.
فطنطن:
- خلص وهات اللي عندك.
- أصل انا كنت عازم واحد صاحبي.
- عازم ايه يا اخويا هو إحنا عارفين نأكل علشان تعزم صاحبك .
ممدوح:
- اصل هو دبسني بصراحه قال لي عايز ادوق أكل امك الحلو إلي بتحكي عنه.
فطنطن:
-وانت تقول له ليه اكلي حلو ولا زفت أعمل معاك إيه دلوقتي تحب ادي له صدر الفرخه وخليك تقضي رمضان كله من غير ما تأكل فراخ، عشان تحرر تعزم حد.
فطين:
- خلاص بقى الولد عزم صاحبه وخلاص واكيد هيدخل بهديه عليها القيمه اتهدي بقى خدي فلوس أكل عشان تجيبي الأكل.
فطنطن:
- خلاص يا نور عيني الا زعلك حاضر حعمل لك أكل حلو النهارده.
فطنطن فضلت في المطبخ مطلعتش لغاية قلب الأذان.
ممدوح:
- يلا يا ماما خلصي عشان صاحبي قرب يجي.
فطنطن:
- خلاص يا حبيبي انا كمان ححط لك ترابيزة في دخله البيت واحط لك الاكل عليه عشان تاكلوا كمان براحتكم .
ممدوح:
- ماشي يا ماما ربنا يكرمك.
فطنطن:
- الهي تتستر.
ممدوح خد صاحبه وقعدوا يأكلهوا واستغرب إن أمه عامله أكل وقال لنفسه:
- عجيبه ده اول مره تعمل أكل ما تفضحناش.
صاحبه بيكلمه:
- واد يا ممدوح مش غريبه اللي الناس اللي بيأكلوا على مائده الرحمن معاهم نفس الاكل إلي بنأكل منه هي امك كانت طبخه للناس النهارده .
ممدوح وانا اقول الحاجه دي مش لله ماشي يا ماما .
ممدوح:
- لا هي ماما كده لما بتعمل أكل بتحب برده تنزل منه اه زكاة عننا و من حقهم يأكلوا أكله حلوه وكله بثوابه.
صاحبه:
- ربنا يجعله في ميزان حسناتها شكل الست الوالده محترمه وعارفه ربنا.
ممدوح:
- قوي قوي ده فاضل تركب جناحين وتطير .
صاحبه:
- بجد لازم اتعرف على الست الوالده واعرف ماما عليها.
ممدوح:
- لا احنا ناس محافظه ما ينفعش ستاتنا نتكشف على رجاله و منصحكش الست الوالده تتعرف عليها.
صاحبه :
-بجد انا فرحان بيك قوي بجد نفسي يبقى عيلتي زي مامتك وباباك .
ممدوح :
-احمد ربنا .
صاحبه مشى وممدوح جرى على فوق:
- يا ماما بقى كده تفضحيني وتاخدي الاكل من مائدة الرحمن ، حتى الأطباق ما تغيرتش ومعالق هي هي.
فطين بيبص لفطنطن.
فطنطن قالت:
- يعني انا كنت اعمل ايه انا قلت بدل ما اروح اعمل اكله ب 300 جنيه عطيت فحطيت الواد حماصه اللي شغال عند عم احمد 50 جنيه قلت له يا ابني عشان في واحد صاحب ابني جاي من السفر وما لحقتش اعمل الاكل الهي تنستر الحقي مش عارفه اهمل ايه، جاب ترابيزه ونظفها وحطها وقال لي ما تحمليش هم يا ست فطنطن بس كده بسيط اه ليه تعقدوها.
فطين:
- طب الفلوس فين ده أنت عمل ليه الفطار طبق بطاطس وقلتي اصل الاكل حطيته للعيال.
فطنطن:
- وعد بكره حعمل ليكم اكله حلوة بالفلوس.
فطين مش هقدر اقول غير منه له.
الفصل الثامن
يا ترى هعمل إيه النهارده هعمل أكل ولا أغسل الغسيل ولا أغسل المواعين، ما هو انا لو عملت الاكل الاكل هيتكلف والغساله عاوزه كهربا فكري يا فطنطن انا عندي فكره حلو . فطنطن نزلت لام اعتماد: ام اعتماد عندك ميه يا غاليه.
- اه ليه.
- اصل عندي قطعة مش عارفه ليه شكل الماسوره انكسرت واتصلت بالسباك وقال هاجي لك بعد الفطار.
ام اعتماد: لو عندك حاجه يا حبيبتي الجيران اللي بعديها هاتي الحاجه.
فطنطن قالت:
- خلاص ماشي كثر خيرك يا غاليه يا جارة الهنا وجارة السعد .
راحت فطنطن لمه الغسيل بتاع البيت كله ونزلته لجارتها: عاوزاكي تغسلي الغسيل ده عشان الميه اللي قاطعه ومعنديش غبار خالص فطين.
ام اعتماد:
- خير يا فطنطن انت بقالك سنتين ما غسلتيش ولا ايه.
فطنطن:
لا ده الواد ممدوح على طول موسخ هدومه وفطين كل يوم عاوز غيار جديد يدوبك ده غسيل الشهر.
ام اعتماد:
- ماشي اغسلهملك.
فطنطن:
- وربنا يكرمك حطي مسحوق من عندك عشان ايه مش حعرف انزل الشارع اشتري مسحوق.
ام اعتماد:
- هاتي الفلوس يا غاليه وابعت حد يشتري ليكي.
- حاضر هطلع اجيب لك الفلوس.
فطنطن طالعه على السلم وتقول: ده وليه ما عندهاش دم وقليله الذوق في ايه يعني لما اخد منها كيسين اريال او ثلاث اكياس اريال يعني ده الجيران لبعضيها يعني ما هي لما طلبت مني الطماطم عطتها طمطمايه وخدتها منها تاني يوم هو انا قلت لها رديها وقتي وليه قليله الذوق.
طلعت فطنطن وجابت فلوس ونزلت لها وقالت:
- خدي يا اختي جيبي المسحوق عقبال ما اطلع اشوف اعمل ايه في المواعين.
ام اعتماد:
- عارفه يا غاليه لو كان عندي خرطوم كنت مديت لك فرع لفوق عندك.
- لا يا غاليه انا هتصرف.
طلعت فطنطن خبطت على أم حسن
- ازيك يا ام حسن عامله ايه.
- انا كويسه يا فطنطن عاش من شافك بقى لي شهرين ما شفتكيش بعد ما دفعت لك حق العيش وقلتي لي بمجرد لما اروح البيت حطلع اجيب لك الفلوس وانزل لك على طول.
فطنطن:
- قلبك اسود يا ام حسن جامد عموما يا اختي ايه الرسول وصى على سبع جار فما بالك بالجار اللي في وشك بصي يا غاليه عاوزه وصله الخرطوم توصل لغايه الحوض عشان اغسل المواعين عشان الميه عندي قطعه.
ام حسن:
- كان على عيني يا اختي ده الخرطوم مخروم .
فطنطن:
- خلاص هنزل اجيب لك خرطوم من عند الجيران .
ام حسن:
-اهو ده كمان كان علي عيني يا اختي عارفه يا لو كنت دفعتي لي فلوس العيش كنت زماني اشتريت بيه خرطوم وخدتي انت الوصله بس يلا بقى إلي قدم السبت يلقى الحد وبقيت الاسبوع.
فطنطن:
- انت يا وليه يا قليله الذوق علشان 50 جنيه عيش ما كانش معايا فلوس وقتها طب ايه رايك مش حديكي حاجه علشان قلة ذوقك مش عاوزه منك حاجه حسبي الله ونعم الوكيل.
فطنطن راحت خبطت على ام فاروق:
- ام فاروق إلي مليش غيرها وحسها في الدنيا.
ام فاروق:
- خير يا فطنطن.
-عاوز يا اختي خرطوم من عندك للبيت عشان اغسل المواعين.
ام فاروق:
- يا غاليه ده انت الشهر اللي فاتت خدتي مني الميه وجاي لي انا فاتوره الميه 150 وجايه لك 5 جنيه.
فطنطن:
- اخص عليك يا ام فاروق بتبقي ليا بعينك المدوره ربنا يستر.
وهم واقفين جه بتاع الميه:
- استاذه فطنطن كل ما اجي اخبط عليك ملاقيش حد في الشقه.
فطنطن:
- الخير على قدوم الوردين ارتحت يا ام فاروق اهو بتاع الميه عاوز فلوس.
بتاع الميه:
- 5 جنيه يا ست كل شهر في 12 شهر ب 60 جنيه ايدك على 60 جنيه.
فطنطن:
- يا خرابي 60 جنيه ايه يا اخويا اذا كان ال 5 جنيه انا مش بدفعها حدفع 60 جنيه قسطهم ليا كل شهر اللهم ٢ جنبه شهريا.
الراجل بتاع الميه:
- يا ستي والله انا بكره اليوم اللي بشوف في وشك واقول لهم حد ثاني يروح لهم بس اعمل ايه قدري ان انا ماسك منطقتكم يا ست طب هاتي رقم جوزك.
فطنطن: جوزي معهوش تليفونات ارتحت يا ام فاروق قاعده تقولي خمسه جنيه خمسه جنيه يا اختي اهو جالي 60 جنيه اتبطي بصي يا اخويا انا ممكن ادفع لك 5 جنيه النهاردة.
- يا ستي هاتي 60 جنيه بدل ما اقطع عليك الميه بدل ما هي نازله في الشارع.
ام فاروق:
- ليه هي الميه مش مقطوعه عندها .
الموظف:
- لا يا ست الميه فتحاها فوق اهو والبلكونه بتاعتها ساقيه الشارع.
ام فاروق:
- امشي يا فطنطن عشان ما افطرش عليك قبل الفطار.
فطنطن:
- ان شاء الله اعدمك يا ست ام فاروق لو كان عندي نقطه ميه انا اشوف مين ابن الجزمه اللي راح فتح الحنفيه وانا تحت.
طلعت لقيت ممدوح بيسقي الزرعه .
فطنطن: انت يا تور مين اللي قال لك افتح الميه.
- ايه يا ماما ما انا بسقي الزرعه.
- زرعه ايه والميه مدلدقه على الجيران.
ممدوح:
- ما انا نسيت الخرطوم ودخلت الحمام.
- يعني بشحت ميه من الجيران يلاقوا الميه في الشارع روح منك لله الهي تنفضح فضحتني وقالوا عليا ست بخيله.
ممدوح:
- فشر انا امي معلمة البخل.
- انا معلمه في البخل.
ممدوح:
- ايوه ويتحط ليكي الكرسي ويضربلك تعظيم سلام عليه كمان.
فطنطن:
-طب عشان قله ادبك والله ما انت فاطر النهارده معانا.
ممدوح:
- احمدك يا رب جت منها حبيبتي يا مائده الرحمن يا مأكله الغلابه والجيران جاي لك يا غاليه من الاذان واوعي تفتكري اللي ممكن اسيبك وانام انا جاي.
بتاع الميه:
- انت يا ست انا عاوز الفلوس ايدك عليها عشان امشي.
فطنطن:
- امشي يا راجل انت من هنا احسن لك لولا وش البومه ما كانش حصل كل المشاكل مع الجيران مش دافعه حاجه و اضرب راسك في الحيطة فطنطن اصلاحه وادب وما تدفع مليم
بتاع الميه:
- يا ستي ده انذار تديه لجوزك تحطيه على الفطار تحطيه على مائده الرحمن حطيه مطرح ما تحطيه المهم بكره يجي ويدفع الفلوس يا كده انا بذات نفسي حشيل الموتور ومشي الراجل.
فطنطن:
- وريني جمال خطوتك مد ايدك على الموتور ما كنتش اخلي فضايحك بجلاجل و ادفعك تعويض اهو حتى الحق اجيب هدوم العيد .
الراجل روحي منك لله
الفصل التاسع
يا ترى هتعملي اكل إيه يا فطنطن كل يوم في الدربكه دي في الآخر مفيش فايده وانا اتكعبل في المواعين لا النهارده بقى اريح.
فطين: بتقولي ايه يا فطنطن على الصبح.
فطنطن: لا يا اخويا ما تشغلش بالك اتوكل على الله انت بس.
قبل الفطار بساعه ممدوح: فين الاكل.
فطنطن: لا ما احنا النهارده هناكل بره.
ممدوح: بالله مش بتهزري.
فطنطن: عيب يا واد انا برده بهزر يلا اجري البس.
فطين:انت بتتكلمي بجد يا فطنطن ايه حسيتي على دمك وعرفتي ان انت بتعملي معانا غلط.
فطنطن:روح البس بدل ما اقول لك ما تجيش معانا.
خلصوا لبس ونزلوا فطين:هنروح فين يا فطنطن.
- نقي احلى ترابيزه ونروح نقعد عليها.
ممدوح: ماما انت بتهزري انت عزمانا على مائده الرحمن.
فطنطن: في ايه يا واد انت عادي يعني ما انت على طول بتاكل قلت اجرب المائدة اقعدوا بقى كده عقبال ما اروح اظبط الدنيا.
فطنطن راحت: واد يا حماصه عاملين أكل أيه.
- عاملين فراخ وبانيه ومكرونه يا خاله.
فطنطن: ليه بانيه هو كفايه حته الفرخه الناس صايمه اللي هتقعد تاكل ياكل حته صغيره ويشبع ملهوش لازمه البانيه يا حماصه.
حماصه: تصدقي عندك حق بدل ما الاكل يفيض ويترمى احنا نشيل طبق البانيه ده لبكره. فطنطن: عندك والله ما حد هيشيل الطبق ده الا انا احطه لك عندي التلاجه بتاعتي كبيره بتشيل الحاجات دي اوديها عندي في البيت.
- ريحي دماغك يا خاله.
فطنطن: ان شاء الله اعدمك أخذ الطبق واحط عندي في البيت.
حماصه: خاله المره اللي فاتت دبستني في حق الفراخ قلتي لي هطلع اشيلهم عندي وتعالى بكره خدهم ثاني يوم طلعت اخدهم ضربتيني وخرجتيني وعم احمد حلف لدفع حقهم عشان احرم بعد كده آمن ليكي.
فطنطن: يا لهوي عليك واد قلبك اسود .
حماصه: انت عارفه كام كيلو بانيه يا خاله دول 10 كيلو بانيه يعني ان شاء الله ادفع اللي انا اشتغل من هنا للسنه الجايه عشان اسد فلوسهم سيبي الطبق يا خاله.
فطنطن: واد انت مش مستأمني ده انا فطنطن الأمانات الخارجيه والداخليه مع مراعاه فرق التوقيت.
حماصه: بس يا خاله روحي اقعدي على الترابيزه دي واجيب لك الاكل لغايه عندك .
فطنطن: طب مش عاوز مساعده اساعدك احط للناس الاكل .
حماصه: لا شكرا اخر مره ساعدتيني عقبال ما خلصت لقيت الناس ما اكلوش وطلع الاكل طلعتيه على بيتك روحي يا خاله اصلا عم احمد لما شافك نازله قال لي اي حاجه خالتك فطنطن حتخربها او هتاخدها هتدفع فلوسها فارجوكي روحي اقعدي مش جزاتي اللي بعمل خير في رمضان.
فطنطن : ماشي ماشي يا حماصه انا زعلانه منك حسبي الله ونعم الوكيل فيك اللهم اني صائمه يلا اوعى بقي الحق ادعي عليك وقت المغربيه .
فطنطن سابته وراحت قعدت وبعد الاكل.
عم أحمد: عد المعالق وعد الأطباق اي حاجه ناقصه هتدفع فلوس.
حماصه: كله تمام ما عدا ناقص ثلاث اطباق وثلاث معالق وثلاث كوبايات.
عم احمد : ما ليش فيه شوف مين خدهم عشان بعد كده تركز.
حماصه: انا هتصرف.
حماصه طلع لفطنطن: خاله فطنطن في ثلاث كوبايات وثلاث معالق وثلاث اطباق مختفيين انت ما شفتهمش.
فطنطن: ان شاء الله اعدمك لو كنت شفتهم انت فاكرني ايه.
حماصه: الحاجه دي ما اختفتش الا النهارده لما انت ظهرتي على المائده لو مظهروش انا هدفع فلوسهم من جيبي وانا مش معايا مليم وعم احمد حالف يا ادفعهم يمشي.
فطنطن: لا امشي احسن عشان تحرم ما تدينيش البانيه شفت دعوتي استجابت ازاي وقت الفطار.
حماصة: يعني انت ما اخذتهمش يا خاله كده هتخليني الف على بيت بيت عشان اشوف مين اللي خدهم.
- لا ما اخذتهمش وما شفتهمش.
وهم بيتكلموا ممدوح: ماما ماما الثلاث معالق والثلاث اطباق والثلاث كوبايات دولا شكلهم حلو بس شبه اللي كانوا معانا على المائده هو انت خليتي الولد حماصه يشتريهم لك. حماصه: خالتي الحاجه اهي.
- انت قصدك على الحاجه دي انا بحسبك على حاجه ثانيه لا يا اخويا كنت قولت لي الحاجه اللي كنت بتاكلي فيها يا خاله فطنطن كنت قلت لك ان انا اخذتها اغسلها اه ما انا ستي نضيفه لازم انظف مكان ويا عيني عارفاك تعبان فقلت اريحك بقى منهم واغسلهم لك انا كنت الصبح حنزلهم لك.
حماصه: لا يا خاله شكرا لمجهودك الخارق ويا ريت ما اشوفكيش تاني ولا انت ولا حد من عندكم على مائده الرحمن عندنا جبرت على كده.
فطنطن: ايوه عليكوا واد قلبك اسود انا غلطانه قلت اريحك شويه عشان شايفه ايديك تعبانه يلا خد حاجتك وغور من هنا.
جري حماية ومشى فطنطن لممدوح: وانت يا روح امك عشان وعايتك ولسانك اللي مش بيتسد هتدفع حق الثلاث كوبايات والثلاث معالق والثلاث طبقه ممدوح وانا مالي فتنتن عشان بعد كده لما تشوف حاجه ما تفتحش بقك.
ممدوح: طب وانا ادفع ليه ما عندك بابا يدفع ما على قلبه فلوس قد كده .
فطين: اه يا قلبي انت مالك بابوك يلا هو انا اللي فتحت بقي ولا انت وانت يا ست نازله تسرقي الناس مش كفايه اللي هم ماكلينك.
فطنطن: تصدق كنت ناسياك انت كمان ايدك على حق الاكل اكل ملوكي اهو.
فطين: وانا ادفع حق الاكل ليه.
فطنطن: ما انا يعتبر وفرت لك بس انا هحسبك الطبق الواحد ب 50 جنيه يا بلاش اهو 150 جنيه شفت اه و حق خدمه وحق الطبق وحق المعلقه وحق الكوبايه ادي 300 جنيه ايدك على 300 جنيه.
فطين: ابعدي بعيد عن وشي يا فطنطن دلوقتي انت وابنك ما وراكمش غير وجع الدماغ وكل ما تشوفوني هات هات هات منك لله انت وهو في ساعه واحده.
فطنطن: يعني انا مش هعرف اطلع منك بفلوس عموما انا مش هفتح بقي رغم اللي انت شغال في شركه كبيره خالص وبتاخد مرتبي كبير خالص بس بخيل .
وهو واقف الشركه بتتصل بيه صاحبه: استاذ فطين اتحولت للتحقيق وفي قرار بخصم جزء من مرتبك نظره لوجود عجز في الخزينه.
فطين بص لفطنطن ويقول لها: روحي منك لله يا بعيده
الفصل الأخير
- فطين إيدك علشان اشتري هدوم العيد ايدك على الفلوس.
فطين: عاوزه كام يا فطنطن وخليك حنينه عشان انت عارفه دخلت عيد والدنيا والميزانيه والغلاء.
فطنطن: انا ست مدبره وموفره حشتري هدوم ليا ولما يفضل حاجه حشتري للواد ممدوح انت بقى خليك على العيد الكبير برده لازم تكون مدبرة.
- يعني انت عاوزه تاخذي الفلوس عشان تشتري هدوم العيد وما تجيبليش حاجه .
فطنطن: ما انا لازم اوفر ولازم كلنا نيجي علي بعض يعني أنا حشتري الطقم بنطلون وبلوزه وطرحه وبندانه وشوز وشنطه ومش هجيب شراب والواد ممدوح اجيب له تيشرت وبنطلون ومش هشتري له حزام اما انت بقى ممكن اجيب لك حزام او شراب وبعد العيد أبقي اشتري ليك.
فطين: انا مستحملك طول شهر رمضان فمجتش على كام يوم.
- ايدك على الفلوس وما ينقصوش مليم
- عاوزه كام 1000 جنيه حلوه.
فطنطن: ١٠٠٠ جنيه انا عاوزه 3 4 .
-3 4 جنيه.
- لا انت فاهم غلط 3000 او 4000 جنيه عشان ما تنساش لسه في كحك ومكسرات.
- انت عاوزه تقنعيني ان انت حتروحي تشتري حاجات ده انت السنه اللي فاتت خدتي مني الفلوس ورحت اشتريتي بخمسه جنيه لب وخمسه جنيه طوفي وقلت كل سنه وانتم طيبين.
فطنطن: ما انا قلت اوفر الحاجه غاليه .
- هو التوفير فاهمه غلط التوفير ده اللي انت بترجعي لي الفلوس مش تاخديها فكده انت ما وفرتليش حاجه.
فطنطن: ما انت من نبرك في الفلوس اهو ما بقاش ليها بركه ما بقاش لها قيمه وبقت مركبه جناحين.
فطين: خذي الفلوس وحلي عني مش ناقص دوشه احنا في ليله مفترجه .
فطنطن خدت الفلوس: خلاص يا اخويا انا حنزل اشتري حبه حاجات ولو اتاخرت على الفطار عندك مائده الرحمن انزل كل عليها.
- فطنطن امشي من وشي احسن لك.
راحت فطنطن عشان تشتري ودخلت محل الشوزات :انت يا عم عاوزه المقاس ده هاته لي.
الراجل: يا ستي استهدي بالله معايا ورق كثير.
- ما انا مستهديه بالله بقى خلص يا راجل انت هو انا هفضل جنبك طول النهار واد يا ممدوح رحت فين خليك جنبي يا ابني.
- انا الوحيد اللي شغال بطلع اجيب الحاجه من فوق واديها للناس علشان صحابي لسه ما جوش.
- طب خلاص يا اخويا صعبت عليا خلاص هساعدك نزلي الحاجه وانا اناولها للناس واللي يقيس يروح يدفع فلوسها على طول اللي مش عاجبه ارجعه لك.
الراجل: ماشي يا حاجه ربنا يكرمك ويراضيك .
- عادي اه عشان نخلص.
- في خدت الحاجه من الراجل وبقت تقف مين اللي عاوز الشوز الابيض مين اللي عاوز الشوز الاسود.
- الناس انا يا مدام عاوز الشوز ده القط وراحت حدفت الراجل بالشوز
- الراجل اللي عاوز الشوز الابيض جت في دماغي اتهدي بقى
- طب انا اعمل لك ايه يا ست انت مش عاجبك يا اخويا ما تشتريش يلا غور في داهيه.
- انت يا ست احدفي لي الجزمه بتاعتي اللي في ايديك عشان اقيسها .
- خدي يا حاج اهو.
- اه يا دماغي منك لله يا بعيده فتحت دماغك يومك اسود روح يلا نادي على عمتك من بره تجيلي.
سمعوا صوت واحدة بتقول: في ايه يا ناس يا لوكل مين فيكم جاي جنب امي.
- تعالي يا بنتي الست المتخلفه اللي فوق حدفت الجزمه فتحت راسي اه يا راسي شفت الدم.
امي يا لهوي راس امي بتنزل دم يا ناس لازم اعمل فيك محضر يا ست مش عارفه اشوفك.
فطنطن: ايه عامله غاغه ليه يا ست انت على الصبح كل ده عشان بساعد ده حتى الراجل ما رضاش يديني ابيض ولا اسود.
- تساعدي مش تفتحي دماغنا اوعي ياما وسعي كده
(اللحظة الموعودة) ايه ده فطنطن بتعملي ايه هنا
- حياه أنت بتعملي ايه.
- -جايه اشتري شوز للولا مازن والبنت لوجي وجو ابني
امها: هي طلعت صاحبتك كنت لازم اعرف صحاب بنتي هتكون ايه يلا عاوزه الحق الدم اللي نزل ده .
فطنطن: حياه خدي طنط شربيها كوبايه عصير
حياه: مين يا عيني اللي حتشرب كوبايه عصير ليه وانا مالي يا اختي انت اللي فاتحه دماغها وهاتي لها فرخه بالمره.
فطنطن: فرخه مين يا حاجه اقول لك في مائده رحمن تحت البيت عندي هاتي الحاجه وتعالي كلي فيها .
حياه : بتقولي ايه مين حياكل على مائده رحمن ليه هو انا اعلمك لما تيجي تطبقي تطبقي عليا .
فطنطن: اخص عليكي يا حياه أنت عايزاني اكون مبذرة أنا حروح اجيب لي طنط كوبايه عصير قصب ب 5 جنيه ازيد من كده مش دفع .
حياه: لا يا غاليه كرمشي لها 100 جنيه وانا عارفه امي هتسكت.
فطنطن: يا لهوي 100 جنيه انت عاوزه تموتيني.
حياة: فطنطن ما تلعبوش عليا ده انا استاذه ورئيس قسم كفاية أن ربنا هدانا طول شهر رمضان
فطنطن: بصي بقى هتمشي من هنا وتاخدي امك معاكي ولا حديكي اسود ولا ابيض والا حدفعك فلوس الشوز اللي عجبني دلوقتي.
حياه: لا يا غاليه سيبي الطلعه دي عليا اه انا علمتك يا غاليه بس انا برده الاستاذه.
حياة مسكت فطنطن وضربتها بالراس.
ام حياه : سيبيني عليها اجيب لك اجلها.
الناس اتلموا وطلعوا بيهم علي القسم.
الظابط: يا اختي حياه تاني اعمل فيك ايه يا ستي انت هو انا مهما اروح في حته الاقيك في وشي والمره دي جايبه لي ايه.
فطنطن: الحقني يا حضره الظابط الوليه المفتريه دي فتحت دماغي وانا ست غلبانه خليها تديني 100 جنيه وانا مش هتكلم واتنازل عن المحضر وكفي المؤمنين شر القتال.
الظابط: نعم حضرتك انت جايه هنا تطلبي تعويض.
فطنطن: ما انا في حمى الحكومه مش هتقدر تيجي حياة جنبي بالذات هي وامها المفتريه .
حياه؛ انا مفتريه يعني اعلمك تسبقيني يا معفنه والله ما انا سيباكي.
الظابط : بس انتوا الاثنين انت يا ست أسمك ايه.
- حياة.
- لا مش انت قصدي التانية.
- فطنطن عزوز.
- الظابط: خير.
- فطنطن ده اسمي يا حضره الظابط انا المهم عندي تجيب لي فلوس منها مش مهم تكتب ايه في الورقه اللي معاك دي تبقى تديني القلم ده عشان شكله لسه اول فاتحه له.
- الضابط: مدام فطنطن هو انت قريبت مدام حياه .
- صديقتها الصدوقه.
- الظابط : أنت يا حضرت الصول اتصل بفؤاد جوزاستاذه حياه وخد نمره جوز استاذه فطنطن وخليهم يجوا يستلموا مراتاتهم مش ناقص خوته احنا داخلين على عيد والاثنين دوله مش هيجيبوها البر.
فؤاد وفطين اتقابلوا عند الباب فطين: استاذ فؤاد هو انت جاي انت كمان .
فؤاد: استر يا رب جاي ليه اوعى تقول لي مراتك فطنطن. هز راسه وقال له نعم ايوه جوه .
فؤاد: استر يا رب تجيب العوائب سليمه حياه وفطنطن يا لهوي.
الظابط: خد الجوز دوله كل واحد يمدي استلام لمراته يا ريت تغوروا من هنا مش عاوز اشوف وشكم .
فطنطن: يعني حضرتك مش هتديني العيديه بتاعتي.
حياه: ما كنتش اعرف ان انت بخيل.
الظابط : هو انتم جايين هنا تاخدوا عيديه ولا جايين في ايه بالظبط هو انا اخلص منكم انتم الجوز ازاي وانت يا ست حياه هو انا كنت قادره عليك عشان تجيبي لي صديقتك الصدوقه.
حياه: يا فطنطن سيبيكي من حضره الظابط كارمشي لامي 100 جنيه وهي تسكت وانت يا فؤاد ادي فطنطن 200 جنيه.
فؤاد: طب ما انا ادي لامك ال 100 جنيه وكفى المؤمنين شر القتال يا ست حياه ولا لازم اتغرم في ام القاعده دي انت مش نازله تجيبي حاجه لابن اخوك خلاص يبقى اخوك يدفع فرق الفلوس.
ام حياه : روح منك لله يا فؤاد هو ابني معاه فلوس انت على قلبك فلوس قد كده .
فؤاد: تصدقي حياه انت مش بيجي من وراك الهم.
حياه : خلاص بقى يا فؤاد اعتبرها الزكاة.
فطنطن: بدل جوزك هيطلع زكاة يا حياه ما تنسيش انا طبرضه انت ضربتيني وكلمتيني باسلوب مش حلو عاوزه تعويض نلم العيديه من دلوقتي.
الظابط : لو غمضت عيني وفتحتها ولقتكم قدامي والله لدخلكم كلكم الحبس واه الناس ترتاح منكم استاذ فطين واستاذ فؤاد يا ريت تاخدوا البلوتين دولا من هنا عشان انا مش ناقص انا جالي ضغط وسكر من مدام حياه.
فطنطن: عقبال القلب يا خويا.
الضابط: بره.
كل واحد خد مراته و خرج بيها .
فطنطن: خالتي هي انا ممكن اجي افطر عندكم النهارده .
حياه: لا يا غالي روحي خليكي على مائدة الرحمن اللي انت متعوده عليها عشان عامله الاكل على قدي عاوزه تيجي هاتي 300 جنيه وانا اعمل لك اكل أو ممكن اخصمها من الجمعيه اللي جوزك داخل فيها مع جوزي.
فطين: مدام حياه يا ريت ملكيش دعوة بالجمعيه دي.
فطنطن: عامل جمعيه خلاص يا حياه شوف دور جوزي امتى وقولي لي اجي اقبضها.
فطين: والله العظيم يا فؤاد يا مراتك عطت مراتي الجمعية مادافع فيها مليم.
فؤاد: حياه ملكيش دعوه بالجمعيه بتاعه الراجل.
فطنطن: اه يا حياه ملكيش فيه انا اللي ليا فيه سيبه لي لما يروح البيت يحلها ربنا.
فطين يبص لحياه ولفؤاد ويقول لهم: حسبي الله ونعم الوكيل فيكم منه له.
فطنطن يلا كل سنه وانتم طيبين وها سوف ابدأ خناقة العيد.
مع السلامة استنوني رمضان القادم بأذن الله وسوف تستلم حياة الراية مني مرة أخري.
تمت
الروايات الأكثر قراءه 👇👇
🌹🌺🌹🌺🌹🌺🌹🌺🌹🌺🌹🌺🌹🌺
🌹🌺🌹🌺🌹🌺🌹🌺🌹🌺🌹🌺🌹🌺
حماتي عاوزه تجاوز
تزوجت زوجي وليس في الوجود مثله
تعليقات
إرسال تعليق