رواية لهيب عشقه أحرقني بقلم إدمان سيما Sima jarisse 🥀 H حصريه وجديده
 |
رواية لهيب عشقه أحرقني بقلم إدمان سيما Sima jarisse 🥀 H حصريه وجديده
عندما يكون لقاء الصدفة بداية للعلاقات 🍷
.. عندما يجتمع شخصان في شخص واحد 🥀
عندما يعشق السايكو بجنون تبدا متعة الروايات ... 🍷
عندما عشق السايكو .. أحرقها بنار عشقه ..
يقولون أن العاشق دائما ما يقع في المحظور .. فالعشق حب والعشق جنون وأنا اليوم بك مجنون ... 🍷
( Aşkının ateşi beni yaktı)
جنون سايكو 🍂
اسمعيني مليح يا فتيحة وديري في بالك حنا تفاهمنا من بكري وراجلك مخلصش الدين تاعو انا نسحق كاميليا لإلياس قاتلها ماما بسيف الطفلة مخطوبة والناس علابلهم ونتوما هذو السنين ما بنتو وضك رجعتو قاتلها خدمة ولادي وراجلي رجعت هنا وانا وين يكونو نتبعهم وضك رجعنا وبنتك تتزوج مع وليدي غصب عليها واذا حبيتي رجعيلي دراهمي مشي مشكل بصح وشنو مشي كاش نسحق حاجة وخزرت للدار قاتلها هذي الدار لي ننسف عليها طيح نسحقها مالا وشوفي وين تروحي بولادك طرطقت عيني نشوف فيها نطقت بنتها قاتلها ماماا هيااا صاي داتها وهي تمشي تقول ملكة هذيك اللبسة وهذيك اللفة تاع الخمار ولا الريحة تاعها قعدت نشوف منيش فاهمة الحكاية ونستنى ماما تفسر وتبرر بسك راني مشوكية ومخي مش قادر يستوعب .. شكون هذو الناس .. ووشكون هذي المرا بذات ؟؟؟ ... أسمي إكرام فيروز الاسم لي سماني بيه بابا الله يرحمو واكثر الناس يعيطولي فيروز طبعا هو اسم راقي وشباب عمري 21 سنة عايشة مع ماما وثلاثة خاوتي ومرت بابا نورة كاين خاوتي عائشة هي الكبيرة متزوجة بوليد خالتي منبعد كامليا عمرها 26 سنة باه انا وورايا خويا الصغير سامي عمرو 10 .. حنا اصلنا تركي يعني بابا من تركيا وكاين عايش بضبط في اسطنبول مع باباه ويماه وخوه الكبير برك لي خرج من الدار لسبة من الاسباب ومعاودش رجع ثما جدودي حزنو عليه وشاءت الاقدار انو يموتو في نفس الشهر خلاو بابا وحداني ومن كثرة صاي تعب على فراقهم باع كلش و راح عاش في لبنان عامين وتنقل هنا ستقر بدات حكايتو مع ماما كي تعرف عليها وقت راحت تشري في الحانوت وهو حاكم بلاصة صاحبو تبعها وخطبها بعد فترة قليلة تزوجو لانو جدي قالك باين فيه ناس مليح ويتيم بصح المشكل انو ماما تزوجت بسيف عليها مع بابا لانو هي حبت واحد وتواعدو يتزوجو و يماه محبتش تخطبهالو وقاتلو مشي من عرشنا وفعلا الولاية لي نسكنو فيها تاع عروش بإمتياز وجدي بابات ماما من عرش خلاف كامل تزوجت بيه ورضات بمكتوبها مي بقى عقلها وقلبها معلق بلمعشوق وجامي لا نساتو فاتو ليام ناس زادت وناس ماتت وماما جابتنا ورا بعضنا بابا كان فرحان بينا خاصة انو هو يحب لبنات وسمى اختي عائشة الكبيرة على يماه وكان يفضلها بسك تفكرو فيها تمنى انو يجيه طفل كي ماما هزت بيا بصح مكتوب ربي وجيت انا سماني فيروز وماما تهاوشت معاه قاتلو اسم تاع كبار قالها لاباس بيه ( ملاحظة بابا مع الوقت تعلم اللهجة تاعنا عادي ) انا بابا ملي زدت تعلقت بيه مالغري يحب عائشة اكثر منا و يعجبني الحال كي يحكي معايا ولهجتو مكسرة شوي فاتو عامين وهو تحرق على لولاد حاب طفل وماما مزادتش جابت قالها نتزوج نجيب طفل نسميه على بابا ويونسني ويكون سندي بطبعهم الرجال ديما يديرو العيب في المرا وزيد مرت خالي ولات داصرو كي يروح لدار جدة وتقولو عندي ختي وكذا والشرع محلل ربعة و فتيحة جابتلك لبنات قرر بابا يتزوج قالك مدام قادر نعيشهم عادي ومن كثرة جدي عقلية بكري قالو ايه اذا ربي محلل حنا علاه نحرمو وتزوج بابا وجاب هذي مرتو نورة ديما نسمعو وندو نظرة انو مرت الاب هي الواعرة مي نحكي الصح مرت بابا مكانتش واعرة انسانة حنينة وقلبها ابيض تعاملنا خيرمن ماما لي كانت تكرهنا ولا نقول تكرهني انا وعلاش ؟؟ على خاطر كانت حابة طفل وجيت انا وحتى خياتي جامي تعاملهم مليح كرهتنا فيها رجعنا نعيطو لمرت بابا ماما القلب برد والتعامل هذا خلانا نخافوها كي تسمعنا حكينا هكاك تحكمنا بسوط تضرب حتى تشبع ومرت بابا تسلكنا وتبكي علينا كبرنا وكبرو همومنا وماما نورة هزت الحمل بابا فرح ولا يصلي صباح وعشية باه يجيه طفل وفعلا جاه طفل خونا مصطفى دار وعدة وذبح خمس كباش كنت صغيرة ومنعرفش مي نسمع في ماما تقول منين جاب الخير زدنا وراها تنقلنا لدار خلاف كانت كبيرة وواسعة فرحت ومش عارفة بلي هذا الشي وهذا الخير وهذي السعادة لي نعيشها ضك يجي نهار ويدور عليا .... فاتو ليام نفس الشي ووصل عمري 12 سنة كنت تلميذة ممتازة بزااف وعلاماتي ملاح مام ختي كاميليا اما عائشة كي مجابتش الباك حبست وقعدت في الدار تتعلم الخياطة مالغري بابا قالها وحاولها شدت رايها ما تكمل قالها لي تريحك .. وحد النهار كنا قاعدين في ليل على الطابلة نستناو بابا يجي جعت وليت نقولهم حطونا وماما نورة تقولي ماما اصبري ضك تاكلي نطقت ماما ملهيه قاتلي تاكلي الرهج راكي في عام الشر سكت نخافها مزدت كلمة ساعة زوج ثلاثة مكانش خبر بصح خبر خالي لي جا وخلانا نتشوكاو انو بابا عفساتو الماشينة تاع الحصاد كي كان يخدم ثما طاح علينا كي الصاعقة ماما تغاشات ومرتو نورة صاي معادش فيها عشت معنى اليتم ومعنى تعيش يتيم .. كي جابوه في الصندوق وجهو منور كنت صغيرة منعرفش بستو ودمعتي طاحت عليه كانت اخر كلمة شفيت عليها هي كي ماما قالت راح وحصلني في ولادو .. فقت من تخمامي على صوت رانيا درت ليها قاتلي وشبيك فيروز غايسة برا قتلها ههه راحت طل قاتلي اممم الطبيب حليم ياااك راهم كامل يحكيو ويقولو عليكم تحبو بعض قتلها مكانش منها تعرفيني جيت شهرين نحبو وزيد تعرفي السطاج تاعي مزالو 4 اشهر ويخلاص قاتلي وبلاك كاين مكتوب ضحكت عليها وكملت نشوف لتحت فيه وهو واقف مداير يديه في جيبو ويهدر مع الطبيب لوخر .. كي جبت الباك تاعي محبيتش نروح نقرا في الجامعة قعدت عوام وانا هكاك نتعلم في الماشينة تاع عائشة تزوجت وخلاتها عندنا منبعد قررت اني ندير فورماسيو لقيت هذي تاع مساعد ممرض قلت نسيي زهري وكان مولا الفورماسيو يعرف جارنا مخلصش عليا عطاوني ورقة باه نروح ندير سطاج في السبيطار 6 شهر ثما تعرفت على حليم انسان شباب عمرو 38 سنة يخدم جيهة ليزرجونس والناس يحبوه كامل تلاقينا صدفة كي خرجت نتغدا تعرفنا وولينا كل يوم نحكيو نكذب اذا نقول مطحتش فيه وحتى هو نحس بنظراتو ليا مش نورمال كان يساعفني لانو شوي في سطاج يبخلو بلمعلومات وهو يعاوني ويخليني نحط يدي باه نتعلم وصح تعلمت بزاف صوالح قد ما نشكرو جامي نوفي ... قتلها رانيا هيا نروحو نفطرو قاتلي عندي حق وحدة سوفلي مع قرعة جي قتلها امشي برك قاتلي اوو نحيت الطابلية تاعي وخرجت للدوش هازة صاكي دخلت نريقل في خماري انا كنت نعصب شعري كيما يقولو (تريبو ولا تيغبو ) .. وكنت ندير منقوشات معاه بابا عطاهملي من الصغر هو في الحق مدهم لعائشة قالها تاع يما كي محبتش تديهم درتهم انا وعجبوني بقاو ذكرى منو وجامي لا نحيتهم .. جمالي كان مليح وربي عاطيني الزين ملامحي هادئة خاصة انو سمرا وعينيا مخلطين بين الاخضر والبني مجبودين كيما الشناوة تقاسيم وجهي مفصلة خدودي طالعين ونيفي مقدود حواجبي كثاف بصح ملاح شعري طويل حتى لمسلاني من بكري نديرلو القردون طوال وكثاف رقبتي طويلة وفيها خانة صغيرة تاتيري الطول تاعي 1.62 وكنت شوي معمرة اللبسة تجيني شابة كان حلمي نرجع رقيقة كيما رانيا عندها لطاي مانكا وهي تقولي انا مقدرتش نسمان راني حابة نرجع كيما نتي معمرة قتلها يا بنتي عندي الكرش وشمن طاي قاتلي رجال هذا الوقت يحبو هذا الشي قتلها اعع منيتك ديجا انا كارهة روحي لبست المونطو كنا في زمان الشتا والمنطقة لي نسكن فيها باردة بزااف دفيت روحي بشال صوف من الفوق هزيت غوجلافغ غوز بااارد منحبش المكياج حتى كي نخرج ندير ايلانير وغوجلافغ ميبانش خرجنا نمشو انا ورانيا وهي تضحك تعجبني عقليتها لانو تعرفنا هنا هي تخدم في لارسيبسيو ( الاستقبال ) وتقولي كون جيت فرميلة نعاونك بزااف .. وصلنا للباب نشوف في حليم داخل يمسد في يديه من البرد نيفو احمر عينيه الزرق يخلوني نروح لعالم اخر عالم الاميرات زيرت على صاكي قالنا وين لبنات قتلو نفطرو قالنا خلي انا نشريلكم واش خصكم ولينا حمورا خاصة معندناش دراهم كبار قتلو لاا اصلا مروحين للحانوت تاع القش قالي اا اوكي مالا براحتكم وتبسم حللي الطريق روحت قاتلي رانيا ويااا قريب تبهدلنا قتلها اسكتي برك قلبي راح يخرج تغدينا ورجعنا كي العادة حتى للعشية باه جيت خارجة ورانيا سبقتني خوها فات يديها بقيت تقريبا انا اللخرة كي لبست ووصلت للباب نشوفهم الحالة مخلطة لتحت لابوليس ..البياري خلعني شكلهم مكنتش منقبل نعرف شكلهم كي الاسم مكتوب واحد فيهم زربت هبطت تلاقيت مع فرميلة موالفة تخدم هنا ودير الزكارة فيا قاتلي ازربي ادخلي روحي راهم زوج العروق تاعهم مقطعين قتلها وااش قاتلي ازربي راهم محابسيا يالله عاونيهم ضك نجي عندي خرجة بلخف بابا يستنى فيا وراتلي صاشي تمدهالو ولا معرف طرت داخلة مالغري سطاج برك بصح متعلمة شفت حليم خارج يلبس في ليgو تاعو شافني قالي فيروز واش ديري هنا مرحتيش ؟؟ قتلو نعاونك في حاجة ؟ قالي لاا روحي قتلو خلي نعاونك ولله وزيد انا اول مرة نسيي تنهد قالي تبعيني مشيت وراه نحي في المونطو تاعي دخلت قابلوني زوج بياري ثما بلعت ريقي يا يما قداه طولهم كنا غير انا وحليم وهو يعيط وييينهم هذوك قتلو سندس هذا وين شفتها خرجت دكتور ستغفر قالي فيروز كي يكون عرق مقطع واش نديرو بقيت نشوف فيه عيط اهدريييي قتلو نبداو نحبسو الدم قالي اجري نسيت هذوك لي ثما حسيت بواحد ورايا درت بلخف خلعني قفزت مبعدة نطق بصوتو خشين كان مبحاح قالي كملي خدمتك يالله وجبد كرسي قعد وحط رجلو على الكرسي لوخر هاز السلاح بين يديه قعدت غايسة فيه وجهو مغطي غير عينيه كحولا مخلطين مع الاحمر يبان مغشش رتبت روحي والراجل يتوجع بين يديا معرفتش واش ندير في هذيك الدقيقة نسيت واش تعلمت كامل حتى خبط هذاك الكرسي قالي عاااااااام نحالي الخيط ولبرا من يدي قتلو اصبرر وشبيك جا حليم قالو يا الشاف اصبر طبعو لور تخنزر فيه قالي نوريلك كيفاه تكون الخدمة قتلو تعيش اصبر عينيا دمعو راه يحتاج المخدر مزال مدرتلو مهدرش معايا وحكم يدي المريض يخيط فيها لا رحمة لا شفقة صاحبو رجع يهدي فيه ويقولو اصبر يا الشاف تخنزر فيه رجع لور وانا نرجف معندوش رحمة يا ربي شفت زوج طبة دخلو هداو الحالة خزر فيا قدم عندي رجعت لور وحليم حكم يدي قالي روحي هذاك غمض عينو وطرطق رقبتو قالو مزلت تدخل ؟ خزر فيا قالي بدلي وجهك عليا يالله جيت نردلو منبعد. خفت هزيت المونطو والصاك وخرجت خليتهم واش حاسبة روحي انا غير سطاجيار ندخل لحالات كيما هذو لقيت حليم طالقلي على هذا دخلت روحت توال لاري نستنى في البيس كي وصلت ركبت وروحت للدار .. طبطبت قداه من مرة باه حلتلي ماما تخنزرت فيا قاتلي هذا وين تجي ؟ قتلها الله غالب نحيب صباطي توال الباب ودخلت قابلتني مرت بابا في الكوزينة دير العشا قتلها ماماا جعت قاتلي ايه كاين العيش سخون درتو على جالك علابلي تحبيه قتلها اييييه ولله صح مشيت للشمبرة قابلتني كامي تحكي مع خطيبها عندها عامين ملي تخطبت صراحة هذيك خطيبها نكرهو هو وليد حومتنا انسان سوكارجي خطبها وقعدو كي نقولها وقتاه تتزوجي تقولي كي يدير اسامة تاويل قتلها رانا نستناو اسامة وقتاه يدير التاويل نحيت قشي بقيت بلفيزو والبيستي طلقت شعري هزيت تلفون نتصور قاتلي فقمة درت ليها قتلها بلعيييي قاتلي تضلي تاكل ها شخشوخة هي عيش ها الكسرة كرشك خرجت قتلها بصح عندي المتريال كون تشوفي واش صرا اليوم قاتلي واش حكيتلها قاتلي سيريو كون ضربك ونتي هذاك وقت تنساي فيه قتلها كون تشوفي كيفاه قعد توالي هاز السلاح تاعو يدور فيه على يدو ورجليه فوق الكرسي لوخر وعينيه حمر قاتلي يا لطيف الطف قتلها ولله كيما نحكيلك قاتلي نتي اتعلمي مشي تنساي فيروز قتلها الخلعة برك لبست بيجامتي قتلها عائشة مشي تجي اليوم قاتلي لا حتى للخميس ... فاتو يومين نفس الروتين نروح ونجي للدار اليوم الخميس وصلت العشية خرجت مع رانيا قاطعلي حليم قالي فيرووزة ضحكت قتلو صفاا قالي لباس معليش نحكيو خمس دقايق قتلو اوكي نغزتني رانيا قاتلي روحي روحت نمشي معاه ونشوف لور فيها ديرلي باي باي وصلنا للجاردا تاع سبيطار قعدنا واقفين المطر والكراسا تشمخو قالي فيروز حبيت نحكي معاك برك قتلو وي نهدر ونزير على يديا حسيت ومحسيتش واش حاب يحكي قالي انتي عندك واحد في حياتك الخطبة مكيش بصح يعني حبيب ولا حاجة هكا هزيت راسي قتلو لا معنديش تبسم معايا قالي انا من نهار جيتي اول مرة صراحة عجبتيني ونويت الحلال ديركت سقسيت عليك وقالولي باباك ميت الوغ عرفت بلي عندك خالك وقلت نحكي معاك اذا نتي راكي موافقة رخفت حواجبي منيش مأمنة هو حاب يخطبني قتلو شوف دكتور انا معنديش الهدرة ضك نخمم ونصلي الاستخارة منبعد ساهل قالي وي من حقك ووقت ما رتحتي خبريني برك تبسمت معاه غارقة في عينيه قالي تفضلي مشيت وهو ورايا كنت نضحك في سري لقيت رانيا تستنى فيا هو راح وانا عيطت وحضنتها الغاشي رجع يخزر فيا قاتلي وشبيييك قتلها خطبني خطبني هو حااابني شرعت عينيها قاتلي صححح قتلها ولله عاودت حضنتني ولينا نقزو وحدنا روحنا لاري نضحكو هي حكمت البيس تاعها وانا تاعي .. وصلت للدار كي العادة مي سمعت عياط وشنو هذا ؟؟ دخلت طول الباب كان محلول نشوف في مرا عاطيتني بظهرها لابسة سروال كلاسيك مع فاست تاع ريش مدايرة خمار تركي ساتا هازة صاك ولابسة دومي بوت تهدر وتعيط وتقولها دبري راسك قلت واااش كاين دارو ليا في زوج جات مرت بابا جبدتني من يدي خباتني وراها نطقت المرا قاتلها ووشكون هذي الشابة نطقت ماما قاتلها هذي راهي صغيرة هزت المرا حاجبها شفت بنت خرجت من شمبرتي قاتلها هذيك المرا اسمعيني مليح يا فتيحة وديري في بالك حنا تفاهمنا من بكري وراجلك مخلصش الدين تاعو انا نسحق كاميليا لإلياس قاتلها ماما بسيف الطفلة مخطوبة والناس علابلهم ونتوما هذو السنين ما بنتو وضك رجعتو قاتلها خدمة ولادي رجعت هنا وانا وين يكونو نتبعهم وضك رجعنا وبنتك تتزوج مع وليدي غصب عليها واذا حبيتي رجعيلي دراهمي مشي مشكل بصح وشنو مشي كاش نسحق حاجة وخزرت للدار قاتلها هذي الدار لي ننسف عليها طيح نسحقها مالا وشوفي وين تروحي بولادك طرطقت عيني نشوف فيها نطقت بنتها قاتلها ماماا هيااا صاي.... كي خرجو خلاوني مصدومة وماما راحت تخبط في صدرها وقاتلها تحوس تزوجها باه تعذبها وهي مخطوبة قتلها ماما شكون هذو عيطت عليا طيرييي من وجهي يا الكلبة طيري قتلها حبيييت نفهم اسمعيني هنا انا نسكت بسك نحترمك فهمينا خرجت ليها كاميليا قاتلها انا نتزوج وليدها منعرفو شكون هو ولا يعرفني الله يلعنها تشبه للسحارة قتلها شكون هذو قاتلي اسمعي يا ختي هذي المرا قالك تعرفنا وبابا تسلف من عند راجلها بكري دراهم وضك حوسو يرجعوهم بصح نتزوج انا بوليدها قتلها وشنو هذا التخلاط ونتي واش دخلك قاتلي شفتي نطقت ماما طيروووو من وجهي مدام مراكمش فاهمين طيرو روحنا خبطنا الباب قاتلي وليدها على حساب الشوفة هو الكبير اسمو إلياس هذا ما عرفت عليه قتلها الله يلعنو من بين لجناس قاتلي متزوج وعندو طفل بصح مفهمت لا مرتو ماتت ولا طلقها قتلها زيد عندو طفل قاتلي شفتي كارثة قتلها بصح علاه كانت تعيط والطفلة هذيك شكون قاتلي ختو وبقات تهدن فيا كي وليت نعيط يماها حاسبة روحها قتلها اوااه هذو منين خرجونا قاتلي مكانوش يسكنو هنا باين تنهدت قتلها نشاله تفوت بلا مشاكل ويروحو يخطونا قاتلي نشاله لحق الليل وجات عائشة ختي كل خميس تجي تلمينا على الطابلة من غير ماما حسيت بلي هي مش مرتاحة نضت ديت طبسي فرغت اللوبيا والخبز حطيت الما والدوا تاعها وروحت طبطبت عليها قتلها ماما راكي نايضة لقيتها تصلي حطيت البلاطو حتى خلصت نطقت قاتلي اديه قتلها بصح وشبيك شوفي وجهك اصفر ناضت طوات الصلاية قتلها يالله كولي على الاقل تشربي دواك يطلعلك السكر ستغفرت وهزت تاكل بشوي عمرها ما كانت حنينة علينا بصح البنت كيما يقولو تحن تحن قتلها شكون هذيك المرا قاتلي متحوسيش تفهمي قتلها بصح قاتلي نوضي متحوسيش تفهمي قتلك نضت وخليتها دخلت للكوزينة نطقت عائشة وفمها معمر بلماكلة قاتلي ارواحي تاكلي ولادي قريب يكملو حقك قتلها معنديش شهية وروحت للشمبرة نخمم زعما شكون هذيك المرا ووشكون إلياس وبابا علاه تسلف دراهم ؟ أسئلة بزاف جاو في راسي ملقيتش ليهم جواب ... فاتو هذوك اليومين وانا نخمم في زوج مواضيع تاع المرا لي جات وتاع حليم قررت اني نقبل منبعد يجي يهدر مع خالي لي بدورو يقنع ماما هي مستحيل تحب ضك تقولي مزالك صغيرة وديما كي نهدر على زواج تعيط عليا تقولي عائشة تزوجت عمرها 27 وختك تخطبت 24 ونتي تنساي هذا السوجي كي تلحقي 25 سنة ثما تزوجي ولا ندبي بصح عقلي كان يخمم غير في حليم انسان متربي وقاري وفاهم ومثقف وين راح نلقى كيفو صح كبير عليا بصح عجبني وميبانش وزيد العمر مشي مقياس العقلية هي الصح وانا عجبني بزاف ... مكذبوش لي قالو يحبو بعض انا حبيتو وهو ظهر يحبني يادرا كيفاه تكمل حكايتنا .. نهار الاحد نضت كي العادة لقيت خويا مصطفى يغسل باه يروح يقرا حسيت روحي متحمسة وفرحانة نرد لحليم بلخبر هزيت سروال جين عريض وتريكو ابيض صوف للرقبة مع المونطو تاعي درت منقوشاتي وخماري معصباتو كي العادة هزيت ايلاينر وغوجلافغ مارو شوي غيسل وهزيت صاكي نجري راني روطار ولات ماما تعيط وتسب تقولي هذا كامل من كثرة تضلي مقابلة المراية وتزوقي يا مو الزنق حكمت البيس وصلت ثما روطار شوي كي العادة نتعلم خلصت على 12 رانيا كرشها وجعتها بدات تتقيا جا ليها باباها وانا روحت باه نفطر تلاقيت مع حليم تبسمت قالي صباح الخير متلاقيناش مقبيل قتلو صباح النور صفا قالي لباس وين تروحي تفطري هزيت براسي قالي هيا مالا روحنا فطرنا شرالي من كل خير هذا طاكوس هذي بيتزا هذي كبدة قتلو بزاف قالي متزيديش تعاوديها ...فيروز واش رايك قتلو صراحة احمم قالي قابلة هزيتلو براسي ضحك قالي سيريو قتلو ولله قال الحمد لله يا ربي جبدلي باطة قدمهالي قالي شوفي عرفتها تاع خاتم قلبي ولا يرفرف لداخل حليتها نلقاه خاتم فضة بصح شباب قالي متقوليش جابلي هذا على جال مستخسر فيك هذا تاع العايلة وكل عروسة تجي تديه عندو عوااام قتلو صح قالي ايه وضك مديتولك حافظي عليه هزيتلو براسي عجبني الشكل تاعو جاي خشين شوي وفيه مربع اخضر من لداخل قالي رأيك قتلو يهبل لبستو في يدي جاني روعة بقيت نشوف برك قالي نشاله لعشية نحكي مع خالك قتلو تعيش قولو يقنع ماما برك هي مهيش حابنتي نتزوج قالي علاه ؟ قتلو كيما تعرف انا عمري 21 سنة برك وغير هذو الشهرين وين دخلتها وماما رافضة فكرة زواج الصغر قالي ساهل المهم حافظي على الخاتم قتلو اكيد .. فوتنا الوقت مع بعض منبعد روحت نكمل حتى للعشية خرجت كي العادة وصلت للدار مزالني مدايرة الخاتم قلت اذا سقساتني ماما نقول تاع صحبتي وصاي حتى حليم يهدر مع خالي طبطت كي العادة دخلت سمعت صوت الضياف عندنا فت للصالو بلعت ريقي كي شفتها نفس المرا مع عجوزة شوي كبيرة قاعدين مع ماما ومرت بابا وكاميليا بيناتهم ساكتة نطقت العجوزة وتبسمت معايا قاتلها شكون هذي البوبية تبمست ماما بسيف قاتلها بنتي الصغيرة فيروز هزتلي حاجبها روحي تاكلي بنتي المرا بقات تبع فيا بعينيها جات كامي ورايا دموعها على خدها حكمتلها وجها قتلها احكيلي واش صرا قاتلي قبلو وصاي انا نحب اسامة فيروز قتلها بصح كيفاه قبلت ماما يا ربي قاتلي رانا نسالوهم دراهم كبار معلابليش الحكاية كيفاه خلي يخرجو وتفهمنا ماما قعدت تبكي وتشهق وحاكمة فمها خافت لا يسمعوها شوي وجات ماما قاتلها نوضي تشوفي وشافت فيا حكمتني من الخمار قاتلي تروحي لشمبرتك منشوفش وجهك ويا ربي ونلمحك بلا خمار ويشوفو شعرك دات كاميليا بسيف عليها .. ماما من بكري عندها هيبة وضك كبرت ولات كثر نخافوها بزاف .. حرت علاه قاتلي هكا دخلت لشمبرتي نسمع فيهم مزالو يهدرو حتى المرا ولات تعيط قاتلها فتيييحة اسمعيني بنتك تمديها اللهم بارك متمديش رجعيلي درااااهمي سمعتيييي قاتلها ماما الحكاية فااات عليها وقت والدراهم راجلك هو لي سلف دراهم لراجلي وجامي لا هدر عليهم هذو لعوام والسنين وهو سمح فيهم وراجلي مات والصلاة على النبي كون عندي مين نرجعلك حقك بصح منين نجيبلك 700 مليون يا بنت الناس وزيد حكيم مهدرش ومجاش ليا فهمتي وشوفي سعيدة حكاية بكري والشي، لي، بيناتنا يبقى في بكري سمعت كل كلمة قاتلها ماما ردتلها سعيدة وحنا ضك تفاهمنا بنتك لوليدي وصاي فض الموضوع بدات ماما تعيط تقولها الطفلة مخطوووبة واش مكيش تفهمي فيا قاتلها المرا كون إلياس يجي راح يتزوجها بسيف عليها خلي النسا في النسا بلا ما ندخلو الرجال قاتلها ووليدك يتزوج وحدة مخطوبة مكتوبة على اسم راجل قاتلها المهم يا بنتك يا الدراهم ونتي خيري علات ماما صوتها ياوو مخطوووبة افهمي قاتلها مالا بنتك الصغيرة هذيك حكمت قلبي وشهقت ماما دقيقة صمت قاتلها اهدري نطقت كاميليا قاتلها ختي صغيرة وانا راح نتزوج صاي رجعت لور قعدت فوق السرير نرجف منيش فاهمة منين خرج علينا هذا الهم دخلت كاميليا تبكي وماما ولات تعيط هي وهذيك المرا منبعد قاتلها اخرجوووو من داري اخرجووو حضنت ختي مسكينة قتلها اششش اهداي راحت ماما خبطت الباب كي خرجو وولات تعيط دخلت علينا حكمت كاميليا من شعرها وتضرب فيها قاتلها يا بنت الكلب شكون قالك اهدرييي شكووون قالك اقبلي و ماما نورة تسلك فيها وانا مبعدة خايفة طلقتها وخرجت تدعي على روحها وتقول نشاله تموتو ونتهنى منكم يا الكلبات هو مات وخلالي همكم .. حضنت كاميليا لي تبكي وانا نبكي معاها قتلها ماما نورة واش قصة هذي المرا شكونها قاتلي بنت عم ماماك قتلها بصح علاه تحوس تزوج ختي لوليدها وزيد بابا علاه مدين من عندهم دراهم قاتلي متخمميش بزاف يا بنتي جات حضنتنا في زوج كنت ساكتة برك .. لحق الليل وكل واحد في شمبرة ماما مزادتش خرجت حتى العشا مدرناش سمعنا صوت الباب هزيت روحي باه نحل لقيتو خالي عينيا برقو مي طفاو بلخف كي تفكرت بلي ماما مزعفة وهو بلاك هدر معاه مراحش تقبل سلمت عليه قتلو اهلا خالو قالي بنتي لباس قتلو لباس قالي وينها ماماك قتلو في الشمبرة مامااااااا راه جاا خالو حلت الباب وخرجت ليه تسلم وتعاود قاتلو قطعتني ضربة وحدة قالها تعرفي الدنيا وهمومها قاتلو وهم اختك اكبر يا خويا قالها واش كاين سمعت بلي سعيدة رجعت قاتلو رجعت رجعت وحبت تدي كاميليا لوليدها الكبير قالها كيفاه هذا امشي احكيلي خزرت فيا قاتلي وجدي لخالك حاجة هزيتلها راسي وهوما دخلو للصالو ووراهم ماما نورة ما لقيت ما نحطلو غير حبات تشينة غسلتهم وديت الموس حطيت في بلاطو مع طرشونة ووصلت للباب نتسمع قاتلو بصح كاميليا مخطوبة قالها يحصراه وشمن مخطوبة نتي ثاني راجلها هذا عندو عامين ويادرا وقتاه قاتلو واش ندير ضك قالها كاميليا خالو انتي واش تقولي راكي مرا وتقرري وحدك قاتلو خالي هذو الناس جامي لا عرفتهم قالها باه نقولك هذي سعيدة تكون بنت عمنا وتزوجت بواحد مرفه في وقتها وراحو وعاودو ضك رجعو معلابليش شحال عندها لولاد بصح هي تحوس تخطبك لوليدها الكبير إلياس زاد هنا قبل ما تروح قاتلو بصح خايفة كشما يصرا كي منقبلش انا حابة اسامة وهدرت معاه قالي اذا حبيتي نزربو في الزواج نديرو عشا خفيف قالها انا نروح نهدر معاهم دخلت حطيت السنيوة قالي ارواحي خالو كبرتي ورجعو يخطبو فيك قاتلو ماما شكون هذا قالها ولله يا ختي اليوم جا ليا طبيب يخدم وين هي دير سطاج وقالي شفتها وسقسيت عليها وحبيت الحلال نطقت ماما ديركت لا قالها كيفاه لا هذا قاتلو محسن فيروز صغيرة والزواج مشي تاعها كي تكبر دبر راسها قالها السيد وليد فاميليا يبان قاتلو وشحال عمرو قالها 38 خبطت صدرها قاتلو اخلايا يا خويا وتقولي فيها نورمال نزوج بنتي لشيخ انا قالها طبيب ومتربي وشباب وطلب الحلال وين تلقاي هكا ؟ قاتلو لا يعني لا قالها وانا قابل وانتي اخبطي راسك تبسمت وقلبي راح يخرج من بلاصتو قاتلو خوياااا قالها فتيحة اغلقي السوجي يالله سكتت مزيرة على يديها من بكري تخافو خاصة هو الكبير قالي ونتي خالو واش رايك قتلو انا .. انا شفتو وعجبني قالي على بركة الله نردلو الخبر جا نايض خبيتو تشينة في الطرشونة ومديتلو قتلو اديها تبسم معايا وخرج وماما قاعدة برك روحت وراه غلقت الباب نسمعها عيطت فيييييييرووووووووز لحمي شوك قلبي حبس خرجت عندي قاتلي ارواحي هنا نسقسيك يا الكلبة تحوسي تتزوجي واحد كبير عليك ونتي خمارك مزال ما تعرفي تغسلييييه وتخلي فيه الرغوة اهدريييي قتلها انا ماما ولله عجبني انسان مليح وهو لي يعاوني في كلش ورالي بزاف صوالح في وقت لخرين بخلو عليا ويساعفني قاتلي روحي اتزوجي نشوفو انا منيش راااضية بصح نقولك حاجة ديريها في بالك تخرجي منا متزديش ترجعي لداري قتلها بصح قاتلي بلعي منسمعش حسك سكت وهي دخلت للشمبرة جات ماما نورة قاتلي ونتي تعرفيه هذا قتلها ايه شوفي واش جابلي وريتلها الخاتم قاتلي يهبل قتلها تاع عايلتهم وقالك كل ما تجي عروسة جديدة تلبسو قاتلي فيها خير روحنا لعند كاميليا لي قاعدة في الصالو وساكتة قتلها صاي ضك خالي يحكي معاه قاتلي ني خايفة قتلها قولي لاسامة يزرب في الزواج قاتلي ايه نهدر معاه .. فاتت هذيك الليلة وانا في فراشي نخزر للخاتم متبسمة مقدرتش نرقد من الفرحة وصل الفجر قلت نوض نصلي منيش ملتزمة مليح في صلاتي مرة نصلي ومرة نبطل ونقول ربي يعفو مستهترة بزاف في امور الدين عكس خياتي يلبسو حجابات وعائشة كي تزوجت دارلها وليد خالتي ستار .. صليت وقلت نرقد شوي منبعد نروح نخدم غير غفيت صونات الساعة تاع تلفون هزيت روحي طافية لبست وخرجت طول تاعبة عينيا يتغمضو وحدهم وصلت للسبيطار متلاقيتش رانيا ومام حليم مجاش حرت وشبيهم عيطتلها قاتلي بلي راني مريضة وخبرت المدير قتلها معليش ربي يشفيك كوبيت عليها كملت نهاري وانا مشغولة علاه مجاش زعما ؟؟ كشما قالو خالي ولا مهوش قابل الشيطان بدا يوسوسلي ستغفرت لالا حليم انسان مليح كملت خدمتي وروحت للدار محيرة حتى نميرو تاعو ومعنديش زعما نعيط نسقسي وشبيه وصلت روطار شوي طبطبت حلتلي عائشة نسمع في الهدرة الدار معمرة قتلها واش كاين قاتلي مصيبة يا ختي نحيت المونطو ودخلت لقيت جدي وجدة وخوالي في 3 نطق جدي جات عيشة راجل سلمت عليهم مستغربة مش موالفين يجيو غير ماما تروح ليهم سندت روحي على الباب نستنى درت يدي في جيب السروال منيش فاهمة كاميليا مقابلتني ملهيه تبكي قالها بنتي ارضاي بمكتوبك هذو ناس منقدروش عليهم وتعرفي جدك مشي في عمر تاع عراك ومشاكل وليدها الله يبارك عليه قاتلو ماما لالا تديها ليه باه تردلي كلش عيط عليها فتيييحة سكتت قالها منيش حابكم تخسرو داركم ولا يصراو المشاكل منين نجيبو 700 مليون اااه بدات تبكي كثر قالها اهدري قاتلو صاااااي قابلة صاااااي وخرجت تبكي خلاتني في حيرة قلت احكولي واش كاين نطق جدي قالي ختك راح تتزوج مع عبد المجيب إلياس وليد سعيدة حليت فمي نشوف فيه وكامل سكتو القرار الاخير متبدلش .... سمعنا صوت الباب وهي ولات طير وتبكي كثر قتلها اسكتييييي وشبيك يفسد مكياجك قاتلي خلي يفسد قتلها اشش روحت نطل مي مشفت والو الريدو مغطي الحالة جاو خوالي وختي عائشة ورانيا صحبتي تعرف دير المكياج كي خلصت راحت ..ماما كانت غير مقلقة هذاك النهار واسامة خطيبها كي سمع الحكاية قالها نتي خاينة فهماتو والو ديركت قالها نجي ندي القش تاعي وجا داه صح سمانة فاتت علينا حزن وإكتئاب كي لحق نهار الجمعة نسمع في الهدرة منبعد جات ماما نورة قاتلها ارواحي قاتلي فيروز ارواحي معايا قتلها لالالا قاتلي امشي تعيشي متخلينيش وحدي قتلها ماما شكون جاو قاتلي ولادها في ثلاثة وهي وعجوزتها وباباهم بلعت ريقي خايفة قاتلها جا هذاك الراجل لي يخطب قاتلها ايه معلابليش علاه قلبي وجعني شفت في المراية درت التيبغو تاعي كي العادة هزيت مكياج خفيف درتو خرجت هي ومرت بابا وانا وراهم علاما دخلو للصالو ضربتني ريحة بارفا ميزتها من بين كامل ليبارفا لي عطرو الصالو باين عليهم ناس كلاص بزاف ..ولات جداه تزغرت سلمت عليهم بصح انا لا قعدت توال جداتي نطقت سعيدة قاتلي ونتي يا الصغيرة متسلميش سكت عليها حاشمة من الرجال لي ثما بسك قالك عادي ولافامي تاعنا ماما كانت ساكتة ومدايرة الخمار وجها كحل وانا مزيرة على يديا باين الجو مكرهب مشي تاع خطبة وبلي الطفلة مشي قابلة نطقت الجدة قاتلو عبد المجيب شوف عروستك هزيت عيني لعريس الغفلة عقدت حواجبي عينيه مكانوش بعاد عليا وحتى هو يشوف فيا قالها امم كان طويل لابس سروال مع باسكات وفاست كوير جسمو الضخم خلاني نشبهو لهذاك البياري لي تلاقيتو في سبيطار هبطت راسي بلخف وهو مشي حاشم كامل فاقو بيه خاوتو زوج مدايرين قد الحيط يخوفو وحتى باباهم لحظات رعب نطقت ماما قاتلي روحي فيروز هزيت راسي لعندها واش تحكي توالهم قاتلي نوضي يالله قالها خالي فتيحة وتخنزر قاتلي منيش نحكي معاك ؟ نضت خارجة فت على هذاك إلياس والريحة نفسها ضربت فيا زيرت على يدي وكملت وصلت للباب حسيت بواحد حكمني من ذراعي درت نلقاه هو صدري ولا طالع هابط وخوالي ناضو وحتى باباه قالو عبد المجيب وشبيك هذا عينيه يدورو على وجهي نطق كلمات خلاوني نموت " نسحق هذي البنت اسعيدة " .....
🌹🌺🌹🌺🌹🌺🌹🌺🌹🌺🌹🌺🌹🌺🌹🌺🌹🌺
اتفضلوا حضراتكم كملوا معنا هنا 👇 ❤️ 👇
وكمان اروع الروايات هنا 👇
انضموا معنا على تليجرام ليصلكم اشعار بالروايات فور نزولها من هنااااااااا
🌹🌹🌹🌹🌹🌹🌹🌹🌹🌹🌹🌹🌹🌹🌹🌺🌺🌺🌺🌺🌺🌺🌺🌺🌺🌺🌺